نـوح الـحـمـام - الفصل 176 - بقلم ضــوء الــقــمــر - مكتملة | روايتك

رواية نوح الحمام الفصل 176 بعدمرور 3 سنوات على وفاة امي..!! نمر كبر لكن ما زالت احس مناعته ضعيفه بسرعه ترتفع حرارته ويتعب .., ما ادري هو قلب الام والا فعلن علشانه انولد قبل وقته..؟! با السنوات الي مضوا تعبت كثير كان ضغط علي ماهو طبيعي..! با النسبه لنمر كنت ام مبتدئه الكل يشرح لي كيف اسوي وكيف اعمل مع ولدي..!! نجلاء وبشرى وحتى بناتهم وخالتي ام ابراهيم وريم ما اتركوني .., لكن النظري غير العملي كلهم كانت تجيني منهم نصايح..؟! مع نمر مرات ابكي ومرات اضحك لما كمل سنه حاول معي زياد اني احمل لكن رفضت ما نسيت تعبي بحمل نمر وولادته..؟! عاقبني زياد عقوبه حلوه كملت رسالة الماجستير الي اجلتها والحمدلله توفقت والتقدير كا العاده جيد جدآ ما ارضى زياد..؟! لكن انا كنت سعيده ودايم اكرر لزياد خير الامور اوسطها.., انقطعت علاقتي نهائي باآل ناصرعلى الرغم من ان بناتهم كلموني على فترات متباعده خصوص بعد ماتزوجوا وانفصلو عن اهلهم كنت احاول اني اكون رسميه معاهم واكيد العذر الظاهر للكل ان اهلهم غلطوا بحقي.. وكنت مصوره لهم ان زوجي ما يحب العلاقات الاجتماعيه كثير ويتضايق منها.. لكن السبب الحقيقي ما كان الا خوفي اني افتح على نفسي باب من جهت اهلي .. فكنت احاول اسحب نفسي بهدوء من اي شي له صله باامي وضحى حتى ينسوني الجميع .., دق جوالي كان زياد.., زياد\صباح الحب.., عوق بضحك\هلا وغلاوش ها الروقان.., زياد\لا بس حبيت اخبرك اليوم الغداء خليه مبكر بطلع بدري.., عوق\ابشر تبي شي معين والا اطبخ على مزاجي.. زياد\لا على مزاجك بيجي احلى.., نموري صاحي...!؟ عوق \ايوا هذاك هو قدامي بغرفة خالتي يلعب.., زيادبتحذير\انتبهي له الولد حركته كثيره.. عوق\لا ما عليك قدام عيني ماقصرت على ها الفكره انك خليت غرفة خالتي الله يرحمها غرفة العاب مكشوفه الاطفال ما ينضمنون.., زياد بوجع\الله يرحمها ماعندي اغلى من ولدي ياخذ راحته بغرفة امي.., ومن هنا جتني الفكره غرفة العاب مكشوفه وتشوفينهم من ورى الجدار البلاستيكي الشفاف .., عوق \زياد معي خط تبي شي.. زياد\لا سلامتك لكن لا تنسين الغداء بدري.. سكرت من زياد والي كان معي على الخط خالتي ام ابراهيم كلمتها.., عوق بفرحه\ ياهلا ويامرحبا .., ام ابراهيم \هلابتس واخباركم بشريني انقطعتي لا تجين بيتس مثل اول ولا صرنا نشوفتس .., عوق\ خالتي ضغط علي وانا اسبوع هنا واسبوع هناك نمر يتعب تعرفين ماعنده مناعه.., ام ابراهيم \والله ماعنده ان شاء الله الا الخير لكن انتي موسوسه..! عوق بضحك\بشريني عن البنات..؟ ام ابراهيم \ابشرتس كل شي على ما يسر خاطرتس انتي مشغوله اليوم.., عوق\افضى لتس انتي تامرين.., ام ابراهيم \ما يامر عليتس ظالم اجل بزورتس بعد المغرب نمر بيشوف سميه.. عوق \حياكم الله انتي ونمر.. ام ابراهيم \ومعي ضيفه بتجي ترى مانيب الحالي .. عوق\ حياتس الله انتي راعية بيت .. ام ابراهيم \الله يوفقتس ويخلي لتس وليدتس بس عندي طلب صغير.., عوق بتوجس \قولي خالتي اطلبي.. ام ابراهيم \لا تعزمين احد انا والضيفه بنشوفتس الحالنا وهذا والله طلبها هي .., عوق\ ابشري من الي معتس خالتي..؟ ام ابراهيم \اذا جيناتس بتشوفينها لكن لاتنسين الي قلت لتس.., سكرت الخط من خالتي نوره وقمت علشان اجهز الغدا وعيني على ولدي.. من يوم بدى يميز نمر واحنا صارت جلستنا تحت وغرفة الاشباح حولتها غرفه لنمر.., مجرد ديكور والا ما ينام الا بغرفتي جهزت الغدا وصلحت حلى لقهوة المغرب.. من يا ترى الضيفه الي خالتي رفضت تخبرني عنها مر الوقت وكلمني زياد علشان اجهز الغدا.., وصل وتغدينا ونمر بينا مالي علينا حياتنا بحركاته.. الله يرحم امي يوم كانت تقول سقى الله يوم اشوف عويلتس ياعوق يلعبون حولنا.., زياديضحك بتهكم\تدرين عوق ان نمر على كثر حركته المفروض اسمه اوس , ضرغام , .., عوق تبتسم\ لله دره ها الولد كل اساميه وحوش .., -------------------------------------- يتبــع.