الفصل العاشر
بعد موافقة عادل (اللي كان هيموت من الضحك إنه أخيراً لقى حد "يلم" بنته)،
بدأت تجهيزات الخطوبة. طبعاً جنان كانت عايزة تعمل حفلة في "ديسكو" وتلبس فستان فسفوري، بس صقر وقف لها بالمرصاد.
صقر (بكل هدوء وبرود عسكري): "يا جنان، قولتلك مية مرة، الخطوبة هتكون في البيت، عائلية، وبدون 'دي جي' يزعج الجيران.. إحنا ناس بنخاف ربنا ومقامنا ليه هيبته."
جنان (وهي بتنفخ): "يا صقر يا حبيبي، دي خطوبة مش طابور عرض! عايزة أفرح، عايزة أرقص
'عشرة بلدي'!"
صقر (رفع حاجبه): "ترقصي إيه؟ استغفري الله العظيم.. الرقص ده في البيت لما نبقى لوحدنا، إنما قدام الناس.. مفيش غير 'الأناشيد' والهدوء، فاهمة؟"
.......
يوم الخطوبة، صقر جه وهو لابس بدلة رسمية سوداء وشكله كان "يخطف القلب"، وكان شايل علبة القطيفة اللي فيها الشبكة.
جنان كانت طالعة زي القمر بفستان رقيق (صقر هو اللي اختار طوله ووسع كمامه طبعاً).
جنان بخبث: "وريني كده يا صقر.. جبت لي إيه؟ أكيد طقم ألماس يليق بالملازم جنان؟"
صقر فتح العلبة بوقار: "دي شبكة تليق بيكي وبشخصيتك."
جنان بصت في العلبة وبرقت عينيها: "إيه ده يا صقر؟ دي 'ساعة غوص' وجهاز لاسلكي مطلي بالذهب؟ إنت بتهزر؟ دي شبكة دي ولا معدات مداهمة؟"
صقر (بابتسامة واثقة): "عشان لما تطلعي تهببي حاجة وتتخطف كالعادة، تعرفي توصلي لي باللاسلكي.. دي أغلى من الألماس يا جنان، دي 'الأمان'!"
جيهان (صاحبتها) كانت واقفة وراها ميتة من الضحك وهمست لها: "أحسن من طقم السنان اللي جيبتيهولي يا فوزية!"
.........
بعد أسبوع من الخطوبة، صقر عزم أهله وأهلي جنان على "عشاء رسمي" في بيتهم، وأصر إن جنان هي اللي تطبخ عشان يختبر "ست البيت" اللي جواها.
جنان في المطبخ (بتكلم نفسها): "ماشي يا صقر.. عايز محشي ومكرونة بالبشاميل؟ أنا هعمل لك أكلة 'تاريخية' مش هتنساها العمر كله."
جنان قررت تحط "تاتش" الملازم بتاعها، وبدل ما تحط فلفل أسود عادي، راحت جابت "شطة سودانية" من اللي بتخلي الواحد يشوف النجوم في عز الظهر، وحطتها في كل الأكل.
على السفرة، صقر بدأ ياكل بوقار.. وفجأة، وشه بقى لونه أحمر زي الطماطم، وبدأ يعرق بغزارة.
والد صقر (وهو بيشرب مية ورا مية): "يا بنتي.. إيه ده؟ ده مش أكل، دي قنبلة مسيلة للدموع!"
صقر بص لجنان ولقاها قاعدة بتاكل "برود عسكري" ولا كأن في حاجة (لأنها أصلاً مأكلتش من اللي شطشته).
صقر (وهو بيلهث): "الله... الله يبارك فيكي يا ريم.. قصدي يا جنان.. الأكل فيه 'طاقة' مش طبيعية."
جنان ببرود: "بالهنا والشفا يا قبطان، دي عشان تفضل فايق للمهمات الصعبة."
........
بعد ما الناس مشيت، صقر وقف مع جنان في الشرفة. كان لسه بيمسح عرقه من الشطة، بس كان بيضحك.
صقر: "إنتي فاكرة إن الشطة دي هتخليني أغير رأيي؟ بالعكس، أنا كدا اتأكدت إني اخترت 'المقاتلة' الصح."
جنان (سكتت وبصت للأرض بكسوف): "صقر.. إنت ليه وافقت تتجوزني بجد؟ أنا متعبة ومجنونة وإنت ملتزم وجدي زيادة عن اللزوم."
صقر قرب منها وبص في عينيها بحنية كبيرة: "لأن الالتزام مش معناه إني أكون 'روبوت'.. أنا قلبي كان محتاج لشوية 'جنان' عشان يدق تاني.. وإنتي يا جنان، دخلتي حياتي زي الرصاصة، غيرتِ المسار كله.لاكن اقسم بالله ، أول ما نتجوز، مفيش مطبخ.. إحنا هناكل 'دليفري' طول العمر عشان صحتي وصحة العيال!"
جنان ضحكت من قلبها وقالت: "اتفقنا.. بس اللاسلكي اللي في الشبكة ده، أنا هستخدمه عشان أطلب منك 'بيتزا' وإنت في المأمورية!"
(رأيكم بقى 😂)