عقل وقلب - الفصل 3 - بقلم ورود الخالدي - مكتملة | روايتك

البارت٣ ياسمين:::: بقيت صافنه ثواني بوجهه من سمعته واني بطبعي ارد الحجاية بسرعة فكتلة: اي صحيح هذا كلامي وبعدني متمسكة بي انت مجرد ابن خالتي..واصلا اني ميحتاج احجيلك عن رسائلي. كلت هالعبارات وكمت بس خطيت خطوه وحده لزم ايدي وكلي: كعدي ياسمين كملي غداج ولتنغثين ع مود نقاش عادي لا ابدا ممغثوثة وليش انغث من نقاش..عادي..ومن شخص عادي.. ردت افلت ايدي بس هو لزمها حيل..وبدل ميتعصب من كتله شخص عادي ابتسم وكال كعدي ياسمين..بعدنا دنحجي خلص الحجي هو نقاش عادي وانتهى ههه..لا منتهى خجلت لان حيل لازم ايدي..هو اصلا ملامحة الهادئة الثابته وتفاصيل وجهه..الحادة تخليني اخجل منه حيل بدون ما اكون قريبة منه شحال اذا لازم ايدي ومركز بعيوني فاضطريت ارجع اكعد ع الكرسي فهو هد ايدي وكلي.. اي كولي شنو ردتي تحجيلي عن اخو صديقتج!!؟ هاي شنو اشو دتسالني هسه مو قبل شويه تكولي مسألتج..وميحتاج تحجيلي؟؟ وانتي انغثيتي من كلامي..مو؟؟ كتلك ممغثوثه يعني شنو..مبين عليه مغثوثة.. اي مبين اصلا عيونج...مو غامضة عيونج واضحة بالضبط مثل شاشة تشرح كل الي بداخلج.. يعني شلون مفهمت.. يعني عيونج تكولي انه انتي ردتي تحجيلي بدون متفكرين بالصله..الي بيني وبينج سواء جنت بمقام خالج او مجرد ابن خالتح وبصراحة هذا الشي يسعدني.. اكيد!؟؟؟ اكيد..ياسمين ماشي راح احجيلك باعتبارك......؟؟؟ اعتبريني شخص مقرب..وعوفي مقام الخال وابن الخاله ع صفحة؟؟ اوك..الحقيقة اني مجان هامني احجيلك سبب تفاصيل الرسالة بس من جتي الرسالة اني ارتبكت..فمردتك تفكر انه ارتباكي جان بسبب شي غلط هو مركز بوجهي حيل وبسرعة رد: اذا ماكو غلط فأساسا ماكو داعي ترتبكين بسبب رسالة مو..اني اول مرة تجيني رساله من ولد ع رقمي..لان اني محد يعرف رقمي بس البنات صديقاتي.. لنفرض اني اقتنعت انه بنيه بجمالج ولباقتج..وهاااا..مرحلة اخيرة ..مناطية رقمها بس للبنات شلون اقتنع انه محد من زملائج محصل رقمج من صديقاتج..رغم هذا مو موضوعنا بس حاولي يكون ردج مقنع اكثر... وليش مو مقنع هي هاي الحقيقة اني محد يعرف رقمي بس صديقاتي.. لتكونين هالكد واثقة من كلامج تره اذا انتي..فعلا مناطية رقمج بس للبنات مستحيل زملائج..ميفكرون يحصلون رقمج بأي طريقة تره جنت طالب جامعي مثلج واعرف كل دوالغ الشباب واعرف ميضيع عليهم رقم بنيه..بعدين انتي ليش هالكد مصره تبنيلي انه انت متحفظة تره الرقم مو مشكله حتى لو عرفو..المهم صاحبة الرقم شلون تكون اخلاقها وثقافتها وشخصيتها.. لا..اني مو مصره ابينلك شي او اقنعك بشي بس فعلا هي هاي الحقيقة ..اني اعتبر..رقمي شي مهم ما اريد احد يعرفة بس صديقاتي بينما البنات يكوللي عادي واذا الزملاء عرفو رقمج..تره مابيها شي وانتي معقدة اكثر من اللازم..يمكن حجيهن صح..واني معقدة فعلا.. ويمكن انتي مو معقدة يمكن فاقدة ثقتج بالاخرين بسبب تجارب سابقه من كال تجارب سابقة رأسا تذكرت ماما وكل معاناتها ويه بابا الي اساسا هي تزوجته عن حب وعاندت الناس كولها ع موده...باتفه سبب راح تزوج عليها بالسر بحجة هي تخلف بس بنات..ولان طلبت الطلاك منه اخذني منها بالعناد..وحرمني منها ومن اخواتي ٦ سنوات شفت بيهن الضيم والعذاب يم مرته القاسية..جانت تأذيني وتضربني..وتكرب عليه..ومن احجي لبابا يكولي لتصيرين حساسه تره هيه تحبج وانتي مثل بنتها..اوف جانت ذيج الفتره هي اسوء ايام حياتي كرهت بيها بابا..وكرهت حتى ماما لان اختارت الرجل الخطأ..الاناني الي ميفكر غير بس ..بنفسه..وحسيت كل رجل بالدنيا الله خلقه هو صوره طبق الاصل من بابا لهذا عشت كل مرحلة مراهقتي ودراستي بعيده عن اي علاقة تربطني بأي شخص وحتى زملائي بالدوام ابد ما احجي وياهم لدرجة حتى صباح الخير ما ارد من اي احد منهم يحب يسلم عليه او يلاطفني بحكم الزمالة..جنت صافنه افكر بماما وبكل الظروف الي مريت بيها..ومن شاف صفنتي طولت..كلي: هااا..شو صفنتي...كلامي ذكرج بتجاربج السابقة.. حيل ضجت منه من كال تجارب بسرعة كمت وكتله بصوت حاد: معندي تجارب سابقة ولا راح تكون عندي تجارب حالية ولا مستقبليه..وكافي تتخيل امور من راسك وتلزكها بيه..فهمت تره ميهمني لاعمرك..ولا صله الكرابة الي بيني وبينك..وما احب تحجي وياي بهالاسلوب وقبل ميرد شلت عموري دا اغسل اديه ..غسلتله ونزلته وسمعت خاله تكولي: بعد خالتج سويتي جاي لولا؟؟ اي..اي خاله سويت راح اجيبلج هسه . دا اصب جاي ومنتظره بشنو راح يرد لان اني حجيت بصوت عالي شويه بوجهه..بس هو بقه ساكت..وكأنما ديحاول يحافظ على هدوءه ومينفعل ويتصرف بحكمه..اخذت الجاي لخاله وشفت عموري صعد يمها ع الجربايه وكعد بحضنها خليت الجاي ورجعت للمطبخ عبالك دا استعد لنقاش حاد وياه بس شفته يغسل ومن خلص وهو دينشف اديه بالخاولي اقترب مني وكال بصوت ناصي مستفز: اول شي عيب صوتج يعلى بوجهي..لان اني اكبر منج بسنين...مو قليلة..ومو من الادب ترفعين صوتج بوجهي..وثاني شي..تذكري انه اني من البداية مجنت حاب ادخل بخصوصياتج..بس الكلام وصلنا ..لهنا..ثالثا رد فعلج العصبي والسريع دليل على انه كلامي مبي اي خطأ ولا اسلوبي جان ممقبول ..بس لان الكلام وكع على جروحج..انفعلتي هالشكل..???? من شفته هاديء ويحجي بكل هالثقة ..بدون حتى ميعر ف شكو بداخلي وفسر انفعالي على مزاجة...كتله: ماشي قصي شلون متحب تفكر فكر ماشي..اني مو خوش بنيه وعندي تجارب ويه الف شاب ولهذا فاقده ثقتي بالاخرين اذا هذا يريحك فكر هالشكل ميهمني.. وعفته وطلعت رحت لغرفة احلام لان اعرف عموري راح ينام بحضن خاله..سديت الباب عليه..الى ان صار العصر..من طلعت من الغرفة البيت سنطه دخلت لكيت عموري وخاله بعدهم نايمين ..كلت احتمال هو هم طلع..فصعدت للسطح كلت الم الملابس لميت الملابس..وقبل لا انزل طلعت ملابسه من السلة كلت اخليهن بغرفته ..وانزل ولان متوقعة هو..طالع مدكيت باب غرفته..بسرعة فتت جفلت من شفته ..ديدكم بقميصة بسرعة كلت: اسفه دخلت بسرعة بدون ما ادك الباب توقعت طلعت للمحل..بس هو ملتفت..بقه يرتب بقميصه اني فتت خليت الملابس ع الجربايه..ردت اطلع كلي: اوكفي ياسمين اكو شي.. اكيد اكو شي..تعالي رجعت وكفت يم الجربايه اجه وكف كبالي وكلي ياسمين ..اسلوبي اذا ميعجبج عادي..بعد منسولف ولا نفتح مواضيع..اذا مجرد نقاش زغير يهتسرج ويخليج ..تفقدين اعصايج...بعدين عيب تكولين عن نفسج انتي مو خوش بنيه وتعرفين الف شاب ممسموحلج تحجين ع نفسج هالشكل.. وانت مسموحلك تكولي كلامي وكع على جروحج اوتجاربج السابقه ..الي معتقد هيه تجارب عاطفية ..ليش انت شتعرف عني وشتعرف كلامك ع شنو وكع وع اي جرح بحياتي بالتحديد؟؟ ماشي اني ما اعرف زين..ليش انفعلتي جان ممكن توضحيلي..بدون انفعال زايد.. ليش جان عندي وقت اشرحلك افكاري جان عندي وقت اكولك انه كل تجاربي بالحياة تتلخص بتجربة..ماما الفاشلة وزواجها من بابا الي هو اساسا شخص اناني مواهل للحب والثقة..واعتقد انت تعرف كل تفاصيل حياة ماما بس متعرف كل تفاصيل حياتي وشلون عشت بعيده عن ماما وعن اخواتي... بس هذه مشاكل عائليه عاديه ممكن اي بنيه تمر بيها ومتوصل لدرجة تخليج تفقدين ثقتج بكل الناس. لا توصل..قصي توصل وتتعده من تعيش بنيه مراهقة ويه زوجة اب تضربها وتعنفها وتشوف ابوها يجي بالليل يتلوك لزوجته..الجديدة الي اساسا ظالمتها ظلم فرعون....والي هو نفسه الي حبته امها وضحت بكولشي ع موده وغدر بيها بالنهاية..والي هو نفسه ..الي يسد اذنه وعيونه من يشوف اثار الضرب ع جسم بنته..ويسكت..والي هو نفسه الي كام يلف ويدور حتى يخلي بنته سبب يرجعه لزوجته السابقة الضعيفة بعد مخسر فلوسه وحياته..وحب يرجع يستغل ضعف ام بناته من جديد.. ياسمين..!؟ خلي اكمل حتى تعرف تجاربي الي وصلتني لانه افقد ثقتي بالناس وبالحب وبشكو شي اسمه علاقة ويه رجل..و.. قبل ما اكمل كلي.. ياسمين هاي هيه فهمت والله ماكو داعي تشرحين اكثر..اسف موقصدي اتهمج..بس..يمكن لان انتي شابه حلوة وذكيه ولبقة مثقفة وبصراحة لوجنت اني طالب وياج بالكليه..جان صرتي هدفي الوحيد ..يمكن لهذا السبب..جنت المح لهلموضوع ومفكرت بمشاكلج العائلية من كال اسف بهتت..ونسيت كل تلميحاته..خصوصا جانت نبره صوته حنينه ..ومتفهمه بسرعة كتله.. واني هم اسفه لان رفعت صوتي بوجهج..مجان لازم انفعل..عموما..بعد منحجي بأي موضوع حتى نتجنب اي توتر مو صح.... وقبل ما التفت بسرعة لزم اديه اثنينهن كل ايد بوحده من اديه وكلي: لا موصح..من اليوم وجاي كولشي تحجيلي اتفقنا؟؟ ابتسمت لا متفقنا ..ليش احجيلك يعني بأي صفه ههههه...يابه..بصفتي صديق..؟؟ هلوو..عيني ومنو كلك اني اصادق ولد وخلي صديق مقرب احجيلة كولشي.. هههههه....لا اشو تصادقيني وتخليني مقرب وتحجيلي كولشي..اتفقنا؟؟ لا متفقنا.. ضغط حيل على اديه وبوجهه ابتسامة حنينه بالضبط مثل ابتسامة اب يسايس بنته الغالية ويتقبل كولشي منها فكتلة وجعتتني قصي يعني هو الاتفاق بالكوة.. اي بالكوة.. واستمرت ابتسامته...اني هم مدري شبيه ابتسمتله وكتله.. اوك..اتفقنا..بس هد اديه.. وقبل ميهد اديه التفت ع ملابسه الي عفتهن ع جربايته فكلي : هسه احنا اتفقنا وخلص بس كوليلي ..منو كلج تغسلين هدومي؟؟!!! محد كلي اني كلت لنفسي.. لا ياسمين بعد لتغسليهن.!! ليش..حتى خاله كالت قصي يغسل ملابسه بنفسه وبما انه انت صرت صديق مقرب واحنا منا وجاي كولشي نحجي لبعضنا..ممكن تكولي السبب؟؟ امي هالتشوفيها مريضة..من زمان..ومو صحيح اخلي احد يغسل ملابسي يعني هذه واجبات الزوجة وبما انه اني معندي زوجة ..فلازم اتكفل اموري الخاصة بنفسي.. ولو جانت احلام موجوده هم مراح تخليها تغسلهن!! احلام اختي ومن باب الميانه الاخويه...عادي تغسلهن؟؟! اكولك اشو انت محسسني انه انت عايش بجو مسلسل حريم السلطان اشو كلامك كوله ابواب ومقامات..يعني كولشي بمقامه بعد شويه تكولي خاله هي السلطانه الام واحلام اختك سلطانه خديجة واني بمقمام فريال خانم..اشو طلعت انت المعقد ابراهيم باشا!!!!!!! اول مره اشوفه هيج مرتاح ويطكها ضحكة عالية: هههههههههه...اني ابراهيم باشا...وانتي فريال خانم...هههههههه بس حلوة..خوش..طلعة منج هاي مال حريم السلطان والله اشو بمقام فلان ومن باب كذا تره عادي اذا غسلت ملابسك...مراح يتأثر مقامي؟؟؟ وضحك بصوت عالي مره لخ وهد اديه وكال: براحتج لعد غسليهن منا وجاي!! ماشي راح انزل هسه اي براحتج فريال خانم ابتسمت وطلعت من غرفته قصي::::؛ طلعت من غرفتي وهي مبتسمه..اني ما اطول خلك ويه احد ولا احب اتناقش..بس وياها طولت خلكي وتناقشت ..واستغربت هوايه..ليش جنت هاديء ومنفعلت من علت صوتها بوجهي جان ممكن اخوفها واخليها تلزم حدودها..ما اعرف ليش حسيت هي متستحق غير المعامله بحكمة وتفهم ..اي مبين من سرعة انفعالها وعيونها اليلمعن مبينه مو قويه من الداخل وتحاول بالنقاش الحاد تبين انه هي قويه ومحد يكدر يطلع من النقاش وياها منتصر..خطية تعتبر زواج امها الفاشل تجربه تخصها هي متخص امها وبس..هيج انسانه حساسه..وتحسب حساب لخطواتها ومتنطي ثقتها الاحد اكيد اكو هشاشه وتوترىوفراغ ..وجروح وذكريات مؤلمة بداخلها...وبالنهايه ارتاحيت من انتهى نقاشنا..باتفاق وابتسامة واتحول لموضوع لطرافة..من زمان مضاحك من كل كلبي اول مره اضحك هالشكل وبصوت عالي من شبهتني بابراهيم باشا ومن شبهت نقاشنا بجو مسلسل..وبقت ملامحها وابتسامتها كبالي وخلتني ابقه مبتسم الى ان كطعت ابتسامتي صوره سحر..الي صارت كبالي..شلت صورتها واني احجي وياها.. واكول اكيد لو جنتي عايشة وتشوفيتي هالكد اضحك واسولف بارتياح ويه ياسمين جان ضجتي وغرتي منها..بس ليش..تضوجين وتغارين منها تره معندي شي وياها ولا راح يكون عندي شي بالمستقبل مجرد نقاش عادي لتضوجين حبيبتي..بعدين انتبهت ع نفسي ..اوف ويامن دا احجي شنو قابل هي دتسمعني بعدين ليش دا ابررلها..اني ممسوي شي غلط ومعندي شي ويه ياسمين..اي اكيد معندي شي وياها???????? ثائر::: من الظهر دزيتلها رساله واول موصلت الرساله انفتحت يعني قرتها بس ليش اتجاهلتها ليش مردت عليها..حيل ضجت يعني..اليوم حجينا وكتلها راح افكر بموضوع ضمياء معقوله معدها فضول تعرف شنو قررت..وهالكد مضجت بقيت ممرتاح وكل شويه اباوع ع الموبايل بلكي ترد بس صار الليل وهي مردت..ومرت الساعات صارت ساعة١١ بالليل وماكو منها رد..قررت ادزلها رساله لخ فكتبت: يعني قريتيها لرسالتي ومرديتي تره معندي شي وياج ردت احجي وياج بموضوع ضمياء بسرعة فتحت الرسالة وردت: اخي منو كلك اني اسمحلك تراسلني ع الواتس ..هذا اولا وثانيا ضمياء صحيح صديقتي وحياتها تهمني بس اذا اكو شي يخصها هي تتصل بيه وتحجي وياي من حسابها مو انت تراسلني وتحجي وياي بموضوعها.. استفزتني رسالتها بسرعة اتصلت بيها وحاولت اضغط ع نفسي حتى ما احجي حجاية زايده بسرعة ردت: اخي ثائر اني كتلك ما اسمح بالمراسله هالنوب تتصل هذا شلون حجي.. ياسمين اسمعيني..اني مو من ذوله الي ياخذون ارقام بنات الناس بغرض المعاكسه والعلاقات العابره اني اتصلت حتى اخذ رأيج بموضوع ضمياء لان محتاجج حتى تقنعيها؟؟ اقنعها بشنو ؟؟بالموافقة ع الزواج بالوكالة قصدك؟؟ لا..مراح تتزوج بالوكالة؟؟ لعد؟؟ اتصلت..بهذا الولد الي متقدم الها وكتله لازم يجي للعراق يشوفها وتشوفه واذا وافقت ينخطبون مده متقل عن٣شهور حتى واحد يقتنع باللاخ.. تمام هو هذا الصحيح؟؟ بس هي ممقتنعة تكول اخاف يجي وتجبرني اتزوجه؟؟ وانت شنو مفكر تجبرها؟؟ لا والله فكرت بكلامج واقتنعت بيه لان اني اختي مو هينه عليه مثل مكلتي ولا اريد اشمرها بديرة الغربه بس الولد اعرفة زين خوش ولد ويناسبها واريدج تقنعيها..تقبل تشوفه وتتصرف بشكل عادي واذا عجبها واقتنعت بيه ينخطبون كم شهر الى ان واحد يتعرف ع اللاخ زين.. اي عادي اذا نيتك هالشكل اني احجي وياها.. اشكرج اختي.. الشكر لله بعدني ممسويه شي حتى تشكرني؟؟ وقبل متسده كتلها: ياسمين اني اسف؟؟ ع شنو!! ع الغلط الي كلته بالتليفون قبل ما اتعرف عليج انتي خوش بنيه ادميه وحبابه ومتستاهلين حرف من الكلام الي كلته..اتمنى تقبلين اعتذاري..