الفصل 42
"تشابتر ثنين وأربعين "
أستمعي للرجل جيدا من باب الذوق ..
أما من باب الإحتياط ؟!
فلا تصدقي كل ما يقوله لك
• جنون المطر
بعـد ليلة عصيبة متعبة .. صحـى بكسل على صوت المنبه , تافف بقرف .. هو متى نام عشان يصحى اللحين ؟! استقعد بجلسته وفور حركته رجع الجرح ينغزه عقد حواجبه بضيق وهو ينطق بقرف : الله ياخذك وجع !
فتـح جدوله يحـاول يراوغ اشغاله .. لكن مستحيل اليوم بالذات حضوره مهم , مثل كل يوم ..
دخل الشـاور بصعوبة بالغة قدر يخلص حمـامه .. وقف قدام المراية وشكل جرحه زايد قبح قبح اكسبه قناعه انه لازم يزور المستشفىغير وجهه اللي يحس كبر عشر سنوات من الهلاك اللي شافه أمس , لبس ثوبه وتراجع عن العطـر هالمرة ... أي ذرة عطر بتزيد الوضع سوء بس ..
توجه لطاولته ياخذ اغراضه المهمه المرمية فوقها ... انتبه للشـال الأورانج بالكنب , فجأة استوعب .. امس ؟ صـح امس ...
حدق في الشال لفترة .. ثم سحب اغراضه ودخلها جيبه وهو ينـزل وكأنه يأجل التفكير .. أو يمكن يلغيه ؟!
صبـاح اليوم نشيط عكس العـادة ... أسماء : محـــد طلب رايك يالفصعه !
أنس وهو يفطر : والله المصخرة ... " التفت لامه " بالله يمه هذي كيف صارت اختنا ؟! شكلنا خلصنا العقل عليها
اسماء شهقت : حسبي الله على بليسك ... " التفتت لفراس اللي تو نزل " صباح الخير ! ولو سمحت انا امنعك من أنس التطبع اللي جالس يصير مو طبيعي
فراس ماله خلقها .. تجاهلها وهو يسحب كاس قهوتـه : .....
انس : هاهاها سفهك ! روحي اوقفي بدال المزهرية بالله
فراس رفع عينه لأنس ونطق بحدة : أنـــس !
ام فراس طلعت من المطبخ وبيدها صحن فاكهة : صح النوم يمه
فراس : صح بدنك
ام فراس : انتو خلوا منكم الهواش بسرعة السواق ينتظركم ! اخلصوا افطروا
اسماء : انا مالي دخل .. بيجيني بدر يوديني مع ميهاف انتو يالبزارين اخلصوا
ام فراس : وليش تخلينه يتعنى عشانك ! كان رحتي مع السواق وبس
اسماء : اذا ماتعنى عشاني يتعنى عشان مين بالله ؟!
ام فراس : ياسمين لاتنسين الورقة ..
ياسمين طلعت ورقة وهي تتوجه لكرسي فراس ..وتحطها جمبه : وقعها ..
فراس : شهذي ؟
ام فراس : بداية السنة عشان تستلم مقررها
فراس وقع على السريع وهو يكمل كاسه ... ام فراس ضيقت عيونها فيه واضح وجهه شاحب وغريبة يكون فيه نقار بين اخوانه الصغار ومايهجدهم : فراس ؟! يمه فيك شي ؟
فراس وهو يحتسي فنجاله : شوي صداع بس
ام فراس : بسم الله عليك .. فيه صداع ارتاح اليوم مو لازم تداوم
فراس دون نفس : ومن بيخلص الشغل ؟ خيـالي ؟
ام فراس : وهالشغل مايتأجل ؟
فراس : لا مايتأجل .. انا اللي أتاجل
ام فراس عقدت حواجبها من نبرته .. مره ماله خلق واضح , وقف وهو يطـلع مباشرة .
***
زفرت إبتسام بضيق من شكل معجون الأسنان مرمي على المغسلة دون غطا .. رجعته مكانه وهي تطلع لنايف بغرفة النوم جالس بكسل على اللابتوب : نايف ! كم مرة اقولك لاتترك المعجون كذا ؟! اموت انا ؟
نايف : بس معجون ترا .. لايطق لك عرق
إبتسام : بس معجون ؟! وملابسك المرمية ... من بيصدق اني تو رتبت الغرفة قبل ساعتين ! جيت بخمس دقايق وعدمت المكان
نايف هز راسه بتبلد وهو يكمل شغله .. هزت ابتسام راسها بيأس وهي ترجع ترتب , اثناء ماهي تشيل بنطلونه انتبهت لجواله داخله : ناسي جوالك ببنطالك ! لو دخلته الغساله وش بتسوي ؟
نايف ببرود : بشتري جديد
إبتسام قبل تجيب جواله لعنده انتبهت ل 24 مكالمة فائته من نهى .. نطقت بضيق : وش كل هالمكالمات ؟!
نايف : ما أدري ولا ابي ادري
ابتسام : حتى لو ضروري شنو 24 مكالمة ؟!
نايف رفع عيونه لها وابتسم : تغارين ؟!
ابتسام حطت جواله على الطاولة : لا عادي .. بس انا اقول رد وخلصنا احسن
نايف : افا مفروض تمنعيني اكلمها ! وش هالجفاف رد وخلصنا !
إبتسام : ليش امنعك ؟ حط ببالك اني مستحيل امنعك انك تكلم غيري او حتى تتعرف وتحب غيري .. لأنك لو تحبني صدق كان بتمنع نفسك دون أقولك
نايف ضيق عيونه : يعني هذا معناه لاتكلمها بس بطريقتك الملتويه ؟
إبتسام : ...... هذا معناه عقلك براسك وتعرف خلاصك !
سحبت سلة الغسيل وهي تطـلع .. نايف عقد حواجبه مافهم شي , اساسا صاير مزاجها هاليومين مقفل .. من رجعوا من المزرعة , بس نفسية الحوامل مايتعبث معها .. عنده خبره قبل كذا ,
***
هيـــثم : لا اترك هالوقت لإجازة الربيع أحسن لك
مؤيد : وانا وش مستفيد منها ؟ اخذها رسمية احسن
هيثم : تستفيد كثير .. وقتها مره كويس غير انها طويلة لانك تقدر تمسكها مع اجازة رسمية
مؤيد : بس بخسر الإحتياطي حقي
هيثم : والله اللي يعرس يتحمل !
مؤيد تنهد : ظنك يعني .؟!
هيثم : ايه صدقني ماحتندم .. لانك لو تروح موسم سياحة راح تكون الأسعار ضاربه غير الزحمة والقرف هالوقت ركادة لك
مؤيد : خلاص على قولتك .. وين ظنك اسافر ؟
هيثم دون تفكير : استراليا .. سدني على طول !
مؤيد : يمه مسرع جاوبت ! ليش ؟
هيثم : جوها خفيف وحـلو .. مو جو مدينة يمرض ولا عاد مقطعة , وسط يعني
مؤيد : رحت لها من قبل ؟
هيثم : لا .. بس درست مع ناس من هناك كلامهم مره يطمن غير انهم شعب كويس
مؤيد تنهد : مو مصدق بتزوج .. لو ومو بس كذا باخذ اللي تمنيتها من زمان راح اكون لها اللي تبي بكون صديقها وقت حزنها .. حبيبها وقت حاجتها واخوها وابوها واللي تبي ..
هيثم : انا اقول خلك بنكها تختصر كل وجع الراس هذا بشيء واحد !
مؤيد : فداها والله اصير بنك .. بس ابوي الظاهر ناوي يتركني ادفع نص المهر يعني ابي اصير بنك بجد
هيثم : انا اقول احسن لك تدفعه كله .. خلك مكتفي بنفسك من اللحين قدامك مسؤولية
مؤيد : ايه لان قدامي مسؤولية ابي اوفر !
هيثم : والله انا لو يجوني عيال ماراح ادفع القرش .. انا ادفع وهو ينبسط خله يسنع نفسه
مؤيد : جعلني مب ولدك بس !
هيثم : آمين
مؤيد : مفروض الممرضات والعالم اللي طايرين فيك يعرفون جانبك المجرم هذا عشان يحرمون يعجبون بك بعد !
هيثم : لا تخاف اول معجبه عرفت هالجانب وماشفت الا غبرتها
مؤيد : اول معجبة ؟!
هيثم وهو منوجع من طريقتها في الإنعتاق منه : ..... المهم زواجك متى ؟
مؤيد : لا لا تعال من اول معجبة ؟! اللي تزورك كل شوي ؟
هيثم : يالقفك ! " وقف " قوم بس تاخرنا
مؤيد وهو يلحقه : وين رايح ابعرف يعني ابعرف
هيثم : اقول فك عني .. بدال ماتنشب لي اشكرني راح البريك حقي كله اخطط عنك
مؤيد : شكرا مع خالص احتقاري !
هيثم وهو يكمل طريقه : عفوا مع خالص حقراني
مؤيد وهو يخز ممرضة : يالبيه ياغمازاتها .. شي يقتل ان شاء الله زوجة المستقبل فيها غمازات
هيثم انقهر بجد : كف عيـونك ! استح على وجهك فيه وحده بذمتك
مؤيد : يمه وش قلت ؟! بس ادعي ان فيها غمازات
هيثم : تدعي عليها بتشوه في عضلات الوجه ؟! هذا وأنت دكتور
مؤيد : علامة جمال ياغشيم !
هيثم : طبيا هي تشوه .. ماتقدر تنكر
مؤيد : إلا اقدر انكر ! طبيا يسوون عمليات تجميل عشان الغمازة
هيثم : طبيا يشوهون عضلة الوجه عشان الغمازة
مؤيد : رب ضارة نافعة يخي
هيثم بتسليك : خلاص زين خذ معك دريل اخرق خدها اول ماتشوفها , اوك ؟
مؤيد : ههههههههههههههههههههه تخيل بس
قابلوا دكتور بطريقهم : ههههه جالس تودع العريس قبل يروح
هيثم : شدعوة بيروح المريخ؟ كلها شهر وراجع
مؤيد : بتفقدني وقت اغيب ؟!
هيثم : لا .. بغيب وقت تغيب , باخذ اجازة
الدكتور : صدق ؟!
هيثم : ايه .. مقدمها قبل كم يوم ووافق عليها الرئيس .. هالكم يوم اخلص معاملاتي وباجز
مؤيد : ليش طيب ؟! فيه شي ؟
هيثم : بوسع محيطي شوي .. يمكن القى نفسي بمكان ثاني واشتغل فيه
مؤيد : لا عاد !
هيثم : ماتدري وش الدنيا مخبية لك ..
***
فـراس /
لؤي تنهد : اليـوم وانا امشي بالشركة جالس احس بشوشرة .. شكل العالم بدوا صدق يستغربون وضعي
فراس وهو يكمل شغله : وليش تتضايق ؟ رصيد شهرة ببلاش .
لؤي : لاتقول كذا .. امي اليوم تقول حتى اهلنا عمتي وخالاتي صاروا يسألونها ..
فراس منغمس بشغله : ................
لؤي : اللي يقهر كلهم يشكون فيني .. بجد احيان مواقف صغيرة تبين لك انت شنو بالنسبة للي حولك ! يحسسوني اني مقصر بحقهم بجد ..
فراس وهو يزيح الملف ويسحب الملف اللي بعده بعجل : ماقصرت بحق احد .. بس الحيوان حيوان فلا تفكر كثير
لؤي : أبوي له يومين مطنشني مدري شالسالفة كانه نسى الموضوع ..
فراس : او يمكن جالس يرسم نهاية للموضوع
لؤي طالع فراس : ............. كيف يعني ؟
فراس رفع عيونه له .. وهز كتوفه بخفه : انت ابخص
لؤي تنهد بضيق : احيان افكر اني جالس اظلمها بكل هالظروف ... عشان واحد مايستاهل واناني مثلي
فراس : تحسب انك متواضع وانت تقول هالحكي ؟! لا انت جالس تدمر نفسك وشخصيتك ذاتيا عشان وحده ماتستاهل وانانية مثلها !عز نفسك شوي يرحم والديك
لؤي : ياليل ! يخي انت ليش مو متفهم كذا ! بحقها البنت تزعل وقت اسحب عليها ... بس انا مو قارفني الا حكي هالناس حتى اللي خادمهم طول عمري يتكلمون
فراس : عندك عيـون ؟!
لؤي كبس بعيونه : ايه عندي .. ليه ؟
فراس : اجل تشوف الناس باذنك ليه ؟! دامهم قدام عينك ساكتين وقتها مايهمك وش يقولون من وراك .. هذا اذا قالوا من الإساس .. يمكن امك تبي تحسسك بس انك لازم تغير وضعك , وانا بصراحة ماسمعت شي
لؤي : تتوقع .؟! " تنهد " الا اقول شخبارك انت والمدام المصونة ؟
فراس : مطول انت هنا ؟!
لؤي : ما اعجبتك جلستي
فراس : مشغـول .. وانت واضح جاي تسولف
لؤي : لا يخي والله ماعندي سوالف حتى بس شاسوي احب احكي معك! وبعدين مافكرت تطردني الا يوم جبت طاريها !
فراس : لا من أول جالس اقول هالسالفة بيخلص بس واضح انك راعي طويلة
لؤي : ايييه حال الدنيا اللي يبون بعض متعذبين ! واللي كارهين بعض حاصلهم القرب.. نيالك يخي
فراس بنص عين : مغصتني بهالحكي ترا .. اخلص بجد اطلع
لؤي : لاحظ اني صديقك الوحيد ترا .. وتطردني ؟! صدق المفرط بتجلس لحالك طول عمرك ترا
فراس : ابد .. يقولك قلل ناسك يرتاح راسك
لؤي : اقول انا باخذ باقي كرامتي واذلف .. اشوفك بعدين يالئيم
فراس : على خير .
مجرد مـاطلع ... سكر فراس الملف وهو يوقف ويستعد يطلع قابله قبل يطلع رئيس الفرع الداخلي : طالع طال عمرك ؟
فراس : هاه وليد شبغيت ؟
وليد : لا بس .. فيه المشرف موجود ويبغى الأسعار اللي طلبها
فراس زفر : موجود اللحين ؟
وليد : ايه نعم ..
فراس كان حاس انها ماراح تزبط له : دخله غرفة الاجتماعات .. دقيقة وأكون عنده
***
غـادة تنهد بزهق من نفسها : خلاص تو شفته قبل يروح الدوام من الشباك ! وشكله مافيه شي .. " لانت لمحتها " بس شكله امس كان بالحيل تعبان ..
مسكت جوالها تدق على ابتسام تشغل نفسها .: هلا غدو
غادة : هلا بالقاطعة ! عارفة انك ماصدقتي انتي ونويف انقلع من وجيهكم ! بس شوي اهتمام يخي مره وحده نسوني مايسألون ولا شي
ابتسام : هاو شوي شوي علي كليتيني تو رادة !
غادة : هههههههه كيفك .؟
ابتسام :ههههه تمام ... مايحتاج اسالك كيفك من صوتك واضح معنوياتك كويسة
غادة : تقدري تقولي
ابتسام : لا مستحيل .. الله يتم لك لاتنضلين نفسك
غادة : تخيلي امس سويت شعر اسوم يفوتك شكله مره جمميل , جاني قهر ابي اقص شعري !
ابتسام : اوك قصيه
غادة : بس حرام شعري تعبت لين صار طويل !
ابتسام : معناها خليه
غادة : بس اسوم تقول القصير بيجي حلو عليك
إبتسام : اجل قصيه
غادة : بس القصير التسريحات ماتضبط عليه
ابتسام : افففففففف !!
غادة
بغيت انسى انك مريضة بهالأمور !
غادة : لا خلاص ماحقصه .. يمه منك بس اسألك
إبتسام : يوه غادة عندي مكالمة بالإنتظار سكري احاكيك بعدين
غادة : اوك ..
سكرت ابتسام وهي ترد : هلا هيثــــم .؟!
هيثم : هلا بسمه .. كيف حالك ؟
إبتسام : كويسة .. إنت شلونك ؟
هيثم : ماعلي .... " سكت لفترة ثم نطق " شعندك اليوم ؟
إبتسام : ماعندي شي ... ليه ؟
هيثم : عازمك لمطعم .. نتعشى سوا
إبتسام : وانت فاضي تعزمني ؟
هيثم : ايه اليوم فاضي لك ... اهم شي انتي افضي لي وتعالي
إبتسام : هههههه وانا اقدر اقول لا ؟ ولا يهمك بس وش رايك تتعشى عندي وبس احسن
هيثم : لا لا ! مطعم اريح لي ... خلاص راح امرك بدري مالي خلق الزحمة
إبتسام : اوك من عيوني
هيثم : اشوف