عقل وقلب - الفصل 5 - بقلم ورود الخالدي - مكتملة | روايتك

البارت 5 قصي::: بس طلعت من غرفتي كمت نزعت التي شيرت بعصبيه وشمرته لان احس نفسي مختنك خنكة موطبيعية اخذتلي دقايق كاعد صافن الى ان ارتاحيت شويه وكعدت ويه نفسي افكر بانفالاتي وحالتي الممفهمومه..احجي ويه نفسي شبيه اني ليش هالكد تضايقت واختكت من حجيها وياي وعركه تاخذني وعركة ترجعني شعليه بيها ترتبط تسوي علاقة تحب ..تنخطب تتزوج اني شنو علاقتي بيها وبموضوعها بنيه شابه زغيره وحلوة واخر مرحلة دراسيه طبيعي جدا..تنحب وتنخطب او هيه نفسها تحب وتدخل بعلاقة اني شكو حامي حمامي عليها..وراجعت كلامي الاخير وياها ..حسيته حيل اوفر وجامد اي كولشي مر بهالدقايق الفاتت جان اوفر مني حالتي وكلامي وياها جان رب الاوفر ..بعدين لنفترض اني ضايج لان عندي حسابات ثانيه بخصوصها شنوجنت نايم وهسه كعدت من النوم واكتشفتهن ..تره مومنطقي هالشي..لان هي كبالي طول النهار لو عندي شي يمها جان تحركت باتجاها..خطوة ..ع الاقل جان فكرت بيها بهالطريقة بعدين اني اساسآ ليش مفكرت اوووف دخت والله مجاي افهم نفسي ولا افهم الي ديصير بيه بسببها شنو عندي اهتمام خاص من ناحيتها مثلا معجب بيها او احبها لا..لا ابدا اني بعدني احبها لزوجتي ومنسيتها لحظة وعايش على ذكراها..اصلا امي ماكله كلبي وتكولي عيش حياتك والحي ابقى من الميت بس اني ابد معندي هيج رغبة..لعد شبيه بس اريد افهم شبيه بالضبط البنيه جتي تحجي وياي بكل لطافة وصراحة باعتباري كلتلها قبل اني صديق مقرب واحجيلي كولشي..وهي على ضوء كلامي جتي تحجي وياي..كرجل اكبر منها بسنين ومار بتجارب ..هي مماره بيها وتريد تاخذ رأيي لان مؤدبة وحبابة وممتعلقة بأحد قبل..واني الغبي متصرفت بحكمة هالمرة لا دمي فار حتى هي انتبهت وحست شكد جنت منفعل وعركان وتلافيت الموضوع وكتلها جنت مصخن وصدكتني بس كلامي الجاف وياها..شلون راح تفسره لان اني جان صوتي حيل متوتر ومبين مراضي بالعلاقة الي دتحجي عنها واحجي وياها..بتهكم واضح..شنو السالفة شبيه مضبطت نفسي كدامها..شهالتسرع والغباء مني..لا..منا وجاي لازم اكون اكثر تحفظ عيب منها تحس انه اني..ما اريدلها الخير..لان هي حجتلي قبل عن حياتها ومشكلتها وكالتلي هي متثق باحد وخطية رادت تبدي صفحة جديدة ورادتني اول شخص يشجعها..لان الفكرة مطروحة..سابقا بيناتنا..بس هي شنو كالت بالاخير كالت اني ان شاء الله راح اخذ القرار الصحيح..شنو راح تقرر..والله ما ادري بس ع ضوء كلامها وياي اعتقد راح تحجي ويه هذا الولد وهذا شي ابد ما اتمناه..كل الي اتمناه حاليا ينتهي هالموضوع وكأنما مابده اصلا ثائر::: اوووف صار اسبوعين اتوسل بضمياء واكولها لحي عليها لتبردين عن موضوعها بلكي الله يهديها وتفكر بيه وتقبل تنطيني فرصة زغير اثبت ببها حسن نيتي الها..الى ان ايست منها مضل عندي امل بس بيوم جتني ضمياء تضحك وتباوع عليه كأنما عدها فد حجي جديد جريتها من ايدها واخذتها لغرفتي.. ها ولج شو تضحكين شكو ماكو؟؟ ماكو الا كل الخير واخيرا ياسمين قبلت تفكر بموضوعك.. الله عليج هي هيجي كالت؟؟ اي والله واذا تحب اثبتلك باجر تعال من وكت للجامعه حتى تلكانا بالانتظار بره تره هي تنتظر ابن خالتها ياخذها..لبيت خالتها..اني مسولفتلك عليه قبل.. اي كتيلي هي يم خالتها المريضة اي بس انت تعال من وكت حتى تشوفها من بعيد بس دير بالك مو تجي يمنا تحجيلك حجايه وتجفص تره هيه حيل متحفظة كدام الطلاب اي مو تدلل بس خلي اشوفها كلبي طك.. اسم الله ع كلبك عيني ع الحب..هيجي ايسوي بالبني ادم.. انجبي انتي وطلعت من يمي تضحك وثاني يوم تعمدت اروح من وكت لكيتهن واكفات بره بقيت واكف شويه شالت راسها شافتني ودنكت اويلي خجوله فديتها بس هاي ضمياء الغبيه مخلتني شويه اشبع شوف منها بسرعة جتني تركض..وصعدت لج ثوله بسرعة جيتي جان تأخرتي شويه هاي شبيك هسه ابن خالتها يجي بسرعة وعيب يشوفكم واحد يباوع ع اللاخ؟ اي وشلونه هذا ابن خالتها..يعني شكد عمره عمره ٣٠سنه خطية ارمل وعنده طفل؟؟ ها كلتي ارمل يجوز مخلي عينه عليها.. لا اطمئن ..هذا مو مثل هالناس عايش على ذكرى مرته الماتت..حسب حجي ياسمين وحتى اخوات ياسمين يسمنه خالو لان هو مربيهن.. هااا..مربيهن.اي الحمد لله.. اكولك تره ياسمين متحب احد يدخل بامورها العائلية ولا تحب احد يفرض عليها شي يعني اذا تريد تكسبها بصفك شتكولك كولها اي وصار.. اي هاي سهله. ورجعت للبيت بالليل كلت لضمياء اتصلي بيها ومن ترد احجي وياها شويه واني اخذ الجهاز منج واحاجيها.. وفعلا اتصلت بيها حجن شويه..بعدين اخذت الجهاز هلو ياسمين.. هي ارتبكت.. هااا...منو..اقصد هلوو..هلو اخويه ثائر؟؟ ياسمين صدقة لعمرج لتهبطين معنوياتي بهاي مال اخويه اسمي ثائر سميني بس ثائر ماشي شلونج وردة.. الحمد لله..بخير .. ضمياء حجتلج عني مو. سكتت شويه..وبعدين كالت: اي..حجتلي بس ثائر اني!!! لا بس ولاشي اترجاج انطيني فرصة..زغيره والله اني مو من ذولة الي سهل عليهم يتلاعبون بمشاعر بنيه اني انسان نيتي مبينه..ومرايد منج علاقة وطبه وطلعة والله رايدج ع سنه الله ورسوله بس من عرفت من ضمياء انه انتي متردين زواج تقليدي ردتج تتعرفين عليه وتقتنعين بيه تمام..وكدامج كل الوقت ومراح ازعجج لو الح عليج يوميه نحجي بالتليفون نتبادل الكلام والافكار وواحد يفهم اللاخ قبل كولشي شكلتي؟؟ الله كريم.. اعرف الله كريم بس الله يخليج انطيني كلمة مؤكدة حتى ارتاح ويصير عندي امل ماشي تكدرتتصل بيه هيج وقت ونحجي بس يعني مو هوايه ماشي اني اشكرج واحمد الله واشكره لان اتعرفت عليج.. هسه اروح باجر نحجي ممكن؟؟ اي براحتج عيوني انتي؟؟ الله وياك وصرت يوميه اتصل بيها..يعني نحجي ربع ساعة او نص ساعة بمواضيع عامة اسولفلها عن حياتي وشلون تعبت وتغربت ..وشويه شويه كمت اسألها عن الاشياء الي تحبها والي تكرهها..واحلامها عن المستبقبل طبعا هي فد شخصية عجيبة ومو مثل اي بنيه حيل تعبتني..كولش متحفظة متقبل اي حرف زايد ولا تريدني اغازلها ابد..بس شسوي مضطر اسايسها..ومضطر اكولها اي..وصار..وصحيح ..وحقج ويجرالج..رغم احسها تجفص ابطني من تحجي وياي معلك ومن وره خشمها عبالك..دا اجدي منها الكلام بس هين..دخلي تصير الي وابيتي وكل هذا يتغير..وميمشي الا كلامي عليها وميصح الا الصحيح..وره ٣اسابيع حسيت نفسي تعبت واني امثل دور الشاب المطيع الهاديء..اي اكيد اتعب لان اني بطبعي عصبي وفارض كلمتي بالبيت وع الكل..صعب عليه امثل هالدور وابقى خاضع لكولشي وقررت انهي هالمهزله واكولها...اني تعلقت بيج واذا مقتنعه بيه اريد اخطبج باسرع وقت..وبصراحة طرت من الفرح من كالت بكيفك شوكت متحب اجيب اهلك تعال اخطبني..اويلي هي هاي اللحظة الي جنت منتظرها..ومطولت ٣ايام ورحت خطبتها بس هي مقبلت نعقد لا سيد ولا محكمة لان شرطت..من تكمل هالسنه الاخيرة يلة نعقد وتصير حلالي يله مو مشكله المهم صارت خطيبتي يعني هيه الي الي ولو مضطر ابقى حباب ومطيع وياها منا لما تخلص السنه بس شسوي..هذا شرطها بعد.. قصي::: من يوم الي حجيت ويه ياسمين لحد الان متناقشنا بشي بعد الامور هادئة وتوقعت انه هي شالت فكرة هالولد اخو صديقتها من بالها جنت مرتاح كم اسبوع..الي ان اجه يوم جنت اتريك اني وامي وسمعتها تكولي: يوم عود العصر اخذني البيت خالتك اليوم يجيبون النيشان؟؟ اي نيشان؟؟ نيشان ياسمين غير.. حسيت كلبي وكع مني وراح..بس مردت ابين لامي شكد تأثرت فكتله: ليش هي ياسمين انخطبت؟؟ اي انخطبت ذاك الخميس واليوم يجيبون نيشانها والحلقات..ومن هالسوالف.. هااا..يعني حفله بيناتهم اي..الله يسعدها ويتتملها بخير تستاهل ياسمين.. لا يوم مو حفله بس ام الولد راح تجيب النيشان..والحلقه؟؟..لان البنيه مقبلت تعقد لاسيد ولامحكمة..منا لما تخلص هالسنه فراح يجيبن نيشان بسيط وحلقه هي تلبسها منا لما تخلص الامتحانات.. حاولت اكون طبيعي قدر الامكان؛ يعني اليوم ما اروح عليها للكليه اجيبها؟اكيد بعد متجينا بحكم كونها انخطبت بعد؟؟ حجيت هالكلمات واكو طن قهر على صدري حسيت نفسي بعد ما اشوفها لياسمين بس امي كالت: لا شلون متجينا تجينا عادي بس خطيبها هو الي راح يوصلها النا يوميه ..لان اخته وياها اداوم..فيجيبها بطريقه وانت عود بالليل رجعها لاهلها.. وليش هالدوخة البنيه انخطبت ليش ينحرج خطيبها مثل خطيب نادين.. لا ياسمين مو مثل نادين حسب حجي اختي تكول هي متفاهمه ويه خطيبها وكايلته راح تضل تجينا منا لما يتزوجون.. براحتها اذا هالشكل هسه اروح للمحل لان تأخرت.. وصعدت سيارتي روحي طافرة من الدنيا هاي هيه انخطبت ياسمين شحجي وشكول بعد غير الله يسعدها خطية بس بنفس الوقت بداخلي شي يكولي..ليش ضيعتها من ايدك بنيه تخبل ليرة ذهب..وانت ميال الها ليش تجذب على نفسك اي ميال الها اصلا بس تتذكرها تبتسم ليش روحتها من ايدك بالسكته ومبادرت مبادرة وحده ولو تلميح الها اوووف شهالبرود وهالسكته بس يمكن ممقسومتلك ويمكن الله قاسمها لغيرك..انسى..انسى قصي وارضة بقسمه الله اي انسى موضوعها وضل على ذكريات سحر اروحلك...وابرد لراسك...شغلت رام السيارة ومن سوء حظي طلعتلي اغنيه ..هي قسمه وانت مامقسوملي ذيج دامت حتى هاي ادوملي..صح اني محمل الاغنيه ع الرام من زمان بس مجانت تعنيلي شي وجنت اسمعها كأي اغنيه عادية بس اليوم حسيت الاغنيه وكل كلماتها تنطبق عليه اي والله كولها تنطبق عليه فعلا هي قسمة وياسمين ممقسومتلي ..وسحر الي حبيتها مدامتلي هالنوب هاي ادوملي اوف كل كلمات الاغنيه بالضبط مفصله عليه..وبقيت اسمعها واعيدها الى ان وصلت لمحلي عبالك دا اواسي نفسي بيها.. ياسمين:: اليوم راح يجيبون نيشاني العصر..طبعا ثائر اتصل بيه قبل يومين وكلي يريد يسوي حفله نيشان زغيره بس اني رفضت حفله يعني لازم البس فستان وانزع حجابي منه..ويلبسني حلقه ويلزم ايدي واني هالحجي ميصرفلي مستحيل انزع حجابي منه او يلزم ايدي اذا منعقد واصير حلاله لهذا كتله ما اريد حفله بس والدتك وضمياء يجن يجيبن نيشان وانت ماكو داعي تجي تحججت عندي امتحانات هالايام مو مال حفلات وفعلا جابو نيشاني وامه لبستني الحلقة والكلادة وكعدنا كعده بسيطة وراحن ومن ثاني يوم اجه للكلية..وصعدنا اني وضمياء ويا حتى يوصلني لبيت خاله بالاول ويرجع هو وضمياء لبيتهم طبعا كعدنا بالكشن الوره..ومن وصلني صدفه جان قصي يفتح باب بيتهم فكتله ثائر انزل سلم على ابن خالتي تره هو مثل اخويه الجبير واحب يتعرف عليك..وفعلا نزل واني هم نزلت..اول منزلت شافني كتله: هلو قصي شلونك.هو التفت شافنا كولنا نزلنا.. اهلا وسهلا..تفضلو بس ثائر تقرب منه وتسالم ويا.. سمعته يكوله: يا اهلا وسهلا..تفضلو جوه وكت غدة خلي نتغدة سوه.. ثائر كال: غير مره انشالله..نجي ونتغدة ونضوجكم.. هسه مستعجل والله.. وصعدت ضمياء للسيارة وثائر هم صعد ودخلنا اني وقصي من باب المطبخ بس خليت جنطتي ع الطاوله: الف مبروك ياسمين مبين خطيبج خوش ولد ربي يسعدكم.. اشكرك..قصي يوم الالك.. اني..ههههه..اني يومي خلص من زمان الوكت والايام الحلوة الكم انتو الشباب!!! بس انت هم شاب عمرك بس ٣٠سنه.. ابتسم ابتسامه حنينه وباوع بعيوني وكال: ما اخفيج تفاجئت البارحة من خالتج حجتلي..عن خطوبتج جنتي ساكته طول الوكت متوقعت ضامتلنه هالمفاجأة الحلوة.. الله يحلي ايامك ويوفقك قصي..بصراحة جنت ساكته لان كلامنا الاخير حسسني انه انت ممهتم فمردت ادوخك بموضوعي.. يمعوده ..لا دوخة ولا شي المهم النتيجة جانت حلوة والولد طلع خوش شاب ويستاهلج ان شاء الله يطلع يستاهلني!! ههههه..ليش انخطبتي اله وبعدج ممتأكدة هو يستاهلج لولا؟؟ بصراحة بعدني ممتأكدة والله لهذا مقبلت اسوي اي ارتباط رسمي او شرعي الى ان اقتنع بيه كولش! اي حقج هاي عشره عمر..بس خطيه راح اتعبي هوايه هالشكل! اي لازم يتعب حتى يحصلني لو ما استاهل التعب اني برأيك؟؟ تستاهلين ..كولشي..ياسمين. وشفت عينه راحت على ايدي وركز ع الحلقه الي بأصبعي مدري ليش استحيت منه وكتله اكولك اشو انت تعزم ع الغده واحنا بعدنا مطابخين؟؟؟ اي..غير حجايه التنكال دنيا الظهر الناس شمدريها غدانه متأخر.. هههه..اي صح.بس افرض دخلو فعلا ورادو غده.. اي هاي سهله بدقايق اجيب غده من المطعم..ونغديهم شنو يرادلها روحة للقاضي يعني..؟؟ ههههه اي صح يله راح اسوي غده..ع السريع انت جوعان واني هم ميته جوع وخاله تلكاها منتظرتنا.. اي صح بس احنا هم لازم ندبر حالنا كولها كم شهر تتزوجين وبعد منشوفج!! شنو بعد متشوفوني..ليش يعني! شفته ادنه يمي ما اعرف ليش جانت نظراته بيها معنى مكدرت افهمه..وكلي: يعني راح تنتقلين لبيت الزوجيه بعد كم شهر اكيد مراح نشوفج قابل راح تجينا حتى اديرين بالج علينا مثل هسه!! ملكيت جواب بس بقيت صافنه بعيونه حسيت كلامة مبطن يعني بيه فد معنى ثاني وحسيت هو شكد مهتم انه بعد كم شهر راح يفتقدني من اتزوج..فكتله: يعني راح تفتقدوني اذا تزوجت؟؟ من هسه افتقدناج ياسمين؟؟ مفهمت؟؟ يعني قبل يوم واحد اني جنت اجيبج للكلية واجيبج لبيتنا عادي هسه صرتي مسؤوله من خطيبج هو بكيفه يجيبج النه يعني بدينا نفقد وجودج الطبيعي بينا شويه شويه واكيد بعد كم يوم خطيبج يبزع وبعد ميقبل تجين النه؟؟ لا..لا ابد والله اني حاجيتله كولشي وكتله خاله مريضة وانتو تحتاجوني....وهو مجان عنده اي مانع وخطيب نادين هم مجان عنده اي مانع بالبداية بس شويه شويه بدت المشاكل بينهم بسببنا..واني بصراحة ما اريد تصيرلج مشاكل بسببنا..وتتاثر علاقتج بخطيبج؟؟ ضوجني كلامه لزمت جنطتي وكلت اروح لاهلي بعد هالكلام الي كاله فكتله: خو كول بعد لتجينا ليش تتحجج بخطيبي وتطرني بادب قبل ما التفت لزم اديه ورجع باوع بعيوني: اني اطردج ياسمين..شلون كلبج نطاج تكوليها! مو اني هيج فهمت من كلامك! بس هذا الي فهمتيه....زين ليش مفهمتي..انه كلامي معنى..صعبه علينا نستغنى عنج بعد؟!! جان صوته..دافي واحسه بيه نبره الم من حجه وهو قريب مني يربي..شبيه قصي حيل تاثرت من كلامة فكتله يعني..جان قصدك..انه صعبه عليكم تستغنون عني..هااا..هو..هو هذا جان قصدك قصي؟؟!!!!! انتظروا بارت٦..انتظروه بلهفة فالبارت القادم قنبلة الرواية