الفصل 41
" تشابتر واحد واربعين "
يقول أحد علماء النفس :
الرجال ينسون لكن لايسامحون ,
والنساء يسامحون لكن لاينسون
جـالس على شرفته .. يراقب ساعات طلوع الشمس الأولى وامامه ورقة وقلـم وكاس قهـوة , هو أكثر شخص مستمتع بهدوء البيت العارم ..هالشخص الحالم الخيالي يقدر يبحر بنفسه بعيد عن هالعالم وينسى اللي حوله لساعات ..
تنهـد وهو يفلت قلمه .. تناول فنجاله وهو يوقف ويراقب الحديقة ويشرب قهـوته , كتاباته هي متنفسه الوحيد .. لحد مايفك الحديد كثر الدق .. طالع ساعته قرب المـــوعد دخل غرفته وهو يلبس جاكيته القطني البيج على بلوزته الجنز الرسمية وبنطـال برتقالي .. ونظارته الشمسية مجرد ماخلص دق جواله .. رد مباشرة : وصلت ؟!
فراس : ايه انا عنـد الباب اللحين
لؤي : يله جايك
نزل الدرجات بسرعة حتى وصل لبرا .. حصل فراس بالمقعد اللي جنب السايق , يعني افهم وسق .. ركب : حمد الله على السلامة
فراس : الله يسلمك
لؤي وهو يحرك : كيف شغلك ؟! مشى كلش تمام ؟!
فراس : ليش عند شك انه ماراح يمشي تمام يعني ؟!
لؤي : لا حشى لله.... تصدق مالي خلق نهائي اروح لو مو انت زرعت لي مارحت اساسا
فراس : تغيير جو ...
لؤي تغيرت نبرته : ابسألك كلمت سارا ؟!
فراس تغيرت تعابيره للتشاؤم : كلمتها ! وعندي سؤال واحد بس ..؟! عقلك وين يوم تزوجتها ؟
لؤي : ياليل رجعنا لنفس المنـوال ...
فراس : والله اشوف حالتك تجيب الهم .. وهي عايشة حياتها ولا درت عنك حتى لو مكانك خذيت خطوتين ورا واختفيت من حياتها !
لؤي : وش تبغـاها تسوي يعني ؟!
فراس : ماتطلب الطلاق مثلا ! عطها ورقتها وفكنا .. والله يعوضك خير
لؤي : انا فاهم انها زعلانة .. ويحق لها اللي جاها مو سهل اضطرت تشيل مسؤولية كبيرة ..بس لازم اعطي نفسي واعطيها فرصة ثانية ..
فراس : مو كل الناس يستاهلون فرصة ثانية .. في ناس اصلا ماكانت تستاهل الفرصة الأولى !
لؤي : انا ماراح اناقشك بسارا .. ماراح احط جهدي فيها اللحين .. خل اخلص ابوي قبل
فراس : ابوك ماراح يخلص .. صدقني
لؤي لما حس بقتمه من الموضوع قرر يغيره : شخبار اصابتك .؟! متى اخر مرة رحت للمستشفى ؟
فراس : لي شهر مارحت .. خلاص معد احتاجهم
لؤي : من جدك !! مفروض وقت تبدا تلتئم يشوفونها
فراس : يشوفونها يصورون معها ؟! خلاص التئمت والحمدلله
لؤي : ما شاء الله عليك .. بالحيل مهتم بصحتك , ماعادت تعورك ؟!
فراس : نهائي ..
لؤي : افلقني ! بس معلوم ماراح تقولي
فراس : وقف عند دكتور كيف .. المشوار 3 ساعات ابي قهوة
لؤي : على اساس انت اللي تسوق ؟!
فراس وهو يطلع لابتوبه : على اساس انا اللي بجلس اشتغل طول الطريق
لؤي : حتى بالطريق ؟! هذا وانت بتغير جو ... الله لايبلانا
***
الســـاعة 8 صباحا .. كان نظـام غرف مرتب على سريرين , غادة واسماء تشاركوا الغرفة .. وحصلن نفسهن صاحيات من بدري اسماء كانت بالغرفة تكمل كشختها بينما غادة بالحمـام تاخذ لها شاور , طـلعت غادة من الحمـام بروبها وهي تتجه لشنطتها .. نطقت اسماء بتذمر : اف صبغتي نزلت صاير شكلها بايخ لازم اروح للمشغل قريب
غادة : ايه تو بقولك .. بس وقت تروحي لاتصبغي اشقر بس , لو منك بحط خصلة ملونة
اسماء عقدت حواجبها : ملونة ؟!
غادة : ايه رمادي مثلا .. او بنفسجي حتى بس بيطلع بايخ مع الاشقر ..رمادي حلو !
اسماء : خلاص وقت اروح روحي معي .. ونقرر , المهم تتوقعين احد صاحي اللحين ؟!
غادة : ما أدري احس هدوء مرة ..
اسماء : اجل بسرعة البسي خل نروح ناخذ لفه لفتين قبل يصحون
غادة : لحظة يامطيورة .. خل البس
اسماء : ناشبه تتسبحين من صبح !
طلعت غادة بسرعة بعد مالبست على السريع
اسماء : افف سنة ! خلصتي ؟! اخلصي قبل يقومون وتروح علينا الطلعة
غادة وهي تطبع البلوشر على خدودها : شاسوي بخلص مكياجي ... " رشت عطرها وسحبت عبايتها " يله سرينا
لبسن عباياتهن وهن يطـلعن والجـو يجيب انتعاش .. هالوقت من الصباح مايعلى عليه , اسماء : ياربيه الجو يجيب العافية
غادة : هههههههه انتبهي بس نضيع زي امس !
اسماء : يابنت الحلال الواحد اذا ضاع يحس نفسه مهم .. يفقدونه اهله ويبكون ووقت يرجع يضمونه ! حنا اعوذ بالله شوي ويعلقون حبل مشنقة عند الباب يستقبلنا
غادة : ايوه حنا طرق التعبير عندنا مضروبة شوي
اسماء : وماقهرني الا سجى هالوصخة ! هي اللي رايحه تركض سابقتنا ثم تجي تقول فكرة اسماء يقطعها ام وجهين ذي حقدت
غادة بحقد : وفوق انها عايشه بوجهين ولا وجه فيهم حلو !
اسماء : ههههههههههههه ايه والله صدقتي
غادة وهي تتأمل المزرعة : بس بجد اسوم شغلكم مرة رهيب .. اول مرة اشوف مكان كذا خيالي بجد
اسماء : التصميم كله كان عمي عبدالرحمن .. ووقت كبروا الشباب صار كل واحد يضيف له فكرة او مشروع او أي شي , واغلبها طبعا نايف وعبدالمجيد
غادة : ما شاء الله عليهم شاطرين جد" وقفت غادة فجأة " اسمـاء اللي قدامنا هو كباين الكهرب !!
اسماء : شف شف !! ايه هذي هي .. وجع وحنا امس ضعنا ندورها
غادة : جعله يخلف بس ..
اسماء قربت من الكبينة : تعالي نكتشف الخلل
غادة : اشتغل الكهرب خلاص !
اسماء : مشغلينه بمـولد .. ولا هو مازان
غادة : بجـد !؟ " قربت معهـا وهي تطالع تحاول تكتشف " شوفي هذا السلك مفصول اكيد هو
اسماء : تصدقين
شبكنـه مكانه واسماء تضرب يدينها ببعض : لا ويجون يهاوشونا وهم مايسوون دونا
غادة : ههههههههههههههه وناسه حلينا السالفة صدق
كملن جولتهن على المكـان .. وقت قربت الساعة تصير 10 رجـعن اول مادخلن كان الكل مجتمع على الفطور : بدري ! وين كنتن ؟!
سجى : يضيعون مرة ثانية
اسماء : مانقدر دونك !
ام فراس : اغسلن يديكن وتعالن افطرن
غادة تلفتت : فين إبتسام مو شايفتها
وداد : ماحبيت اصحيها .. مسكينة أمس مانامت طول الليل تقيئ
ام فراس : غريبة .. هي اللحين الشهر السادس مفروض وقف الوحـام
غادة : الله يعيـنها ..
ميهاف نزلت بعد فترة .... ام نايف : كل هذا تلبسين ! حشى !
ميهاف : فجأة نسيت كلمة سر شنطتي .. عقب الشين انفتحت لي
اسماء : من الفهاوة !
ميهاف : ياحلوك ساكته انتي
اسماء : المهم ! اليوم ابي اركب الخيول .. والدبابات وابغى اركب المنطاد بعد و ..
قاطعتها ام فراس : كل هذا بتسوينه اليوم !؟
اسماء : ليش مقدر ؟!
ام فراس : ايه ماتقدرين ! امس لادباب ولا خيول ولا منطاد وضعتي .. كيف بكل هذا !
غـادة : كل هذا موجود ؟ !
اسماء : ايييه كله .. بس طبعا لازم تبيعين كرامتك تشحذين نايف وعبدالمجيد
ميهاف : انا بصراحة ابي الخيل وبس ..
دخلت ياسمين بحماس : ماااااامااا .. فراس ولؤي جو !!
ام فراس : وصــــل من الصين ؟!
ام نايف : ياحليله والله كويس جا يجيب لؤي معه بعد
اسماء : لااااااااااااااااا ... جا فراس خلاص مافيه دباب ولا منطاد ولا غيره ومافيه حتى هواء نتنفسه !
ام فراس : احسن .. سنايدي والله ليته من امس هنا
اسماء : يممممه .. طاح قلبي وانا اتخيل بس
سجى : غادة شفيك كأنك مو مبسوطة ان فراس جا ؟!
غادة عقدت حواجبها .. شتبي هذي : احد قالك اني مو مبسوطة ؟
سجى : اسود وجهك من قالت ياسمين انه جا
غادة : وتراقبيني كمـان ؟ّ واضح اني شايله معك بجد
سجى رفعت حواجبها : فوق ماتتصورين
غادة وقفت : الله يعينك اجل .. انا رايحة اشوف ابتسام بس
همست وداد لسجى بعصبية : شقاعدة تقولين للبنت انتي !
سجى : قاااااااهرتني قاهرتني ! شوفي واصل من سفر ولا همها حتى رايحه تشوف اختها !
وداد : خلاص سجى .. صارت زوجته انتي مالك علاقة باللي يصير بينهم !
عـند فراس :-
دخل هو ولؤي وسلموا على الكل ... أول ماجلسـوا , جلس لؤي جمب هيثم : هلا والله بالدكتور منور والله .. ماتوقعت احصلك لا وممسي بعد
هيثم : مو ناوي والله .. بس ابوك اصر احرجني !
لؤي : هههههههه ايه معليش اجلس وسع صدرك
هيثم : لا ساعه كذا وماشي
لؤي : يوم جيت ؟! لا والله ماتروح ... حنا كلنا بنرجع اليوم خلاص ارجع معنا وبس
بدر : من امس وحنا نمسكه وهو بيطير .!
ابو نايف : شخبار الصين .؟! عسى كلش تمام ؟
فراس : ايه خلصنا كلش باجتماع واحد وكنسلنا الباقي ... واثنين من الإداريين جالسين يبيعون شهادات هناك كويس اللي رحت
ابو نايف : ايه تحتاج متابعه مستمرة ولا راح تسلم من اللي ماعندهم ضمير
فراس : لا طردتهم مايحتاج .. خل اللي يفكر يسوي سواتهم يعرف
بدر : الله وصل فراس صرنا مجلس وزراء خلاص !
عبدالمجيد : هههههههههههههههه من جد .. الا اقول وينه نايف ؟!
بدر : طفشت منه رفسته حست ام امه .. بس مافيه امل يصحى يقولي دقيقة ويرجع ينام
لؤي : نايف نومه ثقيل لاتحلمون يصحى لكم
ابو عبد المجيد : إلا اليوم طفيت المولد .. طلع الكهرب زان
بدر : بجد ؟
فراس : ليش خربان اجل ؟
ابو نايف :ايه امس طفـى ولا اشتغل نهائي .. بس غريبة كيف زان فجأة انا تو اقول بكلم عامل يصلحه
لؤي : كويس اللي تصلح اجل
هيثم : يمكن عـطل بسيط وخلاص زبط
ابوعبدالمجيد : ايه اكيد
فـراس وقف عقب ماخلص فطوره .. ودخل يشوف امه مرة وحده اول ماراح نطق بدر : اقول .. انتبهوا احد يقول لفراس وش صار امس ؟
لؤي : شصار امس ؟!
بدر : سالفة ماتسوى .. بس المهم لحد يزل لسانه بيعصب وبتخرب على الفاضي دام الامور عدت سليمة خلاص
ابو نايف : تنذكر ماتنعاد خلاص مايحتاج احد يتكلم فيها بعد
دخـل فراس يم الفيلا وتنحنح : احححم ... يمـــه
ام فراس طلعت له مباشرة .. باس راسها : هلا والله
ام فراس : حمدالله على السلامة ! كذا ماتقولي انك بترجع ؟
فراس : اهم شي أني جيت ..
سلمت عليه ياسمين .. تلفت عقبها : وين اسماء اجل ؟
طلعت اسماء : هذااااني ... كيف حالك ياصاحب السمو ؟
داخــل .. كانت سجى عند النافذة العاكسة تراقبه , داخت على شكـله بالجنـز الفاتح وتيشيرت أبيض دون تفاصيل وفوقه جاكيت أسود جلد .. تناسق الأسود مع شعره الفحمي معطيـه فخامة غير العالم .. انضرب قلبها وهي تنتبه له يرفع حاجبه باستبعـاد لكلام أسماء الكثير , تنهدت بغرام : يــــذبح .. الله ياخذها يارب
فتحت جزء من الشباك عشان تسمع .. طاحت على ام فراس تسأل : اسماء وين غادة ؟!
اسماء : صعدت لاختها فوق
ام فراس : روحي ناديـها تسلم
فراس : مافيه داعي .. طالع انا اللحين
سجى ( مو ميت حتى يشوفها ! انا من أول حاسه زواجهم مريب ) : ................
اسماء : طيب فراس تكفى نبغى نركب الدبابات طلبتك !
فراس : اختاري .. الدبابات او المنطاد او الخيول ! مو كلها
اسماء : اففف صعــــب اختار ...
انس : نبي الدبابات ّ!
اسماء : شدخلك تختار انت عني ؟!
عقد فراس حواجبه وهو ينتبه للشاش بيد انس : انس شفيها يدك !؟
انس بانتقام : اسماء عضتني ! طلعت دمي مو صاحية
اسماء عضت شفتها وهي تفتح عيونها تبيه يسكت ... التفت لها فراس : ليش عاضته !؟
اسماء : لأنه معط شعري !
انس : نصابه .. انتي معطتي شعري أول عشان كذا معطتك
اسماء : لانك قليل ادب وبزر !
انس : عشان غيرت القناة .. والله انتي البزر
فراس : ايه والله انتي البزر .. " ضيق عيونه فيها " ولك وجه جايه تبين دبابات وخيول وماخليتي شي
اسماء : اففف شاسوي .. والله هو يقهر
فراس : لا تسوين شي خذي لك أقرب سكين المرة الجاية واقطعي يده مره وحده !
اسماء : إلا بقطع لسانه ذالنمام !
فراس سحب اذنها : قدامي بعـد ؟! " هز اذنها بالخفيف " مافيه لا خيول ولا دبابات ولا غيره انثبري في البيت لين تسنعين
اسماء ترفعت على اطراف اصابعها من سحبه وهي تمسك يده تبي تفلته : ااااااااااااااا فراس توجع !! وش هالسخافة طالعين عشان مانسوي شي !
فراس افلت اذنها : تأسفي لاخوك ويمكن اتركك للدبابات بس
اسماء : على قطع يدي ما أتاسف له ! اصلن بدر بيركبني
فراس : يعــــني ؟ بنشوف اذا بيركبك ولا لا ..
اسماء طالعت انس بحقد : حسابك عندي ! " طالعت فراس بقهر " وبعدين هو حتى عورني ومعط شعري لازم يعني الف شاش على راسي عشان يوضح ! وفوقها قايل لي مكاني المطبخ !
فراس : اوك هاتي يدك واتركيه يعضك زي ماعضيتيه .. ثم لك اللي تبين
شهقت اسماء : تبيه يعضني ؟
فراس : العين بالعين . والبادي اظلم !
ام فراس : خلاص هالمرة عشاني اتركها .. اخر مرة تسويها
فـوق عند غادة /
كانت جالسة على سرير إبتسام تنتظرها تلبس بعد ماصحتها , انتبهت لغادة مسرحة بانعكاس المراية : غدو ؟
غادة : لبيك
إبتسام : فيك شي ؟ كانك مو على بعضك
غادة تنهدت : فراس جا ...
إبتسام : اهااا .. طيب ليش زعلانة ؟! انتي بحالك وهو بحاله
غادة : سجى موجودة .. احسها تراقب كلش واللي يقهر لو اقابله راح يفشلني انا متأكدة .. ومابي اتفشل قدامها ..
إبتسام : ماعليك منها .. وبعدين سجى هذي وش عندها حاطه نقرها بنقرك ؟
غادة : على كلام اسماء .. هي كانت تحب فراس
إبتسام : اوف ! بجد ؟
غادة تنهدت : تحبه بالطقاق جعله قدرها ماهمني تتزوجه بعد ... بس انا خلاص انقرفت منها بأي حق تجلس تحط من قدري كذا !
ابتسام : ماعليك منها عطيها طاف .. الحقران يقطع المصران
غادة : انا لاحقرت تتقطع مصاريني انا مو هم !
إبتسام وقفت : تعالي بس ننزل .. بيقولون وش هاللي تكد نوم للحين ؟
غادة : لا وداد قالت لهم انك تعبانة شوي ..
ابتسام : يوه ليش قالت لهم ..
غادة : عادي عشان يعذرونك
نـزلوا لتحت .. ابتسام : صباح الخير
: صباح النور
ميهاف : كيف ابتسام اللحين ؟ احسن ؟
وداد : ايه والله شلت همك امس
ابتسام بابتسامة عذبة : لا حمدالله ... اللحين مرة احسن
انتبهت غادة لسجى تطـالع من النافذة بحماس ... وداد همست لسجى بقهر من تصرفها : سسجى ! تعالي اجلسي
غادة انتبهت لخلفية النافذة ... فراس بنفسه ! صعد قلبها لحلقها مجرد ماشافته .. وانقهرت من هالوقحة اللي جالسة تقزقز !! مهما كان اللي بينهم لازم تحترم علاقتهم وش هذا ! مشت بجرأة ناحية النافذة وسكرت وهي تطالعها بنص عين : خلصتي قز ؟! خرقتيه بعيونك خلاص !
سجى : هييييه انتي وش دخلك تسكرينها ! وخري بس لايكون تغارين مثلا
غادة : انا اغار منك انتي ؟ وعــــوه
سجى : احترمي نفسك ! وعوه انتي يالشحاذة
ام عبدالمجيد طلعت من المطبخ : سجى ! غادة ! ياساتر شفيكن ؟ نخلص من سجى واسماء تجي سجى وغادة ماتخلصين مشاكل انتي ياسجى ؟
سجى سكتت وهي تتجاهلهم وترجع تجلس .. إبتسام اشرت لغادة بعيونها تطلع , وغادة حست شكلها بايخ صدق الكل يدري انه برا وواصل من سفر وهي جالسة ماطلعت لو أنس موجود حطته عذر بس القهر انه حتى ياسمين مو موجودة راحو يلعبون .. كرهت الوضع وهي تطـلع على كلمته : احمدي ربك امي شفعت لك .. الدبابات ويخب عليك اجل !
اسماء برجاء : طيب والخيول ؟
فراس رفع حواجبه : نكنسل الدبابات مره وحده ؟
اسماء : اففف لا لا اسفة خلاص كذا زين
تنحنحت غادة بالخفيف : احــم ..
ابتسمت ام فراس من قلب لما طلعت : هلا والله جيتي ؟!
غادة وهي تصرف عيونها عنه وتطالع ام فراس : ايه ... " التفتت لفراس اللي كان يطالعها بصمت " حمد الله على السلامة
فراس : يسلمك .. " التفت لأمه " يله انا ماشي
اسماء : مافيه امل نهائي ؟ حتى لو غادة نفسها فيها ..
فراس طالع غادة : غادة نفسها فيها ؟ جالسة تعطيني سبب ثاني عشان ارفض ؟!
غادة : شنـو ؟ شدخلني انا
اسماء : افف ماراح نركب الا الدبابات
غادة : ..............
ام فراس تنهدت : الله يستر عليك .. خلاص الدبابات تكفيكن
طلع مبـاشرة .. غادة رجعت تدخل واسماء دخلت تتحلطم : ااااااااااااااااااااااااا ااااااااا ! بايخ بايخ " جلست باحباط " يله دبابات واحمدوا ربكم واشكروه بعد
سجى : شدعـوة بس الدبابات ؟! غادة ليش ماتوسطتي لنا ؟!
غادة حست باستفزاز بجد .. هالبنت تستفزها : شايفتني مهبـولة .. كلمات فراس بالذات اوامر عندي
سجى طالعتها بنص عين : لا واضح ..
اسماء استلقت على الكنبه : سد نفسي الله يسد نفسه
غادة اللي دخلت كئابة نفس الشي " تعطيني سبب ثاني عشان ارفض ؟ " كشرت بقهر وهي تنثبر مكانها ..
***
أول ماطلع فراس من الفيلا .. طفى الكهرب مرة ثانية ! عقد حواجبه وهو يكلم ابو ناايف : عمي مو قلتو تصلح ؟!
ابو نايف : غريبة والله .. اليوم صحينا حصلناه ضبط .. مدري وش صار بعد ؟!
فراس بتذمر : هذي سالفة بعـد .. " طلع جواله " لحظة اكلم الصيانة ..
بدر دخل على نايف ونطق بعصبية : اسمع للثلاثة .. لو ماتصحى قفلت الغرفة واجلس هنا لليل
نايف وهو نص نايم : تسوي خير والله
بدر : يقطع جوك البايخ .. " التفت لعبدالمجيد " امش بس نشوف الخيول
دخل هو وعبدالمجيد حضيرة الخيـول ... عبدالمجيد انتبه لخيل جديد باللون الأبيض : وش هالخيل أول مرة اشوفه ؟
بدر : انا شاريه هدية للمدام
عبدالمجيد : حركــــات ! خيل مرة وحده ؟! وش رايها فيه ؟
بدر : للحين ماعطيـتها اياه .. شريته بداية زواجنا وماحصلت فرصة اعطيها للحين
عبد المجيد : ما تتزوجني ؟
بدر حامت كبده : يخسك حومت كبدي وع
طلـع بدر خيـله .. وهو يمتطيه برشاقة : اخلص يابطيء بسبقك
امتطى عبدالمجيد خيله برشاقه وهم يشقون طريقـهم للحلبة المخصوصة للخيول ..
اثنـاء ماهيثم يراقب منظر الخيـول الرايق ... فجأة دق جواله طالع المتصل عقد حواجبه ! رقم غريب ابعد عن الموجودين وهو يرد : أيـــوه ؟!
: عرفتني ؟
هيثم لقط الصوت مباشرة : سارا !
: ههه أيـوه ..
هيثم : ع بالي ميته بمكان ومحد داري عنك ! وينك يابنت الحلال ؟
سارا : موجودة .. بس صارت لي ظروف شوي
هيثم : اللي هي ؟
سارا : كلام كثيـر ..
هيثم : يابنت الحلال لا تتهربين ولا تبلين قولي زهقت منك وبس
سارا : انا اقول كذا عنك ؟ ..." تنهدت " ادري اني غايبة كل هالوقت وفجأة بكلمك اطلب خدمة بس ..
هيثم قاطعها : ايش خـدمته ؟!
سارا : انا جـــاية السعودية للرياض بكرة .. تقدر تستقبلني ؟
هيثم : ايش عنـدك بالرياض ؟
سارا : فيه حاجات لازم اخلصها .. تقدر ؟
هيثم : والسـكن ؟
سارا : بحـجز طبعا .. ابيك بس تستقبلني وأبيك تحجز لي باسمك ؟
هيثم عقد حواجبه : ماتعرفين تحجزين ؟
سارا : اعرف ... بس ابغى باسمك .. مو باسمي
هيثم : اوك انا اللحين مو فاضي .. بس اول ما افضى الليلة ان شاء الله بضبطه لك
سارا : شكــرا مره ..
هيثم : يله سلام ..
سكرت سارا وهي تتأمل الفوضى اللي هي فيها .. شكلها يرثى له بعد ما أهلكت نفسها من صبح في التنظيف حتى الصعب تنظيف السقف والنوافذ ترتيب الأسرة كان البيت يلمع ..
دخلت عليها صوفي : انت تلجأين حقا لإهلاك نفسك
سارا وهي توقف وتكمل شغلها : ربما ...
***
بعـد مارجع فراس وأبو نايف من كباين الكهرب ... نطق ابو نايف بعصبية : من هاللي شابك الكيبل غلط !! فجر الطبلون كله
فراس : مو هو الكهرب لما تصلح فجأة على قولتكم ! كان مضروب على اقوى شي واللحين ..
بدر : شالسالفة ؟!
ابو نايف : احد شابك الكهرب غلط .. وفجره
بدر : افــــا !
فراس : السؤال اللحين من هالملقوف !؟ مع اني تقريبا اعرف !
عبدالمجيد : ميـــن ؟
فراس وهو يتوجه للفيلا : من يعني راس كل المشاكل ؟!!!
أول مادخل الفيلا نادى : اسمــــاء ؟!!!
اسماء وهي جالسة داخل : جاي يكمل علي النكد يعني ...؟
فراس : اسمـــاء ؟!!!!
طلعت له بكئابة : هـلا ؟!
فراس بنبرة عادية : اليـوم الكهرب فجأة تصلح ..؟ ماتعرفين ليش ؟!
اسماء تحمست وابتسمت من قلبها : انـــا وغادة صلحناه ! "كملت بغرور " ادري انا رهيبات وشاطرات ! لاتحاول تتأسف اللحين يوم عرفت قد ايش انا مبدعة ؟!
فراس هز راسه : اها ... انتي وغادة ؟! روحي نادي غـادة معك طيب ودنا نعرف كيف صلحتوه لانه رجع يخرب ؟
اسماء صدقت دخلت بحماس : غادة ! فراس يبيك
غادة فتحت عيونها " وش يبي .. من متى وهو يبيني " : ..............
اسماء : اخلصي متحمسة اكمل فلسفتي !!
غادة : ليش ؟
اسماء وهي تسحبها من يدها : تخيلي يبون يعرفون كيف صلحنا الكهرب .. بس اصبري والله ما اعلمه لين يوافق على الدبابات والمنطاد وكلش !
طـلعت غادة وهي مب متطمنة .. حتى لو صدق هن صلحنه مستحيل يسألهن : ................
انتبهت له متسند على العـامود اشر لهن باصبعه يقربن : من ودهـا تبدا ؟!
اسماء رفعت يدها بحماس : انا انا ... بس لازم مقايضة اولا ّ!
فراس رفع حواجبه : مقايضه ؟
اسماء : ايه .. تتركنا نركب الدبابات والخيول والمنطاد وقتها نقولك كيف .. اما غيره معليش ماراح اعطيك سر الوصفة
فراس التفت لغادة : وانتي ؟! ماودك تقولين .؟
غادة كبست بعيونها : انا احس .. احس بس ان السالفة غلط !
اسماء : كيف السالفة غلط ؟!
فراس : احساسك صح .. الكبينة انفجرت واللحين تعطلت !
اسماء فتحت عيونها : تستـــهبل ؟!
فراس : السؤال هو .. من اللي معطيكن شهادة مكيانيكي عشان تشتغلن من راسكن ؟ انتن حتى شهادة سباك ماتجيبنها!
اسماء : ايه طبعا مو مقامنا !
فراس وهو ينقل بصره بينهن : انا فاهم اني متزوج كمخة بس اللي تو افهمه اني جمعت كمختين في بيت واحد !
غادة باستغراب : ......غريبة والله كنت متأكدة اني مركبته صح !
فراس : انتن بالذات فلس ثقافي ! ومصدقات بتصلحنه ؟!
ام فراس طلعت على صوته وهي تنتبه له متسند على العامود وقدامه غادة واسماء : ..... شفيكم ؟
فراس : تعالي تفرجي .. الحلوات هذول موكلات عمارهن عمـال وفجرن كبينة الكهرب !
ام فراس شهقت : انفجرت انفجرت ؟! ومتــــى ! لاتقولن امس ؟
اسماء عضت على شفتها لايزل لسان امها وتقول انهن ضاعن : ... لا لا ! اليوم فجر رحنا !
ام فراس : يعني الواحد امس عجز يحكي واليوم تروحن ... الواحد يتعب يقولكن الحكي تسمعن نصه وتفهمن ربعه وتسون عكسه بعد !
غادة : طيب آسفات .. والله ماقصدنا
فراس باستهزاء : لا انحلت المشكلة ! غادة اعتذرت ؟! خلاص اكيد الكبينة بتصلح نفسها بنفسها " طالعها بحدة " اسمعـي انتي ! " والتفت لاسماء " وانتي ! مبلغ الكبينة يندفع كامل
اسماء : ولا يهمك بقول لأخوي فراس يدفع لك .. مليونير ترا !
فراس ضرب راسها بخفه : تنكتين ووجهك ؟! بتدفعينه من جيبتك ! ريال على ريال لين تصلحينه كامل
اسماء : يوه فراس !! ماتقدر تدفعها يعني ؟
فراس : ليش ادفعها ..؟!! مو انتي اللي خربتيها يله صلحيها !
غادة : طيب انا مامعي .. مفلسة " طلعت جيوب بنطالها " من اليوم لبكرة ماحتحصل شي
فراس بحدة : النص بالنص .. انتي نص المبلغ وانتي نصه ! وامي مافيه وبدر مافيه ! " التفت لغادة " واختك مافيه !
غادة فتحت عيونها : كيف طيب ؟!
فراس رفع يديه : مالي دخل .. والله ثم والله لو يخلص هالشهر وهو ماتصلح ! بتاكلينها على راسك انتي وياها ! انا مطول بالي ترا بالنسبة للي شفته ...
اسماء : بكم طيب ؟
فراس : قولي 35 زائد 15 وزيديها 23 وعشان التختيم 7 ... كم ؟!
غادة : 80 ؟!!!
فراس : لا شاطرة تعرفين تحسبين
اسماء : وش 80 ؟!!!
فراس : الف .
اسماء : يووووه فراس واجد !
غادة بقهر : ايه صدق واجد وش دخلنا .؟ ماكنا ندري انه بيخرب يعني
فراس : تعرفون تخربون ولا تعرفون تصلحون !!! 80 الف ان شاء الله تبيعون خلقكم
غادة : متأكد ؟!
فراس : مية بالمية .
اسماء : بسوي أي شي ثاني الا فلوسي ! وش ذالقهر ادفع 80 الف وانا بنت الشمري
فراس : شوي شوي لاتقطعين نفسك يابنت الشمري !
غادة : طيب بنحاول نصلحه مرة ثانية ... يمكن يتصلح ومب لزوم ندفع مهر حشى ! " كملت بحلطمة " حتى انا ماجاني مهر كذا
فراس تكتف : عندك شكاوي ؟
غـادة ببراءة : والله واجد ..
فراس : انتي بالذات كيد الحريم اللي فيك هذا شغليه صح ودبريها !
غادة : كيدي عظيم بس عطفي اعظم مقدر .
فراس انقلبت ملامحه لقرف : .............. ايه لاحجت البقر
اسماء : انا ابي ارجع البيت ! وش هذا مافيه الا دبابات لا وفوقها ادفع ومدري شلون !
فراس اشر لها بيده : درب السلامة .. ارجعي البيت
اسماء : والله بجد فراس انك تقهر .. نبي ننبسط خربت علينا
داخل الفيلا /
سجى وهي تراقب الوضع .. واضح ان النقاش مطول وماتسمع فجأة انتهى بان اسماء تدخل معصبة متجاهلتهم وام فراس تدخل .. انقهرت وهي تشوف بس غادة اللي جلست ..
طالعها فراس بنص عين : وش عندك بعد ؟!
غادة : ابي .. ابي اكلمك بموضوع .. بس مو هنا
فراس استقام بوقفته : مو فاضي لك اللحين
قبل يروح مسكت غادة يده لا يروح .. وقف فراس وجسمه قشعر من لمستها التفت لها وهو يطالع يدها النحيلة اللي ماسكه معصم يده ... طالعته غادة برجاء : لو سمحت .
فراس وعينه بعينهـا ... مسك يدها اللي ماسكه يده بيده الثانية وسحبها من يده بخفه ونطق بهدوء : لا تلمسيني .. نهائي , سامعة ؟
غادة بلعت ريقها من اثر مسكته ليدها .. حست فعلا بجفاف حتى بلمسته حضنت يدها بيدها الثانية وهي منزلة عيونها : الموضوع ضروري . . . راح تقولي اللحين مو فاضي .. وبالبيت ماراح تجلس .. وبالأخير بتسافر ماقلت لك شي ..
فراس طالعتها لفترة .. واضح على عيونها منكسرة : رنيم جت امس .. جالس أنتظرك ترجعين تشتكين ؟ ماراح تسكن في بيتي ... فانسي الموضوع
غادة : ليش طيب ؟! انا مو عايشة مع أحد .. لا انت ولا أهلك .. ابي احس احد معي
فراس طالع بحدة جهة النافذة .. قمطت سجى وهي تسكر الستارة : يمة أنتبه لي !
رجع فراس يطالع غادة لما تسكرت الستارة .. كانت منزلة راسها ماتقدر تتكلم وهي تطالعه , وضامه يدها بيدها الثانية وواضح ضاغطة على شفتها : عشان ماترجعين تعورين راسي كل فترة بهالسالفة ... راح اقولها لك مرة وحده وافهميها رنيم ماراح تسكن ببيتي
غادة رفعت راسها بقهر : انا ماراح انحرم من بنتي طول عمري .. ماراح تسكن ببيتك اجل انا مابي بيتك بعد !
فراس : حتى بيتي وأهله مايبغونك ! " كمل بعصبية " تجلسين تحسسيني انك متعذبه معنا وحنا ميتين عليك .؟! لولا الظروف ماكان لك مكان عندي " كمل بحدة " صدقيني انا كاره وجودك بحياتي اكثر من الكل ! مو من زينك ولا زين اخلاقك اتعلق فيك !
غادة : لا طال عمرك ! انا اللي ميته عليك انا اللي خاطبتك اساسا وساحبتك تعيش معي
فراس رفع حواجبه وهو ينتبه لنظراتها المحتده فيه .. خطى خطوتين لقدام .. غادة تراجعت مباشرة بخوف : شنو !
لما قابل ظهرها الجدار .. وقف قدامها مباشرة وهو يسند يده على الجدار : ايه أنتي اللي خاطبتني .. ولا نسيتي ؟!
غادة بقهر وضيق من قربه وريحته الرجوليه تلفح خشمها : بأحلامك بس !
فراس : مالك مكان بواقعي عشان يكون لك بأحلامي .. استوعبي هالشي
نزل يـده من الجدار وهو يعطيها ظهره .. قبل يطلع : موضوع رنيم لعد يتكرر .
وطـلع مباشرة .. اول ماطلع انتبهت لجسمها يرجف من القهر , ارخت جسمها على الجدار وهي تعض على شفتها .. ماقدرت ترجع تدخل نزلت درج مقدمة الفيلا وراحت تمشي تدور مكان تنعزل فيه .. تحس بوهن فضيع عقب مايكلمها .. دفنت راسها بين ركبها .. وهي تكرهه بداخلها زود تكره رقابته عليها .. تكره كلامه لها .. لما كانت محبوسة عنده بطرابلس كانت اكرم من اللحين ..
أول مارجع فراس .. كان الكل مشغول بالسوالف ماعدا نايف اللي تو صاحي وجالس يفطر ..
نايف : اوه انت هنا .. حمدالله على السلامة
فراس وهو يجلس : يسلمك .
ابو نايف : عرفت من اللي خربها ؟
فراس : ايه عرفت .. وراح يصلحها بنفسه فلحد يلمسها !
ابو نايف : من ؟!
فراس : اللي هو ..
نايف : لايكون ركبتوا الخيول وانا نايم ؟
بدر : اييييييييييييه .. بنحتريك مثلا !؟
نايف : ياشينك ياكلب ... تصدق امس لما رجعت للرياض كان بنركبها بس اجلناها عشانك ! كانك كفو ؟
عبدالمجيد : ايه نايف شفت الخيل اللي شفنا امس ولا عرفنا لمين ! طلع لاختك هدية من الرومانسي هذا
نايف رفع حواجبه : اخسس اخسس ... والله وعرفنا نناسب !
بدر : ايه معـلوم عرفتوا .. عكس هيثم سبحان الله
نايف : ترا اخوك معي هاه !
بدر : حتى اخوي !
هيثم : لا والله والنعم فيهم كلهم ... حاصل لنا حنا ؟
نايف : صح لسانه ! خلك انت بس ترا ابوي كل ماقابلته حش فيك يانسيب الفلس
ابو نايف : حسبة ولدي ولا ماعليه خلاف
نايف : عموما ترا هالخيل كان بشتريه اخر مرة .. بس حصلت واحد احسن
بدر : بكم ؟!
نايف : اغلى من حقي اللي مات اول
ابو نايف : ايييه بالخيول بتقط فلوسك ! ويوم طلبك ولدك كم ريال عييت
نايف : إنا لله ... الله يخليك له يبه جعله مايحتاج لي
ابو نايف بقوة : آمين ! مدري كيف صرت ابو انت !
نايف : اشرح لك يعني ؟!
بدر : ههههههههههههههههههههههههه ههههههههه ! نايف انقلع قبل تتكفخ
عبدالمجيد : هههههههههههههههههه وصخ
لؤي حبس ضحكته احتراما لأبوه اللي معصب ... لكن بالأخير الكل ماقاوم ..
ابو نايف هز راسه بيأس : انا مدري للحين ليش اناقشك !
نايف : اندري عنك
***
اسمـاء اللي كانت تتمشى بالحديقة لحالها تتنفس شوي عقب فراس .. وبنفس الوقت تدور غادة اللي من طلعت مارجعت .. تنهدت بضيق : اكيد كمل عليها بعد .." طالعت ساعتها " مابقى شي على مانرجع ولاركبنا دبابات ولا شي ! اففف .. وش هالزيارة المقرفة
اثناء مشيها أنتبهت لهيثم ينسحب من جلسة الرجاجيل وباذنه جواله .. واضح المكالمة مهمة جالس يبتعد عضت على شفتها بقهر وهي تطالعه : .................
تجاهلته وهي تكمل مشيهــا .... بالأخير تراجعت وهي تحاول تعرف وجهته .. مشت ببطئ وراه ناحية الحدايق اللي دخلها ... وقفت بخطوتها وهي تحاول تتراجع .. لازم ترجع وش تلحقه له ؟!
: شايفك ترا ..
انتبهت له يطالعها وهو يسكر السماعة : .. لوين كنتي ناوية تلحقيني ؟!
اسماء برد اعتبار : حديقتنا ! انت اللي جاي مو انا
هيثم : يعجبني كبريائك اللي يمنعك تحاكيني بس يجبرك تراقبيني من بعيد .. " تغيرت نظرته " حاس عليك من قمت من الجلسة .. ماراح تكوني اسماء اذا مالحقتيني
اسماء : اها حاس علي ؟ عشان كذا جيت مكان مافيه احد ؟! يمكن كبريائك هو اللي يخليك تراقبني مو انا
هيثم ضغط على نفسه ورمى السؤال بصعوبة : الفترة اللي راحت .. ماصرتي تجين المستشفى ..
اسماء استغربت كلامه .. نطقت بقهر : صدق انك غريب .. وقت اجي ترمي كلامك علي وتتوقعني ارجع اجيك ؟!
هيثم : لأن اللي يحبك بيجيك مهما كان ! " كمل ببرود " عشان تفهميني وقت اقولك انك تخدعين نفسك
اسماء : بالله كيف تقول كذا ؟ بس معك حق هذا مو حب .. هذا مرض انك توجعني بس مازلت أبيك .. هذا اكيد مو حب
هيثم : الفرق اللي بيني وبينك اني صح شفاف ساعات واحيان قاسي وعنيد ومزاجي بس ماعمري كنت منافق .. ولا زورت نفسي ولا مرة....... كنت أنا !
اسماء : انا المزورة يعـني ؟ انت ماكنت قاسي ولا عنيد لا .. انت كنت كارثي بالنسبه لي احسك موجود بس عشان تتفنن في كسر صبري ..
هيثم : وتقنعيني انك تحبيني عقب كل هذا ؟!
اسماء عضت شفتها ونطقت بقهر : ايه .. لو عندي دليل واحد عليك .. كان ماتراجعت لحظة ..
بعد فترة صمت وحرب نظرات بين الإثنين .. عين تواجه صعوبه في التعبير وعين تواجه صعوبة بالتفسير هيثم شد على قبضته : ...... تبغيني ؟!
اسماء فتحت عيونها مب مستوعبة : ...............
هيثم : متأكدة بتتحملين هالشي ؟
اسماء ماستوعبت كلامه للحين : ........... اذا جاوبت ؟! راح تصدقني ؟
هيثم : ... انا اصدق افعال مو كلام ..
اسماء : ........... اذا انت ماتعرف الجواب عقب كل هذا .. اجل انا شكنت جالسة اسوي كل هالوقت ؟!
هيثم دخل يدينه بجيب بنطلونه : عطيني دليل .. دليل مقدر اكذبه حتى لو اجتهدت ! وانا مجتهد مثل ماتعرفين
اسماء بقهر : تدري انك تضحك ؟! تجلس تتكلم وكأنك ضحية هالعلاقة ! " عضت على شفتها " انا اللي لازم تعتذر لها وتثبت لها ! لا تجلس تجيني باسلوب ملتوي .. ماعدت اتحمل هالأسلوب ! ماراح اعطيك دليل ... ولا راح اعطيك شي .. " كملت بقوة " انا احبك هيثم ! وانت تعرف هالشي .... اللي لازم نعرفه اللحين هو انت ! ولا انا .." كملت بغصة " ماراح اجتهد عقب اليوم .. ليش اجتهد ؟! عشان تقولي كذابه ومنافقة !! شكرا يكفيني اللي وصل منك للحين !
ضربت رجلها بالارض وهي تعطيه ظهرها .. وقبل تكمل طريقها التفتت : ولعاد تطردني من سيارتك ! مو من زينها !
وكملت طريقها .... هيثم : .................................................. ......؟
تردد على اذنه لهجتها الحادة " انا احبك هيثم ! وانت تعرف هالشي .. ماراح اعطيك دليل " : معناها ... انا اسف مقدر اساعدك ..
اسمـاء /
ضربت خدودها وهي تعدل نفسها وتدخل الفيلا .. حصلت غادة طالعة من مؤخرة الحوش : غادة ! انتي هنا ؟
غادة : ايه .. ليش ؟
اسماء : لا بس كنت جالسة ادورك ..
غادة : موجودة ..
اسماء : تعالي بس ندخل .. الرحله هذي كلها على بعض زي وجيهم
دخـلوا داخل ... نطقت ام فراس : وينكن تاخرتن
جلست كل وحده باحباط دون كلام .. اسماء وهي جالسة جمب غادة اسندت راسها على كتفها : متى بنرجع البيت ؟
ام فراس : طفشتي عقب كل هالمشاكل ؟
اسماء : ايه والله انبطت تسبدي خلاص ... غـادة ؟!
غادة : همم
اسماء : ريحتك ريحة فراس !
غادة فتحت عيونها : شنو ؟
اسماء : ايه والله .. " شمت " ريحـته واضحه بجد
ميهاف : اووووه امداكم !
وداد : هههههههههههههههه ماعندهم صبر معاريس !
سجى كانت تطالع غادة اللي انحرجت وهي تشم ريحة بلوزتها ... بغى ياكلها من شوي طبيعي تلزق ريحته نطقت بانحراج : والله مو عارفه كيف ..
ميهاف : مو عارفة ؟!! كلش يالبريئة
ام فراس : خلاص لاتحرجون البنت !
دق جـوال ابتسام ردت مباشرة : هلا ؟! اوك تمام
وقفت وهي تلبس عبايتها : يعطيك العافية ام فراس على هالطلعة الحلوة انبسطنا بجد
ام فراس : بدري ! بتروحين من اللحين ؟
ابتسام : ايه خلاص نبغى نمشي قبل تغيب الشمس ... يله سلام
طـلعت إبتسام .... وعقبها أم عبد المجيد وبناتها ..وأم نايف .. دخل عقبها بدر : احم احـــم .... ميهاف ؟!
ميهاف : جاية !
سلمت على البنات وهي تطـلع ... ركبت السيارة دون تعليق : ...............
بدر وجه سيارته ناحية الإسطبلات ... وقف وهو يقولها : انزلي بوريك حاجة
ميهاف تكتفت : مابي مالي خلق اشوف شي .. خل نرجع البيت وبس !
بدر : انزلي وصدقيني ماراح تندمين !
ميهاف : آففف ! مابي ... شنو لعبة هي تمسح بكرامتي الأرض امس واليوم الحقك !
بدر رفع حواجبه .. ورجع يركب : انا المهبول اصلن اللي مفكر فيك ! كويس مانزلتي
ميهاف : أيـوه هذا انت تغلط .. وتجي تتكلم طبيعي ومفروض اسايرك ! لا حبيبي اذا ماتحب تعتذر لاتغلط من البداية !
بدر : خلاص انبلمي ! لا اعتذر ولا غيـره ... معليش ميهاف بس احيان استخسر اهتمامي فيك
ميهاف : شعور متبادل ...
بدر طالعها بنص عيـن ... وعقبها طلع سماعاته من الدرج وهو يشبكها باشارة لانهاء النقاش : ...
***
بعد مغادرة الكل .. دخل فراس ووهو ينتبه لهم جالسين بعباياتهم يستعـدون للرحيل : جاهزين .؟!
ام فراس : ايه
فراس : اجل مشينا
تراكض انس وياسمين للسيارة ... اما غادة واسماء كانو يسحبون رجليهن
بالسيارة ... اسماء بتذمر : اول مرة اكره رحلة زيه المرة ياساتر وش هالطفش ..
ام فراس : لا والله انبسطنا .. خلك اجتماعية وشوفي العالم وانبسطي
اسماء : من زين هالمجتمع عشان اصير اجتماعيه
فراس : الله يريحك اجل ... اقعدي بالبيت وبس
اسماء : امنيتك عاد !
فراس : لا والله شدعـوة ؟! بس مافيه داعي يجتهد احد يطلعك دام مافيه شي عاجبك .. ارتاحي بالبيت وبس
انس بتأييد : ايه والله
اسماء التفتت لانس بعصبية : طولك طول ساقي وجالس تنصحني !! هش بس
التفتت اسماء لغادة حصلتها مسندة راسها على النافذة وغاطة بنومة عميقة .. تسندت بعد هي لحد مانامت صاحيات من فجر ومن صحن وهن من سالفة لسالفة ..
أول ماوصـلوا كان الكل نايم تقريبا .. ام فراس : كلهم ناموا واضح تعبانين
فراس ضرب البوري حتى فزوا كلهم .. : وصلنا انزلوا
اسماء : انفجر راسي من البوري وش ذا !
سحب الكل رجله وهو يتـوجه لمكان نومه .. اسماء مجرد مادخلت غرفتها .. حست نفسها مرتاحة وبنفس الوقت قلقة .. قدرت تعبر عن اللي داخلها اخيرا .. بس مو مرتاحة لنتيجة فضفضتها .. لبست بجامتها وهي تسحب حرف الأتش وتضمه وتفكيرها ياخذها ويوديها .. استوعب كلامي ؟ ولا للحين متسـاهل ويحسبني العب ولا ...؟ وفكرة تودي وتجيب حتى غطت بنومـــتها
***
صبــاح ... بالمطـار ينقل بصره ينتظر مسافره يوصل . لما انتبه لها وقف وهو يستقبلها : حمدالله على السلامة ! والله وتغيرتي
سارا : ههههههههه بجد ؟! ايه معلوم بتغير كم لنا عن بعض 3 سنين ؟
هيثم سحب شنطتها : يله السيارة برا
ركبوا وسارا تراقب ممرات الرياض وبداخلها خوف من اللي راح يصير : ................
هيثم : صاير شي ؟! احس جيتك للرياض مو لله
سارا : لا مافيه شي .. شدعوه تقول كذا ؟
هيثم هز كتفه : إحساس
سارا : لا تشيل هم .. مشاكل بسيطة وبتنحل
هيثم : عموما بأي وقت ابيك تعرفين اني موجود متى ما احتجتيني .. دوريني مباشرة وقت تحتاجين كتف تسندين عليه , راح اكون لك هالشخص
سارا ابتسمت : مشكور هيثم ... بجد وحشتني
هيثم : نصابة لو واحشك ماجلستي سنتين مانعرف عنك " تذكر " اييه على فكرة !! انتي كنتي تشتغلين بشركة فراس ؟ ترا قبل فترة كلمني لؤي ولد عمه وقالي انه يبغى يتواصل معك ضروري بس وقتها ماكنت اعرف وين ارضك من سماك
سارا : ولا تقول له انك حصلتني !
هيثم استغرب : ليش ؟
سارا بربكة : لا بس .. اكيد بيصرون علي اشتغل وانا خلاص كرهت الوظيفة عندهم
هيثم : .... اهـا
سارا : انت كيفك ؟ وكيف حياتك .؟
هيثم : ولا شي ... نفسها
سارا : ماتزوجت .؟
هيثم : لا والله فكرة تودي وفكرة تجيب ولا أدري وش التالية
سارا : اخس صرت تفكر في هالموضوع يعني !
هيثم : كم عمري .. خلاص طبيعي افكر فيه
سارا : الله يوفقك ويسعدك مع اللي ترضيك يارب
وصــل هيثم عـند الشقة اللي استاجرتها : يله مفروض اعزمك ع فنجال قهوة شي بس مشغول .. بعدين ان شاء الله
سارا نـزلت : يله بــاي
مجرد ماغادرت سيارة هيثم ... وقفت لفترة ثم رفعت يدها من جديد توقف لها تاكسي .. وترجع تركب
***
فـراس كان جالس بالبيت .. ولؤي في زيارته /
فراس بصدمة : إيش ؟!
لؤي : شفيك ؟ قلت بقول لواحد اعرفه بالسفارات سالفتي .. عشان يقدر يدخلها السعودية دون يعرف ابوي ثم احطه قدام الأمر الواقع
فراس : وعلى أي اساس بتقول لهذا اللي بالسفارات ؟ بيقول لابوك على طول
لؤي : انا واثق فيه فوق اني بعطيه مبلغ يسكته
فراس : وابوك بيعطيه مبلغ ينطقه ..
لؤي : ايه بس انا واثق بالرجال من زمان اعرفه .. بيساعدني يعني
فراس : انت واثق فيه وهو واثق في ذاك وذاك يثق بالثاني .. وسلم لي على سرك !
لؤي تنهد بضيق : خلني متفائل ... احسن
فراس : اللحين هي كارشتك ماتبيك ... وقت تتعدل قرر
لؤي طالعه بنص عين : هذا انت عايش مع وحده ماتبيك .. وقفت علي ؟
فراس : عايش مو أحب ! فرق لو سمحت ..ومو عايش كمان أتعايش
لؤي : اللي هو .. " تنهد " انا كمان ما أحب انا اعشق .. فرق لو سمحت
فراس : شالفرق ! كلها بلا
لؤي : الفرق انه اذا كنت تقدر تنام .. منت عاشق , واذا اللقمة ماتوقف بنص حلقك منت عاشق .. ملخص الكلام دامك أنت هو أنت منت عاشق
فراس طالعه بنص عين : احلف ؟
لؤي : اقول .. انا بروح البيت يخسك انت واللي جالس معك .
فراس : الله معـك صدعت بي بخرابيطك
لؤي ابتسم : ماودك تجي معي ؟ نوقف بمحل شي ؟
فراس بتعابير الكسل على وجهه : لايخي والله عجزان مالي خلق اطلع
لؤي : يله ... اشوفك على خير
دخـل فراس البيت .. كان ام فراس جالسة مع ياسمين وأنس : راح لؤي ؟
فراس وهو يسترخي على الكنبة : أيـه راح
ام فراس : الله يستر عليه
فراس طالع الساعة تشير لـ 9 .. : بكرة دوامات " طالع ياسمين وانس " شتسون سريرك انتي وياه
انس : لحظة بس هاللعبة وأقوم
ياسمين : لاراح أنس رحت ..
فراس : لكم دقيقة قبل افصل التلفزيون ولعد تشوفونه
استسلم انس وهو يسكر القيم .. صعد : تصبحون على خير
ام فراس : وانت من اهله .. " تنهدت " يازينها الدوامات بنرجع ننتظم
فراس : اسماء وين ؟ لاتصدموني وتقولون نايمة من اللحين
ام فراس : مدري وينها هالبنت اصلن مو بعادتها تداوم أول يوم ..
: الزين على طاريه
ام فراس : هلا .؟!
اسماء كان حاطه قبعة على شعـــرها .. فكته وهي تنفح بشعرها بطريقة مغرية : تاااااااااااااااداااا
شهقت ام فراس .. اما فراس طارت عيـونه من المنظر : ................
كان شعرهـا بلون الكحلي مدرجه ا طرافه بكحلي أفتح ... وقاصته فيكتوريا قصير مـرة .. وناكشته بشكل جميل وشبابي ... حطت روج أحمر تكمل جمـال شعرها اللي ماراح يفهمه لا أم فراس .. ولا فراس !
فراس : كأن احد غاسل شعرك بكلوركس !
ام فراس : وش هـــذا ؟! متى رحتي للمشغل اليـــوم
اسماء هزت كتوفها : مارحت ... غادة ما شاء الله كأنها مشغل " جلست تهز راسها بحماس " هي قصته لي وصبغته
أم فراس : وينهـا ؟ الله يهديها وش هاللون وش هالقصة
اسماء : والله ياماما حلـــو ... انتظري اداوم بكرة بينجنون كلهم عليه
فراس هز راسه : انشهد ان العقل نعمة .. لا ولا الثانية لاعبة عليك لو هو حلو صدق حطته براسها بس ماخذتك مصخرة يالهبله
اسماء بلكنة غـادة الجداوية اللي تستعملها باوقات نادرة : غدوشتي فاهمــا بالدوق .. إنتا ماتفهم خليك باركينق لو سمحت
فراس بقرف : تكلمي زي العـالم .. يكفي الزفته اللي فوق وانتي خليك امعه وش ماتقول اجري وراها
اسماء : ههههههههههههههههههه
ام فراس : وينها غادة عـاد ؟
اسماء : فـوق
ام فراس : شتسوي فوق كان نزلت معك ؟
اسماء : يوم سمعت صوت فراس تحت عيت .. شاسوي اذا ولدكم مسوي لها بعبع
ام فراس هزت راسها : والله هالصبغة مب زينة يا أمك .. غيريها احسن لك
اسماء : ترا جـويل براسها بتموت قهر لو تشوف صبغتي عشان تفهمون بالذوق بس
ام فراس : احلفي عاد .. مستانسة ان هاليهودية بيعجبها شعرك
اسماء : ما أحلف على امور سخيفة .. وبعدين انتي سببتوا لي يأس من الحياة عقب أمس فصرت احتاج تجديد
فراس : انتي يأستي من الحياة ؟ انتي خليتي الحياة تيأس منك
أسماء : يله خلاص انتهى الشــالشــو .. بصعـد خلاص
ام فراس : بتداومين بكرة ؟
اسماء : ايه بـداوم .. لاتنسين تصحيني
صعـدت اسماء حصلت غادة على راس الدرج : سمعتي ؟
غادة : القط كلمة وتفوتني كلمة .. بس كنت متوقعة مايعجبهم
اسماء : ماعليك فيهـم .. انا عاجبني وهذا أهم شي ! بصراحة يجنن مبدعه
غادة : ههههههههههههههه هوايتي من وانا بزر .. بس ابتسام ماتحب تغير بشعرها ماتعطيني وجه ماصدقت احصل احد يعطيني وجه
اسماء : تسلمي والله جميل ... يله انا بروح انام تصبحي على خير
غادة : وانتي من أهله
انتبهت غادة لخطوات أول الدرج ركضت مسرعة تصعد .. آخر شي تتمـناه تشوفه ! صعدت وهي تستلقي قدام التلفزيون صاير شغلتها هالأفلام ..
عـند فراس /
بنــص نومة ..انعقدت حواجبه بألم بنص نومة .. زاد انعقاد حواجبه والعرق ينصب من راسه ... ! فتح عيونه بضيق وهو يحس حلقة جـاف .. مسك مكان رصاصته .. " عقد حواجبه بألم وهو يرفع بلوزته " الجرح يطلع صديد .. عض على شفته هذي فايـدة الإهمـال ...
فتح درجه وهو يبلع حبتين ورا بعض دون مويـة ... بس مافيه فايدة يحس نفسه جسم بارد جدا مرمي في مقلاه حاره .. فتح باب بلكونته وهو يطلع يحس جو الغرفة مكتومة ... مسكه سعـال دون انفصال .. لكم مكان رصاصته يبغى الألم يسكن مافيه فايدة ..
البلكونة اللي فوق بلكونته مباشرة ... بلكونة شقته , غادة اللي دخلت غرفة النوم بعد ماداعبها النوم بنص الفلم .. لبست بجامتها وهي تستعد تنـام .. توجهت للبلكونة اللي تعودت تتركها مفتوحه وتنام عشان يتجدد هواء الغرفة .. اول مافتحتها انتبهت لسعلات متتالية .. عقدت حواجبها باستنكار للصوت .. خطت برا البلكونة وهي تتبع مصدر الصوت .. نزلت عيونها للبلكونة اللي تحتها .. انتبهت له ببنطـال البجامة ودون حاجه تغطي صدره .. فتحت عيونها بعدم تصديق للجرحين بصدره . . والثاني نازل تحت بمعدته .. فيه جرح متشكل على شكل ندبه قديم .. بس الثاني هو اللي يخوف واضح ملتهب ... : ............
كان مرخي جسمه على البلكونة وهو يسحب سيجارته ويوقف بنصها من نوبة السعال .. ماسك فمه يحاول يسيطر على هالسعال اللي مايوقف : اخخخ
قبضهـا قلبها وهي تشوفه بهالهيئة .. معقولة فيه هالجرحين ويتصرف طول اليوم كأن مافيه شي .. الجرح اللي بصدره هذا الرصاصة .. اللي تحته شنو ؟! " ظلت تتأمله " كلام كثير صار بطرابلس يوضح ان هالرجال وراه قصـه .. بس ليش مايتهشم ؟ ليش مايون ؟! " عضت على شفتها حتى ادمت " دخلت داخل وهي تسحب شـال طويل اورانج من درجها .. ثم راحت للمطبخ وهي تطلع مويـة بدرجة حرارة الغرفة .. واخذت سطل مويـة معه منشفة نطقت بقهر من نفسها : ولو انك ماتستاهل ..
فــراس /
اثناء ماهو جالس يعاني .. ويحاول يلتقط انفاسه .. عقد حواجبه من الشال اللي نازل ومربوط فيه قنينة موية رفع راسه لفوق ماشافها .. مجرد الشال نازل هزت الشال بمعنى " استلم " مد يده وهو يفك الشال من الموية .. وللحين متعجب اكيد شافته .. تافف وهو يلعن مكان البلكونة البايخ .. شافته بهالوضع البايخ .. سحب قنينة الموية وهو بيدخل لكن وقف لما انتبه للشال ينزل مرة ثانية ومعاه سطل موية بمنشفة : ..............................
تراجع عن الدخـول وفك الشال وهو يسحب السطل .. وبكل مرة يرفع راسه مايشوفها .. اكيد ماتبيه يشوفها : ...
غـادة فوق كانت جالسة عشان مايشوفها .. وماتلقط الا يده المرسومة بالعروق .. وهي تفك الشـال .. جلست تفكر وش ممكن ترسل بعد , انتبهت لسلة ملابسه اللي مازالت ام فراس مصرة تصعده .. سحبت منها بلوزة ثقيلة وربطتها بشالها مع ورقة .. ونزلته مرة ثانية استلمهـا وهو يقرا " تدفى كويس واترك الوجع يحرق بصدرك ونام " .. شهقت غادة وقت انفلت شالها من يدها .. مسكه فراس لايطيح ... عقبها سمع باب البلكونة يتسكر : ................
ابتسم بخفة وهو يقرا الورقة مرة ثانية .. : وانا تاركه يحرق بصدر غيري ؟ بس لازم تردها يعني البزر ..
لبس البلوزة مبـاشرة .. رغم ان ريحتها موجودة فيها ماعارض .. وهو يدخل ويرمي شالها على كنبته ويحس تنفسه رجع ينتظم بعد الهواء النظيف ..
***
ابو نايف بساعات متأخرة من الليل مازال بمكتبه ... دخل سكرتيره : عند زايره
ابو نايف: بهالساعة ؟ مين ؟ ام يزيد ؟
السكرتير : لا تقول اسمها سارا .. وتبيك ضروري
ابو نايف لقط الأسم مباشرة نطق بعصبية : اتركها تدخل !!
بعد فترة دخلت المكتب .. وهي مخبية وجهها لأول مرة بالطرحة .. لانها تخاف وجوده ويلقطها مباشرة : ....
ابو نايف وهو يحكم اعصابه : وش جاية هنا تسوين !!
سارا : السلام عليكم ... ابو لؤي ؟
ابو نايف بغضب : ايه !
سارا تنهدت : جاية اساعـدك ... واساعد نفسي ..
Like
موضى و راكان
likes this.
رد مع اقتباس إقتباس متعدد لهذه المشاركة الرد السريع على هذه المشاركة
#50 أضافة تقييم إلى لامارا تقرير بمشاركة سيئة
قديم 19-05-17, 08:45 PM
الصورة الرمزية لامارا
لامارا لامارا غير متواجد حالياً
مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
"تشابتر ثنين وأربعين "
أستمعي للرجل جيدا من باب الذوق ..
أما من باب الإحتياط ؟!
فلا تصدقي كل ما يقوله لك
• جنون المطر
بعـد ليلة عصيبة متعبة .. صحـى بكسل على صوت المنبه , تافف بقرف .. هو متى نام عشان يصحى اللحين ؟! استقعد بجلسته وفور حركته رجع الجرح ينغزه عقد حواجبه بضيق وهو ينطق بقرف : الله ياخذك وجع !
فتـح جدوله يحـاول يراوغ اشغاله .. لكن مستحيل اليوم بالذات حضوره مهم , مثل كل يوم ..
دخل الشـاور بصعوبة بالغة قدر يخلص حمـامه .. وقف قدام المراية وشكل جرحه زايد قبح قبح اكسبه قناعه انه لازم يزور المستشفىغير وجهه اللي يحس كبر عشر سنوات من الهلاك اللي شافه أمس , لبس ثوبه وتراجع عن العطـر هالمرة ... أي ذرة عطر بتزيد الوضع سوء بس ..
توجه لطاولته ياخذ اغراضه المهمه المرمية فوقها ... انتبه للشـال الأورانج بالكنب , فجأة استوعب .. امس ؟ صـح امس ...
حدق في الشال لفترة .. ثم سحب اغراضه ودخلها جيبه وهو ينـزل وكأنه يأجل التفكير .. أو يمكن يلغيه ؟!
صبـاح اليوم نشيط عكس العـادة ... أسماء : محـــد طلب رايك يالفصعه !
أنس وهو يفطر : والله المصخرة ... " التفت لامه " بالله يمه هذي كيف صارت اختنا ؟! شكلنا خلصنا العقل عليها
اسماء شهقت : حسبي الله على بليسك ... " التفتت لفراس اللي تو نزل " صباح الخير ! ولو سمحت انا امنعك من أنس التطبع اللي جالس يصير مو طبيعي
فراس ماله خلقها .. تجاهلها وهو يسحب كاس قهوتـه : .....
انس : هاهاها سفهك ! روحي اوقفي بدال المزهرية بالله
فراس رفع عينه لأنس ونطق بحدة : أنـــس !
ام فراس طلعت من المطبخ وبيدها صحن فاكهة : صح النوم يمه
فراس : صح بدنك
ام فراس : انتو خلوا منكم الهواش بسرعة السواق ينتظركم ! اخلصوا افطروا
اسماء : انا مالي دخل .. بيجيني بدر يوديني مع ميهاف انتو يالبزارين اخلصوا
ام فراس : وليش تخلينه يتعنى عشانك ! كان رحتي مع السواق وبس
اسماء : اذا ماتعنى عشاني يتعنى عشان مين بالله ؟!
ام فراس : ياسمين لاتنسين الورقة ..
ياسمين طلعت ورقة وهي تتوجه لكرسي فراس ..وتحطها جمبه : وقعها ..
فراس : شهذي ؟
ام فراس : بداية السنة عشان تستلم مقررها
فراس وقع على السريع وهو يكمل كاسه ... ام فراس ضيقت عيونها فيه واضح وجهه شاحب وغريبة يكون فيه نقار بين اخوانه الصغار ومايهجدهم : فراس ؟! يمه فيك شي ؟
فراس وهو يحتسي فنجاله : شوي صداع بس
ام فراس : بسم الله عليك .. فيه صداع ارتاح اليوم مو لازم تداوم
فراس دون نفس : ومن بيخلص الشغل ؟ خيـالي ؟
ام فراس : وهالشغل مايتأجل ؟
فراس : لا مايتأجل .. انا اللي أتاجل
ام فراس عقدت حواجبها من نبرته .. مره ماله خلق واضح , وقف وهو يطـلع مباشرة .
***
زفرت إبتسام بضيق من شكل معجون الأسنان مرمي على المغسلة دون غطا .. رجعته مكانه وهي تطلع لنايف بغرفة النوم جالس بكسل على اللابتوب : نايف ! كم مرة اقولك لاتترك المعجون كذا ؟! اموت انا ؟
نايف : بس معجون ترا .. لايطق لك عرق
إبتسام : بس معجون ؟! وملابسك المرمية ... من بيصدق اني تو رتبت الغرفة قبل ساعتين ! جيت بخمس دقايق وعدمت المكان
نايف هز راسه بتبلد وهو يكمل شغله .. هزت ابتسام راسها بيأس وهي ترجع ترتب , اثناء ماهي تشيل بنطلونه انتبهت لجواله داخله : ناسي جوالك ببنطالك ! لو دخلته الغساله وش بتسوي ؟
نايف ببرود : بشتري جديد
إبتسام قبل تجيب جواله لعنده انتبهت ل 24 مكالمة فائته من نهى .. نطقت بضيق : وش كل هالمكالمات ؟!
نايف : ما أدري ولا ابي ادري
ابتسام : حتى لو ضروري شنو 24 مكالمة ؟!
نايف رفع عيونه لها وابتسم : تغارين ؟!
ابتسام حطت جواله على الطاولة : لا عادي .. بس انا اقول رد وخلصنا احسن
نايف : افا مفروض تمنعيني اكلمها ! وش هالجفاف رد وخلصنا !
إبتسام : ليش امنعك ؟ حط ببالك اني مستحيل امنعك انك تكلم غيري او حتى تتعرف وتحب غيري .. لأنك لو تحبني صدق كان بتمنع نفسك دون أقولك
نايف ضيق عيونه : يعني هذا معناه لاتكلمها بس بطريقتك الملتويه ؟
إبتسام : ...... هذا معناه عقلك براسك وتعرف خلاصك !
سحبت سلة الغسيل وهي تطـلع .. نايف عقد حواجبه مافهم شي , اساسا صاير مزاجها هاليومين مقفل .. من رجعوا من المزرعة , بس نفسية الحوامل مايتعبث معها .. عنده خبره قبل كذا ,
***
هيـــثم : لا اترك هالوقت لإجازة الربيع أحسن لك
مؤيد : وانا وش مستفيد منها ؟ اخذها رسمية احسن
هيثم : تستفيد كثير .. وقتها مره كويس غير انها طويلة لانك تقدر تمسكها مع اجازة رسمية
مؤيد : بس بخسر الإحتياطي حقي
هيثم : والله اللي يعرس يتحمل !
مؤيد تنهد : ظنك يعني .؟!
هيثم : ايه صدقني ماحتندم .. لانك لو تروح موسم سياحة راح تكون الأسعار ضاربه غير الزحمة والقرف هالوقت ركادة لك
مؤيد : خلاص على قولتك .. وين ظنك اسافر ؟
هيثم دون تفكير : استراليا .. سدني على طول !
مؤيد : يمه مسرع جاوبت ! ليش ؟
هيثم : جوها خفيف وحـلو .. مو جو مدينة يمرض ولا عاد مقطعة , وسط يعني
مؤيد : رحت لها من قبل ؟
هيثم : لا .. بس درست مع ناس من هناك كلامهم مره يطمن غير انهم شعب كويس
مؤيد تنهد : مو مصدق بتزوج .. لو ومو بس كذا باخذ اللي تمنيتها من زمان راح اكون لها اللي تبي بكون صديقها وقت حزنها .. حبيبها وقت حاجتها واخوها وابوها واللي تبي ..
هيثم : انا اقول خلك بنكها تختصر كل وجع الراس هذا بشيء واحد !
مؤيد : فداها والله اصير بنك .. بس ابوي الظاهر ناوي يتركني ادفع نص المهر يعني ابي اصير بنك بجد
هيثم : انا اقول احسن لك تدفعه كله .. خلك مكتفي بنفسك من اللحين قدامك مسؤولية
مؤيد : ايه لان قدامي مسؤولية ابي اوفر !
هيثم : والله انا لو يجوني عيال ماراح ادفع القرش .. انا ادفع وهو ينبسط خله يسنع نفسه
مؤيد : جعلني مب ولدك بس !
هيثم : آمين
مؤيد : مفروض الممرضات والعالم اللي طايرين فيك يعرفون جانبك المجرم هذا عشان يحرمون يعجبون بك بعد !
هيثم : لا تخاف اول معجبه عرفت هالجانب وماشفت الا غبرتها
مؤيد : اول معجبة ؟!
هيثم وهو منوجع من طريقتها في الإنعتاق منه : ..... المهم زواجك متى ؟
مؤيد : لا لا تعال من اول معجبة ؟! اللي تزورك كل شوي ؟
هيثم : يالقفك ! " وقف " قوم بس تاخرنا
مؤيد وهو يلحقه : وين رايح ابعرف يعني ابعرف
هيثم : اقول فك عني .. بدال ماتنشب لي اشكرني راح البريك حقي كله اخطط عنك
مؤيد : شكرا مع خالص احتقاري !
هيثم وهو يكمل طريقه : عفوا مع خالص حقراني
مؤيد وهو يخز ممرضة : يالبيه ياغمازاتها .. شي يقتل ان شاء الله زوجة المستقبل فيها غمازات
هيثم انقهر بجد : كف عيـونك ! استح على وجهك فيه وحده بذمتك
مؤيد : يمه وش قلت ؟! بس ادعي ان فيها غمازات
هيثم : تدعي عليها بتشوه في عضلات الوجه ؟! هذا وأنت دكتور
مؤيد : علامة جمال ياغشيم !
هيثم : طبيا هي تشوه .. ماتقدر تنكر
مؤيد : إلا اقدر انكر ! طبيا يسوون عمليات تجميل عشان الغمازة
هيثم : طبيا يشوهون عضلة الوجه عشان الغمازة
مؤيد : رب ضارة نافعة يخي
هيثم بتسليك : خلاص زين خذ معك دريل اخرق خدها اول ماتشوفها , اوك ؟
مؤيد : ههههههههههههههههههههه تخيل بس
قابلوا دكتور بطريقهم : ههههه جالس تودع العريس قبل يروح
هيثم : شدعوة بيروح المريخ؟ كلها شهر وراجع
مؤيد : بتفقدني وقت اغيب ؟!
هيثم : لا .. بغيب وقت تغيب , باخذ اجازة
الدكتور : صدق ؟!
هيثم : ايه .. مقدمها قبل كم يوم ووافق عليها الرئيس .. هالكم يوم اخلص معاملاتي وباجز
مؤيد : ليش طيب ؟! فيه شي ؟
هيثم : بوسع محيطي شوي .. يمكن القى نفسي بمكان ثاني واشتغل فيه
مؤيد : لا عاد !
هيثم : ماتدري وش الدنيا مخبية لك ..
***
فـراس /
لؤي تنهد : اليـوم وانا امشي بالشركة جالس احس بشوشرة .. شكل العالم بدوا صدق يستغربون وضعي
فراس وهو يكمل شغله : وليش تتضايق ؟ رصيد شهرة ببلاش .
لؤي : لاتقول كذا .. امي اليوم تقول حتى اهلنا عمتي وخالاتي صاروا يسألونها ..
فراس منغمس بشغله : ................
لؤي : اللي يقهر كلهم يشكون فيني .. بجد احيان مواقف صغيرة تبين لك انت شنو بالنسبة للي حولك ! يحسسوني اني مقصر بحقهم بجد ..
فراس وهو يزيح الملف ويسحب الملف اللي بعده بعجل : ماقصرت بحق احد .. بس الحيوان حيوان فلا تفكر كثير
لؤي : أبوي له يومين مطنشني مدري شالسالفة كانه نسى الموضوع ..
فراس : او يمكن جالس يرسم نهاية للموضوع
لؤي طالع فراس : ............. كيف يعني ؟
فراس رفع عيونه له .. وهز كتوفه بخفه : انت ابخص
لؤي تنهد بضيق : احيان افكر اني جالس اظلمها بكل هالظروف ... عشان واحد مايستاهل واناني مثلي
فراس : تحسب انك متواضع وانت تقول هالحكي ؟! لا انت جالس تدمر نفسك وشخصيتك ذاتيا عشان وحده ماتستاهل وانانية مثلها !عز نفسك شوي يرحم والديك
لؤي : ياليل ! يخي انت ليش مو متفهم كذا ! بحقها البنت تزعل وقت اسحب عليها ... بس انا مو قارفني الا حكي هالناس حتى اللي خادمهم طول عمري يتكلمون
فراس : عندك عيـون ؟!
لؤي كبس بعيونه : ايه عندي .. ليه ؟
فراس : اجل تشوف الناس باذنك ليه ؟! دامهم قدام عينك ساكتين وقتها مايهمك وش يقولون من وراك .. هذا اذا قالوا من الإساس .. يمكن امك تبي تحسسك بس انك لازم تغير وضعك , وانا بصراحة ماسمعت شي
لؤي : تتوقع .؟! " تنهد " الا اقول شخبارك انت والمدام المصونة ؟
فراس : مطول انت هنا ؟!
لؤي : ما اعجبتك جلستي
فراس : مشغـول .. وانت واضح جاي تسولف
لؤي : لا يخي والله ماعندي سوالف حتى بس شاسوي احب احكي معك! وبعدين مافكرت تطردني الا يوم جبت طاريها !
فراس : لا من أول جالس اقول هالسالفة بيخلص بس واضح انك راعي طويلة
لؤي : ايييه حال الدنيا اللي يبون بعض متعذبين ! واللي كارهين بعض حاصلهم القرب.. نيالك يخي
فراس بنص عين : مغصتني بهالحكي ترا .. اخلص بجد اطلع
لؤي : لاحظ اني صديقك الوحيد ترا .. وتطردني ؟! صدق المفرط بتجلس لحالك طول عمرك ترا
فراس : ابد .. يقولك قلل ناسك يرتاح راسك
لؤي : اقول انا باخذ باقي كرامتي واذلف .. اشوفك بعدين يالئيم
فراس : على خير .
مجرد مـاطلع ... سكر فراس الملف وهو يوقف ويستعد يطلع قابله قبل يطلع رئيس الفرع الداخلي : طالع طال عمرك ؟
فراس : هاه وليد شبغيت ؟
وليد : لا بس .. فيه المشرف موجود ويبغى الأسعار اللي طلبها
فراس زفر : موجود اللحين ؟
وليد : ايه نعم ..
فراس كان حاس انها ماراح تزبط له : دخله غرفة الاجتماعات .. دقيقة وأكون عنده
***
غـادة تنهد بزهق من نفسها : خلاص تو شفته قبل يروح الدوام من الشباك ! وشكله مافيه شي .. " لانت لمحتها " بس شكله امس كان بالحيل تعبان ..
مسكت جوالها تدق على ابتسام تشغل نفسها .: هلا غدو
غادة : هلا بالقاطعة ! عارفة انك ماصدقتي انتي ونويف انقلع من وجيهكم ! بس شوي اهتمام يخي مره وحده نسوني مايسألون ولا شي
ابتسام : هاو شوي شوي علي كليتيني تو رادة !
غادة : هههههههه كيفك .؟
ابتسام :ههههه تمام ... مايحتاج اسالك كيفك من صوتك واضح معنوياتك كويسة
غادة : تقدري تقولي
ابتسام : لا مستحيل .. الله يتم لك لاتنضلين نفسك
غادة : تخيلي امس سويت شعر اسوم يفوتك شكله مره جمميل , جاني قهر ابي اقص شعري !
ابتسام : اوك قصيه
غادة : بس حرام شعري تعبت لين صار طويل !
ابتسام : معناها خليه
غادة : بس اسوم تقول القصير بيجي حلو عليك
إبتسام : اجل قصيه
غادة : بس القصير التسريحات ماتضبط عليه
ابتسام : افففففففف !!
غادة
بغيت انسى انك مريضة بهالأمور !
غادة : لا خلاص ماحقصه .. يمه منك بس اسألك
إبتسام : يوه غادة عندي مكالمة بالإنتظار سكري احاكيك بعدين
غادة : اوك ..
سكرت ابتسام وهي ترد : هلا هيثــــم .؟!
هيثم : هلا بسمه .. كيف حالك ؟
إبتسام : كويسة .. إنت شلونك ؟
هيثم : ماعلي .... " سكت لفترة ثم نطق " شعندك اليوم ؟
إبتسام : ماعندي شي ... ليه ؟
هيثم : عازمك لمطعم .. نتعشى سوا
إبتسام : وانت فاضي تعزمني ؟
هيثم : ايه اليوم فاضي لك ... اهم شي انتي افضي لي وتعالي
إبتسام : هههههه وانا اقدر اقول لا ؟ ولا يهمك بس وش رايك تتعشى عندي وبس احسن
هيثم : لا لا ! مطعم اريح لي ... خلاص راح امرك بدري مالي خلق الزحمة
إبتسام : اوك من عيوني
هيثم : اشوفك ..
سكر السمـاعة .. تنهد وهو يمسك راسه , صعب عليه يتنـازل .. طالع الساعة وهو يفرك عيونه ,سحب اغراضه وشنطته وهو يستعد يطلع من المستشفى
***
طـلعت ميهاف واسماء من الجامعة .. وركبن مع بدر , اسماء بحماس : بدووووري !! وش رايك كل يوم توديني وتجيبني !
بدر بسخرية : هههههههههه اسومتي ! وش رايك تطخين راسك باقرب جدار ترجعين للحياة الواقعية
اسماء كشت عليه : مالت ! هذا وانت اخوي ...
بدر : انا بيتي وين .. وبيت اهلي وين .. والجامعة وين ! فاضي لهالمشوار كل يوم ؟
اسماء : مايهون عشاني .؟
بدر وهو يحرك : لا مايهون
اسماء : وبعدين وش بيت اهلي هذي ؟ مو بيتك يعني !!!
بدر : ياليل ... اقول شخبار الجامعة اليوم ؟
اسماء : ميهاف قولي له .. انا زعلت
ميهاف : هممم .. كويسة , بس بدر انا امي تو كلمتني تقول تعالي تغدي معنا ..
قاطعها بدر قبل تكمل : بوصلك اللحين
ميهاف : وأنت ؟
بدر : ماحضيع ..
اسماء : تعاااال معي نتغدى سوا مع امي بتنبسط
بدر : هذا اللي بيصير
***
ام فراس .. ابتسمت بسعة وهي تشوف بدر يدخل واسماء : يالبى من دخل .. هلا والله مابغيت تنور ؟
بدر وهو يبوس راسها : هههههههه لو ادري من زمان اني مهم كذا كان حصلتيني !
ام فراس : افا وليدي وعندك شك انك مهم ؟ بتتغدى معنا ؟
بدر : أيـــه
اسماء : يمه وين غادة ؟
ام فراس : ما ادري .. مانزلت من صبح
اسماء : غريبة ! " طمرت " بروح اشوفها
بدر : ووين فراس ؟! مفروض رجع اللحين الساعة 2 ..
ام فراس : شكله مشغول .. ادق عليه مارد وارسل رسالة انه مشغول
بدر : الله يعيــنه .. يعني ماراح يتغدا معنا ؟
ام فراس : ماظنيت ..
***
بيت أبـو نايف /
دخل لؤي البيت وهو ينتبه لأمه وابوه وميهاف جالسين سوا : اووه ميهاف عندنا
قامت ميهاف تسلم عليه : وحشتني يادب كيفك ؟!
لؤي وهو يطالع ابوه اللي يتغدى بصمت : مشتاق لك اكثر شلونك انتي وشلون بدر ؟
ميهاف : شفيك ناحف كذا ياولد ! ماتاكل اجل ؟
لؤي ( وهو اللقمه تنبلع بحلقي بهالبيت . ؟ ) : وش تتوقعين نفسية واحد حابسينه أهله بالبيت ! لاشغل ولا مشغله
أبو نايف : أنت اللي اخترت تكون كذا ! لاتخليني انشر غسيلك قدام اختك ... يكفي انا وامك طحت من عينا
ميهاف استغربت .. مشاكل لؤي كاثرة من ترك وظيفته واللحين شكل فيه مشكلة بعد : شفيكم صاير شي ؟
ابو نايف : اللي صاير يا أبوك اني ماعرفت اربي مضبوط ! هذا اللي صاير .. مجتمع محافظ زينا يجي هذا يسود وجهي فيه
شد لؤي على قبضته : معك حق يبه .. حنا مجتمع محافظ اكيد .. محافظ على التخلف والجهل والتعصب !
أبو نايف : تتمصخر .؟! انقلع من وجهي ... انقلع لابارك الله فيك ! اصلن حقارتك هي انك نسيت أهلك وكل اللي وراك بسبب وحده عرفتها عن طريقنا .. انا الغلطان اللي تركتك تشتغل اساسا ! اذا كنت بترضى الذل لي ولأهلك فياليتك ما أنولدت ولا جيت على هالدنيا من الاساس !!
ميهاف فتحت عيونها بدهشة " وحده " لاتكون اللي وراها صورتها ... كانت خايفة من عواقبها من شافتها واللحين : ...
ابو نايف : انا مدري ليش تغيرت كذا ! ولا متى حتى تغيرت كذا .؟!
لؤي بألم : أقلدك .. وين المشكلة ؟
أبو نايف : ليتك تقلدني كان ماصار كل هذا ! اذا هذا حال شبابنا الله يخلف على بكرة من اللحين
لؤي : بالضبط .. حنا الشباب يبه مو أنت ! اتركني اخطط لبكرة انا اللي راح اعيشه مو أنت ... مو كافي ان مستقبلكم الفاشل هو حاضرنا اللحين !
ضرب ابو نايف بكل قوته على الطاولة : لــــــــــــــــــــــؤي !!!!!
عبر طريقه يصعـد لفوق ينهي هالنقاش اللي ماراح يرتقي أبد ... صار يكره هالبيت .. يكره الرياض يكره هالمدينة اللي اضطرته يعيش هالحب كله تزوير وتهريب , مجرد مادخل غرفته مسك جـواله وهو يفتح على صـورتها ... ابتسامتها كانت كافية انه يعيش باقي عمره دون ندم .. تنهـد هو يشكي شوق ولا يشكي ألم .؟ كتب رسالة يحاول يفرغ فيها اللي بداخله : ( ماني متعـود احد يفهمني .. ماني متعود لدرجة أول ماعرفتك حسيت الموضوع مزحة أكيد .. واللحين بلاك رجعـت اعيش شعور ليش صعب عليهم يفهموني زيك؟ .. )
رمى جـواله وهو يستلقي .. صار محتار وش مفروض يسوي ؟! الواقع بدا يتسلله ويحاول يفهمه ان ابوه معه حق مافيه أمل انهم يقبلونها .؟! قطع تفكيره صوت جواله .. رفعه بكسل لكن تعابيره انقلبت لتعجب ! ماتوقعها ترد مجرد ارسلها تفريغ ... فتح الرسالة
( الدنيا مشوار طويل فيها الصعب وفيها السهل .. وفيها برضو المستحيل .
السهل .؟! انك تلقى احد يجرحك .. حتى أنت كان سهل عليك
الصعب .؟ انك تلقى احس يحس فيك ..
والمستحيل .؟ تلقى احد يمسح دموعك ويبيع الدنيا ويشتريك ... كان مستحيل علي حتى أنا
آسفة .. )
لؤي حس بمرارة عقب ماقرا رسالتها ... بلع ريقه وهو يرسل ( كيف مايا .؟! اقلها صورة ... أكيد كبرت مو ؟ )
لكن هالمرة مافيه رد ... ! حس بهلع داخله . . فيه حاجة غلط ! رسالتها تجيب المـر .. مر فوق مر كلامها لما راح امريكا .؟ رغم انه عبر .. مازال يحس بمرارته داخله ..
***
اثناء جلسة العصر .. ام فراس وبدر جالسين ..
وقف بدر بعد ماخلص فنجاله : اكرمكم الله .. يله انا ماشي .. تامرين شي ؟
ام فراس : اقول بدر .. فاضي اللحين ؟
بدر : ايه ماعندي شي ..
ابتسمت ام فراس بوسع : اجل وش رايك تطلعنا معك للحديقة وبالمرة نتعشى سوا
بدر عقد حواجبه : ليش .؟
ام فراس : هاو ؟ مشتهيه اطلع معك .. واخوانك حتى فاقدينك
بدر بمضض : اوك .. اللحين ولا متى ؟
ام فراس وقفت بحماس : اللحين !
صعدت مسرعة : اسماء !!! انس ! ياسمين !! يله تجهزوا بسرعة بنطلع
ياسمين : فين ؟
ام فراس : مع اخوك بدر .. بنطلع نتمشى
طلعت اسماء : شالسالفة ؟
ام فراس : كم مرة بعيد انا !! اخوك بدر بيطلعنا معه نتمشى ..
اسماء : يله ... اوه لحظه بروح اقول لغاددة تجهز
مسكتها ام فراس من كتفها : لا غادة ماراح تروح معنا !!
اسماء : ليش يمه غريبة عليك !!
ام فراس : حنا بنطلع مع بدر .. بنجلس معه مانبي ننفصل " همست " وبعدين راح نرجع متأخر خلي البيت يفضى يمكن يزهق فراس ويصعد ولا هي تنـزل يتدابرون عاد
رفعت اسماء حواجبها : اهــــــــــا !! والله منتي بسيطة يا أم فراس ... كل هذا تخطيط؟ طيب فلنفترض مثلا بس ان فراس مارجع الا اخر الليول كالعادة تجلس البنت لحالها ؟
ام فراس : لا هو كلمني وقال بيرجع بدري بيتعشى معنا .. فخلينا نطلع وهو يرجع
اسماء : طيب واذا نزلت غادة وحصلت البيت فاضي ؟
ام فراس : انا راح اكلمها أول مانطلع وبقولها حنا طالعين ومشغولين وفراس بيرجع يبي عشا وهي تسوي اللازم
اسماء : والله يا يمه حركات عجز صدق
ام فراس قبصتها : عن الحكي الزايد واخلصي علينا !
سوت ام فراس اعصار لين خلص الكل وركبوا السيارة .... اول ماركبوا دقت ام فراس على غادة : هلا والله !
ام فراس : هلا غادة .. شلونك طيبة ؟
غادة : ايه حمدالله .. راحت علي نومة اليوم فمانزلت
ام فراس : لا عادي الله يحفظك .. بس حبيت اقولك ترا محد بالبيت بدر اصر علينا نطلع معه من زمان عن اخوانه
بدر فتح عيونه وهو يأشر على نفسه : انا ؟!
ام فراس ضربت كتفه بخفه وهي تاشر له يسكت : فعاد طلعـنا وميهاف اصرت نتعشى عندها ... فراح نتأخر
بدر فتح فمه وهو يطالع امه : ياكبرها عند الله ! ميهاف بعد ؟
غادة وصوتها دخله احباط : اهــا .... اوك الله يحفظكم انبسطوا
ام فراس : ايه نسيت اقولك ... فراس بيرجع على الساعة 8 كذا ويبي عشى اكيد اليوم ماتغدى مشغول , فانتبهي لعشاه وسوي اللازم
غادة : هـــاه .؟!
ام فراس : يله في امان الله هذا حنا دخلنا عند الناس .. مع السلامة
سكرت بسرعة قبل تعطيها فرصة لأي كلمه .... بدر يطالع امه بنص عين : ........
ام فراس : لاتطالعني كذا ! شاسوي اذا اخوك اعوج ... خله يحتاج لها غصب
بدر : هي مرته طبيعي بيحتاج لها دون كل هالدراما !
ام فراس ( بلاك ماتدري ) : ................
بدر : وبعدين ميهاف مو بالبيت ترا ... كيف حطيتي نفسك معزومة عندها
ام فراس : بس عشان اسكتها ... حنا بنروح المنتزه ونغير جو ولاخلصنا رحنا لخالاتك وسهرنا عندهم
اسماء : ههههههههههههههههههه ماراح استغرب من نفسي اجل لما كنت اسوي تخطيطات كذا ! طلع العرق دساس يمه هاه ؟
ام فراس : جب ولا كلمة ... صدق البازع هذا لمصلحتهم مو لعب بزران
***
ابتسام :
كان البانيو مغري لدرجة ماقدرت تحرك نفسها تطلع لمدة ساعتين بالأخير سحبت نفسها بصعوبة .. لبست حاجة تدفيها .. مع بطنها البارز بالبلوزة الصوف .. كانت تنطق نعومة .. سليبرز عشان تدفي رجلها .. شعرها المبلول تركته على حاله .. نزلت تحت وهي تجهز لها حليب دافي عشان تجلس تختم معاملات قسمها .. لازم تخلص كلش قبل تاخذ اجازة امومة اثناء ماهي جالسة .. فجأة فزت على اللي نغزها من ورا حتى ضرب بطنها بالطاولة قدامها : اااااااااا ! " التفتت بفزع " نااااااااااايف !!!!
نايف خاف مباشرة : بسم الله عليك ... عورتك .؟
إبتسام وهي ماسكه بطنها وعاقدة حواجبها : بالله هذي حركة !؟ فجاة تجي تخوفني !
نايف جلس القرفصاء قدامها وعلى وجهه تعابير تأنيب الضمير : آسف والله .. شاسوي ماطرا علي ..نروح المستشفى؟
إبتسام سحبت هوا وهي تتنفس : لا عادي ..
نايف إبتسم : ياكثر ماتقولين لي لا عادي وانا احس ودك تهفيني بكف يلف وجهي مرتين !
ابتسمت إبتسام : من جد ههههه
نايف : اخيرا ضحكتي ! اليوم كله مابغت تطلع هالضحـكة .؟ " ضرب خدها بخفة " شلت همك هاليومين .. احسك مو تمام
إبتسام : الله يعين .. وهو العيال ببلاش ؟
نايف وقف وهو يجلس بالكرسي المقابل : وهو الجنة تحت رجليكن ببلاش ؟
إبتسام : إلا اقول .. ادق عليك قبل ساعة ماترد ليه ؟! تخيل لو كنت ابغى شي ضروري .
نايف : شوفي يابنت الحلال من عاداتي السيئة .." قلب وجهه بسخرية " وياكثرها بصراحة ! ان علاقتي انا وجوالي مشوهه اتمناه مايرن وانبسط اذا تعطل أو خرب .. واذا رديت ارد وانا مالي خلق
إبتسام : لا عاد ؟ طيب اذا جتني الولادة .. وادق عليك ماترد؟ راح اقول معليش عادة سيئة ؟
نايف : لا المشكلة اني وقح .. لاشفت اللي حولي جوالاتهم ترن ويردون احسدهم ! اتمنى اني زيهم بس .. ماتضبط ماش اكره جوالي صدق
إبتسام : هذي مو عادة سيئة ياحلو .. هذا قلة مسؤولية واهتمام
نايف : صدقيني كل اللي يعرفوني من وانا صغير فاهمين ان هالموضوع عادة فيني لا أقل ولا اكثر
إبتسام : اجل لاتزعل اذا قلت لك ان الجدار مفيد اكثر منك !
نايف بتفهم : معك حق والله .. اقل شي فيه فيه الشاحن .. والمكيف .. اكيد مفيد اكثر مني !
دق جـوال ابتسام ... نايف : مين .؟
إبتسام : هذا هيثم لحظة .. " ردت " هلا هيثم ... ايه ايه جاهزة ؟ اوك
سكرت السمـاعة وهي توقف : حبيبي انا طالعة اتعشى مع هيثم عازمني ..
نايف فتح عيونه : وانا .؟!
إبتسام وهي تلبس عبايتها : بتحصل صحن بالثلاجة .. حرره وبالعافية
نايف : لحـــالي ؟ وبعدين ماقلتي لي انك معزومة ويا هيثم اليوم
إبتسام : نايف مو وقته الولد برا ... يله باي
طلعت مبـاشرة بينما نايف تكتف وهو يتحلطم : ولا عزمتني معهم حتى !
***
غـادة كانت تتحرك روحة وجيه وهي تحس بورطة ! هو يبي عشاء يعني ؟ طيب يمكن مايبغى مني ... افففف .. لا ولحالنا بعد ؟ عقب امس مدري كيف بطالع في عيونه اساسا .. احقره وبس ؟
مسكت راسها وهي تحس بصداع ... دقت على منقذتها : هلا غدو
غادة وهي شوي وتبكي : ابتسااااام ...
ابتسام : شفيك خرعتيني ؟
غادة : تخيلي ..." بلعت ريقها " ام فراس طلعت هي وعيالها كلهم .. وتقول بتسهر برا وفراس بيرجع بدري ويبي عشاء وتبغاني اسنعه
ابتسام : طيب وش فيها .؟
غادة بربكة : ... هو ... امس صاير بينا موقف غريب .. مدري كيف بتصرف
ابتسام : غادة ! اسمعيني زين .... اعتبري هذي فرصة ذهبية البيت فاضي ومافيه غيركم .. اضبطي نفسك واكشخي مايحتاج اوصيك بالكشخة .. وسوي طبخة تفتح النفس وجهزي جو رايق خليه يهتم فيك شوي عشان تكسبينه يالهبله ! كيف تبغين رنيم ومدري ايش وانتي كذا ! وبعدين خلاص تزوجتوا تسنعوا عن الهبال !!
غادة كانت فاتحه عيونها بوسعها وابتسام تتكلم : اقول أبتسام ! شكل حرارتك مرتفعه ... روحي من وجهي هناك .. قال ايش قال اكشخي واطبخي .... اقولك امس صاير موقف انا احتري ردة فعل عليه ... يعني يمكن يقتلني لو يشوف كل هالإهتمام فجأة
إبتسام : ليش وش صاير أمس ؟
غادة عضت على شفايفها : ..... كيف أقولك شصاير وانا ماعندي كلمة مناسبة اشرح فيها الوضع لنفسي حتى ..
إبتسام : اقول غادة انا مشغولة اللحين .. بعدين اتفاهم معك , انا عطيتك الحل المناسب للحين .. تبغينه ولا اجلسي
وسكرتها مباشرة ... غادة طالعت الشاشة وهي تعض شفايفها .... اف ببكي اكرههـــا .. ضربت برجلها الأرض : وش يعـــــني اكشخي وأطبخي ! الله يسامحك يا خالتي على هالموقف
بعد صراع مع نفسها ومع الوقت اللي يمشي بسرعة .. قررت ماتبالغ بحاجة .. راح تسوي الواجب وأنتهينا .. غيرت بجامتها البنكيـة وهي تلبس بنطال قماش اسود رسمي " high waste " مع بلوزه رسمية سماويه دخلته تحت البنطال شعرهـا رفعته بوني تيل .. مع مكياج خفيف كحل بسيط .. وروج وردي غامق لبست صندل بسيط .. ونـزلت مباشرة ..لما شافت البيت فاضي وكلش هادي .. كان غرابة بجد .. تنهدت بضيق : مايمزحون يعني ..
دخلت المطبخ .. وهي واقفة بحيرة ..تخاف تسوي أكبر غلطة وهي تطبخ حاجة مايحبها .. تنهدت بضيق وهي تمسك جوالها : يقولك في قانون الذكاء خلك غبي عشان تعرف .. اسألهم وبس ..
دقت على اسماء لكن مافيه رد ... والحقيقة كانت أن ام فراس سحبت جوالها ورفضت انها ترد بحجة " تخربين عليهم!" ... : بعد فوق انهم تاركيني حاقريني ... " تاففت " حتى الخدم ماخذينهم !!! " تنهدت " انتظر لين يرجع واسأله ؟ ايه اتوقع احسن من اني اتلقف واطبخ حاجة ماتنوكل
سمعـت صوت الباب ينفتح ... بلعت ريقها ومن قهرها ضربت راسها بالطاولة اللي قدامها !! سمعت صوته ينادي : يمـــــه ..؟ يمم .... " غير الإسم " اسماء ؟ انسسس !! انسس .. ياسمين ؟ ..... ميري
غادة هنا كرهت نفسها .. فوق انهم تاركينها ماعطوه خبر !! مايدري انهم طلعو ؟ بالله وش هالحالة حتى الشغالة قال اسمها وماقال اسمي .... وايقت من المطبخ وهي تشوفه يرفع جواله ويتصل على رقم ثم نطق بحيرة : وماترد ؟
جلس على الكنبة وهنا دق جواله ... رد مباشرة : هلا دكتور .." استطرفت المكالمة انتباه غادة ! صح لازم يروح دكتور عقب أمس " ... لا معليش اليوم انشغلت ماقدرت اجي .. " تنهد " فاهم والله ..... خلاص بكرة على خير
سكر السماعة وهو يرفع راسه : لا بجد العالم وينهم !!!
: طلعـوا ..
التفت لصوتها وهي واقفة عند مقدمة الصالة .. وشابكه يدينها ورا ظهرها : ..
فراس عقد حواجبه : طلعوا وين ؟
غادة هزت كتوفها : مدري ... فجاة دقت علي امك وقالت بيطلعون كلهم مع بدر وبيسهرون برا
فراس شد على قبضته .. ثم عض على شفته بصبر وهو ينطق : وأمي اللي تحبك مدري على ايش .. ليش ماسحبتك معها كالعادة ؟ " تو بتتكلم نطق " مايحتاج تقولين .... اتوقع اللي يصير واضح .... " همس بقرف " مهزلة
غادة ظلت واقفة لوهلة .. بس الظاهر مو وقتها : ........ " تنهدت بإحباط " تبغى شي قبل أصعد ؟
فراس رفع حواجبه : احلفي ؟ شمري عن كمومك وادخلي المطبخ ياهانم !
غادة : طيب .... وش حاب تاكل ؟
فراس : ما شاء الله منيـو مفتوح ؟ على اساس تعرفين تطبخين كلش !
غادة تنهدت داخلها " اللهم طولك ياروح اللي بيشوفه اللحين مو مصدق ان حالته امس قريبة من الموت " : ....
فراس : معناها ابغى جريش
غادة : جريش ؟ .... ما أعرف
فراس : اجل ليش تسألين ! وش تعرفين حضرتك ؟
غادة : طيب وش رايك تطلب من مطعم جريش .. ونرتاح كلنا
فراس : ترتاحين ؟ على راسك انا ... مابي طبخ المطـــاعم !
غادة : إيوا بس مو تتذمر .. لأنوه ما اعرف كثير
فراس : انتي اساسا تعرفين شي ؟ لا طباخة .. ولا ذرابة ... ولا فوق كل هذا خرابة ! وش فايدتك بالحياة اجل ؟ بزر صدق
غادة تنهدت وهي تنطق بقهر : اقل شي مو بزر لدرجة ما أنتبه لصحتي !
سكت فراس .. وهو يضيق عيونه فيها : نعـــم ؟
غادة عضت على شفتها : ...... أمس .. " شاحت بنظرها " واضح جرحك محتاج راحة لأنه رجع ينفتح .. فـ .. ليش .
قاطعها فراس : يهمك ؟
غـادة : يهمك اذا يهمني او لا ؟
فراس ببرود : لا , عموما لاتفلينها انتي وهالشرفة قبل أسكرها
غادة : إنتا اللحين ليش معصب ؟
فراس : عشان !
غادة : عشان شنو ؟
فراس : عشان تمثلية شوفوني انا البنت الطيبة ما تعجبني , اوك ؟
غـادة رفعت حواجبها : ماحزرت .. انا بجد بنت طيبة !
فراس : لاتضحكيني وانا مالي خلق اضحك !
غادة : مافيه خير بإهتمام يجي متكلف !
فراس : بالضبط مافيه خير ..
غادة : اوك آسفة ! انسى .. تمام ؟ راح اعطي امك الخبر مرة ثانية واتركها تهتم بك وخلصنا ؟
فراس : اذا بخاطرك اصير أرمل سويها !
غادة : معناها اقبل المعروف وقل شكـــرا دون تحقيق .. لان ماعندي أي دافع خفي
فراس رفع حواجبه : أقول ؟ وريني عرض اكتافك وانقلعي المطبخ
غادة بالفعل ورته عرض اكتافها .. لأن نفسها طابت من هالإنسان الصعب : ...............
فراس : غادة !
غادة وقفت " وش بعد " : هلا .؟
فراس : تكلفة الكابينة .. مافيه داعي تدفعينها
غادة فتحت عيونها : بجد ؟
فراس وهو يشب سيجارته: عشان تعرفين أني على عكسك .. المعروف مو خسارة فيني
غادة اكتفت بإبتسامة صادقة : فيك الخير
ودخلت المطبــخ ... وبدت تجهـــز
***
ميهـاف :
ام نايف : كأن الوقت تأخر ؟ ماراح ترجعين ؟
ميهاف : واااي ماما زهقتي مني ؟ ترا زمان ماجيتكم حرام عليك ..
ابو نايف : ايه والله اتركيها ... شفيك على البنت ! إلا اقول ميهاف مابقى لك شي على التخرج .. فكرتي وش بتسوين ؟
ميهاف تنهدت بضيق : طبعا أبغى اشتغل .. اكره جلسة البيت بس ...
ابو نايف : بس شنو ؟
ميهاف : محتاجة دعــــم ..
ابو نايف : افا بس ! شايله هالهم وانا موجود ؟ الدعم من اللحين موجود لاتشيلين هم
ميهاف : بجد بابا ؟
أبو نايف : ايه اكيد ... اللي تبين كرمـال عيونك يحضر
ميهاف : ميرسي بجد بابا .. مو عارفة ايش كنت بسوي دونك ؟
دق جـوال أبو نايف .. رد مباشرة : هلا والله .؟! لا انا بالبيت بس شوي وطالع ....... خلاص تعال نتقهوى على ما أروح ... يله يله جايك
سكر السماعة ... : جهـزوا القهوة هذا بدر
ميهاف : انبسطي ماما يله بروح !
ام نايف : ايه وناسة الأم تشوف بنتها مرتاحة ببيتها
ميهاف : رايحة اشيك على القهوة وأخذها معـاي
دخلت المطبخ تاخذ القهـوة بعد ماجهزت .. دخلت المجلس وهو متربع جمب أبوها ويسولف : السلام
بدر : وعليكم السلام والرحمة .. ماكان فيه داعي كلافة قهوة شوي وماشين
ميهاف وهي تحط الصينية : فنجال مايضر
ابو نايف : تو كنا نتكلم عن تخرج ميهاف .. ومن اللحين انا ضامن لها مكانها عندي بشركتي اول ماتخلص ! مو تقول ماقلت لك ؟
بدر وقف بنص فنجاله ... نطق يستوعب : وميهـاف وش رايها بالموضوع ؟
أبو نايف : هي اللي طلبت تشتغل عندي .. وانا عطيتها
بدر : اهــــااا .. " طالع ميهاف وإبتسم باصطناع " مبروك حياتي جتك الوظيفة مثل ماتبين
ميهاف مافاتها انه متضايق .. بس ماهمها اهم شي مستقبلها : يبارك فيك ..
دق جـوال ابو نايف .. تغيرت تعابيره ثم رد : هلا ....... اللحين ؟ ... تمام ... لا ... خلاص زين !
سكر السماعة : انا لازم امشي اللحين .. خذ راحتك البيت بيتك
بدر : درب السلامة عمي ..
مجرد ماطلع أبو نايف انفكت ابتسامته المزيفة .. وهو يطالعها وكأنه يطلب تفسير : ...............
ميهاف تجاهلت نظراته : اتجهز نمشي ؟
بدر : لا اجلسي مكانك ياحلوة .... كابره معك هالاسبوع مو ملاحظة ؟
ميهاف : شقصدك ؟
بدر : قصدي اني صابر لي اسبوع .. بس ترا تكوني غبية لو تظنين اني صابر غباء ولا طيبة مني
ميهاف : شدعـوة ؟ حنا ماصبرنا كلش يعني ؟
بدر نطق بين أسنانه : انتبهي ميهاف ! لا تستوطين حيطي عشان ما أهده عليك ..
ميهاف عضت على شفاتها : ماله معنى هالحكي هنا ؟ بنرجع البيت ونتفاهم
بدر : حلم ابليس بالجنة .. اليوم ما أبي اشوفك قدامي ! خليك هنا
ميهاف : تستهبل ؟
بدر وهو ينزل فنجاله ويوقف : من غير مطرود .. ابي اظل لحالي ! مو مزعجتني لك اسبوع بأهلك اللي ماتشوفينهم .. تخلخلي عندهم اجل
وطلع مباشرة دون يعطيـها فرصة ! ميهاف مو مصدقة هالبدر ... عليه حركات فضيعة ! مسكت راسها بقهر .. على باله بهالحركة بيخليها تتراجع عن قرارها .... بس ماراح تخسر له ..
***
فراس كان مسترخي على الكنبة .. وبيده جواله يتعبث ..طلعت راسها من المطبخ : فراس !
فراس : نعـــم ..
غادة : تحب الحار ولا لا ؟
فراس : وسط !
غادة : اهــــا .... " رجعت للمطبخ " ربع ساعة ثم طلعت للصالة ..
فراس بتذمر : ماخلص هالمفطح اللي تطبخينه ؟
غادة : حطيته بالفرن يبي له دقايق ... ليش مستعجل ؟
فراس : ماني مستعجل .. لك ساعة والله لو عزيمة كان خلصت
غادة جلست بكرسي بعيد عنه بشكل معقول : قلت لك اني مو طباخة ! سويت اللي اقدر عليه
فراس طالع الساعة .. 11 ونص , وللحين اهله مايردون : استغفر الله بس !
غادة : بجد تأخر الوقت .. للحين مارجعوا ؟
فراس هز راسه : عمرهم مارجعـوا !
غادة : أوف ليش تقول كذا ! بسم الله عليهم
فراس : والله امي مسكينة .. على بالها تاركتني مع وحده سنعة ! هذا انا جويع وبطق من الجوع بعد
غادة : آله انا؟
فراس : ليته ..
غادة : هو أنا آلة بس باشياء ثانية طبعا ... المطبخ كلش مو مجالي
فراس بسخرية : ونعـم والله ..
غادة : عادي اسألك سؤال ؟
فراس : لا .
غادة بوزت : بخيــــل ..بس راح اسأل بكل حال ! يعني أنت مو ناقصك شي كامل ..
قاطعها : قولي ما شاء الله !
غادة : ما شاء الله ! صح تنقصك الأخلاق شوي بس ماتضر .... ليش ماتزوجت من زمان ؟
فراس : مكتوب اني ابتلش فيك شاسوي ؟
غادة : هههههههههههههههههههههه ظنك !
فراس رفع حواجبه : مبسوطة ؟
غادة هزت كتوفها : لا بس تضحك طريقتك وانت تقولها ..
فراس : وأنتي ؟ ليش تزوجتي من بدري ؟
غادة اختفت ضحكتها .. نطقت بكئابة : مكـتوب ..
فراس : هذا مو جواب ..
غادة : هممم ... كان ولد عمي , وعمي طالبنا فلوس .. " صارت تدلك يدينها ببعض بضيق " وبابا كان مريض .. وإبتسام راتبها مايوفي شي .. وهيثم تو يدرس ... فخطبني من أبوي كحل بديل ..
فراس وهو يتأملها .. واضح ضيقها من هالموضوع او من هالمرحلة بحياتها : حل بديل ؟ معناها مافيه مهر
غادة هزت راسها : كان دايم يقولي مهرك اني مارميت اهلك بالشارع .. عموما عمي كان يكرهنا بالأخير قرر أني حل بديل فاشل فرجع يطالب بالفلوس ... بس فرجها ربي وقت خطب نايف ابتسام والمهر وفى كلش .. " تنهدت " كنت دايم اخاف اعنس زي إبتسام ...
فراس : التالي عند ربه غالي ... مطيورة !
غادة ابتسمت بضيق : ههههه .. معك حق ..بس حمد الله على كل حال .. اللي مايقتلك يخليك أقوى
فراس : اللي مايقتلك يخليك نفسية
غادة ظلت تطالعه .. وهو مسند راسه على يده ويسولف معها لأول مرة .. ابتسمت لاشعوري من إحساس داعب قلبها: حياتي هنـا .. بجد حياة كثيرة علي , بيت اهلي كان كئيب لدرجة المرض ... بيت عمي كان جحيم من جميع النواحي .. بيت إبتسام كنت احس بثقل .. وقت جيت هنا .. شفت كيف أم تحب عيالها لأول مرة .. شفت كيف اخوانك يحبون بعض .. شفت كيف أنت شايل مسؤوليتهم ... مستحيل اصدق انك تعاقبني بهالزواج .. لأني عشت اوقات اصعب..
فراس كان يتامل الطاولة بالنص وهو يسمع كلامها : هذا اللي افنيت نفسي عشانه ..
غادة تو بتتكلم انتبهت لتعابيره تنقلب ... : قلتي لي بالفرن ؟
غادة شهقت وهي تنقز : نسيــــــــــــــــــــته !!!!
فراس مسك راسه : ................... أقتلها ولا أقتلها .؟
***
المطـــــعم /
إبتسام : جت التحلية ... انت فيك شي وتراوغني كل ماسألتك
هيثم تنهد ... نطق بربكة ويده ورا رقبته : إبتســام ... اذا قلت لك أني بسألك كم سؤال .. بس دون تقولين لي ليش ..
إبتسام : اسأل اللي تبغى .. وماراح اقولك ليش !
هيثم : ....... وش رايك في أسمـــاء بنت فهاد الله يرحمه ؟
إبتسام توسعت عيـــونها : تبغـــــــــــاها !!
هيثم : واللي يرحم لي والديك ابتسام .. انا اسأل مو انتي ..
إبتسام حست ان هيثم يواجه صعوبة بجد .. طول عمره كذا عنده مشكله اذا صار يعبر عن نفسه : ... رايي فيها ؟ من أي ناحية ؟
هيثم : اخلاقها ..
إبتسام : البنت وقحة !
هيثم فتح عيونه ... إبتسام : وقحـة لدرجة كل مرة اطلع معهم مشوار ماتطلع الا متضاربه مع نص الموجودين , لأنها ماتسكت عن حقهـا ولا حق غيرها ..
هيثم وعيونه على صحنه ويسمع .. وكلامها يرسم صورتها بعيونه .. دفاعية ؟ يناسبها : ............
إبتسام : و ماتعتبر مسؤولة .. مرة هبلة .. بالحيل مطيورة .. بس كل هذا لأن قلبها طيب .. واللي فيه على لسانها ..انا أحبها بجد هالبنت
هيثم وعيونه مازالت شاردة بالصحن : ...............
إبتسام ابتسمت وهي تقرا اللي بداخله : تبغـــاها ؟
هيثم رفع عيونه لها :............................
ابتسام حضنت يده اللي على الطاولة : راح اقولك انها عكسك بكل شي ... بس يمكن هذا اللي تحتاجه , وبأمانة ؟ هي عطتني كم تلميح عنك .. ههههه كنت مستغربة بس اللحين فهمت .. ماراح اسألك كيف صار كل هذا لأني واثقة انك مستحيل تتجاوز حدودك .... " ابتسمت بوسع " نتوكل على الله .؟
هيثم رفع يده وغطــى عيونه وهو ينطق بانحراج : ونعـم بالله ...
ابتسام ماتت ضحك .. : ههههههههههههههههههههههههه ه ياربيه ! اول مرة اشوفك مستحي !!
ارنسمت إبتسامته الجذابه وهو مازال مخبي عيونه : للحين أحس مخي مغسول لأني كلمتك بهالموضوع
إبتسام : صدقني راح تسعـدك .. فوق ماتتصور , البنت روحها تجيب العافية
هيثم نزل يديه وهو يبتسم براحة بعد ما قال اللي بخاطره : أدري ..
***
لــؤي اللي كان بالسيارة مع ابوه .. ومستغرب انه طالب منه يروح معه : ...............
كان ساكت طول الطريق .... عقد حواجبه وهم يوقفون عـند المحكمة : شالسالفة ؟
ابو نايف : مو عارف .. كلمني القاضي وقال فيه قضيه مرفوعه علينا ..
لؤي : شغل يعني ؟
ابو نايف كمل طريقه دون يرد .... تبعه لؤي لحد ماوصلوا عند الشيخ ...
ابو نايف : تفضل ياشيخ ..
القاضي : انت لؤي بن عبدالرحمن بن نايف الشمري ؟
لؤي : أيـ..يـه
القاضي : زوجـتك سارا والكر رافعه قضية خلع .. وكل الأدله بصفها فراح نضطر نخلعك للأسف .. ياليت تصير طلاق بالطيب ..
لؤي : مستحيل ! كيف تطلب خلع وهي .... " استوعب " هي وين ؟!!!
القاضي : موجودة .. راح نوصلك لعندها ونسمح لك بلحظة لكن احب افهمك ان القانون مو بصفك
لؤي صرخ بقهر : هي فين !!!
بعـد ما مشى لحد ماوصل لغرفة .. اول مادخلها كانت جالسة بعبايه على كتوفها وطرحه لافتها على راسها .. وقفت أول مادخل وهي تنتبه لهيئته المفزوعه ... والإرهاق واضح عليه : ..................................
لؤي وبعيونه عتب نطقه بصعوبة : انتي هنا !!!
سارا نزلت عيونها .. كان صعب تواجه عيونه : ....... ايوه انا هنا ..
لؤي : قبل شوي ... قالي القاضي ..
كملت سارا : ايوه .. انا طلبت خلع , راح تساعدني اذا تمت الامور بسهوله ورجع كل واحد لمكانه الصح ..
لؤي هز راسه بإنكار : لا ... مستحيل ! اكيد انتي مو بعقلك !! " صرخ فيها " ليش قابلتي ابوي .... ليش صار بينكم تواصل !! اكيد كل هذا بسببه
سارا : ابوك ماله دخل ... هذي قناعتي .." تنهدت " لؤي انا ماراح اندم على اللي صار بينا .. اللي صار ذكرى راح اعتز بها طول عمري ...ومايا هديه ماراح انساها منـك وراح اشوفك فيها طول عمريبس اللحين انا محتاجة اشوف حياتي .. ويكفي اللي صار للحين .
لؤي حضن يدها وواضح على لمحته فزع من كل اللي يصير : انا لك سارا .. لاترجعيني لي انا لك ! شقاعدة تسوين ؟
سارا وهي تمسك نفسها لاتنهار : انت مو لي ... ولا بيوم حسيت بهالشعور وانا اعتذر اني رغم هذا غلطت وسايرتك .. كان حلم مسمم بالنسبة لي .. خلاص لؤي خل نوقف لحد هنا .. شف حياتك .. وانا راح اشوف حياتي .. تزوج وحده تقدر تواجه العالم بها
لؤي بعصبية : شقاعدة تقولين !! منهي اللي راح تكفيني بعد مارفعتي سقف التوقعات عندي لحد تعجز عنه أي وحده بالعالم ! انا مالي غيرك صدقيني ..
سارا : انا ماراح اقبل بأقل من اللي استاهل .. وهالوضع اكيد اقل من اللي استاهله ..
لؤي : صدقيني فترة وراح تمر ... ليش ضعفتي ! لازم نصير قويين اذا نبغى نهاية تناسبنا ..
سارا رفعت يدها بألم وهي تمسح الدمعه بخده .. ودمعتها ماقاومت تنزل : ظنك الدنيا تنسينا بعض .؟
لؤي اكتفى باعتصار دموع تعبر عن خوفه واهتزازه بهاللحظة : ........
سارا : لؤي خلاص .. انت تنتمي هنا هذي ديرتك واهلك ! صدقني انا لو مكانك سويت كذا ..
لؤي : انا من سافرت وشفتك تغيرت نظرتي للحياة .. تغيرت فكرتي عن الرفاهيه اللي كنت عايشها وعن الهواء والراحة .. وعن انتمائي .. ما انتمي هنا انا انتمي لك ..
انطرق الباب ..... : الوقت مو لنا ياجماعة ؟
سارا استنشقت الهواء بقوه وهي تنزع يدهـا من يده وتمسح دموعها .... : هنا مكان قانون .. لاتحاول تلحقني .. ماعلى الدنيا عتب .. كل مافيها اماني ..
***
فراس كان جالس ومتكتف ... وقدامه صحن الأكل المحترق تقريبا : ...................
غادة كانت تطالعه بربكة : ......
فراس قلب الأكل بالملعقة .. لكن ماطول رمى الملعقة : هذا المحترق شوي بس ؟
غادة عضت على شفتها : ما أعجبك ؟
فراس ضرب بالملعقة على الطاولة .. حتى فزت بخوف : قومي انتي وهالسم الهاري اللي حاطته لي ... وسوي لي خبزة اخلصي علي بنام ! الساعة 12 وحنا للحين ننتظر هالأكل وبالأخير ..." ماحصل كلمة يعبر بها "
غادة شالته وهي منقهره من السوالف اللي ضيعت عليها طبختها اللي تعبت عليها .... سوت له سندويتشه وهي تطالع التاريخ : اول مرة نتعشى سوا ! هههههههه ماكانت فكرة شينه انهم يروحون بعد كلش ..
جهزته بصحون وحطت كاسين عصير .. وهو ترسم سمايلي فيس على سندويتشته .. شالت الصينية وأول ماطلعت .. انتبهت لوجهه متغير وهو يكلم : شفيك يابن الحلال خرعتني !! .... تكلم زين مو فاهم !! .... " رجعت ملامحه للبرود ونطق بهدوء عقب فترة " انت وين اللحين ؟ .... خلك مكانك
وقف وهو يمشي يطلع .. غادة : وين ؟! العشاء !
كان الجواب تسكيرة الباب ... وش المكالمة فجأة !! طالعت العشاء بقهر .. عقب كلش ماتعشوا اساسا ..
Like
موضى و راكان