الفصل 5
يشعر بروحه وهي تذبل أمامه لكنه لا يجد أي طريقةٍ بإمكانها أن تسعفه هذه المرة "
واقف بضبط بجانب بوابة المستشفى
مكتف ايدينه ويطالع العالم الداخله
والطالعه مر الوقت وهو لازال صامت
وكلمه وحده تردد براسه: هبوب الترف
رفع كفه وهو يدلك عيونه بتعب كم مر عليه
وقت وهو جالس عجز يجلس عند ابوه
وهو نايم من قو ازدحام افكاره خاف يحس عليه تنهد من كل قلبه
طالع ساعته اللي تشير للساعة 5 فجرا
وقف وهو يدخل لداخل وقف قدام المغاسل
وهو يغسل وجهه اكثر من مره وبعدها رجع
يطالع وجهه وهو يحاول يبتسم علشان
ابوه بس اهتزت شفاته وهو يتذكر
كلام الدكتور ان هاليوم بتكون التحاليل
الاخيره لعملية ابوه واللي تقررت بتكون
بكره ولازم يبلغ ابوه ب اسرع وقت دنق راسه وصدره يرتفع وينزل
بخوف من فكرة الفقد والموت من تخيل وجع
العمليه ضرب ايده بالمغسله بقوه وهو يردد
بصوت خافت: ابوي مايتحمل ابوي ماهو قوي لهدرجه
حط يده على قلبه يحاول يهدي بعدها طلع وهو
يبتسم وبنفس الثانيه تختفي الابتسامه ويرجع
يحاول يبتسم فتح باب الجناح وهو يشوف ابوه
يصلي جلس على السرير وهو ينتظره يخلص
سلم وبعدها طالع لضيف وببتسامه خفيفه: توني حسيت اني بخير
ابتسم ضيف : وانا بعد بعد هالابتسامه اظن حرام اتضايق
وقف وهو يسأله: صليت
ضيف غمض عيونه وهو من كثر التفكير نسى امر الصلاه: لاوالله لهيت الحين بصلي
ابوه وهو يجلس ع السرير : كل شي بدنيا اخره الا صلاتك ياضيف ماهي من عوايدك
ضيف هز راسه وهو مو قادر ع الكلام وقف قدام وهو يصلي
يطالع له وهو حاس فيه من الليل وهو جالس معه وباله مو معه ابد يعرفه اكثر من نفسه عيونه فيها حزن وحزن عميق هذا ضيف اللي رباه لحاله يعرف وش اللي يضايقه واللي يفرحه يعرف متى يمثل الضحكه ومتى يكون زعلان ومتضايق تنهد وهو يشوفه يطول بالسجود رجع راسه لورا وهو يستغفر ويدعي له بداخله ان ربي يدله على الطريق الصح
سلم وهو يمسح عيونه بقوه وبعدها رفع عيونه لفوق وهو يستغفر
ابتسم راجي وهو ينطق: وش مضايقك ياولد ابوك تراني اعرف متى تكذب ومتى تصدق ورفعة عيونك ماتسويها الا اذ كنت متضايق وعيونك فيها من الحزن الكثير شاركني همومك ياضيف
ضيف ب ابتسامه هاديه:وش همومه يالغالي الحمدالله ما طبني من الهم شي
وقف وهو يجلس على الكرسي بعيد شوي عن السرير حط ايدينه على وجهه وهو يطالع ابوه
راجي بحده خفيفه: اسمعني ياضيف عمامك جاين وبعد شوي بيدخلون علي وبيجلسون عندكم لين ما اطلع من العمليات انسى كل اللي فات وخليك كريم معهم
قاطعه وهو يوقف: يبه عندك تحاليل مو مهمه الحين ريح بالك ومايصير خاطرك الا طيب
بتحذير اخير: انسى حقدك عليهم
ضيف طالعه بخيبه بداخله: ان شاءالله
دخلو الدكاتره وهم ياخذون ابوه وهو وراه لين دخل قسم التحاليل اسند راسه على الجدار وهو يضرب راسه ع خفيف : حقد الحين انا حاقد يعني
ضحك بخفه وهو يعيد براسه كلمة حاقد
____
ببداية الصباح عند بيت راجي ابو ضيف:
متسدحين بتعب بعد ماغسلو الحوش ولعبو
همام وعيونه للسماء: اهخ ياظهري تكسر والله خالتي مو بسهله
باهي وهو جالس على صخره كبيره: ههههههه ماحد يعرف لك غيره بردت خاطري
تطالعهم مبتسمه : خلصتو قاموا ركبو القهوه وبخرو المجالس
باهي وهمام بنفس الوقت:خاااااله
جتهم وهي تنضم لجلستهم طلعت ام همام وهي تشوفهم جلسين ببداية الحوش
جتهم ومعها صحن فيه مكسرات وشاي :
وهذي مكافاءه للحلوين اللي تعبو معنا اليوم
باهي وهو يتعدل بسرعه: والله انا عارف مافي مثل قلب خالتي
جاء بيمد يده وضربته ام رنوه بمزح: انتظر الكبار
رنوه فتحت شباكها وبصوت عالي: مجتمعين من ورانا
همام فز بسرعه: ادخلي لاحد يشوفك
باهي بمزح: من بيشوفها بهالفجريه
همام : الصوت يسري
ضحك باهي وهو يقول بصوت عالي: يعني صوت من غير صوره
سكرت الشباك وهي تضحك نزلت بسرعه لتحت وهي تنضم لجلستهم
اما بسيل حذفت الفراش بعد ماطلعت رنوه سحبت الكرسي وفتحت شوي من الشباك وجلست بحزن وهي ضامه نفسها ومدنقه راسها على ركبها وهي تسمع سوالفهم
تحت انسدح همام على رجل امه : يمه الحين ليش سمتوني همام
امه وهي تطنشه : باهي عطني كاستك
مد لها باهي وهو يقول: من غير نعناع
ضحكت ام رنوه وهي تقول: سبحان الله نسخة ضيف
باهي وهو يشوف همام يحره : همام اعقل بزر انت
همام : يمه شوفيه تراني ماسك نفسي عنه
رنوه وهي تجلس ومعها بسكوت يحبه همام: وهذا لباهي لدوره اليوم بتقوية العلاقات الاخويه
ضحكوا كلهم باهي وهو يقلد همام وينسدح على رجل ام رنوه: حتى انا عندي ام مو بس انت
ضحكت ام رنوه مع ان الموقف اثر فيها مسحت على راسه : يابختي وولدي بباهي
فتح الباب وهو يدخل ومعه اكياس كثيره وفطور :
مجتمعين من وراي ماحد يعزم
فزوا بسرعه لانه كان خلفهم وصوته يشبه لصوت ابوه مسك قلبه همام: عبالي ابوي
ضيف وهو ينزل الاغراض ويحذف المفتاح لهمام
شاف باهي منسدح بحضن ام رنوه نطق بمزح:
الله لنا
بعدها اشر هذا فطور عمامي ماباقي لهم شي ويوصلون
طالعهم وهم يطالعونه ب استغراب
باهي وهو يتعدل: اقرصوني خلوني استوعب
ضربه همام كف بسرعه
باهي : وجع قلت اقرصني
قرب من عندهم وهو ينزع نعوله ويجلس بجنب رنوه : تبون اطلع لكم الهويه علشان تصدقون اني ضيف
اشر على همام وباهي: قوموا ركبوا القهوه وبخروا المجالس ورتبوا الفرش
طلع بوكه وهو يطلع صرافاته: عسى كفتكم الفلوس امس
باهي: ايه الحمدالله كفت وزادت
همام : انا بروح اضبط القهوه
وقف ووقف معه باهي وهو يروح
طالع لخالاته ورنوه قرب اكثر منهم وهو ينطق بحزم: ابوي بكره عمليته اليوم اخر يوم زياره ابي منكم تشدون عليه مو تبكون اذ بتبكون لاتجون معنا وعمامي بعد شوي بيوصلون نبي نبيض الوجه معهم ويمكن جدي يجلس هينا مايرجع لين يطيب ابوي ابي وقفتكم معي
ام رنوه وام همام: ابشر
التفت لرنوه وهي اكثر وحده قاسمته الوجع: بعتمد عليتس جدي مايرتاح الا معتس انتي واكثر وحده مشتاق لها انتي فخليس مثل اول لاتعاملينه بجفا
رنوه وهي توقف : يصير خير ياضيف
رجع يطالعهم : حاولو تطيحون اللي براسها
امها : ان شاءالله
اخذ المكسرات وهو يوقف : البنات وين
ام همام: قبل شوي ناموا
ضيف : نوم العوافي يلا نا استأذن عندي مشوار بخلصه وبعده برجع لابوي
ام رنوه وهي توقف معه مشت وياه لين وصلو الباب : متاكد انك بخير وجهك تعبان
ابتسم : والله ياخاله بخير
ام رنوه وهي تمسك كم ثوبه: ترا مانت مجبور تستقبلهم اذ يضايقك الموضوع خل اخوانك يقومون فيهم
ضيف احتدت ملامحه : هذولا اهلي قبل لايكونون عمامي ياخاله وواجب علي اقوم فيهم وانا بمكان ابوي الحين واللي مضى من سنين مضى وانتهى
الا حياهم الله والعين اوسع لهم من المكان
ام رنوه : عساك على قوه وانتبه لنفسك
طلع وهو يركب سيارته وهو يشوف سيارتهم مقبله
تلثم بشماغه : حرك
سعود طلع من حارتهم وهو مستغرب من اللي دخلو: ماشاءالله وش هالسيارات اللي وقفت عندكم
ضيف فك اللثمه بعد ما ابعدوا : ناس
سعود عقد حواجبه: اها طيب وين رايحين الحين
ضيف: سجن الرياض
________________
الجوف:
انتهى التحقيق بعد مامسكو هادي اللي رجع له عقله وانهار لمن عرف انها بالعناية
بالسجن جالس وهو يتذكر كلام المحقق انه بينسجن على الاقل 7 شهور علشان التستر على الجريمه
بالمستشفى:
انهارت منار و امها تحاول تسندها بس طاحت وهي تبكي : راحت من يديني يايمه راحت
ضمتها وهي تهديها وتقراء عليها
_____
الرياض :
عبدالعزيز وهو يشوف السياره اللي طلعت من الحاره نزل جده وحرك مستعجل لاحق السياره
ضيف لف وهو يستمع لسعود: السياره من طلعنا وهي تلحقنا شكله واحد من ناسكم
ضيف : تعرف تضيعه ولا نتبادل
سعود ب ابتسامه واسعه: افا عليك خبره بالملاحق
طالع لضيف وغمز: تثبت زين
سعود اسرع وبدا يدخل بين الحارات
عبدالعزيز ضرب السكان بعصبيه: ولعنه ياضيف
وقفوا بعد فتره عند السجن طالعه وهو مستعد ابد يقابل الضباط بعد اللي صار حس بشي يعوره من امس حط يده على قلبه وهو يتذكر ان كل اهله بخير من اللي متعب قلبه تنهد التفت لسعود اللي يطالعه بصمت : اول مره تسكت وش صاير لك
سعود بهدوء وهو يلعب بالمفاتيح: مستغرب منك
ضيف عقد حواجبه بعدم فضول وهو يمشي لقدام:
يمكن اطول لاتبعد
دخل مديرية السجن وهو لابس ثوبه عدل شماغه واتجه لغرفة احد الضباط
________
ببيت راجي
متصدر المجلس وممسك بعصاته وهو يشوف عياله حوالينه وعيال راجي يضيفونهم ويرحبون فيهم دخل عبدالعزيز وهو يجلس يساره وملامحه ماتتنفسر
الجد بقوه: وينك اخوك ياباهي
باهي بطفش وهو ينزل الدله ويمسك اعصابه: مرافق مع ابوي
الجد : توني داق على ابوك ماهو عنده
باهي وهو يشد على كفه بقوه يحاول يمسك لسانه:
عنده اشغال
الجد : واشغاله ماتطلع الا يوم نجي ولا ماهو قد المرجال
نزل الدله بعصبيه واضحه عليه : هالكلام ماينقال لضيف ينقال للي معك واللي مقطوط بالسجن
فزو بيتهاوشون بس دخل وهو يصرخ: كل واحد مكانه احترموا البيت اللي انتم فيه
نطق جده: اخوك الغلطان
ضيف بثقه: باهي مايغلط يابو راجي وبضيق: ابوي بكره عمليته وانتم تتهاوشون ابوي محتاجكم معه مو بحاجة هواشتكم
نطق عبدالعزيز وهو يشوف ضيف ماسك ايد باهي بقوه: اخوك قل ادبه على جده
طالع باهي لعبدالعزيز بنظرات استحقار : لولا ضيف كان كملت عليك
ضيف بهمس مايسمعه الا باهي وهمام لانهم معه واقفين: لاتناقشونهم انتم بذراي انا كملو طيبكم ولا اطلعو
ابعدوه وملامحهم مكتومه
طالع لعمامه بدون نفس سلم عليهم لين وصل لجده تبادلو نظرات لو قتلت قتيل كان كفت ووفت
غصب نفسه وهو يسلم عليه جاء بيبعد بس مسكه من ايده وهو يقصر صوته: طلع ولد عمك
نفض ايده بقوه وعينه بعين جده بتحدي بصوت عالي: ولد عمي مايفرح بالطلعه ومكانه السجن
هذا اذا ماقصوه
فز عمه وهو ينطق: فال الله ولا فالك عذه
رفع حاجبه بسخريه وهو يبعد عنهم ويجلس قبال الدلال مختار ابعد مكان عنهم صد وقلبه موجعه من غير سبب رجع طالع وجيهم ضغط على ايده وهو يسمع همسهم عنه رفع عيونه لفوق وهو يدعي ربه يمده بالصبر
تكلم واحد من عمامه: مانت ناوي تعرس
تنهد وهو يلف على همام
همام وهو ماسك ضحكته: تحمل
ضيف بهمس: مو قادر اتحملهم ثواني
وقف بعد ما انهى كلامه وبصوت هادي: الزياره مفتوحه العصر معكم الين7 المغرب وعشاكم اليوم عندنا
تعداهم وهو يطلع من المجلس واحساسه اشبه بالقتيل طلع بسرعه وهو يركب سيارته وحاس الوجع شاد عليه لحقه عبدالعزيز: ضيف ضيف وقف
وقف وهو يضبط ملامحه ب اقل من دقيقه رجعت ملامحه طبيعيه ولف عليه من غير لايتكلم
عبدالعزيز بتانيب ضمير: اسف اذ ضايقتك
مارد وهو متكتف وبصعوبه مو قادر ينطق حرف
عبدالعزيز : تدري بنتي لقوها بس مرقده بالعنايه ودخلت غيبوبه
غمض عيونه لثواني من شدة الالم اللي جاه فتح الباب وهو يركب السياره حرك مطنش عبدالعزيز اخذ البندول وهو ياكل حبتين بصعوبه صاح بقوه من الوجع اللي جاه صدره يرتفع ويهبط بعد ماصرخ وقف قبال الفندق
نزل وهو يالله يوازن مشيته
دخل وهو يتجه قبال الاستقبال:
ضاري .... موجود هينا ولا
موظف الاستقبال : اسف هالمعلومات خاصه
طالعه من فوق لتحت وهو ماوده يستعمل القوه معه طلع جواله وهو يدق على سعود ابعد شوي عن طاولة الاستقبال:
سعود قدها ولا
سعود ب استغراب: بس وش السالفه
ضيف: تعال عند فندق.... والبس بدلتك العسكريه
سعود بفزه: ابشر دقايق وانا عندك
سكر الجوال وهو يتلثم ارسل لهمام:
عندك رقم ضاري دق عليه واشغله
همام: وليش ارسله مالي خلق له من امس وهو يدور عليك ويبي يشوف ابوي بس خاف تسوي مشاكل
ابتسم بسخريه وكتب: همام بتخلصني من ضاري ولا شلون
همام: ابشر بخلصك منه وبصرفه واخليه يروح لابوي
ضيف:روح وياه لايدخل على ابوي لحاله ويقلب راسه
همام : لاتوصي الحين بدق عليه واقوله اني متعطل واخليه يجيني
ضيف : انتبه لنفسك ومثل ماوصيتك
همام : تمام يلا بطلع وارسله
سكر جواله وهو يجلس على الكراسي
دقايق وهو يلف شاف ضاري نازل مستعجل والجوال ب اذنه طالعه بنظرات متغير ضاري متغير والغربه رسمت بملامحه بُعد عنه عقب ماكان اقرب له من روحه شد على ايده وهو يرجع ويحافظ على هدوئه بعز سرحانه جاه سعود وضربه على خفيف على كتفه: وش عندك متلثم
ضيف وهو يمسح على وجهه : ولا شي
سعود : وش فيك
ضيف: بدخل على حدى الغرف بس ماقدرت ابي خبرتك
سعود وهو يتنهد : هذي صعوبه شوي
ضيف طالعه وهو يدور حلول
سعود ضربت براسه فكره: شرايك تسوي نفسك عامل نظافة وتدخل
ضيف خزه : شكلك متأثر بالافلام حيل قم اسال كم غرفة ضاري وقول انك من المباحث
سعود وهو يوقف : لي جلسه معك بعد ماتطلع
مارد وهو يوقف وينتظره يروح ويخلصه
اتجهه سعود للاستقبال دقايق ورجع له وهو يهمس له: 207
هز راسه وهو يصعد بسرعه وقف قبال باب الشقه وهو يعدل شماغه دق الجرس
ثواني ووصله صوتها: منو
سعود نقز بجنبه طارت عيون ضيف وهو يشوفه يقلد لجهة الهنود: انا وصل اكل بابا ضاري يقول ودي شقه
استغربت هبوب : طيب دفع لك الحساب ولا
سعود وهو ماسك ضحكته على ملامح ضيف المعصبه: ايوه يدفع
فتحت الباب مدت يدها
دف الباب بقوه وهو يدخل ويسكر الباب بوجه سعود اللي ضربه الباب بقوه مسك خشمه بوجع: بسم الله هذا شفيه معصب
حط يده على خشمه بوجع وهو ينزل ويدعي على ضيف
حاط كفه عليها ومثبتها على الجدار
صدرها يرتفع وينزل والخوف اعتلى ملامحها وقلبها غمضت عيونها وهي تحاول تبعده: ابعد عني والله لاعلم اخوي عليك
مارد وعيونه غرقانه بعيونها الخايفه شاف الرعب والاستنكار بعيونها انهارت وهي تحاول يفلتها شد اكثر وهو يشوفها تصيح ب انهيار همس بصوت مخذول: ماعرفتيني
قلبها يدق بسرعه وايدينها ترجف بين ايدينه: ضيف
افلت ايدينها وهو يطالعها بـ كره: مالومك ماتعرفيني سويتي سواياك وانحشتي
هبووب والدموع ماخذه مجراها وصوتها يرجف: والله مانسيتك والله مالي ذنب مو بس انت اللي تعبت من هالبُعد حتى انا
ابعد عنها وهو يصد عنها وبصوت عالي: وشو اللي ما اعرفه ويهددني فيه فايز انطقي وش سويتي غير كذبتس اللي صار
هبوب جلست على الكنب وهي تاخذ نفس وشاده نفسها: مافي شي ماتعرفه كل شي عارفه
لف عليها وهو وده يذبحها: اقسم بالله ان طلعتي مخبيه شي عني لايكون اخر مابيني وبينتس وانا لاحلفت نفذت يا
سكت وهو يردد: حتى اسمك صرت اتقرف اقوله
بكت وهي تحط ايدينها على وجهها: انت مريض وربي مريض عقب كل اللي صار هذا كلامك وانا اللي مانسيتك وكم مره يجيني خبر انك طلقتني
قاطعها بخذلان: وصدقتي واقص ايدي اذ قلتي لا ضيف مايسويها بس انتي دايم كلام الناس يوديتس ويجيبتس ولا عندتس ثقه بنفستس طالعها لاخر مره وقلبه متوجع
ومن غير لايحس رجع لها وهو يدنق عليها ويمسح دموعها بشماغه وبهمس موجوع:
ماوقفت إلا عشان أمسح دموعتس
ولا انا ماشي لو إنتس ما بكيتي
تنهد وهو يرجع يقولها: اتمنى انتس مو مخبيه شي عني لان وقتها بيكون لي تصرف ثاني معتس
وطلع عكس مثل مادخل
بكت بكت الين ماتعب البكى منها
ركب السياره وعقله مو معه اسند راسه على الكرسي بتعب نفسي وجسدي تنهد وهو يردد الابيات توصف مشاعره:
والمحبه ليا اقفت مثل ماضِ السنين
لو تحاول ترجعها ، ماهي راجعه !
اتجهه للمستشفى ناسي امر سعود اللي جالس ينتظره
ضاري رجع بعد ماحس ان الموضوع كذبه
دخل مستعجل على هبوب: شافتس سوا لتس شي
هبوب بكت بقهر: قهرني ياضاري قهرني
ضاري ضمها وهويتحلف بضيف: لايكون دخل عليتس هالحقير
هبوب بعدم استيعاب لمقصده هزت راسها وهي تبكي
ثار بعصبيه: انتي واعيه للي تقولينه والله لا اوريه هالكلب
هبوب بتعب وهي يالله تتنفس: خله على عماه لاتقرب له
_______
بالمستشفى بليل بعد ماروحو اخوانه واهله
دخل ضيف : كيف معنوياتك
طالعه بزعل: وش انت مسوي الكل يشكي منك
رفع عيونه لفوق : يليل يالمشاكل اللي فوق راس ضيف
رفع حاجبه: جدك
قاطعه وهو يجلس بجنبه ويمسك يده يحطها على قلبه: يبه قلبي مو بخير
بسكاكا بالمستشفى:
صرخت الممرضه برعب: توقفت دقات قلبها
الى هنا ولي رجعه قريبه جداً
لاتبخلون بالرد ❤
قمرااي and أزميرالد like this.
فيتامين سي غير متواجد حالياً التوقيع
شكراً منتداي الأول و الغالي ... وسام أعتز به
رد مع اقتباس
قديم 25-06-20, 07:48 PM #8
زينه 4
نجم روايتي ومشاركة بمسابقة الرد الأول وابنة بارة بأمها
الصورة الرمزية زينه 4
? العضوٌ??? » 372378
? التسِجيلٌ » May 2016
? مشَارَ?اتْي » 3,420
? مُ?إني » قلب امي
? الًجنِس »
? دولتي » دولتي Saudi Arabia
? نُقآطِيْ » زينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond reputeزينه 4 has a reputation beyond repute
¬» مشروبك water
¬» قناتك mbc4
?? ??? ~
يمّه على داعيك يزداد قدّي بك افتخر يا ملهمه يا عظيمه
?? ??? ~
My Mms ~
افتراضي
جاري القراءة ................................