10/11
القائمة
روايات
بحث عن
الرئيسية/الجزء
الجزء
الجزء العاشر من رواية محظوظ ولكن
الجزء العاشر من رواية محظوظ ولكن
صورة مهند أدهم مهند أدهميونيو 18, 20220505 10 دقائق
وفي الجزء العاشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء العاشر من رواية محظوظ ولكن
نزلت ندى من سيارة متانقة
وﻻبسة كعب ونظارات …
ومانتبهتش لسكيروتي وفجاة يتلفت عمر ويلقى ندى …
وتجي عين ندى ف عين عمر ..
عمر معش فهم شي 😮
ندى تشنجت ؛_؛
فرج حار لهلموقف الغريب *_*
شن جيبها ندى اهنا ..
ادم : الشركة نورت يا انسة ندى..
استدركت نفسها ندى وخشت مع ادم
عمر يشوف ل فرج وفرج يشوف لعمر …
خش عمر لريسبشن ولقي ادم و ندى واقفين يستنوا ف اﻻصنصير
ندى مرتبكة تتلفت تشوف لعمر وخايفة وتتلفت ل ادم وتبتسم وتواسي في خصلات شعرها من اﻻرتباك …
ادم : انستيني الشركة نورت
ندى مش مركزة مع ادم …
ادم : ندى خيرك من وقت وصلتي لشركة وانتي مش على بعضك …
عمر يتقدم بخطوات واسعة كالأسد الجريح و وجهه احمر
ندى ل ادم : اها وﻻ حاجة حسيت بدوخة بس …
ادم : سﻻمتك ..شنو مافطرتيش ؟؟
ندى : افط …
ووصل عمر فيهم ويصيح : فهميني تواااااا
تلفت ادم ل عمر وقاله : تفضل ؟؟
ندى تلكمست : هئ حم
تلفت ادم ل ندى وقالها : تعرفيه ؟؟ قريبك؟؟
ندى سكوت تام ..
ادم حار يحسابها قريبته فقال: يا فرج كل مافي موضوع انها جت بتشتغل موظفة
عمر : مش فرج انا عمررر.. ومش قريبتي هادي
ندى حست انه فعﻻ خسرت عمر ففكرت ان اقلها يقعدلها ادم ظل راجل وﻻ ظل حيطة فقالت لي عمر : عفوا نعرفك انا ؟؟
ادم : به هيا ماتعرفكش تفضل ؟؟؟
عمر حس الموقف سخيف وانها باعاته قدام مدير الشركة
فاخبط ايده على اﻻصنصير جنب راس ندى
ندى انخلعت وصيحت : ااااه
ادم : اطلع من اهنا واحترم نفسك
عمر حسها بيووووع فشافلها نظرة حقيرة وخﻻل مايشوفلها قال : به به … سامحنا يااستاذ وان شاء الله يكون ضميرك مرتاح بس !
حست ندى الدوة عليها فنزلت راسها …
ادم : شن تقول انت
انفتح اﻻصنصير وطلعوا منه موظفين..
عمر : ان شاء الله يكون ضميرك مرتاح بس يااستاذ ادم ..
ادم : كﻻم اﻻلغاز ساد منه
عمر ايفنص في ندى وخر بخطوات للخلف …وتلفت عليهم ومشي
وطلع من الباب ..
ركب ادم وندى ف اﻻصنصير وادم راسه يرفع ويجيب … فيه ان في الموضوع وعمر 100% يعرف ندى … وندى داسة حاجة ..
فرج : عمر … ياعمر استنى
عمر : خلي عمي والله ماطيق حاجة حول يافرج
فرج : غير اصبر ياودي شن صار
عمر : شن اللي ماصارش كدابات عفن في عفن خاينات.. مافي واحدة منهم مسقمة ﻻ حب وﻻ واحدة… جايبهالي وتقولي كويسة… ياعمر بنت مافيش زيها ياعمر بنت ماﻻخير …هه نحسابوه موسى طلع فرعون
فرج : وين نندري عليها انها حربة تلعب عالحبلين
عمر : تكدب على عمي وتقول ماعنديش عمل وهيا جاية تشتغل… هدا من غير انها باعتني قدام المدير
فرج : بجديات
عمر : تي شن نكدب عليك مدير ياعيني شن بدير بيا مديييير بخيره وخميره .
فرج : امممم
عمر : كله منك يافرج كله منك ..انا كنت مسكره سريب التعارف والتكبيد
فرج : خﻻص فوتها
عمر : تي توجع اللقطة.. هادي تاني مرة اتصيرلي تي ديما ايبيعوا فيا والنبي حول يافرج تره خلي ننتلف من اهنا
فرج :والعمل
عمر :ﻻ عمل وﻻ سفنز ..قدملي استقالتي تولع بقاز الشركة على ندى على كلهم على بعضهم كمشة شفوش
الكﻻم هدا كله طاح في وذن خالد سواق ادم …كان مقعمز ف سيارته ومنزل الكرسي متكي مايبانش…
ركب سيارته عمر وعطاها الشياط
عليك حظ منيل قتلوني البنوت عييت منهم …. عيب عليها اتقولي ماعنديش عمل و بنشتغل ف مكتب وهيا جاية تتلصق في المدير …
حسبي الله ونعم الوكيل …
وصل للحوش وهوا متكطكط ومش شايف الدنيا قدامه .. على طلعة امه من المطبخ
امه : عمر …ياعمررر انت ياولد
عمر : نعم يام
امه : فيه بنت اليوم بنخ…
قاطعها عمر : به به ديري اللي تبيه
خش لداره وقربع الباب
امه : نازك انتي يابنت
نازك : نعم يمى نعم
امه : خوك قتله بنخطبلك قالي ديري اللي تبيه
نازك : عمر قال هكي
امه : والله زي مانقولك تو
نازك : غريبة !
امه : وين ماشية
نازك : بنسئله لان عمر يوافق على خطبة تقليدية مش مقتنعة !
امه : هوا انتي ياسوسة تعبيله ف راسه بري طيبي الغدي امشي تمشي فيسع …
{انا يندار فيا هكي … تعبت النهار المبارك قداش مرة تو … هل البنات بصفة عامة ماينفعوش ؟ واﻻ غير انا حظي صفر … مش حنكد روحي على خاطر واحدة زي هادي وﻻ تسوى وﻻ حنفكر فيها نكرة ..تلبس كبوطها وتلحق خواتها الخاينات ..
طق طق طق
عمر : ادخل
نازك : عمر !
عمر : ها
نازك : خيره وجهك احمر
عمر : من الغيض بس
نازك : على خاطر الخطوبة واﻻه
عمر : خطوبة شنو
نازك : توا قتلك امي العشية بنخطبلك قتلها باهي
عمر : انا قلت باهي ! امتى
نازك : وقت خشيت للحوش
عمر : استغفر الله العلي العظيم ..
وقف عمر وهوا ضايقة بيه الدنيا .
نازك : وين ماشي …عمر تعال اهنا …تو اتوريني امك
طلع عمر من داره ووقف ع امه ف وسط الحوش
عمر : شن قصة الخطوبة هادي
خ وداد : ايه بنخطبلك العشية
عمر : ومن قال اني نبي نتجوز
خ وداد : اللطف توا قتلي باهي بالك فيك حاجة ياولد انفصام في شخصية واﻻ حاجة
عمر : توا فيه ام اتقول ل ولدها عندك انفصام في شخصية
خ وداد : تي عاد توا قتلي باهي
عمر : ماقلت شي
خ وداد : بنخطبلك وخﻻص …. تو انوريك ياسوسة يلي داسة روحك يلي اسمك نازك
عمر : نازك ماليهاش عﻻقة في الموضوع..وعموما ماتخطبيليش
خ وداد : ابنخطبلك وبتاخدها ماتخلينيش نحلف عرسك السبوع الجاي عييت حتى من الدوة قداش مرة بنتكلم على خطبتك اتجوز تره فددتني
عمر : مانبيش وخﻻص وموضوع هدا سكريه يمى
خ وداد : والله وحق اسمه ماني مسكراته وﻻ راضية عليك ياعمر ياولد بطني لين نخطبلك ونجوزك هي انهيه الموضوع والله ماراضية عليك لين نخطبلك هالبنت عاجبتني ريتها ف عرس ولد خالتك نعيمة بنية صلي عالنبي حتى من شعيراتها صفر …
..شاف عمر نظرات حزن لأمه واستاجع لحاله المنكوب …
عمر : عﻻش بس عﻻش هكي اديري فيا ساد الدنيا جاية عكسي اتزيدي حتى انتي يمى حني عليا حسيني راني دم ولحم راني مش ناقص هوني عليا طبطبي عليا وقوليلي شن ناقصك ياعمر بالك فيه حاجة مضايقتك لكن ﻻﻻ اتعاملي فيا كأن ولد الجيران
خ وداد : توا واحدة قلبها على ولدها تبي اتجوزه وتبي تخليه متهني ومستقر في حياته معناها تعامل فيه زي ولد الجيران ..
عمر : الله يسامحك يمى الله يسامحك ..
خش عمر لداره خدي مفاتيح سيارته وطلع من الحوش.. ولع سيارته وركبها ويلود ف الشارع … حس ب دوخة .. بسيطة … قريب خشت فيه سيارة …
تعبان ياربي تعبان ﻻ لقيته من الدنيا وﻻ من حظي وﻻ من امي من بيهون عليا اوقف معاي ياربي ماتخلينيش بروحي ..
خ وداد : سوسة الله غالب ماتهنيتش لين خشيتيله وقلبتيله راسه
نازك : ﻻ ياودي طلع مايندريش انك بنتخطبيله
خ وداد : بﻻ تفتريش زايد نوضي بالكي جيبيلي تلفون خلي نتصل بالعويلة نقولهم بنجوكم
نازك : احح باه
{امتى ياربي اتحن عليا وتبعتلي نصيبي والله عييت من كل شي قيمي حطي بري تعالي وصلت التﻻتينات وماتقدملي حد .. فديت من مرت خوك جابت بري عاونيها ف قضية الحوش.. خوك بيخطب وتيله بيانه امتى يقولوا نازك انخطبت ^^
امتى بس {هذا موضوع الرواية الجديدة عطيتكم نبذة من خﻻل نازك }
خ وداد : يامنجوها انتي يابنت شن واقفة زي العسكري جيبي التلفون !
نازك : هيا هي
ادم مازال يفكر ويفكر في الموضوع
عﻻش عمر تنرفز من وجود ندى وعﻻش ندى اتلكمست ووجها ولى احمر لما شافت عمر ..فيه نقطة ضايعة ﻻزم نعرفها .. عمر يعرف ندى وندى تعرف عمر ابه وتعرفه كويس…
وبينما ادم يفكر وسارح نقاله رن .. طلع تليفونه ادم من جيب الجاكيت و رد
ادم : ايوه نعم
خالد : استاذ ادم فيه موضوع نبي نقولهولك
ادم : بخصوص ؟
خالد : بخصوص ااااا … بخصوص ندى… ابلة رهف بنتك ….
ادم : اركبلي في المكتب
خالد : تمام
فرج : الو عمر انت وين ؟
عمر : ف الشارع
فرج : اتصلت بيا نازك وقتلي انك طلعت متكنطي
عمر : امي بتخطبلي وانا مانبيش
فرج : غير انت وين ؟
عمر : قاعد في قهوة الساعة في المدينة
فرج : شوية وجايك غير انتم الدوام بس
عمر : باهي دير رايك
فرج : سﻻم
خالد : وهذا اللي صار يااستاذ ادم الحقق كنت مانبيش انقول لكن حسيتك مهتم بيها هلبا وانت اتعز عليا مانبيكش تتعرض لتجربة زي هادي
ادم : ﻻ باهي قتلي امممم يعني عمر يبي ندى وندى مرتبطة بيه ونكراته قدامي
خالد : ايه نسمع في عمر ايقول شن بدير بيا شخص على قد حالي شن جيبني لمدير بخيره وخميره وقال ان البنات كلهم خاينات …
ادم : تمام تمام وضحت الرؤية … مشكور خالد روح انت وكان نبي حاجة تو نكلمك
خالد : تمام
فرج : اه وصلت انا وينك
عمر : نشوف فيك كمل قدام
فرج : تمام ريتك…
سكر فرج الخط ومشي ل عمر …
وقاله : هاه شنو منو… شن قصة الخطبة هادي
عمر : والله ماني عارف روحت للحوش متعفلق من موضوع ندى زادتني امي.. شي ماتخافش عليا يرقى عليا السكر واﻻ حاجة.. كل همها اتجوزني وتمشي ف العراس بزوز كناين
فرج : زعمك او
عمر : ايه ماه جارتها هكي ادير
فرج : كيف الحل توا … باهي قتلها انك مش موافق
عمر : قتلها وقتلي ماني راضية عليك لين نخطبهالك ..والله تعبت يافرج تعبت ان شاء الله انموت ونفتك
فرج : غير اسمع…عندي حل
عمر : قول
فرج: مشي معاها امك وخليها تخطبلك وبرا شوفها بنت
عمر : ماتقوليش بالك حلوة وتعجبك
فرج : غير اصبر.. برا شوفها ومن تاني يوم اتمسمر في جيهتهم اكيدة حتطلع البنت هنا واﻻ هنا ..كلمها وتفاهم معاها وفهمها ان الرفض يكون منها هيا وفهمها ان امك هيا اللي مصرة عليك
عمر : قصدك اتقول ل اماليها رافضة ومانبيشي
فرج : بالزبط
عمر : والله تاريتك مش هوين يافروجة
فرج : ها اماﻻ شنو تحساب
عمر : به هدا موضوع وشبه حصلتله حل وموضوع الكلبة ندى راكبة فيا نار مايعلم بيها اﻻ ربي … ااحيه راسي
فرج : خديت حبة السكر اليوم
عمر : والله ماخديتها
فرج : فالح اقعد هكي لين اتجيك غيبوبة سكر باهي وزيد اسحن ف جراير البنات
عمر خبط على الطاولة لين تلفتوله الشباب اللي مقعمزين في القهوة وقال : ماك مش حاس بيا يافرج نار تاكل فيا ماكلة
فرج : اس اس ياسر بﻻ عار اهفت وراء كل عﻻقة لازم الشهدرة في الشارع شد روحك ياراجل راك
تريس
عمر : استغفر الله وخﻻص …
تررررررن
ادم : ايوه نعم
حسنة : ادم .. بنتك تعيط تبي ندى
ادم : سكتيها مش فاضي انا
حسنة : قولها ندى اتجي.. نتصل بيها من بكري ماتردش
ادم : اتصرفي ياحسنة راسي يرفع ويجيب توا …مش قادر حتى انفكر
حسنة : باهي به سﻻم
وقف ادم على الروشن يفكر
كيف بيتصرف مع ندى ..
زعما كيف اندير … عندي حلين ياام نخليها تشتغل في الشركة زيها زي غيرها ياام نرجعها اتكون مع رهف … ﻻﻻ مع رهف ﻻ مستحيل نخششها لحوشي تاني
تو انكلم مديرة العﻻقات تحطها في مكتب بعيد عليا مع زميﻻتها … عﻻش مكتب بروحها لو انها تستاهل كنت حنخليها في مكتب بروحها..
قام الخط واتصل بالسكرتيرة : الو ياامل … ناديلي ميساء
امل : ان شاء الله استاذ
بعد شوي طقطقت ميساء على ادم وقالها : ادخل
ميساء : نعم استاذ طلبتني
ادم : بري ل مكتب الموظفة الجديدة ندى وانقليها في مكتب الخدمات مع عايشة و تانية نسيت اسمها
ميساء : حاضر استاذ ..
**
فرج : منو يتصل ؟؟ ندى ؟؟
عمر : ايه هالكلبة
فرج : رد عليها
عمر : مانيش راد تو نمشيلها بعد الدوام نبهدلها
فرج : به هات انرد عليها انا .. نبي نفهم شن القصة
عمر : مافيش قصص تلقاها تلعب وتوا متصلة بتحط كدبة
فرج : غير هات تلفون
عمر : هاك اه
فرج : الو نعم
ندى : عمر ..
فرج : انا فرج … شن الي درتيه ياهانم
ندى تبكي بالشهقة
وقالت : فرج … فرج افهمني قبل ماتحكم انا مش قصدي
فرج : فهميني هي
في هاﻻثناء وصلت القصقاصة ميساء لمكتب ندى … الباب مردود و كيف بطقطق عالباب ماصارلهاش سمعتها تبكي هههه بنات حشيشتنا القصقصة ووقفت تتسنط
ندى : يافرج.. استاذ ادم ضغط عليا وجابني نشتغل بالسيف اهنا في الشركة …دار فيا حالة وكان اعترفت ب عمر قدام استاد ادم ايبهدلني..فهمت عايا
انفتحوا عيون ميساء على اﻻخر 😳 على هالكﻻم اللي سمعاته شركة هههه
فرج : ياندى كﻻم مش مقنع
ندى : كيف مش مقنع
فرج : ماقتنعتش معقولة مدير بيفرض عليك تشتغلي عنده.. شن مصلحته من هدا كله
طقطقت ميساء على الباب
تلفتت ندى للباب … وقالت : شوية ونكلمك
فرج : اوك سﻻم ..
ميساء : اهلين
ندى : اهلين بيك
ميساء : انا ميساء مديرة العﻻقات
ندى : اهﻻ بيك …
ميساء : خودي شنطتك وتعالي معاي
ندى : عﻻش
ميساء: حننقلك لمكتب تاني
ندى : شن السبي
ميساء : مش عارفة… هكي قالي استاد ادم
انصدمت ندى وقعدت اتفكر … كيف يدير هكي بعد ماعطاها مكتب بروحها… اكيد عمر قاله حاجة خﻻه ايغير رايه هكي …
ونقلتها ميساء للمكتب التاني..مع زميلات الجدد ومشت وخلتهم
ورجعت لزميﻻتها وقروبها وقتلهم عاللي سمعاته من ندى … ويوووززززع من موظفة لتانية
عمر :هاه شن قالتلك من كدبة
فرج : مش عارف الحق دوة ما قتنعتش بيها
عمر : خليها خليها حسابها عندي
فرج : عﻻش شن بديرلها !
عمر : تو تعرف … تو تعرف …
كان مانخليهاش تمشي وراها وتتلفت مانبداش عمر …
فرج : تي ياسر من العناد الهى في خطوبتك الي امك بدبدسك فيها.
عمر : ﻻحق عليها حتى هيا تو نفركشها …غير اصبر عليا بس خلي انطفي النار اللي قايدة في جواجيا
فرج :به اشمعنى هادي ؟؟خيره اللي قبلها خليتهم فحالهم
عمر : اللي جت فيه ربي ايصبره
فرج : البنت صديقتي ومعرفة قديمة ماتحشمنيش معاها
عمر يعصر في ايده ويسحن مع نظرة عيونه اللي مليانة غل وبنبرة صوت حازمة قال : مش حندير حاجة اتحشم مش ليا الموال هدا … لكن حنخليها تبكي دم يافرج..حنخليها تتدكرني طول عمرها..
شن بيصير في عمر وخطوبته وشن بيدير ل ندى ؟؟وشن موقف ادم من ندى لو وصلاته الدوة ؟؟ كل التسؤﻻت هادي حتعرفوا اجابتها في الجزء القادم بإذن الله .
يتبع ……..
لقراءة الجزء التالي : الجزء الحادي عشر من رواية محظوظ ولكن
لقراءة الجزء السابق : الجزء التاسع من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
فيسبوك X بينتيريست Reddit
صورة مهند أدهم
مهند أدهم
مقالات ذات صلة
صورة رائعة لغلاف الجزء الثامن عشر من رواية عاصفة الصمت
الجزء الثامن عشر من رواية عاصفة الصمت
يونيو 21, 2022
صورة جميلة لغلاف الجزء الثامن من رواية أنت عدوي
الجزء الثامن من رواية أنت عدوي
مايو 19, 2022
صورة جميلة لغلاف الجزء الثاني عشر من رواية ضوء في آخر النفق
الجزء الثاني عشر من رواية ضوء في آخر النفق
مايو 9, 2022
صورة جميلة لغلاف الجزء السابع من رواية تزوجنا ولكن هل يبقي الحب
الجزء السابع من رواية تزوجنا ولكن هل يبقي الحب
مايو 15, 2022
اترك تعليقاً
لن يتم نشر عنوان بريدك الإلكتروني. الحقول الإلزامية مشار إليها بـ *
التعليق *
الاسم *
البريد الإلكتروني *
الموقع الإلكتروني
احفظ اسمي، بريدي الإلكتروني، والموقع الإلكتروني في هذا المتصفح لاستخدامها المرة المقبلة في تعليقي.
© حقوق النشر 2026، جميع الحقوق محفوظة | من موقع قصص واقعية
فيسبوك
فيسبوك
X
واتساب
تيلقرام
زر الذهاب إلى الأعلى
القائمة
روايات
بحث عن
الرئيسية/الجزء
الجزء
الجزء الحادي عشر من رواية محظوظ ولكن
الجزء الحادي عشر من رواية محظوظ ولكن
صورة مهند أدهم مهند أدهميونيو 18, 20220583 14 دقائق
وفي الجزء الحادي عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الحادي عشر من رواية محظوظ ولكن
عمر يعصر في ايده ويسحن مع نظرة عيونه اللي مليانة غل وبنبرة صوت حازمة قال : مش حندير حاجة اتحشم… مش ليا الموال هدا … لكن حنخليها تبكي دم يافرج..حنخليها تتدكرني طول عمرها..
ادم : امل وصليني بمكتب ميساء
امل : ثواني بس .
بعد شوي …
ميساء : نعم استاذ ادم
ادم : نقلتيها ندى ؟؟
ميساء : اي نقلتها زي ماقتلي
ادم : به تمام ..
وقف ادم وطلع من حجرته وطلع على المكتب الرئيسي
ادم : امل … انا طالع واي مواعيد حوليهم على غدوة
امل : ان شاء الله ..
طلع برا من مكتبه ﻻحظ الممر فيه موظفين والكل يتهامس
وكل مايخطم قدام مكتب يشوفوله .ماعرفش السبب اللي وهو ان ميساء نشرت اللي سمعاته من ندى …كمل طريقه ادم وطلع من الشركة
**في احد المكاتب **
جﻻل : سمعت بالمدير
مهند : ايه سمعت واستغربت بش قتلي قبل شوبة واﻻ نسيت
جﻻل : اي صح هههه من هول الخبر معش نندري على روحي
مهند : والله استغربت احرف منك.. والله مدايره طيب باهي او.. تاريتني انا الطيب
جﻻل:هههه طلع بعبع عمك المدير
مهند : والله رسمي مركب الرعب للبنت مسكينة… وهيا رايحة زي النسمة تشبحها اتقول مﻻئكة
جﻻل : ايه صح عيب عليه يدير فيها هكي تي هادي قد بنته
ترررن
مهند : الو … ها معزة شنجك … تمام يابرو … ﻻﻻ ماشية ياراس ..تي كان نقولك … ايه … تي بش المدير طلع بعبع … جايب بنت تشتغل عنده اجباري…مش عارف جاية اتعيط وحالتها حالة ..ماندري لكن شوره اشبح شن شاد عليها .. يا واخد منها حاجة الله اعلم .. ايه قعدت اتعيط وتقول جايبني نشتغل بالسيف و مداير فيا حالة ومبهدلني وكان اتشوفها البنت مﻻئكة مسكينة .. يﻻ اللي تحسابه نظيف يطلع عافن …ايه هوا هدا … يﻻ نتﻻقوا بعدين ياراس تسلم منور احبيبي ربي يحفظك..سﻻم
جﻻل ل مهند : بلبول من يوم يومك اللي بتسمعه ﻻزم اتقوله
مهند : ههههه مانقدرش اندس اخبار زي هادي بعدين لمن قلت انا … هدا عادل عادي
جﻻل : اللي يشتغل مع كتيبة …. !
مهند : ايه
جﻻل : فالح والله وين تندري عليه بالك يدير حاجة
ساعة 2 ظهرا ..
كيف طالعة ندى من المكتب والكل يشوفلها ويتهامس عليها استغربت وطلعت من الشركة …
ووقفت تستنى في افيكو …
صوت من وراها …
ان شاء الله ضميرك مرتاح ياحربة ..
تلفتت ندى ولقت عمر واقف ..
ندى : ع ع عمر انن
عمر : اسسس
ندى : انا
عمر بصوت مرتفع : قلت اسكتي انا
ندى : به
عمر : ماعلموكش في المدرسة ان الكدب حبله قصير به بﻻش بالمنطق ماقتلكش ماما ان اللي يكدب ربي يحطه في النار
ندى : تكلم فيا وكاني عيلة طفلة
عمر : ايه عيلة … عيلة لما تكدبي بش توصلي لحاجتك اﻻ وهيا ادم ..به كيف تبي المدير ﻻش تكلمي فيا ﻻش تكدبي عليا … واﻻ مدايرتني تسلية اه اتكلمي واﻻ مقمزتني على كرسي اﻻحتياط مثﻻ !
ندى : انا قلت لفرج ان ادم ضغط عليا وخﻻني نشتغل معاه ﻻ كرسي احتياط وﻻ كرسي جمهور
عمر : بالك تحسابينا شادين حلوة لحاسة ! بش بتضحكي علينا بهالكمتين
ندى : شن تبي عمر؟ شن تبي مني لو انك مش مصدقني
عمر : مانبي شي … لكن ياندى مش حنفوتهالك حنخليك اتعدي الدقايق وتحسيهم ساعات حتبكي بدل دمعتك دم… وتقت فيك ياحربة وتبيعيني قدام المدير … تنكريني على خاطر المادة
ندى : قتلك انا ادم مهددني
عمر : وكان سئلته ؟؟ انديرها عادي راه
ندى : وشن متوقع بيقولك ايه مهددها ؟؟ اكيد بينكر
جي افيكو من بعيد … لشرتله ندى وركبت فيه ومشت
ساعة 5 عشية
خ وداد : ايه يشتغل ولدي … عنده خدمتين وحوشه تام مصلي عالنبي حتى من اﻻتاث موتيه
خ امنة (ام العروس) : ماشاااء الله ربي يبارك
خ وداد : وريت بنتك ليال في عرس ولد نعيمة وعجبتني وقلت هااااادي لوليدي عموري
خ امنة : اي صح … والله يا وداد انتوا عيلة ونعم فيكم وسمعتكم طيبة ويشرفنا اناسبوكم وان شاء الله ايروحوا خوتها الشباب ونقولهم واللي فيه الخير ربي ايقدمه
خ وداد : اي من حقك اﻻصول اصول وبالله ردي عليا فيسع مستعجلين
خ امنه : بإذن الله …
خ وداد : لكن عاد قداش عمرها
خ امنة : 23 عام
خ وداد : بطولت عمرها
خ وداد : هي نوضي يانازك
نازك : هي
خ امنة : غير اقعدو نضيفوكم حاجة
خ وداد : ﻻحقين عليه ان شاء الله
**
تمنيت … تمنيت لو نلقاها . بنية طيبة صافية النية .. اتعيشني عيشة حلوة هنية .. تخفف جروحي واللي فيا … اطبطب عليا تنسيني همي وماضيا … اتحن اتحبني من قلبها وماترضاليش الكية. ادللني وتخاف عليا… تمنيت تمنيت لو نلقاها
فرج : تي وين بتلقاها هادي
عمر : وانت ﻻش تتسنط عليا
فرج : عجبني الشعر لكن احﻻمك اكبر من واقعك
عمر : عارف واقعي مر.. بس الله كبير اﻻ مايحط في طريقي اﻻنسانة اللي اتصوني …
فرج: ان شاء الله
عمر : اخخخخ عالوقت وخﻻص … غدوة مع الحداشات ماشيلها الحقيرة اﻻ مانوريها …
فرج : راك اديرلي زوبعة غادي
عمر :اطلع منها بس ..
يوم اﻻحد
طبعا ندى مشت للعمل وامورها طيبة
امل : استاد ادم ندى تبي تقابلك
ادم : قوليلها مشغول عندي اجتماع
امل : تمام …
معليشي ياندى عنده اجتماع مشغول
ندى : اها اوكي تو نرجع بعدين
عالساعة 11 درس عمر قدام الشركة
وجاه فرج هدرزوا شوي …
واذا بها سيارتين متسوبيشي مزوقة عسكري كتيبة درست قدا الشركة وبيخشو …مشالهم فرج يجري
فرج : تفضلوا
عادل : حول من الباب
فرج : شنو فيه ياخونا
عادل : ابتكسر الشر وتحول واﻻ ﻻ ؟؟
فرج : فهمني شن فيه
عادل : مدير الشركة غلط ف غلط والغلط راكبه من ساسه لراسه بتحول واﻻ نتصرف
حول فرج من طريقهم واتصل بالمايكرفون لسكرتيرة وقاللها
امل : استاذ ادم فيه كتيبة خشت لشركة
ادم بتوتر : عﻻش شن فيه
امل : مش معروف هكي قالي السكيروتي
ادم : باهي به انا نطلعلهم وانتي قيمي كل اﻻوراق المهمة وحطيهم ف شنطتك
امل : تمام استاذ
فرج : عمرررر ياعمرررر
نزل عمر من سيارة ومشي لفرج وقاله : شن فيه
فرج : والله ماعارف جت كتيبة هادي وقالي المدير الغلط راكبه من ساسه لراسه ومش عارف شنو
عمر : زعما مداير حاجة
فرج : الله اعلم
عمر : زود خلي نخشوا نفهموا الموضوع
فرج : هي
ادم في الممر يمشي بخطوات واسعة وحاير ف موضوع الكتيبة !
وموظفين الشباب نزلوا وصارت بلبلة في الشركة والموظفات ايبيتوا من فوق
عادل ل ريسبشن : توا تناديه المدير ينزل اهنا واﻻ نركبله
وصل ادم لوطا وقال: تفضلوا شن فيه
عادل : قدامي فيسع …اتفيه عليك وعلى اشكالك
نزل مهند من الدروج وشاف عادل يلعلع ..
ادم : احترم نفسك لو ضان نفسك بتخوفني فانت غالط
عادل : انخوفك اماﻻ شنو … تحساب انت بس اتخوف ف البنات وتجبرهم يشتغلوا عندك
ادم : تي شن اتقول انت؟؟ اتقي الله في نفسك
عادل : واااك بتطلع قدامي واﻻ نطلعك انا
ادم : مش طالع
عادل : انت شورك ﻻزم تبي الشهدرة …. يامهند بالله وينها البنت اللي مخليها تشتغل عنده اجباري و مداير فيها البهادل
ادم : انا ؟؟؟ شن اتقول انت … شن الكﻻم هدا يامهند تتبلى عليا ؟؟
مهند : ﻻ يااستاد ادم انا سمعت من جﻻل …
جﻻل : وانا سمعت من حنان
حنان : البنات كلهم يقولوا فيها مش مني يااستاد تقريبا ميساء قالت .
ادم : ناديها ميساء فيسع
ركبت حنان نادت ميساء وقالتلها شن فيه ونزلت هيا وياها . مشي ندى شبحتهم نازلين يجرو نزلت فجرتهم وماتعرفش شن الموضوع
ادم يكشخ : شن الدوة اللي مطلعتيها ياميساء
ميساء : يااستاد ادم مش مني .. انا سمعت ندى تكلم في فرج في التلفون وتقوله انك انت خليتها تشتغل غصب عندك وان انت مداير فيها البهادل ولو رفضت ادير فيها حالة وهلبا كﻻم …
ندى حلت فمها
ادم : حق الدوة يافرج ؟؟
فرج : والله شن بنقولك
ادم : شهادة من دينك حق الدوة يافرج
فرج : ايه صار يااستاذ
ادم: ياسﻻم صحة ليك ياندى صحة ليك تلعبي مليح ….
عادل : وينهااا ندى وروهاااالي
ميساء : اهياه
عادل : صح الدوة ؟؟؟
هزت راسها ندى ايه وهيا تبكي بعدين قالت : ﻻ ﻻ مش صح … انا ك كنت ن ن
عمر :كنتي تكدبي على فرج بش اتخلي عمر الغبي ايصدقك قتلك انا الكدب حبله قصير هدا شئ تاني شي شفتي كدبتك شن دارت … خليتي المدير في موقف بايخ … وهوا داير فيك خير ومراعي ظروفك وعطاك عمل وانتي تبليتي عليه … وكذلك عطلتي عمل هالشباب جايبتيهم من مقر الكتيبة ودرتي قلقلة في الشركة بكدبك ياانسة ندى
عادل : ومن اتكون انت
عمر : شخص متليع فقط
عادل تلفت ل ندى وقالها : عيب عليك حطيتي روحك ف موقف بايخ وحطيتينا معاك في موقف وﻻ يسوى … سامحنا استاد ادم
ادم : معليشي من وصل الخبر
عادل : شخص وخﻻص
ادم : ﻻ حلفتك اتقول منو
عادل : مهند
ادم : تمام … اطلعي برا من الشركة ياندى …
ندى : استاد اد
ادم : اططططلعي برا من شركة وﻻ عاد نبي نشوف وجهك تاني وانت يامهند لحقها …
طلعت ندى وهيا تبكي من الشركة
لحقها عمر وقالها : الحمد لله ربي خدالي حقي من غير ماندير شي وهكي حتتدكريني طول عمرك …سﻻمات يا ندى …
وتلفت عليها ومشي ….
وقفت ندى تبكي على الطريق نتيجة كذبها ولعبها على الطرفين..
فرج : والله طلعت نيتك صافية يا عمرر
عمر : وشن تشبح فيها قبل ملوثة او فرج : سبحان الله كنت بتخليها تبكي دم وفعﻻ بكت دم وتحشمت قدام الكل …
عمر :الحمد لله اطفت النار اللي بداخلي برغم ماكنتش نتمنالها هيك موقف لكن اللي عقدها بيديها ايحلها بسنونه…
بعد عدة ايام …
خ وداد تتكلم بالتلفون مع ام ليال …
خ وداد : ايه بإذن الله ﻻ من حقها اتشوفه… خﻻص اليوم انجوكم العشية ونديرو نظرة الشرعية …
تمام بالسﻻمة ..
نازك : شنو وافقوا ؟؟
خ وداد : ايه قالوا موافقين وخوتها قالوا حددوا يوم للفضانية غير هيا تبي اتشوفه قبل .. نوضي ضبحي ع عمر فزي
نازك : ف الحمام ايدوش … اهو طلع هاه … عمر تعال شوي
عمر يمسح في شعره المبلول وقال هيا جاي هي ..
وصل فيهم وقالهم : اه شنو فيه
خ وداد : قعمز سلم وليدي قعمز ..
قعمز عمر وقال : ان شاء الله خير … سلم وليدي وحاﻻت.. على غير عادة
خ وداد : غير اسمع … العويلة ردو علينا وقالوا تعالوا بنديروا رؤية شرعية
انفعل عمر وكيف بيعارض ادكر كﻻم خاله متع شوفها وبرالها تاني يوم وقولها مانبيش…
ياعمررر ارزن ودير روحك تبي الموضوع بش امك معش اتشك فيك
وقالها : اما عيلة اللي مشيتي خطبتيلي منهم ؟؟
خ وداد : ايه
ابتسم عمر وقالها : ان شاءالله خير امتى حددتي معاهم
خ وداد : اليوم العشية ..
عمر : ان شاء الله خير … توا بنبدل وبنطلع و مع العصر انولي نبدل ونمشولهم
خ وداد فرحت وقالت : الحمدلله ربي هداك هه هكي ماشاء الله تسمع في الكﻻم
ابتسم عمر ابتسامة من تحت لتحت وقالهم :هي خلي نمشي عندي حاجات بنديرهم
وبدل وطلع ومع العصر رجع خدي دوش ولبس وتأنق وتعطر ..كله كله بش امه معش اتشك فيه
عمر :هيا يمى تاخرنا عاالناس معقولة هكي !
خ وداد : ان شاء الله خير مستعجل
عمر : من بكري واتي انا
نازك : له له له شن الشياكة هادي
عمر : طرحة جديدة ^^
خ وداد : هي اني واتيه نوض بالك وانت من بكري هيا هيا هدا غير ماتبيش ف اﻻول
عمر :ﻻﻻ خﻻص غيرت راي
خ وداد : باهي الحمدلله
{عمر … هههههه وﻻ يمكن انغيره رايي ماناقصني غير زواج تقليدي توا . زي ناس قبل صام صام وفطر على بصلة ههههه غير اصبري عليا لغدوة بس مامظل اﻻ مفركشها }
خ وداد : تي هيا شن واقف عالمراية تتبسم
عمر : سرحت بس .. هيا هي…
وطلع هوا وامه وطول الطريق مشغل اغاني حزينة جروح واهات لين وصل …
وصلوا خش للمربوعة وكل مرة يخش واحد من خوتها لين اتعبت المربوعة
{عمر نهار احرف على دماغهم عشرة وﻻد اياح زعما من ام واحد او واﻻ من هلبا نساوين … هدا شنو مازال فيه فروخ زعما صغارهم واﻻ حتى هما خوتهم …
محمد (خوها الكبير): انستنا
عمر : الله يأنسك
{تي هيا جيبوا اختكم رقم حداش ماتطلع اﻻ راجل ﻻبس شاربة ههههه}
محمد : والله سئلنا عليكم وطلعتوا عيلة كويسة وكان البنت عجباتك اكتب عليها مروح بيها حتى من الليلة
{انروح بحناك الشارفة تحساب صبلي نشرب }
عمر : بارك الله فيك عداك العيب والله حتى انا سئلت عليكم عيلة ماشاء الله كان نلقى الفضانية بعد غدوة
محمد : فيك بارك الله … تم كان تبيها حتى توا ايصير ماعندكش مشكلة
{نوض تل يشحطك انت وخوتك التسعة رايحين زي الجيش }
عمر : ربي يحفظك
امهم امنة : محمد … يامحمد
محمد : انعم يمى
خ امنة : تعال شوي
(وش وشوشوش وش )
محمد : هيا نوض انت وياه تنسموا …
طلعوا خوتها التسعة وقعد محمد وامه وجت خ وداد بتشوف عمر بالك يحط كلمة هكي واﻻ هكي. .
خشت البنت وقف عمر سلم عليها
عمر : مرحب كيف الحال
ليال : الحمد لله
عمر ماشاء الله البنت اية من الجمال باهي اللي ماطلعتش لخوتها ههه : ان شاء الله امورك طيبة
عمتك ليال ماتت في عمر وعيون وجمال عمر …
ليال : الحمدلله كويسة
عمر : تقري واﻻ تشتغلي
ليال : متخرجة من كلية العلوم ونعطي في دورات للابتدائي
عمر : اه اوكي .. صبح واﻻ عشية
ليال : في الصبح
عمر وهو المطلوب ياحلوة : باهي كويس ربي ايعاونك
وتمت الرؤية الشرعية وروح هو وامه وفي الطريق
خ وداد : ها شن عجباتك
عمر : ﻻ باهية قنينة
خ وداد : قتلك انا
عمر : خوها قال خودها حتى توا
خ وداد : هادي عيلة عيونها معبية مايتشرطوش … عندهم خيرات ماشاء الله
عمر : باهي كويس … قوليلي شنو من ام واحدة وﻻ بوهم متزوج زوز نساوين
خ وداد : ام واحدة ..
حط امه عمر وطلع خطم على فرج ومشوا لصالة الحديد
فرج :هااا ياعريس احكيلي شن صار
عمر : كان نقولك خوتها جيش ياراجل عشرة تريس متسطرين و هيا رقم 11 هههه وﻻ من ام واحدة
فرج : حداش مرة واحدة ربي يعطيها الصحة
عمر : هههه خوها كان يلقى يعطيهالي من تو .. قتله فخاطري نوض تل يشحطك هدا ما مازال هه تي من غدوة الصبح نتمسمر فشارعهم نستناها تطلع قالت تعطي ف كورسات ل اﻻبتدائي
فرج : باهي مليح
عمر : ف الشك انروح للحوش اليوم امي اكيدة معش بتبطل دوة عليها نقعد اهنا ف صالة وبعدين نمشوا للعمل وخﻻص
فرج : تمام
… الساعة 4 صباحا
سعد : يا عمر … عمر نوض جاني بﻻغ ع هجرة غير شرعية نوض فيسع
عمر : برا كلم فرج تعبان انا
سعد : يا فرج نوض نوض
فرج : اممم شن فيه
سعد : نوض فيه قارب خاش
فرج : برا لعمر صقع مانيش نايض
سعد : برو روحوا حتى انا صقعان وبنرقد …
ساعة 8 الصبح
عمر ناض مخلوع : حي علمك يا فررج
فرج : القارب خش ياحمار انت وياه
سعد : اما قارب !
على خشت الظابط : تلقيتوا بﻻغ واﻻ ﻻ ؟؟
فرج :صبااح الخير ايه تلقاه سعد
سعد : صباح الخير.. راقدين مابوش اينوضوا استنيت ونعسني النوم ماخدوش توكاتهم عمر وفرج
عمر : صباح الخير ااا اممم ال القارب ماخشش تقريبا
الظابط ربع ايديه مع نظرة جدية وحزم قال : ﻻ خش وهربوا قريب 16 النفر شن يسموه هدا ؟؟ بش تسيب في العمل او .. عدم انظباط صح واﻻ ﻻ وين نندروا عليهم منين جايين وشن جايبين من مرض معاهم …في الحبس انتوا التﻻتة خمس ايام على عملتكم السودة شن بنقول لباقي الظباط اللي بيجوا … اللي شادين التوكات رقدوا وخش قارب فيه 25 نفر 16 منهم هربوا
فرج : والله مش عارف كيف صارت اللقطة
الظابط : يااحمد احمد بالله خودهم عالحبس .. عمر كنت مدايره اﻻول في الانظباط لكن ياودي
وخداهم احمد عالحبس
احمد : طفوا نقالاتكم وهاتوهم
عمر : فكنا من الجو احمد
احمد : هاتوهم تتفكر اخر مرة شن درت فيا انت وسعد او وقت انحبست
عمر : شن درت فيك !
احمد : خديت النقال وقتلي هادي اﻻوااامر وﻻ وفوق منها تضحك
عمر : هههههه انا ؟؟
احمد : غولتي
عمر : بالك انبصر
احمد : ﻻﻻ هيا هات النقاﻻت فيسع
عمر : باهي وانت دليتنا هاك ماعندي ماندير بيه
احمد : حتى انا هكي قلت
مدوا التﻻتة نقالتهم وقعدوا زي مالقيات العزي
سعد : كله منكم
عمر : به طلعت فتحت الكشافات ودرت اندار رانا نضنا
سعد : كنطيتوني الزوز متلفلفين ف البطاطين نقعد غير انا في الصقع !
فرج : اه الصقع شوف شن دار فينا
عمر : خمس ايام والله هلبا… فرج حيه البنت
فرج : اما بنت !
عمر : البنت ظ ع اساس اليوم بنطلع نكلمها
فرج : حي عالجوو
عمر : كيف الراي !
فرج : والله ماعارف الحق …
سعد : كان نضت امس راه ماضاعش عليك الموعد
عمر : قدر الله وماشاء فعل وبعدين اصﻻ هوا مش موعد
حسنة : خيرك ياادم انحس ليك ايام مش على بعضك
ادم : فكري مشوش
حسنة : من شنو
ادم : من موقف لو حكيتهولك مش حتصدقي
حسنة : احكيلي
حكالها ادم من الاف الى الياء
حسنة : مش معقولة ! بجديات؟؟
ادم : زي مانقولك
حسنة : معقولة فيه بنات هكي
ادم : والله لين استاجعت فتحتلها بيتي وخليتها مع بنتي و وظفتها ف الشركة وفوق من هكي اتبلت عليا
حسنة : حسبي الله ونعم الوكيل فيها
ساعة 11 صباحا …
خ امنة : سئلنا البنت وقالت موافقة وخوتها مش معترضين شايفين ولدك عمر تريس ونعم الرجال اخﻻق ماشاء الله
خ وداد : باهي الحمدلله حددوا يوم للفضانية وتم
خ امنة : عمر قال لولدي محمد حتى بعد غدوة ويقصد على غدوة
خ وداد : ماشاء الله … والله عاد كانكم قادرين توتوا رويحتكم في يوم مادبينا
خ امنة : بالله بنتي فالحة ادير كل شي وقتي
خ وداد فخاطرها هه شكار العروسة تو نشبحوها بنتك تعرف اطيب واﻻ ﻻ … وردت عليها : خﻻص بإذن الله غدوة موعدنا
خ امنة : ان شاء الله وانتي طيبة بسﻻمة …
خ وداد : يانازك يانااازك
نازك : نعم يمى
خ وداد : فضانية خوك غدوة
نازك : اللطف كيف صار هكي فيسع فيسع ..
خ وداد : عمر هكي يبي ..وهكي مقايل لخوها فقلت خير البر عاجله خير مايغير رايه
نازك : غريبة والله
خ وداد : بري اركبي لحاتم قوليله يتصل برجالة العيلة يقولهم فضانية عمر غدوة
نازك : به تمام … لكن خيره ماروحش عمر
خ وداد : تلقيه واخد حتى توكة الصبح
نازك : اه به
عمر : كلم احمد الخبتي اهواه قوله يجيبلك نقالك خلي نتصلوا بالعويلة
فرج : مش حيجيبه
عمر : به كلمه
فرج : ماناقص غير نتغوطله فكني منه
عمر : سعد … سعد كلم احمد خلي يجيبلك نقالك
سعد : مايكلمش فيا ومش حيجيبه مسموم
عمر : باهي كيف بنطمنوا العويلة
فرج : نستنوا خالد لين قريب ايجي …
وبعد نص ساعة جي خالد
خالد : ههههههه منظركم ايضحك انتو تﻻتة ف الحبس شن دايرين
سعد : خش قارب والبشاوات راقدين
خالد : هههههه
عمر : ساد ضحك عطيني نقالك بنتصل
خالد : مافيش
عمر : 😑
خالد : نبصر نبصر هاك نقال
خداه عمر واتصل ب امه ..
عمر : اه يمى صباح الخير … كيف الحال … ﻻ الحمدلله بخير … ا شن بنقولك قاعدين انا وفرج في الحبس متع العمل ايه على خاطر خض قارب واحنا راقدين .. ايه.. خمس ايام والنقال ممنوع غير واخد نقال واحد صاحب..
خ وداد : اه باهي شن بنقولك
عمر : انعم
فرج ل عمر : اومة الضابط دس النقال
دس عمر النقال وراه
و خ وداد قاعدة اتهدرز وعمربعا مايسمعش فيها : حددنا موعد فضانيتك غدوة … الله غالب نكملوا الموضوع وخﻻص.. فات فيا وعطيت كلمة …وحتى خوك كلم رجالة العيلة نتم الموضوع وخﻻص وانت امتى ماتروح تو نتفقوا عالبيان
الظابط : ساعة كم جاك البﻻغ ياسعد
سعد : ساعة 4
تلفت لظابط بيشوف حاجة
مشي طلع عمر النقال وقال ل
امه : باهي يمى تو نكلمك بعدين سﻻم
وسكر الخط وحطه ف جيبه
ترررررن تررررن
تلفتلهم الظابط وقال : اللي عنده نقال ايطلعه
اتخزرط عمر ويشوفوا لبعضهم هما التﻻتة
الظابط : اللي عنده نقال ايطلللعه
طلع عمر النقال … الكبيدة يتصل بك
خداه منه الظابط وحطه عالطاولة ونادى خالد … وهزبه لانه عاطيهم نقال
وفات هاليوم على عمر زي الجبل ﻻنه قاعد ف الحبس … ويفكر ف ليال كيف بيقوللها ترفض وهوا في الحبس…
وجي تاني يوم الفضانية وعمر وفرج مايندرو على شي … وفضوا في ليال ..
وتمت مدة عمر في الحبس وروح للحوش … امه استقبلاته بزغاريت هيا ونازك وسماح مرت خوه …
يحسابهم يزغرتوا على انه طلع من الحبس
خ وداد : مبارك ياولدي
نازك : مبارك ربي يتمم ع خير
سماح :مبارك ان شاء الله نشوفوك عريس
عمر : عريس هههه على شنو تباركولي ! انا طالع من حبس العمل ﻻ اكثر وﻻ اقل
سماح ل نازك : ريتيه واﻻ يدير في الجو علينا
خ وداد : خلوه بالك متحشم ههههه
عمر : فهموني شن قصدكم … !
نازك : خيرك تايه بش قبل تﻻتة ايام فضانيتك
عمر : ف فضانيتي ! ! !
يتبع………
لقراءة الجزء التالي : الجزء الثاني عشر من رواية محظوظ ولكن
لقراءة الجزء السابق : الجزء العاشر من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
فيسبوك X بينتيريست Reddit
صورة مهند أدهم
مهند أدهم
مقالات ذات صلة
صورة رائعة لغلاف الجزء التاسع من رواية طبيبة قلبي
الجزء التاسع من رواية طبيبة قلبي
يونيو 19, 2022
صورة جميلة لغلاف الجزء الثاني عشر من رواية المشوه
الجزء الثاني عشر من رواية المشوه
يونيو 23, 2022
صورة جميلة لغلاف الجزء الأول من رواية انتقام قرين
الجزء الأول من رواية انتقام قرين
يونيو 11, 2022
صورة جميلة لغلاف الجزء الثامن من رواية همس العيون للكاتبة لوزة ليبية
الجزء الثامن من رواية همس العيون للكاتبة لوزة ليبية
أبريل 2, 2022
اترك تعليقاً
لن يتم نشر عنوان بريدك الإلكتروني. الحقول الإلزامية مشار إليها بـ *
التعليق *
الاسم *
البريد الإلكتروني *
الموقع الإلكتروني
احفظ اسمي، بريدي الإلكتروني، والموقع الإلكتروني في هذا المتصفح لاستخدامها المرة المقبلة في تعليقي.
© حقوق النشر 2026، جميع الحقوق محفوظة | من موقع قصص واقعية
فيسبوك
فيسبوك
X
واتساب
تيلقرام
زر الذهاب إلى الأعلى