الفصل السابع
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم كتفي واكتفائي`*
*❴🔢❵الـــبـــــــــــ❴7️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
قصص وروايات 📚📖:
باسل: حضرتك اتصلت بهاد الرقم
الشب: أنت الدكتور باسل؟
باسل: اي انا باسل.. تفضل كيف فيي ساعدك؟
الشب: سمعت إنك عم تفتش ورا حادثة وفاة عمك وجدك وأنا عندي معلومات مهمة بتفيدك بهالموضوع
باسل بيوقف وبيقول بحماس: شو بتعرف عن الموضوع
أنت؟
الشب: ما بحكي ولا كلمة قبل ما تأمن حمايتي
باسل باستغراب: حمايتك من مين؟
الشب: من يلي تسببوا بالحادث
باسل: مين قصدك؟
الشب: ع التلفون ما بيمشي الحال... أنا ساكن بمنطقة بعيدة شوي عن المدينة اذا بتحب تجي لعندي ببعتلك الموقع
باسل: اي اكيد رح اجي
الشب: بس لو سمحت ما تخبر حدا ولا تجيب حدا معك لأنه الكل بيعرف إني سافرت برا البلد وما بدي حدا يعرف إني لساتني هون
باسل: ما تقلق رح اجي لحالي
الشب: تمام رح ابعتلك الموقع... سلام
باسل: لحظة بس قلي شو اسمك
الشب: عامر
باسل: تمام بانتظار الموقع
بيسكر باسل الخط وبعدها مباشرةً بيوصله الموقع وبيفتحه لحتى يشوف وين صاير.. بيكون مكان بمنطقة جبلية بعيدة حوالي الساعة عن المدينة... بيشلح باسل مريوله الأبيض وبياخد تلفونه وبيطلع ع مكتبه باستعجال... بيدخل ع المكتب بيلبس جاكيته الجلد الأسود فوق البلوزة الصوف السودة يلي لابسها وبياخد مفاتيح سيارته من درج المكتب وبعدها بيطلع من المستشفى وبيركب سيارته وبيتوجه للموقع يلي وصله
بالطريق وهو عم يسوق بيرن تلفونه وبيكون علي المتصل... بيفتح باسل الخط وبيحط التلفون سبيكر وبيقول: اهلين علي
علي: وينك أنت؟ مريت ع مكتبك ما لقيتك وبالعيادة كمان ما لقيتك وماحدا شافك ولا بيعرف وينك
باسل: أنا طلعت من المستشفى... اتصل فيي حدا وقال عنده معلومات متعلقة بحادث عمي وجدي وهلق رايح شوفه
علي بيحكي والصدمة باينة بصوته: عم تمزح ماهيك؟
باسل: لا ماعم امزح.. ليش بدي كون عم امزح؟
علي بغضب: وليش ما خبرتني لحتى روح معك؟؟ لك أنت كيف بتروح لحالك وبتتصرف من راسك؟ نحنا ما اتفقنا نعمل كل شي بهالموضوع سوا؟
باسل: روق علي ولا تنفعل... كنت مستعجل وما كان عندي وقت خبرك بعدين كل الموضوع إني رايح شوف الشب واحكي معه كلمتين
علي: ولو كان أنا رح اجي لعندك... وقف ع اليمين وابعتلي موقعك وانطرني لنروح سوا
باسل: الشب قال ما بدو حدا يكون معي لأنه خايف ينكشف وجوده هون بالبلد
علي بغضب: يعني أنا رح أفضح السيرة مثلاً؟
باسل: لا اكيد بس كل ما قل عدد الناس يلي بيعرفوا كل ما كان احسن.. خلص علي خليني روح شوفه وبعدها ماعد اتصرف لحالي بوعدك
علي: أنا قلبي مو مرتاح.. اذا ما بدك ياني روح معك ابعتلي الموقع يلي رايح عليه تحسباً لأي شي
باسل: يا علي اذا أنت قلقان من أيهم أو فاتح فما فيه داعي للقلق لأنه هني التنين عند جميل من الصبح ولو كانوا رجعوا ع بيوتهن كان حمزة خبرنا
علي بحزم: باسل بلا نقاش.. ابعتلي الموقع
باسل: خلص رح ابعته بس اوعدني لا تلحقني
علي: مارح الحقك إلا إذا تأخرت
باسل: علي اوعدني عم قلك
علي: خلص وعد وعد... مارح اعمل شي إلا في حال تأخرت لرجعت
باسل: تمام.. رح ابعتلك ياه بمسج.. سلام
علي: الله معك
بيسكر باسل الخط وبيبعت الموقع لعلي وبيكمل طريقه
بعد حوالي الساعة....
بيوصل للموقع وبيكون عبارة عن بيت قديم بمنطقة جبلية مهجورة مافيها سكان ولا حركة... بينزل من السيارة وبيتصل برقم الشب وبعد كم رنة بيشوف باب البيت انفتح وطلع منه شب وقال: دكتور باسل؟
باسل: اي نعم أنا باسل... حضرتك عامر؟
الشب: اي.... حدا كان لاحقك شي؟
باسل: لا لا اتطمن عيني كانت ع الطريق كل الوقت ومافيه اي حدا لحقني
عامر: كتير منيح تفضل
بيدخل باسل لجوا البيت ومجرد ما يخطي خطوة وحدة جواته بيحس بضربة قوية ع راسه وعلى أثرها بيفقد وعيه وبيوقع بالأرض وماعد بيحس على شي
بعد مدة قصيرة...
بيبدأ باسل يستعيد وعيه وبيفتح عيونه ببطء وهو حاسس بصداع براسه وبوجع بإيديه ورقبته... بيحرك رقبته يمين ويسار وبيجول بنظره بالمكان يلي متواجد فيه... بيلاقي حاله قاعد على كرسي وايديه مربوطين لورا ورجليه كمان مربوطين مع الكرسي وقاعد قدامه
عامر وشب تاني معه... بيحكي باسل بهمس: شو عم يصير هون؟
عامر بيلتفت ع باسل وبيقول: سلامة قلبك دكتور بس حبينا نستقبلك ع طريقتنا
باسل بياخد نفس عميق وبيزفره بهدوء وبيقول: ممكن تحكي بوضوح متل العالم والناس؟
الشب التاني بيقرب لقدام باسل وبيقول: اصبر شوي لحتى يوصل المعلم ووقتها بتفهم كل شي ومنه بتتعلم لا تحشر حالك بشغلات ما بتخصك
باسل بيفهم أنهن عم يحكوا عن أيهم وبيتذكر حكي علي وقت قله أنه قلبه مو مرتاح... بيكز ع أسنانه بقهر وبيقول: ومين بيكون معلمك؟
عامر: قلنالك اصبر ليوصل
باسل بيفهم أنهن مارح يحكوا شي لهيك بيسكت وماعد بيسأل شي وبيمر الوقت وهو قاعد عم يتطلع حواليه
بدون ما يقدر يعمل شي وبعد حوالي الساعة بيرن تلفون عامر وبيسمع باسل حديثه [اهلين معلم... لا ماحكي شي.... اي لعيونك ألف طلب متل هالطلب... سلام]
بيسكر عامر الخط وبيرسم ع وجهه ضحكة مستفزة وبيقرب من باسل وبيقول: المعلم بيسلم عليك كتير وطلب مني نتوصى فيك لبينما يكون وصل هو
عامر بيضرب باسل بوكس ع وجهه وباسل بيتطلع فيه وبيبتسم ببرود بدون ما يرد... بيقرب الشب التاني منهن وبيقول: اتركلي ياه الي عامر
عامر: اي تفضل سيد جواد
بيبدأ جواد بضرب باسل ع وجهه ضربات متتالية وبيصير الدم ينزل من تمه لباسل وأنفه بس بيحافظ على صمته وبعد مدة بيقول عامر: خلينا ندخن سيجارة وبعدها منكمل
بيبعد جواد عن باسل وبيقول: اي بيصير
بيرجعوا عامر وجواد لمكانهن وبيقعدوا قبال باسل وكل واحد بيشغل سيجارته وباسل عم يتطلع حواليه ويفكر كيف بدو يخلّص حاله من هالورطة
بيمر الوقت وبتغيب الشمس وباسل لساته ع حاله، عامر وجواد عم يتناوبوا على ضربه وهو عم يفقد طاقته وقوته تدريجياً
لما تعتم الدنيا تماماً بيسمع باسل صوت سيارة عم تقرب من البيت وبيتطلع من الشباك بيشوف أضوية السيارة وبعد مدة بيندق باب البيت دقة معينة وبيقوم عامر بيفتح وبيقول: اهلا وسهلا بالمعلم... تفضل تفضل
بيتطلع باسل بالشخص يلي ع الباب وبيبتسم بقهر وبيقول: الأستاذ أيهم هو المعلم
أيهم بيدخل لجوا البيت وهو عم يضحك ضحكته المستفزة وبيقرب من باسل وبيقول: انشالله عجبك استقبالنا؟
باسل بيكز ع أسنانه بقهر وبيقول: أنت من وين جايب كل هالحقد يلي بقلبك؟؟ لك اصحى ع حالك اصحى وحاج عايش بالوهم أبوك هو يلي غلط ودمر حياته بقراره الغلط وانتقامك كله ما اله معنى
أيهم بيصرخ بصوت عالي: اخرااااس ولا تسمعني صوتك... عمك وابن عمه هني السبب بكل شي صار معه... لك أنا من لما كان عمري ١٠ سنين وأنا ناطر لحتى احرق قلوبكن وبفضلك ما تعذبت كتير ورح اخد انتقامي من كل عيلتكن
بيبعد أيهم لورا خطوتين وبيقول: هاتوا كرسي لهون
بيجيب جواد كرسي بسرعة وبيحطها قدام كرسي باسل وبيقعد أيهم عليها وبيحط رجل ع رجل وبيشغل سيجارة وبيضحك وبيقول: ههههه عم تدور ورا موت جدك وعمك؟ لك قصة عمرها سنين ليش عم تفتحها؟ بسببها أنت هون على فكرة، يعني لو ما وصلني أخبار إنك عم تنكش بالماضي ماكنت قدرت جبتك بكل هالسهولة... لا وحضرتك من أول اتصال اجيت ع مكان متل هاد بدون ما تفكر بشي... شكلك متحمس كتير
لتعرف الحقيقة ماهيك؟
باسل بغضب: أنت السبب بالحادث يلي صار معهن ماهيك؟ أنت السبب يا واطي؟؟
أيهم بيضحك بصوت عالي وبيطالع سلا.حه من خصره وبيوجهه لباسل وبيقول: فضولك ورا هالسؤال يلي وقعك بين إيديي وأكيد مارح جاوبك بسهولة
بينزل أيهم السلا.ح وبيوجهه لرجل باسل وبيطلق طلقة جنب رجله وبتخدشه الرصاصة وباسل بيصرخ بوجع أما أيهم بيلتفت ع عامر وبيقول: تعال اقتله أنت.. حابب شوف المشهد من بعيد أنا
عامر: حاضر معلم
بيقرب عامر وبياخد السلا.ح من أيهم وبيوجهه لباسل أما أيهم بيرجع خطوتين لورا وهو مبتسم بخبث... عامر بيوجه السلا.ح باتجاه قلب باسل بس قبل ما يضغط ع الزناد بينفتح باب البيت بقوة وبيسمع حدا عم يقول (سلموا حالكن المكان محاصر) ومن صدمته وارتباكه بتنزاح ايده عن موضعها وبيضغط ع الزناد بدون وعي وبتستقر الرصاصة بمنتصف صدر باسل
ع صوت الرصاصة بيدخل علي بسرعة ع البيت وملامح القلق والخوف ظاهرة ع وجهه ولما يشوف باسل مرمي ع الأرض ومربوط بالكرسي وغرقان بالدم بيقول بصدمة: باسل!!!
بيطلع علي من صدمته بسرعة وبيقرب من باسل وبيقعد ع الأرض وهو عم يصرخ بصوت عالي: بااااسل رد عليي بااااسل
أيهم بيضحك بصوت عالي وبيقول: ودع ابن عمك يا حضرة الدكتور
علي ما بيكون سامع أيهم شو عم يحكي وبيقول بصوت عالي: جيبوا النقالة فوراً يلااااا
الشرطي: يلا يلا
بيطلع الشرطي من البيت وبينادي بمكبر الصوت لسيارة
الإسعاف يلي واقفة بعيد عن البيت ومباشرةً بتقرب السيارة من البيت وبينزلوا المسعفين ومعهن النقالة وبيدخلوا لجوا... بيكون علي فك ايدين ورجلين باسل من الحبل ومدده ع الأرض وفوراً بيقوم وبيساعد الممرضين لحتى يحطوه ع النقالة وبعدها بيطلعوا بسيارة الإسعاف وهو معهن وبيتوجهوا للمستشفى أما رجال الشرطة بياخدوا أيهم وعامر وجواد وبيتوجهوا لقسم الشرطة ومعهن حمزة وأخوه الضابط
بالطريق وبسيارة الإسعاف....
بيكون علي عم يعمل كل الإسعافات يلي ممكن يعملها لباسل والقلق والخوف مسيطرين عليه... بيتطلع بالممرض يلي معه بالسيارة وبيقول: خبرتوا المستشفى؟
الممرض: خبرناهن أنه فيه حالة إسعافية بس ما ذكرنا أنه المريض بيكون الدكتور باسل
علي: اي أحسن
بيرجع علي بيتطلع بباسل وبيقول بهمس: يارب لا
تحرق قلوبنا عليه... يارب لا تتركني من دونه (بتنزل دموع علي وبيكمل بهمس) اللهم إني استودعتك اخي وقلبه وصحته لا تريني فيه مكروه
بيمسح علي دموعه وبيقول: الجرح يلي برجله خارجي ماهيك؟
الممرض: اي دكتور خارجي والحمدلله النزيف وقفناه وخبرنا المستشفى ورح يجهزوا غرفة العمليات ويخبروا الدكتور بسام وانشالله وضعه رح يكون منيح
علي: انشالله انشالله
بعد مدة بيوصلوا ع المستشفى وبيكون الدكتور والممرضين منتظرين قدام المستشفى وأول ما ينفتح باب سيارة الإسعاف ويشوفوا باسل جواتها بهالحالة الكل بيشهق بقلق وخوف والدكتور بسام مباشرةً بيقرب وبيقول: شو صاير معه؟
علي: طلق ناري بمنتصف الصدر... الرصاصة جوا والنزيف مستمر... قيمه عم تنخفض ولازمه عملية
بسرعة لحتى نطالع الرصاصة
بسام: بسرعة ع غرفة العمليات يلااا
بيقربوا الممرضين وبيساعدوا بتنزيل السرير من سيارة الإسعاف وعلي بينزل مع باسل وبيجروا السرير بسرعة وبيدخلوا ع المستشفى وبيتوجهوا لقسم العمليات كرمال يحضّروا باسل للعملية أما علي بيدخل للغرفة المخصصة للتعقيم واللباس الخاص بالعمليات لحتى يحضّر حاله وبيدخل وراه الدكتور بسام وبيقول: دكتور علي أنت مارح تدخل للعملية
علي بصدمة: كيف يعني مارح ادخل؟!!
د.بسام: أنت من أقارب المريض ومافيي اسمحلك تدخل.. هيك القانون وأنت بتعرف
علي بجدية: بدي ادخل
د.بسام: بس أنت بحالتك هي مارح تركز بشغلك
علي: أنا مارح أتدخل بالعملية لأنه أساسأ مانها من اختصاصي بس بدي كون موجود جوا.. أنا مستحيل اترك باسل لحاله
د.بسام بيتنهد وبيقول: خلص متل ما بدك... بس ما لازم تخبر عمك بيلي صار؟
علي بيتطلع بالدكتور بسام وبيسكت وبيقعد ع أقرب كرسي وبينزل راسه للأرض... هو كان نسيان أهله وأهل باسل تماماً وهلق الدكتور بسام عم يذكره أنه لازم يخبرهن... شو بدو يقول لعمه؟ شو بدو يقول لخالته وبناتها؟ هو بيعرف أنه باسل بالنسبة الهن أغلى من حياتهن.. كيف بدو يخبر الكل؟
بيقرب الدكتور بسام لعند علي وبيقول: أنا برأيي روح خبر عيلتك وكون معهن أحسن من وجودك بالعملية
بيترك الدكتور بسام علي ع حاله وبيروح بيحضّر حاله بسرعة وبيلبس اللباس المعقم الخاص بالعمليات وبيعقم ايديه وبيلبس الكفوف وبيحط كمامته وبيدخل ع غرفة العمليات أما علي بيقوم بضعف وبيطلع من الغرفة
وبيوقف عند بابها المقابل لباب غرفة العمليات وبيحس حاله متل ولد صغير ضيّع أمه بالطريق... بيتطلع بغرفة العمليات وبيصير يتردد براسه صوت باسل (بتعرف علي أنا كل ما دخلت غرفة العمليات بحسها باردة كتير.. بحس لو إني مكان المريض رح اتمنى حدا يكون جنبي ومعي)
بياخد علي نفس عميق وبيطالع تلفونه بيلاقي عشر اتصالات من أهله... بيتنهد بحزن وبيتصل بأبوه وبعد كم رنة بيرد عصام والقلق باين ع صوته: وينك لك ابني لهلق؟ عم اتصل فيك ماعم ترد وباسل كمان ماعم يرد وعمك قلي أنكن مو بالمستشفى... وينكن انتو وينكن؟
علي بيحكي والغصة واضحة بصوته: بابا أنا وباسل بالمستشفى بس.. بس..
عصام بخوف: بس شو؟ شو فيه علي ليش هيك صوتك؟
علي بيحكي بصوت مخنوق: باسل انصاب بطلق ناري
عصام بصدمة: شوووو؟؟!!! كيف يعني طلق ناري؟ كيف
وضعه هلق؟
علي: هو بالعمليات... أيهم أطلق عليه النار... خبر عمي وتعالوا ع المستشفى.. أنا داخل ع غرفة العمليات لعنده
بيسكر علي الخط قبل ما يسمع أسئلة تانية من أبوه وبيرجع لغرفة الملابس بيحضّر حاله بسرعة وبيلبس كمامته والكفوف وبيدخل لغرفة العمليات
🌺 🌺 🌺
ببيت عصام...
بيسكر عصام الخط مع علي وبتسأل فاديا بقلق: شو صاير عصام؟ قلبي رح يوقف من الخوف بترجاك احكي وريح قلبي
عصام بيقول ولساته تحت تأثير الصدمة: باسل انصاب وهو بالعمليات
أسيل لما تسمع هالجملة بتقعد ع الكنبة بضعف وهيي
حاطة إيدها ع صدرها وبتحس قلبها انقبض بقوة والغصة علقت بحلقها وبينزلوا دموعها بصمت أما فاديا بتشهق بخوف وبتقول وهيي عم تبكي: ولي على قلبي وكيف وضعه؟
عصام: ما بعرف... قوموا البسوا بسرعة لازم نروح لبيت أخي غسان نخبرهن وناخدهن ع المستشفى.. أنا رح اتصل بحسن وبحسين
فاديا بتقول وهيي لساتها عم تبكي: يارب دخيلك تشفيه وتعافيه وتردلنا ياه سالم يارب... يارب تعطيه القوة والصحة يا قادر يا كريم يا رحمن يا رحيم
بيطلعوا أسيل وفاديا بسرعة ع غرفهن وعصام بيتصل بحسين وبيخبره بالموضوع وبيتفقوا يلتقوا ببيت غسان ولما يسكر الخط معه بيشوف آدم داخل ع الصالة والقلق والحيرة واضحين عليه وبيقول: بابا شو صاير؟ شفت ماما وأسيل عم يبكوا وما فهمت عليهن ولا كلمة
عصام بحزن: باسل ابن عمك انصاب بطلق نار
آدم بيهمس بصدمة: كيف هيك صار؟ وكيف وضعه؟
عصام: بالعمليات حالياً... رح احكي مع أخوك حسن لحتى خبره وأنت احكي مع خضر خليه يلاقينا لبيت عمك غسان
آدم: يلا فوراً
بيطلع آدم من الصالة بسرعة ليتصل بخضر أما عصام بيتصل بحسن وبعد كم رنة بيرد حسن: اهلين بابا
عصام: أنت بالبيت؟
حسن: اي بالبيت.. خير شو فيه؟
عصام: اذا سارة جنبك ابعد عنها شوي
حسن بيقول والحيرة واضحة بصوته: لا مو جنبي بس خبرني شو فيه؟
عصام بيتنهد وبيقول: باسل انصاب وهو بالعمليات
حسن بيهمس بصدمة: كيف يعني انصاب؟ ايمت صار هالحكي؟
عصام: ما بعرف... نحنا رايحين لبيت عمك نخبرهن وبعدها رح نروح ع المستشفى... اذا بدك لاقيلنا أنت وسارة لبيت عمك ونحنا منخبرها
حسن: ماشي بابا ماشي
بيسكر عصام الخط وبيقوم بيطلع من الصالة وبيوقف عند الدرج وبيقول: يلا يا فاديا استعجلوا شوي
فاديا بتقول وهيي نازلة ع الدرج: يلا يلا اجينا
بتنزل أسيل ورا فاديا وبيطلعوا كلهن من البيت وبيكون آدم مشغل السيارة وناطرهن... بيركبوا بالسيارة وبيتوجهوا لبيت غسان... بيوصلوا هني وبيت حسين بنفس الوقت وبيوقفوا قدام الباب والحزن مسيطر ع الكل... بتقرب لانا من خالها عصام وهيي عم تبكي وبتقول: خالو كرمال الله طمني عن أخي... قلي أنه هو
منيح الله يخليك
عصام بحزن: طولي بالك يا بنتي بإذن الله رح يكون بخير بس انتي ادعيله
لانا وهيي عم تبكي بتقول: يارب تحميه وتشفيه يارب
حسين بيتطلع بعمار: عمار خلي لانا تقعد بالسيارة وخليك معها
عمار: حاضر بابا
عصام بيتطلع بسلمى وبيقول: أختي أنتِ وفاديا وأسيل وحنين خبروا رانيا وسالي وأنا وحسين منخبر غسان
سلمى بحزن: ماشي أخي
بتقرب سلمى وبتدق الباب وبعد مدة بيفتح غسان الباب ولما يشوف وجوههن بيقول بقلق: شو صاير؟ ليش هيك وجوهكن؟
عصام: مافيه شي أخي... خليهن يدخلوا وتعال شوي
بتدخل فاديا مع سلمى وأسيل وحنين لجوا البيت وعصام وحسين بيقربوا لعند غسان وبيوقفوا ع باب البيت وبيقول عصام: أخي فيه شي لازم تعرفه بس بدي ياك تبقى قوي متل ما بعرفك
غسان بخوف: باسل صرله شي؟
حسين بيتنهد وبيقول: باسل انصاب بطلق ناري وهو هلق بالعملية بس انشالله رح يكون منيح
غسان لما يسمع الخبر بيحس حاله رح يفقد توازنه وبيسند حاله ع طرف الباب وبيقول بضعف: الإصابة خطيرة؟
عصام بحزن: ما منعرف شي.. لازم نرو...
قبل ما يكمل الكلمة بيسمعوا صوت فاديا عم تصرخ بصوت عالي: رانيا رانيا شو صرلك رانياااا
بيركض غسان لجوا البيت وبيدخل ع الصالة بيلاقي رانيا واقعة بالأرض.. بيقرب منها بقلق وبيقول: اعطوني كولونيا بسرعة
بتركض حنين بتجيب كولونيا وبتعطيها لغسان وهو بيرش ع ايده وبيقربها من أنف رانيا وبيقول: رانيا ردي عليي رانيا
بتبدأ رانيا تفتح عيونها ببطء وبتقول بتعب ودموعها ع خدودها: خدوني لعند باسل الله يخليكن
غسان بحزن: رح اخدك بس أنتِ وكلي الله وقوي حالك.. باسل بإذن الله رح يكون بخير
بيقوم غسان وبيساعد رانيا لتوقف وبيقول: مرت أخي ساعديها أنتِ وأختي لتلبس تيابها
فاديا: اي يلا
بيطلعوا فاديا وسلمى مع رانيا لغرفتها وسالي بتكون قاعدة عم تبكي بصمت ولساتها مو مستوعبة يلي عم
يقولوه... بيقرب غسان منها وبيقول: سالي بنتي قومي البسي خلينا نروح لعند أخوكِ
سالي بتطلع بأبوها وهيي عم تبكي وبتقول: باسل بخير ماهيك بابا؟ هو بخير أكيد.. أنا بعرفه هو قوي كتير.. هو سندنا والكتف الثابت بعيلتنا.. مارح يصرله شي ماهيك بابا؟ (بتطلع بأسيل وبتقول) رح يكون بخير ماهيك أسيل؟
غسان بيدمعوا عيونه وبيقول: بإذن الله رح يكون بخير بس انتو ادعوله... يلا قومي بنتي الله يرضى عليكِ جهزي حالك بسرعة.. أسيل بنتي خليكِ مع سالي انتي وحنين الله يرضى عليكن
أسيل بتقول بغصة: حاضر عمو
بتقوم سالي مع أسيل وحنين وبتطلع ع غرفتها وغسان بيرجع لعند عصام وحسين وبهالوقت بيوصلوا سارة وحسن وخضر وراهن... بتنزل سارة من السيارة وهيي مستغربة وجود الكل قدام بيت أهلها وبتحس أنه صاير شي مو طبيعي وبتقرب لعند أبوها بسرعة وبتقول
بقلق: شو صاير بابا؟
غسان بيحاوط كتاف سارة وبيقول: بنتي اهدي ولا تتوتري مو صاير شي
سارة بقلق: كيف مو صاير شي وانتو بهالحالة والكل واقف هون وكأنه ناطرين شي؟ (بتطلع حواليها وبتقول) وينه باسل؟
عصام: باسل بالمستشفى هو وعلي
سارة: وانتو شبكن؟ فهموني منشان الله شو صاير؟
غسان بيحكي بهدوء: أخوكِ صار معه حادثة بسيطة وبدنا نروح لعنده
سارة بتطلع بأبوها وهيي مو مستوعبة شو قال وبتقول بحيرة: ما فهمت.. حادثة شو؟
الكل:.....
سارة بانفعال: لك ليش ماحدا عم يجاوبني؟ فهموني شو صاير مع أخي
عصام بيهمس بحزن: باسل انصاب بطلق ناري وهلق هو بالعملية
سارة بتطلع بعمها وبينزلوا دموعها وبتصرخ بصوت عالي ممزوج بغصة: لاااا لااااا مو صحيح.. باسل ما صرله شي.. باسل بخير أنا متأكدة.. انتو غلطانين
حسن بيقرب فوراً من سارة وبيضمها لصدره وبيمسح ع ضهرها بحنية وبيقول: اهدي سارة اهدي وادعيله.. لازم تقوي حالك هو محتاجنا جنبه هلق
سارة بتحكي وهيي عم تبكي وحكيها مو مفهوم كتير بسبب البكي: هاد باسل يا حسن باسل يلي بشوف الدنيا من عيونه... هاد أخي نور عيوني يا حسن... يااارب دخيلك تساعده وتحميه وتقويه يارب لا تضرنا فيه يارب
الكل بيهمس بحزن: آميييين
بعد مدة قصيرة الكل بيركب بالسيارات وبيروحوا ع المستشفى... بيوصلوا وبيدخلوا بسرعة لجوا وبيتوجهوا لغرفة العمليات... بيكون حمزة قاعد ع مقاعد الانتظار بالممر عند باب غرفة العمليات... بيقربوا لعنده وبيقول عصام باستغراب: حمزة أنت شو عم تعمل هون؟
حمزة بأسف: أنا كنت موجود لما صارت الحادثة
غسان بقلق: كيف وضع باسل؟ وين مكان الإصابة؟
حمزة بيجاوب بتردد: ب.بصدره
رانيا بتقول وهيي عم تبكي: يارب دخيلك تحميلي ياه.. يارب تردلي ياه سالم معافى يا الله
غسان: أنا بدي ادخل لعنده.. مافيي ابقى هون
حسين: وكل الله غسان... شو بدك تدخل تعمل جوا وأنت بهالحالة؟ خليك مع مرتك وبناتك هون وادعوله
عصام: حسين معه حق أخي... إذا دخلت رح يتلبكوا
فيك الأطباء بعدين علي معه جوا وبإذن الله مارح يصير إلا الخير
غسان بيهمس بضعف: يارب
بعد حوالي الساعة....
بيطلع علي من غرفة العمليات وبيقعد ع الأرض عند بابها وبيحط ايديه ع وجهه وبيصير يبكي وهو عم يهمس بدموع ممزوجة بفرح: ألف حمد وشكر الك يالله.. ألف حمد وشكر الك يالله
بيطلع الدكتور بسام من غرفة العمليات وبيشوف علي قاعد ع الأرض.. بيقرب منه وبيحط ايده ع كتفه وبيقول: الحمدلله ع سلامته... أهلك وأهله كلهن برا ناطرين عند باب قسم العمليات وقلوبهن نار عليه.. اطلع بشرهن أنت بهالخبر الحلو
علي بيمسح دموعه وبيقوم بيوقف وبيتوجه للمغاسل، بيغسل ايديه ووجهه وبعدها بيطلع من
قسم العمليات وأول ما ينفتح باب القسم بيشوف الكل ناطر بالممر
والحزن مخيم عليهن والكل عم يهمس ويدعي.. بتقرب رانيا من علي بلهفة وبتقول: طمني علي كيفه باسل؟
علي بيبتسم وبيقول: ألف الحمدلله العملية نجحت وطالعنا الرصاصة
رانيا بتضم علي بقوة وبتقول وهيي عم تبكي: ألف ألف الحمدلله
بتبدأ المعانقات والتهاني والكل عم يهمس بالحمد والشكر... وبعد هالموجة من الفرح بتقول رانيا بلهفة ممزوجة بدموع: ايمت منقدر نشوفه علي؟
علي: رح يطالعوه هلق ع العناية المركزة كرمال نخليه تحت المراقبة أول ٤٨ ساعة... بتقدري تدخلي لعنده خمس أو عشر دقايق
غسان بيقرب لعند علي وبيقول: علي لا تخبي عني شي.. صار مع باسل اي مضاعفات؟
علي: صدقني يا عمي وضعه منيح كتير بس أنت
بتعرف هيك عمليات حساسة بتحتاج مراقبة بعدها
غسان: معك حق.. أنا من خوفي عليه ماعد عم فكر بشي
عصام: اي علي ما بدك تخبرنا شو يلي صار معكن؟
علي بيتطلع بأبوه وبيقول بتعب: ممكن نأجل الحديث لبعدين بابا؟ أنا كتير تعبان وبدي روح اتحمم وغيّر تيابي كرمال ارجع لعند باسل
عصام بيهز راسه بتفهم وبيقول: متل ما بدك (بيتطلع بآدم وبيقول) آدم وصّل أخوك ع البيت
آدم: اي على عيني
أسيل بتقرب لعند علي وبتقول: أخي أنت بخير ماهيك؟
علي بيبوس أسيل من راسها وبيقول: الحمدلله بخير أختي بخير.. يلا بالإذن
بيروح علي مع آدم ع البيت وبيضلوا الباقي بالمستشفى وبعد مدة بيطالعوا باسل من غرفة العمليات وبيسمحوا لرانيا تدخل خمس دقايق لعنده وبعدها يبروح كل واحد ع بيته وبيبقى غسان عند باسل وبيرجع علي لعنده كمان وبيبقى معه
🍁🍁 🍁🍁 🍁🍁
بعد مرور يومين....
بيطالعوا باسل من العناية المركزة لغرفة خاصة وبيكون الكل موجود عنده باستثناء علي وشهد يلي كانت مهمتها تبقى بالبيت وتهتم بملك.. بيكون الكل فرحان وعم يهنوا غسان ورانيا والبنات بسلامة باسل وهو متمدد بسريره وماعم يحكي كرمال لا يتعب بس لما يتطلع بالكل ولا يشوف علي بيناتهن بيهمس بتعب: وين علي؟
الكل بيتطلعوا ببعض وبيسكتوا وعصام بيبتسم وبيقول بهدوء: عنده شغل.. رح يجي بعد شوي
باسل بيبتسم بتعب وبيقول: زعلان مني ماهيك؟
غسان: صحيح هو زعلان بس رغم هيك بقي جنبك كل الوقت ليل ونهار وما تركك لحد اللحظة يلي طلعت فيها من العناية
وهني عم يحكوا بيندق الباب وبتدخل الممرضة ومعها جهاز قياس الضغط وبتقول بابتسامة: صباح الخير
الكل: صباح النور
بتقرب الممرضة لعند سرير باسل بتقرب الممرضة لعند سرير باسل وبتقول: الحمدلله ع سلامتك دكتور
باسل بيهمس بتعب: الله يسلمك
الممرضة بتطلع بغسان وبتقول: الله يهنيكن بسلامته دكتور غسان
غسان: الله يسلمك يا بنتي
الممرضة بتقرب لعند باسل وبتقول: بعتني الدكتور علي لحتى قيس ضغطك
باسل بيبتسم وبيقول بتعب: بعد إذنك روحي لعند علي وقليله باسل ما سمحلي قيس ضغطه ومارح يرضى حدا يقيس ضغطه ويشرف ع حالته إلا أنت
بتبتسم الممرضة وبتقول: حاضر دكتور
بتطلع الممرضة من الغرفة وبعد مدة بينفتح باب الغرفة وبيدخل علي وبيقول: صباح الخير
الكل: صباح النور
بيقرب علي لعند باسل وبيقول ببرود: الحمدلله ع سلامتك
باسل بيبتسم وبيقول: الله يسلمك
علي بيبدأ بقياس ضغط باسل بدون ما يتطلع فيه ولما يخلّص بيوقف وبيتطلع بغسان وبيقول: الحمدلله ضغطه منيح وتحاليله كلها منيحة... بعد الضهر بخلي حدا يمر يبدله ع جرحه
غسان بيبتسم وبيقول: الله يعطيك العافية
علي: الله يعافيك عمي.. أنا لازم ارجع ع شغلي
باسل بيقول بتعب: علي خلينا نحكي شوي
علي بيقول بدون ما يتطلع بباسل: مو وقتها هلق
باسل بيصرخ بألم لما يحاول يقوم من محله وعلي بيلتفت عليه بلهفة وبيقول: شبك شو صرلك؟
باسل بيحط ايده ع جرحه وبيقول بألم: مافيه شي بس حاولت قوم بسرعة
رانيا بقلق: صرلك شي ابني؟
باسل بيكتم ألمه وبيقول: لا أمي مافيه شي
علي بيقرب لعند باسل وبيقول بغضب: أنت من ايمت صاير هيك متهور وما بتحسب كل تصرفاتك خطوة بخطوة؟ فهمني شو عم يصير معك؟؟؟
فاديا: روق علي مو وقته هالحكي
علي بيحكي بغضب مكبوت: مو حضرته عم يطلب نحكي؟ أنا ماعندي غير هالحكي... بسبب تهوره كان رح يخسر حياته وكنت رح أخسر أغلى إنسان على قلبي بكل هالدني (بتتحول نبرة صوته للحزن والقهر وبيكمل بصوت عالي) انتو ما كنتو بمكاني وماحدا فيكن عاش اللحظة يلي أنا عشتها لما شفته ع الأرض غرقان بدمه... للحظات عقلي وقف عن التفكير وأنا عم اتخيل إني رح أخسر شريك أيامي وطفولتي وسنين عمري قدام عيوني بدون ما اقدر اعمل شي (بيرجع بيتطلع بباسل وبيقول بغضب) لو إني ما قدرت أسعفك شو كان صار؟ أنت متخيل شو كان رح يصير فيي لو صرلك شي وما قدرت ساعدك؟
باسل: بس أنت إنسان مؤمن وبتعرف أنه ماحدا بيموت ناقصه عمر ويلي كاتبه رب العالمين بدو يصير
علي بغضب: بس رب العالمين ما بيقول ارمي حالك من عاشر طابق وقول يلي كاتبه الله بدو يصير... أنت غامرت بحياتك ورحت لحالك لمكان مجهول بدون ما تخبرني لروح معك وطنشت حكيي وتحذيري الك من خطورة هالموضوع ورغم إني قلتلك انتظرني لأجي لعندك بس حضرتك اخترت تروح لحالك.. والنتيجة؟
باسل:.......
عصام: بتوقع صار الوقت لحتى نفهم منكن يلي صاير لأنه مر يومين ع الحادثة ولهلق ما منعرف شي
علي بياخد نفس وبيقول بهدوء: المحامي حمزة ع الطريق ولما يوصل بيخبركن كل شي صار من الأول.. أنا عندي مواعيد ومافيي اتأخر اكتر.. بالإذن
بيطلع علي من الغرفة وبيروح ع شغله وبالفعل بعد خمس دقايق بيندق باب الغرفة وبيدخل حمزة وهو عم يقول: صباح الخير
الكل: صباح النور
بيتوجه حمزة لغسان وبيعطيه بوكيه الورد يلي حامله بإيده وبيقول: الحمدلله ع سلامته دكتور
غسان بياخد البوكيه وبيقول: الله يسلمك ويحميك لأهلك ولشبابك يا ابني.. تفضل اقعد
بيقعد حمزة ع كرسي جنب سرير باسل وبيتطلع بباسل وبيقول: كيف صرت دكتور باسل؟
باسل بتعب: الحمدلله بخير... بس لهلق ما فهمت كيف وصلتوا لعندي بالوقت المناسب؟
حمزة بيقول بنبرة أسف: قبل ما احكي شو صار بدي اعتذر منك ومن الكل... بسببي صار يلي صار وبسبب قلة انتباه الشباب
عصام: يلي صار قضاء الله وقدره بس نحنا حابين نعرف كل شي من الأول
حمزة: ونعم بالله (بيتطلع بباسل وبيقول) احكي كل شي قدام الكل مافيه مشكلة؟
باسل بيهز راسه بمعنى اي وحمزة بيبدأ حديثه: القصة يا أستاذ عصام بدأت من حوالي العشر أيام بيوم الخميس الماضي لما رحتوا تزوروا سعيد أبوه لأيهم وكان باسل معكن.. بعد ما رجعتوا اتصل فيي الدكتور علي وطلب يشوفني المسا وبالفعل رحت وشفته هو والدكتور باسل يلي خبرني بوقتها عن شكوكه حول علاقة أيهم بحادث السير يلي تعرضله المرحوم حسان والمرحوم محمد من حوالي الأربع سنوات
الكل بيتطلعوا ببعض وهني مصدومين من هالفكرة وبيقول عصام باستغراب وهو عم يتطلع بباسل: وشو الشي يلي خلاك تشك بالموضوع؟ وليش ما خبرتنا كلنا بهالشي؟
باسل بيهمس بتعب: لأنه مجرد شك ولأنه مر ع القصة ٤ سنين ما حبيت افتحها من جديد بدون ما يكون فيه أمل تنكشف الحقيقة لهيك ما خبرت إلا علي (باسل بيسكت شوي وبيرجع بيكمل) يلي خلاني شك هو طريقة حكي سعيد وأيهم عن وفاة عمي وجدي الله يرحمهن وكيف كانوا عم يضحكوا بطريقة مستفزة ونظرات عيونهن يلي كان فيه لمعة انتصار
عمار: وبعدين شو يلي صار؟
حمزة: بعدين أنا رحت لعندكن ع الضيعة لحتى شوف ملف القضية من جديد وشوف شو بقدر اعمل بعد كل هالوقت وبقيت أسبوع عم اسأل هون وهون لأوصل لطرف خيط وبنفس الوقت كنت على تواصل مع الشباب يلي عيّنتهن لحتى يراقبوا سعيد وأيهم وفاتح
حسين بيقاطع حمزة وبيقول: عفواً ع المقاطعة بس مين فاتح؟
خضر: رفيق أيهم يلي كان محامي فرع الشركة بالضيعة
حمزة: بالضبط وبسبب علاقته بأيهم وسعيد طلب مني الدكتور علي حطه كمان تحت المراقبة وكان اي شي جديد بيصير يخبروني فيه الشباب وأنا خبّر الدكتور علي أو الدكتور باسل... ويوم الخميس أنا اجيت من الضيعة لهون مباشرةً وخبرتهن أنه فاتح عم يشتغل بتهر.يب الممنوعات
خضر بتتوسع عيونه بصدمة وبيهمس: تهر.يب!!!!!
حمزة بيهز راسه وبيقول: الشب يلي كان عم يراقبه شهد على تسليم أس.لحة بعد نص الليل
فاديا بتقول بخوف: شو هالناس يلي علقنا معهن ياربي دخيلك!!
حمزة: انا كتير بعتذر ع هالحديث بس هاد يلي صار وهي المعلومات كلها أكيدة وموثقة كمان
حازم: طالما موثقة ما بتفيدنا إذا قدمنا بلاغ عليهن؟
حمزة بيقول بأسف: مع الأسف الصور بعيدة والأشخاص مو واضحين تماماً بسبب بعد المسافة والعتمة
حسن: وأيهم كان معه بوقتها؟
حمزة: لا كان لحاله.. لنرجع للشي يلي صار يوم الخميس.. مع المعلومات يلي وصلتني عن شغل فاتح خبروني الشباب يلي عم يراقبوه هو وأيهم أنهن راحوا الصبح بكير لبيت بأطراف المدينة وبعد ما سألت عن هالبيت عرفت أنه لرجل الأعمال جميل الصباغ ويلي الكل بيعرف أنه بالسر بيشتغل بكل شي ممنوع وهاد الشي خلانا نتوقع أنه أيهم كمان بيشتغل مع فاتح..(بيسكت شوي لياخد نفس وبعدها بيكمل) بعد ما خبرت الدكتور علي والدكتور باسل بكل هالمعلومات تركتهن ورحت ع شغلي وطبعاً اتفقنا خبرهن لما يرجعوا أيهم وفاتح ع بيوتهن ومن بعدها الحديث عند الدكتور باسل
باسل بيبدأ يحكي بهدوء: بعد الضهر لما كنت عم افحص مريض اتصل فيي رقم غريب وقلي أنه عنده معلومات متعلقة بالحادث وطلب إني احميه ولا خبّر حدا لأنه ماحدا بيعرف أنه هو بالبلد والخوف كان واضح بصوته لدرجة ما شكيت أنه كذاب أبداً
بيسكت باسل شوي ليرتاح وياخد نفس وبعدها بيكمل كلامه: بعتلي موقعه وأنا مباشرةً ركبت سيارتي ورحت وبالطريق اتصل فيي وعلي وجن جنونه لما خبرته بيلي صار وبالفعل طلب مني أنتظره لأنه ما كان مرتاح لهالقصة بس أنا ما رديت عليه وبعتله الموقع وطلبت منه لا يلحقني إلا إذا تأخرت
بيرجع باسل بيسكت شوي لياخد نفس وبعدين بيكمل كلامه بتعب: لما وصلت استقبلني عامر الشب يلي اتصل فيي عند باب البيت بس مع أول خطوة بخطيها جوا البيت أكلت ضربة ع راسي ووقعت بالأرض وبعد مدة صحيت لقيت حالي مربوط بالكرسي وقدامي عامر وشب تاني صاروا يتناوبوا ع ضربي لحتى اجا أيهم بعد ما عتمت الدنيا (بيسكت شوي وبيكمل) أيهم كان مستفز جداً بكلامه وصار يقول لو ما نكشت بالماضي ما كان صار فيك هيك وبعدها طالع سلا.حه وأطلق عليي جنب رجلي وخدشتني الرصاصة ورجع عطا السلا.ح لعامر وطلب منه يطلق عليي وبالفعل عامر وجه سلا.حه ع قلبي بس قبل ما يضغط ع الزناد انفتح الباب ودخلوا رجال الشرطة وهو باللاوعي أطلق عليي بس طبعاً بسبب لبكته تحركت ايده عن موضعها وصابني بصدري
حسن بحيرة: كيف وصلوا لعندك بالوقت المناسب؟
باسل: هاد الشي أنا كمان ما بعرفه.. الأستاذ حمزة هو يلي بدو يخبرنا فيه
حمزة بيرجع بيستلم الحديث من جديد وبيقول: أنا كنت قاعد بالمكتب وحوالي الساعة ٧ إلا ربع بعد الضهر بيرن تلفوني وبيكون طاهر الشب يلي عم يراقب بيت سعيد هو المتصل
❄FLASH BACK❄
بيرن تلفون حمزة وبيتطلع بالاسم بيكون طاهر هو المتصل... بيفتح الخط وبيقول: اهلين طاهر
طاهر: كيفك أستاذ
حمزة: الحمدلله... فيه أخبار جديدة؟
طاهر: أيهم وفاتح دخلوا لعند سعيد من شي ربع ساعة بس ما شفت سامر ومراد وراهن مع أنه نحنا متفقين إذا اجتمعوا التلاتة بمكان واحد نجتمع نحنا كمان لهيك اتصلت فيهن وقالولي ما شافوا أيهم وفاتح طلعوا من البيت يلي دخلوه الصبح ولساتهن بمكانهن
حمزة بقهر: معناها فيه مخرج تاني للبيت وهني ما انتبهوا عليه... بكل الأحوال أنت خليك مكانك وأنا رح اتصل فيهن كرمال يجوا لعندك
طاهر: وإذا فاتح وأيهم طلعوا من هون قبل ما يوصل مراد وسامر؟
حمزة بعد تفكير بسيط بيقول: بتلاحق أيهم.. يلي بيهمنا بالدرجة الأولى هو أيهم
طاهر: حاضر أستاذ
بيسكر حمزة الخط وبيتصل بمراد وبيطلب منه يروح لبيت سعيد بأقصى سرعة هو وسامر وبعدها بيتصل بباسل لحتى يخبره بيلي صار بس بيكون تلفونه خارج التغطية لهيك بيتصل بعلي وبعد كم رنة بيسمع صوت علي عم يقول: اهلين أستاذ
حمزة: اهلين فيك... عم اتصل بالدكتور باسل بس خطه خارج التغطية
علي: اي عنده مشوار ضروري راح عليه.. صاير شي جديد؟
حمزة: أيهم وفاتح طلعوا من بيت جميل من مخرج تاني وحالياً هني ببيت سعيد
علي بصدمة: متأكد من هالحكي؟؟!
حمزة باستغراب: اي طبعاً متأكد
علي: معناها يمكن يكون باسل راح للفخ برجليه
حمزة باستغراب: فخ شو؟ عن شو عم تحكي؟
علي بيحكي لحمزة يلي صار وحمزة بيقول: أنا طلبت من طاهر يراقب أيهم في حال طلع من البيت ورح أرجع ابعت حدا تاني لعنده كرمال يراقب فاتح كمان وأنت ابعتلي موقع باسل وانشالله ما بيصير الا الخير
علي بقلق: انشالله خير يارب
بيسكر حمزة الخط مع علي وبعد دقيقة بيوصله الموقع وبيفتحه ليشوف المكان وبعدها بيرن تلفونه وبيفتح الخط فوراً وبيقول: اي طاهر صار شي؟
طاهر: أيهم طلع من البيت وأنا وراه حالياً
حمزة: بأي اتجاه رايحين؟
طاهر: باتجاه الجبال بالجنوب
حمزة بقهر: معناها فعلاً باسل بخطر... خلي عيونك عشرة عشرة الموضوع خطير ولازم تلحقه بدون ما ينتبه عليك
طاهر: لا تقلق أستاذ
بيسكر حمزة الخط وبيتصل مباشرةً بأخوه الضابط ولما يرد بيقول بدون مقدمات: كريم انا بحاجة مساعدتك
كريم باستغراب: خير شو القصة؟
حمزة: الدكتور باسل يمكن يكون بخطر
كريم: كيف يعني يمكن؟
حمزة: ماهيي هون الفكرة... مافيي قدم بلاغ رسمي لأنه يمكن ما يكون فيه شي بس أنا شاكك أنه رح يصير شي
كريم: خلص ابعتلي الموقع وأنا رح اخد عناصري المقربين مني واطلع ع مسؤوليتي
حمزة: ماشي وأنا رح اجي معك كمان
كريم: ماشي.. سلام
بيسكر حمزة الخط وبيبعت الموقع لأخوه وبيتصل بعلي وبيخبره وعلي مباشرةً بيقول: انا كمان بدي روح معكن ورح اخد سيارة إسعاف من المستشفى تحسباً لأي شي
حمزة: اي بيكون أحسن بس بدي اسألك اي ساعة طلع باسل من المستشفى بالضبط؟
علي: يمكن حوالي الخمسة
حمزة: يعني صرله ساعتين واذا بدو حوالي الساعة ع الطريق معناها وصل من ساعة ع الموقع (بيتنهد وبيقول بأسف) بتوقع الحديث ما بياخد وقت لهالدرجة
علي بقلق: انشالله ما يكون صرله شي
حمزة: انشالله.. خلينا نلتقي عند مركز الشرطة
علي: تمام.. أنا رح اطلع هلق من المستشفى
حمزة: ماشي.. سلام
❄BACK❄
بيكمل حمزة سرد يلي صار ع مسامع الكل وبيقول بهدوء: وصلنا ع الموقع حوالي الساعة ٨ وشوي ونزلنا من السيارات بمكان بعيد عن البيت ومشينا باتجاهه كرمال لا نلفت انتباه بصوت وأضوية السيارات بس قبل ما نوصل للبيت سمعنا صوت رصاصة ووقتها ركضنا كلنا ودخلوا رجال الشرطة وبنفس اللحظة رجع طلع صوت رصاصة تانية وهون دخل علي واجت سيارة الإسعاف والباقي بتعرفوه
رانيا بتقول وهيي عم تبكي: الحمدلله خلصت القصة ورجع باسل بخير الحمدلله
غسان بيقول بعتب: بس يا باسل الحكي يلي قاله علي ابن عمك كله صحيح ومعه حق فيه مية بالمية
باسل: أنا من لهفتي لأعرف الحقيقة ماعد فكرت بالعقل والمنطق وبكل الأحوال يلي صار صار وماعد فينا نغير شي
عصام: الحمدلله ع كل حال والحمدلله إنك هلق معنا وبيناتنا بس بتمنى لاعد تخبوا عننا هيك مواضيع حساسة وخطيرة خاصة أنه الناس يلي عم نحكي عنها ما بتخاف الله ومجرمة وعندها القتل متل شربة مي
باسل: معك حق عمو.. نحنا من الأول كان لازم نخبركن بكل شي
حسين: هاد درس قاسي لكل الحاضرين كرمال ماحدا يتصرف من راسه بعد اليوم
عمار: فعلاً درس قاسي بس شو رح يصير بأيهم هلق؟
حمزة: أخي كريم قال أنه عامر وجواد اتبنوا الجريمة بس وجوده بموقع الجريمة والسلا.ح يلي باسمه مع شهادة باسل والاتصالات بين باسل وعامر وعامر وأيهم بتكفي لتجريمه مع عامر
حسن: اي كتير منيح يعني رح نخلص من أيهم أخيراً
حمزة: اي انشالله رح نخ...
بتقاطعه دقة الباب وبيقول غسان بصوت عالي: تفضل
بينفتح الباب وبيدخل كريم أخوه لحمزة برفقة تنين من عناصر الشرطة وبيقول بهدوء: صباح الخير
الكل: صباح النور
كريم: أنا المقدم كريم هيثم العباس
عصام: تشرفنا بحضرتك.. تفضل سيادة المقدم
كريم: الشرف الي أستاذ عصام.. إذا فيه مجال بدنا ناخد إفادة الدكتور باسل طبعاً إذا وضعه بيسمح
باسل بيهمس بتعب: تفضلوا حضرة المقدم (بيتطلع بحسن وبيقول) حسن وصّل سارة وأخواتي وأمي ع البيت بعد إذنك.. مافيه داعي تبقوا هون كلكن
رانيا: أنا مارح روح واتركك لحالك
باسل بيبتسم وبيقول: ماما إذا بدك ياني أرتاح بتروحي ع البيت بترتاحي
رانيا: بس يا باسل...
بيقاطعها باسل وبيقول: بدون بس ماما.. هي بابا وعلي وعمو حسين وحازم موجودين بالمستشفى.. خالتي احكيلك كلمة
فاديا: خلص أختي خلينا نروح نحضرله اكل وتياب ومنرجع بعد الضهر
رانيا بتقول بعدم رضا: ماشي الحال متل ما بدكن
لانا: أنا رح ابقى هون وبرجع مع عمي وحازم ع البيت
باسل: لا لانا أنتِ عندك بنتك صغيرة وبحاجتك.. عمتي الله يخليلنا ياكِ خدي لانا معك يلا
غسان: يلا يا بنات حاج تتعبوه يلا
بيطلع الكل من الغرفة باستثناء غسان وعصام وحسين وحمزة وكريم وعناصر الشرطة وبيبدأوا ياخدوا أقوال باسل أما البنات وفاديا ورانيا وسلمى وآدم وحسن وحازم بيكونوا واقفين برا قدام باب الغرفة وبتقول سالي: ماما أنا رح ابقى هون عند باسل
رانيا: بدك تبقي لحالك؟
أسيل: لا مرت عمو أنا ببقى معها
حنين: وأنا كمان ببقى هون وبرجع مع بابا وأخي لما يرجعوا
رانيا بتطلع بفاديا وسلمى وبتقول: شو رأيكن؟
سلمى: أنا برأيي إذا بقوا عنده بيكون أحسن لأنه حسين وغسان وعلي وحازم رح ينشغلوا بالمرضى
فاديا: خلص معناها بتضوا هون وإذا صار شي لا سمح الله بتتصلوا بحدا منهن
سالي: اي تمام
عمار: وإذا باسل ما قبل؟
سالي: إذا انحط تحت الأمر الواقع بيقبل.. يلا انتو روحوا ع البيت ارتاحوا ونحنا بس يطلع المقدم من عنده رح ندخل
رانيا: ما بدي وصيكِ سالي انتبهي عليه منيح
سالي: لا تقلقي ماما لا تقلقي
بيروحوا فاديا ورانيا وسلمى وسارة وحسن ولانا وعمار وآدم ع البيت وبيضلوا أسيل وسالي وحنين واقفين مع حازم قدام غرفة باسل
بعد تلت ساعة...
بيطلعوا الكل من جوا وبينصدم غسان بوجود البنات وبيقول: ليش ما رحتوا ع البيت؟
سالي: ماعندي شي اعمله بالبيت لهيك قلت ببقى جنب أخي
عصام: يلا ادخلوا لعنده
بيدخلوا البنات لجوا وبعد مدة قصيرة بيدخل وراهن غسان وحسين وعصام بعد ما يودعوا حمزة وأخوه وبيقول غسان: باسل محتاج شي قبل ما روح ع شغلي؟
باسل بتعب: بدي مسكن.. حاسس حالي موجوع
غسان: يلا رح اعطيك إبرة ومنه بتنام وبترتاح
باسل بيتطلع بسالي وبيقول: ما كان فيه داعي تبقي هون يا سالي... هي أنا رح نام شو بدك تعملي هون؟
سالي: معي أسيل وحنين منتسلى سوا.. أنت ارتاح وبس
بيعطي غسان الإبرة لباسل وبعدها بيروح هو وحسين وحازم لشغلهن أما عصام بيروح ع الشركة ليشوف شغله كمان
🍁🍁 🍁🍁 🍁🍁
بعد مرور ٥ أيام....
يوم الجمعة يوم جمعة العيلة بس هالمرة الكل اجتمع ببيت غسان بمناسبة خروج باسل من المستشفى.. بعد الفطور بيقعدوا الشباب بجهة من الصالة والصبايا بجهة لحالهن.. بيقرب عمار من عصام وبيقول: خالو بدي اطلب منك طلب إذا ممكن
عصام: اي تفضل ابني قلي شو بدك
عمار: أهلي عم يقترحوا عليي أبدأ بإكساء بيتي كرمال أنتقل أنا ولانا عليه... يعني كرمال لانا تاخد راحتها اكتر ويكون الها خصوصية واستقلالية
عصام: اي مو غلط وأساساً بيتك جنب بيت أهلك يعني رح تبقى قريب منهن بس شو المطلوب مني؟
عمار: إذا عندك بالشركة مهندسي ديكور شاطرين كرمال شوفهن أنا ولانا ونشوف شو بدنا نختار تصاميم.. أنت بتعرف أكتر مني بهيك مواضيع
عصام بيبتسم وبيقول: اي تكرم عينك... بس تكون فاضي امرق لعندي أنت ولانا ع الشركة ومنحكي بكل شي
عمار بيبتسم وبيقول: تمام.. شكراً كتير خالو
بتنشغل كل مجموعة بحديث معين وباسل قاعد جنب علي وعلي ماعم يحكي معه... بيقرب باسل من علي وبيقول: علي لايمت بدك تضل عم تعاملني هيك ببرود؟
علي بيرد بدون ما يتطلع بباسل: مو أحسن ما نتخانق ونغلط على بعض؟
باسل: يعني مو ناوي تسامحني ع غلطي؟ القصة صارت وخلصت وأنا الحمدلله بخير وما صرلي شي
علي بيتطلع بباسل وبيقول بقهر: بس أنا صرلي كتير.. من لما شفتك مرمي بالأرض لحد هاللحظة وصورتك محفورة براسي وعقلي وكل الوقت عم فكر شو كان صار لو ما وصلنا بالوقت المناسب
باسل: أنا آسف لأنك عشت هيك شي بسببي وبعترف إني غلطت بس بيكفي زعل... أنا فهمت غلطي وعم أطلب منك السماح
علي بيتنهد وبيقول: بتوعدني لاعد تتصرف من راسك بدون ما تخبرني؟
باسل بيبتسم وبيقول: بوعدك طبعاً بس المهم نرجع متل قبل ونطوي هالصفحة
علي بيبتسم وبيقول: خلص اعتبرها انطوت
باسل بيجذب راس علي وبيبوسه وبيقول: الله يخليلي ياك يا رفيق العمر... أنت الكتف الثابت يلي بيسندني بوقت الشدة... بربي هاد أصعب أسبوع مر عليي وأنت عم تعاملني بهالبرود
علي بيحط ايده ع كتف علي وبيقول: صدقني هالأسبوع ما بحسبه من عمري لأني كنت حاسس بنقص كبير بس كان ضروري تتعاقب ع تصرفك
عصام بيبتسم وبيقول: الله يديم هالمحبة بيناتكن
الكل: آمين
🍁🍁 🍁🍁 🍁🍁
الجزء السادس:
بعد مرور ٤ سنوات....
بالمستشفى....
علي طالع من قسم الإسعاف وحاطط ايديه بجيب المريول الأبيض، بيركب بالأسانسير وبيطلع ع الطابق الرابع بس لما يوصل ويطلع من الأسانسير بيشوف حنين بنت عمته واقفة مع دكتور بالممر وعم يحكوا.. بيفكر للحظات أنه يهجم ع الدكتور ويضربه بس بعدها بيتمالك أعصابه وبيقرب منهن وبيقول بهدوء: مرحبا
حنين بترد بلبكة: اهلين علي
الدكتور يلي مع حنين بيقول: اهلين دكتور
علي بتساؤل: حضرتك دكتور جديد هون؟
الدكتور: لا أنا غياث ابنه للدكتور بسام.. طالب طب عم اختص هضمية
علي: تشرفنا
غياث: بحضرتك.. أنا لازم روح ع شغلي.. بالإذن
علي وحنين: إذنك معك
بيروح غياث لشغله وعلي بيتطلع بحنين وبيقول بغضب مكبوت: ليش واقفة معه؟ شو كان عم يحكي معك؟
حنين بلبكة: غياث معي بالجامعة وشافني اكتر من مرة هون هالسنة وانصدم لما عرف بنت مين أنا
علي بحدة: وشو كان عم يقلك؟؟
حنين بتتوتر من نبرة علي بالكلام وبتضل ساكتة بس علي بيرجع بيعيد السؤال وبيقول: شو كان عم يقلك؟ ليش ماعم تجاوبي؟
حنين بتحكي بلبكة وتوتر: ك.كا.كان عم عم يسألني إذا بوافق في حال بعت أهله يطلبوني
علي بيحس النار ولعت بقلبه بعد هالحكي وبيقول بنبرة حادة ممزوجة بقلق: وأنتِ شو جاوبتيه؟
حنين بتوتر: قلتله الحكي لأبي وأخواتي مو الي
علي بيضغط ع ايده بقوة وبياخد نفس ليحافظ ع هدوء أعصابه وبيقول: مافيه داعي تاخدي وتعطي مع حدا هون... مو حلوة وقفتك معه لحالكن
حنين بلبكة: معك حق... أنا طالعة لعند بابا ع المكتب.. بالإذن
علي: إذنك معك
بتروح حنين لمكتب أبوها بالطابق السابع وعلي بيدخل ع عيادته بيكون فيه مريض ناطره.. بيخلص شغله بعد تلت ساعة وبيطلع ع مكتبه.. بيقعد ع الكنبة وبيرجع راسه لورا بتعب وبيتذكر أول مرة التقى بحنين عندهن بالبيت وكيف بعدها صار يحس قلبه عم يميل الها بس ماكان يحكي بهالشي حتى بينه وبين حاله.. بيجلّس قعدته وبيكون قدامه فيه كاسة مي ومن شدة غضبه وقهره بيمسكها وبيرميها بقوة ع الأرض.. بيمسح وجهه بتوتر وبيهمس ليحاول يهدي حاله: لا إله إلا الله محمد رسول الله... لا إله إلا الله محمد رسول الله
بيقوم علي ع الحمام بيغسل وجهه ولما يطلع بيندق الباب وبيدخل باسل وهو عم يقول: تشرب قهوة؟
علي بيتطلع بباسل وما بيرد وباسل بيتطلع بالمكتب وبيشوف قطع الزجاج منتشرة بالأرض.. بيسكر الباب وبيقرب من علي وبيقول باستغراب: شو صاير معك؟
علي: مافيه شي وقعت الكاسة من ايدي
باسل: وليش منظر وجهك هيك كأنه حدا قاتلك قتيل؟
علي بغضب مكبوت: باسل قلتلك مافيه شي... لا تضغط عليي اكتر
بيرمي علي المنشفة من ايده ع كرسي المكتب وبيروح بيقعد ع الكنبة وباسل بيقعد جنبه وبيقول: علي مارح اتركك وأنت بهالحالة بدون ما تحكيلي شو صاير معك
علي بيتنهد وبيقول: مافيه شي ينحكى صدقني
باسل بإصرار: لا فيه.. بدي اعرف شو يلي وصلك لهيك حالة وأنت نادراً لتفقد أعصابك هيك
علي بيمسح وجهه بكف ايده وبيقول: شفت حنين واقفة مع ابن الدكتور بسام وكان عم يسألها إذا ممكن توافق في حال بعت أهله يطلبوها
باسل بدهشة: شو هالحكي؟؟! وهيي شو قالت؟ موافقة؟
علي بقهر: قالتله الحكي لأبوها وأخواتها... باسل أنا بجن إذا بيت عمتي بيوافقوا ع هالشب.. لك ما بتخيل أنها تنخطب لغيري وأنا قاعد عم أتفرج
باسل: الحق عليك... كتمت بقلبك هالحب والمشاعر ٤ سنين وصرلي ٣ سنين بحاول أقنعك تطلب ايدها وأنت بتقول لساتها صغيرة لساتها صغيرة
علي: ماكان بدي شوش عليها و ع دراستها.. قلت لحالي لما تتخرج بفتح الموضوع مع أهلي.. بعدين عم تحكي عني ع أساس حضرتك ما عملت متلي
باسل: لا مو صحيح أنا ما عملت متلك.. أنا من ٣ سنين اجيت وقلتلك أنا بحب أختك وبدي ياها بس لأنها صغيرة مارح افتح الموضوع مع حدا ولما تتخرج بطلبها رسمي وأنت وافقت ووعدتني لا توافق ع اي حدا بيتقدملها قبلي أما أنت ما حكيت مع حدا بخصوص بنت عمتك ولا خبرت حدا ولا حتى عمار.. مع إني قلتلك روح حاكيه كرمال تضمن لا تنخطب لغيرك بس حضرتك عنّدت
علي باستياء: باسل أنت بدك تساعدني ولا تزيدها عليي؟ لاقيلي حل كرمال الله وبعدين احكي يلي بدك ياه
باسل: الحل بسيط كتير.. بتروح لعند أهلك بتخبرهن والمسا بتروحوا بتطلبوا ايدها قبل ما يلحق الدكتور بسام يحكي بالموضوع
علي بعد تفكير بيقول: وإذا كان حاكي مع عمو حسين هون بالمستشفى؟
باسل: مارح يلحق وحتى لو كان هيك بتوقع بيت عمتك مارح يرفضوك ويوافقوا ع الغريب
علي: فيها وجهة نظر
باسل: اي قوم روح بسرعة وحاج تتصفن بالحيط
علي: يلا قايم بس أنت خبر عمي وعمو حسين إني طالع من المستشفى بلا ما يسألوا عني ولا يلاقوني
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني ا