نـوح الـحـمـام - الفصل 111 - بقلم ضــوء الــقــمــر - مكتملة | روايتك

رواية نوح الحمام الفصل 111 وضحى بخوف\بسم الله عليتس ليه تبكين ! عوق بضيق \لا مافيني شي بس متضايقه .., وضحى بخوف\الله يكفيناشر ضيقة المغرب لاتخلين قرآنتس الحصن الحصين.., عوق من بين دموعها\لا ماهو مثل ما انتي فاهمه لكن ضايقني كلامتس لي قبل شوي .., يعني الي متى بيلحقني عار مشاعل.., وضحى بحسره وحزن \عار مشاعل وسمه كوي نار ما يتغير على طول الزمان الله يعينهاعلى بلواها.., اردفت ام عوق وهي تتنهد بوجع\يا عوق مشاعل مثل الحمامه الي كسروا جنحانهاوخلوهاتنوح.., محد درى عنها هي تغني والا تبكي.., وسبحان الله يا بنتي فيه الي ازود من مشاعل لكن ربي ساتر عليهن الله يكفينا الشر.. وكلامي لتس كل ام تقوله لبنتها تنبها..! مرات الانسان يغفل والذكرى تنفع المؤمنين والله ماهو قصدي اجرحتس والا اضيق صدرتس.., تعوذي الشيطان قومي تجددي وصلي المغرب واتركي عنتس وساوس ابليس..! قمت صليت المغرب وكالعاده الرحله اليوميه تحضير دروس ولبس لبكرا ملابسي بدت تضيق علي والا انا يتهيئ لي.., نادتني الخادمه تقول امي تبيني با الصاله ام ابراهيم عندها قلت خلاص روحي انا طالعه لها.., يا ربي طايح وجهي من ام ابراهيم عقب الي صار وشلون اقابلها سميت بالله وطلعت لها.., يوم شافتني فزت وقامت بوجهي وسلمت علي ام ابراهيم بفرحه \وشلونتس ياعوق مبطيه عنتس ..! عوق منحرجه \طيبه ياخاله لكن مشغوله مع المدرسه.., ام ابراهيم با استغراب \وش فيتس متغيره بسم الله عليتس..! وجهتس نحفان وعيونتس باين بها التعب وجسمتس ماهو الي حنا خابرين.., عوق بتوتر\لا مافيني شي تعرفين المدارس الاهليه ضغط مو طبيعي.., ام ابراهيم تمسك ايدين عوق بدهشه\ماهي سالفة مدرسه وجهتس اصفروتعبان..؟! وشوفي عروق يدينتس طالعه والله مالتس شبيه الا الي ماكل اكل ملوث ومتسمم.., ام عوق تضحك بمشاكسه\صادزه يا نوره عوق تعشت عشا دسم غث تسبدها ولا تبي تعترف يمكن نلقى له علاج..؟! فهمت امي وش تقصد ما ادري وش ارد عليهاوقفت ابي اهرب لغرفتي من كلام امي.., عوق با ارتباك واحراج \سلمي خاله على البنات وباركي للجوهره.., ام ابراهيم\يوصل وانتي وش بلا حابسه نفستس اطلعي سيري عليناالبنات فاقداتس..! عوق بتوتر\والله مشغوله ما افضى والا والله انكم على البال..! ام عوق بتبرير\نهارها كله تقضيه با المدرسه والا حابسه نفسهابغرفتها..؟! ام ابراهيم \الله يعين يا وضحى والوقت ما عاد فيه بركه اجلسي وين تبين لاحقه على ها الدروس ..! عوق\عندي تحضير واجد مابعد سويت فيه شي.., طلعت لغرفتي وانا اغبط خالتي ام ابراهيم تضحك عادي معي وتسولف..! وهي طالعه اخر مره من بيتنا تبكي من كلامي لها وبناتها فا قداتني ويسئلون عني ونمر يرد علي عادي اكيد ما عطتهم خبر عن الي صار..! لوكنت انا كان قومت الدنيا وقعدتهاهو العيب فيني والا في الناس ..؟! مر اسبوعين على جدولي الجديد ادرس مادتين النحو الانشاء ..., وضعي تمام حتى الماغص الي كنت احس فيه ماعدت احس فيه..! اليوم رجعت للبيت متأخره امي جالسه تنتظرني.. ام عوق بخوف\هلا يمي ليه تأخرتي با المدرسه..! عوق تجلس بتعب\الي اخرني بنت في اول ثانوي من اليوم اتنظر اهلها..! ما في احد جا لها اضطريت اني اوصلها آخر الدنيالبيتها ..! والمشكله حتى بيتها ما تعرف وينه قعد يسأل السواق حتى وصلناها..!؟ ام عوق با استنكار\مافي مدارس قريبه من بيتهم ؟ وش الي يحد اهلها يبعدونها! عوق بتهكم \ إلا فيه قريب منهم مدرسه خبرتي حي مافيه مدرسه والا مدرستين المدارس اكثر من المدرسات..! سألتها قالت استاذه صديقاتي الي كانو معي با المتوسط انقلوا هنا وانا معهم..! ام عوق بتعجب \بعض اهل هم الي يرخون الحبل لبناتهم ويعطونهن على كيفهن..! عوق\المفروض من الاهالي ما يطاوعون البنات خلاص يشوفون اقرب مدارس لبيوتهم ويسجلون بناتهم..! الواحد ما يعرف ظروفه يتعب يصحى متأخر .., مشوار المدارس يقطع القلب والدقيقه محسوبه على الطالب ..! ام عوق \خلينا من سوالف المدارس الي ما تخلص قومي تغدي ...! عوق\طيب بغير لبسي واجي ..! ام عوق على الغدا \اليوم مع المغرب بيجي ناصر ولد سعد بياخذني..! ؟ كلمني سعد يقول تعالي وسعي خاطرتس الجو زين و شوفي الذود الي انا شريت على شانتس..! عوق بألم \تروحين وترجعين با السلامه..! ام عوق \وش فيتس تعبرين مانيب متأخره..! سكري بيبانتس زين والخدامه والسواق عندتس.., والجيران يحسبون رجلتس يضوي عليتس كل ليل ماعليتس شر ان شاءالله.., عوق بقهر \ليتنا افتكينا من ها الزواجه كان ارتحنا..! ام عوق\تعوذي ابليس وهو رجال راح في حاله ..؟ وانا نبهته لا يحاول يزعجتس ماعاد نبيه غير ضلال تشوفه الناس وترهب قربتس..! -------------------------------------- يتبــع.