الفصل 2
البارت2
قصي,::::
ثاني يوم الصبح رحت لمحلي فتحت عادي ساعة ١١اتصلت خالتي:
الو شلونك بعد خالتك
ياهله بخالتي الغاليه
خاله عود مر على ياسمين للكليه واخذها وياك لبيتكم؟؟
ياسمين؟؟!!!
اي هي راح تجي يمكم بمكان نادين ..انت تعرف نادين عرسها بعد كم شهر وتريد تجهز امورها وملتهيه؟؟!!
لا خاله مو هذا السبب اعرف خطيبها ميقبل تجي يمنا وهذا من حقه بالنسبه الياسمين ما اريدج تحرجيها وتخليها تجي
ياااا..وصلتك خبالات فرقان؟؟خاله هذا فرقان نص عقل تره ويغشم روحة رغم يعرف انت مربيها لنادين و..
خاله كتلج حقه الولد اني لو بمكانه اتصرف نفس التصرف..
هسه معلينا بنادين مر على ياسمين واخذها وياك؟؟
والله ماكو داعي اني اعزل من وكت وارجع للبيت ادبر امورنا..
خاله شنو ترجع ادبر اموركم امك يرادلها مره اداريها وهذا الطفل يحتاج مداراه شنو تكطع باب رزقك بعدين بناتي ما مصخرات على خالتهن هذا واجبهن ومابي لافضل ولا احراج ولا مستحه..
بكيفج خاله
راح ادزلك رقم ياسمين حتى من يخلص دوامها تمر عليها
ماشي
ودزتلي رقم ياسمين بصراحة معندي اي ميانه ويه ياسمين واصلا مجانت تجي لبيتنا هوايه يعني بيناتنا بس سلام ولقاءات قليلة بالمناسبات..والي اعرفه هي من النوع الجامد يعني مو مثل نادين سبورتيه واجتماعيه ..باختصار راح يصير صعب عليه بالبدايه اتعامل وياها..المهم ساعة ١٢اتصلت عليها اكثر من مره مردت فدزيتلها رساله
اني خالج قصي ردي ياسمين.
فاتصلت هيه:
الووو..هلو..قصي..
هلو خالو..شوكت يخلص دوامج..
الاستاذ مجاي للمحاضره الاخيره راح اطلع..
ماشي انتظريني جايج
اوك
ورحت لكليتها لكيتها منتظرتني صعدت بالكشن الوره عكس نادين جانت تجي ركض تصعد بصفي اول مصعدت كتلها:
شلونج خالو..
الحمد لله..انت شلونك قصي!!!????????????
الحمد لله ماشيه..اعرف امج حرجتج وخلتج تاخذين مكان نادين..وطبعا ما احب تجين لبيتنا مجبوره بحجه المستحة..
شوف قصي..اني محد يحرجني ومحد يجبرني..وما اسوي شي..مجبوره عليه بسبب المستحة..
كلامج مريح خالو!!
اكيد مريح..اني مو نادين الي صارلها فتره تحاول ترضي ماما وخطيبها وترضيكم ..ومتعرف شلون!!
بالنسبه الي وللحجيه راضين عنها وخطيبها من حقه يتصرف هالشكل..وباجر عكبه اذا انخطبتي اعتقد خطيبج ميختلف تصرفه..
وليش هي تسمحله يتحكم..بيها ويمنعها تجي الكم اذا هي مقتنعه جيتها الكم مبيها خطأ؟؟
خالو...تره كل رجل يحب تكون المره الي تخصه طوع امره..وكتلج انتي اذا انخطبتي راح يصير وياج نفس الشي..
متوهم..انت..محد يكدر ..يتحكم بحياتي ولا يستغل اي صفه تربطني بيه حتى يمشيني على كيفه!!!
هههههه...بس جيتج النه تناقض كلامج:
شلون؟؟
يعني بحكم علاقتج بامج كدرت تفرض عليج الجيه وبحكم كوني بمقام خالج ..وبحكم كون امي خالتج..اضطريتي تجين!!
اولا ماما مفرضت عليه بس لان وضع ماما صعب كونها حامل بابا اقترح اجي بمكان نادين..وثانيا انت مو خالو ولا بمقام خالو انت ابن خالتي وبس..ثالثا خاله ام قصي احبها..ومن اداريها ما اعتبرها حاله اضطراريه..
اوك كلامج هم مريح الحمد لله جنت قلق لهلسبب؟؟
وخلص النقاش بيني وبينها هالشكل لان وصلت للاسواق القريبة من بيتنا نزلت اخذت معلبات ودجاج مجمد..وعصير..ورجعت للسياره بقت امتار قليله ونوصل لبيتنا هي منتبهه ع الطريق التفتت..اباوع عليها..ياسمين ..مو شخصية..ساذجة او بسيطة واضح هيه ذكيه..وعيونها الملونات مليانات جرأة...ووكاحة
ياسمين:::
عادي وصلنا لبيت خاله..التهيت اسوي دجاج وتمن وزلاطه ساعة وحده ونص صبيت غده خاله كالت:
ياااا..خاله ما اختنكتي من هذه الربطه...انزعيها منو يمنه؟؟
خاله تره قصي راح ينزل يتغده!
يااا وانت محجبه من خالج قصي..اخواتج كولهن ميتحجبن منه غير خالهن ومربيهن!!
لا خاله شلون يصير..حرام..
براحتج بس الحجاب طول الوكت يضوج عاد فتحي الدنبوس خلي على متونج!!!
اي خاله فتحت الدنبوس وشمرت طرف الشال على متوني بس ممبين مني شي..وتغدينا عادي ومرت الايام عاديه ابيت جدي..بالنهار ابقه يمهم وبالليل قصي يوصلني ومن اول يوم جيت بيه الهم اني وخاله بس نسولف قصي مو هالكد اسولف ويا لان يتغده ويصعد ينام..والعصر يرجع للمحل مالته..فالنهار يخلص ويه خاله وابن قصي..طبعا خطيه هالطفل يكسر الخاطر وحيل هاديء..يسمي بيبته ماما واني من اجيت هم يكولي ماما..بس عادي مثل كل الجهال يلعب ومرات يريد يطلع للشارع وما اخليه ..لان بعده زغير مو مال يطلع بره..ومرن ٦ايام عاديه بس الشي المو عادي انه ضمياء صارلها اسبوع ممداومه وكولما اتصل بيها خطها مغلق..بس حسابها مال الفيس عندي وهم مو ناشط بس باليوم السابع نزلت ستوري يخوف وبيه كلام عن اليأس والانتحار حيل قلقت عليها..كلت باجر اضرب الدوام واروحلها للبيت وفعلا رحت لبيتهم طلعتلي امها..ودخلتني للاستقبال وره شويه جتي ضمياء
هلو ضمياء قلقت عليج ليش متداومين؟؟
وشكو مداومة بعد اسبوع اللاخ كولشي ينتهي
يعني شنو؟؟
يعني اخويه ديسوي باوراقي وراح اعقد عقد زواج بالوكاله كولها ايام واسافر
ياااااا..يعني هاي هيه استسلمتي؟؟
هاي قسمتي شأسوي..
ثائر:::
جيت من الشغل تعبان اول مدخلت فتحت الثلاجة شربت مي الحجيه كالت:
يوم مو تفوت للاستقبال صديقه ضمياء يمها؟؟
صديقتها؟!!!!
اي هاي ياسمين صديقتها؟؟
ها كلتي ياسمين...يعني هاي لاتستحي ولاتخجل وتجي لهنا..
ياااا..شبيك يمه.
يوم...لتدخلين انتي اعرف شلون اطيح حظها هسه
رحت بسرعة للاستقبال ودخلت طبعا البنيه جان ظهرها للباب وهي محجبه فمشفت وجهها بالبدايه وبسرعة كلت:
اما انتي صدك متستحين كتلج كطعي علاقتج بأختي واكفينا شرج..
بسرعة التفتت الي..
اويلي..شلون وصله هاي تخبل شهالعيون الملونه شالحجاب اللافته على وجهها الي جنه..كمر..من شفتها ارتبكت وتندمت لان دخلت وحجيت بسرعة ..بس هي هم مسكتت:
اشكرك اخي ع كلامك..واكيد كل اناء بمافيه ينضح واحب اكولك اني جنت اتمنى ارد عليك من سمعت الغلط مالتك عليه بالتليفون بس انت للاسف منطيتني مجال بسرعة سديت التليفون بوجهي..يعني تصرفك مو بطولي بالضبط مثل طفل يسب ويغلط وينهزم..
هاااا..يعني اني برأيج طفل هسه؟؟
والله كل انسان تحكمة تصرفاته وتصرفك كان مناسب للوصف الي وصفتك بيه!!
وتصرفاتج انتي وتدخلج بحياة اختي ومحاولتج تحرضيها على اهلها..هذا شنو تسمي؟؟
اولا اني ممدخله بحياة صديقتي بوحدي لان هي الي دخلتني اساسا..وجانت تشكيلي من حضرتك وضغطك عليها....ثانيا اني مجنت احرضها بس جنت اوعيها واخليها تاخذ حقها بلسانها..بعدين اخي ..انت مقتنع تزوج اختك بهالطريقة لشخص هي مشايفته وممقتنعه حتى بطريقه الزواج العجيبه الغريبه....يعني افرض اتزوجته ومتفقو يعني احسن تخليها هنا يمك..وكدام عينك لو احسن تشمرها بديره الغربه متعرف عنها شي لمجرد تريد تجامل او ترضي صديقك..افرض صديقك مجان كد الامانه الي محملها اله ..شراح يصير بالنهايه اكيد راح ترجعلك مطلقه ومكسوره الجناح,????????????
هي تحجي واني صافن على حلكها وعيونها وشلون ترتب الكلام..شالجرأة والثقه والاسلوب اي هاي النسوان المتغلب..هاي الشخصية القويه الجنت..اتمنى الاكيها حيل عجبتني ملامحها وعيونها الجريئة.. من شافتني صافن بعيونها دنكت اويلي استحت..مبينه خوش بنيه واني الاثول نزلت عليها دوسه ونص بالتليفون وفتت عليها واني اقسم بس هي مهتزت ولا خافت واجهتني ..معدلة والله..ومن فشلتي كتلها:
اي كلامج مقنع نوعا..ما وراح افكر بيه
اكيد؟؟
اكيد
وشفتها التفتت على ضمياء وكالت:
ضمياء تعالي للكليه..ميصير هالكد تفوتج محاضرات!!
ضمياء كالت:
بس ثائر كال..
وقبل متكمل قاطعتها..
روحي باجر للدوام ضمياء..
وسمعتها تكول:
اني اروح هسه واشكرك اخي لان تفهمت ..وراح تفكر بكلامي..بس هذا ميعني انه نسيت غلطك عليه وعلى اهلي ..
ورادت تمشي كتلها:
خيتي..اوصلج!!
لا اخي اني ما اصعد بسياره احد ما اعرفه لان اهلي مربيني زين مو مثل مكلت عليهم بالتليفون
وبسرعة فاتت من كدامي وطلعت من الباب..
ياسمين:::
طلعت من بيت اهل ضمياء بسرعة بس شنو دمي ناشف صح حجيت الي ابالي بس جنت حيل مستحيه من ثائر اخوها..يعني الولد غريب ومن كتله طفل مجانت رده فعله قويه يعني لو واحد غيره جان انهد عليه بس هو جان هاديء وياي بس صافن بوجهي..واستغربت من اقتنع بسرعة وكلي راح افكر بكلامج..والعجيب بسرعة خله ضمياء ترجع للدوام..طبعا الي صار من صالح ضمياء واني ارتاحيت لان راح اداوم بس ابد مرتاحيت لاخوها احس هو دياخذنا على كد عقلنا وديسايسنا..اني وضمياء طبعا هو ابد منزل عينه من عليه حيل خجلني الحمد لله طلعت منهم بسرعة...
من طلعت من بيت اهل ضمياء رحت مباشرة لبيت خاله ام قصي رغم بعد وكت دخلت عزلت الغرف لان اكو غرفتين جوه غرفة لخاله..وغرفة ثانيه بيها جربابه ام نفر جانت هذه الغرفة غرفة احلام ..بت خالتي واكو غرفة ثالثة مبيها اثاث هوايه متروكة ميستخدموها..المهم نظفت الغرف والمطبخ وقبل ما انظف سألت خاله:
خاله اسويلج ريوك
لا بعد خالتج كولنا تريكنا ..بس شعجب اليوم جايه من وكت
خاله بصراحة اليوم مرحت للدوام..رحت لبيت صديقتي عدها مشكله وصار فتره مدا اداوم والحمد لله باجر ترجع اداوم..
هااا..يعني اليوم ممداومة..بس قصي ميعرف انتي ممداومة خطيه اخاف من يعزل يروحلج للكليه..خلي اخابره اكوله انتي يمنه
اي خاله خابريه
وسمعت خاله تحجي ويا ومن خلصت مكالمة كالت;
خاله بلا امر عليج بلكي تصعدين تلمين ملابس قصي من غرفته وتخليهن بالحمام هو من يجي يخليهن بالغساله..
يعني هو يغسلهن قصدج!!..هاااا..اي فعلا يمكن هو يغسلهن لان اني كولما ااغسل ملابسكم ما الكة ملابسه وياهن..بس ليش هو يغسلهن خو يخليهن ويه الملابس..عادي..
لا خاله هو يغسل ملابسه من يوم الي توفت مرته حتى اني ميقبل اغسلهن..
براحته..هسه اصعد المهن وانزلهن.
صعدت لغرفته فتحت الباب..اول مدخلت حسيت بالعطر الي بغرفته طبعا عطر مو طبيعي كولش طيب..اي اكيد يستخدم احسن عطر ..بحكم كونه عنده محل عطور راقي...واني دا اجمع ملابسه استغربت اكو ع الزاويه ملابس نوم نسائيه وع الميز مكياج وعطور نسائيه مرتبه وصوره زوجته..بصف الجربايه.. وحتى الجزامة مال احذيته..اكو شحاطة وحذاء نسائية ويه احذيته..صار عندي فضول فتحت الكنتور لان المفاتيح معلكات..وهم استغربت يعني اكو خانتين بيها ملابس زوجته كولهن مصفطات ومرتبات وشفت علبه..قديفة فتحتها بيها....ذهب..بقيت صافنه يعني كل اغراض زوجته موجودات ذهبها وملابسها وحتى شحاطتها ..هو محتفظ بيهن رغم صارلها اكثر من 3سنوات من توفت بعدين انتبهت ع نفسي ياااا..شبيه اني ليش فتحت الكنتور مو من عوايدي المس شي مو الي لو ادخل بخصوصيات احد حسيت تصرفي غلط بسرعة سديت الكنتور واخذت ملابسه ونزلت وخليتهن بالحمام..طبعا ملابسه عطرهن قوي من نزلتهن فكرت كلت احتمال هو جان يستحي يكول لنادين اغسليهن او لان خاله مريضة ميكلفها تغسلهن ليش ما اغسلهن واشرهن شكو بيها..حالهن حال ملابس خاله وابنه..واذا..حسيته مراضي ابطل بعد ما اغسلهن واذا مر الموضوع عادي ..يعني ماكو شي..هو حباب يعني من جيتهم لليوم تعامله وياي هاديء وحتى يتعمد يجيبلي نساتل وكرزات الي اعرف هو ميجيبهن لابنه لان خاله متخلي ياكل حلويات حتى متسوس اسنانه..واعرف خاله هم متاكل حلويات وكرزات يعني ديجيبهن الي..ومفد يوم شفته حجه حجاية زايده اصلا منسولف هوايه يجيبني من الدوام وهو ساكت ..ومن يسلم عليه سلام عادي ويا ابتسامة خفيفة ..واحس عيونه بيهن مسحة حزن رغم يحاول مبيبنها بلطفة وهدوءه..عموما علاقتي بيه بسيطة الى ابعد الحدود..المهم غسلت ملابسه وشريتهن..ونزلت كملت الغده اجه من المحل وكعدنا كولنا نتغده خاله مكلت هوايه بسرعة سحبت الكرسي المتحرك مالتها وراحت غسلت اديها وكالت:
سويلي جاي بعد خالتج
بس خاله متغديتي زين..؟
هو شال راسه قبل متحجي خاله:
صح يمه..اشو ما اكلتي شنو لان الاكل اليوم طيب ما اكلتي؟؟
هههه..شنو بس اليوم الاكل طيب تره ياسمين يوميه طبخها طيب ..بس اني اليوم ما اشتهي حتى الصبح كوه تريكت..
اي اخذج العصر لطبيبج..
شنو السالفة ماما كل الميشتهي ياخذو للطبيب!!العصر اجوع واكل..رايحة لغرفتي اريد اتمدد..
رحت وياها للغرفه كومتها من الكرسي وكعدتها ع الجربايه ورجعت..دا اسوي جاي..اني مخليه موبايلي ع الطاوله لان جنت كاعده اتغده.. ..سويت جاي وشغلت الغلايه ورجعت لمكاني اكل لان بعدنا دنتغده اني وقصي وعموري...بس شلت الخاشوكه شفت رساله ع الواتس من رقم غريب ...عادي اني معندي شي اضمه يعني من تجيني رساله من صديقاتي او اخواتي او ماما رأسا افتحها..بس من فتحتها ارتبكت من قريت
ياسمين اني ثائر ..اريد احجي وياج..رجاءا ردي اذا شفتي رسالتي..
من كملت قراءة الرساله اديه عركت ومعرفت شلون اتصرف حيل ارتبكت..رفعت راسي لكيت قصي..منتبه على انفعالاتي زاد ارتباكي وحيل استحيت رغم اعرف انه هو مراح يسألني ومراح يتدخل..بس ما اعرف ليش حسيت روحي انقبضت يمكن لان اول مره تجيني رساله من ولد اني ما انطي رقمي لاحد..هو شافني مرتبكة..دنك ع الاكل ورجع ياكل طبيعي يمكن ميريد يحرجني او يحسسني انه هو ممهتم ..بس اني مدري ليش كتله:
قصي هذه رساله جتني..من اخو صديقتي اكو مشكله صارت ويه صديقتي واني ادخلت بيها..و..
هو شال راسه وباوع بعيوني:
تره اني مسألتج عن شي..ولا طلبت منج تفسريلي او تحجيلي عن نوع اي رساله تجي على موبايلج انتي مو طفلة انتي بنيه واعيه وجبيرة ومثقفة وذكية..وممحتاجة تبررين لاحد تصرفاتج او حتى طبيعة انفعالاتج..بعدين ما اريدج تتقيدين بوجودي او تفكرين تخلين موبايلج صامت حتى متنحرجين مني من تجيج رسائل خاصة
كلامة حيل ضوجني حسسني شكد هو متجاهل وجودي يعني اني ابيته..واخواتي يسمنه خالو المفروض يحسسني بنوع من المسؤوليه تجاهي مو يكولي اتصرفي براحتج ولتتقيدين بوجودي..بسرعة انفعلت..وكتله:
يعني اذا اختك احلام ..او وحده من اخواتي حبت تحجيلك عن رسائلها راح يكون ردك نفس الرد؟؟!!!
اكيد لا..بالنسبة لاختي احلام..اذا تجي رساله خاصة ع جهازها راح اسألها منو دزها وشنو نوع علاقتها بالشخص المرسل..وبالنسبه لاخواتج هم نفس الشي لان اني بحكم خالهن..بس انتي..اكيد..موضوعج مختلف لان انتي لا اختي ولا اني خالج..اني مجرد ابن خالج وبس مثل متفضلتي وكلتي بأول يوم جبتج بيه لبيتنا????????????
انتظروا بارت3
طبعا تأخر النشر بسبب قلة التفاعل لان قلة التفاعل تفقدني الحماس للكتابة
Like