الفصل 6
*روايات وقصص يمنيه 📚🖋️*
*روايه [#نزيف_القلب💔]*
#للكاتبة_ريشة_الطاووس
*بارت رقم [ 6 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
ندى: ايوه هييييهاه اتصلت زمان ليش تسأل؟
أمين مع نفسه (ياريت والظروف تسمح لي اتواصل معش واقولش عن كل اللي في قلبي كنت على الاقل اطمن عليش وماكنت معذب ومخنوق):
ولا شي بس العمارة اظلمت من بعد ماسافروا
ندى: بين احس ان فيك شي مش مرتاح قلبي مالك قول لي
أمين بمزح: به جدة امش الحولا ارقدي عد اسير ارقد
ندى: طيب عد اخلص الرواية وارقد وانت سير ارقد يا حنون وضحكت
يوم جديد
وجدان تجري لجنب جدتها وتمسك يدها
مريم: افدي قلبش يابنتي وتلتفت لبدرية هذي وجدان؟
بدرية: ايوه هذي وجدان
وجدان: هههه انا ياجده وجدان هيا ماهو قد نسيتيني وانا عندكم صُبح وعشي؟
مريم: اصلحش الله يابنتي بس بين ابسركن انتِ وبنات اعمومش وماعد ميزت بينكن
وجدان: سهل سهل امم احكي لنا ياجده عن شبابش
مريم: ماهو عن شبابي كيف احكي لش؟
وجدان: اممم عن اي شي
روان: احكي لنا كيف تزوجتي بجِدي؟
يسرى بحناك: هيييهاه قد حكتها لنا زمااان
وجدان: والآن تحكيها لي انا وروان واسيل وغزلان مافيها؟؟
زينب تشتي تغيظ وجدان: هههع حياكي الله ولاعتحكي لكن ولاشي والتفت لجدتها مع ياجده ولاتحكي ولاشي
الهام: هههههه شكل بناتش يابدرية عيملكين عمتي لهن
زينب سمعت الهام وردت بخزا: ههه انا بين امزح ياعمه
الهام: الله يصلحش يابنتي وظلت تتأمل زينب وشوي وتبسر ليسرى وهن مشغولات بالمجبر مع جدتهن ومش مركزات على شي
وجدتهن تحكي لهن بعض لحظات حياتها
الهام تلتفت لبدرية: ماشاء الله على بناتش يابدرية قد كبرين
بدرية: الله يسعدش ايوه لو تبسري يااختي كيف انا فارحة بهن
إلهام: من حقش تفرحي بهن ماشاء الله حلوات وتشوف لهند اللي مش مهتمة بكلامهن ولا حتى تشاركهن بالمجبر همسا لبدرية مالها هذي ساع الحانقة
بدرية بهمس: والله مانا دارية من يوم ماا جوا وهي معقدة لحواجبها وبتتقارح فوق عيالها
إلهام مسكت على يد بدرية: اهم شي ان ماانتم مقصرين علينا بشي كثر الله خيركم
بدرية بصوت مرتفع على سب هند تسمع: والله يااختي بين افعل كل جهدي والباقي على الله واذا قصرنا بضيافتكم او تعبناكم من غير قصد سامحونا
إلهام: انتو يلي لازم تسامحونا ان احنا نثقل عليكم خيرات ونتعبكم معنا
بدرية: ياريت واتعب نفس تعبكم
تعبكم راحة والتفتت لهند مالش يااختي بين احس ان القريه ماعجبتش
هند: ماشي الحال
بدرية: اهم شي ان مابش احد بيزعجكم؟
هند: ههههههه حببتي البلاد مزعجة بأصلها
الهام وبدرية يتبادلين النظرات
بدرية التفتت لها بحدة: وانتِ مش غصب تجي بها بنفسش تجي اهلا وسهلا مابنفسش تجي اجلسي ببيتش
هند: ههه حببتي مش قصدي بس هو الذي اصر
إلهام: اسمعي يااختي محد يغصب احد وكلام بدرية صدق اذا مش عاجبتش الجلسة خلي زوجش يضوش لبيتش وخلاص
هند: بتطردني والتفت لبدرية تطرديني من بيتش انتِ وهي
بدرية فتحت عيونها على الآخر: ماهو ماتقولي انــا طردتش وهو انتِ يلي قلتي البلاد مملة
إلهام: لاحول ولا قوة إلا بالله خلاص يااختي يا بدرية تعالي نفعل لنا كم ركعة للتراويح قدو وقت
بدرية: طيب وخطيين وهند تشوف بعدهن
مسكت تلفونها وكتبت رسالة لـعلي لو سمحت تعال لان اشتي اتحاكا معك بموضوع مهم
ــــــ🌺💔ــ•
بعد نصف ساعة
علي وصل برفقة اخوانه احمد محمد وابن اخيه صفوان والصغير ايمن
علي يشوف تلفونه: اهو نسيت تلفوني هانا اسكه ياايمن قوم اديه
ايمن: حاضر وقام ادى تلفون علي ومكنه لاااايده
علي شاف الرسالة من هند وكان التوقيت من قبل نص ساعة رفع راسه ويشوف لـاحمد بقلق تقل مابه مابش احد مريض؟
احمد: ليش؟
علي: فعلوا لي رسالة قبل نص ساعة وتلفوني نسيته هانا
احمد: طيب سير للصالة اللي داخل وادعي لوجدان او لأي واحدة من البنات واسألها
علي: طيب وقام صيح لوجدان وخلاها صيحت لهند
هند خرجت: ساعه فعلت لك الرسالة وانت ولا ترد
علي: نسيت التلفون هاناعندش بالمجلس ليش مابه
هند: انا زحفت اشتي اروح البيت
علي: تروحي؟
هند: ايوه والآن
علي: طيب ليش ما بينش؟
هند: زوجة اخوك المحترمة بدرية تطردني من بيتها
علي: هصص لحد يسمع ليش تطردش مابه؟
هند تمثل البكاء: قامت تطرني وقالت ليش روحت وقالت اضوي بيتي
علي: مش معقول تقلش هكذا طيب كيف لوما قالت لش هكذا
هند: انا قلت القرية مملة وهي قامت تطردني
علي: طيب دام هذا كلامها كوني مستعدة انتِ وبدرية
هند: انا وهي وين عتسير؟
علي: ههه وين تسير تجي عند زوجها للمجلس وعنناقش بينكن الثنتين
هند بخوف: مماهو نتناقش لا مابش داعي عد اصبر هذي المرة
علي: ههه مفكرة ان انا اهبل تلعبي على حِسي او انا جاهل اسمعي كلامي تجلسي مثلش مثل زوجة محمد باحترام وبطلي تفعلي مشاكل واذا مش عاجبش الجلسة معاهن...
( اذكروا الله الباقيات الصالحات سبحان الله والحمدلله ولا إله إلا الله لاحول ولاقوة إلا بالله)
هند بخوف: مماهو نتناقش لا مابش داعي عد اصبر هذي المرة
علي: ههه مفكرة ان انا اهبل تلعبي على حِسي او انا جاهل اسمعي كلامي تجلسي مثلش مثل زوجة محمد باحترام وبطلي تفعلي مشاكل واذا مش عاجبش الجلسة معاهن اتصلي باخوش يجي يضويش البيت اما انا عاد اجلس هانا لبعد العيد
هند تشوف له: خلاص عد اريع لك
علي دار ظهره لها ومشي دخل وجلس
احمد: مابه مابش احد مريض
علي: المرض عند زوجتي وزوجتك
احمد: ليش مابه؟
علي: الله المستعان بدرية زوجتك تطرد زوجتي من البيت ليش كم قد لنا عاد ماقد لنا شهر
محمد يشوف لـاحمد: مش معقول هذا يجي من زوجتك يااحمد والكل بيمدحها ويقول انها من ناس ماتاخذ إلا الثقال
أحمد: مدري ماوقع بها ويعلم الله انها تعزكم
صفوان: حصل خير ياعم مابش حاجة وهي داويه من حق النسوان هن عيسدين
علي: انا قد قلت هكذا
احمد يفكر: الله يستر لايكونين تصايحين على سب وجدان؟
ورجعوا يتجابروا ويضحكوا
وصلت الساعة 9:00 م
تسحروا واحمد كان ينزل اللقم بالغصب وهو زعلان من بدرية
احمد يشوف لـ ايناس: وين امش من اللي فعل السحور
ايناس: فعلته مامه وذاك كانت بالمطبخ
احمد: طيب وقام يشتي يروح
وقفه صوت محمد ووو وين عتسير قدو عيأذن وغمز لـعلي
علي: هههههههه ويأشر بيده تعال تعال وتسأل عنها وبدون ماتخجل
احمد: الله يهديك يامحمد انا مابين اقصد شي اقصد انو من البارحة ماتهنيت بِـالسمره وانا بين اسأل نفسي عن الذي حصل
علي: خلاص لاتهتم هي زوجتي سلبطية
احمد: لازم اعرف ليش؟
محمد: طيب على راحتك
احمد خطي وصل عند باب المطبخ وهو يشوفها مقفيه ظهرها وتغسل المواعين خطي لجنبها
بدرية التفتت له وتشوفه له وهو يشوف لها بعد ثواني
احمد: مابتفعلي؟
بدرية: اغسل المواعين عادك ذكرت تبسرني الآن اني زعلانه منك
احمد: ليش زعلانة؟
بدرية: اممم كم قدلي ماعد بين ابسرك اسكه قلي؟
احمد سحب كرسي وجلس جنبها ويكلمها: خلينا من ذا المجبر اشتي اسالش سؤال؟
بدرية: تفضل
احمد: امس كيف قضيتي وقتش مع من وانتِ ومن وماهو المجبر اللي تجابرتي فيه مع زوجة علي لوما قمتي تطرديها ليش تطرديها يعني ماعد تحترمي زوجش؟
بدرية تركت المواعين من يدها وبصوت مخنوق: احمد اني مااحترمك؟
احمد: جاوبي على سؤالي بالاول
بدرية: انا عد اكلمك بكل شي بس بالاول جاوبني ليش تقول انو ماعد بين احترمك انا قد غثيتك؟
احمد مسك يدها: ياروحي انتِ ماقد ابسرت منش شي يغثي الا البارحة
بدرية: طيب عد احكي لك كل شي.. وبدأت تكلمه عن كل اللي صار
احمد: اها وهذا اللي حصل؟
بدرية: ايوه
احمد: وليش وهي مغثيه هكذا؟
بدرية: مش اني عارفة
احمد: خلاص حصل خير بعد اليوم لاتكلميها او تسأليها وكلمي زوجة محمد لاتكونين تسألنها عن شي لاعتفعل مشاكل
بدرية: طيب حبيبي لا تهتم سير ارقد
احمد: طيب وانتِ سيري ارقدي قدش تاعبة
بدرية مسكت يده وابتسمت
احمد يشد على يدها اكثر: تعرفي
بدرية: ماهو؟
احمد: من يوم ما تزوجت وتعرفت عليش ماقد غثيت منش الا ذي المرة
بدرية: آسفة حبيبي والله ماكنت عارفة ان القصة عتكبر وتزعلك
احمد: مافي شي يزعل بس هي شكلها زعلانة ليش علي روح هانا خايفه يذكر **
بدرية تقاطعه: حبيبي الله يكون بعونهم اصلاً الغيرة متعبة
احمد: اها يعني اذا تزوجت عليش عتكوني شريرة
بدرية: اكيد عد ادافع على ممتلكاتي
احمد: ههه ويشوف للساعة ورجع يمد بيده لعند وجهها ابسري اوقاتي معش كيف تمشي بسرُعة
بدرية: ههههههه حتى انا
احمد: يلا يلا خلصي شغلش وارجعي ارتاحي
بدرية: لحظة
احمد: هاه
بدرية: بلغ علي اعتذاري قوله قالت هي آسفة ماكان بقصدها واني عد اعتذر من هند
احمد: طيب وطبع على جبينها بوسه وخطي وهي تشوف بعده
ـہـ٨ـہـ٨ـہہ💔🩹
مرت الايام وقبل عيد الفطر المبارك
في غرفة البنات اسيل وجدان يسرى روان غزلان ينامين بغرفة
زينب وايناس ونوره وعمران والجده ينامين بغرفة توزعين على الغُرف على سب الدور الاول مافيه اماكن كثيرة
يسرى: بنات بالاول نجهز ملابس العيد من الآن على سب نختصر الوقت
وجدان: صح بالاول نجهز الكسوه وبعدا نفعل الحناء ليداتنا
روان: انا مااشتيش اتحني في النهار لان الحناء مايرضي يحنا فيني ويلزمه اربع ساعات او اكثر
وجدان: يعني كيف؟
روان: يعني عاد اتحني في الليل لان اذا قررت اتحني حناء ورق اتحني في الليل على سب ياخذ وقته
اسيل: مع تتحني الآن
وجدان: روان لاتخافي عنفعل له ليمون وتمر حامض وعيكون لونه حالي
روان: مع لا اخاف مايكون حالي
وجدان: خلاص براحتش اتحني المساء والبنات عنحنيهن بعد شوي
يسرى: طيب واتفقين على النقش وكل واحدة اختارت لصقة نقش حسب ذوقها وبدرية حطت لهن اللواصق وحطت الحناء عليه
ــــــ🌺💔ــ•
في المساء الساعة 10:00
علي دخل: هيا بنات عاد ينقصكن شي
يسرى: كثر الله خيرك ياعم ولاينقصنا شي
غزلان تجري لجنب عمها: ابسر ياعم تحنيت وتمد يدتها بكل براءة
وايناس تجري بعدها: واني ياعمو تحنيت
علي يشوف يداتهن: ماشاء الله مسك يدات غزلان ويبوسهن ورجع يبوس يدات ايناس
ايناس وغزلان يسلمو
علي يشوف لـ وجدان ويسرى وزينب واسيل وروان: وانتن سكه اشوف؟؟
البنات راحين يعلمين علي بيداتهن
علي ظل يشوف يداتهن ويبوسهن رجع شاف الحناء على يد وجدان يلي اول مرة يشوف يداتها وفي عليهن حناء مسك يداتها وظل يتاملهن: حالي الله يسعدش
وجدان: انحنت وتبوس يدات ابوها فديتك يااغلى اب بالدنيا كلها
علي بكل حنان: كل سنه وانتِ بخير يابنتي
وجدان: وانت بخير ياغالي
رجع دخل احمد وبعده محمد ماعدا صفوان ظل جالس في مجلس الرجال الثاني
محمد يشوف البنات: الله الله ماشاء الله قمارى الله يصلحكن
غزلان: بابا عمو قال الحناء اللي على يدي حالي
احمد: ايوه اكيد وانا والكل عد اقول انش حالية بكلش
محمد يشوف يداتها: اكيد حالي مثلش رجع رفع عيونه يبسر لوجدان ماشاء الله ذي بنتك يا علي صح
علي: لا ذي خادمة من الشارع
وجدان ابتسمت لابوها
البنات يشوفين لوجدان 😂
احمد: هذي الاميرة حقكن
يسرى: اباه
محمد: رحت فيها ياويلك😂
احمد: وانتِ من يشبهش
محمد يهمس لـأحمد: هذي اين
احمد بصوت مرتفع: هذي بنتي يسرى الكبيرة
محمد: والله
يسرى: ايوه انا الكبيرة وعلى سب انا كبيرة قول لهم ياعم مايكونوا يعاكسوا كلامي
علي: 😂😂😂
روان: هصصص صفوان لو يدرى بِـجنونش هذا عيكون يتعيبط علينا
يسرى: ومادراه لش الكلاب
روان: لايسير البطل أيمن يحاكيه
علي: يلا تجابرين لكن اما انا عد اسير اسمر
احمد التف: وانا والكل
محمد: يلا على سب اقول لكم عن موضوع
دخلوا للمجلس
علي: ماهو المجبر
محمد: انا بصراحة مستعجل واشتي اقطب لصفوان البنت
صفوان: ماهو يابه انا**
احمد: على راحتك على راحتك ياابني والبنت هي لك وهذا كلام رجال
صفوان: ....
محمد يشوف لصفوان: لاحول ولا قوة إلا بالله ياابني اعقل مالك مفتجع اخس من البنات
صفوان: يابه انا مش مفتجع انا مااشتي اتزوج الآن اول شي لازم اامن مستقبلي
علي: ونعم بالله وظلوا يتكلموا وتمت ليلتهم على خير
ــــــ🌺💔ــ•
في بيت مطيع
سهام الساعة 3:09: عد اسير اصحي ندى وايمان على سب يقومين يتجهزين
مطيع قام وقف تجاهها: وانا؟
سهام: وانت قدك صاحي؟
مطيع: اهم شي صاحي
سهام ابتسمت له ومدت يدها
مطيع طرح يده على يدها ويشوف لها
سهام: ....
مطيع: ليش ساكتة؟
سهام: بين احنججك وارتمت لحضنه وتضمه
مطيع يضمها اكثر ويحس بهمسة بكاها رفعها ويشوف دموعها: مالش ليش يا روحي تبكي؟!
سهام: فقدت ابي الله يرحمه
مطيع يمسح دموعها: لا لا تبكي الله يرحمه ويغفر له اسمعي ماعد اقول لش؟
سهام: ...
مطيع: ابسري لاعندي
سهام رفعت عيونها وتشوف له
مطيع: بالاول يا عمري انا مااحب ابسرش تبكي ثانياً مش انتِ قلتي تحنجيني؟
سهام تشوف له :بسرت فيك حنية ابي وحنية امي ابسرتك كل شي بحياتي
مطيع يبسوس جبينها: كل سنة وانتِ روحي كل سنة وانتِ عمري كل سنة وانتِ سعادتي كل سنة وانتِ عيدي عيدش مبارك
سهام: وانت طيب الله لا يحرمني من كلامك الحالي ولامنك يلا عد اسير اصحي أمين والبنات يقوموا يتجهزوا
مطيع: طيب وارجعي لاهانا لاعندي على سب تجهزي ذاك الكيس فيه ملابس اطفال وفيه جعالة البيـت وبيت .. وبيت .. اشتريت لجهالهم كسوة واشتريت لهم جعالة وكلمي أمين يتجهز سريع على سب يشلهن على طريقه
سهام: طيب ولا يهمك وراحت صحت امين وندى وايمان ورجعت جهزت الكيس الكبير وفعلت كل واحد حق اولاده وسط كيس لوحده وكل واحد جعالته وسط كيسه
ـہـ٨ـہـ٨ـہہ💔🩹
في بيت غالب
احمد لبس ثوب فضي وجنبيه ضخمممه جداً على صندل بُني وكوت بُني وشال اخضر غامق وعليه نقش كبدي
علي لبس ثوب ابيض على جنبيه جميله جداً وكان العكف منقوش بنقش ذهبي وطلع على لون الجنبيه روعة وكوت اسود وصندل رمادي وشال سكري منقوش بلون اخضر واحمر وطلع اللبس حالي
محمد لبس ثوب رمادي على جنبية اجمل من جنبية علي وشال ابيض وعليه نقش اخضر على كوت ازرق وصندل اسود
ونروح لعند صفوان ونشوف ايش لبس
لبس ثوب سكري على كوت برتقالي غامق شال ابيض وعليه نقش بني وحزام على حقوه وصندل لونه سماوي
غالب لبس معوز وجنبيه جميله جداً وغالية الثمن على شميز ازرق وشال بنفسجي وعليه نقش ابيض
محمد يمسك على كتف غالب: ...
محمد يمسك على كتف غالب: عيد مبارك وكل عام وانت بخير ياغالي
غالب: وانت طيب الله يحفظكم ياابني
احمد يبوس راس ابوه: عيد مبارك وكل سنة وانت طيب وحاج ان شاءالله ♡
صفوان اتجه ناحية جده ويبوس جده: كل سنة وانتوا طيبين وحجاج وان شاء الله من السالمين
علي: وانت طيب وعريس مقبعس
محمد: اكيد وان شاء الله العيد الثاني نحتفل بعرسك
احمد: هههه الله كريم
محمد يبوس راس ابوه من الجهة الثانية: عيدك مبارك وكل سنة وانت طيب الله يطول في عمرك ويعافيك
غالب: وانتوا طيبين ومن السالمين الغانمين وكل عام وانتوا بخير الله يديم جمعتنا على خير
وظلوا يتبادلوا التهاني مع بعض
احمد يلتفت لغالب: انا فدالك يابه نشتي البنادق
غالب: انا عد اديهم تعالوا دخلوا للغرفة ومكن كل واحد حقه *(واتجهوا لصلاة العيـد)*
ـہـ٨ـہـ٨ـہہ💔🩹
عند البنات
ايناس وزينب ويسرى لبسين نفس بعض
لبسين فساتين احمر نص كم وطويلين يوصلوا للارض اما ايناس كان فستانها قصير لنص ساقيها على بنطلون يتبع نفس اللون واكسسوارات حلوة وشعرهن مفرود على ظهرهن وجزمات حمر مرتفعات قليل وكان شكلهن كل واحدة اجمل من الثانيه
وجدان لبست فستان نفس جلد النمر مكمم قصير لنص ساقيها وعليه بنطلون جينز اخضر على صندل ارضي لونه اسود ولبست ساعة على يدها الشمال حلوة واسواره جميله جداً على اليد وشعرها مكفوت كبه ولبست مقرمة وردي وطلع شكلها حلوة جداً
اسيل لبست بنطلون ازرق وفنيله كحليه كم كامل
روان لبست فستان ابيض طويل وعليه فراشه كبيره من وراء ظهرها وسرحت شعرها وفعلت تاج ملكي كان يناسب للفستان كثير ولبست صندل ابيض على لون الفستان وكانت ملكة على عرش ابوها
غزلان لبست فستان على طولها وكانت حلوة
هند لبست فستان عنابي مضغوط من الصدر لعند ركبها ومن تحت الركبة مفتوح وكانت فيه حلوة ومبين عليها صغيره في السن
بدرية والهام لبسين ارواب طويلة نفس الشكل وعليهم نقش في الصدر لعند الخصر وكانين كل واحدة تحسد الثانية على شكلها
مريم لبست روب اخضر يقرب شبه لروب بدرية والهام بس حقهن لونهم وردي وحقها لونه زهري
هناگ في تلك القرية المجاورة لقرية غالب من يراقب بصمت يتأمل ويترقب خروج وجدان
تلفون بدرية يرن
وجدان: هذا تلفون من؟
يسرى: تلفون امي هاتي اوديه صيحت لبدرية ومكنتها التلفون
بدرية تشوف لـوجدان اللي تشوف لها وهي مبتسمة: يا الله هذي عبير اكيد تشتي تكلم وجدان ردت هلا
عبير: هلا فيش عيد مبارك وكل سنة وانتِ طيبة
بدرية: وانتِ طيبة وكل عام وانتِ بخير كيف حالش؟
عبير: الحمدلله تمام
بدرية: وين ابي وامي كيف حالكم كلكم؟
عبير: كلهم بخير ذلحين قولي لي مابتفعلي
بدرية: ولاشي مريعين للمصلين لوما يرجعوا من المسجد
عبير: انتِ ومن؟
بدرية: انا ووجدان وبنات عمها المهم بالمختصر انا والكل
عبير: اها لايكون الاسبيكر مفتوح
بدرية: لا
عبير: طيب اسمعي اشتي اكلم وجدان
بدرية بطريقه ذكية وبصوت مرتفع: كلهم يسلموا عليش تشتي تكلميهن تفضلي ياالهام ذي اختي تشتي تسلم عليش
عبير ابتسمت وعرفت انها على سب ترجع تكلم وجدان
إلهام: من اختش اا عبـ**
بدرية تقاطعها: اا اختي بالبيت كلميها
إلهام عرفت قصدها وترد على عبير: هلا وغلا
عبير: اهلين كيف حالش عيدش مبارك
إلهام: الحمدلله الله يبارك في روحش ويعيدش في عيد
عبير: آمين يارب اسكه هاتي بدرية
إلهام: ها بدرية تفضلي ومكنتها
بدرية: نعم
عبير بهمس: وينها؟
بدرية: بنات تعالين تعالي ياوجدان كلمي التلفون
وجدان كانت عارفة انها اخت بدرية لانها كانت تسمع من البداية بانصات هزت راسها طيب مسكت التلفون وردت: نعم
عبير فز قلبها: من معي
وجدان لزمها الصمت وحست بشي هزز قلبها شعور غريب ثواني ردت عليها: معش وجدان اختش بدرية تكون عمتي
عبير نزلين دموعها وبصوت مخنوق: كيف حالش
وجدان تحس من نبرة صوتها انها تبكي وفجأة نزلت دموعها بدون ماتشعر: الحمدلله تمام وانتِ اخبارش وصوتها اختنق اكثر وكان اذا احد كلمها او قلها اي كلمة عتنفجر من البكاء وتحس بأحاسيس غريبة وتحس نفسها بحالة حرجة جداً مافهمت مشاعرها
عبير: الو
وجدان نطقت غصبب: نعم اسمعش مااسمش؟
عبير: اسمي عبير ياروحي
وجدان: اسمش حلو مثلش
عبير: ومادراش اني حلوة
وجدان: ....
عبير تشتي تطول معاها اكثر: مابتفعلي يابنتي
وجدان: ولاشي جالسين انتِ قد في عندش بنات؟
عبير وهي تحاول تكتم البكاء: ايوه
وجدان: الله يحميهن لش ويسعدش يارب ومشكورة على اتصالش الحلو هذا
عبير: ماقدرت تتحمل انفجرت من البكاء
وجدان: الو
بدرية تمسح دموعها بدون محد يركز واخذت التلفون من يد وجدان وسكرت قبل ماتعرف انها تبكي
وجدان: مالها...
بدرية تمسح دموعها بدون محد يركز واخذت التلفون من يد وجدان وسكرت قبل ماتعرف انها تبكي
وجدان: مالها شكل صوتها تااااعب
بدرية: ايوه الله يعينها
وجدان: كم عندها بنات؟!
بدرية: عندها بنت واحدة
وجدان: اسكه اعزميها تجي بنفسي اتعرف عليها اكثر
إلهام: صح يا بدرية والله عجبني تواضعها يعني هي طول عمرها اصيلة وما اتغرت جاني فضول اعزمها بنفسي اشوفها
بدرية تعض شفايفها لـلهام: هه حبيباتي هي زوجها مايسمح لها تسير اي مكان يعني زوجها متشدد
إلهام حست بغلطها وهزت راسها بمعنى تطمني
وجدان تذكر صوتها وحست بضيق بصدرها ومشاعر مختلفة نزلين دموعها بدون ماتشعر
يسرى: مالش ليش تبكي؟
وجدان غطت على وجهها بيداتها وبدأت تبكي
بدرية تشوفها بصدددددمة وقامت لجنبها: مالش ليش تبكي
إلهام تتبادل النظرات هي وبدرية وتمسكها: حببتي وجدان مالش؟
وجدان مواصله بكاء....
بدرية مع نفسها: ياربي ليش قامت تبكي لاتكون عرفت انها هي امها يارب استر
البنات شافين وجدان تبكي بحرقة وبدأين يبكين معاها
بدرية تحاول تبعد يدها عن وجهها: مالش يابنتي
وجدان: مش انا دارية انا تاعبة
إلهام تضمها: سلامتش ياقلبي ماهو اللي يوجعش؟
وجدان: مدري
بدرية عارفة بس مش قادرة تتكلم
وجدان تذكر صوت عبير في آخر كلمة كيف صوتها مخنوق واعتلت صوت شهقاتها
إلهام اتجهت لعند الغرفة الثانية وادت لها قارورة ماء: اشربي ياعمري
بدرية تضمها: خلاص اشربي ياقلبي وهيا سيري ارقدي
وجدان بعدت يدتها من وجهها وكان مبلل بدموع شربت الماء
إلهام وبدرية والبنات كانين اللي تبكي واللي تحس قلبها يتألم من ألمها
بدرية: هيا سيري ارقدي لين تتحسني واخذتها لغرفتها وغطتها وطلعت
إلهام: تقولي مالها
بدرية مادرت بأيش تجاوب ردت: مدري
إلهام: عيجوا الآن من الصلاة وقد جهزين الحلا والكعك والاكلات انواع
احمد دخل برفقة اخوانه والبنات قد كانين خرجين من المجلس على سب صفوان يدخل
محمد: عيدش مبارك ياام يسرى وكل سنة وانتِ طيبة
بدرية: وانت طيب الله يسعدك
رجع التفت لـالهام عيدش مبارك ياام صفوان وكل عام وانتي بخير
إلهام: وانت بخير وصحة وسعادة الله يسعدك
احمد عايد إلهام والتفت لامه يلي دخلت وجري يبوسها وعلي ومحمد راحوا يبوسوها ويبوسوا ركبها وراسها
احمد رجع يشوف لبدرية وغمز لها بدون محد يركز
بدرية ابتسمت له
علي يشوف لهن مجموعات كلهن ماعدا هند: وين هند؟
إلهام وبدرية يتبادلين النظرات
مريم: مدري ياابني خرجت الصبح من الغرفة جلست شويه ورجعت غرفتها
علي: اها اا يمكن مريضة
احمد بهمس: مرض السرطان
صفوان كان جالس جنبه وسمع ماقدر يمسك نفسه ضحك بأعلى صوت
احمد يبهرر بعيونه هسسس
علي مد يده لجيبه وطلع فلوس ويعد ليد احمد هذي لـ.. يسرى وهذي لـ.. ايناس وكل واحد مكن الثاني عوادة بناته
صفوان مد يده لجيبه: هذي ومدها لـ بدرية عيدكم مبارك ياعمه
بدرية: الله يعيدك في كل عيد مابتفعل والله مااجت
صفوان: لاتكسفينا ياعمه وذاهو قد انا انا وانتم انساب
بدرية تشوف لـ. احمد؟؟
احمد يأشر لبدرية: ان شاءالله
رجع سلم على إلهام وعودها
إلهام: ماهو بطل هبل والـلـ....**
صفوان يقاطعها: والله مارجعت وقضوا بضع من الساعات مع عسب العيد
والبنات جلسين بالمجلس حق الحريم بنص سعادة لان وجدان دخلت ترقد ومش موجودة معاهن
في نفس الوقت
في مدينةة صنعاء وبالتحديد في بيت مطيع
أمين وصل من صلاة العيد وكان لابس ثوب بُني وشال سماوي وعليه نقش اسود وفاعل عمامه وكوت رمادي مايل لسواد وعلى حقوه جنبيه وصندل اصفر
ندى لابسة فستان بني مكمم ساده وشعرها مفرود على ظهرها
أمين: وكل سنة وانتِ طيبة وحجة وعروسة ممخططه والخ...
ايمان: لااااااا عيد😢
ندى خرجت للصالة: حيا بروحي وقلبي فديت طلتك والشياكة
أمين: فديت قلبش انا.. عيدش مبارك وكل سنة وانتِ طيبة وحجة
ندى: وانت طيب وحاج وعريس مقمبع
امين: ياالله يارب ان شآء الله عريس مسك على قلبه وين قلبي
ندى: هههههههه
إيمان: هصص ابي جاء
ندى التفت ايمان وأمين فهموا قصدها
أمين: مع ارجعين بدون نقاش انا اول
إيمان: ماعه ماعد ارجع وعنبسر من الاول
ندى تشوف للباب بدأ ينفتح وركضت لحضن ابوها
مطيع يضحك: كل سنة وانتِ بخير ياعافيتي انتِ
ندى: وانت بخير وصحة وسلامة ومن السالمين
إيمان تدهف أمين: ابعد
أمين: شوفي شوفي ماهو هذا اللي عرضوه في الشاشه شكله في انفجار
ايمان تلتفت: اين؟
أمين نبع لجنب مطيع ويبوس راسه: عيدك مبارك وكل سنة وانت طيب
ايمان: يانذل انت وندى عد اوريكم وماعتبوسوا امي إلا الآخرين
سهام خرجت من المطبخ وندى نبعت اوله لحقها أمين و...
يتبع ...
`حط تفاعل بذا لنستمر🖤`