الفصل 1
المقدمة
نسيبة : صباح الخير ماما
نادية : صباح النور تبي تفطري
نسيبة : لالا تو ناخد شكلاته ناكلها حتى في السيارة هي سلام
طلعت ركبت سيارة واني حاسة اني اليووم جووي مش مليح بكل فتحت قرأن وتوكلت علي الله لفيت بالسيارة واخديت طريقي للجامعه
( خلووني نعرفكم باابطال قصتنا نسيبة : مواليد 93 تقرا تانيه جامعه تخصص قانون طويلة وبيضا شعرها طويل وكيرلي عيونه كبار لونهم عسلي جذابات وجميلة
الام : ناديه مواليد 73
الاب : متوفي
عندها تلاته اخوات وماعندهاش خوت
نورس مواليد 96 تقرا تالته تانوي عيونها خضر وشعرها نعم وقصير يقولولها انها مغرورة بس هي هادية وماتتكلمش هلبا وماتحبش تحكي مع الي ماتعرفهمش
نوال ونرجس توأم مواليد 99 يقرو اولى ثانوي مع بعض توأم مختلف نوال جوها مليح وطايشة شوي ماتحبش لنكد اما نرجس هادية هلبا ورقيقه وحساسه ونكدية زي ماامسميتها نوال )
احبهم لييش خلووني .. فوني رن رديت على طول
هاجر : الو صباحوو نوسه
اني : صباح النور اهلين هجورة
هاجر : نوسة طلعتي انتي من الحوش
...: ايه كيف طلعت
..: تقدري تخطمي عليا بابا امشي للخدمه ومحمد ماباش ينوضلي
اني : خلاص هي وتي روحك بسرعه تو نمر عليك رااهو تاخر الوقت
هاجر : تمام اني واتيه رنيلي لما توصلي
..: سلام
(هاجر صديقه نسيبة المقرربة هلبا من ايام الثانوي مع بعض مواليد 93 نفس تخصص نسيبة جميلة بيضا نقشها ع الاسود كانت تحب شخص اسمه موسى حنعرفو قصته بعدين
امها اسمها نعيمة طيبة علي حالها الاب جمعه عندها اخ واحد اسمه محمد هدا مهبل بنات الجامعه مواليد 88 معيد في الجامعه معروف باانه يشبه كرستيانوو
واخت اسمها ريما متزوجه من شهريين بس )
مريت علي هاجر ورنيتلها ركبت وامشينا للجامعه درست في الباركي ونزلنا خشينا لاول محاضرة وبعدها طلعنا
مشينا للكافتيريا
هاجر : تبي نجيبلك حاجه
اني : لالا ماعنديش نيه في شي
هاجر : نوسة خيرك في حاجه صايرة حاسه جوك مش تمام اليوم
اني : عادي اصلا مافي شي يخلي جوي حلوو
هاجر قعمزت وشافتلي بنظرة حنونة : حبيبتي خيرك احكي
اني : استاحشت وليد استاحشته ياااهاجر سنه وشهرين اليوم سكر سنه وشهرين وااني مانعرفش هل هو حي علي الاقل سنه وشهرين نعرف ان فيهم بابا متوفي بس حبيبي نعرفش عليه شي ضمييري كل يأنب فيا هوو امشي وهو زعلان مني ياريت يولي الوقت بس نتاسف منه والله مانتعارك معاه نسمعله ونهدي عصيبته والله مانرد عليه بكلمة تزعله والله .. ونزلوو دمووعي عطتني هاجر منديل وطبطبت عليى ظهري هي حاايرة تواسيني
مسحت دموعي : هاجر خليناا انوضو نبي نتمشى
هاجر : اوك هي
ااه تنهدت تنهيده طوويلة كااني نحاول نطلع الهموم والالم االي نحس بيه الالم الي ناغصني في قلبي ياربي علاش هكي اني مش معترضه علي حكم الله بس ليش هكي يصير فيا اغلى اتنين في يوم واحد اختفوو من حيااتي في يووم واحد الاتنين فقدتهم طحت انكسرت كسره وحده
2 /12 الساعه 5 العشية قبل سنه وشهرين بالضبط
وليد : نسيبة معاش تعلي صووتك علياا تكلمي بالشوية
اني : انت عادي تعلي صووتك وتكشخ عليا مع اني مش غالطة في شي
وليد : لاوالله مش مش غالطة تطلعي من غير ماتقوولي وبرووحك مش معتبرتيني بكل حتى لو امك هي الي بعتاتك علي الاقل حسي بان في راجل خايف عليك رااجل تهميه ويغار ويبي يحس انه حبيبته دايرتله حسااب ويااريت وقفت علي انك طلعتي وماقلتيليش فووقها كدبتي ليين انطلس منك الكلام طلس
اني : ممكن تنزل صوتك ومعاش تكشخ علياا اني امي بعتتني وبعدين انت مش قاري عليا الفاتحه بيش تحكم فيا
وليد : اني ماقلتش نحكم فيك بس ماتكذبيش عليا قوولي الصدق بس من دامك هكي انتي ماتبيش تعترفي حتى بغلطتك هي سلام معررفه خير اعتبري روحك ماعرفتينيش بكل انسي واحد اسمه وليد هي سلام
اني : وليد استن..... طووط طووط
سكر عليا الصبرر ياربي
( وليد : مواليد 84 يشتغل اعمال حرة وسيم طويل وعريض عصبي شوي بس حنون وخاصه مع نسيبة تعرفو علي بعض في النت استمرت علاقتهم لحد اليووم المشؤوم "2 /12 "
(حتعرفوو شن صار في هاليووم في باقي القصه )
امم وليد اسمها فتحية وااعره شوي وحاازمه بس طيبة وماتحبش الغلط
الاب اسمه مختار كان واعر هلبا بس توا مريض عنده فشل كلوي والقلب وديما راقد ويحب وليد هلبا هدا اغلى واحد في اولاده
عنده زوز خوت اولاد وزوز اخوات
عبد القادر مواليد 82 خاطب بنت عمه شكله عادي جدا طيب وهادي ويحب القرائة دكتور اسنان
محمود 89 عازب عايش حياته عرض طوول جنتل ماان بمعنى الكلمة جوه مليح ووسيم بس عصبي هلبا
منى : مواليد 88 متزوجه عندها ولد اسمه وليد طيبه هلبا
رحمة : مواليد 93 تقرا قانون في نفس جامعه نسيبة وااعره هلبا ومسمومة انانيه تغاار هلبا بيضا وعيونها ملونات وشعرها اصفر )
البارت الأول
كمل يومي في الجامعه عادي هاجر جاها بوها روح بيها واني ركبت سيارتي وروحت خشت لحوازتنا درست ونزلت توجهت لحوش حنينه الي هي ساكنه جنب حوشنا في حوش صغير حنينه كانت بصحتها مش كبيرة هلبا بس وفاة بابا اثرت فيها هلبا ومعاش تقدر تمشي الا خطوات بسيطة عمي دارلها شغالة تخدم فيها وتساعد فيها .. طق طق طق
اني : السلام عليكم
سونيا : عليكم سلام
..: حنينه فايقه ؟ قلتها واني نخش
سونيا : ايه ماما معاها استاذ ايمن
( ايمن ولد عمتي فاديه طيب وحنون هلبا بس لما يتعفلق اهربي جنتل علي قولة نرجس وطرف علي قولة نوال بس اني نشوف فيه عادي مواليد 85 محامي عيبه انه سمين وقصير شوية يعني اطول مني بشوية بس
الام فادية واعرة شوية وحازمة بس طيبة
الاب متوفي
عنده تلاته خوت واخت
أحمد 79 متزوج بنت عمي سميه
أنور 81 متزوج وحدة اسمها اية
عدنان 87 اعزب
عليا 92 تقرا طب بشري
طبعا مانشوفش فيهم اولاد عمتي الا في المناسبات معادا ايمن )
: السلام عليكم قلتها واني خاشة لدار احنينه سلمت عليها كيف حالك حنينه اليوم
حنينه فاطمة : ردت بصوتها المبحوح الحمدلله كيف حالك انتي وحال قرايتك
اني : الحمد لله كويسة
التفتت لأيمن وسلمت قلتله كيف حالك
أيمن : الحمد لله تمام كيف حالك انتي وشن جو الجامعه
.. الحمد لله ماشية وين مغيب ليك فترة ماتبانش
ايمن : اهوو والله حال الدنيا وخدمة
وقعمزت جنب حنينه
حنينه : وين امك اليوم ماريتهاش
استغربت ماما ديما تجيها الصبح : والله مانعرف اني جيتك على طول
حنينه : ترا بري شوفيها سلم بنيتي مش من عادتها
اني : هي تو نمشي نشوفها نستاذن توا سلام
فتحت باب حوشنا خشيت للمطبخ القيت نوال دايرة سندوتش تن : السلام عليكم
نوال : وعليكم السلام خيرك عطلتي
اني : تعرفيني ديما الاثنين محاضراتي متاخرة وين ماما ؟
نوال : مااما قالت ظهرها طاحت في الدروج ومش قادرة تتحرك اهو تشوفي فيا ناكل في سندوتش يعني ماقدرتش تدير غدي
طلعت ركبت لماما طوول طقطقت علي دارها وجاني صوتها قالت خشي
اني : ماما خيرك لاباس شن صاير وكيف طحتي
ماما : طحت واني انشف في الدروج ظهري مش قادره نحركه وقادره لانقعمز ولانوقف
اني : هي امالا خلي نرفعك للمستشفى مرات صارتلك حاجه
ماما : لالا تو نرقد نرتاح تعرفيني سريب المستشفيات مانحباشي
اني : لا والله الما تمشي ماني مخلياتك هكي
نرجس وهي خاشه : ايه ماما لازم تعايني تديري كشف هي خلي نطلعلك عباية نلبسك
اني : نحط شنطة شيتاتي ونطلع فلوس ونجي ونرجس خلي نوال توتي روحها بيش تمشي معااي تساعدني
نرجس : حتى اني نبي نمشي مش حنخلي ماما
اني : اوكي
ماما : غير كبرتوها ربي يهديكم
نرجس : لاكبرناها لاشي هي نلبسك ماما
قلت لنوال تمشي معاي وحتى نورس قالت بنمشي البسنا كلنا وسايسنا ماما بالشوية نزلناها من الدروج ركبناها للسيارة واني راكبة تدكرت حنينه قلت لماما : احنينه امبكري سالتني عليك خلي نمشيلها انطمنها قبل استنوني
نزلت خشيت قلت لحنينه وطمنتها
ايمن : خليني نرفعها اني
اني : ماما طلعتها في سيارتي هي توا هي حنينه توا مع السلامه تو نتصل بيك نطمنك
حنينه : في حفظ الله يابنيتي
ايمن طلع وراي طبعا وقال اني نمشي وراك وسوقي بالشوية وردي بالك
اني : ان شاء الله
نوال : والله صقع بكل الولد هذا خايف عليك
اني : ريحيني من فلسفاتك انتي رااهو زي خووي ايمن
نوال : بس هو عشقان وبيحب هههه
اني : يعطك حبه في نص لسانك
نرجس : والله جنتل الراجل ويهبل خييرك عليه ومحامي وشكله رومانسي
اني : اني ماقلت شي لكن هو زي خوي
ماما : بنات اخر زمان باه ديرو روحكم حتى متحشمين شوية قدام امكم
حسيت ماما تغيرو ملامح وجهها
نوال :هههههه وسعي بالك ياست الحبايب تو بالله من رايك انتي ياامي الولد مش يهبل وواضح انه يحب نسيبة
اني : بتسكتي انتي وياها وبتغيري السيرة والا انزلكم في السريع توو تكملو باقي الطريق علي رجليكم
نوال : خلاص سكتنا الا السبيدروو جديد بيتخررب في المشية علي الرجلين
وصلنا للمستشفى درست ودرس جنبي ايمن طبعا سيارتي جنب سيارته كركووبه اصلا عادي هههههه
خششنا ماما للاسعاف طبعا طلب عليها صورة وقعدنا نديروو في اجرائاتها والحق ايمن تعب معاها بس عادي خليه يضعف اصلا كرشته لركبته طبعا الدكتور قال لماما انها لازم ترتاح وتو بتدير جلسات علاج طبيعي واعطاها مجموعه مساجات تدهن بيهم خديناهم وطلعنا
اني : شكرا ايمن تعبناك
ايمن : لاعادي مافيش تعب ولاشي ديري بالك ع روحك ياامرت خالي وان شاء الله لاباس
ماما : سلمك ياوليدي بارك الله فيك في حفظ الله سلم علي امك
ايمن : يوصلل سوقي بالشوية يانسيبة وردي بالك من الطريق
اني : ان شاء الله سلام
نوال : ياروووحي وقعدت تقلد في صوت ايمن " سوقي بالشوية وردي بالك من الطريق "
اني كان جنبي باكو كلينيكس حذفته عليها وقلتلها انتي بجد ناوية تروحي علي رجليك
نوال : تو نمشي لايمن يروح بيا مايقولش لا
اني : واني نقوله خليها تروح علي رجليها وحيسمع كلامي
ماما : والله هو الا لاقيينه ماشاء الله عليه ومسكين ديما متعبينه
نوال : كل التعب يهوون علشان نوسة حبيبة القلب
اني : فنصت فيها في المرايه افتحي الباب وانزلي
نوال : لالا ابداا اصلا هوو دراه كبد راجل اختي قصدي لالا ايمن
نرجس ونورس هههههههه
اني : هيا هيا انزلي وانتي طول الطريق ترغي
نوال : ماشي ووخرت شوية وقالت ايمن باعلى صوت هههههاها
اني : والله الما نوريك
هربت تجري فتحت الحوش وخشت مالحقتش عليها
ماما : نبي نخش عند حناكم ماشفتهاش اليوم بعدين نروح
اني ونرجس ونورس : باه براحتك
خششناها تمددت ونورس دارتلها حاجه تاكلها هي وحنينه وقعدت معاهم واحني روحنا
احبهم ليش خلوني .. اني : الو هجورة
هاجر : اهلين كيف حالك توا
اني : الحمد لله وانتي
هاجر : تمام الحمد لله شن تدييري
اني : والله كيف خشيت للحوش واحكيتلها شن صار لماما
هاجر :سلامتهاا ماتشوفش شر
اني : سلمك تعرفي تاعبانه احسن شي ان غدوة مافيش محاضرات يعني بنرقد من توا لغدوة
هاجر : هيييي من توا الساعه 7 لغدوة امالا بكل نهارك حرش
اني : عادي هي توا طيري اني جعانه بناكل حاجه وبنخش نرقد سلام
هاجر : ماشي سلام ياخميرة النوم
سكرت نزلت درت اتنين توست وقعمزت اكليتهم وركبت لبست بيجامه نوم
واتكيت علي سريري اول ماحطيت راسي قمت يدي اليسار وقعدت نشوف للخاتم نزلت دمعتي وقلت وينك ياوليد استاحشتك وين امشيت بس قوولي انت حي والا .... ماقدرتش نقولها ياربي يكون حي حتى بعد عشر سنين نعرف خبر عليه بس طمني عليك ياحبيبي وقعدت نبكي لين دخت ورقدت وحلمت بكاابوس اعوذ بالله نضت مفزووعه تعوذت من الشيطان صحصحت شوية ونضت فتحت الدار كان الحوش هدوء قمت راسي شفت للساعه القيتها الساعه 2 طلعت امشيت للمطبخ شربت ميه وبعدها امشيت توضيت وصليت العشي فاتني واني راقده حسيت روحي جعانه درت سندوتش تن وشاهي وقعمزت ناكل شوي وخشت نوال شكلها نايضه من النوم جعانه حتى هي : شن نوضك
نوال : بطني زقزقت واني راقدة فيقتني
اني : هههههه انتي بطنك ديما خالعاتك
نوال : انتي غير كان بلعتي الي في فمك وانتي تتكلمي وتمضغي وتقولي اني بطني خالعتني شووفي انتي من الجوع مقعمزة فوق الطاولة
اني : ههههه باه اسكتي هي خليني بناكل
دارت نوال توست وجت ركبت حتى هي فوق الطاولة وقعدنا نهدرزو وناكلو بعدها نوال قالتلي : مافيش اخبار علي وليد الي كنتي تكلمي فيه
العبرة خنقتني وحاجت غصت في قلبي معاش قدرت نتكلم هزيت براسي بمعنى لا وحطيت السندوتش خلاص معاش قدرت ناكل ودموعي بدوو ينزلو
نوال : اسفه نوسه مش قصدي ندكرك بمواجع
اني : اني مانسيتاشي اصلا يانوال استاحشته وقت يقولي ياامشفشفه استاحشت كلمة نحبك منه تنهدت وكملت اني انكسرت مرتين وفي نفس اليوم في نفس اليوم الدنيا خدت مني اغلى اتنين اني انكسرت وانهديت هدة وحدة تعرفي توا جاني كابووس يانوال خلاني انوض مفزوعه
نوال : شن هو
اني : بلعت ريقه وتكلمت بصووت ضعيف مخنوق من بين دموع صوت مقهوور وخاايف من الدنيا خايف تغدره وتاخد منه اكثر حلمت انه بابا كان شاد بيد وليد ويمشي هو وياه واني نجري وراهم ومالحقتهمش وبعدها بابا سلم علي وليد وامشي اختفي واني وليد يشوفلي وكله دم منظره كان يخووف قعدت نعيط وانادي فيها بس هو ماجانيش هو قعد واقف يشوفلي وخلاص
نوال قعدت تبكي وتاثرت بكلامي : خلاص نوسه حبيبتي بالله عليك ماتديريش في روحك هكي باه ماحاولتيش انك تفتحي نت افتحي ايميلك يانسيبة ودوري اصحابه دوري في صفحاتهم بالك تحصلي شي او خبر عليه
اني : اني حالفه من يوم وفاة بابا الايميل معاش حنفتحه لان بابا كان مايندريش عليه وكنت نتكلم مع وليد بالوي شات ومعاش قدرت نفتحه من بعد هداكا اليوم ماعنديش القووة نفتحه ومانلقى منه شي وقتها كلامكم بيطلع صح بيطلع ان بابا خداه معاه بيطلع خلاص معاش نقدر نرجعله اني عندي نسمع خبر عليه انه تزوج ولايموتت اني نبيه اني نحبه خلاص معاش قادرة نتحمل استاحشته استاحشته ياانوال استاحشته
قعدت نشهق ونبكي ونوال تحاول تهديني اعطتني شربت ميه هديت شووية
نوال : نسيبة انتي ماحاولتيش تتصلي برقم تليفونه
اني : نتصل بيه ليا سنه كل يوم بس مقفل يأست ليا تلات ايام قلت معاش بنتصل
نوال : باه جربي اتصلي توا بيش يتطمن قلبك بس ويصدق
اني : ااه ياربي اهو تو نتصل 091******* شفت لنوال نظرة خوف طمنتني هي بنظره حنونه
طووط يناادي اني قلبي وقف خلاص ترشقي فيا موس ماتطلعش ولاقطرة دم طووط نادى تاني نشوف لنوال واني مرعووبة وقلبي بين رجليا : ينادي يانوال ينادي
طووط : الوو
اني......................
طووط : ألوو
اني : قلبي حسيته يدق بقوة لدرجه الي جنبي يسمعه لساني ارتبط رجليا يرعشو معاش عرفت خلاص شن ندير هاتف وليد يرن وفي راجل رد عليا ياربي قداش استاحشت صووته بس معاش قدرت نتكلم خلاص لساني حسسيته معقود كل عرووق جسمي يبست بس لحظه لحظه " هذا مش صوت وليد " مش صوت حبيبي صوت حبيبي اني نميزه من بين مليون شخص اربع سنين واني نسمع في صوته من لما انوض لين قبل مانرقد وليد مايقولش الو يقول ايووه هذا منو الي رد هدا مش حبيبي ..
:الوو منوو معاي .
مش صوت حبيبي ايه لا هدا مش صوت وليد هداا مش وليد اني نبي حبيبي وينه نبي صوت حبيبي
: الووو بترد والا نسكر
اني بلعت ريقي وحاسه لساني مربووط مش قادره نحركه باه يمك يكون حد من اصحابه يمكن حد يعرفه يااربي
: الوووووووووووو
اني : أأأأأ هدا تليفون وليد مختار
هو : لااا ومعاش تتصلي وليد مات طووط طووط
اني قعدت ترن في ودني كلمة وليد مات مات مات مات لااااااااااااااااااا صووت عيط بداخلي ودموعي نزلو كيف المطر قعدت تهدي فيا نوال وهي حايرة شن صارلي : نسيبة نوسة خيررك شن في شن قالك
مارديتش نزلت من فوق الطاولة شديت مالقي ميه وطاسة وطلعت من المطبخ بدوون ماننطق ولاكلمة واني مدوومة وكلمة وليد مات مات مات تررن في ودني وكاانه تضرب فيا في كفوف حبيبي رااح حبيبي امشي مع بابا ليش يادنيا تديري فيا هكي لحقتني نوال وهي تسال فيا شن صار : نوسة اوقفي استني احكيللي شن صار نوسة انتي كويسة
لاياختي اني مش كويسة مش كويسة حبيبي مات وانتي قاعده تسالي فيا كويسة او لا
نوال : نوسة ردي عليا خيرك تشوفيلي هكي
هزيت راسي بمعنى ايه مافهمتش درتها هكي وخلاص بيش تسيبني امشت نوال للمطبخ وهي شكلها رجعت لهاتفي كانت حاايرة شنو الي صارلي
ركبت للدروج ونمشي بخطوات ثقيلة وقلب ماينبضش لانه حبيبه امشي خلاص لايانسيبة لا وليد ماماتش هوو اول ماحبيته قالي اني مستحيل نسيبك ليش سيبني توا هوو مستحيل يمشي ويخليني بعدهاا معاااش نندري علي شي
فتحت عيوني واني حاسة بألم في جسمي وراسي يوجع ماعرفتش شن صار
لفيت بعيووني للي جنبي سقف ابيض دار بيضا قمت عيوني يميني شفت كيس تغدئة اني في المستشفى ليش شن صار بعدها رنت في ودني وليد مات مات مات لاااااااااااااااااااااااا اااااااااا عيطت بصوت عالي قعدت نبكي ونشهق بصوت عالي خشت نرجس ونورس ونوال ومعاهم ايمن خشو يجرووو
نوال : نوسة حبيبتي اهدي بالله عليك خلاص واضبطتني
اني : حسي بوجع في يدي وكتفي وقت اضبطتني قلت ااايي بالم
نوال : اسفه نوسة خلاص امتدي ارتاحي ماتعبيش روحك ومدتني بالشوية ع السرير واني حاسه اني قاعده في حالة صدمة سكتت وهديت شوي بس قلبي من دااخل ناار راكبه فيه حااسه اني جثة هادية من الخارج بس جثة بلا روح رووحي عطيتهاله وخداها معاه قلبي عنده وقف لما وقفت نبضاات قلبه ياربي نطلع نحلم يااربي ماماتش
ايمن فيقني من سرحتي وقال : الحمد لله ع سلامتك نوسة خوفتينا عليك ماتشوفي شر
نرجس : الحمد لله ع سلامتك حبيبتي
نورس: الحمد لله ع سلامتك ياوخيتي
باه اني شن صارلي ليش يتحمدو علي سلامتي اصلا اني ليش في المستشفى : شن صارلي ليش اني في المستشفى ورجلي مجبسة وحااسة بالم في جسمي وراسي وحاسه راسي دايخ كاانه مخدر
نرجس : انتي طحتي في الدروج وكاان في يدك المالقي مرش ف .. سكتت
ايمن : انتي ارتاحي توااا وماتفكري في شي الدكتور قال لازم ترتاحي واني توا بنمشي اناديه يشوفك مااتعبوهاش ياابنات وطلع اايمن
اني : كملي يانرجس شن صارلي
نوال : ارتاحي توا وخلي الدكتور يجي يشوفك قبل وهو حيشرحلك شن حالتك
الدكتور : السلام عليكم
كلنا : وعليكم السلام
الدكتور : الحمد لله ع سلامتك ياانسة نسيبة طهورا ان شاء الله
اني : الله يسلمك شكرا يادكتور بس اني ماعرفتش شن صارلي وليش رجلي مجبسة وشن صارلي لما طحت من الدروج
الدكتور : مستر قيسلها الضغط والله ياانسة نسيبة انتي عندك كسرين في رجلك الباين انها انخبطت في حديد لو الدروج فيه حديد تبي مدة تلات شهور ع الاقل بعدها نديرو صورة تاني ونشوفو لو نحولوه وبالنسبة ليدك لفيناها لانه فيها شوية رضوض مااتخوفش وكتفك خشت فيها مرشة وكانت كبيرة قالو اخواتك انه كنتي شادة طاسه ومالقي
اني : ايه صح
الدكتور : خيطناها 7 بونتو ماتخافيش ان شاء الله كل شي يلتأم وراسك جيتي في حاشية الدروج فممكن كانت ضربة قوية لهذا يوجع فيك
اني نسمعله ومصدومة هذا كله صاارلي : باه يادكتور اني مش متذكرة كيف طحت ولا نتذكر اني حسيت بالم قصدي هدا بسبب ضربة راسي خلتني ننسى ؟
الدكنور : لااانتي صارلك انهيار عصبي وانتي في الدروج فغبتي ع الوعي لهذا انتي مش متذكرة
اني مصدومة انهيار عصبي
الدكتور : للاسف انتي صغيرة ومااتحملتيش الانهيار الي صارلك وشكلك صارلتك صدمة خلاتك تنهاري لاازم تتريحي نفسيا توا بيش صحة جسمك تتحسن
" اكبر صدمة ياادكتوور اااه ياربي "
دمووعي نزلووو معاش قدرت نوقفهم
الدكتور : خلاص ياانسة نسيبة معاش تفكري في شي ولااتعبي روحك اني توا نخليك ترتاحي وانتو ياابنات خلوها ترتاح ومااتعبوهاش بكثرة الحكي وتو الستسر تجيبلك اكل لازم تاكلي ضغطك نازل
هزيت رااسي لاني مش قادرة نحكي شي طلع الدكتور وخواتي وايمن طلعو وسكرو الباب
ااه ياربي ياربي خليني نلحق حبيبي وبابا ياربي اغلى اثنين اخدتهم الدنياا مني ياربي ليش الدنيا هكي ناويتني
" ياحبيبي كيف اعيش بعدك وكيف اتنفس من اكسجين الدنيا وانت غائب عنها كيف ينبض قلبي وحبك قد اخدته الدنياا لااا لن يتحول حبك من قلبي مهما طال الزمن والدهر ساابقى وفيه لك ياحبيبي ساابقى احبك الى اخر نبضة في داخلي الى اخر قطرة دم في عروقي "
قعدت نبكي ونشهق بصوووت عالي وكلمة وليد مات مات قاعده ترن في ودني عقلي يسمع فيها بس قلبي يبيش يسمع يبيش يسمع انه حبيبه مات قلبي يبيش يصدق
ياربي اني كيف وقفت علي رجليا من وفاة بابا كيف بديت نحاول نعيش كان عندي امل ان حبيبي حي انه حبيبي حيرجعلي بس الاتنين خدتهم الدنياا الاتنين اخر مرة نسمع اصواتهم كانوو في نفس اليوم
اني ضعيفه اني نقدرش نتحمل اني قلبي ضعيف " قلبي ضعيف " نفس الكلمة الي كان يقولي فيها وليد الله ي..... مش قادرة نقولها مش مصدقة اني مش قادره نصدق ياااربي
2/12 الساعه 6
اني : ماما كلمتي بابا وينه لتوا
ماما : والله مانعرف يابنتي هو من الساعه 2 تقريبا معاش اتصل قالي مسافه ساعه لكن اهو ليه قريب 4 ساعات ماجاش ترا اتصلي بيه
اني : رصيدي كمل امبكري لما كلمته اول ماوصل للمطار
ماما : هاك اتصلي من تليفوني
اني : هاتي ...... طووط طوووط طووط
: الوو
ااني : الوو بابا وينك لتوا انشغلنا عليك هي نرااجوو فيك من بكري
هو : نسيبة اني ايمن
اني : كيف حالك ايمن بس وين بابا
ايمن : رشف خشمه وهو يحاول يتكلم بصوت عادي هوو عندنا ماتنشغلوش عليه
اني : ايمن بابا فيه حاجة اني قلبي مش مرتاح
ايمن : نسيبة اني شوية ونوصل لحوشكم اطلعيلي انتي بنكلمك وماتقولي لحد ان اني جاي
اني : ان شاء الله خير اوك نراجي فيك سلام سكرت واني خايف ومشغولة
ماما : شن رد عليك
ياربي تو شن بنقوللها
اني : ايه وقال مش معطل غير صارلي ظرف
رن فوني امشيت نجري القيته ايمن
الوو ايمن جيت
ايمن : بصووت مخنوق ويرجف ايه اطلعي تعالي قدام حوش حنينه
اني : واني خايفه قلتله اوكي سكرت البست عبايه ووشاح فوق البيجامه وطلعت بسرعه وتاكدت انه ماحد شافني
: ايمن شن في بابا وينه وشن صاير
ايمن : كيف حالك يانسيبة
اني : ايمن ماتلعبش بااعصابي بابا وين احكي بالله عليك
ايمن :قعممزي احني اشر علي كرسي وهو قعمزي قدامي وقعد يشوفلي واني نشوف في الدمعه في عينه
اني : ايمن احكي بالله عليك بالله عليك بابا وين
ايمن : اني نعرف ان بوك غالي عندك هلبا ونعرفك انك اغلى وحدة في بناته
اني مستغربة ليش يقول هكي : ايمن تقعدش تلف بالكلام قولي بابا وينه وشن صايرله
ايمن : باه اهدي انتي مؤمنة بالله ونعرف ان خالي مربيك علي ايمان وكان مؤمن بالله انتي مؤمنة بقضاء الله والا ؟
اني : انت خيرك اليوم تفترش في الدوة وتدخل في الكلام ببعضه شن قصدك يعني بابا صايرتله حاجه
ايمن : باه اهدي
اني : اني هادية شن تشوف فيا نريش في شعري توا ( قلتها واني يديا يرعشوو وصوتي يرجف وخاايفه وقلبي ينغص )
ايمن : خالي .........