الفصل 129
رواية نوح الحمام
الفصل 129
جاتني رساله من زياد؛
(كيف العنود وامهااليوم)
ارسلت ؛
( طيبات ومشكور على الهديه الي ارسلتها لزوجة نواف )
ارسل؛
(ما سويت شي ونواف يستاهل عساه اعجبهم )
ارسلت ؛
(مره اعجبهم وحتى يقولون المفرش حيل غالي حسيتهم يجاملوني بكلامهم )
ارسل ؛
( ههههه يجاملونك تدرين كم سعره..!! )
ارسلت ؛
(كم يعني كله مفرش..؟)
ارسل؛
( قيمة المفرش مقدار راتبك في المدرسه الاهليه 3مرااااااات )
ارسلت ؛
(انت صادق)
ارسل؛
(اما عاد اكذب عليك تداومين من الصباح لظهر وحصص وتعب واخرتها تجمعين رواتب ثلاث شهور علشان تشترينه)
ارسلت؛
(اكيد تمزح)
ارسل؛
(لا بعد الراتب صافي ماتصرفين ولا ريال منه)
فجعني كلامه وش قصده يوم يرسل هديه بالقيمه هذي..,
ارسل ؛
(تبين تتأكدين امرك ونطلع للمحل تشوفين السعر واشتري لك واحد مثله زوجة نواف ماهي احسن منك)
ارسلت ؛
(خلاص ما يحتاج مصدقتك)
ارسل؛
(تكفين عوق بطلع معك نتمشى ساعه وحده وارجعك عند امك شوفي لك اي عذر صرفي امك فيه
ليتني خليت مواعيدك با المستشفى يوميه ماتتخيلين وش كثرمشتاق لك وربي اتخيلك بكل مكان)
ارسلت ؛
(الي فيك كله من السهر يا دكتور قلة النوم تخلي الواحد يهلوس )
ارسل ؛
(الله لايوريك حالتي مستعصيه فوق قهر اليتم ذبحني الجوع يا ليت امك مطوله في البر
كان ما انحرمت من اكل خدامتكم ان كان امك بترجع بوصلها بنفسي )
ارسلت ؛
( بوضعك يمدحون النوم )
ارسل
(والي ذبحته الوحده ومافيه نوم وش يسوي)
ارسلت ؛
(ابد ما يسوي شي ياخذ دش ويشرب حليب دافي وينام)
ارسل ؛
(آه بس انتي تتكلمين و ما تحسين بلي احس فيه
يا شين الشوق با الليل يا ستار تسهركن ما بالعيون جفون )
قفلت الجوال ونمت زياد ماراح يعتقني من رسايله..,
الصباح صحيت وطلعت افطر واتقهوى مع امي
ام عوق با انتقاد لاذع \وش عرف زياد انتس تبين لبنت مسلط مفرش..,
عوق منحرجه\يمه انا ارسلت له ماكان قدامي حل الا هذا ..
ام عوق بتهكم\ترى ماكأني سويت شي انا اصده من جهه ابيه يعرف قيمتس..
وانتي تغافليني من وراي وتضكحون علي انتي وهو..,
عوق بخجل \يمه والله ماهو قصدي ولا تقولين اني اضحك عليتس ..,
ام عوق با انتقاد\ للحين انتي صغيره زياد مهما ضحك لتس وعطاتس من معسول كلامه احذري منه الرياجيل ما ينأمن لكلامهم..
انا ادري انه يحبتس وشاريتس لكن ابي الي اسويه الحين له قرصة اذن بعدين هذي فرصتس تعلمينه قدرتس..
يا عوق من هي الا م الي ترضى بخراب بيت بنتها بس وش اسوي انتي الي حديتيني..,
عوق با انكسار\ ابشري ..
ام عوق \تروحين لعرس الجوهره..؟
عوق \والله ودي لكن ما اقدر اطول با الوقفه..,
ام عوق\اجل على خير انا بروح لهم واقوم با الواجب وارجع بسرعه..
عوق \يمه استانسي عادي لا ترجعين الا اذا طاب خاطرتس..,
ام عوق \الحاره اكيد بتخلا الجيران كلهم بيحضرون العرس ما اقدرابطي
مالي حيل على السهر وانتي تعبانه..,
الحمدلله عدى الموقف على خير ...
زياد صار يرسل ويدق ولا ارد عليه ..,
.
.
يوم عرس الجوهره
.
.
ام عوق بتحذير\انا الحين طالعه مع السواق انتبهي لنفستس
بسلم على ام ابراهيم وام جزاع وبسرعه بعود ماهو من بعد القصر..
--------------------------------------
يتبــع.