سند الأنثى رجل - الفصل 42 - بقلم shosho - مكتملة | روايتك

ماما : خلاص قعمزي يانوسة ياسرك ظهرك اني : هي ياماما نكمل الصالة بس ماما راكبة في الدروج : عنيدة بكل وفجأة وقفت ، وحست الدنيا تلف بيها ، ولت نزلت نزلت اخر درجة وجت طايحة علي طولها اني :مااامااا ماااما خيرررك كلهم سمعوو عيطتي طلعو يجروو نورس جت تجري قامت راس ماما : ماما خيرها شن صااارلها نرجس الوحيدة الي كانت تعرف مرض ماما ، طاحت علي ركابها وتبكي كانت لحظات فظيعه ، الكل خايف علي ماما خالتي وعمتي يعيطوو نرجس طايحة تبكي سارة طلعت تجري تناادي في حد يجي يرفعها نوال مشت تجري جابت ميه وقعدت تبخ علي وجه ماما جبنا ريحة بخينا وشممناها بس مافيش اي استجابة خشو اولاد عمي واولاد عمتي يجرو ، وحتى محمود كان موجود قاموها وحطوها في السيارة وطارو بيها للمستشفى مافيناش وحدة قدرت تلحق عليهم الا نوال ، لبست بسرعه وطلعت تجري محمود يسوق ، ومن الخلف مقعمزة نوال وماما قاعدة مغمي عليها ومشي معاه عبد المنعم اني نمسح في دموعي : خلااص بطلووو عيااط ماما مافيها شي ماما حتنوض بالسلامه ،هيا يانورس نمشولهم نرجس بدت تهتري من كثر البكا ومعاش تندري علي روحها : ماما ماتت ماما لحقت بابا احني من حيقعد معانا اني : ماما ماماتتش نووضي حنمشولها معاش تقولي هكي نرجس : ماما مريضة ماما ماتت هي علاش تدس علينا في مرضها ، علاش مااهتميناش بيها كلنا لهينا ببعضنا ونسينا مرضها نورس قعدت تهز فيها من كتافها : ماما مافيها شي يانرجس ماما مش مريضة ، اسكتي ، وانهارت بكي نرجس قعدت تردد في : ماما مريضة ماما ماتت ماما امشت وسيبتنا اني معاش قدرت نوقف علي رجليا ، قمت تلفوني اتصلت بوليد وليد : ايوه نوستي اني نبكي : وليد ماما وليد ، وانهرت بكي معاش قدرت نحكي وليد : خيرها ماما يانوسة اهدي شن في اني من بين شهقاتي وبصوت مش مفهوم : ماما طاحت وهما هما رفعوها للمستشفى ماما وليد ماما وليد : اهدي بس ياحبيبتي في اما مستشفى اني : نعرفش نعرفش رفعها محمود وليد ماما وليد : اهدي بس يانوسة تو نمشيلها اني ونطمنك باهي نوسة بطلي بكي باذن الله مافيها شي هي تو نكلمك ، وسكر اتصل بمحمود على طول خالتي قاعدة تخبط علي فخادها وتبكي سارة : ياماما اهدي صلي ع النبي ياماما هما بنات خالتي ناقصين وانتي تزيدي فيهم نرجس شدتها مرت عمي وقعدت تقرا عليها في قرآن نورس اتصلت بعدنان قالتله : اني معاش نقدر نصبر اني : بنصبرو وخلاص مانعرفوش حتى اما مستشفى ، وليد معاش رد عليا ياااربي ياااربي خالتي : حييي عليا ياااوخيتي صغيييرة مسكينه وخيتي عليا : يااناس والله حطيت صوابعي فيها نبض مرت خالي نورس تبكي : خلااص ياخالتي بالله عليييك خلااااااص الي فينا مكفينااا والله ، ماما حتنوض بالسلامه اصلا مافيها شي ماما خيرررررركم هكيييي ماما حتحضر عرسي وحتفرح بيياااا ، كانت تحكي وهي ترعش خالتي سكتت شوية لكن دموعها قاعدين ينزلو عمتي تمسح في دموعها طلعت من باب المطبخ للجنان واتصلت بعبد المنعم عبد المنعم رد : الو عمتي عمتي :طمنا ياوليدي شن صار كيف حالها عبد المنعم : توا كيف خشينا بيها سعفوها على طول ومعاش نندرو ياعمتي علي شي قاعدين نراجو عمتي : ايمن معاكم ؟ عبد المنعم : ايه لحقنا هي بنسكر ياعمتي عمتي : باه ياولدي طمنا بس سكرت عمتي وخشت عليا في المطبخ : شن في ياماما شن قالولك عمتي : كيف سعفوه ربي يسلم وخلاص عليا : هي ياماما قاعدة مافهمتش شن صارلها اني كانت كويسة وضميت اني وياها الصالون وماشاء الله عليها عمتي قعمزت ع الكرسي : يستر الله يابنتي ، نادية مريضة هي ياريتها بدت بالعلاج عليا قعمزت : خيرها ياماما علاش مريضة عمتي قعدت تحكيلها عليا قعدت حاطة يدها علي فمها ومصدومة حسيتي بريقي جف من كثر البكي ، وقفت وامشيت للمطبخ بنشرب ميه نمشي بخطوات بطيئة وثقيلة ونمسح في دموعي وبالي شارد عند ماما قربت من المطبخ كنت بنخش بس سمعت عمتي تحكي وخرت ووقفت عمتي : عندها الخبيث في راسها يستر الله وخلاص عليا : وهي علاش داسة شي زي هكي ياماما عمتي : خايفه علي بناتها يابنتي مش عارفه من بيهم بعد امهم ربي يطول في عمرها ويشفيها بمعجزة من عنده مأخرة حتى علاجها لين تتطمن علي بناتها مسكينه ، يخي اهو نورس في ذمة عدنان ونوال مخطوبة اني حسيت الدنيا لفت بيا ، حسيت نفسي نحلم شن الكلام الي قاعدة نسمع فيه من هي الي عندها الخبيث ماما !!؟؟ لالا مستحيل ، بس هما واضح يحكو علي ماما عليا دمعتها في عينها : ربي ينوضها بالسلامه ويشفيها ان شاء الله ،والله لو البنات يسمعو انه مرت خالي عندها خبيث ينهارو عمتي : ماتقوليش ويستر الله وخلاص اني ماحسيتش بنفسي الا دموعي نازلات زي المطر علي خدودي ، وواقفه قدام عمتي عمتي وقفت مصدومة وخافت نكون سمعت كلامها سمعت ياعمتي سمعته كلامك ، عارفاتك انتي غالطة او سمعتي بالغلط ، نعرف ماما اني مستحيل تسيبنا احني بناتها لالا ابدا ياعمتي كلامك غلط اني مستحيل نصدقك الشجار هدا كان كله في داخلي كان الباين عندي الدموع وعلامات الصدمة علي وجهي بس اني كيف بنسالها هل كلامها صح او خطا هل الي سمعته كذب او حق حسيت الدنيا لفت بيا شديت في حاشية الباب بس بعدها معاش نندري علي شي ،،،،،، وليد قدم : ياايمن ايمن تلفتله وواضح علي وجهها علامات الخوف وليد بصوت واطي : قلت للدكاترة علي مرضها ؟ ايمن : لالا ماقلتش ياراجل هما خشو معاش طلعو لااله الا الله وليد : باه قوللهم امشي ايمن مشي وليد قعمز محمود : هيا يانوال نروح بيك اصلا مش عارف كيف طلعتي اني نوال تبكي : بالله عليك يامحمود الا فيا كافيني واني والله ماني مروحة لين نتطمن علي ماما محمود : لاحول ولاقوة الا بالله ، يانوال المستشفى معبي رجالة شن تديري انتي اهني علي قدم وقطع عليهم ، وهو يشوف لنوال: هيا يانوال نروح بيك محمود طارتله وهو ضاغط علي سنونه وفي غيض : اقلب وجهك خير ماندير مشكلة في المستشفى وماليكش دخل بيها اني نروح بيها نوال تبكي : وهدا الي ناقص الموضوع تتعاركو بس وتختم ، خلاص ياعلي تو يروح بيا محمود علي شاف لمحمود نظرة غيض ووخر وهو متعفلق باعد عليهم نوال : بعد نتطمن علي ماما نروح اني وياها محمود قعمز وسكت ايمن خش وقال للدكتور ، فنادو علي دكتور اعصاب ومخ على طول وبدو الفحوصات لماما ،،،،، فقت من ريحة قوية راسي دايخ ورزين ، رمشت عيوني ، نشوف في كل شي مشوش سكرت عيوني بقوة مر قدام شريط ، ماما كيف طاحت ، كلام عمتي ماما مريضة ماما عندها سرطان فتحت عيوني بقووة وعيوني مدمعات :مااما شفت يمين القيت نورس مقعمزة وتبكي القيت روحي في دار المعيشة شفت للباقي ، خالتي وعمتي والبنات كلهم يشوفولي اني بصوت مبحوح : ماما وين نورس : قاعدين ماكلموناش يانوسة نراجو في خبر اني تدكرت حالة نرجس : نرجس وين نورس تمسح في دموعها : رقدت من كثر البكي خالتي : شدي حيلك يابنتي راك حامل ، امك ان شاء الله تنوض بخير اني دموعي نزلو : حتى انتي تعرفي ياخالتي والا لما طاحت كنتي تحسابيها ماتت والا قولي ياخالتي خالتي شافت لعمتي ، وقعدت تبكي نورس شافتلي : شن تعرف شن في شن داسين اني قعمزت وشفتلها وقعدت نبكي اكثر نورس : شن في شن فيييها ماما تكلموو عمتي : تعالي معاي يانورس نتكلمو برا نورس تبكي : لالا مش ماشية لولا مكان لين تقولولي ماما خيرها ماما شن فيها كانت كويسة عمتي شدتها من يدها : تعالي معاي بس واني حنحكيلك يابنتي نورس وقفت وامشت مع عمتي وعيونها عليا ياربي لااعتراض على حكمك بس ليش احني هكي يكفينا كسرتنا في بابا يكفي قعدنا سنين نعانو فراقه يكفينا حوشنا ظلم في غيابه يزيد يظلم علينا اكثر بغياب ماما لااياربي ياربي اشفيها يااربي انت القادر على كل شي يااربي ماكانش عندي غير الدموع نحكي بيهم علي الالم الي فيا ،،،،،، طلع الدكتور وقارن حواجبه وليد شافه ناض بعكازته وقدم جهته وكلهم دارو عليه دورة الدكتور شاف لايمن وبجدية : انتو ليش ماجبتوهاش من اول مادرتلها التحليلات المرة الي فاتت ، باتت في المستشفى اهني يومين اني متذكر وقلتلكم المرض في مرحلة متأخرة نوال جت وراهم وخايفه عبد المنعم : مرض شنو أيمن : احني كنا بنسفروها بنعالجوها برا بس هي كانت رافضه الفترة الي فاتت لكن توا نطلعوها من المستشفى غلى طول للطيارة الدكتور هز راسه يمين يسار : شوف اني مش حنلف وندور معاك ، الورم في مراحله المتاخرة اساسا هي مأثرة علي عيونها ممكن في خلال ايام معاش تقدر تشوف يعني تنعمى بسبب تاخيركم وهو من الاول تاخرنا في اكتشاف المرض وجيتو متاخر وزيادة اهملتو كان الكل مصدوم بكلام الدكتور والاكثر صدمة كانت نوال الي واقفه تسمع وتكذب في ودانها استمر الدكتور : اني حتى عملية مش حنقدر نديرلها الورم جاي بمنطقه حساسة حنعرض حالتها علي كم دكتور وبعدها نشوف وان شاء الله خير ايمن : احني حنطلعوها برا البلاد يمكن يلقو علاج الدكتور : انت بكلامك هدا تشكك فيا بمهنتي ، بس معاك حق لكن خليني نقولك انه كلهم حيقولولك نفس الكلام المريضه عندها ورم سرطاني خبيث في مراحله المتاخرة يعني مافيش ليها علاج العملية مش حيقدرو يديروها بسبب المنطقة الحساسة الي جاي فيها والاعمار بيد الله الكلمات الاخيرة الي قالها الدكتور رنت في ودن نوال وكاانها فيقتها من غيبوبة الصدمه ، وبصوت عالي ومخنوق : انت شن قاااعد تقووول وشن قاعد تخرررف اساسا انت علي من تحكيييي علي ماما كلهم تلفتو وانصدمة بنوال الي كانو ناسيينها محمود شد يد نوال بسرعة : نوال تعالي نمشو خلينا نحكو شوية نوال طلقت يده : شن نحكووو خليني نفهم الدكتور هدا شن قاعد يقوول شن قاعد يختتررف اني ماما مااافيها شي شن قاعد يكذب عليكم الدكتور طارتله : لو سمحتي احترمي الفاظك ياانسة نوال بغضب : شننن نحتترمم الفااظي وانت اصلا مش فاهم راسك من رجليك اصلا ماما مااافيهااا شي انت اصلاااا كيف تقوووول انه ماما عندها سرطان كيييف ، وطاحت علي ركابها ودموعها غلبوها ، قعدت تخبط بيديها ع الارض : مااامااا حتعييش ماما هدااا كذاااب يقول ماما بتموت كذاااب كذاااب محمود طبس شدلها يديها : نوال حبيبي اهدي خلاص نوال نوال شافتله وعيونها معبيات دموع : حتعيش ماما والا مش حتسيبنا محمود : حتعيش ياحبيبي حتعيش خلاص اهدي ، هي نوضي خلينا نروحو للحوش هي ياحبيبي نوال وقفت معاه : باه نبي نشوف ماما اني محمود يمسحلها في دموعها : غدوة نشوفوها ماما باهي ياحبيبي اكيد تعبانه هي توا نوعدك غدوة نجيبك نوال وعيونها مغرقات دموع : نبي نشوفها توا اني بالله عليك محمود : باه حااضر قعمزي شوية بس ونسالو الدكتور ، قعمزها وامشي الدكتور : مع انه حالة المريضة تعبانه بس عادي تخش هي بس محمود : باه هي بس ، وامشي لنوال : هي قال باهي تعالي نوال وقفت على طول ومسحت دموعها خشت مع الممرضة ، واول ماشافت ماما انصدمت ودموعها نزلو من جديد كانت ماما حاطيلها جهاز علي خشمها وجهاز مقياس دقات القلب وتغدية ، قربت منها وقعمزت جنبها وتبكي شافت لشعر ماما وانصدمت اكثر، اول مرة تلاحظه انه قعد فراغات هلبا وطايح منه جزء كبير ماما الي امس كانت بحصتها واقفه وكاانه مافيهاش ولا مرض ، الي كانت امس فرحانه ببنتها وتغني وتضحك تطيح فجأة علي طولها وتولي بالضعف هذا تفكرت كيف امس في البيان قعدت تقنع فيها انها تستشور شعرها وتحول الحجاب بس ماما رفضت تذكرت هي قداش وجعتها وقت كان تترجى فيها تستشور شعرها ، وماما كانت تدرق في شعرها علينا ماتبيش تبيلنا انها ضعيفه ومريضه شدتلها يدها باستها ودموعها ينزلو علي يد ماما ماما ضغطت بيدها علي يد نوال ، فتحت عيونها بالشوية وابتسمتلها ابتسامه الم نوال شافت لماما وهي تبكي : نحبك ياماما هي نوضي بالسلامه باش تروحي معانا وتنوري حوشك ماما عرفت من بكا نوال انه بنتها عرفت بمرضها ، وبصوت ضعيف : ردو بالكم من بعضكم انتي واخواتك ، نرجس ردي بالك عليها يانوال ، ردي بالك ع راجلك وخلو ميعاد العرس زي ماهو بعد شهر وحتى لو صار فيا شي نوال : بعيد السو عليك ياماما ربي يطول في عمرك وانتي تديريلنا عرسنا وتفرحي بينا وقت تزيفينا لرجالتنا ماما ابتسمت وماردتش عليها ، ولت غمضت عيونها بتعب نوال قعدت تبكي اكثر الممرضة : خلاص ياانسه امك عاطيينها منوم حتقعد راقدة ياريت تطلعي نوال وقفت ، طبست باست علي راس ماما ودموعها ينزلو ، طلعت من الدار وهي عيونها عليها ايمن : خلاص بطلي بكا يانوال ان شاء الله ربي ينوضها بالسلامه نوال شافتله وعيونها مغرقات دموع : مستحيل نسامحكم انكم دسيتو علينا مرض ماما ايمن : مش هكي يانوال احني خفنا عليكم وبعدين هادي اكثر شي رغبة مرت خالي ماتبيش تشغلكم وتخوفكم عليها نوال تمسح في دموعها : وحتى لو كان كان مفروض نعرفو لو صار فيها شي وكنا قاعدين مانعرفوش مستحيل نسامحوكم ابداا ،،،،، مرو الساعات بطيئة بكل روحت نوال وقالتلنا كل الكلام الي قاله الدكتور كنا مقعمزين ونراجو علي احر من جمر ماكليناش ولاحاجة ولاتكلمنا قعدنا ندعو وبس طول الوقت خالتي : نوضو الله يربحكم كولو حاجة الساعه 9 توا من فطور الصبح معاش اكليتو حاجة عمتي : حرام عليكم هكي امكم تبي تكون مرتاحة عليكم وماتبيش تقعد تخمم فيكم مافيناش ولاوحدة ردت عليهم وكل وحدة فينا تفكر خالتي :لاحول ولاقوة الا بالله انتي يانوسة والله نكلم وليد نقوله ، راااك حامل يااابنتي تدووخي تصيرلك حاجة استهدي بالله وكولي لقمه راك عندك روح في داخلك اني ماتكلمتش ، كملت نسبح وساكته عمتي : ترا ياعليا جيبيلي تليفوني والله نكلمه يانسيبة اني قعدت ساكته ، مااهتميتش كل همي ماما في هاديكا اللحظة ، اني مش قادرة نتخيل المرض والعذاب الي هي فيه شرين الجرس ناضت خالتي بتفتح سمعت صوته خاش ، وقفت وطلعتله قبل مايخش بسرعه خالتي : اهي جت مابتش تاكل حتى حاجة من فطور الصبح اني مااهتميتش لكلام خالتي : كيف حال ماما طمني خالتي خشت وسيبتنا وليد : قبلها علاش مااكليتي شي وانتي حامل اني : ياحبيبي طمني علي ماما وبعدين ساهل وليد : كويسة خليتها راقدة وممنوع يقعد اي حد في المستشفى مش عارف نظام جديد شكله اني : والدكتور شن قال وليد قعمز وشافلي وسكت اني خنقتني العبرة : احكتلنا نوال ،وليد في امل والا وليد :احني ديما مانفقدوش الامل بالله ولازم يكون املك بالله كبير اني قعدت نبكي : ونعم بالله يارب يارب وليد وقف حضني ويمسح علي شعري اني قعدت نبكي اكثر وخايفه خايفه من المستقبل ، خايفه علي ماما ،خايفه عليها من مرض مايرحمش ، خايفه من يوم انوض وماما مش موجودة فيه ، خايفه وخايفه من هلبا حاجات وليد :خلاص ياحبيبتي ادعيلها بس محتاجة الدعاء هي بس اني : والله ندعي من بكري ربي يشفيها يارب وليد قعمز وقعمزني جنبه ع الكرسي اني : تعرف ياحبيبي الحوش نحسه مظلللم من لما طاحت ورفعوها للمستشفى ، حسيت الحوش من غير طعمه من غيرها ، كئيب بارد مظلم وليد : ان شاء الله ياحبيبتي تنوض بالسلامه وترجع تنور حوشها ، ايمن قال بيجيرلها علي اوراق بنطلعوها برا مرات من غدوة ياروحي يسافرو بيها اني : ياريت يمكن نحصلو دكتور افضل وليد :مع ان دكتورها ممتاز يعني خريج جامعه امريكية ومعروف اني : ماهو ياحبيبي نتطمنو من اكثر من دكتور وليد :ان شاء الله ، هي تروحي معاي يانوسة اني : لالا مانقدرش نسيب اخواتي ولين نتطمن علي ماما ، معليشي ياحبيبي خليني اليوم وليد : باه هي خلاص اني خلي نمشي اني : انت من جابك وليد : جيت في تاكسي ، هو الاسبوع الجاي بنمشي للدكتور يمكن يحولهولي ونفتك منه هالجبس ، هي حبيبتي خشي كولي حاجة اني : والله ياحبيبي ماعنديش نية في حتى حاجة ومانبي شي غير نتطمن علي ماما بس وليد : انت ماتبيش البيبي يانوسة اني : بالعكس ياحبيبي والله فرحانه بيه ع الاخر ونراجي فيه امتى يجي ويفرحنا الزوز وليد : لو تبيه كنتي اهتميتي بنفسك وتاكلي كويس ماكنتيش خليتيه جعان اني : باه يابيبي تو ناكل وليد : وعد اني : وعد وليد باسني علي خدي : هي ديري بالك ع روحك اني : حتى انت وطمني وقت توصل وليد : حاضر هي مع السلامه اني : سلامات في حفظ الله ياحبيبي روح وليد واني خشيت ، درت توست جنبه وقعمزت ناكل فيه نوال خشت للمطبخ : ماقال شي وليد اني : قال ايمن يديرلها في اوراق بيطلعوها برا علاج برا افضل ويستر الله نوال : ايه افضل اصلا الدكتور هدا ماخشليش راس تحسيه قايم خشمه وشايف روحه بكل اني : وليد قال الدكتور كويس انتي بس كرهتيه لانه قالك علي ماما نوال سكتت وهكي مرت الساعات بطيئة وكئيبة مافيناش حد قدر يرقد كلنا نفكرو غدوة شن حيصير طلع صبح تاني يوم سكرت من وليد الساعه 9 الي سهر معايا طول الليل بالتليفون نضت من مكاني طلعت من الدار القيت خالتي فايقه : صباح الخير خالتي : صباح الورد هي تعالي كيف بنحط الفطور افطري اني : ناضو خواتي خالتي : ايه ناضو خليتهم لوطى في المطبخ جاية بنوضك اني اني : ماشي ندير دوش ونجي خالتي : ماتعطليش بس بيش نمشو لامك اني : حاضر ،،،،،،، في المستشفى ايمن : هي شن قلتي يامرت خالي ماما : بعد عرس نوال ونورس نسافر عادي لكن مانبيش نمشي ونخرب عليهم فرحتهم ايمن : ماهو يامرت خالي كل ماتعالجي بسرعه كل ماافضل وبعدين حتى البنات اكيد يفضلو صحتك وعلاجك بكري ماما : اني ياايمن نعرف حالتي شنو انت قاعد اتعب في روحك بس ياولدي حنستنى مامكتوبلي من عمر ايمن بحزن :تفائلي خير يامرت خالي بالله عليك تفائلي خير وخلي ايمانك بالله قوي وانه قادر على كل شي ماما : ونعم بالله مش طالبة شي الا بناتي يكونو بخير بس امانه عبد العظيم يكونو بخير بس ،،،،،،،، اني ع التليفون : حبيبي بنمشو بعد شوية بنشوفو ماما وليد :من رافعكم اني : نورس ومعاد ولد عمتي وليد : خلاص اني توا بنمشي للدكتور بتاع رجلي وبعدها نجي غادي اني :اوك وليد :خلي بالك ع روحك ومش لازم الحركة هلبا وامشي بالشوية وماتزعليش روحك هلبا ومانبيش دمووع راهو نجي نلقاك تبكي نروووح بيك اني : حااضر حااضر مشينا لماما واول ماوصلنا للمستشفى دورنا علي حجرتها وركبنا طول فتحت الباب وخشيت اني الاولى وقفت في نص الدار ونشوفلها عيوني تعبو دموع على طوول مش مصدقة حسيت الدنيا تلف بيا ، وخرت شديت بحاشية الباب ونشوفلها وعيوني معبيات دموع ماتوقعتش ننحط بموقف زي هكي ماتوقعتش في يوم نشوف ماما بالضعف هدا ماتوقعتش الي امس كانت تضحك وتحكي وبكل صحتها اليوم نشوفها متممدة ع السرير والاجهزة محوطة بيها ووجها اصفر ، شعرها الفراغات واضحة فيه خشت خالتي بعدي ، قعمزت على طول جنب ماما وشادة دمعتها خشو اخواتي وقعدنا واقفين مافيناش وحدة قدرت تقدم جهة ماما ، مافيناش وحدة كانت مصدقة الي صاير لماما ماما بصوت مخنوق : تعالو قربو اني قربت بخطوات بطيئة ، دمعتي نزلت على طول ، وتبعوها باقي الدموع ، قعمزت جنبها وشديتها يدها بستها ودموعي ينزلو قدمو اخواتي وقعدو واقفين جنبنا ماما قعدت تبكي كانت لحظات مانقدرش نوصفها باي كلمه كان بكائنا توديع بطيء لماما الي كلنا عارفين بمرضها شنو ولكن نحاولو مانفقدوش الامل بالله "ربي لاأريد سوى أن تحفظ كل من احبه قلبي " مرر اسبوع واحني هكي ماما راقدة في المستشفى ، رفضت انها تسافر قبل العرس مع ان نوال ونورس مش قادرين يديرو شي للعرس وبالهم مش فيه بدت ماما في العلاج كنا نزورو فيها كل يوم وقلوبنا تتقطع عليها شوفتها تتألم كان يعصر في قلوبنا عصر من الالم صعب انك تشوف الي فتحت عليها عيونك اول ماانولدت ، الي يااما سهرت علشان راحتك ، صعب تشوف الي رضعاتك من حليبها وسلبت من راحتها علشان راحتك ، صعب تشوفها تتألم وانت مش قادر اتدير شي ، صعب تشوفها تموت بالبطيء وانت مش قادر تدير اي خطوة الا الدعاء ، صعب تخش حوشها وهو مظلم من غيرها ، هي نور حوشنا ونور حياتنا لو امشت من حينور حياتنا ويحليها لو هي سيبتنا من الي حيحن علينا لو هي سيبتنا من الي حيعاركنا علشان مصلحتنا لو هي سيبتنا من لينا في هالدنيا بعد ربي مشي سندنا الاول وهي قعدت لينا الام والاب اخدت الدنيا مننا اغلى شي بالنسبة لاي شخص واهي ناوية تاخد مننا ماتبقى لنا من غالي في هالدنيا طلعت ماما من الكيماوي دخلوها لحجرتها ورقدت على طول ممنوع نخشولها لانه ماتتحملش اي صوت ماعندهاش مناعه نفسيتها صفر بسبب شعرها الي طاح كله طلبت من الممرضة ، نخش نشوفها من بعيد لبستني الكمامة فتحت الباب وخشيت وسكرت الباب وراي وقفت بعيد وشفتلها بتمعن وعيون مليانه دموع جسمها الي ضعف ، ظهرها مقوس قعدت نسمع في اهاتها من الالم حتى وهي راقدة ومش قادرة نقرب منها معاش قدرت نتحمل ، طلعت بسرعه ويديا علي وجهي نحاول ندرق دموعي الي نزلو بشكل رهيب نوال : شن في اني مسحت دموعي : شي نوال :تتالم صح والا نورس تبكي : لاامتى بتقعد تحس هكي نرجس ناضت وسيبتنا وهي دموعها في عيونها اني : لاامتى مايفرج ربي ، هي نروحو وغدوة نجوها نوال : ياريت يخلونا نقعدو معاها بس ، حتى تحتاج شي اني : شن نديرو هدا نظام المستشفى ، الممرضات يحوسو عليها من بكري نورس : انتي بتروحي معانا والا بيجيك راجلك اني : ايه بيجيني وليد ، جاي في الطريق نرجس وهي طالعه تمسح في دموعها تقابلت هي ومعاد معاد : شن في خيرك تبكي نرجس ولت تبكي اكثر : مش متحملة نشوف ماما هكي يامعاد مش متحملة نشوفها تتالم طول الوقت معاد : ربي يشفيها ويخفف عليها يارب نرجس : قعدنا من غير اب ولاسند واحني صغيرات مش بالقوة هادي اني مش بالقوة الي تخليني نشوف ماما تتالم هكي معاد شد يديها وشاف لعيونها : نرجس نرجس شافتله معاد : اعطيني فرصة نكون ليك الاب والام والاخ والاخت وكل شي ، اعطيني فرصة نحولك كل دموعك وحزنك لفرح ، اعطيني فرصة نرجس شافتله ومصدومة ومعاش قدرت تحكي ، نزلت راسها وقعدت ساكته معاد : عارف مش وقت كلامي بس نبي نساندك ونكون جنبك في الوقت هدا ، اني مش متحمل نشوف دموعك وانهيارك هكي ومش قادر نواسيك ونقعد جنبك نرجس مصدومة وساكته معاد : خلينا نطلعو برا جينا جنب الباب الي خاش والي طالع يشوفلنا نرجس لفت وطلعت من غير اي كلمه ، ومصدومه ومش قادرة تحكي معاد طلع وراها وخايف يندم علي كلامه نرجس قامت راسها وتجي عينها علي الي جاي جهة المستشفى وقفت بصدمة ، قلبها يدق بقووة ، الدموع تجمعو في عيونها شافتله بعيون مليانه حب وعتاب ووجع وجرح شافتله بعتاب عاشقة انخذلت وقاعد قلبها معاه هو قدم ويشوفلها ويشوف لمعاد معاد تعفلق وقعد واقف جنب نرجس نرجس نزلت راسها ، تحاول تخفي الدموع الي حتنزل من عينها في اي لحظة شافت لمعاد ، وفي لحظة جرأة مملوءة بخوف وحب مكسور ، شدت يد معاد " ضعف قلوبنا مع لحظات قوة ظاهرية نخدع بها من جرحنا تجعلنا نقوم بتهورات قد نجرح فيها قلوب قد عشقتنا بجنون "