الفصل التاسع
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم كتفي واكتفائي`*
*❴🔢❵الـــبـــــــــــ❴9️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
قصص وروايات 📚📖:
فاديا بترجف ايدها وبتقول بصوت مخنوق: ما الها أثر يا باسل.. وين بدها تكون راحت البنت وييين؟
باسل: ابعتولي موقعكن بالضبط أنا مسافة الطريق بكون عندكن
بتسكر فاديا الخط وبتعطي تلفونها لسالي وبتقول: بنتي ابعتي الموقع لأخوكِ أنا ماعد شايفة قدامي
سالي: يلا يلا
بتبعت سالي الموقع لباسل وبتقول: خلونا ندور حوالين هالمحل ونسأل اذا حدا شافها
سلمى: يلا قوموا كل تلاتة يروحوا سوا باتجاه واحد ومنرجع نجتمع هون
سارة: ماشي
بيطلعوا الصبايا من المحل وبيبدأوا يسألوا الناس عن أسيل وبعد مدة بتسأل حنين رجال كبير بالعمر وهو بيقول: قصدك الصبية يلي لابسة حجاب أبيض؟
حنين بلهفة: اي عمو شفتها شي؟ بتعرف وينها؟
الرجال: والله يا بنتي كان فيه شب حاملها ورايح ولما سألته شبها قلي أنه هي أخته مريضة واخدها ع المستشفى
سالي بصدمة: شو عم تحكي عمو؟!!!
الرجال: والله هاد يلي صار يا بنتي.. وأنا شفته حطها بالسيارة وراح
سلمى بتوتر: ماشي يا عم شكراً الك
بيرجعوا سلمى وحنين وسالي ع المحل وبيلتقوا مع الباقي وبيخبروهن يلي صار
🌺 🌺 🌺
بالمستشفى...
بيطلع باسل هو وعلي بسيارة باسل وبيتوجهوا للموقع يلي وصل لباسل والقلق والخوف مسيطرين عليهن... بيقول باسل وهو عم يسوق: لك رح جن رح جن... شو بدو يكون صار معها يعني؟؟؟
علي: ما بعرف والله ما بعرف... ماعم يخطر ببالي شي حاسس عقلي واقف عن التفكير
باسل: لا حول ولا قوة الا بالله... خبرت خضر وحسن وآدم؟
علي: اي خبرتهن رح يلاقولنا ع السوق (بيسكت شوي وبعد تفكير بسيط بيقول) شو رأيك خبر حمزة؟
باسل بيرد وهو مركز بالطريق: اي خبره ممكن يفيدنا
بيطالع علي تلفونه وبيتصل بحمزة يلي من أول رنة بيرد وبيقول: كنت بدي اتصل فيك هلق
علي: ليش شو صاير؟
حمزة بنبرة أسف: والله ما بعرف شو بدي قلك بس أيهم هرب من السجن
علي بيهمس بصدمة: كيف يعني هرب؟؟!
باسل: مين هاد يلي هرب؟
علي: أيهم هرب من السجن
باسل لما يسمع هالجملة بيشحط فرام مفاجئ وبيقول بصدمة: من ايمت صار هالحكي؟؟؟
علي بيقول لحمزة: من ايمت هرب؟
حمزة: من كم ساعة وأنا هلق لوصلني الخبر
علي بيصرخ بقهر: الحقير الواطي أكيد هو ورا يلي صار مع أسيل
حمزة باستغراب: خير شو صاير معكن؟
علي بيحكي باختصار يلي صار لحمزة وبيتفقوا يلتقوا بنفس المكان يلي انفقدت منه أسيل
بعد عشر دقايق بيكون الكل مجتمع قدام المحل مع الصبايا وسلمى بتخبر علي بالكلام يلي قاله الرجال ومباشرةً حمزة بيخبر أخوه الضابط وخلال عشر دقايق بيوصل لعندهن كريم ومعه عناصره وبتبدأ عمليات البحث عن أسيل... ومن خلال كاميرات المراقبة الموجودة بالمحلات بيقدروا يوصلوا لنمرة السيارة يلي استخدمها أيهم وبعدها بيطلب كريم من قسم الشرطة تثبيت موقع السيارة
بيمر الوقت والكل ناطر وأعصابه ع نار وعلي بيطلب من حسن وآدم ياخدوا أمهن وباقي بنات العيلة للبيت وينتظروا خبر منهن
بعد تلت ساعة بيوصل خبر لكريم عن موقع السيارة وبيطلعوا كل العناصر بالسيارات وعلي وباسل وحمزة كمان بيطلعوا بسيارة باسل وبيتوجه الكل للموقع المحدد... بس بعد خمس دقايق بيرجع بيتغير موقع السيارة وبيقول حمزة يلي عم يتابع السيارة من خلال الموقع: السيارة رجعت مشت
علي: ليش وقف ورجع يمشي؟
حمزة: ما بعرف
بيكملوا سيارات الشرطة وسيارة باسل طريقهن ورا سيارة أيهم وبتكون المسافة بيناتهن كبيرة نوعاً ما وبعد حوالي النص ساعة من الملاحقة بيثبت موقع السيارة وبيقول حمزة: السيارة وقفت بمنطقة الغابة الجبلية
باسل: اديش بدنا وقت لنوصل لعنده؟
حمزة: تقريباً ٢٥ دقيقة
باسل: لازم نوصل قبل
بيضغط باسل ع البنزين وبيزيد سرعة السيارة ليتجاوز سيارات الشرطة وبيركز بطريقه وهو عم يدعي لا يصير شي لأسيل
بعد حوالي الربع ساعة بيوصل باسل لمكان سيارة أيهم وبينزل من السيارة هو وعلي وحمزة وبيتطلعوا حواليهن ما بيشوفوا اي شي وبيقول علي بقهر: وين بدو يكون راح؟
باسل بيقول بقلق: اكيد فيه هون بيت أو كوخ أو أي شي واخدها عليه.... خلونا ندور جوا الغابة
حمزة: ما بدكن تنتظروا وصول الشرطة؟
باسل وعلي بصوت واحد: لا مافلا مافيه وقت
حمزة: معكن حق بس خلونا نمشي ورا شي أثر كرمال لا نضيع بالغابة ع الفاضي
بيقرب حمزة من السيارة يلي كان فيها أيهم وبيدور حواليها وبيقول: فيه آثار مشي من هون
بيقربوا باسل وعلي بلهفة من حمزة وبيقولوا: بأي اتجاه؟
حمزة: باتجاه الشرق... خلونا نمشي يلا
قبل ما يتحرك حدا منهن بيوصلوا رجال الشرطة وبينزل كريم وبيقرب لعند حمزة وبيقول: لقيتوا شي؟
حمزة: فيه أثر مشي بهاد الاتجاه
كريم: تمام... رح خلي العناصر يطوقوا المنقطة كلها ونحنا منلحق الآثاربيعطي كريم أوامره لعناصره وبيمشي هو وحمزة وعلي وباسل وكم عنصر وهني عم يتطلعوا حواليهن ع أمل يلاقوا شي أثر أو يلمحوا بيت بشي مكان أو يسمعوا صوت.. وبعد خمس دقايق من المشي بيسمعوا صوت أسيل عم تصرخ وتستنجد وبيكون الصوت بعيد وضعيف...
بيركضوا علي وباسل باتجاه الصوت وبعد مسافة قصيرة بيلمحوا كوخ خشبي بين الشجر وبيقربوا بسرعة منه وبيدخلوا بدون ما ينتظروا دخول الشرطة
بيكون الكوخ عبارة عن طابقين وصوت أسيل عم يجي من الطابق العلوي لهيك بيركض باسل وبيطلع ع الدرج بلمح البصر ووراه علي مباشرةً ووراهن بيدخل كريم وحمزة وباقي عناصر الشرطة
بيفتح باسل باب الغرفة وبيشوف أيهم عم يحاول يعتدي ع أسيل وهون بيجن جنونه وبيقرب منه بسرعة وبيبعده عنها وبيبدأ يضربه بدون وعي أما علي فلما يدخل ع الغرفة ويشوف حالة أسيل ببلوزتها المقطعة وحجابها النازل وشفتها المجروحة بيحس النار شعلت بصدره وبيهجم ع أيهم، بيدفش باسل عنه وبيمسكه من صدره وبيشحطه لبرا الغرفة وبيبدأ بضربه لحتى يفقد أيهم الوعي وهون بيتدخل كريم وبيبعد علي عنه وبيقول: خلص اهدى رح تقتله
علي بيصرخ بقهر: وأنا بدي أقتله... واحد حقير واطي بيستاهل يموت.. ما بيستاهل يعيش ولا ثانية
بيكون وجه علي أحمر من الغضب وصدره عم يطلع وينزل ونفسه عم يتسارع وبيحاول يرجع يهجم ع أيهم بس بيوقفه باسل يلي بيطلع من الغرفة وهو عم يصرخ بخوف: أسيل غابت عن الوعي
الجزء السابع:
بيدخل علي بلهفة مع باسل ع الغرفة وبيقرب من أسيل المتمددة ع السرير وحالتها حالة وبيحاول يصحيها بس بدون فائدة لهيك بيقوم بيشلح جاكيته وبيلف أسيل فيه وبيزبطلها حجابها ع السريع وبيحملها وهو عم يقول: لازم ناخدها ع المستشفى بسرعة
باسل: يلا يلا أنا رح اسبقك وجهز السيارة
🌺 🌺 🌺
ببيت عصام بيكون الكل مجتمع بالصالة وحالة الحزن والخوف مسيطرة ع الكل... بتدخل رانيا ع الصالة وبتقعد ع الكنبة وبتقول بحزن: الله يجيب العواقب سليمة يارب
حسن: وينها ماما؟
رانيا بترد وهيي عم تبكي: ولي على قلبي عليها.. من كتر البكي عطتها لانا إبرة مهدئ لحتى ترتاح
عمار: ووين لانا هلق؟
رانيا: بقيت جنبها هيي وأمك وسارة
عصام: ياربي دخيلك شو هالمصيبة هي
حسين: انشالله بيلاقوها وما بيصرلها شي بس انتو وكلوا الله وادعولها
الكل: يااارب
عمار بيقرب من حنين وبيقول: أختي حاج تبكي الله يخليكِ.. البكي مارح يجيب نتيجة.. قومي اغسلي وجهك أنتِ وسالي وادعولها الله يحميها ويكون معها
حنين بترد من بين شهقاتها ودموعها: ماني قادرة يا عمار.. كل ما بتخيل أنه رح يصرلها شي بحس روحي عم تطلع
عمار بيتنهد وبيقول: لا حول ولا قوة إلا بالله
آدم: يا جماعة أنا ماعد عندي صبر اكتر من هيك... ماعد متحمل أقعد وانطر بالبيت بدون ما اعمل شي
غسان: شو طالع بأيدنا نع...
بيوقف غسان عن الحكي لما يرن تلفون حسن والكل بيستنفر وبيوقف وبيقول عصام بلهفة: مين عم يتصل؟
حسن: هاد علي
بيفتح حسن الخط وبيقول: اي أخي طمني شو صار معكن؟
علي: الحمدلله لقيناها ونحنا رايحين ع المستشفى هلق... لاقولنا لهنيك
حسن بخوف: ليش المستشفى؟ صاير مع أسيل شي؟
علي: لا لا بس فقدت وعيها ولازم نتطمن عليها
حسن: ماشي أخي ماشي
بيسكر حسن الخط وبيقول: يلا امشوا خلونا نلاقيهن ع المستشفى
خضر بقلق: شو صاير معها؟ أذاها شي؟
حسن: لا بس فقدت وعيها
عصام بلهفة: يلا خلونا نمشي بسرعة
سالي: وشو منشان خالتي؟
حازم: إذا اخدة إبرة مارح تصحى هلق
سمر: والعمل؟
عصام بيتطلع بآدم وبيقول: آدم ابني خليك أنت وحازم مع أمك وعمتك هون
آدم: ماشي بس طمنوني ع أسيل فوراً
حسن: ماشي ماشي
بيطلعوا الكل من البيت وبيركبوا بالسيارات وبيتوجهوا للمستشفى ولما يوصلوا ويدخلوا لجوا بيسأل غسان وحدة من الممرضات: علي وباسل لسا ما اجوا؟
الممرضة باستغراب: لا دكتور غسان ما اجوا
غسان: ماشي بنتي.. جهزوا غرفة بقسم الإسعاف حالاً
الممرضة: حاضر دكتور
بتروح الممرضة ع شغلها وبيطلعوا حسن وخضر لبرا المستشفى لحتى ينتظروا وصول علي وباسل أما الباقي بيصيروا يتمشوا جوا بقلق
بعد عشر دقايق بيوصلوا باسل وعلي وبينزلوا من السيارة وعلي بينادي بصوت عالي: جيبوا نقالة بسرعة
بيركضوا الممرضين لبرا وهني عم يجروا النقالة وعلي بيحمل أسيل من السيارة وبيحطها ع النقالة وبيدخلوها لجوا ومباشرةً لقسم الإسعاف والكل بيدخل وراها وهني خايفين عليها
بيدخل باسل مع أسيل ع الغرفة أما علي بيطلع لبرا وبيقول للممرضة: نادوا الدكتورة ليلى لهون فوراً
بيقرب عصام من علي وبيسأله بقلق: صاير شي لأختك علي؟ أذاها شي؟
علي بيجاوب وهو يتجنب يتطلع بعيون أبوه: لا بابا مافيها شي بس للاطمئنان مو اكتر
بعد دقيقتين بتوصل الدكتورة ليلى وبتدخل لغرفة أسيل وبيطلع باسل لعند الباقي وهو حاسس بقهر الدني كلها اجتمع بقلبه... بيسند حاله ع الحيط بضعف وبيغمض عيونه لحتى يمنع دموعه من أنهن ينزلوا.. بتقرب رانيا لعنده وبتقول: الدنيا ابتلاءات يا ابني ولازم نحمد الله ونشكره دائماً على كل شي.. قول الحمدلله أنه لقيتوها قبل ما يأذيها
باسل بيهمس بضعف: الحمدلله على كل حال
بعد مدة بيسمعوا صوت أسيل من جوا عم تصرخ وبيكون علي بدو يدخل يشوف شو صاير بس حسين بيمنعه وبيقول: اهدى علي واترك الدكتورة تشوف شغلها
علي بيضغط ع ايديه بقوة لدرجة بتبرز عروق ايديه كلها وبتقرب حنين منه وبتقول بحزن: اهدى علي الله يخليك اهدى.. بإذن الله رح تكون أسيل بخير
علي بيتنهد بحزن وبيقول: انشالله انشالله
بعد مدة بتطلع الدكتورة من غرفة أسيل ومباشرةً بيسألها باسل بلهفة: طمنيني دكتورة كيف وضعها؟
د.ليلى بتقول بأسف: صاير معها انهيار عصبي شديد.. رجعت لوعيها وصارت تصرخ لهيك عطيتها إبرة مهدئ.. ما بعرف شو بدي قلكن بس واضح إنها متعرضة لمحاولة اعتداء عنيفة وهالشي أثر ع نفسيتها
عصام بيهمس بصدمة: اعتداء!!!!
خضر بيكز ع أسنانه بقهر وبيقول: الكلب الحقير
غسان: اهدوا شوي واتركوا الدكتورة تكفي كلامها
د.ليلى: لحقتوها قبل ما يعمل معها شي بس أي حدا بيشوفها بيقدر يعرف إنها تعرضت للعنف عن طريق الآثار يلي بوجهها ورقبتها... الحمدلله لحقتوها قبل ما يصير شي... الفترة الجاية كتير مهمة ولازم كلكن توقفوا جنبها وتدعموها نفسياً ومعنوياً ويفضل ما تحكوا بالحادثة قدامها أبداً
حسين: رح نعمل جهدنا اكيد... شكراً الك دكتورة
د.ليلى: العفو والحمدلله ع سلامتها
بتروح الدكتورة ليلى ع شغلها وحسن بيقول بغضب وهو كازز ع أسنانه: إذا ما خليتك تندم يا أيهم ما بيكون اسمي حسن
خضر بغضب: وينه هلق هالكلب؟ لساته عايش؟
علي بيقول بحزم: بيكفي انتو التنين... ما بدي اسمع من اي حدا اي كلمة بتتعلق بيلي صار... كلكن سمعتوا حكي الدكتورة ويلي مافيه يطبقه يروح من هون.. أنا حالياً مو متحمل حالي ويلي بدو يعارض رح يشوف شي ما بيعجبه
عمار: خلص الموضوع تسكر هون وماعد حدا رح يحكي فيه نهائياً (بيقرب لعند علي وباسل وبيقول) وانتو تعالوا معي اغسلوا وجهكن وايديكن يلا
بيمشوا علي وباسل مع عمار وبيدخلوا ع الحمام، بيغسلوا وجوههن وايديهن وبيقول عمار: انتو التنين لازم تكونوا أقوى من الكل والمهمة الأكبر بتوقع عليكن انتو (بيتطلع بعلي وبيقول) أنت بالنسبة لأسيل اكتر بكتير من أخ.. أنت سندها وقوتها وإذا شافتك منهار مارح تقدر توقف من جديد (بيتطلع بباسل وبيقول) وأنت يا باسل مهمتك صعبة وبعرف أنه يلي صار تقيل عليك اكتر من الكل بس بدك تنسى وتفكر بأسيل وصحتها وبس
باسل بيمسح وجهه بكف ايده وبيقول: أنا ما بدي شي إلا أنه أسيل تكون بخير
علي بيحط ايده ع كتف وباسل وبيقول: بإذن الله رح ترجع متل ما كانت
باسل بتنزل دمعة من عينه وبيضم علي وهو عم يقول بصوت واطي: انشالله
بيرجعوا الشباب لقدام غرفة أسيل وبيقول علي: خالتي مافيه داعي تبقوا كلكن هون... أسيل نايمة ومارح تصحى هلق
رانيا: رح تطالعوها اليوم من المستشفى؟
علي: لا بتوقع تبقى لبكرا.. لحتى يكون وضعها استقر شوي... هلق منطالعها لغرفة خاصة وببقى أنا وباسل جنبها
حنين وسالي بيحكوا مع بعض: وأنا كمان رح ابقى
عصام: وأنا كمان مارح روح
باسل: لا عمي أنت روح ارتاح وخليك جنب خالتي
غسان: اي أخي روح أنت ع البيت وأنا وحسين باقيين هون بالمستشفى كمان
عصام بيتنهد وبيقول: ماشي بس إذا صار شي اتصلوا فيي فوراً
علي: لا تقلق بابا (بيتطلع بحسن وبيقول) يلا حسن روحوا ع البيت وأنا ببقى ع تواصل معك
حسن: حاضر أخي
بيروح الكل ع البيت وغسان وحسين بيروحوا لشغلهن وبيضلوا علي وباسل لحالهن، بيطالعوا أسيل لغرفة خاصة وبيبقوا جنبها
بعد ساعة ونص...
بتبدأ أسيل تفتح عيونها ببطء وبتطلع حواليها بتشوف علي وباسل يلي لما يحسوا ع حركتها بيقربوا منها بلهفة بس هيي مجرد ما تتذكر يلي صار معها بتحس نفسها عم يضيق وبتصير تبكي وتصرخ.. بيقرب علي منها لحتى يهديها بس هيي بتكون منهارة تماماً وبتصير تصرخ وتقول: ما بدي شوف حدا.. بدي ابقى لحالي اتركوني لحالي أنا ما بدي حدا ما بدي حدا
علي لما يشوف أسيل بهالحالة بيعطيها إبرة تانية لتهدى وتنام
🌺 🌺 🌺
ببيت عصام...
بيكون الكل قاعد بالصالة وفاديا عم تبكي وتقول: بدي روح شوفها الله يخليك يا حسن خدني لعندها
رانيا: طولي بالك يا أختي.. هلق حكي علي وقال إنها رجعت نامت يعني مارح تستفادي شي من الروحة لعندها
فاديا: ياربي دخيلك ليش هيك عم يصير مع هالبنت.. من أول حياتها وهيي عم تتعذب
سلمى: وكلي الله مرت أخي ما بيصير هالحكي.. ادعيلها الله يريح قلبها وانشالله تعدي هالفترة على خير
فاديا بتقول بغصة: انشالله انشالله
🍁🍁 🍁🍁 🍁🍁
بعد مرور ٥ أيام....
نازلة فاديا الصبح من غرفة أسيل ومعها صينية عليها أكل، بتدخل ع المطبخ بتحط الصينية ع المجلى وبتتهند وبتقول بحرقة: ما أكلت إلا لقمتين
عصام: لا حول ولا قوة إلا بالله... لايمت رح تبقى ع هالحالة؟
آدم بأسف: صرلها ٥ أيام لا بتاكل منيح ولا بترضى تشوف حدا إلا أمي وحنين وسالي.. أنا خايف عليها كتير
علي: يلي صار مو سهل أبداً... أسيل البريئة يلي بتخجل حتى من أهلها فجأة تمر بهيك شي قاسي.. ردة فعلها كتير طبيعية ونحنا لازم نبقى جنبها ولا نضغط عليها
فاديا بتقعد ع كرسي وبتقول: أكيد يا ابني أكيد مارح نضغط عليها بس والله قلبي عم يتقطع لما شوفها هيك ولا لسا باسل يلي حالته بتبكي الحجر
علي بيهز راسه وبيقول بأسف: فعلاً حالة باسل صعبة كتير.. عم يحاول يتمالك حاله بس الله وحده بيعلم شو عم يصير جواته
عصام: شو عامل بإيده؟ عم تقلي أمك كان مبارح لاففها بشاش
علي: ضربها بالمراية لصارت مية شقفة وايده تجرحت كلها من برا
آدم: والله يلي صار مو سهل.. يعني الفترة يلي لازم يكون هو وأسيل فرحانين فيها وعم يحضّروا لعرسهن بتصير أسيل مو متقبلة تشوف وجهه.. والله صعبة كتير
فاديا بتقول بحرقة: اي والله صعبة كتير... الله يكون معه
بيكملوا فطورهن وهني ساكتين وقبل ما يخلصوا بشوي بيندق باب البيت وبيقوم علي بيفتح وبيرجع بعد دقيقة ومعه حنين وسالي.. بيدخلوا ع المطبخ وبيقولوا بصوت واحد: صباح الخير
الكل: صباح النور
حنين وسالي: صحة وهنا
فاديا: على قلبكن يا روحي... تفضلوا افطروا معنا
سالي: أنا فطرت واجيت
حنين: وأنا كمان فطرانة (بتطلع بعلي وبتقول) كيفها أسيل؟
علي: الحمدلله ماشي حالها
عصام بيتطلع بسالي وبيقول: كيفه باسل؟
سالي: الحمدلله هدي شوي بس لساته مقهور لأنه أسيل ماعم ترضى تشوفه
عصام: الله يرضى عليكن يا بنات احكوا مع أسيل بالهداوة وحاولوا تقنعوها تطلع من غرفتها وتقعد معنا.. بلكي شوي شوي بتتقبل تشوف باسل
حنين: لا تقلق خالو رح نحاول معها وانشالله تقبل
عصام: انشالله... صحيح حنين منشان تجهيز بيتكن، أنا قلتله لعلي ياخدك وتنزلوا ع السوق تشوفوا يلي بدكن ياه بس قلي أنه أنتِ ما قبلتِ
حنين: كيف بدي اترك أسيل بهالحالة وانزل ع السوق!!
فاديا: بس يا بنتي مو باقي للعرس إلا ١٥ يوم
حنين: وكمان عرس أسيل بنفس اليوم.. لما تطلع من حالتها وترجع لطبيعتها منرجع نكمل سوا ومنشان البيت أنا عم فكر اختار كم شغلة ع النت وبعدها بنزل أنا وعلي منشوفهن سوا ومنه بخلي أسيل تشوف معي بلكي بتغير جو شوي (بتطلع بعلي وبتقول) إذا علي ماعنده مانع طبعاً
علي: الفكرة حلوة كتير وأكيد ماعندي مانع
حنين بتبتسم ابتسامة هادية وبتقول: تمام
سالي: نحنا منستأذن لنطلع لعند أسيل
الكل: إذنكن معكن
بيطلعوا حنين وسالي لعند أسيل، بيلاقوها قاعدة وشاردة بالفراغ... بيقربوا لعندها وبيقعدوا جنبها ع السرير كل وحدة من جهة وبتقول حنين: صباح الخير يا حلو
أسيل بهدوء: صباح النور
سالي: قال حنين بدها تطلب منك طلب بس خايفة إنك لا تلبيها
أسيل ببرود: شو الطلب؟
حنين: بدي ياكِ تختاري معي طقم الكنبايات منشان غرفة الضيوف... أنتِ بتعرفي ذوق علي اكتر مني
أسيل بتهمس بحزن: حنين والله ماني قادرة أطلع من البيت
حنين: رح نختار عن النت
أسيل بعد تفكير بسيط بتقول: إذا هيك ماشي الحال
حنين بتبتسم وبتضم أسيل وبتقول: الله يخليلي ياكِ
سالي بمزح: ايوااا وأنا طلعت برا يعني؟
أسيل بتبتسم ابتسامة خفيفة وبتقول: لا ما النا غنى عنك
بتبتسم سالي وبتضم أسيل وبتقول: دخيلها الحنونة يلي ما بيهون عليها زعلي... يلا حنين جيبي تلفونك
حنين: يلا
بتقوم حنين لعند الطاولة وبتفتح شنتايتها لتاخد التلفون وبعدها بترجع بتقعد جنب أسيل وقبل ما تفتح ع التصاميم بيندق باب الغرفة وبيسمعوا صوت علي من برا عم يقول: أختي انا رايح ع المستشفى... انتبهي ع حالك وإذا احتجتِ اي شي اتصلي فيي
أسيل بتتنهد بحزن وبتهمس: الله يحميك وييسر أمرك
حنين بتهمس بتردد: أسيل والله علي كتير مقهور لأنه ماعم ترضي تشوفيه... كل يوم عم يجي يحاكيكِ من ورا الباب بس لأنه ماعم يهون عليه يطلع برا البيت بدون ما يودعك
سالي: اطلعي شوفيه واحكي معه.. صدقيني ماحدا بالكون رح يريحك متل أخوكِ... هاد علي يا أسيل.. علي الكتف يلي سندك دائماً وحماكِ من كل الدني
أسيل بيدمعوا عيونها وبتقوم بسرعة من السرير وبتتوجه للباب بتفتحه وبتلاقي علي متوجه للدرج لحتى ينزل بس لما يسمع صوت الباب انفتح بيوقف وبيلتفت وبيهمس بصدمة ممزوجة بفرح: أسيل!!!
أسيل بتركض لعند علي وبترمي حالها بحضنه وما بتلاقي حالها إلا عم تبكي وتبكي وهو بيضمها بحنية وبيمسح ع شعرها بدون اي كلمة.. هو بيعرف إنها محتاجة حالياً حضنه وبس بدون كلام وتنظير لهيك بيفضل يبقى ساكت ويتركلها المجال تعبر بدموعها عن القهر يلي جواتها... بتمر خمس دقايق وعشر دقايق وربع ساعة ع نفس الوضعية وبعدها بتبعد أسيل عن علي وبتقول وهيي لساتها عم تبكي وراسها بالأرض: أخي أنا مو قدرانة اتطلع بوجه حدا منكن، أنا.. أنا كتير كرهانة حالي بسبب يلي صار و..
بيقاطع حكيها علي لما يرفعلها راسها ويقول: أنتِ ما الك ذنب بشي أسيل... ارفعي راسك وخليكِ رافعتيه دائماً... أنتِ ما عملتِ شي لتكرهي حالك وإذا لسا بسمع هالحكي منك رح أزعل كتير كتير
علي بيمسح دموع أسيل بأيديه التنين وبيمسك وجهها وبيقول بحنية: أنتِ وردة هالبيت وروحه يا أسيل ولما تكوني زعلانة كل البيت بيدبل... بدي ياكِ ترجعي أسيل يلي بعرفها.. أسيل يلي كانت ضحكتها مزينة بيتنا ويلي ما بتسمح لحدا مننا يطلع برا البيت بدون ما تودعه بدعوة لطيفة وابتسامة حلوة... نحنا بدونك مننطفي يا أختي وكلنا محتاجين ترجعي تنوري حياتنا بضحكتك
أسيل بتضم علي بقوة وبتقول: الله يخليلي ياك يا علي ولا يحرمني من حنيتك.. صدقني من اليوم رح أعمل كل جهدي لأرجع متل قبل
علي بيمسح ع شعر أسيل وبيقول: مافيه شي رح يريحلك قلبك متل القرآن الكريم.. هو دوا لكل هم وحزن بالدني
أسيل: معك حق... مافيه شي رح يشفي قلبي وعقلي إلا القرآن الكريم
🌺 🌺 🌺
ببيت غسان...
قاعدة رانيا بالصالة هيي وسارة وعم يشربوا قهوة.. بتحط رانيا فنجانها ع الطاولة وبتقول بحرقة: ااه والله قلبي عم يتقطع ع حالة أخوكِ وأنا عم شوفه قدامي مقهور
سارة بحسرة: والله وحالة أسيل بتبكي.. لهلق ما قبلت تشوف حدا من أخواتها وحتى علي ما قبلت تشوفه
رانيا: حسبي الله ونعم الوكيل بيلي كان السبب.. الله ينتقم منه ع يلي عمله فينا.. لك بعد يلي عمله بباسل ودخل السجن قلنا خلص ارتحنا منه.. والله لهلق ماعم أفهم كيف قدر يهرب!!
سارة: المحامي حمزة قال أنه كانوا اخدينه من السجن ع المستشفى لأنه مريض كتير وموجوع وماعم يعرفه شو صايرله وبالطريق قدر يهرب
رانيا: لا حول ولا قوة إلا بالله... وهلق شو صار فيه؟
سارة: سمعت حسن عم يقول أنه انحكم إعدام.. خلص أمي خلينا نغير سيرته والله هاليومين حسيت راسي رح يطير من محله من يلي صار وماعد قدرانة اسمع ولا حرف عن هالقصة
رانيا بتتنهد وبتقول: معك حق.. انشالله تنحل أمور أخوكِ مع أسيل على خير وترجع أسيل لطبيعتها
سارة: انشالله
🌺 🌺 🌺
ع موعد الغدا ببيت عصام بيرجع علي ع البيت وبيدخل وهو عم ينادي أمه: ماما أنا اجيت
بيسكر علي الباب وبيشلح بوطه وجاكيته وبيشوف أسيل طالعة من المطبخ وعم تقول: يعطيك العافية أخي
علي بتتوسع ابتسامته وبتلمع عيونه بفرح وهو عم يشوف أسيل برا غرفتها من بعد ما مروا ٥ أيام وهيي حابسة حالها بالغرفة... بيقرب لعندها بلهفة وبيقول بفرح: الله يعافي قلبك يا عيوني... هلق صارت الرجعة ع البيت حلوة والها طعمة
بتطلع حنين من المطبخ وبتقول: يعطيك العافية
علي بيبتسم وبيقول: الله يعافيكِ حبيبتي
حنين بتبتسم بخجل وبتقول: ممكن توصلنا أنا وسالي ع البيت؟
أسيل: لا مارح تروحوا قبل ما تتغدوا
سالي بتطلع من المطبخ وبتقول: غير مرة أسيل.. اقعدي مع أخواتك وعمي واقضي الوقت معهن
حنين: سالي معها حق
أسيل: خلص متل ما بدكن
بيطلعوا حنين وسالي من البيت مع علي بيوصّلهن كل وحدة ع بيتها وبيرجع.. بيوصل ع البيت مع وصول حسن وسارة وخضر وسمر وآدم وعصام وبيدخل الكل لجوا.. بتستقبلهن أسيل عند الباب والكل بيكون فرحان فيها وأصوات الضحك بتملى البيت وكأنه الحياة رجعت للبيت من بعد ما كان الحزن مخيم عليه
🌺 🌺 🌺
ببيت غسان بيجتمع الكل حوالين طاولة السفرة لحتى يتغدوا وسالي بتخبرهن أنه أسيل طلعت من غرفتها أخيراً وبتسأل باسل بفضول: أخي ليش ما رحت شفتها؟
باسل: خليها تشوف أخواتها وتقعد معهن بالأول.. وقلتله لعلي يخبرها إني المسا رح امرق شوفها
رانيا: باسل بدك توعدني لا تنفعل مهما كانت ردة فعلها.. اتفقنا ابني؟
باسل: لا تقلقي ماما رح أتقبل اي ردة فعل بتظهرها، المهم عندي هيي تكون بخير
غسان: انشالله خير
بعد الغدا بيطلع كل واحد ع غرفته بيرتاح ومتل العادة باسل بيرجع ع المستشفى بعد الضهر ولما يخلّص شغله هو وعلي بيطلعوا سوا من المستشفى كل واحد بسيارته وبيتوجهوا لبيت عصام
بيوصلوا ع البيت قبل موعد العشا بنص ساعة... بيفتح علي الباب وبيقول بصوت عالي: ماما أسيل وينكن؟
بتطلع أسيل من الصالة لتستقبل أخوها متل العادة بس لما تشوف باسل جنبه بتجمد بأرضها وبتحس كل جسمها رجف ودقات قلبها تسارعت وقبل ما يحكي حدا أي كلمة بتركض باتجاه الدرج وبتطلع ع غرفتها بسرعة وهيي عم تبكي
بيتطلع باسل بعلي وبيقول بحرقة: ياريتك خبرتها إني رح اجي معك
علي: قلتلك بالمستشفى لو خبرتها كانت رح تبقى بغرفتها
باسل باستياء: يعني هلق مارح تبقى بغرفتها؟
علي: ع الأقل شافتك.. لحظة المواجهة هي كان لابد منها.. ادخل ع الصالة أنا رح اطلع شوفها
بيدخل باسل ع الصالة وبيلاقي فاديا قاعدة لحالها، بيقرب لعندها بيبوس ايدها وبيقول: مسا الخير خالتي كيفك
فاديا: الحمدلله يا ابني كيفك أنت
باسل بيتنهد وبيقول: الحمدلله بخير
فاديا: وين علي وأسيل؟
باسل بحرقة: أسيل لما شافتني طلعت ع غرفتها وعلي طلع يحاكيها
فاديا بحزن: لا حول ولا قوة إلا بالله
بغرفة أسيل...
بيدق علي باب الغرفة وبيحاول يفتحه بس بيكون مقفول، بيحكي من ورا الباب: أسيل افتحي خلينا نحكي
أسيل ما بترد بس بيرجع علي بيدق الباب وبيقول: لو سمحتِ أختي افتحيلي وخلينا نحكي بهدوء
أسيل بتمسح دموعها وبتقوم بتفتح الباب وبترجع لجوا الغرفة بتقعد ع طرف السرير وعلي بيدخل وراها وبيقعد جنبها وبيحط ايده ع راسها وبيمسح ع شعرها بحنية وبيقول: ليش عم تبكي؟
أسيل بتجاوب بغصة: ليش ما خبرتني أنه باسل رح يجي معك؟
علي: أنا آسف بس كان ضروري تواجهيه ولو خبرتك ما كنتِ رح تنزلي من غرفتك
أسيل بتطلع بعلي وبتقول وعيونها مدمعين: هو طلب منك لا تخبرني ماهيك؟
علي: لا تظلميه أسيل... هو طلب مني خبرك بس أنا قررت ما خبرك بشي
أسيل بتنزل دمعة من عينها وبتمسحها مباشرةً وبتقول بصوت مخنوق: أنا لسا ماني مستعدة لشوفه.. لهيك لو سمحت علي لا تضغط عليي بهالموضوع
علي: شو ذنبه هو أسيل؟ أنتِ ما بتعرفي اديش باسل بيحبك وكيف مروا عليه هالكم يوم.. حرام عليكِ أختي والله باسل ما بيستاهل تحرميه منك هيك
أسيل بتحكي وهيي عم تبكي وتشهق: ليش أنا شو كان ذنبي لصار فيي هيك؟؟ أنا كنت بستاهل يصير فيي يلي صار؟
علي بيضم أسيل وبيقول: يلي صار مو ذنب حدا.. مو ذنب حدا بس هاد امتحان من رب العالمين ولازم نصبر ونحمد الله ع كل شي.. يلي صار صعب كتير بس إذا وقفنا جنب بعض بيصير كل شي سهل
أسيل بتبقى عم تبكي ع كتف علي وبعد مدة بتقوم وبتقول وهيي عم تمسح دموعها: خلص أخي اسبقني لتحت.. رح غير تيابي وألحقك
علي بيبتسم بحنية وبيقول: الله يخليلي ياكِ يا حنونة
بينزل علي من غرفة أسيل وبيدخل ع الصالة بيسلم ع أمه وبيقعد وفاديا بتسأل مباشرةً: ما قبلت تنزل؟
علي: امبلا رح تلحقني
فاديا: اي تمام
بعد عشر دقايق بتنزل أسيل من غرفتها وبتكون لابسة تنورة بلون أسود وفيها ورود صغيرة باللون الأبيض وفوقها قميص أبيض وشعرها رافعته كعكة ومنزلة خصلتين من قدام ع خدودها.. بتقرب بتوتر لعند باسل وبتمد ايدها بلبكة وبتهمس: م.مسا الخير
باسل بيوقف وبيسلم ع أسيل وبيقول: مسا النور
بتقعد أسيل جنب علي وبيقعد باسل محله وهو حاسس قلبه رح يطير من فرحته بوجود أسيل وشوفتها قدامه من بعد ما مرق أصعب أسبوع عليه وطبعاً ما كان صعب عليه يلاحظ توترها ولبكتها
بيوقف علي وهو عم يقول: عن إذنك باسل، أنا طالع غير تيابي
باسل: إذنك معك
فاديا بتوقف كمان وبتقول: وأنا رح جهز السفرة لبينما يوصل عصام وآدم
أسيل بتوقف بسرعة مع فاديا وبتقول: رح اجي ساعدك
فاديا: لا يا روحي خليكِ مرتاحة وقاعدة
بيطلعوا فاديا وعلي من الصالة وبيتركوا أسيل مع باسل لحالهن ع أمل يحكوا شوي.. بتمر خمس دقايق وأسيل منزلة راسها وعم تفرك أيديها ببعض بتوتر وباسل عم يراقبها ومحتار شو عم يعمل وبالأخير بيقرر يكسر هالصمت وبيقول: كيف صرتِ؟
أسيل بتهمس وهيي ع نفس الوضعية: الحمدلله
باسل: الحمدلله (بيسكت شوي وبيرجع بيقول) أنا آسف لأني اجيت بدون ما يكون عندك خبر بس علي قرر لا يخبرك
أسيل بهمس: بسيطة حصل خير وأنا بعتذر ع ردة فعلي بس (بتتنهد وبتقول) لساتني متوترة من يلي صار
باسل: مو مشكلة المهم تكوني بخير
ع موعد العشا بيوصلوا آدم وعصام وبيجتمع الكل حوالين طاولة السفرة وبعد ما ييدأوا أكل بيقول عصام وهو عم يتطلع بأسيل: عمك غسان وخالك حسين حابين يجوا يشوفوكِ
أسيل بتجاوب بتردد: اي اهلا وسهلا فيهن
عصام بيقول بحنية: اذا حاسة حالك مو مرتاحة بعتذر منهن ومنأجلها لغير مرة
أسيل: لا عمي مافيه مشكلة
بعد العشا بيقعدوا عصام والشباب بالصالة أما أسيل وفاديا بيضبوا السفرة وبيرتبوا المطبخ وبعدها بيدخلوا ع الصالة بيقعدوا وبعد مدة بيوصلوا غسان ورانيا وسالي ووراهن حسين وسلمى وحنين... بتقوم أسيل هيي وحنين وسالي ع المطبخ بيحضّروا الشاي وبياخدوها ع الصالة بيضيفوا الكل وبيقعدوا
من حديث لحديث بينفتح موضوع العرس وعصام بيتطلع بأسيل وبيقول: بنتي بتعرفي أنه العرس مو باقيله إلا ١٥ يوم ولازم تكملي التحضيرات بسرعة
أسيل بتطلع بكل الموجودين وبتقول بتردد: أنا كنت بدي احكي معكن بخصوص هالموضوع
غسان: احكي بنتي ويلي بدك ياه بيصير
أسيل بتاخد نفس وبتقول بتوتر: أ.أنا أنا ب.بدي نأجل العرس
بيتطلعوا الكل ببعضهن والدهشة والصدمة واضحة ع وجوههن وبتقول فاديا وهيي عم تطلع بأسيل: كيف يعني بدك تأجلي العرس؟
أسيل:...........
عصام: بنتي احكي اشرحيلنا شو السبب؟ العرس بعد ١٥ يوم وأنتِ هلق عم تقولي بدك تأجليه... فهمينا شو عم يصير؟؟
أسيل بتنزل راسها بتوتر وبتهمس: أنا لساتني تعبانة وما عندي قدرة كمل تحضيرات
فاديا: بس يا أسيل الناس كلها بتعرف أنه عرسك أنتِ وباسل تحدد مع عرس علي وحنين.. شو بدنا نقول للناس؟ كيف بدنا نبرر التأجيل؟
أسيل:.......
علي: أسيل لا تترددي واحكي كل شي عم تفكري فيه وخلينا نلاقي حل للمشكلة مهما كانت
أسيل بتبقى ساكتة ومنزلة راسها وعم تجاهد لتحبس دموعها ورانيا بتقول: باسل احكي شي كلمة.. أنت صاحب العلاقة ولازم نعرف رأيك بهالكلام
باسل بياخد نفس وبيقول بهدوء: أنا حابب أقعد مع أسيل لحالنا ونحكي بهدوء (بيتطلع بعصام وعلي وبيقول) إذا عمي وعلي بيسمحوا طبعاً
عصام: أكيد ابني مافيه مشكلة (بيتطلع بأسيل وبيقول بهدوء) بنتي قومي مع باسل واقعدوا بغرفة الضيوف
بتقوم أسيل بعد ما تطلع بعلي وتاخد موافقته وبتمشي مع باسل وبيطلعوا من الصالة ولما يوصلوا لعند غرفة الضيوف بتوقف أسيل وبتقول بتوتر: ممكن نقعد بالحديقة الشتوية؟
باسل بيهز راسه بتفهم وبيقول: أكيد تفضلي
بيطلعوا باسل وأسيل ع الحديقة الشتوية وبيقعدوا قبال بعض حوالين الطاولة الدائرية الموجودة ببداية الحديقة وبيقول باسل بهدوء: أسيل أنا بتفهّم رغبتك بتأجيل العرس وبعرف أنه بعد يلي صار صعب عليكِ تتقبليني كرجل وشريك حياة بهالسرعة وإنك بحاجة وقت لحتى تنسي يلي صار وهالشي كتير طبيعي بالنسبة لصبية متلك مرت بالشي يلي أنتِ مريتِ فيه
أسيل بتهمس بتوتر: أنا...
باسل بيقاطع أسيل وبيقول: خليني كمل كلامي وبعدها احكي يلي بدك ياه
أسيل بلبكة: تفضل
باسل: خالتي كانت عم تقول الناس كلها بتعرف أنه عرسنا بعد ١٥ يوم وكيف بدنا نبرر تأجيل العرس بس صدقيني ما بيهمني الناس وشو رح يحكوا، يلي بيهمني هو أنتِ وإذا أجلنا العرس بخاف يجرحك كلام الناس وتلميحاتهن... بخاف تأذيكِ نظراتهن أما هني شو بيفكروا صدقيني ما بيهمني لأنه هي حياتنا نحنا مو حياتهن هني
بيسكت باسل شوي وبياخد نفس وبيكمل بتوتر: بدي منك تقبلي يبقى العرس بموعده وأنا بوعدك ما قرب منك لحتى ترتاحي وتتجاوزي يلي صار
أسيل بتطلع بباسل وهيي مصدومة وبتهمس بعد مدة بتوتر: بس أنت هيك رح تنظلم
باسل بيبتسم ابتسامة هادية وبيقول: لا تفكري فيي.. أنا بكون مرتاح لما أنتِ تكوني مرتاحة وكمان بهالطريقة علي وعمي وخالتي رح يكونوا متطمنين عليكِ
أسيل بتتنهد وبتهمس بعد تفكير: موافقة
باسل: تمام بس هاد الحكي بيبقى بيناتنا وما لازم حدا يعرف فيه حتى علي كرمال لا يضغط حدا عليكِ
أسيل بتهز راسها وبتهمس بتوتر: شكراً كتير الك
باسل بيبتسم وبيقول: يلا خلينا ندخل نريحلهن قلبهن
أسيل بتقوم مع باسل وبيدخلوا ع الصالة وبيقعدوا جنب بعض وباسل بيقول: أنا وأسيل اتفقنا.. رح يبقى العرس بموعده
بتنرسم البسمة والضحكة ع وجوه الكل باستثناء علي يلي كان بيعرف كتير منيح أنه باسل ظلم حاله كرمال أسيل تكون مرتاحة... هو بيعرف أخته وبيعرف باسل اكتر من حالهن وما كان صعب يستنتج كيف باسل أقنع أسيل بالعرس بس قرر أنه يترك كل شي يمشي ع حاله وبعد العرس بيحكي مع باسل
🍁🍁 🍁🍁 🍁🍁
بتمر الأيام وبينشغل الكل بالتحضير للعرس من جديد وبيجي يوم العرس والكل فرحان باستثناء أسيل يلي كانت طول الوقت متوترة وحاسة بغصة وطبعاً باسل ما كان حاله أحسن من حالها بس كان عم يظهر فرحته حتى ما يحس حدا على شي
بعد ما تخلص الحفلة بيودعوا أسيل وحنين أهاليهن وأخواتهن وبتروح كل وحدة مع زوجها بسيارته وبيتوجهوا باسل وأسيل للفندق يلي حجز فيه باسل ليلة وحدة باعتبار تاني يوم رح يسافروا شهر عسل ع إيطاليا أما علي وحنين بيتوجهوا لبيتهن وبيكونوا متفقين يسافروا تاني يوم الصبح بكير ليقضوا شهر العسل بسويسرا
بيوصلوا أسيل وباسل للفندق وبيطلعوا ع الجناح يلي حجزه باسل... بيدخلوا ع صالة الجناح وبيسكر باسل الباب وبيتوجه للكنبة بيقعد وبيبدأ يفرك جبينه بأصابعه ليخفف من شدة الصداع يلي صايبه أما أسيل بتبقى واقفة بمكانها متوترة وعم تطلع بالأرض وبتهمس بتوتر ولبكة: تعبان؟
باسل بيرفع راسه وبيتطلع بأسيل وبيبتسملها بهدوء وبيقول: لا شوية صداع بس.. ادخلي ع الغرفة غيري فستانك أنا رح اطلب عشا
أسيل بتقول بتوتر: أنا ما بدي أكل
باسل: ليش شو أكلتِ اليوم؟
أسيل بتهمس: ولا شي
باسل: معناها رح تاكلي.. يلا ادخلي ع الغرفة وخدي راحتك فيها أنا رح ادخل ع الحمام التاني غير تيابي
أسيل بتهز راسها بمعنى اي وبتدخل ع الغرفة أما باسل بيقوم بيطلب أكل وبعدها بيدخل ع الحمام التاني بياخد شاور سريع وبيلبس بيجامته وبيرجع ع الصالة وبعد مدة بتطلع أسيل من الغرفة وبتكون لابسة بيجامة ورافعة شعرها كعكة ولما يشوفها باسل بيقول: تعي أسيل شوي وبيوصل الأكل
بتقرب أسيل بتردد وبتقعد جنب باسل وهو بينتبه ع رجفتها وخوفها لهيك بيقول: أسيل اهدي مافيه داعي لكل هالتوتر.. نحنا متفقين وأنا لساتني عند وعدي ولا ما عندك ثقة فيي؟
أسيل بتهمس بلبكة: لا مو هيك القصة بس الجو جديد عليي كتير وبدي وقت لأتأقلم
باسل بيهز راسه بتفهم وبيقول: معك حق
بعد دقيقتين بيوصل الأكل وبيقعدوا باسل وأسيل بيتعشوا ولما
تتمة السابع
بعد دقيقتين بيوصل الأكل وبيقعدوا باسل وأسيل بيتعشوا ولما يخلّصوا بيقول باسل: أنا رح نام هون وأنتِ خدي راحتك بالغرفة
أسيل: بس الكنبة مارح تكون مريحة.. خليني نام أنا هون وأن....
باسل بيقاطع أسيل وبيقول: أنا رح نام هون وما بدي نقاش.. يلا أسيل روحي ارتاحي.. اليوم تعبتِ كتير
أسيل بتوقف وبتقول: متل ما بدك.. تصبح على خير
باسل: وأنتِ بخير
بتدخل أسيل ع الغرفة وأول ما تسكر الباب بترمي حالها ع السرير وبتحضن مخدتها وبتبدأ تبكي بصمت وهيي عم تكتم شهقاتها حتى ما يسمعها باسل.. بتكون مقهورة من يلي عم يصير معها.. الليلة يلي لازم تكون فيها فرحانة متل اي عروس مرت بالحزن والقهر والدموع وبالأخير من كتر البكي والتعب بتغفى:
🌺 🌺 🌺
عند الثنائي التاني.. علي وحنين.. بيوصلوا ع بيتهن وبيدخل علي وهو حامل حنين وبيتوجه للطابق التاني وبيدخل ع غرفتهن... بينزلها ع الأرض بيشيل الكاب عنها وبيحط ايديه ع خصرها وبيهمس: نورتِ أيامي وسنيني وحياتي
حنين بتكون منزلة راسها بخجل وحاسة ع شوي رح توقع بأرضها من التوتر.. بيحط علي ايده تحت دقنها وبيرفعلها راسها وبيخليها تطلع فيه وبيقول: متوضية؟
حنين بتهز راسها بمعنى اي وعلي بيقول: معناها البسي حجابك كرمال نصلي ركعتين
بتتوجه حنين لشنتاية تيابها وبتحط غطا الصلاة ع راسها ولما يخلّصوا الصلاة والدعاء بيقرب علي منها وبيشيل الغطا عن راسها وبيمسك دقنها وبيهمس بحب وهو عم يتطلع بعيونها: بتعرفي إنك طالعة بتاخدي العقل
حنين بيحمروا خدودها وبيرجف جسمها وهيي عم تحس بأيد علي عم تحاوط خصرها وهو بيحس برجفتها وبيقول: وبتعرفي أنه خجلك لسا عم يزيدك فوق جمالك جمال
حنين بتهمس بخجل وخدودها حمر: ورح تبقى عم تخجلني هيك؟
علي بيبتسم وبيقرب حنين منه اكتر وبيسرق قبلة خاطفة من شفافها وبيهمس: لو تعرفي شو نطرت تصيري حلالي لأتنعم بهالخدود يلي بيصيروا متل حبات الكرز لما تخجلي
حنين بيزيد خجلها وبتتسارع دقات قلبها وعلي بيبتسم ع رجفتها وبيمرر ايديه ع خدودها برقة وبيقول: شو رأيك تدخلي تغيري فستانك وتلبسي شي مريح كرمال نعرف نكفي سهرتنا؟
حنين بتهز راسها بمعنى اي وبتسحب حالها بخجل وبتدخل ع الحمام يلي بالغرفة ركض أما علي بيبتسم ع خجلها وبيروح بيعمل دوش سريع بحمام الغرفة التانية وبيلبس بيجامته وبيرجع ع غرفتهن بيقعد وبيشرد بالفراغ وهو عم يفكر بأسيل
بعد مدة بيطلع علي من شروده لما ينفتح باب الحمام وتطلع حنين وهيي لابسة فستان نوم قصير باللون الأبيض مزين ع صدره بورود باللون الأحمر وفوقه قطعة تانية لتغطي الجزء المكشوف من جسمها بسبب الفستان.. بيقرب لعندها وهو عم يتطلع فيها بحب وهالشي بيخليها تنزل راسها بخجل لتهرب من نظراته الجريئة بس ثواني وبتكون صارت بين ايديه وبيطبع قبلة رقيقة ع رقبتها وبعدها بيخطف قبلة من شفافها وبيهمس بحب: بحبك يا أحلى شي صار بحياتي!!
حنين بتكون عم تدوب من خجلها وبتغمر راسها بصدر علي لتهرب من نظراته وهو بيبتسم ع حركتها وبيمسك ايدها وبيسحبها باتجاه السرير المزين بالورد الأحمر لحتى يكملوا ليلتهن بحب ورومانسية...
🍁🍁 🍁🍁 🍁🍁
بعد مرور شهر.....
الكل مجتمع ببيت عصام ومنتظرين وصول العرسان من شهر العسل... بيندق باب البيت ليعلن عن أول الواصلين حنين وعلي.. بيدخلوا ع الصالة وبيسلموا ع الكل والكل بيهنيهن وبيباركلهن
بعد مدة بيوصلوا باسل وأسيل وبيدخلوا بيسلموا ع الكل وبتقرب أسيل من سالي بتضمها وبتقول: اشتقتلك كتير كتير
سالي بتبتسم وبتقول: وأنا اكتر يا روحي (بتكمل بمزح وبتقول) بس بما إنك صرتِ مرت أخي رح يكون عنا وقت كتير نقضيه مع بعض من اليوم ورايح
سلمى بتضحك وبتقول: إذا البنت وبنت حماها اتفقوا معناها الله يعينك يا باسل
عمار بيضحك وبيقول بمزح: اي اسألني أنا بهالموضوع.. خبرة ٦ ٧ سنين
الكل: هههههه
بتقرب أسيل من حنين وبتضمها وبتقول: الله يهنيكن ويسعدكن يا قلبي
حنين بتبتسم وبتقول: والقايل يا روحي.. انشالله أيامك كلها سعادة وهنا أنتِ وباسل
بتبعد أسيل عن حنين وهيي مبتسمة وبتقرب لعند علي وبتضمه بقوة وبتتعلق برقبته متل الطفلة والكل بيبتسم ع حركتها وبيعلق آدم بمزح: يعني مهما صار وكبرتِ بتبقي متل الطفلة جنب علي
علي بيبتسم وبيمسح ع ضهر أسيل وبيقول: حبيبة قلبي ومدللتي.. الله يبعتلك أيام حلوة أنتِ وباسل وشوفك ع طول مبسوطة
أسيل بتبعد عن علي وبتبتسم وبتقول: الله يخليلي ياك ويخليكن أنت وحنين لبعض ويسعدكن ويهنيكن
باسل بيبتسم وبيقول: على فكرة مو بس أختك اشتاقتلك
علي بيبتسم وبيقرب من باسل بيضمه وبيقول: والله وأنا اشتقتلك... يمكن هي أول مرة بيمر كل هالوقت بدون ما شوفك
باسل بيضحك وبيقول: فعلاً هي أول مرة... ألف مبروك يا رفيق العمر
علي بيبتسم وبيقول: مبروك النا نحنا التنين
عصام بيبتسم وبيقول: الله يديم هالمحبة واللمة الحلوة
الكل: آمين
بيقعدوا الشباب بالصالة وبيطلعوا الصبايا ع الحديقة كونه الطقس حلو وسالي بتسأل مباشرةً بفضول: كيف كانت إيطاليا وسويسرا خبرونا
رانيا بتضحك وبتقول: هههه لك بنتي خليهن ياخدوا نفس بالأول
سارة بتبتسم وبتقول: فضولية مو بإيدها
لانا بتضحك وبتقول: بس هالمرة معها حق.. القصة فيها إيطاليا وسويسرا
سمر بتقول وهيي مبتسمة: ليش أنتِ وين قضيتِ شهر العسل؟
لانا بتضحك وبتقول: هههه أنا انحسبوا عليي السنتين يلي عشتهن بفرنسا شهر عسل
سالي بمزح: اي مين قدك سنتين وأنتِ عم تتنقلي بمدن فرنسا (بتلتفت ع أسيل وبتقول بحماس) يلا ابدأي أنتِ بالحديث.. كيف كانت إيطاليا؟ وين رحتوا؟ خبرينا
أسيل بتضحك وبتبدأ تسرد ع مسامعهن عن إيطاليا والجو فيها والأماكن يلي زارتها والكل بيكون ملاحظ أنه نفسيتها تحسنت وضحكتها رجعت بفضل هالمشوار وتغيير الجو ولما تنهي كلامها بتستلم حنين الحديث وبتخبرهن عن سويسرا وأماكنها الرائعة.. وحديث بيجر حديث وبيمر الوقت وهني عم يضحكوا ويحكوا ونفس جو المزح والضحك والأحاديث بيكون موجود بالصالة
بعد مدة...
بيقوموا فاديا وأسيل بيتمشوا بالحديقة ولما يوصلوا لعند المسبح بيوقفوا وبتسأل فاديا: كيفك أنتِ وباسل؟
أسيل بتتلبك وبتنزل راسها بخجل وبتقول: الحمدلله ماما تمام
فاديا: أكيد أسيل؟؟
قبل ما ترد أسيل بتقرب رانيا لعندهن وبتقول وهيي مبتسمة: الأم وبنتها اشتاقوا يبقوا لوحدهن بسرعة
فاديا بتبتسم وبتقول: عم اتطمن عليها هيي وباسل
رانيا بتوقف ورا أسيل وبتحط ايديها التنين ع كتافها وبتقول: أسيل مافيه متلها وأكيد رح تكون مثال الزوجة الصالحة لباسل
أسيل بترد بخجل: انشالله مرت عمو
فاديا بتبتسم وبتقول: كان آدم ع طول يقلك ليش ما بتناديها خالتي متلنا وأنتِ تقولي كرمال عمو غسان بحب ناديها مرت عمو وهلق صار للكلمة معنى اكتر كرمال باسل
أسيل بتبتسم وبتقول: اي بتذكر وكانت مرت عمو تقلي ع طول قليلي هيك
رانيا بتقول وهيي مبتسمة: كنت حب هالكلمة منك كتير وهلق صرت حبها اكتر واكتر لأنك صرتِ زوجة باسل وعطيتها حقها اكتر
أسيل: الله يخليلي ياكن ولا يحرمني من وجودكن جنبي
فاديا: ويخليلنا ياكِ يا عمري... يلا روحي اقعدي مع الصبايا نحنا رح نروح نجهز الغدا
أسيل: رح اجي ساعدكن
رانيا بتبتسم وبتقول: أنتِ هلق عروس جديدة خليكِ مرتاحة ولا تفكري بحدا إلا زوجك وبس
أسيل بتنسحب بخجل وبتروح لعند الصبايا أما فاديا ورانيا بيدخلوا ع المطبخ مع سلمى ليبدأوا بتحضير الغدا
بالصالة بيكونوا كل تنين مشغولين بحديث وعلي بيستغل هالفرصة وبيقرب من باسل وبيهمس: تعال معي شوي
باسل بيقوم مع علي وبيطلعوا من الصالة وبيدخلوا ع غرفة الضيوف وباسل بيقول باستغراب: خير علي شو فيه؟!!!
علي: ولا شي.. حابب اتطمن عنك وعن أسيل
باسل بيبتسم وبيقول: ما كل يومين كنت تتصل وتسأل عننا.. كم مرة لسا بدك تسأل هالسؤال؟
علي: السؤال ع التلفون غير السؤال وجه لوجه
باسل بيفهم أنه علي كل الفترة الماضية ما كان عم يقتنع بجوابه ع التلفون لهيك حابب يتطلع بعيونه وهو عم يحكي وبيرجع علي بيقول بإصرار: ما جاوبتني ع سؤالي
باسل بيبتسم وبيقول: الحمدلله نحنا بخير
علي بيهمس بجدية: ما تممت زواجك منها ماهيك؟
باسل بيحاول يحافظ ع ملامح وجهه بس هو بيعرف كتير منيح أنه مافيه يمثّل ع علي... لأنه علي حافظه وحافظ كل تعابير وجهه وحركات ايديه ولمعة عيونه ومتل ما هو بسهولة بيفهم ع علي كمان علي بسهولة بيفهم عليه لهيك بيفضّل يسكت ولا يكذب ع رفيق عمره وبينزل راسه ليهرب من نظرات علي يلي بيرجع وبيقول: جاوبني باسل.. ريحني وجاوبني لو سمحت
باسل بيتطلع بعلي وبيقول: ما أنت بتعرف الجواب.. ليش عم تسأل؟
علي: لحتى اتأكد (بيتنهد بأسف وبيقول) هاد الشي يلي خلاها تتراجع عن تأجيل العرس ماهيك؟
باسل: بالضبط واتفقنا لا نخبر حدا وهلق بدك توعدني لا تحاكيها ولا تسألها ولا تضغط عليها بهالموضوع
علي: اكيد مارح اسألها وأحرجها بس يعني اديش رح يستمر الوضع هيك؟
باسل: لا تغير الموضوع علي.. قلتلك اوعدني
علي بيمسح وجهه بكف ايده وبيقول: وعد وعد مارح احكي معها بشي.. تمام هيك؟
باسل: تمام... إذا خلصت استجواب خلينا نرجع ع الصالة بلا ماحدا يحس ع شي
علي باستياء: الله يسامحك أنا عم استجوبك!! كل القصة إني بدي ارتاح من التفكير
باسل بيبتسم وبيقول: عم نمزح ولو... صاير ما بتلقى مزح بعد ما تزوجت
علي بيضحك وبيضرب باسل بوكس ع كتفه وبيقول بمزح: بلا تنقير حكي حضرة الدكتور
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني الق