سند الأنثى رجل - الفصل 28 - بقلم shosho - مكتملة | روايتك

معاد : كيف حالها نرجس وينها ؟ ماما : رجلها انكسرت اخدوها علي غرفتها معاد : قصدك بتبات في المستشفى ، خيره صارتلها حاجة ماما : والله مانعرفو اهو بنسالو دكتورها ، وامشو جهة الدكتور عدنان : شن يادكتور طمنا الدكتور : تطمنو هي كويسة كسر بس في رجلها واني درتلها دخول باش نتطمن عليها اكثر معاد قعد يشوفله بتشكيك : باه خلي نمشي نشوفها الدكتور : لامافيش داعي معاد شافله : نعم ؟ الدكتور توتر : قصدي هي كويس مافيش داعي يعني تقدرو تخلوها ترتاح وغدوة حنديرلها خروج الصبح معاد برفعه حاجب : بس اني نبي نشوفها توا ، وتلفت وامشي عدنان واقف مستغرب من الي صاير ، حركات الدكتور وعماد ماليهاش تفسير الدكتور طارتله وتنرفز ماما : خلي حتى اني نمشي نشوفها ، ولحقت عدنان عدنان قعد يشوف للدكتور لين الدكتور توتر واستاذن وامشي ، عدنان لحقهم وركبو ،،،،،،،،، عبير خاشة لشقتها ودموعها علي خدها ، كان كل شي مغيره وليد ، حطت بنتها ع الارض خلتها تمشي ، وقعدت تدور في الشقه ، وتفكر كيف حندير العزي اهني واني ماعنديش شي في الشقه ، وقطع تفكيرها ، صوت جرس الباب ، استغربت ، قربت من الباب : منوو من ورا الباب : اختي عبير اني اسامة كانت تذكريني اسامه محمود جيران حوش عمك عبير تذكراته ، فتحت الباب : اهلين اسامه كيف حالك اسامه مد يده : كيف حالك انتي ، وعظم الله اجرك في الحاجة ربي يتقبلها برحمته عبير بحزن : شكر الله سعيك اسامه : اني امي قالتلي انك بتديري العزي اهني فجيت ، وكان الباب مفتوح فشاف ان الشقه فاضيه قعد مستغرب عبير فهمت عليه وين يشوف : شقتي انحرقت الفترة الي فاتت كنت دايرتلها صيانه اسامة باستغراب : وكيف حتديري فيها العزي عبير نزلت راسها : ماعنديش خيار تاني انت عارف انه حوش عمتي عمي قاعد فيه وعارف انت مش لازم نحكيلك علي يدير فيه ، تو نحاول نطلع نجيب كم حاجة قبل الدفينه اسامة : لالا والله ماصارت واحني وين امشينا اهو حوشنا موجود وصالة عمي مسعود للرجالة والجيران كلهم خليتهم كل حد بيتكلف بحاجة بالعزي ، والعزي علينا عبير دموعها ينزلو : لكن اسامه قاطعها : خلاص تو انتي خودي بنتك وبري لحوشنا وماتدوري شي عبير : مش عارفه كيف نشكرك ،،،،،،،،،،، خشو للغرفه كانت راقده ع السرير وتحس بالم شوية في رجلها ، وسرحانه ومصدومة معاد : السلام عليكم ، لاباس لاابااس نرجس ابتسمت : الله لايوريك باس ماما خشت : شن كيف حالك توا قاعده تحسي ؟ نرجس : شوية بس خش عدنان : الحمد لله ع السلامه ياهبله خوفتينا عليك نرجس ابتسمت : الله يسلمك معاد عاقد حواجبه ماما قعمزت في الكرسي جنبها وشدت يدها : تحسي قاعده نرجس : شوية مش هلبا عطاني مسكن الدكتور عدنان : هو مش عارفه علاش دار خروج مع انه مافيش داعي مفروض جبس وتطلعي وخلاص نرجس توترت : مانعرفش مانندريش عليه ماما لعدنان : ترا كلم نورس ياعدنان خليها تروح بكري قبل ماتظلم وقوللهم نرجس بتقعد في المستشفى وتو نقعد معاها اني الليلة معاد : لالا انتي روحي ياخالتي ارتاحي واني تو نقعد معاها الليلة والصبح نروح بيها ماما : لاياوليدي مانقدر نسيبها تبي حاجة اتنوض تخش الحمام خليني معاها معاد : والله تروحي وترتاحي اهو الممرضات موجودات وهي تبي حاجة نجيبهالها نرجس : ماتدورينيش ياماما ، وانت يامعاد والله ماتعب روحك معاد : تي عيب ،والله ياخالتي انتي تروحي واني تو نقعد معاها ، بعدين شن بتخلي البنات بروحهم في الحوش ماما : باه الله يربحك عدنان خش للغرفه : اهو كلمتها يامرت خالي ، كان تخليهم يقعدو يباتو مع امي ماما : لالا وين تو نروح حتى اني ومعاد اهو قال نقعد عدنان مستغرب من الوضع بس مشاها وماتكلمش ،،،،،،،،،، اني : وعلاش الدخول ، والله حسني انشغلت نورس : عدنان طمني قال عادية وحتى يهدرزو معاها نوال : باه واحني شنو بنروحو توا نورس : نروح اني وياك للحوش ، مش عارفه ماما بتقعد والا بتروح مافهمتش اهو بنزيد نكلمها ونفهم اني خديت تليفوني ونضت ، رنيت علي وليد وليد وصوت دوشة جنبه : ايوه اني : انت وين حبيبي وليد : قاعد في العزي ، شن نجيك توا تروحي ؟ اني : مش عارفه ياحبيبي والله ، وحكيتله الي صار وليد : والله وكيف حالها توا اني : كويسة بس حتبات الليلة في المستشفى ، كان فيها كيف حبيبي نبيك تجيني نشوفها ، وبعدها نمشي نعزي عبير وليد : باه اعطيني سااعه تانيه عندي كم حاجة بنديرها اني : باه خلي بالك ع روحك وليد : ماشي اني بصوت واطي : نحببك وليد : تماام اني : تو في واحد تقوله مرته نحبك يقوللها تمام وليد قعد يضحك ومتخزرط : ههههه ايه باه هي في امان الله هههه اني : هههههه سلام ، وسكرت واني نضحك أنور خاش من باب الحوش قعد يتنحنح : احم احم ، السلام عليكم اني تخزرطت هدا من امتى اهني : وعليكم السلام أنور : شن الجو اني قدمت سلمت عليه : تمام والله شن اخبارك انت احمد نازل من فوق : وين يامشفشفه هكي ماتسلميش علي خوتك لاتبااني تو هدا كلام يجي اني : هههههه وانت خيرك ماجيتش سلمت عليا انت مابنتش ، وقدمت سلمت عليه احمد : طوولة لساان يالطيف قلنا تتزوجي تعقلي زدتي هبلتي اني انصدمت : تووو اني مهبوولة انور : حشااك انتي مش مهبولة اني شفتله وابتسمت انور : انتي مهبولة وتلت اربااع اني ضرربته علي كتفه : هههههه باارد احمد : شن اخبارك ، حقا اتصل بيكم عدنان طمنكم والا اني : ايه كلمنا انور : علي شنو احمد : نرجس طاحت امبكري انكسرت ورفعها عدنان للمستشفى انور : والله ، مانندريش ، وشن اخبارها توا اني : الحمد لله طمنا يعني كسر عادي وجبسوها ، خيرك ماجيتش تغديت انور قعمز ع الصالون : شغل ماقدرتش نطلع ، سخنيلي توا اني قمت حواجبي وشفتله : الي مايجيش وقت الغدي خلاص تم معاش في انور شافلي بكسرة عين : تو شن هالباردة ، اهو مرتي قاعده ، وبصوت عالي : سمميييه سميييوة اني واحمد قعدنا نضحكو : هههههه سميه طالعه من الدار : نعم ، خلاص انور والله نسمع فيييك انور : حسبتك معاش تسمعي ماهو ، بالله جعان سخنيلي غداي ، وخودي هالباردة معاك ، واشر عليا سميه : هههههههه خيركم اني : راجلك هو البارد مش اني احمد : هو تبو الحقيقه الزوز باااردين ، وقعمز جنب انور انور تلفتله بكسرة عين سميه خشت للمطبخ تسخن في غدي انور عمتي طلعت من الدار : باهي الي شفناكم انتو الزوز وينكم انور : اني والله ماقدرت نطلع من الشغل احمد : واني اتغديت اهني مع وليد وعدنان عمتي : عارفاتك عبيت بطنك وتسلحبت فوق احمد : وتغديت شن نبي تاني قاعد ، وبعدها ركبت طبختها نومه صح أية طلعه من الدار : كأنه صوت حميدا هذا ، وشافتني لوت شواربها : نضت احمد : لالا قاعد راقد اني شديت ضحكتي أيه بضحكة صفرا : هههه صحة النوم اني وانور قعدنا نتبادلو في النظرات وشادين ضحكتنا أيه قعمزت جنب احمد من الجهة التانيه ولصقت فيه ، حسيتها كان تلقى تكبش فيه وتشوفلي وكأني نبي نجبده منها ( ان شاء الله بالشفي ) سميه جايبه صفرا غدي انور : ترا بالله يانوسه حطي الطاولة الصغيرة اني جبدت طاولة وحطيتها قدام انور ، سميه حطت الصفرة انور : صحيتي ، هي بسم الله ، وقعد يأكل عليا طلعت من الدار شافت لأنور وشهقت لين خلتنا انخلعناا انور : يااعنشكلك خيير جدددك علياا: خاااش بكندررررتك ، حييي يااااحي يااامااااما تعالي شوفي العفاسي الي دارهم انور كمل ماكلتها وماعدلش عليهاا ، بعدها قام راسه شافلي : تبي تفضلي ، تفضلووو معاي احمد : بعد قريب حتى تكمل ماكله اني : هههه صحة ، وشرين فوني ، لقيته ايمن استغربت : الو ايمن : اهلين نسيبة شن الاخبار اني وخرت وخشت الدار التانيه : تمام وينك من لما طلعت معاش جيت ايمن : روحت الحوش ، قلتلك نسيبة جربي اتصلي بهاجر اني : امبكري اتصلت بيها ماردتش ، شن صاير معاكم ؟ مافهمتش امبكري شن تقصد أيمن تنهد : مافي شي غير كان حصلتيها طمنيني عليها اني : باه حاضر وسكرت ،،،،،،،،، طلعت للجنان والقت نساوين جزء يطيب وجزء يغسلو في الاماعين ، وجزء يوتو في الصفر ، والرجاله يخششو في صناديق لبن وتمر وحليب ، شاده بنتها ودموعها علي خدها عبير : ربي يعطيكم الصحة يارب ، وقعدت تبكي وحدة من النساوين : ان شاء الله طولي بالك ياوخيتي ادعيلها بالرحمة عبير تمسح في دموعها : خالتي مبروكة هادي نقرض منك ظهرك انتي الخاله مبروك حطت الموس : والله تريحيني يابنيتي ظهره نحسه ولى زي العصا معاد قادرة نقعمز عبير حطت نسيبة قعمزتها وحطتلها لعبتها : خلاص نوضي خشي تريحي وانتي تو نكمل بدلك اسامه خاش وشاد صفرة فيها عوالة الشاهي : بالله اغسلوهالناا ، كان فيكم وحدة يديها فاضيات وحدة من البنات : هاتها تو نغسلها ، واخدت منه الصفرة اسامه انتبه لعبير مقعمزة تقرض وجنبها نسيبة ، قرب وقاام نسيبة وقعد ينط بيها نسيبة قعدت تضحك وتفرفش وفرحانه عبير قامت عيونها ابتسمت اسامه يبوس في نسيبة : شن اسمها السمحة عبير : نسيبة اسامه ينط فيها : ماشاء الله ربي يصون ويحفظهالك ام اسامه ( الحاجة رجعة ): وين مرتك يااسامه اسامه بضيق : ياامي عارفتيها في حوش بوها ام اسامه قربت منه : وخيرك ماقلتلهاش العزي في حوشنا راهي جت عاونت اسامه : تي ياامي مليت اقسم بالله ، تبي الطلاق تو نبعتلها ورقتها ونتريح من هالدوشة وتريحني ترا ام اسامه : وسع بالك عليها وماتتهورش ، تو نكلمها اني نقوللها تجي ، الناس يسألو عليها اسامه : الي تشوفيه باهي دريه ، وحط نسيبة جنب عبير : هي شنو صار في الصفرة الي بتغسلها وينها وشوية وجابتلها البنت الصفرة خداها وطلع ،،،،،،،،،،، في المستشفى ماما مقعمزة جنب نرجس وعدنان مقعمز في كرسي بعيد شوية ومعاد متكي ع الحيط ، ويهدرزو علي نرجس اما نرجس كان عقلها مش معاهم بكل وتساير فيهم ومرة مرة تسرح ماما : هي عدنان نمشو عدنان : باهي هي علي راحتك ، والتفت لنرجس : تبي حاجة نرجس نجيبلك حاجة من الحوش نرجس : تليفوني واللابتوب ، وماما نبي شوية ملابس معاد : تو نمشي اني نجيبهم فيسع ونجي عدنان وقف : لالا خليك اصلا اني بنوصل مرت خالي تو ناخدهم ونجيبهم معاد : باه تمام ماما : ردي بالك ع روحك ومش لازم الحركة الزايدة ، وماتعبيش ولد خالتك نرجس : حاضر معاد : مادوري شي ياخالتي ماما : رد بالك عليها الله يربحك ياوليدي ، هي مع السلامه نرجس : في امان الله وطلعت ماما وعدنان ونزلو معاد قعمز جنب نرجس : شن توا رجلك قاعده تحسي فيها ؟ نرجس : لا لا خف شوية بعد المسكن معاد : باه تمام ، كيف صار احكيلي نرجس : كنت في الحمام حشاك يعني وكان فيه ميه مش عارفه كيف رجلي التوت وطحت معاد : ردي بالك مرة تانيه نرجس : ان شاء الله ، لكن انت من قالك معاد : ها اتصلت بتليفونك ردت نورس واحكتلي نرجس : علاش انت متصل كنت تبي حاجة ؟ معاد تخزرط : ها مش عارفه نسيت شن كنت نبي الدكتور لما شاف ماما وعدنان طلعو يحسابه كلهم روحو وجي يجري لحجرة نرجس معاد قعد يغير في الموضوع : تعرفي حتى امي ماقلتلها ، وحط يده في جيبه طلع تليفونه واتصل الدكتور في اللحظة هادي وهو كيف بيفتح الباب ، جاه الدكتور التاني وقعد يتناقش معاه علي حالة معاد فتح المايك : الو امي خالتي : الوو ويننك نراجو فيك ع الغدي معاد : مش جاي تغدو ، قاعد في المستشفى اني خالتي شهقت : هييييي خييرررك شن صارلك معاد : غير وسعي بالك مش اني ، نرجس بنت خالتي طاحت انكسرت رجلها ، تعرفيها انتي عاد ماتعرفش تمشي من قبل نرجس : هههههه ، وضرباته علي يده خالتي : حي عليا شن صارلها ووه عليا معاد : تي بطلي ياامي خيررك مافيها شي زي الجن اهي جنبي غير كسر في رجلها بس ، ووه عليا وحيي عليا مفلحكم فيهم انتو النساوين خالتي باه باه غير اسكت ، جنبك هي معاد : ايه تسمع فيك خالتي : نرجووسة بنيتي الحمد لله ع سلامتك كيف حالك نرجس : اهلين ياخويلة الحمد لله كويسه اني الله يسلمك وقعدت خالتي تسال وتعاود علي نرجس ، بعدها سكرت معاد شرين تليفونه ، قامه شاف الرقم : وووه نرجس : خيرك معاد : لصقه النهارات ، وفصل الخط نرجس : من ؟ معاد : وحدة لصقه ، اهي عاودت تاني ماعرفتش صحة الوجه منين جايبتها ، والا نقولك هاك ردي عليها قوليلها اي حاجة معاش تتصلي مرتي خطيبتي اي حاجة المهم فكيني منها نرجس خدت منه الموبايل : هههه مانعرفش شن نقول معاد : تي اي حاجة تصرفي نرجس فتحت الخط وبتردد : الو البنت بدلع مصطنع : الوو منو انتي ؟ نبي معاد اني نرجس سكتت شوية بعدين قالت : اني حبيبة معاد انتي منو تفضلي تبي حاجة ؟ البنت : ايه نبي معاد اعطيهولي عارفاته جنبك نرجس : نقولك حبيبته تقوليلي عطيهولي البنت : نبيه في موضوع نرجس : قوليه ليا الموضوع اني وياه واحد معاد مبتسم ويشوف لنرجس وعاجبه الجو البنت : تي اعطيني معاد اني حبيبته واهني انفتح الباب ، بس نرجس ومعاد مش منتبهين نرجس : نقولك اني حبيبته انتي تزيدي تصححي في وجهك وزياده قريب نكون خطيبته ، سكري وتحشمي علي وجهك البنت : ان شاء الله مرض ليك وليه ، وسكررت الي فتح الباب واقف وشاد مونيليا ومصدوم نرجس : ههههههههه ان شاء الله فيك معاد : خيرها شن قالتلك نرجس : قالتلي ان شاء الله مرض ليك وليه ههههههه وسكرت معاد : هههههه بكل دراه كبد النهارات ..... احم احم معاد لفت وجهه وشاف جهة الباب ، القاه الدكتور ، قرن حواجبه ، ووقف اما نرجس فتوترت وقعدت تشوف الدكتور خش : شن كيف حالك توا يانرجس نرجس : الحمد لله كويسة معاد مربع يديه وواقف الدكتور : قاعده تحسي في الم نرجس : لالا توا تمام واهني شرين تليفون معاد ، وكان مدير خدمه مقدم فيها جديد يبي يخدم ، شاف للدكتور ونرجس ، ومايبيش يطلع ، لكن اضطر انه يرد ويطلع من الغرفه الدكتور : منو هذا نرجس بتوتر : ولد خالتي الدكتور : مذكرتيني يانرجس نرجس نزلت عيونها وهزت راسها : ايه الدكتور فرح ، بس بعدها تذكر كلام نرجس في التليفون : حقا هدا يكون خطيبك !! نرجس : ها لا ، ولد خالتي بس زي خويا الدكتور : والمكالمة !! نرجس انصدمت انه اسمع ، والقت روحها تبررله وتحكيله الدكتور تريح شوية : باهي ، نخليك ترتاحي توا ، ولف بيطلع نرجس بصوت واطي : حسن حسن تلفت ولما نطقت اسمه حس بقلبه قعد يدق بقوة ، ابتسملها : نعم ناجس توترت : رجلي حتكون كويسة صح ؟ حسن مبتسم : اكيد حتكون كويسة معاد خش ، ويشوف لحسن كيف مبتسم طارتله : شن كملت ؟ حسن يسحن ، وتلفت لنرجس : توا حتجيك الممرضة تضربلك يبرا ، وطلع معاد يشوف لنرجس المتوترة : مش متريحله الدكتور هوا اني مانعرفش علاش ، هكي ماهضمتاشي نرجس ساكته حسن : عدي اعطيها اليبرا هادي الممرضة بااستغراب : منوم هذا !!! حسن : اعطيها وخلاص مش شورك الممرضة اخدت اليبرا وطلعت ومستغربه معاد : جعانه ؟ نرجس هزت براسها بمعنى لا : متغدية ، انت مش متغدي برا كول حاجة معاد : والله من ناحية جعان جعان الحق ، امالا نمشي نجيب غدي ليا وليك نرجس : لالا اني مانبيش شبعانه معاد : امالا حتى اني مش واكل نرجس : هههه تي والله متغدية شبعانه معاد : لا تسايريني وتاكلي معاي نرجس : باهي وامري لله معاد وقف : خلاص امالا اني نمشي نشوف كان في مطعم قريب ، شن تحبي تاكلي نرجس : عادي اي شي معاد : باه تمام ، وطلع الممرضة لما طلعت من الدار طلع وراها حسن معاد لما طلع تقابل هو والمممرضة ، حسن لما شاف معاد طلع خلاه نزل وجي يجري الممرضة كانت تمسح في يد نرجس وبتضربلها اليبرا حسن خش : استني الممرضة استغربت ووخرت : نعم حسن : هاتي تو نضربلها اني الممرضة مدتله اليبرا واعطاته قوانطيات وقعدت واقفه جنبه حسن : تقدري تعدي تو نتصرف اني الممرضة طلعت نرجس ساكته حسن : اليبرا فيها منوم ، يعني بعد نعطيهالك حترقدي نرجس : ليش حسن : هكي افضل ، ويجهز بيضربلها اليبرا معاد لما وصل قدام باب العيادة ، حط يده في جيوبه مالقاش موبايله ، ولى ، جي للاصنصير القاه مشغول ، ركب من الدروج نرجس : ممكن نسألك سؤال ؟ حسن ابتسم : أسالي نرجس : علاش درتلي دخول ؟ حسن ماعرفش شن يجاوبها : هكي يعني باش نتطمن عليك اكثر نرجس شافتله ، وقعدو عيونه في عيون بعض وعيونهم هي الي كانت تحكي الي في داخلهم << في جوه قلبي حاجه مستخبيه كل لما بجي اقولها فجأه مش بقدر وقدام عينيك بقف وبنسى ايه يتقال ليه كل مره يجرى فيها كده ليا وديه هي كلمه واحده بس مش اكتر والكلمه ديه عندي فيها راحه البال >> << لغة العيون الوحيدة التي تعبر عن ماتخبئهم قلوبنا في لحظة يكون فيها الكبرياء هو من يتحكم بأفعالنا >> حسن : نرجس اني من اول يوم شفتك فيه مانعرفش شن الي صارلي حسيت بشيء ، وأشر علي قلبه وسكت نرجس تشوف لعيونه وساكته وقلبها يدق بقوة حسن : شوف كم مرة شهر واني نراجي امتى نشوفك << حبيتك يوم ما اتلاقينا لما حكينا اول كلام حبيتك واحلف على ده تسمع زياده ده انا مش بنام ديه الناس في عيني حاجه وانت حاجه تانيه عندك مشاعري حتى خدها واسئلها انا صعب اعيش حياتي وانت لحظه بعيد ً احساسي بيك في وقت ضعفي قواني كانت حياتي ناقصه جيت تكملها فرحة لقايا بيك بتبقي زي العيد حبيتك يوم ما اتلاقينا لما حكينا اول كلام حبيتك واحلف على ده تسمع زياده ده انا مش بنام >> واهني انفتح الباب وخش معاد نرجس وحسن .............. معاد ......... معاذ فتح الباب نرجس وحسن تلفتو جهة الباب حسن وقف ، واشر لنرجس بمعنى اهدي معاد خش قام حاجة وتكنطى حسن قام كم نرجس بيضربلها اليبرا معاد : انت شن تدير اهني حسن تلفتله وقايم حاجب ومنزل حاجب : كيف ؟ على مااعتقد هادي مريضتي ، وتلفت لنرجس نرجس خافت وتوترت حسن ضرب اليبرا بالشوية نرجس : ااااي ، وشدت علي شاربها حسن : ههههه ساهله ساهله نرجس قريب تبكي : حااررة معاد طاايرتله وواقف فوق راس حسن حسن بعد كمل اليبرا ، ومن غير مايشوف لمعاد : خليها ترتاح معاد قارن حواجبه وماردش عليه ، وحسن لف وطلع نرجس : انت علاش وليت ؟ معاد وهو طايرتله : نسيت تليفوني ، وقعمز نرجس : باه مش بتجيب غدي ؟ معاد : ماصارليش ، وجبد تليفونه من الكمادينو وفتحه وقعد يقلب فيه بعصبية نرجس معاش بت تتكلم وتكت راسها ع المخدة ، وبدت تنعس ،،،،،،،،،،،،،،، ماما روح بيها عدنان للحوش ، القت نورس ونوال مروحات ويراجو فيها نورس فتحت الباب : اهلين خيركم عطلتو كيف حالها نرجس ماما خشت : الحمد لله كويسة قعد معاها معاد ولد خالتك عدنان خش ورا ماما : السلام عليكم هما : وعليكم السلام ماما : نوال وتي لاختك لبسه وبيجامه ، وموبايلها وكمبيوتر بيرفعهملها عدنان نوال : باهي ، المهم حالها كويس ماما قعمزت : لاكويسة ، روحتو بروحكم ؟ نورس : وصلنا وليد ورانا بالسيارة ، وهي نسيبة مش عارفه قالت بتعزي وبعدها بتخطم علي نرجس بتشوفها ماما : باهي ، جيبيلي ميه ، قعمز ياعدنان عدنان قدم وقعمز جنب ماما نوال ركبت توتي لنورس في حاجاتها ، ونورس خشت للمطبخ صبت عصير لعدنان وميه لماما عدنان خدي طاسة العصير : شكرا ، وغمزلها نورس ابتسمت وخدودها ولو حمر ، وعطت الميه لماما وقعمزت قدام عدنان عدنان يشرب في عصير ويشوفلها ومبتسم نورس كانت ناسية روحها كانت لابسة بيجامه ، ولما جت ماما نزلت تجري ومادورتش ( اخواتي بالعادة نلبسو في حجاب قدام اولاد عمتي ومعاد ولد خالتي الا نوال ) نوال نازلة وشاده في يدها شنطة : اهم حاجاتها عدنان حط طاسة العصير ووقف : هي خلي نمشي اني ماما : كان فاضي اقعدي تعشى عدنان : لاوالله يامرت خالي ، بنمشي نروح بالعمال ماما بااستغراب : عمال شنو نورس شافتلها باستغراب عدنان : ههههه ، وحك راسه : والله انتي تعرفي يامرت خالي انه من قبل واخد قطعة ارض قريبه من حوش ايمن فهذا وين سخر الحال من اسبوع جبت مقاول وبديت ماما ابتسمت : مااشاء الله مااشاء الله ربي يكملك علي خير ، وخيرك ماقلتش عدنان يضحك : والله قبل مانبي نقول امشي هكي انطلست مني نورس انصدمت بس فررحت في نفس الوقت نوال شافت لنورس : غير سقد روحك بس وفكنا منها نورس تحشمت وفنصت في نوال عدنان قعد يضحك ماما : تحشمي هههه ، وبارك الله فيك ياعدنان تعبناك معانا اليوم عدنان قام الشنطة : لاوالله مافيها تعب ، تبو حاجة كلموني ماما : الله يربحك عدنان لبس سبيدروه : هي السلام عليكم ، وغمز لنورس ، وطلع ماما : اني خلي نركب نغير حوايجي ، وشوفو ديرو حاجة تعشوها ، وركبت نورس اول ماسمعت ماما سكرت باب دارها طلعت تجري نوال لحقتها عدنان كان واقف في الجنان وعاطي الباب بظهره ، وماسك تليفونه نورس قعدت تمشي بالشوية وجت وراه ، ووقفت علي روس صوابعها وحطت يديها علي عيونه عدنان في الاول انخلع ، ابتسم حط تليفونه في جيبه ، وقام يديه وحطهم علي يديها علي عيونه ونزل يديها وباسهم نورس تحشمت ووجها ولى احمر حاولت تجبد يديها بس عدنان شادهم بقوة عدنان شاد يديها ولف جهتها وهو مبتسم ، ويقرب من وجهها وعيونه في عيونها نورس تشوف لعيونه وقلبها يدق ، وانفاس عدنان قوية عدنان بهمس : نحبك نوال مادة وجهها من الباب ، شهقت : هييييييي نورس انخلعت وانخبط راسها في صدر عدنان عدنان حتى هو انخلع ولما شافها نوال : ههههه تي اقلبي وجهك وانتي ديما مخربة اللحظات نوال : خيييزي علي قلة الآدب ، تو حلال فيكم نمشي انادي ماما من فوق نورس وخرت من عدنان ، وحطت خصلتها ورا ودنها ومتوترة : بااردة عدنان استغل نورس ملفته وجهها باسها خطف علي خدهاا ، وبلعاني يغيض في نوال نوال : هيييييي ، وحطت يديها علي عيونها : استغفررر الله استغفر الله ، يااصايع عدنان وخر ويضحك اما نورس دوروها ماتلقوهاش ، فاتحة عيونها ومصدوومة ووجهها طماطمة ، تلفت لعدنان وتفنص فيه وجهها احمر عدنان يوخر جهة الباب ويضحك نوال : صاايع منحررف خزيي عدنان : هههه انتي موتي بحسدك نورس تقدم جهة عدنان وتفنص فيه عدنان يوخر : ههههه نورس اهدي ، تو في وحدة يبوسها حبيبها هكي تفنص فيها نورس تقدم جهته : تيي عدنان لف وطلع يجري وجبد الباب وراه بس ماسكراشي نورس وقفت : والله تشوف ياسخيف ، وقدمت بتسكر الباب عدنان ولى ودخل راسه من الباب : اننحبك نورس تجري جهة الباب عدنان سكره بسررعه وهو يضحك نورس فتحت الباب وطلعت راسها : والله تشوف عدنان يضحك وركب سيارته نورس سكرت الباب وخشت : خزي هالصايع هدا نوال : اني حسني صاارلي جفاف عاطفي نمشي نكلم خطيبي خيرلي ،ولفت وخاشه وتغني : ينا قلبي يناا قلبي نورس خشت وراها : باه نقصيلي صوتك من غير فضايح نوال لفت عليها : ههههه وراس امك وجه النكد سكريلي فمك انتي ولا مسلسل تركي درتيه وفوقه مكشرة نورس : تيي اني مش خفيفيه زيك ، وحطت يدها علي خدها ، وقعمزت ع الصالون وتكت راسها : يهبببل نحبببه نوال : قبل شوية قالتلي اني مش خفيفه نورس شرين فونها القاته عدنان عيونها ولو قلوب قلوب وابتسمت نوال تشوفلها وقايمه حاجبها نورس ردت بصوت واطي : الو نوال بصوت عالي : هدااا غيرررر مش خفيفه نورس عضت شاربها وفنصت فيها ، وحطت يدها علي سماعه الموبايل : تي ضمي فممك نوال كيف بتتكلم شرين فونها حتى هي القاته محمود : الو محمود : اهلين شن الجو نوال : تمام ، شن جوك انت محمود : تمام ، وجنبه دوشة نوال : وين قاعد شن هالدوشة محمود : قاعد في القهوة اني والشباب نراجو في المبارة نوال : هيييي المبااارة نسيييتهااا ، وامشت تجري للتلفزيون محمود : قاعده مابدتش نوال : ان شاء الله يربحو ريال محمود : ان شاء الله تشجعي في ريال نوال : ها امالا انت برشاا ، تي طيح سعدك محمود طلع من القهوة : تي شن تشجعي في رياال ، شجعي برشا نوال وهي خاشه للمطبخ : لالا انت شجع ريال محمود : اني خطيبك وانتي لازم تسمعي كلامي قلت تشجعي برشا يعني برشا نوال تطلع في طنجرة : هههه حلوة هاادي ، اني نشجع في ريال والله ونحب الريال تم محمود يدوي بجديات : شن تحبي الريال هي انتي قلت ماتشجعيش الريال اني نوال : ههههههه تبصر اكيد محمود : تييي عنشكلك معااش تعاندي انسيه الريال ، واصلا احني الي رابحين ماتعبيش روحك نوال تصب في سبول في الطنجرة : لاايابابا احني حنفوزو ، عندنا رولاندو محمود طارتله : نواااااال ، قلت شجعي برشلونه اني نوال : هههههه واني نبي ريال والله محمود : تي عنشكلك والله كان نجيك نوريك الريال كيف شكله اني نوال : ههههه مدريدية اني ماتحاولش ، وحتشوفو حناخدوها احني اليووم الشباب ينادو علي محمود محمود للشباب : تيييي بااااهي ، تعررفي تسكتي خيرررلك مدريدية قالتلي اني مرتي ماتشجعش رياال نوال : عادي خطيبتك تشجع ريال محمود : حييي عليهاا هاادي ، سكرري توااا المبارة بتبدا وتو نعرف نتفاهم معاك بعدين نوال : هههه باهي غير استنى كان فزنا احني حتجيبلي هدية محمود : نجيبلك عييينك مش هددية ، سككررري نوال سكرت وتضحك ، حطت الفوشار في الصونيه، حطاته في الصالة ، وركبت لبست تيشرت ريال ، ونزلت للصالة قعمزت وقوت التلفزيون وقعدت تراجي في المبارة ،،،،،،،،،،، اني بعد روحت من حوش عمتي امشيت طول للعزي ، عزيت عبير وقعدت شوية وبعدها طلعنا امشيت لنرجس القيناها راقده ، قعدنا شوية راجينا ماناضتش طلعنا ركبت السيارة وركب وليد وليد يولع السيارة : تو غدوة تروح وتشوفيها اني : كنت بنتطمن عليها بس ، امشي طلعت عاطيها منوم الدكتور وليد : تو غدوة تروح للحوش ونرفعك ، وفتح المسجل اني تكيت راسي علي الكرسي وليد مسك يدي باسها وحطها ع المارشة وحط يده فوقها : حقا عندي سفرة الاسبوع اني عدلت تقعميزتي : كيف ووين ؟ وليد : بنمشي لتركيا بنشوف بضاعه للمحل اني : واني ؟ وليد شافلي : وانتي ؟ اني : بنقعد بروحي قصدك وليد : لا اني : يعني ؟ وليد ابتسملي : روحي حتقعد معاك اني ابتسمت غصبن عني : اسمع ماتاخدنيش بالكلام المعسل توا ، نبيش نقعد بروحي اني راهو وليد : قلتلك روحي بتقعد معاك انتي ماتبيش تقتنعي اني : وليييد ، باه خلي محمود هو الي يمشي ، مش هو الي شاد المحل وليد : لالا اني نبي نمشي نجيب اني طرمت شواربي ولفتت وجهي جهة الروشن ( شن يخليني بروحي نبي نمشي معاه ) وليد باس يدي : والزعلانه الحلوه هههه الدلوعه هادي الي تبي تمشي معاي ، واني مش حنرفعها وهي زي البييس تدلع اني قالبه وجهي ونشوف للروشن وليد حطلي يدلي ع المارشة ، اني سحبتها ، قعد يضحك وعلى صوت المسجل اني طارتلي بكل مش معدل عليا وليد يغني مع الاغنيه : نحبـــه ... نحبه ... نحبه ريدى بوعيون كبار زينه فايق من ربه وانا في جاشى نار ،،، وقعد يصفق اني شديت ضحكتي صوته تحفه بصراحة ، لكن قاعده قالبه وجهي وزعلانه وليد يغني : نحبه ويعز عليا ما نطيق فراقه يوم ناره في الجاش قويه حرمتني طعم النوم يا ربي تلطف بيا بحبه ريدي مغروم مشكاي يعز عليا سحرني كاحل الانظار ، وهو يغني ويقرب مني ويضحك واني شاده ضحكتي علي صوته الجميل ، وليد يصفق ويغني اني قعدت نضحك علي الهبال : ههههههههههههههههههه وليد شافلي وقايم حواجبه : ان شاء الله بالشفي اني : هههههههه بالله عليك اسكت صوتك فظيع ههههههه وليد : تييي بري ملحي والله صوتي مش عادي احلى من راشد الماجد الي تحبيه اني نبي نردله حرقه الدم الي حرقهالي : راشد الماجد مايجي حد زي صوته يهبل هداكاا وليدد : شنووو شنووووو ، ودرس ع الجنب : علي شن ناويه انتي اني لفتت وجهي جهة الروشن : ارفعني معااك وليد : وين ؟ اني تلفتتله : وليد من غير تسهويك وليد : غيرر جديات وين نرفعك اني رديت وجهي جهة الروشن : لتركيا وليد : هههههههههههههه اني شفتله : تو شن يضحك وليد : انتي ، وقرب باسني علي خدي خطف ، وولع السيارة اني بنرد عليه بعد باسني تلخبطت معاش عرفت ندوي : شن شن اني وليد شن وليد يضحك ويسوق مش معدل عليا ، واني طاارتلي وقعدت نسحن وصلنا للحوش ، واول مادرس نزلت نجري وقفت قدام الباب ونشوف للباب ومانبيش نشوفله وليد سكر السيارة وجي فتح الباب ويضحك وجوه مليح واني نغلي ، خشيت للجنان ركبت طول وصلت للشقه القيت مش معاي مفتاح ، قعدت نغلي ومعاش عرفت شن ندير ومش حنقوله يجي يفتحلي الباب اما وليد وقف متعمد في الجنان ويراجي فيا ننزل نكلمه اني طبست من الدروج : المفتااح وليد باستعباط : مفتاح شنو ؟ اني : المفتاح الي حنفتحلك بيه راسك ، ونزلت بغل في الدروج ، واني ماشيه جهة حوش عمتي وليد شدلي يدي وجبدني ، لين خبطت في صدره ووليت في حضنه وليد : ههههه شن بتديري بيه المفتاح عاودي ماسمعتكش اني قعدت ندف فيه : حول وليد شادني بالقوة : شن بتديري بيه المفتاح قوليي قبل اني : بنفتح بيه الشقه وليد : ههههه ياخواافه اني دفيته ووخرت : مش خواافه ، حول بنخش لعمتي وليد : هي نركبو ، وغمزلي : بعدين تنزلي اني : لاا مانبيش بنشوف عمتي وليد : غير نبيك في حاجة بس فوق اني ملفته وجهي وطايرتلي وليد : هياا اني نبيش نرد ومطرمة شواربي وليد : ماتبيش ، باهي هي ، وقدم جهتي وقامني حطني علي كتفه اني : ننزللي شن تدير يامجنون نززلني وليد يركب الدروج : ماتبيش تركبي نركبك اني اني نخبط فيه علي ظهره : مجنون انت حتطيحني حي عليا بنطييح نزلني وليد يطلع في المفتاح : تي اسكتي ياخوافه بتجيبيلنا الجيران ، وفتح الباب وخشينا اني : نزلني خلاص وصلنا وليد سكر الباب ونزلني اني نواسي في ملابسي : بارد قريب طيحتني ، ولفيت بنخش وليد شد من يدي وجبدني : تعالي جاي يازعولة ،،،،،،،،،،، نوال تتفرج وتاكل في فوشار قامت فونها ، اتصلت بمحمود : الو محمود رد من غير مايشوف منو : بعدين نكلمك وفي اللحظة هاادي رياال داارو قول نوال عيطت في وذنه : وووووووو قوووووووووووووول ، ييييييس خششششي محمود : تي ياعن ### الحمااار مايشوفش فييييها علاش ماشدهاش ، ال.. نوال تنقز ع الصالون : قوول قووول محمود : تعرفي تسكتي خير مانطلعلك توا اني نوريك القول نوال : ههههههه وسع بالك اصلا واضحة من الاول يعني وتقولي شجعي البرشا ، تي خااسرين خااسرين محمود طايرتله : سكري خير مانرتكب فيك جريمة وسكر عليها نوال تضحك نورس وماما نازلين من الدروج يجرو بعد سمعو عياط نوال خافو : شن في نوال تنقزز : سجلووو قوول قوول ماما حطت يدها علي قلبها : والله فيك طريحة خير من بلاش رعشتيني حسبته اشبح شن صاير اما نورس فنزلت وتجري جهة نوال تبي تضربها نوال قعدت تجري وتضحك وتعيط وتقول : قووول قووول ،،،،،،،،،،،، فاقت وراسها ثقيل ، بصوت ناعس : نبي ميه معاد ناض يجري صبلها ميه ، ومدهالها نرجس عدلت تقعميزتها ، وخدت الطاسه قعدت تشرب معاد خدي منها الطاسه : صحة النومة نرجس حطت يدها علي راسها : رقدت هلبا ، الساعه قداش ؟ معاد : 10 نرجس عدلت تقعميزتها : رقدت هلبا بكل ،،،،،،،،،،،، ثاني يوم الصبح فقت من النوم مالقيتش وليد جنبي ، خشيت للحمام ( حشاكم ) ،،،، فتحت عيونها ، مدت يدها خدت فونها ، اتصلت بيه : الو محمود بصوت كيف نايض من النوم : الو صباح الخير نوال : صباح الورد ، وينك امس محمود : اسكتي خيرلك ماتفتحيش الموضوع نوال : ههههه باه انت خيرك متغايض ، واضحة من الاول احني حنفوزو محمود : مرة في العمر تصير مبروك عليكم نوال : الهدية محمود : في عيينك مش هدية ، غير احلمي نوال : هههههه انت خيرك هكي محمود : اني هكي نوال : هههههه باه ماتزعلش روحك خلاص تو في مبارة تانيه نخلوكم تفوزو محمود : نوااال بتسكري والا نطلع ناكلك وجهك توا اني نوال : هههههه نحبك وانت هكي تكشخ تولي منظري يضحك محمود : حي عليها هادي علي شن ناوية ع الصبح انتي نوال : هههههههههههه ، نحبك بمعدل اتنين / شي محمود : نواااال نوال : ههههههه باه بنسكر اني بنوض نفطر محمود: افضلك اصلا نوال : واحد زايد واحد يساوي كم محمود : نواااااال نوال : ههههههه باااي سكرت ، وناضت لبست تيشرت مدريد وصورت بيه وبعتت لمحمود الصورة ع الواتس وسكرت ، واهني شرين تليفونها ، ردت ،،،،،،،،،،،،،،،، طلعت من الحمام انشف في شعري ، نسمع في صوت وليد ، حسبته طلع اني ، طلعت من الدار ونمشي ونجفف في شعري ، نسمع في وليد يتكلم بالتليفون وليد : باهي انتي شوفي ، بعدين نمر عليك اني ونشوف شن ناقص ،، باه المهم ماتتصليش لين نتصل بيك تو نسيبة تشك ، سلام ، وسكر اني واقفه نسمع ومصدومة مش فاهمه وليد تلفتلي القاني واقفه ، ابتسم : صبااحو ورد وين هدا كله نوم ، الساعه ١١ ، ووقف جي جهتي اني سكتت ودرت روحي ماسمعت شي : صباح الخير ، فطرت ؟ وليد باس جبهتي : لالا كنت نراجي فيك نفطرو مع بعض اني لفيت : باه نلم شعري ونجي ندير فطور ، خشيت للدار واني حاسة بغصه في قلبي ، ومصدومة نحس في عقلي انشل مش قادرة نفكر ، من الي كان يكلم فيها وليد ،،،،،،،،،،،،،، ناضت من النوم ، بسبب التليفون الي مابطلش رن ، قاماته القاته هو ، فصلت عليه وسكرت تليفونها ، وردت راسها علي المخده ، وقلبها مقبوض من كثر البكي ، وحايرة شن تدير ، مستحيل تتنازل وترجع بهالسرعه بعد جرحها وحطمها ، مدة اليد ماهوش شي سااهل ، يصنع الف جرح في قلبها وصعب تضميده طق باب دارها بصوت تاعب : نعمممم امها : هاااجر نوضي تعالي افطري معانا هاجر : افطرو ياماما مانبيش اني امها : نوضي الله يربحك يابنتي تعودي من الشطان وكولي لقمه من امس ماذقتي حاجة راك حامل ، زوز تاكلو انتو توا ، ناوية تقتلي روحك ؟ نوضي حتى بوك شك خيرك هاجر تسمع في كلام امها ونزلت منها دمعه ، حطت يدها علي بطنها ، مسحت دمعتها بيدها التانيه : باهي ياماما اهو نايضة ناضت هاجر وخشت للحمام ، قامت راسها شافت للمراية ، عيونها متورمة من كثر البكي ، خدها متورم من الضربه منظرها كان شبه مخيف ، قعدت تغسل في وجهها بقووة ، بعدها حطت كريم وكثرت علي وجهها باش يدرق التورم ،،،،،،،،،،،،،، في المطبخ ندير في الفطور وعقلي مش معاي وحاسه بحاجة مقعمزة علي قلبي ، اساسا الصدمة تكفي فيا ، مانبيش نتسرع مرات نكون ظالمه وليد ، اني حتى سمعته بودني قاعده نكدب في ودني وعلي امل نكون كنت نتخيل ،لكن اني ماكنتش نتخيل اني سمعته يقوللها انتي ، وماتتصليش تو نسيبة تشك ، لو كان عادي علاش خايف عليا نشك وليد : اووووي نووووووسة اني انخلعت من صوته العالي : نعم وليد : وين سرحانه اني تلفتت نحرك في القهوة : شي وليد قعمز ع الكرسي : بتمشي اليوم لاختك ؟ اني نصب في القهوة : ايه وليد : باه امالا ، توا واني طالع نرفعك ، اكيد حتكون روحت من بكري اني مارديتش وقعمزت نفطر وساكته ،،،،،،،،،،،،،، اما نورس فلما ناضت الصبح ، دارلها خروج ، وحسن حاول يلهي معاد وعطي لنرجس رقمه وقاللها كلميني روح معاد بنرجس ، وهو روح لحوشهم باش يرقد لانه مارقدش طول الليل ،،،،،،،،،،،،، كملت فطور ووليد ناض خش للدار ، قعدت نضم في حوسة المطبخ ونغلي ، وكان نلقى نمشي نواجهه ونقوله سمعتك ومن هي ، بس حاولت نتحكم بااعصابي ونفكر ومانبيش نستعجل ، كملت حوسة المطبخ ، طلعت خشيت للدار وليد يبخ في برفان : اني عندي مشوار نديره ونجيك نلقاك واتيه باهي اني قعدت نشوفله وخنقتني العبرة معاش عرفت نرد عليه ، وين ماشي ياحبيبي وين ماشيلها بتشوفها من هي باهي ؟ وليد : اووووي نوسه ، وين رحتي ، خيرك اليوم من الصبح تسرحي ، في حاجة اني : لا شي ، ولفيت جهة الدولاب وفتحته بنطلع حوايجي وليد جي وراي ولف يديه عليا وباس كتفي : خلي تو نطلعلك اني لبسه اني واقفه وبنبكي خلاص معاش فاهمه شي ، بنهبل من الي قاعد يصير ، نسمع في وليد بودني يتكلم في التليفون وفي بنت ، وتوا كيف يتعامل معاي ، لكن وليد يحبني والا اني مخدوعه وليد يطلع فستان تحت الركبة لونه ازرق ملكي ، وكم كامل وبسيط ، مده ليا : البسي هدا يطلع عليك حلو اني : علاش بنلبس فستان وليد قرب مني باس جبهتي : غير البسيه علي خاطري اني شفت لعيونه وعيوني تعبو دموع ، مانبيش نضعف لالا ، لازم نتصرف بعقلانيه ، وخرت منه ونزلت عيوني ، وتهربت من نظراته وليد : هي اني ماشي لما قريب نوصل نكلمك باهي باش مانعطلوش اني : باهي وليد قرب باسني من بين عيوني وبعدها علي خدي : هي سلامات ، وطلع من الدار طلع وخلاني نار راكبه فيا ، قعدت نشوف للقفطاان وخانقتني العبرة ، لوحته علي طوول يدي وليد يلبس في كندرته شرين تليفونه اني لما سمعت تليفونه رن ، نضت نجري وطلعت من الدار وقربت من الصالة وليد : ايووه ، ايه شووي وجااي طالع توا اني، شن تبي انتي ناقص ، باه تمام ابعتيه في رسالة ، باه سلام اني حسيت بحاجة انغرست في قلبي ، ماشيلها توا ، اني علاش نخلي فيه يمشي اني لازم نشده مانخليشي يمشيلها ، وطلعت نجري للصالة وليد طلع وسكر الباب وماشافنيش ، ونزلت بخطوات سريعه في الدروج اني وقفت ع الروشن شفته طالع بسرعه يعني مستعجل علي شوفتها هو يجرري ، خلاص راسي بينفجر قعدت ندور في الحوش ، ومعاش قدرت نشد دموعي قعدت نبكي بحررقه قعدت نبكي قرريب نص سااعه ، وطلعت الي في قلبي كله وقفت بثقل وامشيت للحمام ، قعدت نغسل في وجهي بقووة ، ونغسل فيه ونعاود ودموعي ينزلو طلعت امشيت للدار شفت للقفطان الي ملوح ، وجعتني هلبا كيف يقولي البسي القفطان هذا واني متعودة نسمع في كلامه ونمشي برايه بس هو يطعن فيا من وراي ، لكن اني مستحيل نتخلى عليه بهالسهولة ولاراح نسيبهولها ، قدمت قمت القفطاان حطيته ع السرير ، وفتحت القجر وطلعت شنطة مكيااجي ، واستشوار وقعمزت وشفت لروحي شوية في المرايه ، بعدها بدديت بشعري ، استشورته وقمته بتسريحة بسيطة فوق فتحت شنطة المكياج ، وبديت نمكيج ، ونحاول نكون دقيقه وندير احلى مكيااج كملت ولبست فستاني وحطيت اكسسوارات وشفت لروحي في المراية ، طالعه حلوة ، بس شن الفايده ، وليد يكلم في غيري يعني مرات نكون مش عاجباته ، بس هو يحبني واني حلوة اصلا ، لكن مرات اني نظلم فيه مرات اخته منى ، لكن اخته منى علاش يقوللها ماتتصليش باش ماتشكش نسيبة ، شن يخليه يقوللها هكي ، ياربي اني حننجن ، ياربي ساعدني اني مش عارفه شن ندير والا كيف نتصرف نخاف نتسرع ونظلمه ، انتي يانسيبة قاعده خايفه عليه وعلي مشاعره وخايف تظلميه ، بس هو ماخافش علي مشاعرك وقت كلم غير وقطع عليا تفكيري وصراعي مع نفسي صوت وليد يسكر الباب وينادي يانوسه اني بلعت ريقي وشفت لنفسي في المراية بثقه ، ياربي قويني : نعمم اني في الدار وليد خش للدار ووقف قدام الباب فاتح فمه ويشوفلي اني قعدت نقيم في المكياج ومانبيش نشوفله وليد قعد يصفرر : ويين وين علي الحلاوووة هادي ، ويقدم : تبي تهبليني انتي اني شفتله وابتسمت بالسيف وليد قدم وباسني : تهبلي تهبلي كل يوم تزيدي تجنني فيا انتي اني : هيا عطلنا اكيد ماما تراجي فينا ع الغدي وليد : هي اني وخرت منه ولفيت لبست عبايتي ، ووليد يراقب فيا بعيونه ، واني مانبيش نشوفله طلعنا ، وطول الطريق ساكته ، ووليد كل مايحاول يتكلم نجاوب كلمة وقص وليد : نووستي كأنك قاعده زعلانه علي امس اني : لا لا وليد : باهي خيرك ، مش علي اساس تراضينا خلاص امس اني : شي عادي وليد باس يدي : معاش تزعلي روحك ياحبيبتي اني نشوف للطريق وغصه في قلبي وصلنا ، نزلت من السيارة شريننا ، فتحت نوال الباب ، خشيت وخش وراي وليد اني خشيت من الباب الداخلي ، والقيت وووووو