جيتك وكلي جروح وابي منك تداويني - الفصل 21 | روايتك

البارت الواحد والعشرون ــــــــــــــــــــــــــــــــــــــــ اول مافتح خالد باب المكتب ودخل انصدم من فخامة المكتب والاشياء الثمينه الي فيه من تحف اثريه والالماسه الي محطوطه بمجسم على شكل يد ناظر للمكتب يبي يشوف رئيس الشركه بس شافه معطيه ظهر الكرسي وماشاف وجهه تحمحم خالد عشان يلتفت له ويعرف انو هنا. خالد : السلام عليكم التفت رئيس الشركه رئيس الشركه : وعليكم السلام انصدم خالد من شكله واعتلت فمه ابتسامه ماكره فريسته سهله ناظر لرئيس الشركه بتامل كان رجال كبير بالسن بعمر 70 سنه او اكبر وكان شعره ابيض ووجهه كاسيه التجاعيد وظهره منحني وماسك عصاته وباين مو حمل مسؤليه رئيس الشركه : تفضل واشر على الكرسي الي امام المكتب توجه خالد لمكتب رئيس الشركه ومد يده وقال خالد : انا خالد رئيس شركة الوهم رئيس الشركه : هلا بك انا ابو ماجد رئيس شركة الوافي قعد خالد تكلم ابو ماجد ابو ماجد : وش حاب تشرب خالد : ابد طال عمرك ما ابي شي انا جايك عشان الشغل ابو ماجد : اجل ندخل بموضوعنا طلع خالد ملف شركته وقدمه لابو ماجد الي اخذه تكلم خالد خالد بمكر : انا ناوي استثمر معاك بشركتك واذا خسرت الصفقه شركتي حلالك لانو الضفقه بتكون من ربح شركتك واسهم شركتي بتنزل طقت الفكره براس ابو ماجد والطمع عمى عيونه وقال ابو ماجد بطمع : وش يثبت كلامك طلع خالد العقد من جيبه وعطاه ابو ماجد يقرءه اخذه ابو ماجد وقرء الي مكتوب فيه وعجبته الفكره حيل وفكر شوي قال ابو ماجد بنفسه : فرصه وجاتك يا ابو ماجد لاترميها وانت كبير بالسوق ورجال زي ذا مستحيل يكسبك وانت تقدر تاخذ شركته بالشغل او بالحيله ناظره خالد وهو مبتسم لانو واضح قاعد يقلب الفكره براسه قال خالد خالد : هاه يا ابو ماجد نوقع او امشي وراي شغل ابو ماجد بتسرع : لا لا راح نوقع خالد بمكر : لاتنسى ترا اذا قدرت اربح الصفقه راح اخذ شركتك ابو ماجد بثقه : مستحيل اخسر الصفقه ومن الحين اقول لك جهز اغراضك واطلع من شركتي ضحك خالد باستهزاء الظاهر هذا مايعرف منو خالد خالد بثقه مماثله لثقة ابو ماجد : موافق وانت بعد لم اغراضك من شركتي ضحك ابو ماجد باستهزاء مبطن ابو ماجد : موعدنا بعد الصفقه وقع ابو ماجد وخالد على الصفقه وبعدها وقف خالد ومد يده لابو ماجد سلم عليه بنية التعاون وبعدها طلع من المكتب وتوجه للاصنصير وطلع من الشركه اما بمكتب ابو ماجد كان ابو ماجد واقف بشباك مكتبه ويناظر لخالد الي طلع من الشركه وضحك بقوه. ابو ماجد : هههههههههههههههههههههههههههههههه بلع الطعم شال القناع الي ؏لى وجهه وتنفس بعمق كان رجال تعطيه من شكله 27 سنه وتوه ببداية عمره والقناع الي لابسه كان مكبر شكله حيل ومسوي ماسك التجاعيد بيدينه وصاير شكله حقيقي اكثر قال بضحكه : هههههههه والله وطحت وما احد سمى عليك ياخالد وراح تشوف مين........... وتحسب له الف حساب قصر الجد سلطان ـــــــــــــــــــــــــــ اشرت هيفاء للجد سلطان انو رايحه وسمح لها تروح معا انو اصر عليها تتقهوى معاه بس رفضت طلعت من المجلس وهي شوي وتنهار تتمنا توصل للجناح وما تشوف اي احد بطريقها ومن حسن حظها ماكان فيه احد بالصاله لانو الجده بغرفتها. راحت للجناح الي قاعده فيه هي وهيام دخلت وراحت غرفتها وغلقت الباب وتكت بظهرها على الباب وبكت بصمت وهي تتمنا تصرخ بصوت عالي يالله تعبت تتمنا تقدر تتكلم وتعاتب سالم وجدها الي خبو عنها سالفة الزواج وتعاتب جدها الي ناوي يطلقها من سالم بدون علمها هي تحب سالم مو بس تحبه الا تعشقه ماتنكر اعجابها فيه من البدايه لانو شافت فيه ابوها الي انحرمت منه لطيف ويحب الخير ورجال عصامي ومستحيل يتخلى عن الي يحبه وفوق هذا كله تحدا جدها عشان ياخذها وما هابه او حسب حساب انو قاعد يتحدى شيخ الكايد ويمكن يدمره او يطرده ويطلقها منه بالمحكمه هو يجهل جدها حيل بس يبقى بعينها كبير لانو من كان عمره 3 سنوات لقاه ابوها ورباه وهي كانت بعمر سنه كبرو مع بعض بس من صار عمر سالم 15 سنه ابتعد عنهم وصار كل وقته مع ابو همام وتغطت عنه وما صارت تشوفه ابد وصار السواق الي ابو همام يوثق فيه وصان الملح والعيش الي عطاه ابو همام وخاف الله فيهم وما طالع فيهم ابد وشلون تقنع قلبها يكرهه وهو الي اخذ قلبها بدون استأذان بكت اكثر تتمنا لو ابوها عايش كان عاتبته وسالته ليه ماخبرها بزواجه ضحكت بوسط دموعها من تذكرت انو ابوها ملك لهم بنفس اليوم الي مات فيه تحس عقلها ودع وماصارت تستوعب شي بكت وبكت لين نامت مكانها من التعب والارهاق جامعة الملك فهد ــــــــــــــــــــــــــ الساعه 4:00م طلعت ريفان من القاعه بعدما خلصت محاضراتها وصادفت بطريقها ام سلطان وهي طالعه وماشيه مع هيام وروان اشرت لها تجي وراحت لها ريفان ريفان : السلام عليكم ام سلطان والبنات : وعليكم السلام ام سلطان : كيف كان يومك ريفان بحماس : مره حلو ام سلطان بابتسامه : لاتتحمسي كثير مع الايام بتشوفيه متعب ريفان بابسامه : لا ما اضن لانو انا احب الدراسه وما اشوفها سيئه روان بنرفزه : انتي لو لك ثلاث سنوات بالجامعه كان كرهتيها بس بنشوف اذا بتتحمسي لها بس يصير الجد ويعطوك تكاليف قد راسك وابحاث ريفان بضحكه : هههههههه اوف اوف كل ذا حقد بقلبك على الجامعه روان : واكثر من ما تتصور قاعده هنا *واشرت على حلقها *رافضه تنبلع ام سلطان : يالله تاخرنا السواق برا طلعت ام سلطان والبنات من الجامعه وراحو السياره وبعدها حرك السواق وتوجهو لقصر الجد عشان يوصلو هيام استغربت ريفان وقالت ريفان : خالتي بيتنا اقرب وصلوني اول ام سلطان : اهلك معزومين ومو حلو تقعدي بالبيت بروحك راح تقعدي مع روان وملاك لين يرجعو من عزيمتهم سكتت ريفان وهي تحاول تقنع نفسها لانو لو فيه عزيمه اكيد ماراح يروحو الحين بس قررت تسكت وما ترد ناظرتها ام سلطان وهي متنرفزه من سلطان الي خلاها تكذب عليها عشان يخبرها انو اتفق مع ابوها ياخذها بدون عرس قصر الجد سلطان ــــــــــــــــــــــــــ طق طق صحت مفزوعه من نومها ناظرت للباب واستغربت هي ليه هني بس بعدين استوعبت انو نامت مكانها وقفت وفتحت الباب وكانت هيام ناظرتها هيام بخوف حطت يدينها على وجه هيفاء وقالت هيام : هيوف قلبو اشفيك ليه وجهك شاحب وليه بكيانه بعدت هيفاء يدينها عن وجهها ماتبي تحس بحنان احد وبعدين تنهار اشرت لهيام تطلع وتستناها برا طلعت هيام وراحت الصاله الموجوده بالجناح وقعدت على الكنبه شافت هيفاء طالعه من غرفتها وتوجهت لباب الجناح وطلعت ما استغربت تصرفها لانو اكيد راح ترجع بعد شوي دخلت هيفاء وهي حامله بين يدينها صينية الاكل بعدما سخنته لهيام عشان تتغداء ناظرتها هيام وفزت تاخذه منها وحطته على الطاوله ومسكت هيفاء من يدينها وقعدته على الكنبه اشرت لها هيفاء تاكل هيام : هيوفي توي اكلت بالجامعه ومالي نفس اكل ناظرت هيفاء لعيون هيام وشتت هيام عيونها عنها وعرفت انو تكذب اشرت لها بصرامه تاكل عرفت هيام انو مابليد حيل وقررت تاكل عشان تخلص من زن هيفاء مسكت الملعقه وقبل تاكل وجهتها لهيفاء الي رفضت تاكل واشرت لها انو اكلت مع الجد سلطان والجده بس عرفت انو تكذب حطت الملعقه بالصينيه كتفت يدينها وقالت هيام بعناد : والله ما يطب فمي الاكل الا اذا اكلتي معاي هزت هيفاء راسها بعجز من عناد اختها راحت للمطبخ التحضيري الي بالجناح جابت ملعقه ثانيه وقعدت تاكل مع هيام الي فرحت من شافتها قاعده تاكل قصر ابو سلطان ــــــــــــــــــــــــ وصلهم السواق للقصر وفتح لهم الباب ونزلت ام سلطان وريفان وروان من السياره ناظرت ريفان لقصر ابو سلطان كان كبير حيل وتصميمه ياخذ العقل شافت فيلا شكلها جميل جنب القصر بس بينهم مسافه عجبها شكل الفيلا وتصميمها من برا كان ملفت للنظر بلونها البيج تصميمها كلاسيكي حديث نادتها ام سلطان ام سلطان : ريفان يالله خجلت ريفان من فهاوتها ومشت مع ام سلطان وروان دقو جرس القصر وفتحت لها الشغاله الشغاله بابتسامه : اهلآ ماما ابتسمت لها ام سلطان ومشت داخله القصر مع ريفان الي قاعده تتامل كل زاويه بالقصر وهي مبهوره قصر ابوها فخم بس قصر ابو سلطان افخم وكان كل شي فيه بالون الذهبي وكانو قاعده ببيت ذهبي وكل شي فيه يلمع واضائته تجنن ومعطيته روقان هائل دخلت الصاله وشافت ابو سلطان قاعد مع سلطان الي قاعد على كنبه انفراديه والابتوب على رجوله استحت من سلطان بس لازم تروح وتسلم على عمها وذا واجب راحت وسلمت على ابو سلطان الي تهلل وجهه من الفرح بس شافها وقف لها وضمها بحب وفرح وقال ابو سلطان : هلا والله ببنيتي هلا بنور العين روان بغمزه : يبه لاتزيد معيار المدح ترا فيه ناس تغار واشرت على سلطان ناظرها سلطان بنص عين وخافت وقالت ضحك روان بتسليك : ههه امزح يخي اشفيك ماتتقبل المزح ترا البنت بتكنسل العرس ناظرها سلطان نظره ثانيه خلتها تقمط العافيه وتقول روان : باي انا طالعه غرفتي وراحت ركض خايفه يقوم سلطان ويتوطى ببطنها بعدت ريفان عن حضن عمها وقعدها جنبه على الكنبه ابو سلطان : شيلي غطاك يبه مافيه احد غريب سلمان بالشركه وخالد نايم فتحت ريفان الغطاء عن وجهها وتركت الشيله بعدما ضبطتها ناظرها سلطان بدون ماتشوفه وكانت زي القمر بيوم اكتماله الشيله سوداء مثل الليل ووجهها ابيض مثل القمر سلطان : ريفان ممكن اتكلم معاك ريفان بخجل : طيب وقف سلطان : تعالي الحديقه ام سلطان : خل تتغداء اول وبعدين احكو بالي ودكم فيه ريفان بحياء : تسلمي ياخاله تو اكلت بالجامعه ومالي نفس ناظر سلطان لامه وغمز لها بدون ماتشوفه ريفان وقال سلطان : يمه ماراح نطول وانتي خبري الشغاله تسخن الاكل لين نرجع ام سلطان بابتسامه : ابشر طلع سلطان وريفان من القصر وراحو للجلسه الي بالحديقه وكانت قريبه من الفيلا راحو وقعدو على الكراسي الموجوده ريفان : سم سلطان : سم الله عدوك ناظرته ريفان يتكلم سلطان : ريفان انتي تدري انو عمي ابو همام توه ميت وما نقدر نسوي عرس زي الناس ريفان بهدوء : ادري وترا ما افكر اسوي عرس واغاني ابد لانو احترامآ لعمي ولاولاده الي تو ماطابت جروحهم من الفراق لاح طيف ابتسامه على فم سلطان وبسرعه اخفاها ريفان سهلت عليه الكلام سلطان : انا اليوم رحت لعمي ابو راكان وسولفت معاه بالموضوع ذا وما عارض وانا قررت اخذك اليوم تعيشين معاي بدون زواج لانو مانقدر نسوي حفله وماصار لعمي اسبوع من توفى وقفت ريفان وقالت بصدمه : وشو قصدك اقعد معاك من اليوم سلطان بروقان : ايوا وترا جبت كل اغراضك *واشر على الفيلا *وهذي هي الفيلا الي راح نعيش فيها ريفان بعدم استيعاب : مستحيل سلطان برفع حاجب : وش الي مستحيل ترا انتي زوجتي على كتاب الله وسنة رسوله ومو خاطفك او ماخذك بالحرام امتلت عيون ريفان بالدموع : مستحيل انا للحين ماعرفتك زين وما ابي ابتدي حياه بمشاكل وتناقضات غريبه سلطان باستغراب : اي مشاكل الي تحكي عنها وبعدين لو صار وصارت مشاكل كل بيت وفيه مشاكله ريفان برفض : مستحيل انا ما ابيك ابي ارجع البيت تكفى رجعني انا كنت شاكه انو مافيه عزيمه وخالتي بس قاعده تالف سالفه عشان اجي القصر وتاخذني انت سلطان : انا الي خبرت امي وامي مالها دخل وياليت تتقبلي الشغله لانو مستحيل تطلعي من القصر هذا طاحت دموع ريفان : اشلون تخلى عني بالسهوله ذي اشلون هنت عليه كل ماله يطيح من عيني اكثر سلطان باستغراب : مين ريفان ببكى : ابوي اشلون هنت عليه يخليني على عماي لين انت تاخذني بدون مايكون لي علم سلطان بنرفزه من بكاها : بسك بكى ترا مو نهاية العالم زوج واخذ زوجته ليه خايفه قمطت ريفان العافيه وسكتت ودموعها تطيح ناظرها سلطان وتنهد : ريفان ياليت ماتبكي كل شوي على اشياء تافهه لانو انا مو فاضي اراضي احد ريفان ببكى : طيب ليه مانعيش مع اهلك بالقصر سلطان بغيره : وسلمان وخالد ريفان باستغراب : اشفيهم ترا بكون بحجابي الكامل تخيل سلطان مجرد تخيل انو سلمان يشوف ريفان بالصدفه بدون حجاب او يشوف شعرها الي سحره او عيونها وحس بالدم فار بعروقه وقال سلطان بعصبيه : ريفان انا ماسك نفسي عليك بالعافيه راح تعيشي معاي بالفيلا شئتي او ابيتي وبلا كثرت كلام ويالله نروح الفيلا وامي جايبه الغداء الحين بكت ريفان وهي خايفه منه ريفان ببكى : ما ابي شي مشى سلطان للفيلا وهو متنرفز منها وقلبه يتقطع عليها مايبي يخوفها منه بس هي الي ماتفهم الكلام مشت ريفان وراه وهي تبكي دخلو الفيلا ووراها الاماكن وهي ماشيه وراه ومو طايقته وتتمنا لو تقتله وترتاح منه وداها لجناحهم وبعدها راح مكتبه اما ريفان حست بالتعب وبس شافت السرير قدامها طاحت عليه بدون ماتغير ملابسها ونامت دخل سلطان المكتب وقعد يراجع بعض القضاياء ومنها قضية مهند الي قدرت الشغاله تغير شنطتها مع احد المسافرين بدون علمه وقدرت تهرب المخدرات قعد يربط خيوط القضيه ببعض ويحلله ووصل لحل بس خطر على حياته قعد يشتغل لين حس بتعب وعيونه بدا يغزيها النعاس ناظر لساعته وشافها 5:40 م تذكر انو ريفان ما اكلت للحين راح لها بيشوف ليه ما اكلت بس قرر ياخذ شور اول وبعدين يصحيها راح لدورة المياه الي بالجناح اخذ شور سريع يصحصحه وكان لاف الفوطه حول خصره وصدره عاري راح للغرفه وشاف ريفان نايمه على السرير بدون غطاء وعبايتها للحين عليها وشعرها طايح جنبها ناظر السرير وهو يتمنا ينام قرر يروح يغطي ريفان وبعدها يغير وينام راح وغطاها قرر يلمس شعرها الي ياما تمنا يلمسه. شم ريحته الحلوه وحس بخدر من شعرها الفتان وبدون مايحس رما نفسه جنبها ونام وشعرها عند انفه يشمه اليوم التالي الساعه 4:03 ص صحيت ريفان وناظرت الساعه وانصدمت تذكرت انو ماصلت المغرب والعشاء استغفرت الله وبسرعه نزلت من السرير ماتبي تتاخر على الصلاه بس ريفان : ايييي التفت وهي متاللمه تشوف شعرها بوش عالق شافت سلطان نايم عليه ولمن وقفت بسرعه شدته وتاللمت صرخت من ثاني ريفان : اءءءءءء صحي سلطان مفزوع وقعد يسمي بالرحمنٰ ناظر ريفان الي خايفه منه سلطان بنرفزه : اشفيك تصارخين ريفان ببكى : وش سويت سلطان باستغراب : وش سويت ريفان ببكى : انت ليه نايم هني وليه بدون تيشيرت وليه نايم جنبي ليه تستغلني ناظرها سلطان وباس يده وجه وقفاء وقال سلطان : الحمد لله على نعمة العقل الحين انا لو استغليتك بتكوني بعدك بملابسك اكيد ب.......... وماراح يبقى عليك..... فلا تصيري غبيه وفكري بعقل *وبغمزه *وبعدين لو سويت شي حلالي وماراح اسوي شي يغضب الله انصدمة ريفان من جرائته وحست خدودها ولعت من الخجل ريفان بخجل وبكى : انت حيوان رفع سلطان حاجبه : مين الحيوان تذكرت ريفان لمن قالت له انو مو رجال وتزوجها بطرق خشوم خافت يتهور ويسوي الاعظم بعد كلمتها قالت ريفان بتسرع : انا الحيوانه امزح معاك اشفيك ماتقبل المزح سلطان باستهزاء : اشوى حسبت مسحت ريفان دموعها وهي خجلانه من شكل سلطان وهو عاري وعظلاته بارزين ريفان باحراج : انا رايحه اصلي الي طافني انت بعد روح ترا بياذن بعد شوي سلطان بهدوء : طيب راحت ريفان لدورة المياه توضت وبعدها طلعت وقعدت تدور وين مكان السجاده دخلت غرفة التبديل وشافتها محطوطه جنب الدولاب مع شرشف الصلاه والمصحف فرشت السجاده واخذت شرشف الصلاه وتوجهت للقبله كبرت وصلت ركعتين وبعدها صارت تصلي الي طافتها قبل صلات الفجر لانو توه ما اذن الفجر طلع سلطان من دورة المياه الثانيه ودخل الجناح شاف ريفان قاعده تصلي بخشوع وتاني راح لغرفة التبديل فتح الدولاب و اخذ له ملابس لبسهم وطلع من غرفة التبديل وراح ل التسريحه مشط شعره واخذ عطره وتعطر واخذ دهن العود حط شوي بكفه ومسح لحيته ناظر لريفان يشوفها اذا خلصت او لا شافها سلمت سلطان : انا رايح المسجد لاتخافي انتي مو بلحالك الشغاله تحت والحرس برات القصر يعني ماتخافي ناظرت ريفان وفهت من وسامته بثوبه الابيض شعره الي مرتب وطايحه خصلات من نعومته وشماغه الي على كتفه وريحة عطره الي ملت المكان اشر لها سلطان : تسمعيني ريفان بفهاوه : هاه ايوا ايوا لا ماراح اخاف ابتسم سلطان ابتسامه طفيفه على فهاوتها وراح اما ريفان تنهدت تنهيده عميقه سلطان يرعبه بقسوته ويرققها بوسامته عجزت تفهم تناقضه العجيب وقفت كملت صلاتها فيلا خلف ـــــــــــــــ الساعه 6:05 ص صحي وناظر وله جنبه بس ماشافها استغرب وين رايحه من الصباح استغفر الله من الافكار الي ابتدت تهاجمه فكر يمكن راحت لحبيبها زي امه او يمكن قاعده تغوي الحارس او يمكن قاعده تكلم حبيبها قعد يصارع عقله بسبب الافكار الي راودته قطع صراعاته الداخليه صوت باب الغرفه وهو ينفتح ودخلت وله وهي شايله الفطور وعلى فمها اجمل ابتسامه للحضه سب خلف نفسه على تفكيره قالها سلطان وله غير ولازم يعطي قلبه فرصه بس عقله ماترك له مجال للفرص لانو قاعد يالف قصص بس تغيب عنه لحظات تقدمت وله وحطت الفطور على الكمدينه وقالت بابتسامه وله باتسامه : صباح الخير الحمد لله صحيت عشان تاكل الفطور وهو ساخن توي جايه اصحيك ناظرها خلف وشاف البرائه بعيونها سب نفسه الف مره على تفكيره وقال خلف بحب : وله تدري انو انا غبي وله باستغراب : ليه خلف بحب : عشان ماتعرفت عليك من قبل ابتسمت وله بخجل وتوردت خدودها اما خلف ذاب من خجلها وقال خلف : وله تعالي نفطر بالصاله اخاف اهون من الفطور واكلك انتي وله بخوف من انو يتهور ويسوي شي فزت بسرعه واخذت الفطور وتوجهت ل صالة الجناح وله : استعجل الفطور راح يبرد ضحك خلف على خوفها وابتسم بحب كل يوم قاعده تثبت له انو عكس امه وامه ماتسوى مواطين رجولها فيلا خالد ــــــــــــــ صحي خالد على صوت رساله من تلفونه ناظر تلفونه بعيون شبه مفتوحه وشاف المرسل كانت الحب سلوى الي كانت مرسله كلام حب وغزل وانو تبي تشوفه بالمطعم الساعه 9:00 يفطرو مع بعض ناظر الساعه الي جنب السرير كانت الساعه 7:00 حس انو جات له العزيمه ذي من السماء لانو يبي يتمسكن على سلوى وتعطيه كم ريال لانو مفهمها انو فقير والغبيه مصدقته و قاعده تعطيه لانو تحبه وناظر ام همام الي نايمه بحضنه بعدها عنه وقام بتسحب اخذ ملابسه لبسهم وطلع من الفيلا وراح لشركه يشتغل شوي لوقت الفطور وبعدها يروح لسلوى اما ام همام صحيت بعد شوي واستغربت انو مو موجود بس طنشت لانو مو اول مره يروح ويتركها وهي نايمه حست بتعب وحست بمعدتها تلعي وكانو راح تستفرغ بسرعه اخذت الروب الي جنبها لفته حول جسمها و راحت لدورة المياه وقعدت تستفرغ لين ماحست روحها بتطلع من كثر الاستفراغ ناظرت نفسها بالمرايه وكانت ملامحها شاحبه والهالات حول عيونها وتحس بالالم راح يقطع بطنها هي متاكده مليون بالمين انو ذي مو اعراض حمل لانو الالم الي تحسه لايطاق او خمنت انو حامل بس لانو كبرت بالسن وحملت بعد 15 سنه صارت تعبانه بسببه طلعت من دورة المياه ورجعت لسرير اخذت الحاف وتلحفت وهي تحس ببرد فضيع قعدت ترجف من البرد وهي تتخيل ابو همام ولمن دفته وحست بالندم بس بعدين قالت بنفسها يستاهل قعدت تفكر وهي ترتجف من البرد لين مانامت ** وما معاها احد بوحدتها وصارت وحيده بعدما الكل كان حولها وانا من عندي اقول تستاهل** قصر ابو سلطان ــــــــــــــــــــــــ صحيت ام سلطان وصحت البنات والاولاد الي رايح الشغل والي رايح الجامعه والي رايح المدرسه وراحت تشوف الشغاله اذا سوت الفطور وبعدها اخذت عباتها ونقابها وراحت فيلا سلطان طقت الجرس وفتحت لها الشغاله شافت سلطان قاعد بالصاله وريفان نازله من الدرج ولابسه عبايتها وشايله شنطتها ونقابها بيدها ام سلطان : سلطان ريفان يالله امشو قدامي بدون اي اعتراض الفطور جاهز ومافيه احد راح يروح دومه بدون فطور ريفان بمعارضه : بس ياخالتي انا حتاخر على محاضرتي وما ابي افطر الحين سلطان بهدوء : يمه خذيها من شوشتها ترا ما اكلت شي من امس ام سلطان بعتب : افا ياريفان هذا وانا متعنيه امس وجايبه لك الغداء وما اكلتيه ريفان بتبرير : كنت تعبانه من الجامعه وما اشوف الا الفراش وبدون ما احس نمت ام سلطان بصرامه : امشي قدامي اشوف وما ابي اسمع اي تبرير ثاني سلطان : انا ماشي بسلم على ابوي ورايح لدوامي وراح افطر مع خوياي ام سلطان بصرامه : تعصي كلامي ياروح ابوك سلطان بهدوء : ماعاش من يعصي كلامك بس ترا بتاخر يمه ام سلطان بحنان : لو تاخرت ساعه مايضر عجز سلطان يرد لها طلب ذي جنته ودنياه سلطان : طيب انا راح اسبقكم ام سلطان : تمام وقف سلطان الي كان طالع وسأل امه سلطان بغيره : يمه وين سلمان وخالد ام سلطان باستغراب : سلمان راح من الفجر لشغله وخالد اليوم ويكند ورفض يصحى ابتسم سلطان باريحيه بعدما تطمن انو اخوانه ماراح يشوفو ريفان ماخفيت ابتسامته على امه الي حست انو غيران على ريفان وابتسمت بفرحه لانو دام غيران عليها اكيد بقلبه مشاعر مشى سلطان وام سلطان اخذت ريفان من يدها وريفان مشت معاها بقلة حيله بعدما زينت نقابها وراحو لقصر ابو سلطان فطرو وبعدها ام سلطان والبنات راحو الجامعه وملاك راحت مع السواق تشوف غاده وراحو المدرسه وسلطان راح للقسم وابو سلطان راح الشركه جامعة الملك فهد ــــــــــــــــــــــــــ دخلو الجامعه بالسياره نزلت هيام وروان وريفان وبعدهم ام سلطان مشو وكانت ام سلطان ماشيه قدامهم بنفس اللحظه الي دخل فيها عناد بسيارته المبرجيني بسرعه وكان راح يصدم ام سلطان لولا يدين ريفان الي شدتها بسرعه قبل يصدمها وهي خايفه ومرعوبه عليها ريفان بخوف : خالتي انتي بخير حست ام سلطان بخوف ريفان عليها وحبت تطمنها ام سلطان بنظرات مطمنه : لا تخافي انا بخير ارتعبت ريفان من الموقف وتذكرت حادث امها وتحس بغضب وضيق ماتبي تفقد احد ناظرت لسيارة عناد الي وقفت بعيد عنهم شوي والشرار يتطاير من عيونها مشت متوجهه لها بس يدين ام سلطان وقفتها ام سلطان : ريفان يمه خلك منه طيش عيال بعدت ريفان يدين ام سلطان عندها بهدوء ومشت متجاهله ندائت ام سلطان والبنات وكانو مسلوبه الاراده وعيونها معميه من الغضب راحت لسياره وشافت عناد طالع منها وهو مبتسم ولا كانو كان راح يقتل نفس بغير حق ريفان بغضب : اعمى انت ما تشوف كنت راح تقتلها بسبب تهورك التفت عناد للبنت الي قاعده تتكلم وفهي من جمال عيونها قعد سرحان فيها وكانو اخذته عيونها لعالم اخر وما يشوف غير عيونها وما يسمع غير نسيم الهوء العزفي ابتسم من دون مايحس وهذا الي استفز ريفان اكثر رفعت يدها بقوها ووو هببب سطرته كف محترم صحاه من فهاوته ناظرها عناد بغضب وتوجه لها وهو ناوي يقتلها (( وصلنا لنهاية البارت )) //توقعاتكم // تتوقعو مين يكون ابو ماجد ؟ وليه مخبي وجهه عن خالد؟ تتوقعو ام همام حامل او مريضه ؟ عناد وش راح يسوي بريفان بعد الكف الي عطته ياه ؟ شاركوني توقعاتكم الحلوه يحلوين .