عقل وقلب - الفصل 6 - بقلم ورود الخالدي - مكتملة | روايتك

البارت ٦ ياسمين::: من كتله يعني قصدك انتو صعب عليكم تستغنون عني كال: اكيد صعب علينا ياسمين اي ماما هم مراح تعوف خاله وحدها..اكيد اذا اني رحت راح ادز ايناس بمكاني لان بس تخلص امتحانات السادس تكدر تجي اداري خاله.. اي بالنسبه الج الموضوع عادي بس بالنسبه النه صعبه يوميه نبدل شخص تعودنه عليه!!! ايناس من راح تجيكم هم راح تتعودون عليها مثلي!! ماكو احد يشبه الثاني ولابسهوله احد يكدر يسد مكان شخص..غيره..و.. جان يريد يكولي بعد شي ثاني بس مدري شبيه رجع باوع ع الحلقه الي بأيدي ومكمل كلامة.. كتلة. وشنو..؟؟ لا ماكو شي..ماكو شي..يله سويلنا غده تره ميت جوع؟؟ حسيته غير الموضوع بالضبط مثل محسيت اكو اشياء هوايه غامضة بعيونه.. ومرت الايام عاديه يعني يوميه يتصل بيه ثائر ونسولف هوايه بس الغريب بامر ثائر انه هو معنده رأي شكوله يكولي اي يعني ميناقشني ولا ينطيني رأيه واي شي اكوله بسرعة يوافق عليه بدون اخذ وعطى وبدون نقاش وهالموضوع خلاني هوايه افكر يعني معقوله ثائر هالكد مسالم ومثل الطفل بسهوله يقتنع بلي اريده اذا هو هالشكل ليش ضمياء جانت ترجف منه وتكول اخويه صعب وفارض شخصيته وما اكدر اعصى كلامة لو اناقشه بعدين شخصيته مو نفس شخصية الولد الي غلط عليه وعلى اهلي بكلام سخيف حتى صوته مو نفس صوته باول مكالمة سمعته بيها..وارجع اكول لنفسي يعني معقوله تغير كل هالتغيير الشاسع ع مودي ولان هو يحبني زين راح يبقى هالشكل هاديء وحباب للنهاية لو راح يتغير...طبعا اني مو غشيمة وحاولت عده مرات استفزة..واعصبه بس هو جان يغلس ويضحك ..ويكولي احبج..شيطلع منج احبج..لو تشمريني بجهنم..ومرات ادعي ربي واكول يارب ..اذا هو شخص جيد اتمنى يبقى هالشكل واذا اكو دغش بشخصيته وديسايسني اتمنى ما انغش بيه ومرات اكول لنفسي همزين معقدت لازم افهمه زين بالاول واتأكد من حسن نيته.. ومر اكثر من اسبوعين على خطوبتنا والامور طبيعيه طبعا احنا منفردنا ابد لان هو يعرف اني ما اقبل ننفرد ودائما لازم..ضمياء تكون ويانا من يوصلني..لبيت خاله الظهر..ومره وصلني لبيت خاله الظهر دخلت اسوي غده طبعا ..شفت سياره قصي ومنها عرفت هو جاي وحاليا بغرفته ومن خلصت الغده اخذت الخضرة ورحت يم خاله كعدت الكط بيها واحنا نسولف عادي اني وياها..وبينما دنحجي فجأة شفتها راسها مال وهمزين موكعت من الجربايه الكاعده عليها يااا..شبيها خاله اشو متتحرك ركضت عدلت راسها شفتها عركانه..ومغمضه عيونها وشفتها تتنفس بسرعه ..بس متتحرك متت من الخوف عليها خليت راسها ع المخده ورحت اركض وعيوني وحدهن يجرن وصعدت الدرج بسرعة يمكن سويت الدرج خطوتين من سرعتي ودفعت الباب على قصي وصرخت: قصي..قصي الحك على خاله مدري شبيها متتحرك..قصي خاله راح تموت.. هو ركض بسرعة واني وراه نزل الدرج اسرع مني واني هم وصلت بسرعة لغرفة خاله اول مفات لزم ايدها وتلمس ركبتها شافها عركانه بسرعة سألني هي بسرعة وكعت لو تأخرت ..وانتي رشيتي عليها مي لو هي عركانه بسرعة احجي.. لا بسرعة وكعت ومرشيت عليها مي هي عركانه فتح حلكها وكلي: ياسمين شكر..جيبيلي شويه شكر بسرعة.. ليش.. كتلج بسرعة جيبي شكر.. ركضت جبت شكر شفته فتح حلكه وخله على لسانها شويه شكر وراح ركض فتح صيدليه المطبخ طلع منه مغذي ما اعرف شي يشبه المغذي وجهاز اعطاءوكلي : لترتبكين لزميلي ايدها عدل. قصي خلي ناخذها للمستشفى بسرعة.. كتلج بس لزمي ايدها. لزمت ايدها بقيت صافنه شلون شكل الكانولا عبالك مضمد قديم وركب جهاز الاعطاء..وشكله ع الزاويه القريبه بعدين طلع ابره رفيعة وضربها لخاله بزندها...يعني شنو الي ديصير هو شديسوي اشو هاديء ولا عبالك امه مثل الميته ومتتحرك..حتى مخايف عليها ولا مرتبك..واني ميته بدمي اكول خاله مثل الميته ودموعي يجرن عليها..وبقينا كاعدين يمها هو ميحجي بس مخلي ايده ع نبضها ومنتظر..اشو اخذتلها فتره وبدت عيونها تتحرك وطار كلبي من الفرح من فتحت جفونها..الحمد لله رجعت لوعيها..من شافها فتحت جفونها..ابتسم الها هي ..التفتت عليه بعيونها شافتني خايفه ولازمه ايدها الثانيه ضغطت ع اصابعي عود اطمني عليها اني رأسا جرت دموعي اكثر كتلها : خاله شبيج..خاله شلونج انتي زينه هسه.. هي ابتسمت وهزت راسها فهو كلي زينه صارت زينه ياسمين لتخافين بعد اي الحمد لله.. بقينا كاعدين يمها الى ان شويه صارت احسن فهو شالها وخلاها بالسيارة وكلي: انتظرينا ياسمين لترتبكين ولتقلقين ولتخابرين امج تره امي مبيها شي ماخذها اجيك وضعها يم الطبيب.. ومن راحو اني بقيت قلقانه رغم هي رجعت لوعيها بس تصرف قصي السريع والهاديء خبلني يعني شلون عنده هيج قابليه لا ارتبك ولا رف جفنه زين الي سوا شنو وشلون كدر يرجعها طبيعيه وشلون يعرف بسهوله يشكل كانولا ويركب الجهاز وينطي ابر عبالك عنده خبره بالموضوع.. انتظرتهم هوايه صار العصر يله رجعو بس من رجعو جانت خاله كولش زينه وعبالك مصاير شي..وهو هم..خلاها بفراشها جيت يمها..كتلها: ها خاله شلونج تكدرين تحاجيني.. اي بعد خاله زينه اني لتخافين هذا السكر هبط عندي ووكعت .. يعني بعد ماكو شي. ماكو شي بنيتي.. لعد اصبلكم غدة متغديتو لحد الان اني غديته لعموري ونام قبل شويه.. لا..انتي اتغدي اكيد متغديتي..اني متغديه قصي جابلي اكل يم الطبيب بس صبي لكمة الج واله وتغدو اي هسه اصبله غده.. وصبيت الغده بسرعة وصعدت دكيت الباب كلي فوتي ياسمين قصي انزل اتغده.. ياسمين تعالي شويه.. جيت وكفت كباله سمعته يكولي: ها قصي رايد شي.. تعالي خلي احجي وياج لان انتي متعرفين بوضع امي الصحي..كوله..ومتعرفين شلون تتعاملين وياها..اذا صارت عدها غيبوبه سكر!! هااا..يعني الي صار ويه خاله غيبوبه سكر ! اي غيبوبه انخفاض سكر وخطرة كولش.. خطره ! اي خطره.. اذا خطره اشو مجان مبين عليك لاقلقان ولاشي تتصرف بهدوء يعني شلون عندك هالقابليه مدا افهم اصلا جفنك مرف..بعدين شلون تعرف تشكل كانولا وشلون تعرف عدها هبوط سكر وشلون..تعر.ف....ت.. اوكفي ع كيفج اجاوبج وحده وحده.. اول شي اني جنت قلق ويمكن اكثر منج بس الارتباك واللخة مراح تفيدني بشي ولازم اتصرف بسرعة وبهدوء حتى احافظ ع حياة امي..ثاني شي امي عدها سكر من فتره طويلة ودائما تتعرض لغيبوبه مثل هاي وطبيبها نصحني اتعلم الاسعافات الاوليه للغيبوبه.. هااا..يعني انت تعلمت ع مودها.. بالضبط؟؟ بس شلون تعرف يعني عدها ارتفاع لوانخفاض لو تنطيها علاج من كيفك.. هو هذا الي اريد اشرحه الج وصحتج عموده.. اي كول.. شوفي ياسمين ..اذا شفتيها وكعت بسرعة وشفتي جلدها رطب وعركانه..وشفتي حلكها هم رطب يعني هذا هبوط سكر بسرعة تركضين تخلين اي شي حلو بحلكها شكر او شي قريب منج طعمه حلو..واذا شفتيها اتخربطت وكلبها يدك بسرعة وكوه تتنفس وشفتي جلدها جاف ولسانها ابيض يعني هذا ارتفاع وبالحالتين لازم تخابريني اجي بسرعة يعني اذا لازم اخابرك ليش تشرحلي الحالتين.. مو الهبوط خطر كولش لازم بثواني تخلين شي حلو بحلكها..بس الارتفاع مو خطر كولش يعني تكدرين تتصلين بيه واجي اتصرف..بس بالانخفاض لازم تتصرفين بسرعة وتحلين حلكها بدون مترتبكين.. هو يحجي وتذكرت خاله من وكعت وشكيت بنفسي اكدر اكون قويه مثله وما ارتبك بسرعة وكفت وكتله: انت تحجي من كل عقلك اني منيلي كلب مثل كلبك البارد لو عندي هالقابليه واكدر اسيطر ع اعصابي وما ارتبك وافكر بالاعراض لو اعرفه هبوط لو ارتفاع اصلا اذا شفتها صارلها مثل الي صار قبل شويه واني وحدي بالبيت يمكن اموت قبلها. شافني وكفت واحجي واني منفعله وبعدلي نص كلمة وابجي وكف كبالي حيل قريب مني وكلي:: ايباه...انتي القويه الذكيه هيج تكولين ؟؟ نرفزني من كلي قويه وذكيه مدري ليش بسرعة دموعي نزلت ..وصرخت بوجهه.. لا قويه ولا ذكيه ولا بطيخ..منو كلك اني قويه منو..اصلا اني اجبن وحده بهالدنيا..تريدني اتعامل بمسألة حياة او موت منيلي هالقوة التحجي عنها..منيلي..منيلي..؟؟؟؟ من شافني ابجي رأسا ابتسملي ابتسامته الحنينة الحلوة الدافيه..وبسرعه جرني بحضنه حضني هيج بحنيه وبهدوء وجهي صار بصدره وعطره مله انفاسي..وهو حاضني برقه وسمعته يكولي،بصوت ناصي: لتبجين ياسمين..بداعتي ابد لتبجين كدامي.. اني مدري شبيه هدأت بحضنه مثل الي ارتاحيت من حضني ويهدي عليه اصلا..حضنه الدافيء اخذ روحي يمكن هالثواني جانت احلى لحظات عشتها..استغربت من نفسي شلون مثل الطفله غمضت عيوني وصوتي ضاع ومتمنيت ابدا يعوفني بالعكس جنت اتمنى يبقى حاضني اطول وقت..يمكن دقيقتين هو حاضني..بس اني فجاة حسيت ع نفسي وانتبهت عزززززة..عزززة هاي شديصير وهاي اني شبيه ساكته بحضنه وراضيه يحضني هالشكل..لا وفوكاها مستمتعة بهالحضنه وماواريدها تخلص..عززززة..والف عزززة هسه شيكول عليه شنو مصدكت احضنها يربي شكد عيب شكد فشله منه..ومن فشلتي بسرعة رفعت اديه ودفعته وتراجعت خطوات وكتله: هاي شديصير ..قصي..شنو هذا الي سويته شلون تحضني هالشكل..عزززة..عزززة بعيني.. اقترب مني خطوه..كتله...بعصبيه .. ابقى بمكانك قصي.. ياسمين شبيج شنو فهمتي؟؟..تره مقاصد شي والله؟؟ مكدرت اسيطرع دموعي وبنفس الوقت كتله بصوت حاد: شنو مقاصد قصي ..انت منتبه شنو الي سويته انت..جنت حاضني..جنت مخليني بحضنك..وشابكني باديك..شنو مقاصد...متكولي شنو يعني مقاصد؟؟ اي والله فعلا مقاصد شي..صح حضنتج بس وداعة امي حضنه هيج بريئة مو قصدي الي ابالج..؟؟ شنو مو قصدك الي ابالي..واني الغبية شلون بقيت بحضنك كل هالوقت انت ..انت جنت مستغل دموعي وخوفي ع خاله..مو..و!! قاطعني.. لا ..ابد والله متحملت اشوفج تبجين وخايفة بس هيج خليتج بحضيني حتى اهدي عليج؟؟ تهدي عليه قصي..ليش اني طفله لو شنو بالضبط انت نسيت اني شكد عمري ونسيت اني مخطوبه نسيت هالشي؟؟ واذا مخطوبه ليش اني شمسويلج؟؟ لا ممسويلي شي ابد...قابل شمسوي باجر من اتزوج اكوله لثائر والله اني اشرف بنيه بالدنيا باستثناء شغله وحده وهي انه ابن خالتي جان يحضن بيه مو!! خررب...لج ياسمين لتخبليني مصار شي ولتكبرين الموضوع وتحوليه لموضوع سخيف وكأنما اني جان قصدي متعة جسديه لو تحرش..الموضوع موهالشكل ابد؟؟ لعد بأي شكل..تفسره والله متحملت اشوفج تبجين وحضنتج معندي اي قصد ثاني ولا الي نيه اتحرش بيج الله شاهد هالتشوفيني توني جايب امي من الطبيب وحتى لو اني شخص فاسد مثل ممفكرة ابد مجان الوقت مناسب افكر بهيج شغلات طايحظها...بس اذا مقتنعتي بكلامي معناها اني برأيج فعلا شخص فاسد ومو اهل للثقة وهذا تفكيرج حيل يجرحني ويأذيني ياسمين.. ورجعت بجيت مره لخ وكتله: بس قصي انته؟؟ معندي اي نيه عاطله صدكيني!!!! وطلع صوتي متقطع كتله: حتى لو حضنك جان بريء ومعندك قصد لو نيه عاطلة..اني..اني بعد ما اكدر اخلي عيني بعينك..والله ما اكدر .. وعفته وركضت فتحت الباب ونزلت دخلت بغرفة احلام شبعت بجي تقريبا ساعة اني بس الوم بنفسي وابجي وره شويه سمعت صوت بالصاله مسحت دموعي وخليت اذني ع الباب..يمكن هذا صوت احلام بت خالتي يمكن جتي..مسحت دموعي زين وطلعت.. شفتها كاعده بالصاله وياهل زوجها..سلمت عليهم..قصي نزل سلم ع زوجها وتصرف طبيعي بس هو عينه مني اني مدنكة ما اريد ابين شي طبعا زوجها بسرعة راح لان كال ورايه طريق..قصي طلع ويا للباب وبسرعة صعد لغرفته يمكن لان حس اني ما اريد عيوني تلتقي بعيونه...ومن خلال حجيهاعرفت انه هي عدها ولاده وجايه تجيب يم اهلها..بس استغربت لان خاله من زمان كالت هي بشهرها فسالتها: بس انتي حيل تأخرت ولادتج لان خاله اول مجيت هنا كالت انتي داخله بالتاسع واني صار فتره طويله يم خاله؛ اي غير حسابي كوله غلط خالتج شمدريها خطيه تخابرني اكولها بالتاسع بس من اخذت سونار الدكتوره كامت تضحك ع عقلي اكولي وينج اوين التاسع هستوح بالسابع شفتيني شكد فاهيه حتى حساب الحمل ما اعرفه هههه..عادي..بس هسه خاله تفرح بجيتج!! شو مال لها حس امي لاهيه ولاعموري. اي نايمه خاله اخذت علاج ونامت وعموري هم نام.. لعد انتظرهم لما يكعدون؟؟اي انتي شخبارج سمعت من امي انخطبتي لولد يجنن.. لا مو لدرجة يجنن يعني شاب عادي.. شوف شلون تطرد عيون امي شايفه صورته خالتي مشوفتهيا تكول اشكراني ويخبل.. اي صح هو اشكر..هههه.. مو كتلج اطردين عيون. احلام اجيتي بوكتج تدرين بعد ايام لعرس ..نادين ومخبوصين خبص..وكل شويه تخابرني تعالي ساعديني وروحي وياي للسوك واني ميهينلي اخلي خاله وحدها همزين جيتي حتى اروح اليوم ويه نادين نكمل نوقصها مال العرس.. ياااا..شنو بس اجيت تردين ترحين.. اي اروح اليوم ويه نادين خطيه. براحتج... وفعلا طلعت من بيت خاله بدون ميعرف قصي واول مطلعت وكفت تكتك وصعدت ورحت لاهلي اول مدخلت سألتني ماما: يا..ماما شو اليوم جاية من وكت ! ماما مو احلام بت خالتي جتي وتكول عدها ولادة وانتي تعرفين نادين كل شويه تخابرني حتى نروح للسوك اني وهيه نججز بدلات وصالون لان مضل شي ع العرس فاني كلت استغل جيه احلام حتى اجي اطلع ويه نادين..نحجز.. ياااا...عدها ولادة شنو اني عبالي جابت عد عيالها تره هيه حبلت قبلي واني اليوم يله فتت بشهري..؟؟ لا ماما خطيه طلع حسابها غلط هاااا..هاي هم يرادلها تعب ..واذا جابت هم لازم اروح يمهن ادير بالي عليها.. متوقعت بابا ديسمعنه..رأسا طلع من الغرفة كال: وين ترحين يامره فوك التعب مالتج ترحين ادارين بت اختج..واني بطنج كدامج.. شوف..شلون يصنط علينا ..يارجال شبيك انت شايل هم لحملي والله لوحامل ببنيه مثل كل مره جان مشتريتني بفلس بس لان عرفت حامل بالو لد خايف على ابنك؟؟ اي وهذا حقي.. لتخاف بعد ماكو خطر ع الطفل هاي هيه اليوم دخلت بالتاسع وعن قريب اجيبه وتفرح بشوفته..ونخلص من هالربابه.. اي بس مترحين اذا جابت بت اختج؟؟ على بختك ابو ياسمين خطيه هاي نفسه ومداراتها ثواب بعدين منو يداريها تره بناتك كولشي ميعرفن بمدارات النفاس .. بكيفج بس اذا صار شي لبني تعرفين تاليها..؟؟ ههههه..لتخاف ميصير شي ان شاء الله دخلت لغرفتنا لكيت نادين تحجي ويه فرقان صعدت فوك كعدت ع السطح وحدي افكر صح الدنيا حيل بارده والهوه ثلج ..بس مهتميت محتاجة اكعد وحدي ..وافكر زين بكل الي صار اليوم ومدري ليش غمضت عيوني وتخيلت نفسي بعدني بحضنه لقصي..ما اعرف ليش حسيت حضنه احلى مكان بهالدنيا استغربت من نفسي ليش بقيت بحضنه ليش هالكد سكنت روحي واطمأنت من حضني عبالك حضنه هو الامان من كولشي جان متعبني بهالدنيا..وبعدين كلت لنفسي اني بحياتي محد اقترب مني هالكد يمكن لان هذه اول مره شخص يضمني لصدرة ويحسسني بحنانه..معنى هذا انه افكاري وكرهي لاي رجل جان بيها نوع من الخطأ وانه القرب من الطرف الاخر بيه اطمئنان وامان للروح..بس هالاحساس ويه كل رجل لو بس ويه قصي..ياااا..واني شبيه هيج افكر وشمدريني بحضن كل رجال قابل اني مجربه الرياجيل كولهم لوراح اجربهم كبر طمني هاي شلون افكر اني وين راح عقلي..شكد عيب ..هيج افكر.. بس اني حيل صرت استحي من قصي ويمكن بعد ما اكدر اخلي عيني بعينه وتذكرت نظراته وعطره ..دوختني هالافكار وبينما جنت صافنه دك موبايلي لان من صعدت اخذته وياي وشفت رقم قصي اووف اتصل عرف اني طلعت منهم واتصل يربي شأحجي وياه حيل استحي منه: الووو.. الووو ها ياسمين ليش رحتي ..ليش طلعتي بدون متكوليلي او ع الاقل تخليني اوصلج: قصي مو.. مكملت قاطعني.. مو شنو ياسمين مو كتلج مقاصد شي..موحلفتلج برب العالمين وبغلاة امي المعندي اغلى منها وكتلك جانت حضنه بريئه والله اعرف والله ومصدكتك بس.. بس شنو!! بس اني مستحيه منك ما الي عين اخليها بعيونك؟؟!! ليش انتي شمسويه وهالكد محمله الموضوع!! هاااا..لا ممسويه بس ..بس استحي ..اي والله مستحيه منك خلي ابقه كم يوم ما اشوفك بلكي انسه الموضوع؟؟ يعني شنو ناويه فعلا متجينه وشنو كم يوم شكد يعني بالضبط❤️❤️ مو احلام اختك جتي وعدها..ولادة فماما راح تجيكم كم يوم اداريها تعرف اني ما اعرف بشغلات النفاس واما اعرف شنو...و قاطعني يعني ردتيها من الله على الله مو ياسمين..جيه احلام جتي من صالحج مو؟؟ لا..بس ماما هيج كالت!! لا اني فاهمج ياسمين انتي بعد مال الج نيه توصلين لبيتنا بسبب الي صار ومهما حلفتلج مراح يتغير شي! لا..والله بس يخلص عرس نادين واحلام تكوم بسلامة اجيكم!! اكيد اكيد .. واني ما اصدك بكلمة اكيد حلفتلج بغلاة امي الي هي اقرب الناس لكلبي ولروحي وانتي هم حلفليلي باقرب الناس لنفسج حتى اصدك انتي راح تجين؟؟ بصراحة من كلي حلفيلي فكرت منو اقرب انسان الي وملكيت غيره..فبسرعة كتله: وداعتك اجي قصي.. هو سكت شويه وكلي: شنو...ش..شكلتي؟؟ كتلي حلفيلي باقرب الناس الج واني معندي اقرب منك..فكتلك وداعتك.. سكت مسمعت صوته عبالي سد..الخط انتظرته يحجي محجه فكتله: الوو..الووو..قصي انت وياي..لو..انكطع الخط؟!!!!. شويه وكلي وياج..وياج..ياسمين.. شفته صوته متقطع مرتبك فكتله.. ماما دتصيحني هسه راح اسده تصبح على خير..وسلملي ع خاله خاف ما اشوفها كم يوم.. صار..تدللين تصبحين ع خير.. ثائر::::: من حجي ضمياء وياسمين عرفت انه اخت ياسمين الاصغر منها بعد كم يوم عرسها..وشفتها فرصه كلت احاول الكة اي حجه اشوف بيها ياسمين على انفراد..واحجي وياها واخليها تقدم موعد زواجنا بحجة اختها الازغر منها راح تتزوج وهي اداوم فشنو المانع احنه هم نتزوج بسرعة وتبقى هي بدوامها لان كلبي طك من وراها وتعبت حيل واني اسايس بيها..بلكي اكدر اقنعها..بلي اريده وتخلص هالمهزله مال التذلل والتمسكن الها..وتصير الي وذاك الوكت غصبا عليها تخنع وتتقبلني مثل ما اني..بعدين هيه حيل منشفتها عليه من خطبتها لليوم وضمياء مخليتها حارس بيناتنا حتى ما اتقرب منها..لو اغازلها بس هين الثلاثاء الجاي قبل حنه اختها اخلي ضمياء مداوم واني اروح الها للكليه بحجة اوصلها واكدر انفرد بيها واحجي براحتي وبلكي اخذها بفد زاويه بشارع فارغ واحصلي منها بوسه لو حضنه موتتني كلبي طك من وراها....ام خشم اليابس انتظروا بارت٧ وتستمر القنابل حتى البارت القادم انتظرو الاحداث النارية