الفصل 37
البارت السابع والثلاثين"
- لاتجرحوهم , فالحياة لاتمنح فرصة الإعتذار دائما
بعـد نهاية أمسية جامحـة جدا .. حست
غادة
فيها باللي ماحسته بعمـرها كله , ظل موجود حتى اللحين إبتسام واريج ومرام وميهاف وأم نايف .... كانت عجباء " اخت ام فراس " واقفة ونطقت لمرام واريج : وبعدين معكن انتن ؟! يله بنمشي
مرام واريج عايشين مع عجباء اختهن لان امهن وابوهن متوفين .. بحكم أن عجباء ارملة وماعندها إلا ولد واحد كبير متزوج وبعياله ...
اريج : مانبي نروح !
مرام : ايه مانبي بنجلس مامدانا نسولف مع العروسة حتى .. يوم بدت الوناسة وانفكوا الحريم ودعالتهم تقولون يله
أم فراس : عجباء خليهن عندي اليوم ... ينامن ويتسلن
عجباء : بيقلقونك وانتي عندك عرسان .. " طالعتهن بنظرة حادة " قومن قامت قيامتكن
ام فراس : لا تصعبينها يجلسن مافيها مشكلة .. والعرسان بشقتهم وش بيصير يعني ؟ يسلنا
عجباء تنهدت : اللي تشوفينه .. وانتن اوريكن بعدين ! يالجاحدات
اول ماراحت عجباء نطقت مرام بحماس : ياااااااااااااااااسسس !
غادة : هههههههههههه بالله مو خايفات ؟! كانه ناوية عليكن بس ترجعن لها بكرة بعقاب
اريج : لا عجوب حليوة ماعليك بس تهديدات كذا
ام نايف اللي كانت تطالع ابتسام اللي جالسة وواضح على وجهها التعب : إبتسام حبيبتي اذا تبين تتمددين مب مشكلة .. واضح الجلسة متعبتك
التفتت غادة لها مباشرة : يؤ .. ابتسام وجهك منتهي ؟!
إبتسام انحرجت لان الكل صار يطالعها : لا سلامتكم مافيني شي والله
ام فراس مسكتها من يدها دون نقاش : تعالي اجلسي هنا بالجلسة الأرضية ومدي رجليك .. لا تستحين مابه غريب
ميهاف : باي شهر انتي إبتسام .؟!
ابتسام : لسى بآخر الرابع
ام نايف : الله يسهل عليك يارب
مرام : الفـــال لك ميهاف .. اخلصي نشبي بدر ببزر قبل تخققه عارضه ويهملك !
ميهاف تخصرت : نعـــــــــــم .؟!!!!!
اريج : وهي الصادقة يابنت الحلال .. لا نشبتيه ببزر ا ماقدر يروح ! اللحين سهله بلا انتي
ام فراس : وي بسم الله على ولدي ... حرام عليكن والله انه يحبها مايستغني عنها
ميهاف بثقة : يسلم لي قلبك خالتي انتي الفاهمه .. اصلن هن ما آخذ بكلامهن !
مرام : أسمعي عاد ! الحق ان اناقة الرجال تبدا من ويش .؟!
اريج : من غض البصر ! وبدر مايحتاج اقولك .. عيونه مكبسه ينتبه لكلش ! ويشوف كثير .. من وين ترجين منه شي؟
ميهاف : مالت عليك وعليها بعد .. اصلن انتن وش حشركن خلكن في حالكن بس !
اسماء جت وجلست : ااااااااااه اخيرا خلصت .. حشى هالمستأجر سواها لي ذله !
ام فراس : خذوا الاغراض كلها ؟
اسماء : ايه خذاها خـلاص .. مسكين انس سهر عشانهم
ام فراس : راح ينام .؟
اسماء : أيه ايه راح.... " طالعت اريج ومرام " خالتي عجباء راحت ترا !
اريج : يس يس بننام هنا
اسماء : ههههههههههههههه صدق .؟
مرام : يب يب صدق .. يله اسجدي سجود شكر
اسماء : على وش على الضيق اللي بيصير بغرفتي .؟!
اريج : نرد عليك بعدين " التفتت لغادة " اللحين عندنا جلسة تحقيق .... بالله وش سوا فراس اول ما شافك .؟! قال كلمة حلوه .؟! وش قال .؟! يعرف يقول كلام حلو .!؟ ابتسم ؟
مرام : يمه اتخيل فراس يبتسم ! احس فكوكه ماتعرف تبتسم
غادة تخيلت كلامهم صح بس .. من سابع المستحيلات : كيف اجاوبكن اللحين اسئلتكن صعبة !
اريج : اما ! تو ما سألنا الاسئلة الصعبة ... للحين نسأل اشياء خفيفة بس
ام فراس : حمدالله والشكر بس !
وقفت ام نايف : يله انا لؤي جا .. تامرون على شي ياجماعة .؟!
: سلامتك الله معك
ام نايف طالعت ابتسام : ابتسام نوصلك معنا .؟!
ابتسام : لا السواق بالطريق
ام نايف : لا وش سواق بهالحزة ؟!! تعالي بنوصلك .. واضح عليك تعبانة مالك خير من السهر
غادة : ايوه ابتسام شكلك مرهق مرة ... ارتاحي حبيبتي
استجابت ابتسام وطـلعت مع ام نايف ...ميهاف تنهدت وهي تحوس بجوالها : بدر تأخر !
اسماء : دقيتي عليه .؟!
ميهاف : ايه بس مايرد
غادة : وانتي وش معجـــلك .؟! اجلسي سهرانين مبسوطين
اريج معطت خد غادة : يالبييييييييييييها ! مبسوطة بالسهر معنا ... فديت ياناس
غادة مسكت خدها : ههههههههههههههه ااااي تعور يادبه !
اريج رجعت تمعطها : كيـوت انتي يخي ما اقاوم امعط خدودك !
غادة : انا كمان ما اقاوم امعط شعرك اخرب تسريحتك ترا .؟!
اريج : هههههههههههههههههههههه لا استسلمنا يختي
دق جـوال ميهاف .. ردت مباشرة : هلا حبيبي .؟!
مجرد ماقالتها نقزت اريج ومرام جمبها وهن يهمسن : سبيكر سبيكر !
ميهاف بضيق من قربهن : ايوه وبتتأخر كمـان .؟! .......... ايه راحوا .... تمام .. اوك
سكرت السماعة وهي تنفخ فيهن : ادخلن السماعة احسن !
مرام : شفيك انتي قشرا ! لبى غادة لنا ساعة نحوسها ماقالت شي
اريج : هذي معادهيب عروسة معد تستحي ... الله يستر من غادة بعدين
مرام : مدري شفيكن ترا حنا نشوف عيال اختي زي عيالنا والخالة أم مثل ما انتي عارفة !
اسماء : هههههههههههههههههههه امي حتى ماسوت كذا يا ساتر
ام فراس طالعت الساعة ... تشير لثنين حكم : غريبة فراس لهالساعة برا .؟!
اسماء : ايه من جد .. بالعادة 12 برا البيت متأخر عنده
ام فراس : هو انا قلت له ضيوف وبيطولون ... " وقفت " بروح اكلمه اخاف متاخر عشانا
ميهاف : إلا اقول بنـات .. وش سويتو عشان الجامعة ؟! تجهزتو ؟
اسماء : انا ضبطت جدولي باقي السوق بطلع له هالكم يوم
ميهاف : تروحين معــي ؟! انا كمان ناوية اطلع هالكم يوم
اريج : انا شكلي بأجل هالترم .... مرة مالي خلق
مرام : لا اريج ياحيوانة لاتاجلين ! اتخرج قبلك كذا .. خلينا ماشين سوا
اريج : مدري بفكر .. والله مالي نفس
اسماء التفتت لغادة : غادة انتي بأي سنة .؟!
غادة حست وضعها فشلة صدق .. : انا ماخلصت اخر سنة ثانوي
اسماء : اهـــــااا ... وناوية تكملين ؟!
غادة : لا راحت علي خلاص .. وبعدين انا من يومي ماني راعية دراسة فمو ضروري
اريج : انا مثلك يختي بس ضغطت على نفسي وهذاي شكلي برجع اسحب
دق جوال ميهاف .. وقفت : يله هذا بدر ... تمسون على خير ياجماعة
: وانتي من اهلــــه .. انتبهي على نفسك
طلعت ميهاف .... اسماء : حنا وش جالسين ننتظر ؟ قوموا خل ننام خلاص تعبت
اريج : احتري فراس يجي ! ماحقوم قبل ازعجه الخايب
مرام : ايه اصلن مو جالسين الا نزعجه .. وبعدين خاطرنا نشوفه هو والعروسة سوا !!
اسماء : ياروقكم بس ... قومن نامن ولاحقات بعدين تزعجونه
مرام : اساسا غادة ماحتنام اكيد إلا لما يرجع ! بدل نخليها سهرانة لحاله نجلس نسليها .. تبين تنامين انتي روحي نامي
اسماء وهي توقف : وهذا اللي بيصير .. يله تصبحون على خير
: وانتي من اهله
جتهم ام فراس : فراس مو جاي الا عقب الصلاة .. قوموا نامو لكم شوي قبل الاذان
اريج : اما عقب الصلاة ! وش عنده برا وش يسوي .؟!
ام فراس : يقول الملفات محيوسة وعنده تسيب موظفين يقول مقدر اطلع لحد ما اخلص .. انا بروح انام تصبحون على خير
وقفت غادة وهي تحمد ربها انه بيتأخر ... موقف انه يجلس يهينها قدام اريج ومرام هذا اللي ماراح تتحمله كويس جتها من الله : يله اجل نوم العوافي ياجماعة
مرام صعدت وهي تتذمر : فاتنا والله بس وش عليه جالسين له لبكرة !
اريج وهي تتثاوب : قولتك
***
صحت غـادة من نومها .. على حدود الساعة 11 ونص /
جلست بكسل على السرير وهي تسحب جـوالها ... سكرت المنبه وراحت تغسل وجهها دخلت المطبخ تبي تجهز لها شي تاكله لكن المطبخ فاضي انقهرت لازم تقـوله يجهز لها المطبخ مو معقولة كل ماجاعت لازم تنزل خصوصا مع وضع انس بالبيت ..: .............
انتبهت لاصوات ازعاج طلعت من النافذة بعد ماتتبعت الأصوات كانو اسماء واريج ومرام بالحديقة جالسات حست جوهن عليل صدق .. وهي بدت تستمتع بصحبتهن .. انتبهت لجوالها يدق " ام فراس " ردت : هلا والله
ام فراس : صاحيه ولا صحيتك .؟!
غادة : ههههه لا صاحية
ام فراس : البنات تحت جالسات دام فراس طالع اذا ماعندك شغل انزلي تسلي معاهن
غادة : ايوه من عيـوني ان شاء الله
سكرت بحماس وهي تطلع لغرفتها مباشرة تبدل لبسها :-
التنورة ميدي لنص الساق سودا مع بلوزه رسميه بنكي دخلتها تحت التنوره وثبتتها بحزام بني انيق مع جزمة سوداء بكعب خفيف .. ومكياج صباحي ناعم وشعرها عمـلته على كتفها بطريقة رايقة عطاها شكل صباحي بالفعل اعترفت بهاللحظة بينها وبين نفسها ان حياتها هنا تجنن .. نزلـت بحماس .. وابتسامتها زادت لما شافت ام فراس بالصالة : صبـاح النور
ام فراس ابتسمت : صباح الخيـــر .. البنات برا بالحديقة
هزت غادة راسهـا وهي تطلع لهن : صبـــاح النور
مرام : صباح الخير والسرور والشر عنك يزول يارب
اريج : طولتي بالنوم !
اسماء الي واضح ماكله تبن : الانسانة الطبيعية بتنام كذا عقب سهرة امس ! وانتن من 9 مصحياتي ... ادرنالين من صبح الله
اريج : للأمانة حنا ماصحيناك !
اسماء : والازعاج اللي سويتن في غرفتي !
مرام : لا لا اسماء ماتوقعتها منك ! حنا ازعاج ؟
اسماء : انا بالذات توقعي مني كل شي ... اخر مرة اترككن تنامن هنا مرة ثانية على جثتي ماتجلسن ببيتنا
اريج : ههههههههههه لاتخافين عصر بنذلف !
اسماء : ابرك ... غدو افطرتي .؟!
غادة : لا تو صحيـت اصلن " خذت من صحن الفاكهة قدامهم تفاحه تاكلها "
تو غرست اسنانها بالتفاحة سمعت الباب ينفتح .. صعد قلبها لحلقها , كان متوجه لداخل مباشرة قاطعة صوت خالاته
اريج : فرااااااااااااااااااااسسس سوه ! ياثقل خففف علينا عطنا نظرة ولو غلطة
مرام : اخييييييييييييييرا لقينا موعد مع صاحب السمو والجلالة
فراس انتبه للجلسة الجانبية بالحديقة : هلا برية وسكينة
اريج : رية وسكينة بعينك ! يالمروح .. هذا وحنا خالاتك .؟!
تقدمن عنده وهو يسلمن : على البركة على البركة !
مرام : من امس نحتريك نقولك مبروك ... مابغينا نحصلك .؟!
غـادة كان تطالعهم من مكانها زادت ربكتها لما علقت اريج : يفوتك امس ! عوذ مرتك هبلت بالعالم امس ..
غادة انصبغ وجهها .... تمنت تسطرهن على هالتعليق , احترت تعليقه : اها .. ما شاء الله
مرام : وش هالتسليك مالت عليك !
اريج : بالله تعال اجلس ابي اشوفكم سوا وش شكلكم
فراس طالع ناحية غادة حمدت غادة ربها ان طرحتها على كتوفها .. ثم طالعهن ناقد عليهـن ... وتوجه لداخل , تنهدت غادة بارتياح لما دخل : ............
مرام : كش عليه بس الثقل !
اريج : اقول بنات قومــــن خل ندخل ... الغداء بيجهـز اكيد
غادة طالعت اسماء اللي تدق رقبه من النعاس .. هزتها بخفه : اسوم اذا فيك نوم اصعدي نامي ارتاحي
اسماء فزت .. تثاوبت بكسل : ايه ان شاء الله ..
أول مادخلت انفصلن صعدت اسماء لغرفتها ... بينما غادة فضلت ماتجلس بحضور فراس فصعـدت لكن قاطعها صوت مرام : غااادة .؟! ويييين وين ؟!
اريج : ايييييييييييييه وين على الله جالسين نقول الغداء جاهز تصعدين ؟!
غادة انحرجت ونـزلت وهي تجلس بالصالة عقب مارتبت طرحتها لأن انس موجود .. خذت مكانها بالكنبة الفرادية رفعت عيـونها له كان ثاني ساقه على فخذه وجاذبيته غير محدوده بشعره الفحمي لنص رقبته .. تنهدت لازم تحصل فرصة تكلمه قريب : .........................
ام فراس : ماتبي تسأل شخبار العزيمة أمس .؟!
مرام : انا بقولك مايحتاج تسأل ! كلش كان يفتح النفس .... بس بصراحة اكثر شي رهيب لما صعدت غادة المسرح ورقصت
فراس رفع حواجبه : أول مرة اسمع بوحده ترقص بعرسها .. اللي اعرفه انها تجلس بمكانها وتثقل شوي
غادة فهمت التلميح رفعت عيونها للسماء تجمع صبرها ... عشان كذا ماكان تبي تجلس : ............
اريج : غادة بتسكتين له .؟! جالس ينقد عليك !!
غادة بخيبة : وش تبيني اقول ؟!
مرام : انا اقول عنك ولا يهمك ! " التفت للفراس " لو تشوف رقصها ماقلت ذالحكي ... جابت عقول العـــالم !
فراس رفع حواجبه : انا ما أصدق الا اللي تشوفه عيـوني
مرام : ولا يهمك الديجي يجي اللحين !! غادة قومي وريه كسري راسه
غادة انخبلت .. هذا اللي ناقص ترقص له بعد : لا مستحيل مابي !
اريج : مستحية ..........؟!
فراس كان يطالعها وهي ماتحط عيونها بعيونه .. مجرد تطالع اريج ومرام وهي تقاوم الفكرة : ماابي .. جد مالي خلق
فراس إبتسم بسخرية : قدام أمة محمد امس تنقزين ... واللحين ماتبين , ماحاكلك ترا
غادة طالعته بقهر .. ونطقت بدلع رباني : إيـــــوه مابي ! الدعــوة مزاج .. وانا مزاجي طاف اللحين
فراس باشمئزاز : تكلمي زي الـناس لأهفك
غادة بلعت ريقها .. والتفتت وهي تتكتف وتكابر : هذا كلامي .. مو عاجبك لاتسمعه !
فراس : وهـذا بيتي .. تمشين زي الناس ولا روحي قابلي الجدران فوق
اريج ومرام حسـوا انهم شبوا بينهم ... اريج : هههههههههههههههه الله ريحة الغداء تشهي .. مرام تعالي نشوف
مرام لقتها من الله : ايه ايه يله
غادة كانت شادة على شفاتها لاتخنقها العبرة وعيونها تلمع ... جاها تعليقة : ابكي قدامهم ازين !
غادة وعيونها بعيد عنه لاتهزها نظراته : ماحبكي ! بس .... بس كل اللي قلته ان مابي ارقص , إنتا جلست تهاوش
فراس : اهـاوش ؟! انا حتى صوتي ما ارتفع ... حابه اعرف لك الهواش كيف ؟!
غادة : مايحتاج .. " كملت بنبرة منكسرة " كل اللي ابيه منك تسمعني وانت مو راضي تسمع ..
فراس زفر بضجر : اللهم طولك ياروح ... انطقي وش عندك ؟!
غادة نزلت راسها وهي تلعب باصابعها بتوتر وهي تختار كلماتها بعناية : لو سمحت .. اذا مايضايقك انا عندي طلب واحد وعقبه مابي شي ... حتى لو ماعاد تبيني انزل ..
فراس قاطع كلامها المتردد : اللي هو ؟!
غادة : رنيـم ..
فراس : ..........................................
غادة لما ماحصلت رد منه قررت ترفع راسها ... ملامحه ماتغيرت مجرد التمست منه استهزاء بطلبها كملت باصرار : انا ... انا آسفة على كل اللي صار .. بس , رنيم هي بنتي وماني متطمنة وهي بعيـد .. وأكيد احمد بيقتنع منك
فراس : لو يقتنع هذا أحمد دوني ويوصلك بنتك لباب غرفتك .. اعرفي اني مستحيل اوافق تجلس ببيتي
غادة فتحت عيـونها : ليش !
فراس بكل بساطة : ماني مذنوب في بنت آلمرزوق ... كافيني وحده هنا
غادة : بس ... هي مجرد بتعيش معي ..
فراس : زيارات بس ! وكلمة زايدة .. احلمي تشوفيها زيارة حتى
غادة عضت على شفتها بصدمة من رده ... توقعته يرفض يقنع احمد بس مو يكون هو نفسه عائق بطريق رنيم ! وقفت بقهر : الله يقدرني اشوفك ترجي احد ويسكها بوجهك مثل ماسكيتها بوجهي
فراس : زمان عن هاللسان الطويل .. اثر العقل المفاجئ هذا مصلحة ؟!
غادة بقهر : ترا أنا مو جالسة اطلب منك المستحيل ! كل اللي اطلبه تكون مثل الرجال اللي تتمناه لاختك !
فراس : وهي بكرامة !
غادة زاد بريق عيونها دمـوع .. وهي تطالعه وهو يطالعها ببرود الدنيا : ... كنت متوقعه انصدم فيك .. بس مو كذا , ماتقدر لو مرة تكون احسن من توقعاتي ؟
فراس : إنا انسان مثلي مثل غيري لاتصوريني قديس بعقلك وتورطيني كل شوي صدمتني وصدمتني ! ووفري علي منظر دموع التماسيح لو سمحتي واصعدي لغرفتك
غادة طـلعت من الصالة وهي تصعـد مباشرة لفـوق .. قدر يقلب مزاجها في ثانيتين ! دخلت ام فراس الصالة : الغداء جاهز " تلفتت " وين غـادة ؟!
فراس وقف : بقريـح ... شكل الغداء على كيفك اليوم , هاه ؟
***
عقد حـواجبه بضيق من صوت الجـوال ... فتح عيـونه بكسل وهو يمد يده للطاولة ويسحب الجوال ويرد : ايه ؟
نايف : ناااااايم .؟!!!
بدر : كم الســــاعة ؟!
نايف : اسأل روحك ! خرج النوم صح ... لهالساعة نايم ؟!
بدر : المهم شتبي انت مبثرني من صبح الله ؟
نايف : صبــــح الله ؟! الله يعافيك بس .... الدنيا عصر !
بدر تنرفز : خلاص زين دريت ... شتبي اللحين انت متصل ؟!
نايف : بغيت ابارك لك مجلتك نزلت
بدر بكسل : يبـــارك فيك ياموجب ... إلا متى ناوي ترجع انت ماشبعت دجة .؟!
نايف : إلا شبعت ... وخلاص تقريبا يومين كذا وراجع ان شاء الله
بدر : اها .. يله اقلب وجهك اشغلتني
سكر السماعة وهو يجلس بكسل .. هز ميهاف بنعومة من كتفها : ميهـاف .... ميهاف .. ميهاف .؟!
ميهاف فتحت عيـونها : هممم
بدر : قومي الساعة 3 ماقصرنا !
ميهاف فزت : يؤ يؤ يؤ يؤ !!! كيف مارن المنبـه ؟!
بدر : شكله رن وماصحينا له .. " تثاوب " جعل ليلتك أمس تسلم ماتركت فينا عقل
ابتسمت ميهاف وهي تسحب روبها وتنهض : هههههههه هذا المطـلوب
بدر نهض هو نفسه يلحقون على الصلاة اللي راحت عليهـم ... بعد ماخلصت ميهاف خذت صحن غداها وهي تجلس قدام لابتـوبها , جلس بدر مقابلها على الطاولة وصحنه قدامه : شتسوين .؟!
ميهاف : اتأكد من جـدولي .. " تنهدت " زي الزفت شكله هالسيمستر
بدر : اهـا
ميهاف : عموما حياتي انا يمكن اطلع اليوم أو بكرة مع اسماء .. بنروح السوق لكم شغلهبدر : مو مشكلة خذي راحتك
إبتسمت ميهاف بجاذبية : يعـني أخذك ؟
بدر بذوبان : فـداك والله .. " وقف وهو يستعد يطلع " بس وقت تروحين عطيني خبر بوصلك انتي واسماء
ميهاف : اوك من عيـوني .. في امان الله
***
لـؤي نزل بشـنطته .. وهو يبوس راس امه : وين ابوي عاد ؟!
أم نايف : طلع عنده شغله ... بس يقولك في امان الله , وانتبه على نفسك ولا تطول علينا
لؤي : ان شاء الله
ام نايف : المرة الجايه اللي تجي فيها لازم نفرح فيك ... خلاص انت الوحيد مع عبدالمجيد العزابية !
لؤي : هههههههههههه ايوه يصير خير
ام نايف : الله يستر عليك
طلع لؤي وهو يرمي شنطته بسيارته ويتجه بطريقه للمطــــار
***
غــــادة : -
كانت جالسة وهي تحس بجـوع فضيع .. لكن نفسيتها مشغلتها بالفعل , ماكلت لما صحت الا تفاحة واللحين الوقت عشاء .. تنهدت وهي تمسك جوالها وتدق على إبتسام : الو ؟!
إبتسام : هلا غـــادة .. شخبارك ؟!
غادة : ماعلي حمدالله ... انتي كيفك ؟! مارجع نايف ؟
إبتسام بنبرة محطمة : للحين ماكفته نقاهته شكله ... شمسوية انتي ؟!
غادة : زفت ..... ماتقدرين تجيني بكرة ؟
إبتسام : هممم والله بكرة عندي موعد بالجمعية وحوسة شوي ... بس أول ما اخلصها بجيك
غادة : ايه تكفين .. خلاص انا ماعدت طايقة نفسي من الجلسة لحالي
إبتسام : حرام عليك غادة .. يعني خليك منه هو اهله حليوين معاك انزلي ونسي نفسك معاهم
غادة : عارفه أن اهله كويسين .. وماحلمت انهم يكونون كذا معي بس .... " تنهدت " مالي خلق اللحين ..
إبتسام : وبعدين حتى لو أجي بكرة ما أحسني جالسة ادخل بيتك .. عطي ام فراس اقل شي خبر , لاتنسين اني بدخل من مدخل بيتها
غادة : بقولها مو مشكلة ... بس ماراح نجلس تحت اصعدي عندي ترا مشاعري تلفت من المجامل
إبتسام : طيب ليش التعقيد ؟! ليش ماتجين انتي عندي وبس !!
غادة : مابي اطلب منه شي ..
إبتسام : ههههههههههههههه شدعوة ما اذكرني طلبت من نايف إذن اني اطلع مكان وهو ماكان يضايقه
غادة : وش جاب لجاب اصلن !
إبتسام : لا بجد انا قبل اتزوج نايف كان فكرتي ان كل الرجاجيل زي اللي حولنا .. إذن للطلعه والدخلة بس لما تصرفت بشكل طبيعي وطلعت ماتضايق ولاحظت كل اللي بعائلته كذا , يعني انتي جربي ودرعمي اطلعي وبتكتشفين انه عادي
غادة كوش جلدها : لا لا لا لا ... ما اتجرأ حتى ! اساسا من بيوديني ؟! " تنهدت بتذمر " اففف اللحين انتي ليش ماتجين وبس .. خلاص قلت لك بقول لأم فراس
إبتسام : ماشي .. بكرة أول ما أخلص شغلي بجيك
غادة : ايه من أول ! .... يله اشوفك على خير
بالدور التحتي /
دخلت ام فراس غرفة اسماء ونطقت بعصبية : اسماء ! كل هذا النوم ! الساعة 7 !!!
اسماء بكسل : مستحيل اللي يصحيني يقولي الوقت الحقيقي اصلن فما حصدقك
ام فراس : قومي طالعي ساعتك وصدقي !
طالعت اسماء ساعتها وفزت بخوف : اوففف نمت كل هذا !!!
ام فراس : بدري .. ولما نصحيك تقولين جثة ... مافيه استجابة نهائي
ركضت اسماء للحمـام وهي تطلع مباشرة وتصلي تعوض الصلوات ... اول ماخلصت مسكت جوالها عشان تنزل انتبهت لكم هائل من المكالمات من " ميهاف " .. تنهدت وهي تدق جاها ردها المعصب : بـــــــــــــــدري !!!
اسماء : اففف وش تتوقعين مني عقب امس ! اكيد بنام
ميهاف : احلفي ؟! كلنا كنا معك امس ومحد عبى نوم زيك
اسماء بتذمر : داقة تهاوشين انتي .؟!
ميهاف : خلاص مابي منك شي ... كان فرصة نطلع السوق بس وش عقبه مافيه وقت خلاص
اسماء وهي تتثاوب : خلاص مو مشكلة بكرة ان شاء الله
مياف : بكرة ؟!! مو تسحبين ؟!!!
اسماء : لا ما حسحب ... بكرة موعدنا ان شاء الله
ميهاف : ترا والله لو تسحبين لاروح لحالي وخلك مع نفسك
اسماء : اصبري بعد بشوف غـادة ... احسها ماتطلع نهائي ولا أرجي من فراس يطلعها كود انها تطلع معنا تتوسع
ميهاف : يله اجل شوفي وردي لي
سكرت اسماء المكالمة وهي تجلس جمب امها بالصالة : غادة فوق ؟!
ام فراس تنهدت : من ظهر صعدت ولعد نزلت .. حتى ماتغدت , من شوي دقت تقول إبتسام بتجي بكرة ولما قلت لها انزلي صرفت
أسماء : هممممم ..
ام فراس : الله المستـــعان .. وانا اللي وافقت حتى لو عليها ابي فراس يتزوج ويتهنى بس شكلهم ماعرفوا لبعض
اسماء : هو فراس ماعطى نفسه فرصة .. يعني بالله يمه مين البنت اللي بتتحمل اصلن انه يكلمها بهالطريقة قدام اهله
ام فراس سكتت بيأس : ..........................
اسماء : انا وميهاف طالعين بكرة ان شاء الله السوق ... قلت بشوفها يمكن تطلع تتوسع معنا
ام فراس اعجبتها الفكرة : كلميها اجل شوفيها ... ان شاء الله تطلع
اسماء هزت راسها وهي تطلع جوالها وتدق جاها الرد : هلا
اسماء : هههههههههههههه بالله مو بياخة اكلمك وانتي فوقي ! انزلي يختي خل اقولك وش عندي
غادة : ودي والله بس جالسة ارتب اغراضي ..
اسماء باصرار : بوصي لك الخدامة ترتب وانتي تعالي
غادة : لا ما أحبهن يلمسن اغراضي وبعدين بس اخلص وراي كم شغلة ..
اسماء تنهدت : خلاص اجل بقولك هنا وبس ... بكرة انا وميهاف طالعات السوق تجين معنا ؟!
غادة : لا ... ابتسام اختي بتجيني بكرة مقدر اطلع واتركها
اسماء : تطلع ابتسام معنا !
غادة : هههه لا إبتسام ماتحب الأسواق .. وبعدين حامل وتعبانة مالها خلق سوق
اسماء : مافيه امل نهائي يعني ؟! حتى لو نروح بدري قبل تجي إبتسام
غادة : لا اساسا انتي وميهاف بتطلعوا عشان الجامعة .. انا اطلع عشان شنو ؟! اجلس مع اختي اونس لي
اسماء : اللي يريحك اجل ... طيب ماتنزلين تتعشين معنا ؟
غادة : لا تعبانة وبنام اللحين .. باي
سكرت اسماء السماعة وهي تهز راسها : رفضت تقول اختها بتجي وماتبي تطلع .. يله بكيفها حنا سوينا اللي علينا
ام فراس : قولي لهم يحطون العشاء .. فراس مب متعشي هنا بعد
اسماء : ان شاء الله
***
إبتســـام /
بعد ماخلصت شغـلها بالجمعيـات ... ركبت مع السايق : بيت أم فراس
في نص الطريق دق جوالها ... رفعت حواجبها وهي تشوف أسم المتصل " ابو يزيد " , عضت على شفتها وبعدها ردت : أيـوه ؟!
جاها صوته الرايق بأثر نقاهته : مســـاء الخير لأحلى بسمة
إبتسام باقتضاب : مساء النور .
نايف : كيفـك .!؟ شمسوية ؟
ابتسام : طالعة من الدوام ورايحة لزيـارة .
نايف : هههههههههههههههه حمدالله وانا اقول بتمل بالبيت لحالها .. كويس دامك تطلعين وتوسعين صدرك
إبتسام : يب .
نايف : عموما انـا راجع بكرة ان شاء الله
إبتسام : توصل بالسلامة .. اذا ماكفتك نقاهتك تقدر تطول كمان عادي
نايف : شدعـوة ماتكفيني ؟! وبعدين واحشيني ناس حلوين هنا لازم ارجع
إبتسام : أيـوه مصدقتك
نايف كان يكذب نبرتها " الرسمية " مب البداية لكن هنا تأكد : فيك شي .؟!
إبتسام : لا مافيني .. ليش تسأل؟
نايف : ما أدري صوتك وطريقة كلامك .. مو زي العادة
إبتسام : نايف أنت ليش سافرت .؟! مو نقاهه ؟!
نايف : كنت أبي ابعد عن كل اللي جالس يصير شوي .. يمكن تفرغين لمشاكلك وتخلصينها وتشوفيني كويس
إبتسام : أشوفك كويس ؟! عميا ؟
نايف : الفترة اللي راحت كنت اسولف سوالف ولما اذكرك فيها تقولين اني ماقلتها ! بالك مرة مو معي .. وبعدين حنا مانقدر نقرا الورقة اللي لازقة بوجيهنا والمسافة تخلق الإحترام
إبتسام : المسافة تخلق الإحترام .؟! اتفق معك ... اجل خلك وراك لحد ما أحس الإحترام جا بعيوني
وسكرت السمـاعة مباشرة بقهر .. ! أول ماوصلت لبيت أم فراس نزلت وهي تضرب الجرس , فتح لها أنس الباب ابتسمت : هلا والله انس .. كيف حالك ؟!
أنس : حمدالله بخير .. تفضلي حياك امي داخل
دخـلت إبتسام ... قابلتها اسماء بعبايتها : اووووه القهر جايه وانا بطلع !
إبتسام : هههههههههههههه معليش فرصة ثانية
أسماء : لاتروحين لحد ما أرجع .. نسهر سوا ان شاء الله
وركضت بسرعة تطلع ... دخلت ابتسام وهي تسلم على أم فراس .. نطقت ام فراس : غـادة فوق .. من امس ظهر ماشفناها
إبتسام : لاتشيلين همها ام فراس .. يعني اعتبري انها ساكنه بعيد شوي كان جلست ببيتها اكيد ؟!
ام فراس مابغت تقول لإبتسام انها ماعمرها شافت فراس يصعد لفوق .. ولاعمرها شافته مدخل اغراض لفوق عشان كذا هي شايله هم : ..............
إبتسام : عموما انا صاعده اللحين اشوفها .. وبنزلها , بس من وين الطريق ؟!
ام فراس : هههههههههه ياسمين حبيبتي ودي خالة ابتسام لشقة اخوك
صعدت إبتسام وهي تضرب الجرس .. وهي تطالع مقدمة الشقة بس رايقة كأنها شي منفصل عن الدور الثاني من ناحية التصميم حتى بالدرج المذهب بشكل لامع ورسومات على الجدار انفتح لها الباب ... ابتسمت غادة مباشرة : ابتسااااام !
سلمت عليها بحرارة ثم نطقت : هههههههههههه خنقتيني انا وولدي .. دخليني عاد !
غادة : تفضلي حياك
دخلت إبتسام وهي تطالع التصميم العتيق ... كانت شقتهم قطعة فنية بجد : واااااو غادة ... يجنن المكان كأني داخلة قصر هنري
غادة : ايوه مرة الشغل متعوب عليه ... تعالي شوفي غرفة النوم عاد خيال
إبتسام لما دخلت انذهلت فعلا .. تحس كل قطعة بالمكان قطعة أثرية قالت بمزح : هههههههههههه ومنفسة وانتي عايشة بهالمكان ! اقول انثبري بس
غادة طالعتها بنص عين : وش تستفيدين من كل هذا اذا انتي مع نفسك .. ولما تحاولين تدخلين مع الناس تحطمين
إبتسام : هو للحين ينام تحت ؟!
غادة : ولا مرة حتى صعد .. عموما أحسن انا مرتاحة من هالناحية , انا ما أطيق اشوفه وقت انزل كيف يجلس عندي بعد ! ماراح القى هوا اتنفسه
إبتسام : غـدو انتي تكرهينه بجد ؟!
غادة وهي تشد على قبضتها نطقت بقهر : جـدا .. انا لو يرجع الزمن اخترت اتزوجه مرة ثانية .. انا احب مكانتي معه , يعني لما سوت لي ام فراس الحفلة لأول مرة اشوف بعيون الناس حسد لي واحترام .. حتى لو بلسانهم يبون يغلطون مايقدرون .. غير أهله يجننون امه أول مرة افهم معنى كيف الأم تصير أم
إبتسام ابتسمت بحنان وهي تحمد ربها انها حصلت ايجابيات بالموضوع : اجل ركزي على الإيجابيات .. وهو طنشيه
غادة بقهر : إبتسام انا ابي رنيم ... اشتقت لها ! احمد صار مايرد علي حتى .. ولا عاد يرسل لي صورها , وعقب الشين قدرت اقول لفراس ... بس جلس يقولي بكل انانية انه مو مذنوب فيها ! وانه مستحيل يسمح لها تعيش هنا ..
إبتسام : مصير كلش يتسهل ... انتي بس روقي وحاولي تاخذين كلش بذكاء ! صدقيني بتحصلين طرق تقنعينه دون تنطقين حتى
غادة بسخرية : هه تعالي قابليه نص ساعة بس ثم اتحداك تعيدين كلامك
إبتسام : حالتك تجيب لهم بالبجامة وما أدري ايش .. بدلي خلينا ننزل نجلس مع ام فراس شايله همك تقول معد نزلت لنا
غادة : إبتسام طلبتك انا مو مصدقة حصلتك تجيني .. مابي انزل ولا أبي اقابل احد
ابتسام : والله ماوراك سالفة .. اجل احد يفوت جلسة ام فراس ؟!
غادة : ايوه اذا صار فيه احتمال ان فراس يجي ويشارك هالجلسة .. يفوتها ويكفي نفسه شرها كمان
إبتسام : طيب انا اللحين موجودة ! مستحيل يتربع بنص الجلسة معاي .. يله تعالي والله مو حلوة جالسين فوق وهي تحت
غادة بضيق : خلاص انزلي انتي .. انا ثواني بس ابدل وجايه
إبتسام : يله لاتتأخرين سابقتك
نـزلت ابتسام ... بينما غادة تنهدت وهي تدخل غرفتها اساسا لازم تنزل لأنها بتموت جوع ! لبست بنطـال أسود سكيني مع بلوزة بيضاء رسمية فضفاضة لنص فخذها , مع هيلز سوداء وشعـرها طرحته على وجهها بطبيعته .. وماكانت محتاجة غير هالشعر عشان يعطي طـلتها جاذبية غييير بشكله الملفت لآخر ظهرها ,اكتفت بمرطب على شفايفها وكحل على السريع ... ونزلت مباشرة وهي تسأل الخدامة : وين المدام ؟!
ميري : برا حديقة
دخلت المطبخ قبل تطـلع .. لأنها رسميا بتموت جوع ماقدرت تشتغل بالمطبخ فخذت اسهل خيار قدامها توست وجلست تحشاه جبنـه ... جتها الخدامة بخوف : هاتي اسوي انا !
غادة : شعقبه خلاص خلصت ... بس لو سمحتي كاس عصير
طلعت لها الخدامة عصير وهي تنطق باعجاب : مدام انتي هـــيلو ما شاء الله
تنهدت غادة : هييييه ياميري .. وش فاد الزين دام الحظ طايح
ميري مافهمت كلامها .. فرجعت تنطق : ما شاء الله
اثناء ماهي تـاكل انتبهت لأنس يدخل المطبخ ... واضح لما انتبه لها وردت خدوده لأنه أول مرة يشوفها لكنها ما اهتمت .. ما عادت ترجي منه مصلحة عقب مارفض طلبها مو مضطرة تهتم به ! كملت أكلها طبيعي ..
أنس وهو يحك خده : ميري وين ؟!
غادة : همممممم شكلها طلعت .. إيش تبغى ؟! انا اسوي لك
انس بربكة : لا بس ... ولا شي خلاص
غادة : هههههههههههه عادي قول يمكن اعرف
أنس : جويـع ابيها تسوي لي سندويتشه
غادة ابتسمت : ولايهمك اسنعك انا اللحين
انس هز راسه وطلع مباشرة .... غادة : هههههههههه ياحليله يستحي
سوت له سندويتشه على السريع مع كاس عصير ... وحطتها عنده بالصالة ثم طلعت مباشرة وهي تحس بانتعاش من نسمة الهواء اللي برا .. : هلا والله .... تو مازانت الجلسة
ابتسمت لأم فراس وهي ترجع شعرها ورا اذنها وتتوجه لهم : الجلسة
زينة
دامك فيهـا
إبتسام : ايه والله معها حق جلستك انتي ماتمل
غادة : إلا اقول ابتسام عرفتي جنس البيبي !؟
إبتسام : عرضت علي تعلمني بس انا رفضت ... مابي اعرف اللي بيجي من الله وش حلوه
غادة : ايوه بس حلو تعرفين عشان تستعدين له يعني
ام فراس : لا والله معها حق لاتعرف ... وبعدين مو دايم يصيبون ... انا ببدر ولدي قالو لي بنت شوي جا ولد
إبتسام : اتوقع بهالوقت صارت تحليلاتهم دقيقة اكثر ... بس برضو معك حق مو شرط يصيبون
انتبهوا لصوت الباب ينفتح .. لكن الجلسة كانت عند النافورة منفصلة عن مقدمة الحديقة , ابتسمت ام فراس : هذا أكيد فراس رجع .. غادة حبيبتي روحي شوفيه لايدور احد بالبيت ومايحصل
غادة بتهرب : انس وياسمين جوا .. بيقولوا له
أم فراس تعمدت تحرجها عشان تقوم : هاااو ؟! ماتبين تقومين لولدي يعني ؟!
غادة : لا شــدعوة بس ...
نغزتها ابتسام وهي تعطيها نظرة بمعنى " قومي " ... ابتسمت غادة بانحراج : رايحة اللحين
ابعدت كرسيـها وهي تمشي دون نفس ... مجرد ماوصلت الممر المزين للحديقة الرئيسية انتبهت للباب الرئيسي للبيت يتسكر يعني دخل , تاففت مفروض ترجع وتحقره ! ... دخلت وهي تسمع نبرته المتشائمة : من جالسة معـاه ؟!
ياسمين اللي كان جالسة بالصالة مع انس : ابتسام اخت غادة هنا
فراس دون نفس : كملت ..
غادة انقهرت .. مو عاجبة حتى ان احد يزورها !
ياسمين طالعت انس : ابي زي سندويشتك ! ميري ماتسويها كذا !
انس بوناسة : هذي سوتها لي غادة
بلعت غادة ريقها وهي تتمنى تسد فم انس ( لأا لا لا لا لا اسكت اسكت ! ) وصل قلبها لحلقها وهي تسمع فراس : سواها لك مين ؟!
انس بطبيعية وهو ياكل : غادة .. " التفت لياسمين " تبين قولي لها
فراس بتحقيق : وليش حضرتها تسوي لك ؟!
أنس : دخلت المطبخ حصلتها هناك ... سالت عن ميري عشان تسوي لي بس هي قالت وش تبي وانا بسوي , وقلت لها وسوت ..
فراس نطق بنبرة تهديدية ما فهمها انس لكن هي فهمتها : ماشي .
مجرد ماطلع من الصالة .. قبل يصعد التفت وهو ينتبه للي واقفة عند الباب , غادة مجرد ماطاحت عيونه عليها سكرت الباب وهي ترجع تطلع ... اثناء ماهي تمشي بشكل مسرع استوقفها صوته الحاد : مكانك !
غادة غمضت عيونها وهي تعض على شفتها .. انا وش يلقفني اسوي له سندويتشه ولا غيره ! حاولت تلتفت وتحكي بشكل طبيعي : انت جيت .!؟
فراس رفع حــواجبه وهو يوقف قدامها مباشرة : ليش طلعتي أول ماشفتيني ؟! ولا السارق على راسه خياله !
غادة وعيـونها بعيونه .. شاحت بنظرها دون ترد : ................
فراس بحدة : إذا تحسبين فترة مصلحتك عندي انتهت عقب رنيم ! وناوية تلفين لي يمين ويسار فتعدلي لك أخت أنا للحين تاركك تقابلينها!
غادة فتحت عيـونها .. ونطقت بقهر : جزاك الله خير تكرمت علي طال عمرك !
فراس طالعها من فوق لتحت : هالمنظر لايشوفه أخوي مرة ثانية ! سمعتي ؟!
غادة كانت شادة على قبضتها وتحسه جالس يلعب باعصابها : .................................
فراس رفع حواجبه : صقهــــــى ؟!
غادة : لا ماني صقهى . . بس ..
: جيـــت حبيبي ؟!
فراس : ايه تو جيت
غادة كانت منزلة راسها وتحمد ربها ان ام فراس جت , ام فراس نقلت بصرها بينه وبين غادة : وش بتسوي اللحين؟
فراس : ما اشوف قدامي ابي النوم ... فعجلوا العشاء
ام فراس : إبتسام هنا مانقدر نتركها كلنا ...
غادة نطقت مباشرة : لاتشيلين هم إبتسام انا بجلس معها تعشوا انتو
ورجعت مباشرة لإبتسام ... ام فراس تنهدت باحباط كان بتقول " تعشوا لحالكم " , فراس : وش هالتنهيدة ؟!
أم فراس بعصبية خفيفة : أبد سلامتك ! ليش ماتتعشى معها ؟!
فراس : عشان تنسرط عيشتي ولا تنشب بنص حلقي !
ام فراس : حرام عليك مو لهالدرجة ... والله انت لو تحاول تنتبه لها شوي بتكتشف انها تدخل القلب
فراس : اقول وين اسماء مو شايفها ؟!
أم فراس : طلعت مع ميهاف يتسوقون للجامعات قربت
فراس : الساعة 11 ! سوق هالحزة ؟!!!
أم فراس : بكلمها اعجلــــها .. بس اكيد بتتعشى برا وبعدين اللي بيرجعهم بدر اخوك خل ياخذون راحتهم
عـــند إبتسام /
رجعت لها غادة وهي تجلس باحباط : ..................
إبتسام : ماجلستي هناك حتى ربع ساعة ! امداك تكشرين ؟!
غادة مددت رجولها على الطاولة وهي تسند راسها على الكرسي : امنيتي بمرة أتكلم معه .. ولا احس اني ابي ابكي
إبتسام : طولي بالك ... مصيره يمل من هالتوتر اللي عايشه
غادة : من قالك انه متوتر ؟! عايش حياته بطولها وعرضها ..
إبتسام حست أنها ضايقة بجد : ترجعين معي اليوم .؟! نسهر ونروق شوي ..
غادة دون تفكير : لا ... مابي اسأله ولا أبي اكلمه وارجع انخنق
إبتسام تنهدت : شصار من شوي .؟!
غادة : ماصار شي ! دون سبب بيسوي لي سالفة ..خلاص انا انكتمت منه , صرت ما اتحمس اجلس مع اهله من كثر ماينقدني قدامهم
ابتسام : آسفـة حبيبتي
غادة بضيق : من النكد اللي جالس يصير جالسة أحس البسطة والوناسة يكرهوني ! مايبون يجوني
إبتسام : غادة انا لازم اروح اللحين ومابي اروح وانتي بهالحالة .. وسعي صدرك ..
غادة : ..............
ابتسام : اسمعيني حبيبتي ادري انك جالسة تحسين ان مواقفك تعيسة مرة وان الكئابة مغطية حياتك وأن كلامه يزعلك بس أظل اقولك إلا ماتجيك لحظات حلوة لاتصيرين انسانة نكدية مهما صار .. ومع الايام بتجيك لحظات تنسيك كل اللي صار فلاتفكرين كثير
غادة كانت ضايقة بس مايحتاج تضايق ابتسام معها : ليش ما اكلتي صحنك ؟!
إبتسام : شبعت حمدالله خلاص
غادة : انتي تاكلين عن اثنين ! استرينا في نايف بالله لايبلشك يقول ليش ولدي ضعيف
إبتسام : هههههههههههه اكلي انتي ماعليك مني .. انا اكلت نص صحني اقل شي
غادة : سد نفسي الله يسد نفسه
إبتسام : غغغدو خلاصص ! " تنهدت " السواق ادق عليه من شوي مايرد
غادة : لا ترجعي مع السواق بهالوقت .. متأخر مرة , كلمي هيثم شوفيه
إبتسام : بشوف مع اني ماظنيــــته يفضى
أول مادقت رد : هلا ابتسام
ابتسام : هلا والله ... فاضي ياحلو ؟!
هيثم : على حسب .. إيش عندك ؟
إبتسام : هممممم انا عند غادة ... وابي ارجع لبيتي بس السواق مايرد
هيثم ( عند غادة اجل ؟! ) : مسافة الطريق .
إبتسام : يله يعطيك العافية
سكرت السماعة : يقول مسافة الطريق ..
غادة هزت راسها : كويس
***
بسيارة بدر .... زفرت اسماء بقرف : اففففففففففففففف !!!! امي سوت لي حالة استنفار لأن فراس رجع البيت وانا مو فيه !
ميهاف : لحول مع اخوك انتي مو مع الجني
بدر : قولي لهم مسافة الطريق خلاص .
ميهاف : والله قهر كان نفسي نوقف عند مطعم نتعشى قبل نرجعك
بدر : خاطرك بمطعم عيـوني ؟! ولا يهمك نرمي هاللي معنا بيتهم ونروح
اسماء : وجعــــــوه .. احتروني انزل ثم قرروا !
بدر : سوي حالك ماسمعتي مايخالف
أول ماوصلـــوا ... نزلت اسماء وهي تتهزا : سوي حالك ماسمعتي مايخالف " وسكرت الباب باقوى ماعندها "
مشت السيارة مباشرة حتى طيرت الهواء بوجهها .. اسماء بقرف : وجع بعد ! حيوانات بعـــــد !
ما انتبهت اثناء حلطمتها للسيارة الـواقفة قدام البيت والشخص اللي يطالعها من انعكاس المراية وماتوقع انها تطلع قدامه بهالسهولة... قبل تضرب الجرس انوخزت لشي وراها التفتت وعيونها الزرقاء توسعت وهي تنتبه له , هو نفسه لبس الدكـاترة عليه حتى : ................................
دارت الدنيا فيها ... زمــــــان زمان ماشافته تجمعت دموعها تلقائي وهي تشوفه ليش كل مرة تشوفه ترجع للصفر ؟!
فتح هيثم النـافذة .. نطق : كيف البعثـة ؟
اسماء دون تحس بنفسها نزلت الدرجات حتى صارت قدام سيارته .. وهي تتأمله كانت بخير وقت غاب عنها مدة طويلة واللحين كأنها ماتجاوزته اصلن ابتسمت بين دموعها : عليك أنت عيـون .. تشافي المبتلي
رغم قلقه طول هالفترة من اختفائها ... ماقدر الا يظهر بمظهر بارد وهادي : أيـوه كمان كثري من هالحكي .. راح اصدقك صدقيني
اسماء وهي تستشعر الاستهزاء من نبرته : إذا قصدك عتب .؟ اجل انا عتبانه اكثر ..
هيثم ابتسم ببرود : اها .. اتمنى تحصلين وقت ببعثتك تعتبين على هالأمور
اسماء : بعثـه ؟!
هيثم : اجحدي كمـان .. معلوم بعثتك يالناجحة !
أسماء : وانت مافكرت ليش انا ابغى هالبعثة ؟
هيثم : مايبيلها تفكير ... مستقبلك مهم وهذا حقك بس لعب المشاعر هذا بطليه !
اسماء انفجرت : ما اخترت ابتعث واغترب وابعد إلا اني احس بتعب وضيقة نفس ببشاعة وبشكل زايد .. ومزاج يتقلب ألف مرة باليوم ! " نزلت دمعه " اشتقت لك .. واحسني محتاجه افضفض لاحد بس مابي احد اذا ماكان أنت
هيثم توتر منشكـلها .. تلفت يمينه ويساره وهو يتنهد : ادخلي لايشوفك احد ..
أسماء عضت على شفاتها : اذا .. اذا في راسك أني ما ألعب مثل ما انت تقول , وش راح يكون جوابك على مشاعري وقتها ؟
هيثم تنهد : خليك واقعية اسماء
قاطعتها اسماء بقهر : مابي اصير واقعية ! الواقع زبالة مايناسبني
هيثم توتر من انفعالها خصوصا ان المكان غلط ... نطق : تقولي اذا في راسي انك ماتلعبين ؟! صعب افكر لك بجـواب شي مو حقيقي !
اسماء ... ظلت تطالعه بقهر يعني في راسه انها تلعب ومرسوخة بعقلة : ................
دق جـواله ... رفعه وهو يرد : هلا ابتسام ............ انا برا .... يله
اول ماسكرتها نطقت اسماء وهي تنفطر : غيرك بدا يكسبني وأنت ابقى على حالك ياثقيل !
ودارت ظهرها وهي تدخل .. هيثم رجع القلق ينـاوبه ماعمره كذب عيـونها , بس الواقع يقول كذا ! انفتح الباب ودخلت ابتسام : سلام
هيثم وهو يحرك السيارة : وعليكم الســـلام .
إبتسام : حسافة انا طالعة واسوم داخلة
هيثم قرر يحاول يعرف الصدق : اللي تقولي مبتعثة ؟
إبتسام : لا امها رفضت ابتعاثها .. راح تدرس هنا
هيثم احبط .. يعني لو امها موافقة راحت ولا همها : ......... اها الله يوفقها
***
بعد ماراحت إبتسـام .. دخلت البيت حمدت ربها لما ماحصلته , ابتسمت لها ام فراس وهي جالسة مع ياسمين : راحت ابتسام ؟!
غادة : ايه تو راحت
ام فراس : تعشين ؟!
غادة : لا ماقصرت أكلت خلاص .. فيه العافية
ام فراس : يعافيك
غادة : تصبحون على خير
ام فراس : وانتي من اهله
صعـدت لفـوق .. ومباشرة وقفت قدام غرفته بلعت ريقها وهي تستعد نفسيا وطقت الباب جاها صوته : من .؟!
غادة : احـــم ... انا غادة
بعد وهلة انفتح الباب وطلع نص جسمه .. كان بالثوب بس مفتوحه ازاريره ودون شماغ وشعره مبعثر على غير العاده وعيـونه العسلية ناعسه اكثر من العادة كان شكله جــذاب : نعــم .؟!
غادة بلعت ريقها وبعد صعوبة نطقت : المطبـخ فوق محتاج اغراض
فراس : جالسة تضربين الباب بهالوقت عشان تقولين المطبخ يبي اغراض ؟ سواق ابوك انا ؟
غادة : مو قصدي ... ماعندي مشكلة اطلع مع السواق اذا يضايقك واجيبها !
فراس اسند مرفقه على الباب : جتك من الله بتطلعين مع السواق ؟!
غادة : ماجيت عشان تتهزا فيني ... انا اجوع فوق واتوقع هالشي مسؤوليتك !
فراس تنرفز : وين يمديك تجوعين وانتي 24 ساعة في 24 ناشبه بوجهي تحت !
غادة بقهر :خلاص اسفة اعتبرني ماقلت شي
ومشت بطريقهـا وصعدت فوق مباشرة ... وهي تضرب الارض تحتها : عند كلش يسوي سالفة ! لازم الواحد ينزل يعني ويذل نفسه .... لا فوق اني حابسة نفسي معظم اليوم فوق يقولي 24 ساعة ! بوريك انا ال 24 ساعة كيف
***
اليـوم التالي – 8 صباح /
فتح عيـونه من النوم .. طالع الساعة 8 لسى بدري تو بيرجع ينام انتبه انها مو موجودة جمبه عقد حواجبه وهو ينادي : ميهاف ؟!
نهض من سريره وهو يطلع .. حصلها بالصـالة جالسة على كـافي ولابسة شيرت كم نص مخطط بنكي وشفاف مع شورت أبيض وشعرها رافعته بشكل عشوائي .. واللاب قدامها ابتسمت لما شافته : صباح الخير .. غريبة صحيت بدري ؟
بدر : ماصحيت ... أبنام بس استغربت لما ماحصلتك " مشى ناحيتها " شجالسة تسوين ؟!
ميهاف التفتت له : مافيه شي مهم بس دكتورة مراسلتني وكنت ارد عليها وبالمرة اشيك على شنطتي وصلت ولا لا .؟! " ابتسمت بحماس " دام صحيت شرايك نطلع نفطر برا .؟!
بدر وهو يمسج رقبته بيده : أقول ميهـاف .؟!
ميهاف : عيونها قول ..
بدر سحب له كرسي وهو يجلس قدامها : مابي أحبطك بس .. انتي ليش جالسة تدرسين اللحين ؟!
ميهاف عقدت حواجبها باستنكار لسؤاله : عشان مستقبلي طبعا ! محتاجة شهادة
بدر : الشهادة للوظيفة مو !؟
ميهاف : اجل لشنو ؟
بدر : أيـوه بس انا وضحت لك من قبل ... مابي موظفة وانتي باقي لك سنتين على ماتتخرجين اتوقع انك خلال هالسنتين راح تنشغلين عن الوظيفة اساسا
ميهاف ما اعجبها كلامه : لا ماراح انشغل ! شدعوة يعني ؟
بدر : إلا ماتنشغلين ! انا اشوف ربعـي ماني غشيم واشوف اللي حولي .. البيت له عامودين الرجال برا والبنت بالبيت اذا صارت البنت برا البيت معنـاه البيت ماله عامود , مو ؟
ميهاف تنهدت بضيق : قدامنا سنتين على ما اتخرج .. مو ضروري افكر بوظيفة او غيره اللحين خلها لوقتها
بدر : انا مابي اصدمك عشان كذا اقولك من اللحين .. وظيفة مافيه فاذا حاسة تضيعين وقتك بدراستك فبطلي
ميهاف فتحت عيونها ونطقت بقرف : واصيـــــــر انسانة غير متعلمة ؟!!!
بدر : شوي شوي على عيونك لاتطلع من محلها ! وخير ياطير انسانة غير متعلمة ؟! كلها شهادة ترا
ميهاف : بـدر انا انسانة ناجحة .. انا الوحيدة بدفعتي كلها اللي جاها عروض من الدكاترة لوظايف بعد الجامعة , والوحيدة اللي انعرض لها تصير معيدة ! واخرها شنـو ؟ ما اخذ شهادة واجلس بالبيت
بدر تنهد : اوك خذي الشهادة لاتفوتك ... بس انا من اللحين ضد الوظيفة ولا راح تتوظفين
ميهاف : ماراح اناقشك بحاجة عقب سنتين ...
بدر حاس بفمه وهو يوقف : انا قلت لك وبس .. وهالموضوع بالذات قناعة يعني احلمي تكسرينها عندي
سكتت ميهـاف .. مستحيل تنكد نفسها عشان حاجة عقب سنتين , رغم انها تنكدت بالفعل بس قررت تطنش وتكمل دراستها ومصير الدنيا تفهمه تنهدت وهي تنتبه له يبدل ويستعد يطلع
***
صحـت غادة من النوم بدري ... لغرض واحد بس ! بتنزل تنكد عليه عشان يعرف كيف تكون قدامه 24 ساعة .. خلصت لبسها وسحبت طرحتها تو بتنزل حصلت اكياس كثيرة قدام الباب .. كبست بعيـونها وهي تنتبه لورقة ملاحظة فوق الأكياس .. سحبتها وهي تقرا " وخل اشوفك نأزلة بعد ! "
حاست بفمها وهي تتأمل الأكياس المنوعة بجميع أنواع المأكولات ... تنهدت وهي تسحبها لداخل وتلغي الخطة قطع حجـتها بالنزول خلاص ...
تحت /
أم فراس جالسة مع ياسمين وانس يفطرون ... انتبهت لفراس ينزل الدرج بخطوات سريعة : صباح الخير يمه
فراس : صباح النور .. تامرين على شي ؟
ام فراس : بتطلع اللحين ؟! تو بدري !
فراس : فيه رجال يبيني وحاجة مستعجلة ماتتحمل تأخير
ام فراس : طيب غادة شتسوي خل تنزل تفطر معنا ..
فراس وهو بطريقة لبرا : انـا طالع وهي تفطر افطروا انتوا اهم شي
ام فراس ابتسمت دون شعـور .. اول مرة يتكلم عن شي بينهم , حمدالله طلع فيه اكل فوق !؟ اجل الوضع ماهو بذاك السوء , انغمر قلبها بالفرحـة طول عمرها تنتظر تشوف ولدها مستقر واللحين شافته
***
وصــل نايف اراضي السعـودية ... اول ما استلم اغراضة وفتح جـواله جته مكالمة من ابوه : هلا يبه !
جاه صوت ابوه الصارم : اللحين تجيني بالشركة !
وسكر السماعة مباشرة عقد حواجبه باستغراب .. تنهد وهو يركب سيارته ويتوجه مباشرة لعنده أول مادخلت حصله جالس وفراس عنده والصمت مخيم : سلام عليكم
فراس : وعليكم السلام
جلس نايف ونطق بمرح لفراس : مبروك عرسك مابغيت يخي .. كويس اعرست قبل تموت
طالعه فراس بنص عين ... وهو ياشر لأبو نايف اللي كانت حالته واضح متنكدة
نايف : عسى ماشر وش صاير ؟
فراس هز كتوفه : عم تكلم .... نشفت معك من وصلت وانت ماتكلمت
ابو نايف فتح جواله وهو يجري مكالمة استغربوها : الو ...... طيارة مصر المتوجهه لأمريكا فيها مسافر ابيه يوقف ...... آسمه لؤي عبدالرحمن بن نايف الشمري
فتح نايف عيـونه باستغراب ... اما فراس حلل الموقف مباشرة اكيد عرف اكتفى بانه يطالع الطاولة بينما أبو نايف يطالعه بحده : يعــــــني فهمت انا وش اقصد !! يعـني كل هالفترة تدري وصاف يدك !!
فراس : ....................
Like
موضى و راكان
likes this.