سند الأنثى رجل - الفصل 10 - بقلم shosho - مكتملة | روايتك

فقت الساعه 9 الصبح علي صوت دوشة نضت من فراشي درت دورتي وصليت ونزلت القيت ماما قالبه الحوش ضمان اني : صباح الخير ماما : صباح النور تعالي الحقيني نبيك في المطبخ نورس : صبااح الوررد يااحنه امك اليوم مش عارف شن جايهة اني : ان شاء الله خيرر نورس : والله مانعرف جاها تليفون وسكرت منه وقالت هيا بنكتو الحوش اول مابدت ابدت بالصالون قالت عندنا ضيوف اني الفضول قتلني امشيت نجري للمطبخ القيت ماما مقعمزة وتشرب في قهوة : شن في ماما : غير قعمزي افطري اني : باه تو ندير نسكافيه ،درت نسكافيه وجيت قعمزت جنبها ماما : اليوم اتصلت بيا مرا في ناس جايين يخطبوك اني قلت اكيد ام وليد : عيلة من ؟ ماما : ماقالتش هما يبو يجو واني قلتلهم تقدرو تتفضلو غدوة قالت في الاول نبو نتعرفو ع العيلة ونشوفو البنت وطالبينك انتي بااسمك قالتلي اني : امم ماما اني حقا نسيت نحكيلك موضوع ماما : شنو اني .... احكيتلها علي وليد ماما : قصدك يعني مرات امه اني : اني هكي نقول وتو نمشي نساله ركبت لداري قمت تليفوني القيت مكالمة منه اساسا اتصلت على طول : الوو صباحو ورد وليد بصوت واحد راقد : ايووه صباح الفل والياسمين اني : يااكسوول شكلك كيف نايض وليد : ايه قاعد في فراشي مسهرتني المشفشفه اني : ههههه المهم توا ماتلهينيش علي موضوعي وليد : موضوع شنو اني : امك اتصلت بماما ؟ وليد سكت شوية بعدين قال : لالا اصلا قاعد مااعطيتهاش الرقم اني بخيبه امل : اوكي وليد : علاش في حد مكلم امك اني : ايه وحكيتلها عليك حسبتك انت وليد : اها وامتى بيجوك هما اني : غدوة بنضطر نستقبلوهم وبنطلعلهم وليد ماسك ضحكته : باه تمام مرات يعجبوك اصلا اني : وليد بجديات تدوي خيرك مبرد هكي وعادي ومرات يعجبوني شن قصدك وليد : شي اني لو انتي جاك نصيبك اني مانقدرش نوقفه اني بعصبية : نصيب شنو شن الي تلمح ليه امس تقولي بنجي نخطب واليوم تقولي لو جاك نصيبك مانقدرش نمنعك وليد : انتي علاش متعفلقه هذاا الواقع يانسيبة غدوة جايين يخطبوك يشوفوك هما وبعدها تشوفي الولد ومرات يعجبك شن تبيني ندير اني اني : اووكي اني لو قعدت نسمع في كلمه تانيه منك رااح ننجلط بنمشي نضم مع ماما وحنطلع للناس غدوة اووكيي وليد : اووكي البسي لبسه حلوة بس اني بعصبيه : بااااي وليد ببرود : باي تعفلقت بجديات منه لوحت الفون ع السرير ونزلت ماما : هما اني : لاا ماما : باه الناس بيجو ومستحيل نقدر نقوللهم ماصارش بتطلعيلهم اني بنفاذ صبر : بااهي طلعت ماما من المطبخ واني قعدت نشرب في نسكافيه بعصبيه ونقول بيني وبين نفسي وليد معاش يحبني علاش يدير هكي علاش ماتعفلقش وقال كيف وانتي ليا والا هذا يصير في المسلسلات بس ، اني مش متخيلة نكون لحد تاني غير وليد ، لكن تو يشوف الما نغيضه والما نطلع للناس نضت ارسمت علي وجهي ابتسامه صفرا واني من داخل نغلي غلي ضميت الحوش معاهم وكنت نفشش في غلي في الضمان شوي شرين فووني ، هاجر ، : الو هاجر : تي وييينك ياحمااارة نراجي من بكري اني بعدم استيعاب : وين تراجي هاجر : في الجااامعه نسيبة ماتقوليليش ناسية اليوم بنزلو المواد خيرك اني : حييي اقسم بالله نسيييتها مرة وحدة هاجر بعصبية : شن بيقول عليك فمي توو شن نقووولك في الشمس واقفه نراجي وانتي نااسية اني : هههههه خلاص اهديء اعصابك نص ساعه نلحق هكي هاجر : تضحكي علي شن تضحكي علي عازتك والا قهررتك ااااه يامراارتي هياااا خفي روحك ، طوط طوط اني : ههههههه سكرت ، ماما اني بنمشي نلحق في الجامعه بنزل موادي ، وركبت نجرري لبست سورية ع الوردي الهادي فيها سبته ذهبية من الوسط وبنطلون جينز وشوز بيج وشنطة بيج ووشاح مزكرش : مع السلامه ماما ماما : في حفظ الله ديري بالك من الطريق نوال : تي ويين تسقدت العرووسة مفروض نحرثو عليها ليل نهار ماما : هي اصلا ماخاطرهاش في الموضوع قبل تحسابه هداكا الي تبيه كلماته شوره قاللها مش هما ناضو عليها نورس : قصدك ماتعرفهمش الي جاايين غدوة نرجس : قالت باهي بتطلع ماما : ايه قالت تو نطلع اصلا تطلع غصبن عنها شن بتحشمني قدام ناس برانيه بعدين كان ماعجبهاش تقول لا ،، اما اني دررت السيارة طيارة للجامعه وطريق زحمة وحالة نزلت نجري قابلتني هاجر متعفلقه اني بلعت ريقي وابتسمتلها كمحاولة لتخفيف الهزايب : صباح الخير هاجر : منين بيجيني الخير مادام صااحبتي يااحيوانه نص ساعه ولت سااعه اني نحرقت من الشمس كان مش في الجامعه قسما بالله راهو طحت فيك طرريحة نخليك كلك زرقاء اني شاده ضحكتي بالسيف : خلاص اهدي اعصابك هاجر : اعصابي قالت اعصابي شن ندير فيك اني توا قووولي شنننن نديررر اني معاش قدرت نشد روحي : هههههههههههههه بالعكس جت في صالحك اكتسبتي برونزاج هاجر قررصتني من يدي وقعدت تضغط : برونزاج اها صار برونزاج اني : هاجر ااااي حااارة حووولي يامسمومة ووووه معاش تضغطي ااااي هاجر تزيد تضغط : بيش تزيدي تضحكي كويس اني : ههههههه ااااي ههههه ورااس ايمن خلاص حوولي هاجر : راسه نابت فييه وزياده تضحك وتززيد تضغط في القرصه اني : ههههه بتخليني زرقاء ياحمارة غدوة جايين يخطبو فياا هاجر طلقتني : من جاي يخطب فيك اني نتحسس في مكان القررصه : مسموومة والله الما نعبي راس ايمن نقوله ماتاخدهاش هاجر : هاهاها ماتقدريش توا قوليلي من الي بيخطبك وليد بيجيب اماليه اني قرنت حواجبي وقلت بغيض : لااا مش هو نااس تانيين هاجر : كيف صار اني : هكي صاار اتصلو بماما وبيجو غدوة وبنطلعلهم هاجر بااستغراب : ووليد اني : ريحيني منه تراا جييت احكيتله قالي عادي مرات ناس كويسين و(قعدت نقلد في صوته ) مرات يعجبوك وتشوفيه ويعجبك لو كان نصيبك مانقدرش نوقفك ، وبكل برود ياهاجر يقول فيها من بكري واني نغلي عليه والما نغيضه ونطلعلهم تو يشوف هاجر : هههههه هو يعفلق فيك بس اني : بس ياهاجر ماتعفلقش بكل ولادار اي ردة فعل بكل برود يتكلم واساسا حتى الرقم قاعد ماعطاشي لامه بيجلطني عنده عادي نطلع ويخطبوني لغيره مش مدور بكل اني نحس فيه بعد سنتين معاش يحبني هاجر: لالا مااعتقدش واضح وليد يموت فيك ويحبك بس ممكن هو واثق فيك انك تحبيه مش حتوافقي اني : علي الاقل يحسسني انه يبيني ومايبينيش لغيره يدير ردة فعل ، معقولة يقولي مرات تطلعيله يعجبك قصدي هو رضي اني ندير حتى مقابلة هاجر : صدقيني هو بس واثق فيك هذا علاش دار هكي هيا خلينا نمشو مشينا ونزلت موادي وكملنا وقعمزنا في الكافتيريا شوية وروحت خشيت للحوش مع الساعه ١ الظهر القيت الحوش قاعد مقلوب وقاعدين يضمو : السلام عليكم نوال : وعليكم السلام اهلا اهلا بالعرووسة خشي سلم بنيتي بدليلي ع اللبسة النازكة وشمريلي كمامك وتعالي ديري معانا تقطعت اني راهو اني : تي باهي بالشوية وانتي انبكيتي فيا نورس : امك ناازلة علينا تقول الوزير جاايناا الحوش كله قلباته اني : هههههه فرحانه بيا مامتي نوال قربت مني : ماما قالت مش امالي وليد منو ؟ اني : مانعرفهمش نوال : كيف صار انتي ووليد اني : بنطلعلهم وخلاص غدوة وبعدين نرفض وركبت غيرت حوايجي ولبست لبسه حوش ونزلت قعد نضم معاهم وماجت الساعه 5 ليين كان الحوش كامل وسيقنا الجنانات وكل شي نواال : ظهرري ووه عليياا نورس : تقطعت اني خلاص معاش عندي حتى جهد ندوش نرجس : حتى اني عييت بكل اني : ماما تملحتي مننا اليووم هدا بدل مانكون توا ندير في اقنعه لوجهي وماسكات نكد بالوراكينه والصابون بظواافري الي مفروض توا ندير في المنيكير ماما : ماشاء الله علي بنياتي فالحاات هي نوضو نوضو دوشو وخشو ديرولي غدي نوال : اكيد تبصري نادية نرجس : بالنسبه ليا اني ياماما تعبانه بكل بندوش وفرااشي لغدوة العشيه ماتنوضونيش اني : ههههههه ماما مقررة تنتقمي مننا اليوم والا شنو نورس : كان تربحي فينا اجر يانسيبة تمشي تجيبيلنا غدي واتي اني : توا بنطلع بالسيارة غير احلمي نوال : شن رايك نورس تمشي معاي للقهوة الي في راس الشارع نجيبو منها بيتزا ماما : توا بتطلعي تمشي غادي بروحكم خيرك هبلتي نوال : عادي ياماما اني : تو نرفعكم اني وامري لله ، هاك نوال ولعي السيارة طلعت نوال ولعت السيارة وطلعنا بعدها طلعت بالسيارة من الجنان نورس : خلي نسوقها لحد المطعم اني : مزال مانقدرش نسلمك سيارتي بصراحة وبعدين نقعد نصفق نورس : خيزي والله نعرف حتى ان جربت سيارة عدنان .. وبعدها سكتت حست روحها زلقت نوال تلفتتلها : سياررة منو منو عااودي وكيف صار احكي احكي اصلا انتي زلقتي زلقتي اني شفتلها من المرايه : كيف صار نورس : خيركم قصدي هو قالي تعرفي تسوقي قلتله نسيبة تعلم فيا مرات بس مابتش تسلمني سيارتها قالي تعالي جربي سيارتي وسقتها في زنقتهم بس هدا الي صار نوال بشك : قصدي متاكدة هذا الي صاار نورس : ماصح وجهك شن بيكون يصير يعني اني : ههههههه لهالدرجة يانوال مش ضامنه نورس نوال : هههههه والله الحق مش واثقه هلبا نورس : خيزي عليك انتي وياها وعلي تفكيركم اني ونوال : هههههه وامشينا للمطعم خدينا بيتزا وروحنا اكليناها وامشي للوقت وقعدت ساهره للساعه 2 في الليل ووليد مااتصلش بكل لين انشغلت وقعدت مترددة نتصل مانتصلش بعدين قررت نتصل وليد بصوت واحد راقد : ايووه ( يااسلام راقد واني قاعده نحرق في دمي ) اني : اسفه نوضتك شكلني وليد : حاجة زي هكي اني : اوكي سلام وسكررت عليه رقدت واني نغلي منه ،،،، نضت تاني يوم الساعه ١١ فطرت ودرت دوش وبعدها وتيت معاهم الحاجات الي بنفرقوهم وقعمزت نغلي علي برود وليد الي ماكلمنيش بكل ولادور وعارف الناس اليوم جاايين الساعه 4 نضت قعدت نوتي في روحي لبست فستان قصير من فوق اسود ومن تحت نمر ووسيت شعري بس خليته كيرلي اصلا ماخاطريش نديرله شي درت شوي ميك اب ونزلت القيت ماما موتيه روحي نوال : طاالعه طررف انسه ناضلي اني : انسه ناضلي عيينك نرجس : حلوو هلبا القفطان وقعدو خواتي يجهزو لعند الساعه 7 شرين الباب امشت ماما فتحت ماما : اهلين اهلين تفضلو كانو مرا كبيرة شكله امه وزوز بنات وحدة متزوجة والتانيه لا طبعا اني نشووف من فوق الدروج امه : يزيد فضلك بارك الله فيك وخشو للصالون واني نزلت وجوي اخييي بكل وماخاطريش نطلعلهم بس هكي بيش نغيض وليد يحسابني نتسهوك نورس : هاك خودي ارفعي القهوة اني : ماخاطريش بكل نورس : خيرها هاادي امشي خير ماناديلك ماما تجي توريك اني خديت القهوة : اووف ، خشيت بهدوء للصالون : السلام عليكم امه : وعليكم السلام ماشاء الله ماشاء الله اني بحشم مصطنع : سلمك تفضلي وقدمت القهوة وقعمزت قدامهم وراسي لوطى اصلا عقدوني بنظراتهم وخلوني نختصر عليكم المديح الي مدحاته امه لولدها تقول توم كروز وجاها ولدها وروحت واني ركبت طول اتصلت بوليد لانه حضرته مااتصلش بكل : الوو وليد : ايووه اني : كيف حالك وليد : الحمد لله وانتي اني : ويينك وليد : ماحبيتش نزعجك اليوم عندك ضيوف اني : ماتحرقليش دمي وتخليني نطلعلك من التليفون توااا خيرك انت وليد : خيررني اني : سلامتك خلاص اني الغالطة الي اتصلت هي سلام وليد : استني يامهبوولة اني : شنو وليد : خيرك متعفلقة باهي اني مستاحشك وانتي تبي تسكري اني :واضح لدرجة القيت الفون معبي مكالمات منك وليد : والله انشغلت شوية اليوم كان في موضوع للعويلة اني : مش عذر وليد : باه قوليلي شن عجبتيهم الناس اني كيف بنطلعله من التليفون لكن قولت خلي نغيضه زي ماغاضني وقلت بغرور : اكيد حنعجبهم ليش انت عندك شك في جمالي وليد : ههههه لا ابداا اكيد هبلو فيك وخاصه كان طلعتيلهم مشفشفه اني : هاهاها اصلا من لما خشيت وامه تقول ماشاء الله وتشكر وتعاود صقع عليك وليد : ههههههه اها بالضبط اني : ممكن تبطل تسهويك مانقولش في شي يضحك اني وليد : باه ها خلاص المهم احكيلي كيف كانت المقابلة اني : حلوة وناس عجبوني وحسب مواصفات العريس مايرتفضش بكل وليد : حلوو اني معاش قدرت نمسك روحي وقلت بغيض : انت ليش هكي تدير معاش تبيني معاش تحبني قوولهاا امس تقولي بنخطب واليوم تقولي عجبوك الناس انت خيرررك وليد : وطي صوتك وهديء اعصابك انتي اعلاش متعفلقه هكي اني ندوي عادي اني : على فكرة بعد غدوة بيجي العريس وبنطلعله تماام وهي توا بنررقد اني تاعبه وليد : اوكي نوم العوافي تصبحي ع خير حبيبي اني : باااي ، وسكرت من كثر ماغايضني لين قعدت نبكي معاش فهمته علاش يتصرف معاي هكي علاش هكي بارد ومش مدور حتى لو امشيت لغيره ورقدت بدموعي مر تاني يوم عادي جدا ووليد مااتصلش الا مرة وحدة وقاعد نفس البرود يحرقلي في دمي ويسكر ماما كلمت ايمن علي اساس يجي تاني يوم بيش يستقبل الراجل الي جااي والي الطلعه زي الهم علي قلبي اما نوال اتصل بيها محمود العشيه وقعد يهدرز معاها وكلامه يدل علي انه يحبها بس مايبيش يقول وكان يتنهد ومتضايق وهي مش فاهمه شي اما هاجر وايمن امورهم عسل وهاجر اعترفت بحبها لايمن وهو يبي يبدا يبني وبيخطبها ،،،،، ثااني يوم اليوم المرتقب الي بيجي فيه العريس نضت الصبح بكسل ومر الوقت ركيك بكل لحد بعد الغدي شرين فوني كان وليد فررحت وتكنطيت في نفس الوقت : الو وليد بفرحة : ايووه اهلا بالعروسة اني : قسما بالله لو ماتبطلش نسكر ومعاد تسمع صوتي الله ياسر حرقتلي دمي بما فيه الكفايه تلاته ايام واني نسحن ليين نبكي ليش هكي تدير بس وليد بضيق : اسف مش قصدي اني خنقتني العبرة : انت معاش تحبني وليد وليد : والله نموووت فيك معقوله اني معاش نحبك اني مانقدرش نعيش بلاك اني قعدت نبكي : ليش هكي باهي عادي نكون لغيرك وليد : لا مش عادي واني واثق انك مش حتكوني الا ليا اني : الراجل بيجي اليوم وليد : باه اطلعيله اني بعصبيه : رجعت نفس الشي خلاص حااضر تو نطلعله ياوليد تماام وليد : ههه خلاص باه معاش تعصبي اساسا عندي ليك مفاجأة بعدين اني : شن هي وليد : كان قلت شن هي معاش تولي مفاجئة اني : باه امتى وليد : بعد يروح العريس اني بغييض : بااهي اني بنمشي نوتي روحي وليد : ماتحطيش مكياج والبسي طويل ووشاح اني نبي نغيضه : والله بنطلعله صفرا لازم ندير مكياج واكيد بنلبس وشاح بس انت شايف بلوزتي الحمراء عرفتها بنلبسها ( البلوزة هادي مايحبهاش هو قصيرة هلبا ولما نلبسها نتعارك اني وياه علي خاطررها ) وليد : هي حلوة لكن تعرفيني مانحبهاش لانك ديما تعاندي فيا علي خاطرها اني : لكن اني نحبها وليد بكل برود : عادي براحتك اني بيجلطني : اوكي توا سلام وليد : سلام ياروحي سكرت منه واني في كامل غيضي لبست بلوزة سودا للركبه وسروال بيج ووشاح مزكرش وماحطيت شي في وجهي نزلت لوطا القيت ايمن كيف جي : اهلا كيف الحال ايمن : الحمد لله شن الجو اني وواضح عليا متضايقه : ماشي كيف حال عمتي ايمن : الحمد لله تسلم عليك قالت تحس في روحها تاعبه اليوم كان هدا راهو جت اني : سلامتها مش مشكلة ، قعمزت ع الصالون ايمن قعمز جنبي : خيرك مش مرتاحة صليت استخارة اني ببرود : لااساسا الموضوع مش خاش راسي ايمن : كيف مش خاش راسك ماتبيش قصدك امالا علاش وافقتي انك تشوفيه اني : هو طلب واني وافقت وخلاص ايمن : باهي ان شاء الله خير زيدي فكرة راهو اسالت حتى ع العيله اني كلهم شكروهم وحتى الراجل ماشاء الله عليه اني ببرود : باهي كويس قعدت ساعه نراجي لييين مليت بعدها شرين الجرس كان جاي معاه اخته سلمت عليها وكنت مانعرفش حتى اسمها على فكرة ولاحتى اسم العريس ولانعرف العيلة هكي وخلاص غيضه في وليد ناداني ايمن انه نجي نخش لفيت وشاحي وشديت سفرة القهوة وخشيت بيها واني راسي لوطى : السلام عليكم هو : عليكم السلام اني قمت راسي وشفتله ..... ووووو قعدت ساعه نراجي لييين مليت بعدها شرين الجرس كان جاي معاه اخته سلمت عليها وكنت مانعرفش حتى اسمها على فكرة ولاحتى اسم العريس ولانعرف العيلة هكي وخلاص غيضه في وليد ناداني ايمن انه نجي نخش لفيت وشاحي وشديت سفرة القهوة وخشيت بيها واني راسي لوطى : السلام عليكم هو : عليكم السلام اني قمت راسي وشفتله وقفت في مكاني من الصدمة صدمة غضب وفرحه في نفس الوقت ومش مصدقه ايمن : احم خشي يانوسة اني نزلت راسي وقدمت بالقهوة وقمت راسي وشفتله شبحه تفنييصه حطيت القهوة ع الطاولة وهو وقف مد يده سلمت عليهم واني نشوفله ونفنص فييه بتاع اقسم بالله الما نوريك وليد : كيف حالك يانسيبة اني فنصت فيه : الحمد لله وانت ( قاعده شاده روحي بالسيف لان ايمن ) وليد : الحمد لله تمام شن اخبار الدراسه والجامعه ( يااسلام مايعرفش يمثل بكل تي والله الما يشوف ) اني: تمام ماشية ايمن : اني عندي تليفون بنديره خودو راحتكم ، وطلع اني شفت لوليد وقاعده نفنص فيه وليد : هههههه عيونك بيطلعو خلاص ياسر تفنيص اني : اسسس ماتدويش معاي ولاكلمة وليد : هههههه ، وناض قعمز جنبي اني لفتت وجهي للجهة التانيه ( قلبي فرحان بس متغايضه منه يحرقلي في دمي وليد مد يده ولفتلي وجهي : ماهو اني درت هكي مفاجئة نبيك تفرحي مش تتكنطي اني نزلت عيوني وليد : هيا حبيبتي عاد عارف روحي زعلتك وحرقتلك دمك بس نبيك تتفاجئي اني غلبتني ابتسامتي : ماتوقعتش بكل وليد : هههه والله نحببك اني خدودي ولو حمر اساسا هو قريب مني هلبا : باه حتى اني خلاص وخر تو يخش ايمن وليد يشد يدي : مانبيش نوخر هي تهربي معااي اني : ههههه وخر وخر انت خلاص عليك وليد : غيرر هياا والله الا واعره تو نطلع من حوشكم وانتي مش معاي ، خلينا نديرو العرس بسرعه اني : اساسا من قالك بنوافق وليد : شنووو توافقي غصبن عنك كان هذا نخطفك تعرفيني نديرها اني : مش بالسيف وليد : لااا بالسيف والي تحصل فيه دبرله انتي حصلتي فيا دبري اني : ههههه وليد قام يدي وباسها : ربي لايحرمني من هالضحكة اني جبدت يدي : هيي يامجنون وخر وليد : هههه باه هاا وخرت ، وقعمز في كرسيه قدامي ، ايه قبل ماننسى وحط يده في جيبه وطلع باكو صغير اني : شنو وليد يفتح الباكو ويمده ليا كان خاتم دبلة حلو هلبا اني نمد يدي ناخد منه الباكو : حبيبي حلوو هلبا وليد وقف : هاتي نلبسهولك ومن اليوم خلي الناس كلها تعرف انتي ليا بس اني ابتسمت ابتسامه فرح : شكرااا حبيبي ولبسلي الخاتم وباس علي يدي : الف مبروك ياعروستي اني : ههههه والف مبروك عليك حتى انت ياعريسي وليد رجع قعمز في مكانه ويشوفلي وعيونه مليانات حب بادلته نفس النظرة < احبك يامن ستكون حلالي امام الناس باذن الله > خش ايمن وهدرز شوية هو ووليد وشوي وطلع وليد روح ومعاه اخته اني كنت فرحانه بنطير ركبت لداري نجري وقعدت انقز من الفررحة وخواتي يباركولي وسجدت سجدة شكر لربي ،،،،، اما وليد اول ماروح فتحيه : شنو عجباتك ( علي اساس مايعرفنيش ) وليد : اكييد قصدي ايه ماشاء الله عليها مني اني موافق فتحية : روروروروروري ربي يكمل فرحتك وتوافق هي ونفرح بيك انت وخوك وليد : ان شاء الله ان شاء الله منى : هي بصراحة تهببل وطالعين علي بعض انتو الزوز فتحيه : ايه لا ماشاء الله عليها زي الريمه رحمة واقفه علي باب دارها : قصدي الي تشكرو وتعاودو فيها راهي عاديه جدا ومش حلوة اني احلى منها وشايفه روحها ع الفاضي وليد : المهم اني عاجبتني ونشوف فيها احلى وحدة فتحية : انتي ياام لسان كان ماتبطليش نجيك نوريك توا خلي خوك فرحان والبنت ماشاء الله عليها حتى من العيون زي الفناجين رحمة : عيوونها عاديات عيوني احلى ملونات منى : ياسر يارحمة خيرك ع البنت رحمة : والله هادي من قبل ماتوصل خلتكم هكي امالا لما تجي كيف تديرو وليد بعصبيه : والله يارحمة والله والله لو ماتسكريش فمك نجي نسكرهولك اني وماادخلكش فيها انتي اني نبييها ونحبهاا ووالله تجيبي اسمها بسوء علي لسانه والله يارحمة ماتلومي الا نفسك رحمه بهزوة : قول هكي من الاول علاقه وتحبها وتكلم فيك ليش داس منى : رررررحمة خلاص عااد وليد يفنص فيها بعصبية وشاد روحه بالسيف رحمة : اقعدو فيها وخشت وقربعت باب دارها فتحية : هالفرخه هاادي ماعرفتش نربيها اني ماتعدلش عليها ياوليدي ماتخربلكش فرحتك وليد : ماصار شي ياامي ، وين محمود فتحيه : والله مانعرف هالفرخ بيجلطني ليه قداش يوم مايتكلمش معانا يروح اعقاب الليل يرقد ويطلع الصبح حتى الماكلة نخليله فيها في المطبخ ماياكلش فيها ياليه هداكا اليوم قلتله بوك قال انه خاطبلك منى من لما انت صغير وتعرف بوك والله كان قال كلمة خلاص ومستحيل يولي علي خاطر خووه كان هذا يتقاطعو قولي ياوليدي تو اني شن ندير هو حتى انت مش عارف كيف وافقلك وليد : لاحول ولاقوة الا بالله ياامي والله بوي غالط هو مايبيهاش الحاجة هادي ماتجيش بالسيف فتحية : ماعندي ماندير اني يتفاهم مع بوه ،،،،،، اما محمود فااتصل بنوال نوال كانت مقعمزة جنبنا وكلنا نهدرز بس لما شرين فونها ناضت من جنبنا ركبت وسكرت دارها : الو محمود : اهلين شن الجو نوال : تمام الحمد لله شن جوك انت محمود : اهو تمام شن دايرة نوال : شي كنت مقعمزة خوك ماليش هلبا مروح محمود بااستغراب : خووي ؟؟؟ نوال : ايه وليد خوك محمود : وليد خوي شن يدير عندكم ؟ شن صاير ؟ نوال بااستغراب : معقولة ماتعرفش وليد خطب نسيبة اليوم هو جي ودارهالها مفاجئة تهبل محمود : خطب نسيبة ؟؟ ،، اها تمام نوال : كيف ماتعرفش محمود : اساسا ليا قداش يوم مانروحش للحوش الا في الليل ونطلع الصبح وهو اتصل بيا سال علي حالي بس ماحكاليش نوال : ليش محمود خيرك حتى ليك قداش يوم نحس فيك متضايق محمود تنهد وقال : شوية مشاكل وتمر ماتدوريش غدوة مدرسة والا نوال : ايه ان شاء الله محمود : شن اسم مدرستك نوال : مدرسه ***** محمود : يجيكم باص نوال : ايه محمود : الساعه قداش تطلعو نوال : نطلعو من الحوش السبعه وقعدت نوال تهدرز مع محمود فترة وبعدها سكرت وجتنا وهدرزنا لحد الليل وبعدها كلمت وليد وهدرزت معاه وريضيت غصبن عني بكلامه وطول الوقت نشوف لخاتم حولت الخات الاول وحطيته بدله ،،،، نضت الصبح علي دوشة اخواتي طالعين للمدرسة واني كنت بنرفع نورس بتسجل في الجامعه صليت ودرت دوره : هاك نورس ولعي السيارة من بين مالبست الشوز والوشاح طلعنا وامشت سجلت اعدادات طبية وقرايتها مزال تبدا في شهر تلاته ،،،، مر اسبوع وردينا علي اهل وليد بالموافقه وهما موافقين غدوة بتجي امه بتحدد موعد للفضانيه والبيان يبوه قريب واليوم طالعين نشرو في حاجات بيش نستقبلوهم اما نوال فكانت تكلم في محمود كل يوم ومافيهمش حد صارح التاني بالي في قلبه هاجر هي وايمن جوهم حلو وايمن فتح الموضوع مع عمتي واليوم كلمتني قالتلي حددي معاهم موعد يخطبوها وكلمتها وقالولهم تقدرو تجو بعد غدوة وهاجر فرحانه بتطير وايمن حتى هو فرحته مش سايعاته ، اني : السلام عليكم نورس جايه : خيركم عطلتو الغدي طاب ماما : هادي نوسه لمت السوق كله ماخلت ماخدت حتى القفطان الي بتطلع بيه خدت زوز كفت ووفت فلست بيا نوال : مش منها ياحنه امالي حبيب القلب حتى هما نرجس : عايشه اللحظة نوسه اني : مانيش راده عليكم نبيش نعكر مزاجي ، حقا ماما وين خالتي مغطسة ماما : العشيه بالك تجي وبعد غدوة ايمن قاللنا موعد المحكمة اني : ان شاء الله خير نوال : بنمشي معاكم ياماما نبي نردله الكف ماما : ريحيلي روحك وخشيت غيرت لبست بيجامه وتغدينا وغسلنا الاماعين بعدها خالتي جت ماما : اهلا اهلا خشو تفضلو ، تعالى ياعماد كيف حالك شن قاعد وجهك يوجع فيك عماد : الحمد لله ياخالتي شوفي حتى في اثار امشت ماما : ايه باه الحمد لله سارة وهي خاشه من الباب : يا دبلة الخطوبه عقبالناكلنا ونبني طوبه طوبه في عش حبنا نتهنى بالخطوبه ونقول من قلبنا يادبلة الخطوبه وقعدت تغني وتصفق وروروروروروري اني : ههههههه مزال العرس سارة : تي انتي بتسبقيني اني مزال ماده وجهي نراجي ماتكلموش ع البيان اما انتي شكلهم ناشطي اني : ههههه جبتي السي دي الي قلتلك عليه سارة : يب يب وين حولتو المنظومه اني : في مكتبه الصالون تعالي نجيبوها مع بعض، وقمنا المنظومة وحطيناها في الصالة وفتحنا سيدي زمزامات وقاويناه علي قووته معاد : يااااعن شكلك انتي وياااها نقصي البلي ماحد يسمع فيه طبعا ههههه ورقصنا وهيجنا تقول العرس غدوة وحتى العروسه مش مقصره اساسا اني المنشطة ههه ماما : هبلو خلاص عليهم خالتي : ههههههه خليهم فرحانات ماما : ايه والله نسيبة ماتوقعتها الا تخش في حالة نفسيه من الاكتئاب الي كان فيها نحمد في ربي طول الوقت خالتي : مسكينه ماشافت ربي يفرحها ان شاء الله ماما : ان شاء الله وتفرحي ببناتك يارب خالتي : ان شاء الله ، كيف حال حماتك فادية ماما : الحمد لله باهيه خير من قبل قلتلها بالك ان شاء الله تجي غدوة كان يوم حلو هلبا بعد تعبنا من الرقيص قعمزنا درنا بيتزا وبوريك والسلاطات لغدوة وحطينا في الفريز نوال : خالتي بايته والا خالتي : ان شاء الله مادام غدوة عطله سارة : خالتي ماعندكش دربوكة ماما : لا والله يابنيتي مادرت اعراس نرجس : في حوش احنينه في دربوكه سرور : جيبوها نوال : تعالو معاي نمشو نجيبوها وناضوو يجرو نوال وسرور ونورس طلعو من جنااننا عليي خشه سيارة للحوازة كلهم تلفتولها وقعدو واقفين يقصقصو من جي وينزل عدنان : السلام عليكم نوال : وعليكم السلام اهلا اهلا نورتنا يانسيبنا نورس تقرصها : وعليكم السلام عدنان : هههههه فكيني منك يانوال نوال : اني امشيت وشدت سرور من يدها وخلت عدنان ونورس واقفين بروحهم عدنان : شن جوك نورس : تمام وانت عدنان : تمام كنت ماشي مانعرفش شن الي خلاني نجي اهني ممكن الشوق نورس : ههه باه كويس عدنان : نورس نطلب منك طلب نورس : تفضل عدنان : ممكن رقم تليفونك مش مشروع هكي نورس : امم اوكي سجل وسجل رقمها وهدرز معاها بعدها امشو مع بعض لحوش حنينه اما نوال وسرور جابو الدربوكة وجو يجرو سارة : مدي لنسيبة مدي اني خديت الدربوكة وبديت ندربك : وياافرحة ويش نديرلك *** تجيني والا نطيرلك ماما : ههههه عليك جيل اغبر خالتي : بالله زي اياماتنا احني العروسة ماتطلعش من الدار من لما يخطبوها وتقعد تتحشم ماتقابلش حتى بوها وامها ونقعدو نتدرقو توا يدربكو وتلقيها بتطير من الفرحة وقلبنا الحوش تدربيك وغني وجو مش عادي حتى وليد القيته متصل عشر مكالمات واني ماسمعتاشي : ياويلي اتصلت وقلت بخوف : الو وليد : ايووه باهي الي رضيتي علينا ورديتي وينك من بكري انشغلت قريب اهبلت اني : سوري حبيبي بس ماهو صوت الدربوكة وقبلها المنظومة والله ماسمعته هدرزت مع وليد شوية وسكرت قالي اهلي مقررين البيان بعد اسبوع بيشوفو لو يناسبنا او لا وقالي في قرار مفاجئة بيقولهولي في الليل رجعت للبنات وكملنا هبالنا وتعشينا وخشو رقدو واني اتصلت بوليد اني : الو وليد : ايووه اهلين بعروستي الحلوة اني : هي قولي شن المفاجئة وليد : الحمد لله مادام سمعت صوتك انتي كيف حالك اني : غير هيا قول وليد : دوم يارب فرحانه حبيبتي ؟ اني : وليد من غير تسهويك الفضول بيقتلني وليد : دووم الفرحة ياعمري اني : وليييد وليد : ويخليك ليا ياعيون وليد شن درتي اليوم اني : هههههه وليد بطل برادة وليد : اححح مافيش منك امل بكل اني : مافيش بكل ، هيا قول وليد : شن بنقول اني : المفاجئة وليد : مفاجئة شنو اني : واااك انت تستمتع لما تحرقلي دمي وليد : هههههه حاجة قريبه من هكي اني ولييييد وليد : باه تو نقول هي شدي قلبك ، يوم البيان نبي نقرا الفاتحة اني : ها شنو وليد : بتولي حلالي اني : ح حبيبي قصدك بجد يعني اني اني وانت وليد : ايييه ، شن رايك انتي اني بفرحة : احلى مفاجئة وغدوة اهلك بيقولوها لماما وليد : ان شاء الله اني : وليد بجد حبيبي مش مصدقه فررحانه بنطير وليد : اهم حاجة تكوني انتي فرحانه ياعمري اني : حي حبيبي معناها تقدر تخش تلبسلي الدبلة وليد : ااا مانعرفش اني : لا حبيبي بتلبسني وليد : باه حاضر وقعدت نهدرز اني ووليد لقريب الساعه اربعه الفجر واني فرحانه وهو فرحته مش سايعاته بكل نضت الصبح علي صووت التدربيك علي باب دار نرجس ونوال عرفتو منو اكيد هي من غيرها مزعجة اني : ساااااااره بطللللللي بنررررقد سارة : ترقدي عينك نووضي يااحلوة نوضي ياعروسة عزوزتك جاايه اليوم نوال بصوت عالي : ياااحيواااانه ياسااااارة سكررر الرووشن سارة نزلت وكان خطرت في بالها حاجة واحني ارتحنا واسترخينا شوي علي اساس بنولو نرقدو وشوية ونسمع صووت طق بالكاشيك علي الطنجررة : هياا هياا نوضو هيا هيا نوضو هيا هيا نوضو وتلحن فيها نضنا كلنا غصبن عننا من الازعاج فطرنا وبدينا ندورو ع الحوش ضمان خفيف اساسا مضموم وبعدها ماما دارت الرز الابيض هي وخالتي للعشي واحني درنا امبطن وتساعدنا فيها ودرنا شرائح دجاج مع الساعه 5 كلنا مكملين كل شي اني : اني بنمشي ندوش ونبدا نوتي روحي ، وركبت خالتي : بري ربي يعاونك وانتي يانادية حتى انتي بري ابدي وتي روحك واهو اني والبنات نكملو المطبخ ماما : لالا خليني نكمل معاكم خالتي : والله تمشي بري وتي روحك هداكا هو دوشت وبعدها سارة استشورتلي شعري ولبست قفطان ابيض للركبة ودرت لقطة بسيطة لشعري ووتيت روحي ومع الساعه سبعه جوو واني متوترة شوية كانت خالته وامه ومنى اخته طلعت نورس فرقت عليهم العصير وبعدها خشيت اني سلمت عليهم وقعمزت مقابلتهم وقعدو يهدرزو وبعدها جبت القهوة فتحية : عارفه يانادية ان احني جايين نحددو موعد للبيان وفي نفس اليوم ولدي يبي الفاتحة ماما : كيف قصدك الفاتحة قبل العرس فتحية : ايه والله هكي ان شاء الله كان وافقتو الفاتحة العصر وبعد المغرب نجيبو التلبيسه ماما : والله مانعرف فاجئتوني بالموضوع ( عليك غبيه اني ياريتني قلتلها ) فتحية : والله عندك الحق حتى اني فاجئني لما قالي بس هو يبي البنت تكون حلاله ماما : اكيد من حقه وانتو امتى تبو البيان فتحيه : والله مادابينا مع الاسبوع الجاي ماما : والله يافتحيه اسبوع مايسدش نوتو فيه روحنا راهو بتشري قفطان وحوسه ومعاها فاتحة فتحيه : امتى يناسبكم انتو ماما : ع الاقل اسبوعين فتحيه : خلاص امالا الخميس الجاي لا الي بعدها هكي باهي ماما : علي بركة الله ان شاء الله خالتي : روروروروري ربي يتمم علي خير ان شاء الله اني متحشمة ومنزلة راسي لوطى وخلاص ،،،، فاتو اسبوعين وطول هالاسبوعين واني نجري ونطلع يااما اني وماما يااما مع هاجر يااما سارة ومرات بروحي تبهدلت هلبا بالطلوع بس وليد مساعدني هلبا في ايام نتلاقى معاها ونمشو للمحلات يختار معاي ومستحيل يخليني ندفع اساسا حتى القفطان من ذوقه هو والدبلة امشينا اخديناها مع بعض وكانو هالاسبوع رغم التعب الا انهم كانو احلى اسبوعين في حياتي فرحانه وايه بالنسبه لهاجر امشت عمتي طلبتها وامشينا معاها وردو بالموفقه مزال بيديرو فضانيه بعد بياني غدوة البيان واني حايسه ومتوترة قاعده حاطة قناع علي وجهي ونفكر كيف حيكون غدوة وهل نطلع حلوة او لا وكيف وليد حيكون وعقلي مشوش بكل رن فوني كانت هاجر : الو اني : الو اهلين هاجر : شن جوك اني : تمام اهو متوترة هلبا ومش عارفه حاسه روحي حايسه هاجر : علاش حايسه اهدي وماتوتريش روحك باذن الله كل شي يمشي علي خير اني : ان شاء الله ، تجيني اليوم هاجر : اصلا من غير ماتقولي جاياتك وبايته عندك وماشيه معاك غدوة للمزين اني : بالحق وووه جو مش عادي حتى سارة بتمشي معاي للمزين اصلا نبيكم جنبي ضروري وهدرزت مع هاجر وجو ساعه وجتني وجت خالتي وعمتي وعليا ونساوين اخوالي الحوش تعبى والمنظومة مفتوحة وجو حلو ،،،، نضت الساعه تمانيه ع صوت المنبه وتيت روحي ونوضت ساره وهاجر ونزلت القيت ماما في المطبخ : صباح الخير ماما : صباح النور هاك كولي سبع تمرات طلعتهملك توا كليت التمرات وطلعت كان ساره بترفعني مشيت للمزين وفي الطريق كلمني وليد قالي حتى هو بيمشي للحلاق وبيوتي روحه للفاتحه وكان فرحان بيطير ويقول واخيرا بتولي حلاالي ،،،،، الساعه 4 توا اني في الطريق مروحين من المزين وصلنا لباب الحوش وسارة شاده الكلاكس بيييب بييب بييب دخلت السيارة للجنان ونزلت من السيارة قمت الوشاح الي كنت منزلاته علي راسي اول من قابلتني ماما كانو عيونها معبيين دموع جيت نجري اضبطتها وقعدت نبكي دموع فرحة وحزن فرحتي كانت ناقصتها حاجة ناقصتها فرحة بابا الله يرحمه لو كان حي راهو توا فرحان هلبا كنت اغلى وحدة عنده اساسا كان مش حينقص شي وحيديرلي بيان كبير بس هكي ربي مقدر الحمد لله ع كل حال كل شي للبيان وتيناه بروحنا كنت طول الوقت نحس في شي ناقص وحاجة ناغزتني في قلبي الله يرحمك يابابا فكتني خالتي من ماما بالسيف : تي بطلي خربتي مكياااجك اني نحاول نمسح دموعي : حقا تخرب نورس طالعه تجري واول ماشافتني وقفتنا في مكانها كنت محولة الوشاح دايره تسريحة مرفوعه فوق وقفطان احمر طويل عيونها تعبو دموع : نسيبة طالعه تهبلي وجتني تجري اضبطتني الف مبروك يااوخيتي الف مبروك وجو نرجس ونوال اضبطتهم وتخنق فيا العبرة وشادة دموعي بالسيف خالتي : حولو من علي اختكم خلوها تخش هيا خشي خشي وروروروروري عمتي فادية تجي جهتي : روروروروري الف مبروك يابنيتي الف مبروك يابنت الغالي الف مبروك عليا : مبروك يانوسسه اني : الله يبارك فيك الفال ليك حبيبتي سارة : مدولي الدربوكة وقعدت تدربك ويغنو وقلبوها اني مقعمزة نتفرج عليهم وفرحانه مش قادرة نوصف شعوري وفرحه ماما كانت بالدنيا كلها شوي وشرين تليفون ماما : الو ايمن شن صار ايمن : انقرت الفاتحه اعطيني نوسة نباركلها ماما : روروروروروروري خالتي وعمتي ونساوين خالي : روروروروروروري خديت الفون ورديت علي ايمن واني عيوني معبيات دموع ايمن : الف مبرووك ان شاء الله بالحياه السعيدة اني نمسح دمعتي : الله يبارك فيك الفال ليك يارب ايمن : يااااااارب كثري منها الدعوه هادي اني : هههههه وشوي ورن عليا وليد : الو وليد : الف مبرووووووك يااامراتي ياااحلالي انتي يااااحب حياتي وعمري وقلبي وكل شي اني : ههههه الف مبروك علينا حبيبي وليد : واخيراااااا تعرفي لما كملو قريب نضت عيطتلهم في الصالة وقلتلهم واخيرررررا حبيبتي ولت مرتي اني : هههههه مجنون كنت طايرة من الفرحة ومش قادرة نوصف الشعور جي المغرب وشوي نسمعو صوت كلاكسات كنت فوق اني نتفرج من الروشن وبدو ينزلو ونزلو سوابيتهم والحوش انقلب صغاريت وفتحو المنظمومه بعدها بنص ساعه قالتلي ماما انزلي فتحو المنظمومه علي اسماء الله الحسنى ودرجوني عليها خشيت سلمت علي عيلته كلهم وبعدها قعمزت وقعدو يدربكو ويغنو وكان جو خيال تعشو بعدها لبست قفطان الي جايوه هما كان لونه فوشيا منفوخ طلع عليا يهبلل ووليت طررف هاجر : طالعه طررف تهبلي نزلت وشوي وقالو عريسي بيخش وقفت واني طلبت يفتحو اغنيه يادبلة الخطوبة وخش وليد يا دبلة الخطوبه عقبالناكلنا ونبني طوبه طوبه في عش حبنا نتهنى بالخطوبه ونقول من قلبنا يادبلة الخطوبه وووووو.......