عقل وقلب - الفصل 4 - بقلم ورود الخالدي - مكتملة | روايتك

البارت ٤ ثائر:: من سمعتني اعتذرت سكتت فكتله: ها ياسمين شو سكتي اعرف اني تماديت هوايه بس تره الميعرفك ميثمنك ومن عرفتج..حسيت اني هوايه غلطان والغلطان ميشفعله اي شي غير يصلح غلطة بالاعتذار..و قبل ما اكمل قاطعتني: عادي لتهتم اخي وانسه الموضوع بس اتمنى قبل متصدر احكامك ع الناس تتمهل شويه وتحكم عليهم ..بصوره صحيحة.. ذهب والله انتي ذهب وكلامج ذهب وراح اخليه كدام عيني بأي خطوه بحياتي المستقبلية.. الله كريم..اخي اسمحلي تره الوقت متأخر واتمنى يكون هذا اول واخر اتصال بينا.. ليش زعجج اتصالي تره اني مكلت شي غلط.. لا ماكو غلط بس اني ما استقبل مكالمات بس من اهلي واقاربي.. ع راسي والله وهذا يخليني افتخر انه حظيت بفرصة احجي بيها وياج حتى لو اعتبرتيها فرصه اولى واخيره تصبح ع خير واني باجر احجي ويه ضمياء ان شاء الله.. تصبحين ع خير ورداية.. سدت المكالمة جنت اتمنى اطول المكالمة اكثر ما اعرف ليش حيل ارتاحيت من حجيت وياها ومن خلص كلامنا كمت احجي ويه نفسي لك ثائر شبيك يولي..شبيك تخرفنت..بسرعة ..انت شفتها مره وحده شدعوة هالكد فرحان لان ردت عليك...قابل منو هي وانت هالكد متأثر وفرحان بردها ع مجرد اتصال زغير..اصلا انت جنت ادور حجة حتى تحجي وياها وغيرت كل خططك بموضوع ضمياء بساعات قليلة..بس ع مود تلكة موضوع تسولف بيه وياها.. ياسمين ::؛ ثاني يوم رحت للدوام عادي وشفت ضمياء ومن خلصت المحاضره الاولى كعدنا بالكافتريا ضمياء حيل فرحانه لان داومت اليوم وبديت اني الكلام: ضمياء اريد احجي وياج بموضوع البارحة طلب مني اخوج اقنعج بيه.. هههه..ها اتصل بيج والله جنت اعرف راح يتصل.. يعني تعرفين هو شنو يريد؟ اعرف اعرف كولشي.. عجيب اذا حاجي وياج ليش اتصل بيه ..لعد؟؟ هههه..لج انتي شبيج غشيمة انتي صدكتي هو متصل بيج حتى تقنعيني اوافق اشوفه لهذا الراح يجي من المانيا ويخطبني اصلا هو حاجاني من الظهر وقنعني!!! ياااا..اذا مقنعج شكو متصل بيه هنا مربط الفرس.. مفهمت؟؟ اي ضلي غشمي نفسج..يعني صدوك انتي محسيتي هو ليش اتصل.. والله مدا افهم شنو تقصدين؟؟ وج ياسمين شسويتي بثائر الولد راح ينجن..؟؟ شنو ؟؟ اي والله شافج مره وحده وفيوزات مخه عطبت..تدرين كم سؤال سألني عنج..من البارحة الحد اليوم الصبح من وصلني للكليه تدرين من نزلني من السياره بقه ربع ساعة واكف اباب الكليه يتلفت بلكي يشوفج وانتي داخله للكليه ويه الطلبة.. شهالخبال والكلام المبي اي منطق! اني هم مثلج كلت ابدا مومنطقية تصرفات ثائر ..وج معقوله من اول نظره وكعتيه لاخويه؟؟؟!!! شهالخرابيط شنو وكعته ..تره هوايه دتبالغين وهذا اخوج اذا فعلا تصرف مثل مدا تكولين فهذا دليل انه هو شخص هوائي اي بنيه يشوفها يضل يركض وراها لا ابد والله ثائر مو من هالنوع اصلا اني وماما صافنين عليه اول مره بحياته يهتم لابنيه ويضل يسأل عليها..هوايه ويحاول بكل طريقه يحجي وياها مدا تلاحظين شلون بسرعة رهيبه غير افكارة بس شافج؟ وهو هذا الشي الي يخوف بالموضوع تره الي يتنازل عن افكارة فجأة يعتبر شخص هوائي ومتلون!! لا والله ليش انتي هالكد سلبيه وقاسية ليش معندج ايمان انه اكو قدر..يمكن يغير البشر!! ياااا هاي انتي هيج تحجين اشو جنتي تشكين منه وتبجين وتردين تنتحرين بسببه!! اي والله بس تردين الصدوك من حجه وياي البارحة كلي اني جنت متسرع وصديقتج هوايه وضحتلي امور جانت خافية عليه واعتقد موضوعج ملازم نتسرع بيه ولازم نفكر بيه بطريقة ثانيه وج ياسمين من حجايتين منج دماغة لثائر افتر هذا ميعني شي الا حقيقة وحده وهي..شنو.. انه ثائر وكع ومحد سمه عليه.. وكع شنو؟؟ وكع بغرامج من اول نظره..هسه تكولين ماكو حب وغرام من اول نظرة وهاي سوالف مراهقين..مو اكيد ماكو هيج شي وفعلا هاي سوالف مراهقين واكيد اخوج عنده مراهقة متأخره..لو هو طبعه هالشكل لا ياسمين ثائر مو من هالنوع صح اني جنت اشكي منه لان جان مفكر يزوجني بطريقة محلوة بس حرام اظلمة ثائر شاب مكافح تعب على نفسه جان يدرس ويشتغل كمل دراسته وتخرج ومن ملكة تعيين سافر وتلطم بالغربه والدنيا لعبت بيه اشكال والوان حيل تعب بحياته وهو مو هوائي ومراهق اصلا ثكيل كولش واني مصدومة من تأثره بيج بهالسرعة ..بس ليش منفكر بايجابيه ليش منكول رب العالمين مدبر هالصدفة حتى ثائر يشوفج..يمكن رب العالمين يريد يعوضة ببنيه مثلج اصل وفصل وجمال وادب واخلاق.. يعني شنو قصدج بالضبط؟؟؟ يعني شكو بيها لو تتعرفون ع بعض اكثر بلكي تصير قسمه ورب العالمين يجمعكم بالحلال..ياسمين هاي اخر سنه كليه النا ومن نتخرج مراح نلكة تعيين وراح نكعد بالبيت واعرف انتي من النوع الي متختلطين ومتطلعين فاكيد مراح تكدرين تتعرفين ع شخص والي اعرفه انه انتي ضايجة من ملحة اهلج وهمه يردون يزوجوج شلون مجان وبين فتره وفتره تصيرلج مشكلة وياهم بسبب رفضج لكل واحد يتقدملج لان متردين تتزوجين بطريقة تقليديه من اي شخص. لا مو هذا السبب! لعد شنو السبب؟؟ اني اساسا رافضة فكرة الزواج من اي رجل ليش..ليش شناقصج حتى تضلين بدون زواج طول عمرج؟؟ ناقصتني القناعة بفكرة الزواج والثقة بالشريك؟ ها يعني معندج ثقه بأي احد يتقدملج..احتمال لان كل الي تقدمولج متعرفيهم..اكيد مراح تصير عندج ثقة بيهم بس ثائر غير..والله...واول وتالي مراح تخسرين شي اذا تتعرفين بيه بطريقة مؤدبه ضمن حدود كونه اخو صديقتج تحجين من كل عقلج ضمياء يعني شنو اتعرف عليه يعني نلتقي..ونطلع سوه ومن هالسوالف حتى تتعمق معرفتنا مع الاسف عليج شنو شمفكرتتي اني من هذا النوع من البنات لوشنو؟؟ لا حشاج ياسمين لو انتي من هالنوع مجان صادقتج واصلا مجان ثائر..كتل نفسه عليج من اول نظره لعد شتقصدين.؟ يعني مثلا من يجي للجامعه خلي يشوفج واحنا طالعين ولو من بعيد او من يتصل عليج ردي عليه.. مستحيل؟؟ لا فدوة لتكولين مستحيل..ياسمين لخاطر الله طلعي من هالتعقيد والانغلاق العايشه بيه عيشى مثل كل البنات ارتبطي وحبي واختاري شريك حياتج..بقناعة تره اهلج مراح يخلوج عانس طول العمر واكيد يجي يوم يخلص صبرهم ويجبروج ويزوجوج ياهو الجان..لتضيعين هالفرصة الحلوة بالتردد والتعقيد ههههه..يعني معتبرة اخوج فرصة حلوة!! اي وليش مو فرصه حلوة يعني شناقصة..مثقف وخريج ومكافح وتعبان ع نفسه وشاغول وشخصيته حلوة هااا..ومتحمل مسؤوليه بيتنا كولها واذا ع الشكل انتي شفتيه طول وجسم وشباب وملامح شكره حتى عيونه صفر ويموتن..انيق ومرتب ولبق وكلمته مسموعة بعد شتريدين اكثر من هذا حتى مجرد تقبلين تفكرين بيه وتنطيه فرصة.. ضمياء..انتي اترجاج فكري ..بداعتي فكري ولترفضين بسرعة .. بس. كتلج فكري بس فكري وبعدين انطيني رأيج ومرن اكثر من ١٠ايام..يومية ضمياء تعيد الموضوع عليه وتكولي فكري..واني فعلا بديت افكر يعني بالعقل ..كلام ضمياء صحيح هذه اخر سنه الي بالكليه واذا تخرجت راح اكعد بالبيت لان اكيد ماكو تعيين ومن انحبس بالبيت مستحيل راح تجيني فرصة اتعرف بأي انسان..صح اني رافضة الزواج ومعندي مشكله اذا بقيت عانس بس اهلي مراح يخلوني بحالي خصوصا بابا ..يوميه جايبلي عريس شكل وبين فتره وفتره ينفتح هالموضوع وبالف ...طريقه احاول اتملص منه واسده والى متى راح اكدر اواجه اهلي وارفض اي واحد يتقدملي اكيد بالاخير راح يخلص صبرهم ويجبروني..ع الزواج من شخص ما اعرفة..ليش ما احكم عقلي واتصرف...مثل مالعقل يحدد ويقرر..وليش ما انطي فرصة لثائر..تره كلام ضمياء عن اخوها معظمة صحيح لان هي من زمان تكولي ثائر شايل بيتنا ومتحمل مسؤوليه كولشي ومن زمان تكولي تخرج وتغرب حتى يشتغل بالغربة ويدزلنا فلوس نعيش بيهن عيشه كريمة..وحتى من شفته شاب مرتب وحلو وشخصية ونظراته كولها شباب وامل وطاقة شكو بيها اذا اجرب حظي بالارتباط مراح اخسر شي اذا تعرفت عليه ضمن حدود الادب الاخلاق..ورغم ما اني احاول اقنع نفسي هالشكل بكلام ضمياء احس هالقناعة ناقصة واحس نفسي معندي اي جرأة ..اخذ قرار التعارف والارتباط محتاجه احد اثق بيه يشجعني ويكولي..اخطي هالخطوة صح ضمياء اثق بكلامها وهي صديقتي ومتغشتي بس تبقه اخته الثائر..واكيد راح تكون من جانب اخوها محتاجة شخص اكثر وعي وفهم وتجربه بالحياة يشجعني ويكولي ..قرري..وجربي واختاري..بس اني اصلا بمنو اثق..وبقيت افكر ..واول شخص اجه على بالي هو قصي..فعلا قصي هو الشخص الوحيد الي من اول نقاش بيناتنا واني ارتاحيتله وحسيت نفسي اثق بيه واكدر..احجيله كولشي يخصني..بعدين هو الي طلب يكون بمثابه صديق مقرب واكد عليه احجيلة كولشي اي شكو بيها احجيلة هو شخص اهل للثقه واعي ومثقف ومتحضر واكيد راح يسمعني وينطيني دفعة امل تشجعني اخذ هالقرار قصي::: كاعد بغرفتي اتصفح فيس بوك..وبس سمعت باب غرفتي اندكت ابتسمت اي هاي ياسمين بس ليش من تجي ع بالي ابتسم يمكن لان الايام الاخيره علاقتي بيها حلوة..ناكل سوه ونحجي بامور عادية بدون توتر..ويمكن لان حاس نفسي فاهمها اكثر من كل الناس اول مندكت الباب كتلها: فوتي ياسمين.. دخلت: اي همزين بعدك منمت ردت احجي وياك شويه.. اي تعالي كعدي يمي وسولفي شنو تضلين واكفه بالباب ونتهاتف مثل الكاعدين بكهف.. ههههه..لا اكيد اكعد لان الموضوع شويه طويل وحساس اي تمام جتي كعدت ع طرف جربايتي كبالي وجه لوجه..وكالت: قصي هو الموضوع شويه خاص بس لان انته كتلي اعتبريني صديق مقرب واحجيلي كولشي اتجرأت اجي احجيلك..ولان انت بصراحة يعني اكبر مني وعندك تجارب هواية بالحياة واكيد راح تساعدني اتخذ القرار الصح.. بصراحة من حجت هالشكل مرتاحيت حسيت اكو شي وره كلامها. اي كولي..واذا اكو قرار لصالحج اكيد راح اساعدج باتخاذه وان شاء الله يكون القرار الصح! اشكرك قصي..بصراحة الموضوع يخص اخو صديقتي ضمياء حسيت روحي انقبضت فجأة رغم اني معندي شي وياها بس ما اعرف ليش حسيت هالاحساس وبدت تحجيلي عن ظروف صديقتها وشلون وكفت وياها وشلون حاولت تنصحها وتمنعها من الزواج بالوكالة وشلون اخوها سمع مكالمتهن ونزل عليها غلط ..وكلام سخيف وشلون راحت لبيتهم وبالصدفه التقت باخو صديقتها الي اتصرف وياها بهدوء وذوق وبالاخير اقتنع بافكارها وغير كل اراءه بموضوع اخته وبعدين اتصل بيها واعتذر..وبالاخير حجتلي عن صديقتها شلون جانت تحجي على اعجاب اخوها بيها..وشلون دتلح عليها بانه تنطيه فرصة يتعرف عليها طبعا هي تحجي ببساطة بس اني ما اعرف ليش حسيت نفسي حران حيل ومختنك حتى عركت..رغم الجو بارد واصلا مشغل صوبه كهربائية بغرفتي ويمكن هيه انتبهت من شافتني عركان فكطعت كلامها وكالت: قصي..شبيك اشو انت حيل عركان رغم الجو كولش بارد؟!! خررررب حست بأنفعالاتي الي حتى اني ما اعرف شنو سببها اضطريت ادارك الموقف واكولها: اي..اي صح اني حيل عركت يمكن لان جانت عندي صخونه خفيفة قبل شويه واخذت حبايتين بندول فبده تأثيرهن وعركت .. يعني انت مريض لعد ليش مرحت للدكتور؟؟ لا ممستاهلة دكتور هي صخونه خفيفة وتروح وحدها...اي كملي كلامج ياسمين؟؟ هاي هيه بعد معندي شي اكوله كل الي عندي كلته انت شنو رايك بلي كلته!! يعني شنو تحبين تأخذين رايي بموضوع علاقتج بأخو صديقتج.. لا اني معندي علاقة بيه حاليا بس حبيت اخذ رأيك انت شتشوف يعني انطي فرصة واحجي ويا لو انهي الموضوع!! انتي عقلج شنويكولج والمن تميلين اكثر ..الى ان تنهين الموضوع من هسه لو عندج..دافع تبدين بعلاقة ويه هالشخص..؟؟ طبعا سألتها هالسؤال واني قاصد لان حسيتها تميل لانه تبدي بهالعلاقة بس جايه تحجي وياي حتى تحس هيه تصرفها مقبول فكالت: لا قصي مو مسألة اميل اله والله بس..انت تعرف هذه السنه الاخيره الي بالكليه واني مو من النوع الي اطلع واختلط..ومثل متكول ضمياء يمكن هذه الصدفه الي خلت الولد يشوفني ويتعلق بيه من اول مره جانت قدر مرتبه الي رب العالمين واذا انتي هالكد مؤمنه بالصدفة والقدر لويش تاخذين رأيي اعتقد الامور الي نؤمن بيها مو موضوع نقاش؟؟ لا مو لدرجة الايمان بس لو نفكر بعقلانيه نلكة انه..هالصدفه..الي صنعها القدر يمكن تضمنلي مصير احسن من المصير الي بابا وماما مخططين اله قصي انت متعرف بابا شكد يلح عليه بموضوع الزواج..بابا بين فتره وفتره يجي يفتح موضوع الزواج وياي وها فلان يريدج لابنه بيت فلان حاجوني عليج ويردون يمشون ومن ارفض شيفكج ياطلابه يبقى فتره معاديني عبالك مسويه جريمه ..وبالكوه اخليهم ينسون الموضوع واني تعبت من الحاح اهلي وخصوصا بابا.. اي واذا هذا اخو صديقتج..نيته شريفه وخطوبه وزواج ليش يريد يبديها تعارف ..بأختصار ليش يدخلج من الشباج..اذا الباب مفتوح كدامة خو يروح يخطبج من اهلج وفضت خلصت؟؟ طبعا احجي وياها واحس دمي محترك وعركان ..ما اعرف ليش ولامستوعب ليش هالكد مقبوضة روحي واحنا دنحجي بموضوعها بس قدر الامكان احاول اناقشها بتفهم وما اريد ابينلها انه اني ضد فكره ارتباطها وانه موضوعها هو الي مسببلي الحالة الي دا امر بيها حاليا.. قصي ضمياء تكولي هو ميدور علاقات ولا يريد يدخل من الشباج..مثل مكلت انت لا بالعكس هو انسان يتصرف بشكل مباشر بس ضمياء مفهمته انه اني مستحيل اقبل اتزوج زواج تقليدي من شخص ما اعرفه وممقتنعه بيه ..لهذا يكولها ..خلي تنطييني فرصة نتعارف على بعضنا واذا اقتنعت بيه ووافقت مباشرة ادز اهلي يخطبوها..وو.. قاطعتها..وغصبا عليه طلع صوتي متوتر من كلت: اي هاي هيه واضح انه انت متخذه قرارج وكولشي خلصان لدرجة انتي دتخلين كدامي كل مبررات بداية التعارف معناها ممحتاجة رأيي.. لا اذا ممحتاجته ليش جيت كتلك اساسآ؟؟ لا ممحتاجتني ولا محتاجة اي احد يشاركج باتخاذ هالقرار لان انتي اساسا..مقتنعة بيه تحبين اكولج ليش جايه تحجين وياي اساسآ؟؟ ليش!! لان تردين شخص يشجعج وينطيج دفعة ليكدام حتى تحسين نفسج..متخذه قرار مقبول وحتى بالنهاية نتيجة هالقرار اذا جانت سلبية متخلين اللوم على نفسج وبس لا تتقاسمين اللوم ويه الشخص الي شجعج..على القرار والي هو اني..مو؟؟ قصي بس انت كتلي خليني صديق مقرب واحجيلي كولشي ؟؟ صح كتلج وجان ممكن نتشارك اني وانتي بأتخاذ هيج قرار..لو بس حسيت لحظة وحده انه انتي متردده بس بصراحة مدا احسج متردده بالعكس محكمة عقلج ومتخذه القرار وخلصانه.. يعني معندك رأي بالموضوع؟؟ رأيي مراح يقدم ولا يأخر واذا فعلا موضوعكم راح ينتهي بالزواج فالزواج قرار مصيري بيد اثنين همه الزوج والزوجة بس واي طرف ثالث ميصير يدخل او يحكم على انه قرار صحيح او خطأ لان صحة هالقرار وخطئه متنعرف او تنكشف بين يوم وليلة لا ابد الزواج يرادله وقت وعشره وبالعشرة ينكشف كولشي اما..يكون هنا وسعادة طوال العمر واما يكون ندم وتعاسه للنهاية بقت صافنه بعيوني لحظات بعدين كامت وكالت: اشكرك قصي لان سمعتني وان شاء الله اتخذ القرار الصح انتظروا بارت٥