الفصل 9
*روايات وقصص يمنيه 📚🖋️*
*روايه [#نزيف_القلب💔]*
#للكاتبة_ريشة_الطاووس
*بارت رقم [ 9 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
سبحان الذي له ملك السموات السبع ربنا ورب كل شيء ❤️🤍🖤
أمين بدون مايشوف احد حباً وطاعة: يابه بس صدقنا انه مش انا اللي شليتها
مطيع: لاتطلع روحي اطلع بدون اي نقاش
أمين طلع ورزع الباب وبكل قوته
خرج لبرع مشي مسافة بعيدة عن البيت شاف واحد وقف ويداعيه: يااخ
....: نعم
أمين: ممكن استخدم تلفونك اذا مافي مانع
....: اكيد تفضل
أمين: شكراً سجل رقم زكريا واتصل
زكريا يشوف للتلفون رقم غريب رد: الوو
أمين: حياك
زكريا: من أمين وينك يارجال
أمين: عد اقول لك انا وين امس بعد ماطلعت من المحل قلت اسير اغسل السيارة واصلحها قد كانت المكينة بدأت تخرب وصلت الصبح إلا وابي يتقارح فوقي ساع الطاسه حق البرع وطردنا من البيت انا بشارع الـــ.... ممكن تجي لاعندي
زكريا: اهاه طيب عد اجي لاعندك ولايهمك ونفهم ايش الذي حصل قد جاء لاعندي وكان غاثي نفس الشي سأل عنك وانت قد كنت خطيت
أمين: يلا مع السلامة نسيت تلفوني عند المكنيكي اللي بشارع الـ.. سير شله على طريقك
زكريا: طيب ولايهمك مع السلامة وسكر
أمين سكر الخط ويكلم صاحب التلفون: تفضل تلفونك تعبتك معي ومد يده وخرج لصاحب التلفون قيمة رصيد
....: ماهي هذه
أمين: ذي حق الرصيد ياغالي مشكور
....: ماهو بطل خبالة قال حق الرصيد والله ما اشل نص
أمين يكفتها ليد الرجل: شلها ولاتناقش قلبي فيه من الهم مايسده واذا ناقشت قلبي مايتحمل احتمال نقوم نتضارب
....: ههههه طيب بس والله عيب
أمين: لاعيب ولاشي الله معك وخطي
الرجال مع نفسه ماشاء الله والاخلاق عاده مؤمن بالله مع ان اللي مثله معدومين
زكريا: مروان أمين اتصل لي قال اجي له ابوه طرده من البيت عد اسير وانت انتبه
مروان: لاحول ولاقوة إلا بالله ماله هذا الله العالم من اللي اخذ الزلط هو أمين والا من
زكريا: اكيد أمين لان مفتاح الدرج 3 واحد معي انا وانت وواحد معه لا انا ولا انت ولا مروان شليناها كان من عيشلها اكيد هو المهم عد اسير ابسره وانت انتبه على الشغل
مروان: خيرة الله.. الله يعينكم
زكريا: الجميع وخطي
مروان اتجه ناحية المكينك ومبروك يخيط بالجهة الثانية
مبروك يمثل انو ماسمع: مالكم مابه
مروان: مدري أمين ماجري معه شل الزلط اللي في الدرج كلها وابوه زعل منه وطرده من البيت
مبروك بفرحة: هاه يستاهل اذا كان كذا
مروان: لا يستاهل ولا شي هو مدري مايشتيها يمكن ظروف طارئة جبرته يفعل هكذا
مبروك: هيا ناهي عادهم ماسددوا لنا حق هذا الشهر قال ظروف
مروان: عيسددوا هم وفيين وبعدا الشغل بارد امس جمعنا تسعة مليون واربع مية حق 4 شهور
مبروك مع نفسه تسعة مليون واربع مية عد اتزوج بها وعتغطي كل شي وزيادة رجع لوعيه: سابر
صفوان وصل صنعاء الساعة 10:00 ص اتصل لصاحبه يجي وجلس يلف شوارع صنعاء وصل صاحبه للمكان الذي قال انه فيه
صفوان شافه يمشي ويلفت يمين وشمال يدور عليه مشي لا جنبه ويصيح: وووو
خليل: *(ملاحظة خليل هو بن اخو هند)* التفت شاف صفون ومد يده يسلم عليه ويبوسه بخده
صفون يبادله السلام
خليل: اهلا وسهلا نورت صنعاء
صفوان: اهلين فيك هلت انوارك ياغالي
خليل: تعال الغداء عندي بالبيت
صفوان: طيب وراح مع خليل على سب يتغدى
.
.
في بيت مطيع
ندى تبكي وتلف على الغرفة وتحاول تتصل بأمين بس مايرد
إيمان تبكي بالجهة الثانية: هاه ياندى بيرن
ندى: ماشي يرن بس مايرضي يرد الله يسامحك يابه
مطيع جالس يشوف الاخبار على التلفزيون
سهام قربت منه ودموعها تنزل مسكت
كتفه بهدوء
مطيع مد يده لفوق يدها والتفت لها: تعالي اجلسي
سهام تحاول تخبي وجهها المبلل من كثر الدموع وباين فيه التعب والحزن
مطيع: مالش ياسهام زعلانة مني على سب أمين
سهام بصوت بكاء: مش زاعلة منك بس انت عاقبته بطريقة متسرعة ماسمعت حتى تبريره هو ابنك حرام تطرده كنت بالأول اتأكد لايكون واحد من الشغالين أمين مستحيل يشل شي مش حقه لو كان عيشل كان شل وسدد حق الارض مستحيل أمين ياخذها
مطيع: ياروحي انا متأكد انه امين اللي شل الزلط لان المفاتيح 3 واحد مع اثنين من العمال وواحد مع امين وواحد معي من نتهم فيهم مروان جمع الزلط مع أمين وسار يرقد وزكريا كان تاعب ماقدر يشتغل هههه برأيش من الذي شل الزلط وبعدا انا مافي معي غير ذولا الثلاثة وكلهم قالوا انو أمين آخر واحد خرج
سهام: قلبي يوجعني على ابني يامطيع الله يحفظك لاتكن قاسي عليه لذي الدرجة سير دور عليه وانفجرت بكاء
مطيع: اناا فدا قلبش لا تبكي دموعش غالية عليا هو عيسير عند اي واحد من اصحابه لا تخافي وبعدا انا حالف يمين معظم مااسير ادور عليه ولاعاد اكلمه على ميد يتعلم
سهام رفعت راسها بصدمة: ماهو عيد الذي قلت
مطيع: الذي سمعتيه
سهام: والله يامطيع ما اجلس لك تحت سقف اذا هذا كلامك وراحت تجمع ملابسها
مطيع يجري وراها: سهام سهام صلِ على النبي مالش الولد غلط وذا جزاته
سهام: والله ما اجلس الابِـ ابني والا اخرج اني وابني
مطيع: والله ماتطلعي لو على طيار روحي واخذ مفتاح الباب حق الشقة وغلق
ندى وإيمان يسمعين ويبكين
إيمان: يعني عننحرم منك يا امين والله اعلم لوين عتوصل مع امي وابي
ندى: ايمان لا تستسلمي خلينا نفكر ماعنفعل
إيمان تبكي: ماعنفعل الساعة 9.08 قولي هذا ليل لو دورنا عليه وين عندور وكم عنخطى الله العالم اي شارع اتوجه
ندى: الله كريم تعالي نشوف امي ونكلمها من ورا الباب
إيمان تشوف: عاد ابي جالس عند الباب خلينا نسمع
مطيع: ياسهام تعوذبي من الشيطان
سهام: افتح الباب والله اني عد اسير ما اجلس
مطيع بغضب: اسمعي الكلام اللي عد اقوله ولك الخيار تجلسي هانا وتسمعي كلامي والا تخرجي وورقة طلاقش تجي بعدش
إيمان صرخت: اباه ايش تقول تعوذب من الشيطان
سهام تحس بصدمة وحيطان الغرفه بدأت تدور تحس كلامه مثل الرصاصة على قلبها اعتلت صوت شهقاتها
مطيع: سمعتي يلا اختاري
ندى جرت لعنده وتمسك يده وتهزها: ابــــاه اني فدالك ارحم قلبي الموجوع لاتزيدني فوق الألم ألم
مطيع يسحب ندى لحضنه وبهمس: لاتخافي امش هي حياتي كلها ومستحيل اعيش بدونها ولو يوم وهي نفس الشي مستحيل نعيش بدون بعض
ندى بهمس: يعني ماهو؟
مطيع: يعني امش ماتتنازل عن قرارها الا بذا الشرط
ندى تقوم من حضن ابوها وبصوت مرتفع: لا يابه لاتخلنا نعيش مشتتين واتجهت ناحية الغرفة اماه الله يخليش لا تزعلي ابي وتتركينا
سهام ماتطلع ولا صوت تبكي بصمت وقلبها ينزف من كلام مطيع وتفكر كيف هي تحبه ولايمكن فكرت تبتعد عنه ومع نفسها معقول اني رخيصة عندك لذي الدرجه تقارن اسهل شي تقدر تفعله من شاني تقارن حبي لك بأبسط امر لا مستحيل اسكت لك
ندى: مامه افتحي
إيمان مستغربه ومع نفسها كيف كانت معصبة من ابي وذلحينه مالها هدأت
سهام بصوت مخنوق: سيري يمه ارقدي انتي واختش
ندى: ماعه ماعنسير إلا لوما تفتحي ونبسرش
وبعد دقايق فتحت سهام وهي لابسة للعباية والبرقع
ندى نقزت بخوف: اماه وين عتسيري
إيمان تجري وارتجمت لاعند ارجل امها وتمسكهن: اماه الله يحفظش لا تتهوري لا تظلمينا وتظلمي روحش
مطيع ما استوعب اللي يشوفه مش مصدق ان سهام عتقرر تترك البيت مع انه كان ثقته ان سهام مستحيل تترك البيت بعد كلامه
سهام نزلت لمستوى إيمان وتضمها: لا تزعلي ياروحي وانتبهي لنفسش
ندى: اماه مابتفعلي انتِ ماانتِ عارفة ان ابـي كان**
سهام: اسكتي وانتبهي لاختش وانتبهي لنفسش والله يحميكم كلكم استودعتكن الله الذي لا تضيع ودائعه
مطيع بصوت مرتفع: سهاام جننتي انا كنت **
سهام تقاطعه: انت كنت ايش انت ما بتحترمني ولا تحس بمشاعري انت طاردت ابني وماخليته حتى يصطبح مشي وهو جاوع انت مش من بني آدم انت قلبك مش قلب أب يحن على اولاده ولا تصلح أب وماتفكر الا بمصلحتك وبسس الفلوس تغليها على ولدك انت ايش من نوع؟
مطيع جلس على الكرسي وكلامها يتردد بعقله انت طردت ابني وماخليته حتى يصطبح مشي وهو جاوع انت ماتحترمني ولاتحس بمشاعري بيحس جسمه يرتجف
سهام ودموعها تنزل: يلا ضويني بيت اهلي و.. ماقدرت تنطق كلمة طلقني بس اكتفت بدموعها الذي تنزل
ندى تبكي وإيمان تبكي وتمسك على ارجل امها: لا يمه لا
مطيع: لا ياسهام مش انتِ اللي بتخرجي انا يلي لازم اخرج من البيت
ندى تبكي: لا استغفر الله هذي يمكن ذنوب الهتكم عن ذكر الله وذا التعب والمشاكل الذي حلت على رؤوسنا اليوم بسبب اللهو واللعب اتعوذبوا من الشيطان
إيمان تجري لنعد ابوها: لا تخلها تروح وتبكي
مطيع التف يخطى ناحية سهام مسك يدها وبصوت هادئ: والله وغلاوة اولادي الاربعة ان انا اعزش بس ذي المشكلة لخبطت عقلي انا آسف اجلسي عند بناتش وانتبهي لهن وانا ان شاء الله عد اسير من هانا ولاعاد تبسري وجهي قبالش
إيمان: اباه لا تخرج من البيت والله لا اموت نفسي وعترجعوا تندموا
سهام دموعها تنزل بصمت وندى حالها نفس الشي والهم الاكبر بالنسبة لسهام وين راح ولدها أمين
مطيع مشي ناحية إيمان: إيمان يابنتي انتبهي لروحش وانتِ ياندى خلي بالش من امش واختش واتجه ناحية الباب
سهام حست بألم كبير من كلام مطيع
مطيع وصل عند باب البيت وبدأ يفتح بالمفتاح
سهام تسمع صوت اول فتحة وتجري بأقصى سرعة وتضم مطيع من ورا ظهره وتصيح: مطيع وين عتسير؟
ندى تبكي تجري وتضم ابوها وامها
إيمان تجري وتضم الكل وصوت البكاء يعم البيت
مطيع غمض عيونه من الفرحة ان سهام سامحته والتفت يضمهن والتفت لـسهام: انا...
مطيع غمض عيونه من الفرحة ان سهام سامحته والتفت يضمهن والتفت لـسهام: انا احبش ويعلم الله انڜ حبيبتي قبل ماتكوني زوجتي وام عيالي وانا قلت لش الخيار على سب ان انا كنت عارف انش تحبيني ومستحيل تختاري انش تبعدي عني بس انتِ اخترتي البعد وانا قلت اترك البيت ولاابعدش عن اولادش
ندى: ايوه هو كلمني لمن سرت لاعنده كلمني وبدون محد يحس
سهام: وابني انا اشتي ابني اذا تحبني ادي لي ابني
مطيع: تعالي اعلمش أمين ايش فعل ولما تشوفي عتحكمي بنفسش
سهام تلتفت لـندى وإيمان بمعنى روحين
ندى تمسح دموعها وتمسك يد إيمان: طالما اننا انتهينا من دراما المشهد الحزين ودخلنا بالمشهد الرومانسي عنسير نرقد يا إيمان والصبح يحلها الله
إيمان: ايوه يلا تصبحوا على خير
سهام تبكي: ماله مافعل فهمني
مطيع مسك يدها: تعالي اعلمش بالغرفة تلفوني هانك
سهام خطيت بعد مطيع
مطيع دخل: سكري الباب بعدش
سهام: هاه سكرته قلي لا تزيد بوجع قلبي اني قلبي ينزف دم على ولدي
مطيع: هاه ورفع التلفون ابسري مابه
أمين جالس ومعه بيده تلفون عليه غلاف احمر بناتي وفي معه اثنين اكياس
البنت تخطى لاعند أمين وصلت عنده
أمين التف ويكلمها ومش واضح الصوت بالفيديو
البنت اخذت الكيس وخرجت منه الفلوس ومكنت أمين الكيس على سب يمسك لها وهي تعد الزلط خلصت وطرحت الزلط وسط الكيس ومبين انها تكلم أمين
سهام: ياالله من هذي وليش أمين ادا لها زلط؟؟
مطيع: ذي عشيقة ابنش كان يراقبه واحد من العمال وصوره وذلحينه احكمي
سهام: لا مش معقول أمين يفعل هكذا أمين نظيف ويعلم الله اني كم قد راقبته وفتشت تلفونه ماقد ابسرت رقم بنت
مطيع: هذا الفيديو قدامش وانتِ لاتظلمينا وتظلمي عيالش خليه يتعاقب وينام بالشارع
سهام تبكي بحرقة: معقول ابني حق بنات لاحول ولا قوة إلا بالله
مطيع يضمها: انا فدالش ياروحي لا تبكيش دموعش غالية
زكريا وصل عند أمين: هاه تلفونك عليك غضبي ياحمـ... دورك لين طلعت روحي وجاء الليل
أمين: عليك غضبي انا ميبس من الريح وجاوع الموت
زكريا: اهو يلا معي البيت وانا اخلي بطنك تنترس وتشبع
أمين: طيب وصلوا البيت
وزكريا جاب لأمين العشاء واتعشى ونام في بيت زكريا
عند أمين فوق الغداء ياكل لقمة ورا لقمة بسرعة
زكريا: هييي مجنون لك جنان يصرعك كل دلا دلا مالك
أمين يشوف لزكريا وبلع اللقمة غصب: خلاص شبعت كثر الله خيركم
زكريا: انا قلت تاكل دلا دلا مش تقوم
أمين: انا ااكل بسرعة وعاد الشهيه مفتوحة واذا جلست ااكل سع العرايس عتستد عندي
زكريا: ههههههههههه العرايس ليش العرايس كيف ياكلين؟؟؟ الله يشلك
أمين: شوف كيف هاه واخذ قطعة خبز صغيرة واتربع ويشوف لقباله ويطرح شوي من اللقمة لوسط السلتة بشكل بطيء جداً ويطرحها للقفه وياكلها وهو مبصم
زكريا ماقدر يمسك نفسه تمدد جنب السفره من الضحك ويخبط بيده على فخذه: ههههههههههههاي ههههههههههه اخ اخ بطني
أمين ضحك على زكريا وعلى شكله
زكريا التف ومسك الدبه الماء ويرجم أمين: ههههههههههه عد اموت من الضحك الله يسامحك كل يوم يقدموا لي الغداء مااقدرش ابلع لقمة وفي قلبي نكد واليوم فهنت عليا
أمين: الله الله الذي يسمعك عيقول مرة الجيران قد صوتك من الضحك نفس صوت العجايز الكبار
زكريا: كله بسببك ياحقير اخرج خرجت عينك
أمين: اها طردة محترمة خاطرك وقام عاد اسير اتمشى
زكريا: وانا معك ريع ويصيح واو تعالوا شلوا الغداء
ام زكريا: خرجت وين عتسيروا
امين: مد يده لجيبه وخرج زلط ومد يده يسلم عليها ويبوس راسها حياش الله ياخاله عنسير نفتهن ونخزن لنا شوية
ام زكريا: ماهو هذا الخزا والله ماجا ريال عيب
أمين: العيب انش تكسفينا ياخالة انا فدالش قدش سع امي
ام زكريا: سع امك لكن عيب تدي عواده والله ماجت وضغطت عليها قوي
أمين يحاول يرجعها بس ام زكريا كانت اقوا الله المستعان عليك والله ماتدي ريال ويميني كبير قدني مرة عاقلة
زكريا ياشر براسه بمعنى شلها
أمين: الله يسامحش ياخالة كان يلا عنسير
ام زكريا: الله معاكم
.
.
الساعة 12:00 ص
عند وجدان
وجدان: أمين مالك ليش انت جالس هانا
أمين رفع راسه: انا منتظر تجي سيارتي
وجدان: ليش وين سيارتك
أمين: ذاك هي ويأشر بيده
وجدان تلتفت يمين شمال ورجعت تشوف لأمين: مافي سيارة وين راح أمين أمين وين اختفيت صحت من نومها وجسمها مليان عرق اعوذ بالله من الشيطان الرجيم ياالله مالي بين ابسره بمنامي قامت دخلت الحمام وبكرامة القارئ توضت بصعوبه من يدها الوجيعة
وخرجت تمسح الماء من وجهها وتصلي ركعتين وقرأت قرآن خلصت تقرا وضمت المصحف لصدرها وتدعي ياالله انت وحدك تعلم بكل مااخفيه في قلبي وبكل ما افكر به ويتعبني فيارب ارحمني
فيارب ارحمني
واسعد قلبي يارب غمضت عيونها وبهمس يارب احفظه اللهم إنّي ارى حلمي بعيدًا وانت تراه قريباً ياالله احفظه ياالله ارح قلبه ليرتاح قلبي نزلت دمعتها وبنفسها استغربت للمه انا ادعي له مش اخي ولايقربني للمه شفته بالحلم يارب لايكون فيه شي الله ينجيه وينجي كل مسلم
ـہـ٨ـہـ٨ـہہ💔🩹
ندى تسمع صوت الاذان وقامت دخلت الحمام (وبكرامة القارى) توضت وخرجت صلت الفجر خلصت تصلي ورفعت يدها {يااارب احفظ اخي وارزقه يارب احفظه ويسر اموره واكسر اعدائه يارب يرجع بالسلامة لايمسه شر يارب ابعد عنه رفقاء السوء وجلست تدعي لاخوها سام انه يرجع بالسلامة وتدعي لابوها وامها واختها
خلصت لفت السجادة واتجهت ناحية ايمان تصحيها ايمان قومي صلي شرق
إيمان: امممم قد اذن
ندى: ايوه يلا قومي على سب نروح ندور على أمين
إيمان: اسكه حاولي اتصلي يمكن قد فتح
ندى: طيب سيري وانا عد احاول اتصل
إيمان دخلت الحمام (وبكرامة القارئ)
وندى تتصل بس الخط مغلق مسكت التلفون ودموعها تنزل يارب احفظه يارب احفظ نادر وربي اشتقت له وجلست تدعي وتبكي
إيمان خرجت من الحمام صلت ورجعت تدعي لاخونها وبالذات أمين خلصت اتجهت ناحية المصحف وبدأت تقرأ القرآن بصوت هادئ وجميل وندى تسمعها بكل راحة تمددت على السرير ونامت على صوت القرآن
خلصت إيمان تقرأ واتجهت ناحية ندى وتصحيها: ندى ندى اصحي
ندى نقزت: هاه ماهو ماتشتي
إيمان: ما اشتي إلا عافيتش بس قلتي نسير ندور على أمين
ندى بتعب: يووو يااحقاوي يا ارجلي تاعبة قوي مدري ليش
إيمان: عد اسير ادي لش آمول شدي نفسش يلا لازم ندور على اخونا
ندى: ايوه انا فدا قلبش سيري ادي لي علاج يمكن اقدر اتحرك
إيمان: طيب دقايق واجي
ندى تمددت امد ماتدي لها الآمول
إيمان: هاه جيت اشربي ومدت لها الآمول وقلص الماء وساعدتها تشرب
ندى: اسكه لو تزيدي تعليها جماله وتدي عبايتي والجلباب والبرقع
إيمان: هيا ابسرتي لش خدامة والا ماهو
ندى: اصص فضحتيني انا عد اقوم من نفسي وقامت
سهام فتحت الباب: محد تطلع من البيت
ندى: ليش لاحد يطلع خير
إيمان: يمه عنسير ندور على أمين ونرجع بسرعة اذا ماحصلناه بالاماكن اللي نعرف انو يجلس فيها بنرجع لاتخافي
سهام بحدة: انا قلت محد تطلع من البيت فاهمات
ندى: بس**
سهام تقاطعها: بس ماهو عتكسروا كلمتي او كيف والله ابصر الباب حق الشقة ينفتح لا اموتكن فاهمات
إيمان بخوف: طيب يمه ولايهمش اللي يعجبكم
ندى: اذا انتوا ماانتوا مهتمين فاني أمين يهمني ومستحيل اتراجع عن قراري عد اسير يعني عد اسير
سهام: ابوش يتفاهم معش اذا تحاولي تطلعي مش انت وتركتهن وراحت
ايمان: ندى وذلحين كيف
ندى: بالليل في نوم ابن عم الموت نطلع بالليل بدون محد يدرا لاابي وامي
في المساء عند صفوان
صفوان: خليل عدا اسير افصل لي ثوب
خليل: انا عد ادي لك من حقي اجلس خلنا نخزن بالله عليك
صفوان: لازم وبعدا الله يسامحك سع من انت وسع من انا انت اطول مني سع السلام ماعد يجي الثوب حقك عليا الا طربال
خليل: لك الكلاب يرفسوك انا سع السلام 😠
صفوان يضحك: معلومة عادك عرفت فيها الآن يلا قوم
خليل: خلاص عد اوديك محل تشتري الحاصل
صفوان: من الحراج قصدك صح
خليل: ايووه ههههه مشي حالك فيهن
صفوان: والله ما يطلعين فوقي انا عاد انا إلا شباب اشتي عيون البنات تكون عليا وانا انيق مش مشطط سع الذي يسوي حاله مسكين ويشحت
خليل: هات يامالي هات انت مجنون حسك عند البنات
صفوان: ههههه لاتصدق والله امزح
خليل: عليك غضبي طيب وين اوديك
صفوان: في محل تفصيل ملابس رجالية حق واحد جار بيت عمي علي بشارع الـ...
خليل: اذن نسير لاهاناك بسم الله
.
.
عند ندى وايمان
ندى: إيمان اسمعي عنبسر اذا رقدوا عنمشي
إيمان: طيب عد اسير ابسر اذا مافيش صوت وخرجت لعند غرفة ابوها وامها ولاسمعت أي صوت رجعت تمشي بشكل بطيء جداً وصلت تأشر لندى يلا
ندى اخذت جزمتها وجزمة ايمان وخرجين وسكرين الباب من خارج بكل هدوء وسكرين الباب بالمفتاح
إيمان: هوووف الحمدلله نفذنا
ندى: باقي شي واحد نسير نشل سيارة ابو زياد على سب نسير فيها
إيمان: بس مدري عيرضوا يدوها او لا
ندى: نحاول ناخذ وجدان على سب نحس بالامان ونتوانس
ايمان: طيب تمام وطلعين لعند شقة ابو زياد
إيمان تدق الباب
وجدان صحيت من النوم بتعب: ياالله حتى بالليل ماعيخلوا الواحد يرتاح استغفر الله العظيم وتحس بألم يدها 💔
علي: مدري من الذي يدق عد اسير افتح جا هو ووجدان بنفس الوقت
وجدان: افتح مدري من؟
علي: من
إيمان: انا ياعم علي ممكن طلب
علي فتح الباب شاف البنات مغطايات: مالكن يابناتي وين عتسيرين بذا الوقت
ندى: ..
علي فتح الباب شاف البنات مغطايات: مالكن يابناتي وين عتسيرين بذا الوقت
ندى: الله يحفظك ياعم ممكن سيارتك عنسير ندور على أمين مختفي ابي طرده من البيت
وجدان نزلت دمعتها بدون ماتعرف ايش السبب مسحتها بسرعة ولا تكلمت بأي كلمة اكتفت بالدعاء مع نفسها له يارب احفظه يارب نجيه
علي: ليش مافعل
ندى: سوء تفاهم وابي حتى مش راضي يدور عليه واحنا قلنا لو تتكرم وتدي السيارة نطلع فيها واذا ماتقدروا عادي
هند بدت لباب الصالة وتسمعهم بصمت ومع نفسها ماشافوا غيرنا يطلبوا مساعدة اوف
علي: طيب يابنتي طلبش بسيط إذا كنت اقدر كنت اطلع معاكن بس مايصلحش انا مش محرم وهذا رقمي شلنه اذا في شي اتصلين
إيمان: شكراً لك ياعم طالما ان انت ماعتجي ممكن تخلي وجدان نتوانس فيها
هند: وجدان ممنوع تطلع بالليل
علي بدون رد على كلام هند يسأل وجدان: بتطلعي معاهن
وجدان بدون ماتشوف لهند: اذا مافي مانع اي
علي: يلا سيري ألبسي بسرعة الله يحميكن وإذا شفكن أمين اتصلين لي اجي اروح وجدان
وجدان: طيب وراحت تلبس ومن كثر خوفها وتوترها نست تلبس الكفوف الذي تغطي يداتهاا وطلعين البنات
هند: ياحيف عليك الله العالم يتكلمين صدق والا يكذبين قدهن خارجات يتمصيعين وانت خليت وجدان تسير معاهن
علي بدون مايشوفها: ممكن تبطلي كلام فاضي
هند: انا كلامي فاضي
علي: كان ايش هذا السب لبنات الناس تخيليهن بناتش
هند تأففت وراحت الغرفة
ندى: وين نتجه
إيمان: المحل نسير نبسر اذا مش هانك نسير اللوكنده الذي جنب فندق ال....
ندى: صح كلامش
وجدان تشوف للشارع وشاردة
إيمان مسكت يدها: جوجو
وجدان: اخخخ يدي عورتيني
إيمان: مالش مالها يدش انا آسفة
وجدان تذكرت ان هند فحستها بالكاويه: هاه ولاشي
إيمان: اوف خوفتيني وبعد دقايق
ندى: وصلنا هذا المحل
إيمان: لازم نتغطى انا عد اسير وانتين اجلسين هانا
وجدان: عد اجي معش وندى تجلس عند السيارة ونزلين
خليل حصل صاحبه بندر وسلم عليه وعرف صفوان عليه ومشوا
صفوان وصل ونزل متجه ناحية باب المحل وإيمان تمشي قبل وجدان
وجدان تمشي وتحس بتعب ودوخة من النوم
صفوان يشوف للتلفون ومشي وصدم بوجدان والتلفون ارتجم من يده للأرض
صفوان: هييي انتِ يا عمياء ماتشوفي قُبالش
وجدان: انا آسفة ماركزت ونزلت اخذت التلفون وتقلبه الحمدلله ماوقع به شي
صفوان يسحب التلفون: والله تلفوني توقع فيه كسر صغير ماتصلحيه إلا انتِ 😡
وجدان سحبت التلفون من يده وبصوت هادئ: اسكه خلني ابسر وتشوفه
بندر مصدوم من جمالها رغم انها ملثمة ومغطاية بس كانت مثل الملاك لابسة عباية ومقرمة ولثام وجزمة بوتي لونها ازرق عليها خيوط وشكلها حلوة وتبين صغيرة (حلوة وطالعة بنص الليل)
ابتسم بخبث وقرب منها وسحب التلفون ويمسك يدها مع التلفون وكان قاصد يعمل هذي الحركة
وجدان تركت التلفون ورفعت يدها وضربت بندر كف على وجهه: احترم نفسك
صفوان مصدوم من شجاعتها ومستغرب من حرة بندر؟!
بندر يمسك خده: والله لااعلمش على من ترفعي يدش ياكلـ....
وجدان خافت وبدأت دموعها تنزل
صفوان يسحب بندر من يده: عيب تغلط على البنت ولاحظ الخوف عليها وحس انها بدأت تبكي يلا يابندر وينو خليلل وسحبه وخطي فيه
إيمان سألت العمال عن أمين قالوا لها مش موجود ورجعت تشوف وجدان بعيدة عن الباب مسافة بسيطة وراحت لعندها مسكت يدها وتكلمها مش موجود
وجدان ساكتة وتحاول تخفي عن إيمان
بس إيمان سألتها: من ذولاك الشباب اللي كانوا يمشوا من هانا مبين عليهم كانوا يتحاكوا معش
وجدان انفجرت بكاء وكلمت ايمان باللي حصل
إيمان: احنا آسفين تعبناش وحصل لش موقف موجع من تحت رؤوسنا آسفين
وجدان: عادي انا خايفة يعمل شي لانه كان يهددني
إيمان: لا تخافي يلا نمشي وصلين عند السيارة
وجدان: اسكه تصلي عليه يا ندى انتِ والا إيمان والله قدو الوقت متأخر وانا خايفة
ندى: ماهو قالت خايفة فرحنا بالموانس يوانسنا قام قلب عيونه وفجعنا قري وخليش قوية
ايمان تمسك على ظهر وجدان: حببتي نسير
اللوكنده اللي أمين يجلس فيها واذا ماحصلناها نرجع البيت انتِ بس اصبري من شاني
ندى حركت السيارة: بسم لله الرحمن الرحيم يارب نلقاه من غير تعب
وجدان: ان شاءالله (وصلين عند اللوكنده نزلت إيمان وندى اما وجدان جلست داخل السيارة بخوف
ندى رجعت بضبح: اوووف منك يا أمين وين رحت الله يسامحك
إيمان دخلت بعدها وبدأت تبكي
وجدان تضمها: لا تخافي ياعمري هو رجال يعني الرجال ماتضيع
ندى: وجدان عد اروحش ونرجع ندور انا وإيمان
وجدان: لا ليش عد اسير معاكن
ايمان: ذاهو قبل كنتي تشتي تروحي
وجدان تنهدت: ...
*حط تفاعل بذا (👼🏻)*