الفصل الخامس
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم كتفي واكتفائي`*
*❴🔢❵الـــبـــــــــــ❴5️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
قصص وروايات 📚📖:
تتمة الثالث
بياخد خضر نفس عميق وبيدخل ع مكتب عصام والسكرتيرة بتسكر الباب وبتطلع... بيقرب خضر لعند طاولة المكتب وبيقول: يعطيك العافية عمي
عصام بدهشة: خضر!!!!
خضر بخجل: عمي انا اجيت اعتذر منك على كل شي عملته... والله العظيم يا عمي أنا ندمان.. اكتشفت إني كنت ماشي بطريق غلط وندمت كتير وما بدي شي إلا أنكن تسامحوني
عصام بيوقف وبيقول: أنا قلتلك اذا اكتشفت إنك كنت ماشي بطريق غلط وقررت تعتذر فباب بيتي والشركة مفتوح الك
خضر أول ما يسمع هالحكي من عمه بيقرب لعنده بلهفة وعيونه عم يلمعوا بفرح وبيبوس ايده وبيقول: الله يخليلي ياك يا عمي... الله يخليلي ياك
عصام بيبتسم وبيطبطب ع كتف خضر وبيقول: ألف الحمدلله إنك رجعت لأصلك يا خضر.. الحمدلله ما ضاعت ترباية أخي فيك
خضر: والله مابعرف كيف طاوعت الشيطان ومشيت بالطريق الغلط... كان معمي على عيوني وكنت عم أتصرف بدون تفكير
عصام بيقعد ع الكنبة وبيأشر لخضر يقعد قباله وبيقول: كل واحد فينا معرض يصير معه هيك شي، بالنهاية نحنا بشر وجل من لا يخطئ
خضر بيقعد قبال عمه وبيقول: لولا علي وباسل وعمار كنت غرقت بالغلط اكتر
عصام بيبتسم وبيقول: ولولا رفقات السوء ماكنت دخلت بالغلط من الأساس
خضر بينزل راسه بخجل وما بيجاوب بس عصام بيكمل كلامه وبيقول: فيه حكي كتير لازم نحكيه وفيه اسئلة لازم تجاوبني عنها بس هلق مو وقتها... رح خلّص شغلي بسرعة كرمال نروح ع البيت وترتاح
🌺 🌺 🌺
قبل موعد الغدا بتلت ساعة بيوصل علي ع البيت.. بيفتح الباب وهو عم ينادي: ماما انا اجيت
فاديا بتحكي بصوت عالي من المطبخ: اهلين ابني.. ادخل ماعنا حدا
بيدخل علي وبيسكر الباب وبيتوجه للمطبخ وهو عم يقول: الله شو هالروائح الطيبة هي
فاديا بتبتسم وبتقول: اطلع غير تيابك بتكون جهزت السفرة
علي: حاضر يا ست الكل بس وينها أسيل؟
فاديا: نايمة.. بس تغير تيابك صحيها وانزلوا سوا
علي: أمرك
بيطلع علي ع الطابق التالت لغرفته بياخد دوش سريع وبيلبس بيجامته وبينزل للطابق التاني... بيدق باب غرفة أسيل دقة خفيفة وبيسمع أسيل عم تقول تفضل.. بيستغرب أنها فايقة وبيدخل ع الغرفة وهو مبتسم وعم يقول: كيفها مدللتي
أسيل بتكون قاعدة وساندة ضهرها لراس السرير وباين ع وجهها الزعل.. بترد وهيي مبتسمة: اهلين أخي.. الله يعطيك العافية
علي بيقرب وبيقعد ع طرف السرير وبيقول: الله يعافي قلبك... قالتلي ماما إنك نايمة
أسيل: اي من شوي صحيت
علي: كيف صارت ايدك؟ عم توجعك؟
أسيل بتهز راسها بمعنى لا وبتسكت بس علي بيحس أنها مو على بعضها لهيك بيقول: شبك اختي شو صاير معك؟
أسيل بحزن: اليوم صار موقف ببيت عمو غسان زعجني كتير وحاسة إني غلطت
علي بيفهم مباشرةً أنه قصدها ع الموقف يلي صار مع باسل.. بيبتسم وبيقول: قصدك لما دخل باسل ع المطبخ وشافك بدون حجاب؟
أسيل بتطلع بعلي بصدمة وبتقول: أنت كيف عرفت؟
علي: باسل خبرني
أسيل بدهشة: هو خبرك!!!
علي: اي ليش مستغربة؟ أنا وباسل ما منخبي عن بعض شي
أسيل: ما توقعت يخبرك هيك شي
علي: كان حاسس بالذنب لهيك حكالي... بكل الأحوال قصة ومرقت مافيه داعي تكبريها... هو ما قصد يدخل بهالطريقة ولا كان عرفان إنك عندهن بالبيت ولو ما سمع صوت بكي اكيد كان رح يستأذن
أسيل: وأنت مو مزعوج مني؟؟
علي بحنية: أختي أنتِ ما غلطتِ لحتى انزعج... هيك شغلة ممكن تصير مع أي حدا لهيك لاعد تفكري بالقصة
قبل ما ترد أسيل بيرن تلفونها وبتكون حنين يلي عم تتصل... بتفتح أسيل الخط وبتقول: اهلين حنين
حنين: كيفك أسيل.. عم تخبرني ماما أنه إيدك مجروحة خير شو صاير معك؟
أسيل: شغلة بسيطة لا تقلقي... أنتِ طمنيني عنك كيف صارت معدتك؟
حنين: الحمدلله أحسن
أسيل: اي ألف الحمدلله
حنين: صحيح اليوم المسا معزومين انتو وبيت خالو غسان لعنا ع العشا
أسيل: بالله!! ماعندي فكرة لأني من وصلتي ع البيت طلعت ع غرفتي نمت
حنين: اي وهي انا عم خبرك... ليكي ماما عم تناديني رح سكر... بشوفك المسا
أسيل: ماشي يا روحي.. الله معك
بتسكر أسيل الخط ومباشرة علي بيسألها: شبها حنين؟
أسيل: كانت عم توجعها معدتها الصبح لهيك ما راحت معي لعند سالي
علي: وكيف صارت هلق؟
أسيل: الحمدلله أحسن وقالتلي المسا معزومين لعندهن ع العشا
وهني عم يحكوا بيسمعوا صوت جرس الباب وبتقول أسيل: هاد بابا أكيد
علي بيوقف وبيقول: يلا قومي اغسلي وجهك وخلينا ننزل نتغدى
أسيل بتقوم وبتقول: يلا
بتدخل أسيل ع حمام غرفتها... بتغسل وجهها وبتطلع وبهالوقت بيندق باب الغرفة وبتدخل فاديا وهيي مبتسمة وبتقول: أبوكن وصل والسفرة جاهزة
علي: يلا ماما جايين
بتنزل فاديا بالأول وبيلحقوها علي وأسيل... بيدخلوا ع غرفة السفرة وبينصدموا بوجود خضر مع عصام... بيكون خضر واقف جنب عمه والدموع بعيونه وأول ما يشوف أسيل بينزل راسه بحرج... أسيل بتحكي والصدمة مسيطرة عليها: خضر!!!
خضر بيرفع راسه وبيتطلع بأسيل وبيحكي بصوت مخنوق: سامحيني أسيل... أنا غلطت بحقك كتير بترجاكِ سامحيني
أسيل بيدمعوا عيونها وبتقرب لعند خضر بتردد وهيي عم تقول: اذا رجعت خضر يلي رباه أبي وتعب عليه فأنا مسامحتك
خضر بتنزل دمعته وبيقول: صدقيني رجعت لأصلي يا أختي... والله العظيم كان معمي على قلبي بس هلق فقت ورجعت خضر حسان الحسن يلي بعمره ما رفع صوته عليكِ ولا مد ايده عليكِ ولا كسر كلمة أبوه
أسيل بتقرب من خضر اكتر وبتضمه وهيي عم تبكي وهو بيبادلها الحضن وهو عم يقول: انا آسف على كل شي عملته... ريتها انكسرت ايدي ولا ضربتك
أسيل بتبعد عن خضر وبتقول: بعيد الشر عنك.. صحيح كنت زعلانة منك كتير بس صدقني اعتذارك هلق خلاني انسى كل شي
خضر بيبوس أسيل من راسها وبيقول: الله يخليلي ياكِ يا حنونة... يمكن بعمري ما كنت قريب منك وحنون معك بس صدقيني من يوم يلي انتقلتِ وعشتِ معنا صار البيت أحلى وبكل عطلة صيفية كنت حس بقيمتك اكتر بس الله يلعن الشيطان يلي خلاني أقسى عليكِ
أسيل: بسيطة أخي المهم إنك عرفت غلطك ورجعت للطريق الصح
خضر: هالشي بفضل رب العالمين ومن بعده علي وباسل وعمار (بيتطلع بعلي وبيقول) شكراً كتير علي.. وقفتكن جنبي هيي يلي خلتني اصحى ع حالي واكتشف إني كنت غلطان
علي بيبتسم وبيقول: لازم تشكر أسيل لأني أنا كنت رافض احكي معك بسبب الشي يلي عملته فيها بس هيي طلبت مني أوقف جنبك وحاول ساعدك وصدقني أول مرة كنت قاعد معك غصباً عني واكتر من مرة كنت بدي قوم اضربك بس أتذكر أسيل وأسكت كرمالها
خضر بيبتسم وبيقول: كان واضح على وجهك إنك مزعوج مني كتير وهاد حقك طبعاً
علي: بكل الأحوال يلي فات مات وطالما أنت عرفت غلطك وقررت تصلحه فما فيه داعي ننبش الماضي.. الشي الوحيد يلي بيهمني هو سعادة أسيل وراحتها
خضر: وأنا بعاهدكن أمام الله إني أتغير للأحسن من كل النواحي ورح حط أسيل بعيوني وقلبي وحاول عوّضها عن كل شي عملته معها
فاديا بابتسامة: الله يديم هالمحبة بيناتكن ويخليكن سند وكتف لبعض ع طول يارب
الكل: آمين
عصام: يلا يا جماعة تفضلوا اقعدوا
علي: وينه آدم؟
فاديا: رح اطلع ناديه
أسيل: خليكِ ماما أنا بطلع
بتطلع أسيل بتنادي لآدم وبترجع هيي وياه... بيسلم آدم ع خضر وبيقعد الكل وبيبدأوا أكل
بعد الغدا بينتقل الكل ع الصالة... أسيل بتجهز الشاي وبتدخل ع الصالة بتضيفهن وبتقعد جنب أمها وبتقول: خضر رح تبقى هون على طول ماهيك؟
خضر: اي انشالله هيك ناوي... بدي شوف بيت صغير استأجره بس قبل كل شي بدي اعتذر من عمي وخالي وعمتي وأطلب السماح منهن
فاديا: اليوم معزومين نحنا وبيت عمك غسان لبيت خالك.. بتروح معنا وبتطلب السماح من الكل
عصام: اي ممتاز (بيتطلع بخضر وبيقول) بس ليش بدك تستأجر بيت؟ بتعيش هون عنا.. البيت كبير وبيوسع الكل
خضر: لا عمي أنا مابدي قيّد حرية مرت عمي... بستأجر بيت قريب منكن أحسن للكل
فاديا: شو هالحكي يا ابني... نحنا عيلة وحدة
خضر بيبتسم وبيقول: اكيد بس كرمال راحة الكل أنا بفضّل اقعد ببيت لحالي
آدم: وأسيل؟
خضر: بتبقى هون طبعاً.. انتو أهلها وأخواتها وعيلتها ومستحيل كرر غلطي وأحرمها منكن
عصام: مافيه داعي تستأجر بيت... أبوك الله يرحمه اشترى بيت هون بالحي قبل ما يتوفى والبيت جاهز من كل النواحي.. فيك تاخد مفتاحه وتقعد فيه
علي باستغراب: عن اي بيت عم تحكي بابا؟
عصام: البيت يلي ع زاوية الشارع
آدم: أول مرة بعرف أنه هالبيت لعمي حسان الله يرحمه
عصام: ماحدا كان بيعرف إلا أنا وغسان وحسين
خضر: عمي بعد إذنك أنا حابب أبدأ لحالي من الصفر.. أنا طمعت من قبل بالمصاري رغم الحياة المريحة يلي كنت عايشها لهيك حابب بلش لحالي من جديد كرمال حس بقيمة النعمة يلي كنت فيها
عصام: متأكد من قرارك؟
خضر: اي عمي متأكد... أنا مابدي أسكن بالبيت ع الجاهز
عصام: متل ما بدك... بس لما تحتاج مصاري بتجي لعندي وبتخبرني.. مفهوم؟
خضر: اكيد عمي اكيد بس شو منشان الشغل؟
عصام: فيك تبدأ من اليوم اذا بتحب... انا الساعة ٤ ونص عم ارجع ع الشركة واذا بدك فيك تروح معي
خضر: اي بروح احسن من قعدة البيت
عصام: تمام ومنشان البيت رح خلي محامي الشركة يدور ع بيت قريب من هون وانشالله يلاقي
خضر: انشالله خير يارب
أسيل: أخي أنت أكيد تعبان من الطريق... شو رأيك تطلع ترتاح قبل ما تروح ع الشركة مع عمي؟
خضر: اي والله ياريت
أسيل: معناها رح جهزلك غرفة فوراً
🌺 🌺 🌺
ببيت حسين....
قاعد الكل بالصالة بعد الغدا... بيقول عمار وهو عم يلاعب ملك يلي قاعدة بحضنه: كيف صارت معدتك حنين؟
حنين: الحمدلله أحسن
حازم: أنا بس بدي أفهم ليش عم تشربي قهوة ع الريق إذا بتعرفي معدتك حساسة؟
حنين: هيك تعودت شو أعمل!
لانا: بدك تغيري العادة.. افطري وبعدين اشربي قهوتك
حنين: خلص بحاول
وهني عم يحكوا بيرن تلفون شهد ومباشرةً بيسأل عمار بجدية: مين عم يتصل فيكِ؟
شهد بلبكة: هي رفيقتي
عمار: ومين رفيقتك؟
شهد: نيرمين
عمار بغضب مكبوت: نيرمين؟!!! شهد أنا ما نبهتك تبعدي عن هالبنت؟
شهد: امبلا بس يا أخي...
عمار بيقاطعها بحدة: بدون بس شهد... أنا لما وافقت تحملي تلفون ويكون معك خط حطيت شرط وهو الخط يكون للعيلة وبس أما رفقاتك ممنوع ياخدوا رقمك وأنتِ وافقتِ ماهيك؟
شهد بتهز راسها بمعنى اي وعمار بيكمل حكيه بغضب وصوت عالي وبيقول: شو رأيك أسحب منك التلفون؟
لانا: روق عمار مو هيك بتنحل الأمور
عمار بغضب: لو سمحتِ لانا لا تتدخلي
شهد بحزن: خلص أخي أنا آسفة... هي التلفون خدوه ماعندي مشكلة
عمار بحدة: الفكرة مو بس بالتلفون الفكرة بعدم سماعك لكلامي... أنا من لما شفت هالبنت قلتلك ابعدي عنها ما عجبتني تصرفاتها بس حضرتك ما بتسمعي الكلمة
شهد باستياء: أخي أنت ما شفتها إلا مرتين... كيف حكمت عليها بهالشكل؟
حسين: أخوكِ ما بيقول شي مو متأكد منه... هو عنده نظرة بالناس وبيفهم وبيعرف اكتر منك
شهد:.....
حازم: خلص شهد اسمعي كلمة عمار واقطعي علاقتك فيها بدون جدال
شهد بتوقف وبتقول بعدم رضى: حاضر متل ما بدكن.. انا طالعة ادرس عن إذنكن
الكل: إذنك معك
بتطلع شهد ع غرفتها وبتقول سلمى مباشرةً: لك ابني ليش هيك خليتها تزعل!!
عمار: أمي شهد لساتها صغيرة وبدها حدا يوجهها
حسين: ابني اعمل الشي يلي بتلاقيه مناسب.. أنت متابع أختك من صغرها وبتعرف مصلحتها اكتر من الكل
عمار بيبتسم بحب لأبوه وبيقول: الله يخليلي ياك يا بابا
لانا بتوقف وبتقرب من عمار وبتقول: اعطيني ملك خليني نيمها
عمار بيتطلع ب لانا وبيفهم فوراً أنها مزعوجة.. بيعطي ملك لحنين وبيمسك ايد لانا وبيخليها تقعد جنبه وبيقول: ليش مزعوجة؟
سلمى بتجاوب فوراً: بتعصب عليها وبعدها بتسألها ليش مزعوجة!!
عمار بيضحك وبيقول: سبحان الله كل البنات عندهن حماية بتزعجهن إلا مرتي حماتها بتدافع عنها وبتوقف معها مهما كان صاير
حسين بيضحك وبيقول: ههههه بنت أخوها وشبيهتها بدك ما تدافع عنها!!
عمار بيتطلع ب لانا وبيقول: أنا آسف ما كان قصدي احكي معك بهالطريقة بس أنتِ اكتر وحدة بتعرفيني لما عصب وخاصة بموضوع متعلق بأخواتي
لانا بجدية: مافيه داعي تعتذر... انا غلطت وتدخلت بشي ما بيعنيني
عمار بيضحك وبيقول: ههههه زعلك صعب وما بترضي بالسهل متل عمتك (بيقرب لانا منه وبيبوس راسها وبيقول) حقك عليي ما كان لازم احكي معك بعصبية وهي عم اعتذر منك قدام الكل
حنين: خلص لنوش سامحيه هالمرة
لانا: القصة مو قصة زعل وسماح يا حنين بس هو بيعرف كتير منيح إني من بداية زواجنا بحاول خليه يخفف عصبية ويحل اي موضوع بهدوء
عمار: وأنتِ بتعرفي إني حسّنت كتير من عصبيتي خلال هالسنتين بس بيبقى فيه مواضيع ما بقدر أتحكم بعصبيتي فيهن
لانا: بعرف بس بنزعج كتير لما شوفك معصب
سلمى: معك حق.. مافيه صبية إلا بتتمنى زوجها يخفف عصبية ويتصرف بحكمة ومنطق
حازم: بس فيه أمور بتجبر الواحد يعصب
لانا: اكيد بس بمتل هيك موضوع الهدوء هو الصح والمطلوب لأنه العصبية ما بتجيب نتيجة... يعني لو أنا بمكان شهودة كنت رح عاند عمار وابقى عم حاكي رفيقتي بدون علمه
حنين: بس هالشي مو صح
لانا: وأنا ماعم قول أنه صح يا حنين بس لما بدك تمنعي حدا عن شي يفترض تعطيه سبب مقنع وتناقشيه بهالشي مو تفرضي عليه الأمر فرض
حسين: للأمانة حكيك كله صحيح يا لانا
عمار: خلص المرة الجاية رح نحكي بهدوء ونتناقش بكل شي... تمام هيك؟
لانا بتبتسم وبتحكي بهدوء: انشالله خير
🌺 🌺 🌺
بالضيعة...
أيهم قاعد ببيته عم يدخن... بيرن تلفونه وبينفخ بضجر وبعدها بيرد وبيقول: [الو... اهلين... اتصلت فيك وما رديت عليي... الأخبار سيئة كتير... خضر ترك الضيعة وراح لعند عمه عصام... ما بعرف كيف صار هيك... خلص بكرا الصبح بكون عندك... اوكي سلام]
بيسكر أيهم الخط وبيقوم ع غرفته وبيبلش يضب أغراضه وهو عم يتوعد ويقول: ما بيكون اسمي أيهم إذا ما خليتكن تندموا يا بيت الحسن
🌺 🌺 🌺
المسا قبل موعد العشا بنص ساعة بيوصلوا عيلة عصام مع خضر وعيلة غسان لبيت حسين... خضر بيعتذر من الجميع وبيطلب السماح منهن وبيوعدهن يتغير للأحسن والكل بيفرح بهالمبادرة منه
بعد العشا... بيقعد الكل بالصالة وحنين وأسيل وسالي بيحضّروا الشاي وبيدخلوا بيضيفوا الكل وبيقعدوا وبتبدأ أحاديث الأيام القديمة والذكريات الحلوة
وهني عم يتحدثوا بيرن تلفون علي، بيوقف وهو عم يقول: عن إذنكن لازم رد
الكل: إذنك معك
بيطلع علي من الصالة وبيوقف عند الدرج وبيفتح الخط وبيقول: اهلين دكتور أغيد... اي فاضي... اكيد بقدر اجي... مسافة الطريق انشالله بكون عندك... الله معك
بيسكر علي الخط وبيمشي باتجاه الصالة بس بيشوف حنين طالعة من جوا لهيك بيوقف وبينتظرها توصل لعنده وبيقول: كيف صرتِ حنين؟ قالتلي أسيل كانت معدتك عم توجعك
حنين بخجل: الحمدلله صرت أحسن
علي: اي الحمدلله
بتكمل حنين طريقها للمطبخ وعلي بيدخل ع الصالة وبيقرب لعند أبوه وبيقول: بابا أنا مضطر أمشي... اتصل الدكتور أغيد وطلب مني روح ع المستشفى ضروري
عصام: ماشي ابني... انتبه ع حالك
علي: انشالله
بيقرب علي من أمه وبيبوس ايدها وبيقول: ادعيلي أمي
فاديا: الله يرضى عليك ويوفقك ويحميك يا نور عيني
علي بابتسامة: الله يخليلي ياكِ يا ست الكل
بيبعد علي عن فاديا وبيتطلع بأسيل وبيقول: أسيل إذا بدك ياني روح مرتاح بتوعديني تنامي بكير ولا تنطري رجعتي متل كل مرة
أسيل بتوقف وبتقرب لعند علي وهيي عم تقول: رح حاول بس ما بوعدك أقدر أغفى
علي بيبتسم وبيبوس أسيل من راسها وبيقول: ماشي الحال المهم تحاولي
أسيل: انتبه ع حالك
علي بيبتسملها بحنية وبعدها بيقول: يلا بالإذن
الكل: إذنك معك
بيتوجه علي لباب الصالة بخطوات سريعة وبنفس الوقت بتكون حنين داخلة ع الصالة وهيي حاملة صحن لبن وعم تحرك اللبن بالملعقة وماعم تطلع قدامها وفجأة بتضرب بعلي وبينكب عليه شوية لبن وحنين فوراً بتشهق وبتقول: آسفة والله ما انتبهت عليك
سلمى: لك بنتي وينهن عيونك؟ انتبهي الله يرضى عليكِ
فاديا: بسيطة بسيطة بتصير مع أي حدا
حنين بتكون متمنية تنشق الأرض وتبلعها من هالموقف قدام الكل وبتحس حالها رح تبكي من شدة خجلها بس بتحاول تحبس دموعها وبتقول بخجل شديد: أنا كتير بعتذر بس والله ما انتبهت عليك
علي بيتطلع بحنين لحتى يقلها مافيه مشكلة بس لما يشوف عيونها الخضر محمرين والدموع متجمعة فيهن وخدودها وأنفها كمان محمرين من أثر حبس الدموع بيسكت وكأنه ضاع الحكي منه ومباشرةً بينزل راسه للأرض وبيقول: أنا تأخرت ولازم أمشي
بيطلع علي من الصالة بسرعة ليهرب من قدام الكل قبل ما ينتبه حدا عليه بس لما يطلع من باب البيت بيوقفه صوت باسل وهو عم يناديه... بيلتفت علي وبيقول: شو فيه باسل؟
باسل: لا تروح وقميصك هيك... البس قميصي واعطيني قميصك
علي: مو محرزة ما أنا رايح بالسيارة وبمكتبي عندي قميص تاني.. بغيّره
باسل: لك خلصني اشلحه قبل ما تتأخر اكتر من هيك
علي: ماشي الحال يلا
بيتبادلوا علي وباسل القمصان وبعدها علي بيركب سيارته وبيتوجه للمستشفى أما باسل بيدخل ع الحمام لحتى يغسل مكان اللبن بشوية مي وبعدين بيرجع ع الصالة وبيقعد وسلمى بتقول: لانا اطلعي جيبي لباسل قميص من عند عمار
لانا بتوقف وبتقول: اي يلا
بتطلع لانا بتجيب قميص وبتعطيه لباسل وهو بيدخل ع الحمام بيغيره وبيرجع بيكمل السهرة مع الكل
🍁🍁 🍁🍁 🍁🍁
بعد مرور أسبوعين....
قاعد خضر بمكتبه بالشركة ومشغول بأوراق قدامه... بيرن تلفونه وبيتطلع بالاسم بيكون علي.. بيفتح الخط وبيقول: الو
علي: كيفك خضر
خضر: الحمدلله كيفك أنت
علي: الحمدلله... أنا وباسل طلعنا من المستشفى هلق.. مسافة الطريق منكون عندك
خضر: تمام بس توصلوا اعملولي رنة بنزل فوراً
علي: تمام.. سلام
خضر: الله معك
بيسكر خضر الخط وبيطلع من المكتب وبيتوجه لمكتب عصام... بتكون سمر قاعدة لحالها وعم تشتغل ع اللابتوب قدامها... بيدق خضر باب المكتب دقة خفيفة وبيقول: يعطيكِ العافية آنسة سمر
سمر بجدية: الله يعافيك
خضر بلبكة: عمي فاضي؟
سمر: اي بتقدر تدخل
خضر بلبكة: شكراً (بيفتل خضر ضهره لحتى يدخل لمكتب عصام بس بيرجع بيلتفت ع سمر وبيحكي بتردد) آنسة سمر أنا بدي اعتذر منك ع كل شي عملته معك.. والله ما بعرف كيف صار هيك وكيف سمحت لأيهم يتصرف معك بهالطريقة وأنا بتمنى تسامحيني ع غلطي
سمر بتسكت شوي وبعدها بتحكي بهدوء: الله يسامحك
خضر بيبتسم وبيقول: شكراً كتير الك
بيدخل خضر لعند عصام بعد ما يدق الباب ويسمع عصام عم يسمحله يدخل وبيقول: يعطيك العافية عمي
عصام: الله يعافيك
خضر: عمي أنا رايح مع علي وباسل لبيت خالي نتغدى عندهن
عصام: ماشي ابني.. سلم على الجميع
خضر: بيوصل انشالله
بيرجع خضر ع مكتبه بيضب الأوراق وبيسكر اللابتوب وبعد عشر دقايق بيتصل فيه علي وبينزل لتحت بيركب معهن بالسيارة وبيتوجهوا لبيت حسين
بيوصلوا لبيت عمتهن وبيدق علي الباب وبعد مدة قصيرة بتفتح سلمى وهيي مبتسمة وبتقول: اهلا وسهلا بحبايب قلبي
علي بيبوس ايد سلمى وبيقول: كيفك عمتي
سلمى: الحمدلله تؤبرني كيفك أنت
علي: الحمدلله
باسل وخضر كمان بيسلموا ع سلمى وبيبوسوا ايدها وبعدها بيدخل الكل ع الصالة بيقعدوا وعلي بيسأل مباشرةً: عمار لسا ما وصل؟
سلمى: لسا لأنه بدو يمر ع مدرسة شهودة يجيبها معه
باسل: ولانا وحازم وعمو حسين وينهن؟
سلمى: لانا بغرفتها هلق بتجي أما حسين اتصل وقال عنده عملية ومارح يجي ع الغدا وبيعتذر منكن وحازم راح معه يحضر العملية
خضر: الله يعطيهن العافية يارب
وهني عم يحكوا بيسمعوا صوت باب البيت انفتح وبعد دقيقتين بتدخل حنين ع الصالة وبتقول بهدوء: مرحبا
الكل: اهلين
سلمى: اهلين يا عمري... تعالي اقعدي ليش واقفة عندك
بتقرب حنين وبتقعد جنب أمها وبتقول: وين عمار وحازم؟
سلمى: عمار عم يجيب شهد وحازم مع أبوكِ بالمستشفى
حنين: معناها رح روح حضر السف...
بتقطع كلامها لما يسمعوا صوت الباب انفتح وصوت عمار عم يحكي بغضب: تفضلي شهد خانوم ادخلي لشوف
بيقوم الكل وبيطلعوا من الصالة لمدخل البيت وبتقول سلمى وهيي مستغربة: شبك عمار شو صاير؟
عمار بغضب: بنتك ماعد عم تفهم بالحكي... كل ما قلتلها اقطعي علاقتك بهالبنت بتكون قربت منها اكتر
شهد وهيي عم تبكي: والله يا أخي البنت مو متل ما أنت مفكرها
عمار بيصرخ بصوت عالي: اخرسي شهد ماني طايق اسمع كلمة وحدة منك
سلمى بحدة: خلص عمار حاج تبهدل أختك
عمار: أمي كرمال الله حاج تدلليها... انا عم احكي لأني خايف عليها وبدي مصلحتها
بهالوقت بتنزل لانا من غرفتها بسرعة وبتقول وهيي مستغربة: شبك عمار شو فيه؟
عمار بغضب: شو بدو يكون فيه يعني؟ شهد للمرة التانية بتخالف حكيي
حنين بتقرب من عمار وبتمسك ايده وبتقول بنبرة رجاء: كرمال الله روق واهدى
عمار بيسحب ايده بعصبية وبيحكي بصوت عالي وغضب: ماحدا يقلي اهدى... الموضوع زاد عن حده كتير كتير وماعد فيي أسكت أبداً
حنين بينزلوا دموعها وبتنسحب لورا بزعل وعلي بينتبه عليها وبينزعج كتير ومباشرةً بيقرب لعند عمار وبيقول بجدية: خلصنا عمار مو هيك بتنحل الأمور
عمار بغضب: علي حط حالك محلي وخبرني شو بتعمل لو أسيل عملت متل شهد!!!
علي بهدوء: معك حق بس خلينا نقعد ونحكي بهدوء لأنه الصريخ ما بيجيب نتيجة
عمار بيقرب من شهد وبيوقف قدامها وبيقول بغضب وجدية: اسمعي شهد من هاللحظة هي إذا بعرف أو بسمع إنك عم تحاكي هالبنت أو عم تشوفيها وتقعدي معها أقسم بالله العظيم لحتى أنقلك من مدرستك وأمنعك تطلعي برا البيت إلا معي وأحرمك من التلفون وهي الكل شاهد على كلامي... فهمتِ؟
شهد بتهز راسها بمعنى اي وعمار بيكمل حكيه بغضب وصوت عالي وبيقول: اطلعي ع غرفتك هلق ولاعد تخليني شوف صورة وجهك اليوم
بتطلع شهد ركض ع غرفتها وهيي عم تبكي وبيدخل عمار ع الصالة وهو معصب والكل بيدخل وراه وبتقول سلمى بعتب: عمار فيك تفهمني من ايمت بتحكي مع أختك بهالطريقة؟ لك شو صايرلك يا ابني ليش هيك عم تعمل؟
عمار: أمي أنتِ اكتر وحدة بتعرف إني ع طول بدلل شهد وما برفضلها طلب بس هي تاني مرة بتكسر كلمتي وبترجع تحكي مع هالبنت
باسل: ممكن تشرحلنا شو بتعرف عن البنت لحتى هيك عم تتصرف؟
عمار: ما بعرف عنها شي بس شفتها كم مرة وما حبيت تصرفاتها وحكيها
لانا: بس ما بيصير تحكم ع البنت من مرة ومرتين ومن تصرف يمكن كان عفوي وغير مقصود وأنت فهمته غلط
سلمى: وخاصة أنها شهد قاعدة معها كتير وعم تقول إنها حبابة وطيبة
عمار بصوت عالي: أنا سألت عن البنت والكل قال إنها بتسهر برا البيت وعيلتها كتير open mind وشفتها اكتر من مرة قاعدة مع شباب بعد المدرسة (بيسكت شوي وبيكمل كلامه بهدوء) استغفر الله العظيم... وهي بسببكن حكينا عن البنت.. انشالله ارتحتوا؟
لانا: ليش ما حكيت هالحكي لشهد؟ ما كان أحسن من هالعصبية والصريخ؟
عمار: ع اساس ما بتعرفيني ما بحب أحكي بأعراض الناس وأستغيب حدا؟
علي: خلص بسيطة هلق عمتي بتطلع بتحكي مع شهد وبتشرحلها الموضوع كله وبتوقع شهد ماعد تعارضك
عمار: انشالله خير
سلمى: انشالله.. أنا رح قوم حضر السفرة
لانا بتوقف وبتقول: خليكِ عمتي.. بحضرها أنا وحنين
بيقوموا حنين ولانا بيحضروا السفرة ولما تجهز بيجتمع الكل بيتغدوا وبعد ما يخلصوا بتعمل حنين شاي وبتاخد الصينية لعمار ع الصالة وبعدها بتطلع ع غرفتها أما لانا بترتب المطبخ مع سلمى ولما يخلصوا كمان كل وحدة بتطلع ع غرفتها ترتاح وبيضلوا الشباب قاعدين بالصالة لحالهن عم يتحدثوا وبعد وقت بينتبه علي ع خضر أنه شارد وماعم يحكي ولا كلمة لهيك بيحط ايده ع كتفه وبيقول: خضر شو قصتك اليوم؟ صاير معك شي؟
خضر بيتنهد وبيقول: بصراحة راسي مشغول بكذا قصة وحاسس أنه لازم خبركن كل شي صار معي لأني مو حابب خبي عنكن شي
باسل: اي تفضل احكي يلي بدك ياه نحنا منسمعك
خضر: بس شو منشان أعمامي وخالي؟ أنا حابب هني كمان يعرفوا كل شي صار
عمار: معناها أجلها ليوم الجمعة بتحكي قدام الكل
خضر: اي تمام بس بدي اطلب منكن طلب
علي: اي اطلب
خضر بلبكة: أنا بدي.. يعني أنا محتاج... (بيسكت شوي وبيكمل كلامه وراسه بالأرض) أنا محتاج مصاري
علي: اي بسيطة قلي شو المبلغ يلي بحاجته وتكرم عينك
خضر بلبكة: بصراحة المصاري مو الي... أنا تدينت من أيهم مبلغ ضخم كتير ولهلق ما رجعتله ياه
باسل بشك: لهيك وافقت تزوجه أختك؟
خضر بيرفع راسه بسرعة وبيتطلع بباسل وبيقول: لا والله مو لهيك.. انا صحيح غصبتها ع الزواج بس والله مو كرمال المصاري
علي: خلص انا رح احكي مع المحامي حمزة وخليه يحول مصاري من حسابي لحساب أيهم بس أنت اتصل فيه وخبره إنك رح تحوله ياهن
خضر: اي يلا
باسل: ممكن تحط التلفون سبيكر؟.. طبعاً اذا مافيه مانع بالنسبة الك
خضر: اي اكيد مافيه مشكلة
بيتصل خضر بأيهم وبيحطه سبيكر وبعد كم رنة بيرد أيهم وبيقول: عاش مين سمع صوتك خضر أفندي خضر: كيفك أيهم
أيهم: والله زعلان منك كتير... لك انت كيف بتترك الضيعة من دون خبر ولا بتسأل عن حدا ولا بترد ع اتصالاتي؟!
خضر: كنت مشغول بالبيت وبالشركة
أيهم: حلو يعني بلشت شغل بشركة عمك
خضر: اي والله.. المهم أيهم انا اتصلت لخبرك إني اليوم انشالله رح حولك ديونك كلها ع حسابك
أيهم: بس أنا قلتلك ما بدي ياهن.. نحنا أخوة وعيلة وحدة ومافيه بيناتنا هيك شي
خضر: لا أيهم أنا مارح أرتاح إلا اذا رجعتلك ياهن
أيهم: خليني شوفك ومنحكي بكل هالأمور
خضر: مافيي اطلع ع الضيعة عندي شغل وما بقدر اتركه
أيهم: ومين جاب سيرة الضيعة؟ أنا كمان تركت الضيعة وانتقلت ع المدينة
خضر بصدمة: عم تحكي جد أيهم؟!!
أيهم: اي ليش مصدوم؟ انا ما بعرف بالضيعة غيرك ولما أنت تركتها قررت كمان أنتقل ع المدينة
خضر: وفاتح وينه؟ كمان انتقل؟
أيهم: فاتح لساته عم ينصب ع هالعالم هههه هو ما بيهمه إلا المصاري... المهم شو عندك اليوم المسا؟
خضر: مشغول مع بيت عمي... خلص أنا لما أفضى بحكي معك ومنتفق.. انا صار لازم سكر.. سلام
أيهم: ماشي سلام
بيسكر خضر الخط وبيعلق باسل مباشرةً: حاسسني قلبي فيه ورا هالشخص قصة طويلة (بيوجه كلامه لخضر وبيقول) أنت من ايمت بتعرفه؟
خضر: من لما كان عمري ١٤ سنة... انتقل هو وأمه ع ضيعتنا وكان معي بنفس المدرسة وأمه الله يرحمها صارت تشتغل بالشركة عنا
باسل: وهو يلي اقترح عليك تسحب دفعات من مصاري المشروع؟
علي: خلص باسل خلينا نأجل هالحديث ليوم الجمعة ووقتها منعرف ومنفهم كل شي
باسل بيبتسم وبيقول: معك حق
🍁🍁 🍁🍁 🍁🍁
الجزء الرابع:
بيمر كم يوم وبيجي يوم الجمعة وكالعادة الكل اجتمع ع الفطور ببيت عصام وبعد الفطور انتقل الكل ع الصالة والصبايا رتبوا المطبخ وعملوا الشاي وانضموا للكل بالصالة... بيكون خضر قاعد جنب عمه عصام وبيقول بهمس: عمي بتحب احكي قدام الكل يلي صار أو نقعد بدون الصبايا ونحكي؟
عصام: لا قدام الكل... نحنا عيلة وحدة ولازم الكل يعرف شو السبب يلي خلاك تعمل هيك
خضر: متل ما بدك
عصام بيتطلع بالكل وبيحكي بصوت عالي: بعد إذنكن يا جماعة خضر حابب يخبرنا شو صار معه بالضبط لحتى عمل يلي عمله وبدي الكل يسمعه
حسين: اي منسمعه
غسان: تفضل ابني احكي
خضر بياخد نفس عميق وبيبدأ يحكي كل شي صار معه على مسامع الكل وبيروح بذاكرته لقبل سنة
❄FLASH BACK❄
قبل سنة....
خضر قاعد بمكتبه بفرع الشركة بالضيعة مع أيهم وفاتح وأيهم عم يحكي: خضر انت ليش ماعم تفهم عليي؟ عم قلك اذا اخدت شوي من مصاري المشروع مارح يتأثر وماحدا رح يحس ع شي وانا بنفسي بعدل التقارير المالية يلي عم نبعتها لعمك
خضر: بس يا أيهم...
أيهم بيقاطع خضر وبيقول: بدون بس.. لك انا عم احكي منشان مصلحتك.. روح شوف ولاد عمك كيف عايشين بالمدينة و ولا على بالهن وكل واحد عنده بيت وسيارة من افخم ما يكون
خضر:....
فاتح: أيهم معه حق... انت حقك تشتري سيارة وبيت بالمدينة وتأمن مستقبلك برا هالضيعة بعدين صرلنا زمان ما رحنا سهرنا وغيرنا جو وكله بسبب شغلك والضغط يلي انت فيه
خضر: بس اذا عمي عرف بشي رح تصير كارثة
أيهم بمكر: عم قلك انا بعدل كل شي شو بدك انت بهالقصة بعدين انت عم توصلك مبالغ كبيرة لأنه المشروع ضخم ومهما سحبت منهن مارح تلفت انتباه
بتمر الأيام وخضر بيبدأ يسحب مصاري من مصاريف المشروع الضخم يلي عم تشتغل عليه الشركة وأيهم عم يعدل التقارير المالية يلي عم يبعتوها كل شهر لعصام وهيك ماحدا بينتبه على شي
بعد مرور ٤ شهور...
خضر قاعد مع أيهم وفاتح بمطعم عم يتعشوا وبيقول أيهم: خضر انت بتعرف انه حسب التقارير يلي عم ابعتها لعمك كل شهر باقيلك دفعة وحدة وبتنهي المشروع كله يعني المفروض بعد ٣ شهور تسلم المشروع
خضر بصدمة: شوووو؟ وليش ما خبرتني بهالحكي من قبل؟ لك المشروع لسا ماخلص الا نصه كيف بدي كمله انا؟
أيهم: خبرتك بس انت قلت انو عليك دفع مبلغ كبير من سعر الفيلا يلي اشتريتها بالمدينة وماعد معك مهلة لهيك سحبت مبلغ كبير من اخر دفعة وصلتك
خضر: والحل هلق؟ كيف بدي كفي المشروع؟
فاتح: اسحب من خزينة الشركة
خضر: وكيف وقتها بدي ادفع رواتب المهندسين والعمال؟
أيهم: انا معي مبلغ منيح بيكفي لرواتب الموظفين هالشهر بقدر ساعدك اذا بدك ولما تبلش بمشروع جديد بترجعلي ياهن
خضر: اففف ماشي الحال بس انشالله يكفوا المصاري ليخلص المشروع
فاتح: اذا ما خلص منلاقي حل تاني
وفعلاً بيسحب خضر من خزينة الشركة مبلغ بيعادل رواتب ٤ شهور للموظفين بالإضافة للمبلغ يلي وصل من عمه كآخر دفعة للمشروع وبيكمل شغل بس ما بيكون المبلغ كافي لهيك بيضطر يتدين من أيهم مبلغ تاني ليقدر يخلص المشروع بالوقت المحدد... أيهم بيدفع رواتب الموظفين أول شهر بس الشهر يلي بعده بيخبرهن أنه الوضع بالشركة صعب ولازم يصبروا بس أغلبهن ما بيرضى بهالشي لأنه بيكونوا عم يتعبوا كتير بشغلهن وبيقرروا يتركوا الشغل
خضر بيخلص معه المشروع بعد الوقت المحدد بشهر (يعني بعد ٤ شهور) وبيتحجج ببطء العمال بس بالأخير بتمشي الأمور متل ما خطط ومن ربح المشروع بيدفع راتب الشهر يلي مرق للموظفين مع راتب الشهر الحالي بس بيضل عليه ديون كتيرة... مبلغ ضخم جداً لأيهم ومن ضمنه الرواتب يلي دفعها بأول شهر بالإضافة لرواتب الشهرين الجايين
بعد نهاية المشروع...
خضر قاعد بمكتبه عم يفكر كيف بدو يوفي ديونه... بيندق الباب وبيدخل أيهم ومعه فاتح وبيقعدوا قبال بعض وبيسأل فاتح مباشرةً: شبك خضر ليش مزعوج؟ هي المشروع وخلص وعمك شاف بعينه أنه كل شي تمام وما حس على شي وغير هيك جاييك عرض لمشروعين
خضر: والديون يلي عليي لأيهم؟ و خزينة الشركة يلي رايح منها رواتب شهرين لقدام؟ والمهندسين يلي نصهن ترك الشركة؟
أيهم: انا عندي حل لكل هالمشاكل
خضر: شو هو؟
أيهم: سمعت أنه واحد من المشاريع يلي انعرضت عليك لبيت دوبلكس صغير... ماهيك؟
خضر: اي صحيح بس انت بتعرف انو عمي ما بيقبل بهيك مشروع صغير ومستحيل يوافق عليه
أيهم بمكر: أنت خلي المهندسين يعملوا مخطط لفيلا كبيرة شي ٣ طوابق مع مسبح كبير وحديقة واسعة وابعته لعمك وبس يوافق منعدل المخطط لبيت دوبلكس ومنبلش شغل عليه وبفرق المصاري بين المشروعين بترجّع المصاري لخزينة الشركة واذا زاد معك شي بتعطيني دفعة بالنهاية اكيد انا بصبر عليك
خضر: وبلكي كان موقع البيت ما خرج ينعمل فيه فيلا كبيرة؟
فاتح: هي اتركها عليي انا بعدل معلومات الموقع والمساحة ليصير كل شي مناسب
خضر: والمهندسين يلي تركوا الشغل؟
أيهم: بالوقت الحالي عدم وجودهن احسن لأنه وضع الشركة ما بيسمح تدفع رواتب للكل وبكرا بس يرجع الشغل متل ما كان ما بتلاقي الا الكل راجع وبدو يشتغل عنا
خضر بعد تفكير بسيط بيقتنع وبيبتسم لأيهم وفاتح وبيحكي بحماس: ممتاز لكن خلونا نبدأ من بكرا
فاتح بابتسامة: اي هيك هاا هاد خضر يلي منعرفه.. وبهالمناسبة انا عازمكن ع احلى سهرة
بينفذ خضر يلي اتفق عليه مع أيهم وفاتح وبيخبر عمه بفكرة المشروع وعصام بيطلب منه يبعتله معلومات الموقع مع المخطط وبالفعل خلال شهر بتجهز كل المخططات بيبعتها خضر لعصام يلي بيشوفها وبيوافق عليها و بيقدّر قيمة المصاريف المطلوبة وبيبعت دفعة لخضر لحتى يبلش بالتنفيذ ع أرض الواقع
خضر بيبدأ تنفيذ مشروع البيت وبيبدأ يسحب جزء من كل دفعة ويحطها بخزينة الشركة لحتى يرجّع كل النقص يلي صار
بعد شهرين ونص...
خضر وأيهم قاعدين لحالهن بالمكتب
أيهم: خضر شو صار معك بموضوع جامعة أختك؟
خضر: ولا شي كل ما انفتحت السيرة بتخانق معها وبصرخ عليها او بضربها.. لك يا اخي ماعم اقدر سيطر ع حالي كل ما اسمع سيرة الجامعة خاصة كل ما اتذكر حكيك عن المدينة وجوها المختلف عن هون
أيهم: معك حق... نحنا درسنا بالمدينة وشفنا الجو فيها وكيف الجامعة فيها أشكال وألوان
خضر: بس بنفس الوقت اذا هيي راحت ع المدينة رح تقعد عند بيت عمي يعني عند أخواتها لهيك أوقات بفكر وافق ع دراستها وأرتاح من هالهم
أيهم بابتسامة مكر: ويلي بيعطيك حل يريحلك راسك من كل هالسيرة وبنفس الوقت بتبقى اختك هون تحت عيونك
خضر: بعطيه شو ما بدو
أيهم بابتسامة: زوجني أختك
خضر بصدمة: نععععم؟!!!
أيهم: اي ليش مصدوم؟ انا شايفك كيف مضغوط بالشغل من جهة ومن البيت من جهة تانية لهيك حابب ساعدك وخفف عنك وكمان من محبتي فيك وغلاوتك عندي حابب صاهرك وصير أنا وأنت عيلة وحدة
خضر وهو لساه تحت تأثير الصدمة: عم تحكي جد أيهم؟؟!!
أيهم: طبعاً جد.. انا لو مو متأكد انو هالحل رح يريحك ما كنت بفكر فيه... انت عم تقضي وقتك كله هون بالشركة وبالك ع طول مشغول بأختك يلي قاعدة لحالها بالبيت... صح؟
خضر : اي صح
أيهم: معناها الحل المناسب هو زواجها وهيك بتضمن أنها تبقى هون بالضيعة تحت عينك وانت متطمن عليها أنها بأمان
خضر وهو عم يفكر: فيها وجهة نظر (بيسكت شوي وهو عم يلعب بالقلم يلي بأيدو وبعدها بيتطلع بأيهم وبيحكي) خلص خليني فكر بالموضوع وبعدها بردلك خبر
أيهم بمكر: اي اكيييد خد وقتك
خضر: تمام (بيسكت شوي وبيرجع بيقول) اي صحيح قبل ما انسى منشان ديونك انا مو نسيانهن بس بتعرف وضعي هالفترة
أيهم: ومين قلك بدي المصاري؟ خلص نحنا رح نصير عيلة وحدة وعيب نحكي بالمصاري
خضر بيبتسم وبيقول: والله أنت أخ حقيقي مو مجرد صديق
أيهم بمكر: يخليلي ياك يا غالي
بيمر أسبوعين وخضر عم يفكر بحكي أيهم وعم يقتنع فيه تدريجياً بس الشي الوحيد يلي كان متردد منه هو أعمامه وخاله و أولادهن... وبيوم خميس بيكون سهران مع أيهم لحالهن بالبيت وأسيل نايمة بغرفتها
خضر: أيهم خلينا نطلع ع الحديقة نحكي شوي
أيهم: اي تفضل
بيطلعوا ع الحديقة بيقعدوا...
خضر: انا فكرت بعرضك وموافق عليه بس فيه مشكلة وحدة
أيهم : شو هيي؟
خضر : أعمامي وخالي مستيحل يوافقوا وحتى اسيل مارح توافق
أيهم بيبتسم: ومين قلك مافكرت بحل لهالشي
خضر: شو الحل؟
أيهم : ما بتخبر حدا لبعد كتب الكتاب
خضر : وأسيل كمان؟
أيهم: لا انت اسألها اذا بتوافق او لا بس بالأول اسحب تلفونها منها كرمال لا تخبر حدا واذا شفت أنها رفضت احبسها بالغرفة للمسا لوقت كتب الكتاب
خضر : وبلكي قدام الشيخ رفضت؟
أيهم : شبنا خضر بدي لقمك كل شي بالمعقلة؟ اضربها اجبرها هددها اعمل اي شي بالنهاية هيي صغيرة وما بتعرف مصلحتها واكيد بعدين رح تفهم قيمة الشي يلي عملته كرمالها
خضر بيحكي بعد تفكير بسيط: خلص لكن بكرا الصبح بخبرها بالموضوع وانشالله توافق لحالها ولا تعاند وتعذبني
أيهم: انشالله بس لا تنسى اهم شي لا تخلي تلفونها معها ولا تخليها تطلع من غرفتها للمسا
❄BACK❄
بينهي خضر حديثه وبينزل راسه بحرج وبيقول: أنا بعرف أنه مافيه مبرر لغلطي بس أنا مشيت ورا حكي أيهم وكان معمي على عيوني.. أسيل بتعرف إني قبل وفاة أبي وجدي الله يرحمهن كنت شخص مختلف عن بعد وفاتهن وهالشي بسبب أيهم يلي كان ع طول يحشي براسي أفكار غريبة لدرجة أنه كان يحرضني حتى على أسيل
باسل: شو قصدك بالضبط؟
خضر بيتنهد وبيقول: أيهم كان دائماً يحسسني أنه إذا تركت أسيل ع راحتها ممكن تغلط وتخبص وإني لازم أفرض سيطرتي عليها ولا أسمحلها تطلع برا البيت لحالها ومن هالحكي
علي: وأنت سمعت منه وفعلاً حرمتها من كتير شغلات
خضر بندم: والله ما بعرف كيف سمحتله يسيرني ويغير تفكيري بهالطريقة بس هو كان طول الوقت معي وكل يوم يحكيلي قصص عن بنات راحت ع المدينة والجامعة وخبصت وغلطت وأنا صرت تلقائياً لما أسيل تفتح هالسيرة يجن جنوني وأتخانق معها وأضربها
عمار: وموضوع الشركة؟
خضر: متل ما قلتلكن من سنة تقريباً بدأ بالحكي عن المصاري والحالة المادية والراحة وأنا تأثرت بحكيه وسمعت كلامه وعملت متل ما كان يقلي
عصام: يلي صار صار والشي المهم إنك عرفت غلطك واعتذرت وعم تبدأ من جديد بس أنا متأكد انه فيه قصة ورا أيهم لأنه مستحيل شخص يسعى للأذى وخراب البيوت بهالطريقة إلا إذا كان عنده هدف
حسين: تماماً ولازم نعرف شو قصته لهالشب
غسان: ليش ما منطلب من المحامي حمزة يسأل عنه
حسن: اي والله فكرة ممتازة.... حمزة عنده معارف وطرق بيقدر يجيب من خلالها معلومات عن اي حدا
عصام بيوجه حكيه لآدم وبيقول: آدم الله يرضى عليك احكي مع حمزة وابعتله اسم أيهم الكامل وخليه يسأل عنه ويخبرنا شو بيصير معه
آدم: تكرم بابا (بيتطلع بخضر وبيقول) خضر اعطيني اسم أيهم الكامل
خضر: أيهم سمير محمد
آدم بيتصل فوراً بالمحامي وبيعطيه اسم أيهم الكامل وبيطلب منه يجمع معلومات عنه ويخبره أول بأول وبعدها بيقوموا البنات بيقعدوا بطرف لحالهن من الصالة وبيضلوا الشباب بالطرف التاني.. بتقرب لانا من سارة يلي قاعدة جنبها وبتقول: تعي معي شوي ع المطبخ
سارة: اي يلا
بتقوم سارة مع لانا وبيدخلوا ع المطبخ ومباشرةً بتسأل لانا: شبك أختي شو صاير معك؟
سارة باستغراب: أنا؟!!! شو صاير؟! مو صاير شي
لانا: من الصبح حاسستك مو على بعضك وما أكلتي منيح وكأنك مزعوجة.. متخانقة مع حسن شي؟
سارة: لا والله مافيه شي بس حاسة حالي تعبانة شوي وجسمي مخربط وما الي نفس ع الأكل
لانا بتبتسم وبتقول: حامل؟؟!!
سارة بتفتح عيونها بصدمة وبتقول: حامل!!!
لانا بتضحك وبتقول: هههه أنا عم اسألك يا هبلة
سارة ولساتها تحت تأثير الصدمة: ما بعرف ما خطرلي فكر بالموضوع
لانا بتبتسم وبتقول: ما تأخرت عليكِ؟
سارة بعد تفكير بسيط بتجاوب: امبلا كم يوم
لانا بتتوسع ابتسامتها وبتقول: لازم تعملي تيست ونتأكد.. رح نادي باسل كرمال يروح ع الصيدلية
بتمشي لانا خطوتين لتطلع من المطبخ بس بتوقف لما تشوف باسل داخل ع المطبخ وبتقول بحماس: اجيت بوقتك
باسل بيبتسم وبيقول: خير شو القصة؟
لانا بتبتسم وبتقول وهيي عم تطلع ع سارة: يمكن رح تصير خال للمرة التانية
باسل بتتوسع ابتسامته اكتر وبيوجه كلامه لسارة وبيقول: صحيح هالحكي سارة؟
سارة بخجل: ما بعرف هي لانا يلي شكت بالموضوع
باسل بيقرب من سارة وبيبوس راسها وبيقول: انشالله خير.. رح روح ع الصيدلية جبلك تيست.. ما بتأخر
بيطلع باسل من المطبخ وبيدخل ع الصالة وبيقرب لعند عمه عصام وبيقول: عمي بعد إذنك عندي مشوار ضروري خمس دقايق وبرجع
عصام بيبتسم وبيقول: إذنك معك يا ابني
بيطلع باسل من بيت عمه وبيتوجه لأقرب صيدلية بيشتري تيست حمل وبيرجع لبيت عصام... بينزل من السيارة وبيتوجه لباب البيت بس قبل ما يدقه بينفتح الباب وبتطلع أسيل وبتنصدم بباسل قدامها وبتحط إيدها ع قلبها بخوف وبتقول: بسم الله الرحمن الرحيم
باسل بيبتسم وبيقول: خوفتك؟
أسيل بخجل: اي.. لا.. يعني اي لما طلعت قدامي فجأة خفت
باسل: بعتذر... لوين رايحة؟
أسيل: بدي اسقي الورد
باسل: بدك مساعدة؟
أسيل بخجل: لا شكراً
بتكمل أسيل طريقها لبرا وبيدخل باسل لجوا وهو حاسس بدقات قلبه زادت وكيانه كله تغير... بتستقبل لانا باسل بمدخل البيت وهيي عم تقول: جبته؟
باسل بيهز راسه بمعنى اي وبيعطيها الكيس وهيي بتدخل ع المطبخ بسرعة وبتقول لسارة: يلا ادخلي اعمليه
سارة بتوتر: خايفة ما يكون فيه شي
لانا: اي ووين المشكلة؟ لساتك صغيرة وقدامك عمر طويل بعدين أنتِ قلتِ ما كنتِ مفكرة بكل الموضوع لهيك شو ما طلعت النتيجة لا تزعلي
سارة بتتشجع من حكي لانا وبتاخد الكيس منها وبتدخل ع الحمام وبتطلع لانا وراها من المطبخ وبتقرب لعند باسل يلي واقف بمدخل البيت وبتقول: الله يجبر بخاطرها يارب
باسل: آمين
بعد مدة بتطلع سارة من الحمام وهيي ماسكة التيست بإيدها وبتقرب لعند لانا وباسل وبتقول بتوتر: خطين شو يعني؟
لانا بتبتسم وبتقرب من سارة وبتضمها: ألف ألف مبروك يا عمري أنتِ... الله يرزقك الذرية الصالحة ويتمملك على خير يارب
سارة بتحكي والدموع بعيونها: الله يبارك فيكِ يا أختي
باسل بيسحب سارة لحضنه وبيضمها وبيبوس راسها وبيقول: ألف مبروك يا عيوني... الله يتمملك على خير
سارة بتضم باسل وبتقول: الله يبارك فيك يا نور عيوني
باسل بيبتسم وبيقول: يلا ادخلي خبري زوجك وأبوكِ وعمك... أكيد رح يفرحوا كتير
سارة بخجل: لا ما بدي بخجل... خلص خبرهن أنت
باسل بيضحك وبيقول: هههه أنا بدي خبرهن؟!! خلص هلق لانا بتقوم بالمهمة
لانا بتضحك وبتقول: ههههه متل أيام زمان.. لانا والمهمات الصعبة
باسل وسارة: ههههه
وهني عم يضحكوا بينفتح باب البيت وبتدخل أسيل وبتقرب لعندهن وبتقول: شو ليش واقفين هون؟
لانا: هلق كنا رح ندخل.. أنتِ وين كنتِ؟
أسيل: طلعت سقيت الورد
بيدخلوا مع بعض ع الصالة ولانا بتتوجه لعند عمها وأبوها وبتقعد بيناتهن وبتقول وهيي مبتسمة: اعطوني البشارة
عصام باستغراب: بشارة شو؟!!
لانا بتضحك وبتقول: ما بحكي لحتى تعطوني بشارتي
غسان بيبتسم وبيطالع مفتاح سيارة من جيبته وبيعطيه للانا وبيقول: وهي البشارة جاهزة.. مبروك السيارة
لانا بتتوسع عيونها بصدمة وبتقول: عم تحكي جد بابا؟!
غسان بيضحك وبيقول: هههه طبعاً جد.. كنت ناوي اعطيكِ ياها من يومين بس أجلتها لليوم
لانا بتبتسم وبتبوس ايد أبوها وبتقول: الله يخليلي ياك
عصام بيبتسم وبيقول: رح تخبرينا شو القصة؟
لانا بتبتسم وبتقول: مبروك أول حفيد الكن ع الطريق... سارة حامل
فاديا ورانيا بصوت واحد: عم تحكي جد!!!
لانا بتضحك وبتقول: هههه طبعاً جد
بيبدأ الكل يبارك لسارة وحسن ويهنيهن ويدعولهن بالتمام على خير وحسن بيبوس سارة من جبينها وبيقول بهمس: مبروك النا يا روحي
سارة بخجل: الله يبارك فيك ويخليلي ياك يارب
حسن بيرجع بيبوس سارة من جبينها وبيضمها لصدره وهو فرحان وعم يبتسم وبعدها بيسحبها وبيقعدوا جنب بعض وبتقول لانا بمزح: عمو عصام ما بيطلعلي هدية منك ع هالخبر الحلو
عصام بيضحك وبيقول: هههه طبعاً بيطلعلك (بيطالع مفتاح من جبيته وبيعطيه للانا وبيقول) تفضلي هي مفتاح صيدليتك
لانا بتطلع بعصام وبتقول بدهشة: صيدليتي؟!!!
عصام بيبتسم وبيقول: اي صيدليتك.. شو ما بدك تشتغلي بشهادتك؟
لانا بيدمعوا عيونها من فرحتها وبتقول: اكيد بدي بس ما توقعت يصير الموضوع بهالسرعة
عصام: أنا سألت عمار وقلي ماعنده مشكلة تشتغلي لهيك جهزتلك ياها فوراً وعملتلك ياها مفاجأة
لانا بتبوس ايد عصام وبتضمه وبتقول: الله لا يحرمنا منك يا عمو
عصام بيبوس لانا من راسها وبيقول: الله يحميكِ يا لانا ويوفقك أنتِ وعمار ويخليلك هالملاك
بيمر الوقت وكل مجموعة مشغولة بحديث معين أما فاديا ورانيا وسلمى بيقوموا ع المطبخ لحتى يجهزوا الغدا وبيساعدوهن الصبايا... بعد الغدا بيقعدوا الشباب بالصالة والصبايا بيجتمعوا بالحديقة الشتوية... أسيل وحنين بيعملوا شاي بالقرفة وبيدخلوا ع الصالة بيعطوهن لعلي وعمار وبعدها بيطلعوا ع الحديقة الشتوية بيقعدوا مع الباقي
بالصالة...
بيرن تلفون آدم وبيكون حمزة المتصل.. بيقوم آدم لبعيد بيرد وبعد نهاية المكالمة بيرجع بيقعد محله وبيقول: بابا عم يقول حمزة مافيه حدا باسم أيهم سمير محمد
خضر بصدمة: كيف يعني مافيه حدا بهالاسم؟
آدم: ما بعرف قال سأل عنه كتير ومافيه حدا بهالاسم بس قال إذا معنا عنوان بيته ممكن نوصل لشي
حسين بيوجه كلامه لخضر وبيقول: بتقدر تجيب عنوان بيته؟
خضر: اي اكيد.. هلق بتصل فيه وبقله يبعتلي العنوان بس بهالحالة بدي روح شوفه
باسل: اي روح واسمع شو رح يقلك وسايره بس إياك تتأثر
خضر: لا تقلق ماعد أغلط نفس الغلط مرة تانية
بيتصل خضر بأيهم وبيطلب منه عنوان بيته وبالفعل أيهم بيبعتله العنوان وبيتفقوا يلتقوا بعد ساعة عنده بالبيت
بعد ساعة بيروح خضر لعند أيهم بيشوفه وبيقعدوا وأيهم بيطلب من خضر بطريقة غير مباشرة أنه يدبرله شغل معه بالشركة وخضر بيحاول يسايره قدر الإمكان وبيختصر الحديث وأيهم بيحاول يقنع خضر ينتقل ويعيش معه بنفس البيت بس خضر ما بيقبل وبعد عدة أحاديث بيطلع من عند أيهم وبيرجع لبيت عمه لأنه الهدف الأساسي من هالزيارة هو عنوان البيت فقط
🍁🍁 🍁🍁 🍁🍁
بعد مرور ١٠ أيام...
عصام قاعد بمكتبه بالشركة وعم يراجع ملفات مع خضر.. بيندق باب المكتب وبيقول عصام: تفضل
بينفتح الباب وبتدخل سمر وبتقول: الأستاذ حمزة برا وحابب يشوف حضرتك أستاذ عصام
عصام: خليه يدخل يا بنتي
سمر: حاضر
بتطلع سمر من المكتب وبيدخل حمزة.. بيسكر الباب وراه وبيقرب لعند طاولة المكتب وبيقول: صباح الخير
عصام وخضر: صباح النور
عصام: تفضل ارتاح
بيقعد حمزة ع الكنبة قبال طاولة المكتب وبيقول: جبت شوية معلومات عن أيهم وقلت بخبركن ياها
عصام: تفضل عم نسمعك
حمزة: أولاً اسمه أيهم سعيد السالم... أمه متوفية وأبوه عايش
خضر بصدمة: أبوه عايش!!!!
حمزة: اي أنا عينت حدا يراقب البيت وهو خبرني أنه أيهم عم يزور أبوه كل أحد وثلاثاء بعد الساعة ١٢ بالليل أما يوم الخميس بيكون عنده من الصبح بكير وبيرجع بوقت متأخر ع البيت
يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵