غالبا ما يكون الحب قدرا ولا خيارا - الفصل الحادي والثلاثون - بقلم جنى

الفصل الحادي والثلاثون

*– ࢪواية :«غالبا ما يكون الحب قدرا ولا خيارا».* *– الباࢪت:«31».* ‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ـــــــــــــــــــــــــــــــــــــــــــ` *____________* > *الروايه لاتلهيڪم عن الصلاھ اللهم بلغت اللهم فأشهد .* *____________* رواية غالباً ما يكون الحب قدراً لا خياراً الفصل الحادي والثلاثون يوم الاثنين في بيت ام بندر مازن كلم ابو محمد وقال له البنت تبي تشوفك قبل ماتروح لبيتك ورحّب بالفكرة وجا وجلس بالمجلس لطيفة كانت بالمطبخ مع خالتها و متوتره وشايلة هم ام بندر : يالله يمي خذي صينية القهوة وادخلي عنده لطيفة اللي كانت ترجف خوف : ماقدر مابي اشوفه خلاص ام بندر بحنان : ياقلبي والله يالطيفة لازم يمي تدخلين عنده وتشوفينه هذا ابوك مهما كان ضمت خالتها وخالتها بادلتها الحضن لطيفة : طيب بلبس عباتي ام بندر ضحكت : هذا ابوك وانا خالتك مايحتاج عباية لطيفة ضحكت على نفسها وهي بقمة التوتر : طيب ادعي لي تكفين ام بندر ضغطت على يدها : انا دايم ادعي لك وقلبي معك لطيفة وقفت قدام باب المجلس ودخلت وهي تجر خطواتها بخوف كانت منزله راسها بتوتر وخوف .. شافت بس رجله وهو جالس حاولت ترفع راسها بشويش لين قدرت تشوف وجهه وجهه اللي مليان هيبه ماختفت مع تقدم العمر .. وبنفس الوقت يرتاح له الشخص ماتدري كيف يوم شافها قام وقرب لها عشان يسلم عليها وهي ابعدت هي شوي ابو محمد استجاب لها وحس ان لازم لها وقت عشان تتعود وتتقبل هالفكرة رجع جلس مكانه : وش اخبارك لطيفة ؟ لطيفة هزت راسها بالايجاب بس كانت خايفة وساكتة ماقدرت تنطق بـ ولا حرف ابو محمد وهو يتأمل وجهها : شبه بنتي نورة والله مابعدتي عنهاا مازالت ساكته وتلف وجهها يمين ويسار عشان ماتجي عينها بعينه ابو محمد بضعف عمره ماحس فيه قبل هالمرة : تكلمي .. سولفي قولي اي شي تكفين خليني اسمع صوتك لطيفة تقشعرت شوي .. وبعد صمت طويل اخيرآ نطقت : ليه توك تتذكر ان لك بنت ؟؟ ابو محمد نزل راسه بحزن : ماكنت ادري والله ماكنت ادري لطيفة : مستحيل انك ماكنت تدري طبيعي ان امي تحمل !! ليه ماسألت مادورت ماسويت شي ابو محمد بصدق : دورت امك فترة طويلة و مالقيتها كأن الارض انشقت وبلعتها لطيفة : 30 سنة ما اعرف ان لي اب ليه جاي اللحين ؟ عندك عيالك كلهم كبار واحفادك كبار وش تبي فيني بعد هالوقت ؟ ليه راجع تغير حياتي ؟ ليه تبي تدخلني بعايلة ماعرف منها ولا احد ! ابو محمد كان منصدم من كلامها : انتي بنتي مستحيل اخليك حتى لو عمرك 60 ! يكفي انك من ريحة المرحومة امك الغالية اللي يعلم الله اني ماشفت منها الا كل خير لطيفة قلبها عورها من طاري امها ونزلت دموعها .. قام ابو محمد وجلس جنبها وابعدت هي شوي سحبها لحضنه واستجابت له بسرعة ماتدري ليه ! كانت تحس انها تحتاج هالشي ! حست بشعور غريب وجديد ... دفنت راسها بصدره اكثر وكملت صياح ابو محمد سند راسه على راسها وطاحت منه دمعة يتيمه لطيفة وهي تشهق : مابي اروح معك ابو محمد بحنان وهو يسمح على شعرها : ليه طيب ؟ لطيفة بخوف وهي مازالت تشهق : انا مرتاحة عند خالتي ومرتاحة بوظيفتي ومرتاحة بحياتي مابي شي جديد يغير حياتي ( وسكتت شوي ) واخاف عيالك مايتقبلوني ابو محمد : عيالي هم اخوانك لطيفة : انت ماتقبلت انك ابوي للان وشلون تبيني اتقبل ان عيالك اخواني ابو محمد عوره قلبه من الكلمة بس سكت يبيها تطلع كل اللي بخاطرها مع ان حتى هو ماله ذنب باللي صار لطيفة رفعت راسها من حضنه وهي تمسح دموعها : اسفه على كلامي ابو محمد : لا عادي طلعي كل اللي بخاطرك وانا ابوك لطيفة سكتت شوي وابوها يتأمل ملامحها و بعد ماستجمعت قواها : انا ما الومك على كل شي ابو محمد ساكت ينتظرها تكمل لطيفة : طول الاسبوع افكر .. انا ما الومك ولا الوم امي وهذا اللي يعور قلبي ان مافيه اي احد اقدر الومه ,, فيني خوف فيني رهبه من فكرة ان لي اب بعد هالعمر .. عشت طفولتي بصعوبة وكنت اشوف دمعة امي كل يوم كانت تخاف علي من كل شي حتى المدرسة بالحسره وافقت اني ادخلها بعد مااقنعتها خالتي ام بندر ... كنت وقتها الومك احس انت السبب لانك مو معها مع اني كنت اعرف انك متوفي بس ,, ( وسكتت ) ابو محمد : كملي كملي وانا ابوك لطيفة : ماتتخيل الصعوبة اللي مريت فيها بطفولتي ومراهقتي وحتى لما كبرت كنت امر احيانآ بظروف تخليني اداوم بس عشان ابكي بمكان امي ماتشوفني فيه ابو محمد عوره قلبه وكان يبي يتكلم بس حاول يسكت عشان تكمل كلامها لطيفة : كانو اغلب خالاتي يكرهون امي خالتي ام بندر هي الوحيدة اللي كانت تتقبلها كنت اسمع كلامهم لأمي ويعورني قلبي بس ماقدر اقول شي لان امي تقول لي لا تتدخلين خليهم يقولون اللي يبونه ,, كانت نظرة الاستنقاص تملى عيون اللي حولي من يوم اني طفلة كانت ثقتي بنفسي تقل كل فتره كبرت وانا اكره نفسي واكره شكلي واكره شخصيتي .. اشتغلت على نفسي لين طلعت بهالوظيفة وهالشكل اللي انت تشوفه قدامك .. ( وبصوت حاد ) يعني اتوقع وصلت لمرحلة ما احتاج فيها اب واخوان شافت ابو محمد منزل راسه وعورها قلبها بس حاولت تقوي نفسها هي من اللحظة اللي شافتها فيه حن قلبها ورق بس كانت تقول له كلام قاسي بس عشان تطلع شي بخاطرها من الطفولة ابو محمد بعد صمت : انا مريض قلب وابي اعيش اخر سنين عمري ان ربي عطاني عمر مع بنتي نزل وجلس عند رجلها وحط يده على يدها اللي كانت بحضنها : تكفين يابنتي لطيفة قلبها انكوووى من التصرف هذا قامت بسرعة ووقفته لطيفة : لاتقول لي تكفين ابو محمد : طلبتك يابنتي لطيفة داخلها مليون شعور بس اللي تعرفه انها مرتاحه له وتبيه بس الوقت اللي مر عليها كان عائق كانت عيونها تنطق بانها موافقه تروح معه ابو محمد حضنها .. و لطيفة رجعت تبكي ابو محمد : تعالي معي لبيتك ولاهلك ولأخوانك ولأختك لطيفة سحبت نفسها من حضنه : عندي اخت وحدة بس صح ؟ ابو محمد يجلس ويجلسها جنبه : ايه لطيفة : امم اكبر مني ولا اصغر ؟ ابو محمد ابتسم : لا اكبر منك واكبر عيالها تقريبا بعمرك شهقت لطيفة : يوه كنت احسبها صغيرة ابو محمد : لا انتي اصغرهم اللي فوقك ولدي خالد لطيفة : كم عمره ؟ ابو محمد : 36 لطيفة سكتت وكان ينتابها شعور غريب ,, انها قاعده تسأل عن ابسط الاشياء اللي اي اخ يعرفها عن اخوه ابو محمد حس ان وجهها تغير وحاول يرجع يلطف الجو : ترى ابوك شايب اكبر عياله وصل ل60 لطيفة ابتسمت : طيب عادي تكلمني عن عيال اخواني ؟ ابو محمد : .... الليل في بيت ابو تركي كان البيت فاضي مافيه الا رهف وافنان جايتها افنان : شكرآ رهف امي عتقتني من جمعة خالاتي عشان اجي اونسك رهف بتعب : ليتك ماجيتي تصدقين جد مالي خلق افنان شهقت : خالتي قالت لي ان نفسيتها تعبانه بس ماتوقعت لهالدرجة رهف تغطي وجهها : والله بس ابي انام افنان بجدية : رهف جد صاير شي ؟ رهف : لا ماصار شي بس نفسيتي تبن افنان : مستحيل تصير تبن بدون مايصير شي رهف : افنان ممكن اطلبك طلب ؟ افنان باهتمام : وشو ؟ رهف : لا تسأليني عن شي افنان تنهدت : اوكي بس بشرط رهف : وشو ؟ افنان : تنزلين معي لان طلال بالمجلس يقول ودي اشوفها رهف ماكان لها خلق على ولا شي ابد بس ماحبت تكسر بخاطر اخوها وبنت خالتها اللي بمثابه اختها افنان رهف ابتسمت : خلاص طيب انزلي وبتحمم واجيكم افنان : بتطولين ؟ رهف : لا عشر دقايق بس افنان : اوكي ياحلوة ننتظرك .. ... .. في بيت الجدة ابو محمد توه داخل الصالة وكانو عياله كلهم مجتمعين ابو سلمان اكثر واحد كان شايل هم وحاس ان بيصير مصيبة لان ابوه متصل عليه من الصبح وماقال له وش يبي بالضبط ومو عادة ابوه يطلبه بهالسرعة وبهالطريقة كانو كلهم جالسين عند امهم ويتقهوون ويسولفون وكانت ام محمد شاكة ان ابو محمد ماهو خالي من فترة بس كانت ساكتة ويوم قالو عيالها ان ابوهم جامعهم عرفت ان شكها في محله دخل ابو محمد كل عياله قامو يسلمون عليه كانو موجودين من اكبرهم الى اصغرهم جلس ابو محمد وبعد السواليف واخذ الاخبار ابو محمد : ادري ان كلكم متوترين وماتدرون وش صاير ولا ابي ابدا بمقدمات عشان مايطول الموضوع ابو سلمان : اسلم ابو محمد : انا عندي بنت كلهم اعتلت على وجيههم صدمة باستثناء خالد اللي كان داري اغلبهم التفتو لأمهم كانت ام محمد هادية فيها صدمة من داخل بس ماعلقت ولاتكلمت ساااكتة وكان ابو محمد ينتظر ردة فعلها هي اكثر من اي احد ثاني ام ماجد : يبه انت تتكلم من جدك ؟ ابو محمد : ايه الموضوع مايتحمل مزح ابو سلمان : طيب منهي ؟ متى تزوجت ؟ قريب ؟ ابو محمد : متزوج من سنيين شي قديم مرة ابو فيصل : ليه طيب ؟ ليه تونا ندري ؟ ابو محمد : سالفة طويلة وانتهت بوقتها طلقت المره وانا ماكملت معها حتى سنة وراحت بحال سبيلها وتوفت قبل شهرين وتوني ادري قبل اسبوع ان لي بنت منها ام ماجد : منهي ؟ وش اسمها ؟ وش اسم امها ؟ وينها كل هالسنين ؟ ابو محمد : بنتي اسمها لطيفة ورفع نظره لأم محمد اللي غمضت عيونها لما سمعت الاسم وقبل مايكمل خذت عصاتها وقامت لغرفتها ابو محمد حاول مايلتفت وكمل الموضوع لعياله اللي كل واحد منهم مصدوم باستثناء خالد ... ام ماجد كانت جنب خالد لفت عليه وبهدوء وبصوت واطي : كنت تدري ؟ خالد : ايه .. ابو محمد : البنت بجيبها للبيت خلال هالاسبوع وابيكم كلكم تكونون موجودين وقام من مكانه تاركهم بصدمتهم ابو عبدالله اللي توه يتكلم : متأكدين ابوي مو تعبان ؟ او يمكن يتخيل ؟ خالد : لا انا كنت حاضر الموقف وفعلآ ابوي عنده بنت واللي جا يعلمنا هو اخو زوج امها الثاني ابو فيصل : من متى تدري ؟ خالد : من يوم حصل الموقف كنت مع ابوي بالمجلس ابو سلمان : ليه ماتكلمت ؟ خالد : ابوي قال انا بكلمهم بالموضوع سكتو كلهم ومصدومين من هالبنت اللي مايعرفون عنها الا اسمها وعمرها كان الوضع عند ام محمد غير دخلت غرفتها وفرشت سجادتها وقعدت تصلي انفتح الباب وشمت ريحة دهن عود اللي دايم يحطه ابو محمد دخل وجلس على طرف السرير ينتظرها تخلص خلصت ام محمد صلاتها ومسكت سبحتها وجلست تستغفر لما خلصت لفت على ابو محمد ابو محمد : ادري ان شرهتك كبيرة ام محمد ساكته تنتظره يكمل كلامه ابو محمد : وادري ان المفروض انك تدرين قبل سنين عن هالموضوع ام محمد : منهي امها ؟ ابو محمد : سارة بنت عبدالله جيراننا الاولين وبعد صمت طويل من الجهتين : بخاطرك شي يالطيفة ؟ ام محمد : ايه .. بخاطري انك مستغفلني طول هالسنين وماقلت لي الموضوع ابو محمد : السالفة نسيتها مع مرور الايام وماكنت ادري انها حامل ام محمد : طيب ,, ( وناظرته بتساؤل ) البنت اسمها لطيفة ابو محمد ابتسم : ايه اسمها لطيفة .. كنت اقول لأمها عنك دايم و سمتها عليك عشانها تدري انك الغالية عندي ام محمد تنهدت بقوه وسكتت وحطت سبحتها وكبرت عشان تكمل صلاتها .. و ابو محمد قام وتركها - يوم الثلاثاء الظهر بالجامعة رهف تدخل للجامعة وتروح لاختبارها بسرعة بعدين تطلع ماتعطي فرصة لأحد انه يشوفها حتى وجدان اللي كانت معها بنفس القاعة مايمديها تشوفها زين كانت واقفة قدام البوابة وتتصل على السواق ومايرد عليها زفرت بعصبية و فجأه سمعت صوت احد وراها يكلمها وسوت نفسها ماتسمع وجدان جت قدامها : رهف ! اكلمك ليه ماتردين رهف بصدمه مصطنعه : اووه هلا وجدان ماسمعتك وجدان : شخبارك ؟؟ رهف : الحمدلله بخير والله انتي شخبارك ؟ وجدان تتفحص وجهها : متأكدة انك بخير ؟ وبعدين لي اسبوع ماشوفك تتصددين عني انا والبنات رهف بربكه : لاا ويين بس هالفتره نفسيتي تعبانه وجدان : مايحتاج ادري عن نفسيتك بس ليه كل هذا ؟ من بعد المزرعة مااتصلتي علي ولا تردين اذا اتصلت عليك او كلمتك واتس اب رهف رجع لها ذاك اليوم بتفاصيله وحطت يدها على فمها تمنع حومة الكبد .. وجدان : رهف وش فيك صاير شي ؟ رهف : وجدان اللحين مابي اتكلم وجد نفسيتي ماتتحمل اشوف اي احد حتى اهلي وجدان : شايفه مننا شي يضايقك ؟ رهف بسرعه : لا لا تطمني ماشفت منكم شي بس عشان الاختبارات وكذا وجدان كانت مستغربة من رهف مرره لأن اول مرة بحياتها تسوي كذا وعشان ايش عشان سبب عمرها مااهتمت فيه !!! ومااكان عندها تفسير منطقي لذلك اكتفت بالسكوت وقتها وصل سواقها و لفت على رهف : شكل محد راح يجيك تعالي اوصلك رهف : لا بيجي السواق اللحين وجدان : خير رهف لا تكلميني كأني اي وحدة ! رهف ابتسمت : لا والله بس جد السواق بالطريق لو اروح واخليه يمكن يذبحني وجدان : هههههههههههههههه خلاص اجل اللي يريحك وبعدين اذا اتصلت عليك تردين غصب عنك فاهمه ؟ رهف : اووكي عمتي وجدان ودعتها وراحت رهف ماكانت حاقده على احد منهم بس كانت تحس بشعور بشع بعد اللي صار رجع كلامه يرن في راسها شدت بقوه على يدها واسنانها بكل قوتها من القهر : الله يااخذك ياعبدالعزيز الله يااخذك هزت راسها كأنها تطرد الافكار من مخها وانقذها صوت جوالها ... .. ... الساعه 6 المغرب في بيت ام بندر لطيفة وخالتها جالسين بغرفتها كانت قاعدة ترتب اغراضها لأنها بكرة الاربعاء بتروح بيت ابوها لطيفة وهي ترتب تسولف : كلمني عنهم كلهم عن عيال اختي نورة ماجد وريوف وفيه وحدة اظن اسمها ريم مدري بس يقول هذي اصغرهم والباقي ( طقت راسها ) نسيت اسمائهم ياررربي ( وبحماس اكبر ) وقال لي عن خالد اخوي اكبر مني ب6 سنوات مابعد تزوج للحين وقال لي عن بنات اخواني وعيالهم وبنت اخوي الكبير مشاعل زواجها بولد اخوي فيصل بعد فتره ويقول لازم تحضرين ويشوفونك كلهم كانت خالتها مبتسمة وهي تشوف فرحتها اللي من زماااان ماشافتها على وجهها كانت تدري ان لطيفة من زمان تحتاج اهل وسند لطيفة تحرك يدها قدام وجه خالتها : خالتيي ليه تسلكين لي ام بندر : ماسلك لك والله هههههههههه بس اني مستانسه وانا اشوف فرحتك قامت لطيفة من مكانها وجت جنب خالتها ومسكت يدها : خالتي تتوقعين يحبوني ويتقبلوني ؟ ام بندر بحنان : و فيه احد يعرفك ومايحبك ؟ لطيفة ابتسمت بعذوبه : بس مو كل الناس خالتي مزنه ام بندر : لا بيحبونك وبيحطونك فوق روسهم مثل ماكان ابوك حاط امك فوق راسه وعمره ماقصر عليها بشي اكيد مربي عياله على الطيب لطيفة سرحت بأفكارها وهي متخوفه وبنفس الوقت متحمسة للقائها فيهم - يوم الاربعاء الساعة 11 في بيت ام بندر لطيفة تتقلب بسريرها مانامت من امس ابوها قال لها بجي اخذك من المدرسة الظهر وماقدرت تنام ولا قدرت تداوم فكرة توديها وفكرة تجيبها فيها حماس وفيها خوف واشياء كثير ماتقدر تفسرها ودها ان امها جنبها وتعلمها عن خوفها وعن كل شي وتعلمها كيف تتعامل معهم وتعلمها عن كل شي نزلت منها دمعة ومسحتها بسرعة وهي تحاول تقوي نفسها .. .. ... في الجامعة وجدان وريوف مخلصين اختبارهم من ساعة تقريبآ وجالسين بواحد من الكلاسات ريوف : انا مستغربه وشلووون طلعت لي خاله عقب هالعمر !! وجدان : حتى جدي نفسه مايدري ! يوم قال لنا ابوي جلست ربع ساعة استوعب الموضوع واحس نسيت كل المعلومات اللي ذاكرتها ريوف : انا امي علمتني الصبح وانا مدري اعلق ولا اسكت و ريما جالسة تصارخ مبسوطة ! وجدان : ههههههههههههههه اختك ذي مهما كبرت بتبقى بزر ريوف : تخيلي تقول لأمي والله مابي اداوم ابي اشوفها معكم وجدان : ههههههههههههه اخخخ ياللقافه ( وبجديه ) تتوقعين انها تكره جدي ؟ ريوف : لييه ! وجدان : مدري يعني 30 سنه ماسأل عنها ولا وصلها ! ريوف : مو توك تقولين حتى هو مايدري وجدان : مو شرط انها تصدق انه مادرى ريوف : اممم مادري بس تصد.. ( وقاطعهم صوت جوال وجدان ) وجدان وهي تشوف الشاشه : مشاعل هههههههههههههه شكله وصلها الخبر ردت وجدان مشاعل تقفل باب مكتبها وهي تلهث : وش ساالفة عمتنا ؟؟ وجدان : هههههههههههههههههه من اللي مروعك تكفين ؟ مشاعل : عزيز توه متصل علي يقول متى تجون تشوفون عمتكم وجدان : اووف والله من الجفاسه في ذا الولد مشاعل : المهم وشو والله مافهمت شي وكلمت امي وقالت ايه عندكم عمه جديده وسكرت بوجهي لان خالتي اتصلت عليها قلت بس مالي الا حبيبتي وجدان هي اللي بتعطيني العلم وجدان : مافيه سالفه والله بس فجأه طلع لنا عمه جديدة جدي كان متزوج وحدة واكتشف اللحين انها جايبه بنت اللي هي عمتنا مشاعل : طيب وشلون ومنهي اللي تزوجها وكيف ووشلون وعام كم وعمرها كم ووش اسمها وجدان : ماالوم امك يوم تقفل بوجهك والله مشاعل : ههههههههههههههههه لا جد والله مو قادره استوعب شي وجدان : والله مدري اللي اعرفه انها اصغر من عمي خالد واسمها لطيفة و بس مشاعل بحماس : ياعمرررري والله نفس اسم جدتي بعد وجدان : بتجون الرياض طيب ؟ مشاعل : ايييه طبعا وجدان : متى ؟ مشاعل : لو هيفوه ماعندها اختبار بكرة جينا اليوم وجدان : يووو مو وقت اختباراتها ذي مشاعل : من جدد وجدان رفعت جوالها : مشاعل حبيبتي هنوف تتصل علي بسكر واكلمك اذا رجعت البيت مشاعل : اوووكي وعلميني المستجدات لو سمحتي وجدان : هههههههههههههههه ابشري ردت وجدان على الهنوف اللي كانت تسألها عن مكانهم وبعد 5 دقايق دخلت عندهم الهنوف وحطت شنطتها بقوه : سمعتوووو وش صار ؟؟ ... .. ... في بيت الجدة كانو الاخوان مجتمعين كلهم ينتظرون اختهم وام محمد بصدر المجلس جالسة بشموخ واضح رغم كبر السن ,, اللكل يوضح انه عادي وكل شوي عيونهم تروح لأمهم ينتظرون ردة فعلها بس كالعادة كانت ملامحها جامده وقويه وماكأنه صاير شي .. بعد ربع ساعة بسيارة ابو محمد كانت جنبه لطيفة وصمت مرعب حاول يقطعه ابو محمد وماستجابت له لطيفة كانت ردودها مختصره جدآ كان خوفها من المواجهة مشغل تفكيرها تمامآ وصلو عند البيت لطيفة مسكت شنطتها بقوه كأنها تقوي نفسها ابو محمد لاحظ حركتها وبحنان مسك يدها : لا تخافين يابنتي انزلي معي وصدقيني محد راح يتعرض لك او يقول لك كلمة كانت البوابة كبيرررة ابو محمد دخل السيارة لين وصل قدام البيت ووقف لطيفة كانت منبهره من اللي شافته كان البيت كبييير كبيييير هالشي زاد الخوف بقلبها لما سكر السيارة وفتح الباب فتحت الباب ونزلت بخوف ابو محمد جا جهتها ومسك يدها واتجهو لباب البيت كان ابو محمد ضاغط على يد لطيفة بقوووه عشان تتطمن دخلو البيت ودخلت المجلس اللي كانو كل الاخوان والجده مجتمعين فيه لطيفة كانت منزله راسها اول مادخلت اللكل كان قاعد محد تحرك من مكانه الا ام ماجد "نورة" قامت وجت جنبها ومسكت يدها وسلمت عليها الاخوان استوعبو الموقف وقامو كلهم ام ماجد بابتسامة : هلا والله بلطيفة لطيفة بصوت واطي : هلا فيك ام ماجد حست موقف لطيفة محرج واللكل ساكت مسكتها ومشتها على اخوانها وهي تقول لها مين هم وهم يسلمون عليها ابو عبدالله وهو يسلم عليها : هلا والله باخيتي لطيفة سلم عليها بحرارة خلت لطيفة تضعف وجتها الصيحه لما وصلت للجده كانت الجده ماسكه سبحتها وتستغفر قربت لها بتمسك يدها عشان تحبها و دفت يدها الجده لطيفة انصدمت من التصرف ومسكت دمعتها قد ماتقدر وداست على قلبها وقربت وحبت راسها وابعدت بسرعه قبل ماتدفها ثانيه .. محد لاحظ تصرف ام محمد الا ام ماجد وحبت تلطف الجو : تعالي لطيفة لازم اوريك غرفتك ابو محمد بحنيه : ايه يالطيفة روحي ارتاحي اللحين اكيد تعبتي خالد وهو يضحك : اووه جيتي يالطيفة وخذتي الجو عني لطيفة ابتسمت غصب من كلام خالد اللي اول ماشافته حسته دخل قلبها بسرعة كان داخلها مليون شعور قبل اقل من شهر ماكان عندها لا اب ولا ام ولا اخ اللحين عندها اب واخوان واخت و لهم عيال بعد .. كانت ماتتخيل انها بتسمع عمتي او خالتي واللحين كل هذا صاار عندها كان كل شي حلو وجميل لهاللحظه باستثناء تصرف ام محمد اللي بين انها ماتقبلتها وماكانت مستغربه بس خوفّها هالشي خصوصآ انها بتعيش معها بنفس البيت راحت مع اختها ام ماجد للغرفه بنفس الدور الارضي فتحت ام ماجد الغرفه اللي كانت غرفة الضيوف : هذي غرفتك المؤقته لين نعدل الغرفة اللي فوق لطيفة : انا ثقلت عليكم صح ؟ ام ماجد شهقت : لااا مجنونه انتي ! و والله الغرف اللي فوق كثيير بس لان كل شي صار بسرعه مامدانا نسوي غرفتك واللحين جالسين نعدل عليها لطيفة : لا تتعبون نفسكم ترى عادي انا انام بأي مكان ام ماجد : لا انتي راعيه بيت ولك مثل اللي لنا لطيفة : اممم بسألك ام ماجد ابتسمت لها ابتسامة مريحة : سمي لطيفة بتردد : خالتي لطيفة ماكانت تبيني اجي صح ؟ ام ماجد جلست جنبها على السرير ومسكت يدها : لا امي ماقالت شي ,, ولا علقت على الموضوع وترى مو انها ماتبيك تجين يمكن هي مصدومة للان من اللي صار ولا امي ترى طيبة مرررة لطيفة : من حقها ,,, انا داخله بيتها وبسكن عندها بدون رضاها اكيد بتزعل وتتضايق ام ماجد : بغض النظر عن راي امي ,, انتي بنت ابوي واختنا كلنا يعني لك مكان بهالبيت نفسنا عمرك لا تحسين انك غريبة لطيفة : مهما حاولتو وقلتو انا ببقى غريبة ام ماجد : لا مانتي غريبة الا اذا انتي بغيتي تصيرين كذا .. وبأمكانك تصيرين العكس كل هذا بيدك ( سكتت شوي ) شوفي عشان ماتنصدمين بقولك انا لطيفة ناظرتها باهتمام وتنتظرها تتكلم ام ماجد : حنا كل خميس من اي اسبوع نجتمع كلنا عند امي من اكبرنا الى اصغرنا يعني كلهم بيشوفونك بكرة لطيفة بدا الخوف يدب في قلبها ام ماجد : بخليك ترتاحين الحين واي شي تبينه اتصلي علي على طول لطيفة ماكان عندها رقم نورة واستحت تقول لها ام ماجد تذكرت وهي عند الباب ورجعت : عطيني رقم جوالك برن عليك رنه واسكر لطيفة اعطتها الرقم وطلعت خذت نظرة سريعه على الغرفه كانت منبهره من حجمها وكل تفاصيلهاا اللي كانت تدل على ذوق راقي .. .. ... بنفس اليوم المغرب في احد مقاهي الرياض الفخمة كانو العيال توهم داخلين ويباركون لناصر في افتتاحه للكوفي سيف وهو يمسك الخشب : لا شغل مضبووط صراحه اهنييك على الديكور واختيار الالوان ناصر مبتسم : ياعيني انت تسلم والله خالد : لا جد جد ناصر من مختار الالوان ؟ ناصر بفخر : انا طبعآ عبدالعزيز : كذاب تراه مشاورني ناصر يأشر على زاوية المحل : شاورتك في لون ذي بس لا يكثر سيف وهو يناظر الزاويه : والله وصار عندك ذوق يابوالعز عبدالعزيز بغرور : من زمان مو شي جديد ناصر : عاد اصبرو تذوقون القهوة وتنبهرون جد بعد خمس دقايق كانت القهوة والحلا جاهزين ناصر : حاسب العيال كلهم ليش ماجو ؟ خالد : والله كلهم مرتبطين وماجد قال اعتذر لي منه عندي عملية ناصر : ماجد معذور الباقي وينهم هذا وانا مأكد عليهم كلهم عبدالعزيز : حنا نكفي ناصر : فعلآ انتم تكفون بس حسافة باقي الحلا الجاهز وين اوديه خالد : عادي حبيبي مايضيع عطنا ناخذه معنا البيت ناصر : اي والله تكفون متوهق فيه جلسو يسولفون شوي سيف : الا متى بيكون الافتتاح الرسمي ؟ ناصر : انا كنت ناوي بكرة بس بأجله للسبت سيف : غريبة ليش ؟ ناصر : فيه آله للقهوة كانت بتوصل اليوم وقالو ماراح توصل الا بكرة او بعد بكرة عشان كذا خليتها مرة وحدة للسبت سيف : ماتوقع آله وحدة راح تعطل الشغل كله ناصر : هي ماراح تعطل بس ولو ماراح ارتاح الا اذا كل شي اكتمل خالد فجأه ضحك وكلهم لفو عليه وأشر بعيونه على عبدالعزيز اللي الشوكة بيده وتدور يمين ويسار سيف ابتسم على شكل ولد خاله اللي كان بعالم ثاني خالد رفع جواله وفتح سناب وصوره فيديو : والله لأبتزه ناصر قرب من اذن عبدالعزيز وصرخ لف عبدالعزيز مرتاع : وججع وججع وش فيك انت ؟ ناصر وهو يغمز : وييين سارح ؟؟ من ماخذ عقلك ؟؟ عبدالعزيز وهو يرجع عيونه للشوكة : الحلا حقك ناصر : ياكذبك هذي اول قطعه تاخذها وماكلتها بعد عبدالعزيز حك راسه : لا تدقق يااخي ( واكل اللي بيده بسرعة واخذ الكوفي ووقف ) عاد انا استأذن سيف : وش فيك عزيز لا يكون زعلت ؟ عبدالعزيز ضحك : تستهبل ؟ لا والله بس اني مواعد واحد من اخوياي بستقبله بالمطار خالد : منهو ؟ عبدالعزيز : سلطان ال... ناصر : عبدالملك وفهد بالطريق ياليتك تجلس شوي عبدالعزيز : والله ودي بس مرتبط سلم عليهم وطلع كانو كلهم مصدقين انه طالع للمطار الا سيف اللي كان يدري ان فيه شي بس ساكت ينتظر عبدالعزيز يتكلم من نفسه كان باقي على وصول خويه اكثر من ساعتين بس كان يبي يطلع .. وده يختلي بنفسه مايدري وش فيه من لما رجعو من المزرعة ونفسيته سيئة يدري ان رهف سبب بس كان يشوف اللي سواه صح لأنها هي اللي عرضت نفسها عليه بس بنفس الوقت فيه تأنيب ضمير وهذا اللي مشغله طرد الافكار من راسه وركب السيارة ومشى .... .. ... .. في بيت ابو فيصل تحديدآ بغرفة وجدان الهنوف كانت عندها و جايبه معها كتابها وجالسة تذاكر وجدان رمتها بالمخده : انا جايبتك ابي انسى الاختبارات تجين تذاكرين قدامي الهنوف : من قال لك تعزميني ؟ لا بعد تقولين تعالي ونامي تتوقعين يعني بخلي كتابي ؟ تبيني ارسب انتي ؟ وجدان : بسم الله كلتيني بقشوري خلاص اسفه ذاكري بس اصبري شوي تكفين افف ابي اسولف ونورة مو فيه مافيه الا ريم وبزر قلت مالي الا بنت عمي حبيبتي تجي تونسني الهنوف قفلت الكتاب وجت جلست على سرير وجدان : وهذي جلسة يالله وش عندك تسولفين عنه ؟ وجدان : اممم مدري قولي اي شي اي سالفة الهنوف زمت شفايفها : كل شي سولفنا فيه خلصت السواليف والله وجدان : امانة تتوقعين عمتي لطيفة كويسة ؟ الهنوف : اممم مادري والله بس ان شاءالله يعني وجدان : مادري اخاف تجي وحدة وتكون حسوده او كارهتنا او اي شي الهنوف : شوفي اممم انا اتووقع اتوووقع العكس بتكون هي خايفة مننا وجدان : مادري بصراحة الهنوف سكتت شوي : تصدقين بيتكم هادي من بعد نورة وجدان : مرررة مرررة يختي انسى احيانآ ان عندي اهل الهنوف عدلت جلستها : صح صح على طاري نورة ! وجدان : وشووو ؟ الهنوف : اسأل عبود امس عن الكاميرا اللي مصورين فيها زواج الرجال وقال عند فيصل تكفيين جيبيها خاطري اشوف زواج الرجال وجدان : اشووا انك ذكرتيني والله ماخذتها من فيصل وحطيتها بالدرج ونسيت الهنوف : اماا وينها وجدان اشرت على الدروج : شوفيها بالدرج الثاني , وانا بنزل اجيب القهوة والحلا الهنوف : قولي لريتا تكفين مالي خلق انتظرك وجدان : رايحة مع امي لبيت خالتي ولا كان قلت لها الهنوف قامت : اوكي خلاص روحي بس لا تطولين وجدان : طيب ... .... .. في بيت ابو ماجد بغرفة ريناد كانت عندها صديقتها ليان ريناد : اقولك سويت كل اللي قلتيه اضفته وارسلت له بس على طول بلكني بنفس الدقيقه ! ليان بقهر : ليييه هو كذاا ؟ اول مرة اشوف ولد ثقيل لهالدرجة ريناد : مااادري جربت معه كل شي كلمته وسولفت معه على اني ريناد كل شي يصير عادي بس اذا حاولت المح له يصدني ليان : يمكن يحب طيب ! ريناد : لاا ليان لا تستهبلين عزيز مو راعي هالحركات ليان : وش دراك انتي ؟ ما تعرفينه زين ريناد : الا اعرفه و غير كذا هو صديق سيف اخوي الروح بالروح اكيد اعرف عنه اشياء كثير ليان : مو شرط انك تعرفين عنه كل شي عاد حتى لو صاحب اخوك ريناد زمت شفايفها بتفكير : مادري بس شوفي والله لو عنده 10 حبيبات هو لي انا وبس ....... في بيت ابوفيصل وجدان والهنوف يشوفون زواج علي ونورة الهنوف : شوفي مشعل كيف يرقص ههههههههههههههههههههههه وجدان كانت عيونها مركزه بمكان ثاني لفت عليها الهنوف ثم رجعت للشاشه وابتسمت : كلتي الولد بعيونك خلاص وجدان لفت بتساؤل : اي ولد ؟ الهنوف : سيوووف وجدان توترت : وش فيه الهنوف ضحكت : اقولك كلتيه بعيونك خلاص وجدان : ماشوفه انا جالسة اشوف عمي خالد الهنوف : امممم عمك خالد اوكي طبعآ المطلوب مني اصدق وجدان قفلت الفيديو ولفت عليها : وش مشكلتك معي انتي ههههههههههه ! الهنوف فتحت عيونها : لا مشكلة ولا شي بس اللي بقوله ان كل شي واضح وجدان كان معها روج وتفتحه وتسكره وتحاول تظهر عدم الاهتمام : وشو الواضح ياست الهنوف ! الهنوف : واضح انك طايحة على وجهك وميته على ولد عمتك وجدان كسرت غطاء الروج بحركة سريعة الهنوف ابتسمت : واضح وجدان واضح وجدان غطت وجهها بيدينها بأحراج : واضح مره ؟ الهنوف بضحكة : مو مره مرتيين وجدان : خلاااص غيري السالفة مابي استحي الهنوف : ولا بعد ازيد من الشعر بيت .. حتى هو واضح طايح على وجهه مو انتي بس وجدان وجهها قلب الوان : لاعاد وش اللي طايح على وجهه الهنوف : لو اعد المواقف ماخلصت بس والله واضح مرررة بعد وجدان : اففف حرررر اطول على المكيف ؟ الهنوف : لا برد والله بس طاري سيف هو اللي خلاك تشبين شوفي وجهك كيف انقلب بسم الله وجدان : هههههههههههههههههههههه اص بس شوفي وانتي ساكتة شغلو الفيديو وقامو يعلقون ويضحكون بعد ماخلصوه الهنوف مسكت جوالها وضحكت : ههههههههههه يوه ياليتني مسويه بلوك لريوف من السناب وجدان : لييه الهنوف : ردت على السناب اللي ارسلته وكاتبة موشح كامل عن الخيانة والغدر وجدان وهي تفتح جوالها : ههههههههههههههههه اكيد انها مرسله لي بعد ياربيه الله يعين وجدان بعد دقيقتين : هنوووف شفتي ستوري عمي خالد ؟ الهنوف رفعت راسها : لاا وجدان : تعالي شوووفي ( ولفت الجوال ) هذا مو عزيز ؟ الهنوف تشوف : لا مو هو ( وتركز شوي ) الا هوو .. اممم مدري مدري ! وجدان لفت الجوال وشافته : والله لولا الجرح اللي تحت عينه كان حلفت انه مو هو الهنوف عقدت حواجبها : ناااحف مرة ! وجدان : مو ناحف بس ! شوفي وجهه كيف تحسينه تافل العافية الهنوف : غريببة عاد شايفته قبل اسبوع بالمزرعة كان عادي ابد ابد شكله مو كذا وجدان : ايييه فرررق ! الهنوف سرحت بتفكيرها باستغراب : تتوقعين المووضوع له دخل برهف ؟ وجدان رفعت حاجبها : شدخل ررهف !! الهنوف : مدري بس تذكرين يوم اقولكم عن رهف بالاسطبل ؟ احس احسس صار شي وجدان بتفكير : طيب وش خلاك تربطين المواضيع ببعض اللي اعرفه ان رهف كان ظهرها يوجعها وش دخل عزيز ؟؟ الهنوف : امممم شوفي بصراحة رهف ماكانت تتألم كان تبكي تبكي لدرجة احس روحها بتطلع وجدان فتحت عيونها بقوه ومصدومه : ايوووه ! وليش كنتي تقولين انها ماكانت تبكي وبس تتألم ؟ الهنوف : لأني مابي اخوف خالتي ام تركي ووعد وللأمانه انا نفسي ماستوعبت شكلها والحالة اللي هي فيها لدرجة اني بكيت معها وقتها وجدان بخوف وتوتر : طيب يعني ليش قلتي ان عبدالعزيز له دخل بالسالفة ؟ الهنوف عدلت جلستها : شوفي حبيبي انا تركت البنت كويسة ومبسوووطة مره بالاسطبل ورجعت لكم عشان اخذ حلا وكانت خالتي ام سلمان تدور عزيز عشان ينزل باقي الاغراض من سيارته ومالقت الا سيف ( وشهقت ) الا والله وجدان !!! و لاحظي انتي رهف من بعد المزرعة ماكلمتنا وتحاول تصد عننا وجدان بصدمه : معقولة الهنوووف !! يعني صاير بينهم شي ! الهنوف ضاق صدرها : يارب لااا يارب ان شاءالله اكون غلطانه وهذي كلها صدف عادية وجدان بتمتمه : يااارب - يوم الخميس في بيت الجده الساعة 7 الصبح لطيفة استأذنت من الادارة يوم الاربعاء انها ماراح تداوم الخميس وممكن ماتداوم الاسبوع اللي بعده كان مالها خلق دوام خصوصآ انها اختبرت طالباتها بمادتها وكان هذا اللي مريحها تتقلب بسريرها تنام نص ساعة وتفز فجأه لانها اول مرة تنام بهالمكان قامت فتحت النور واخذت ملابسها ودخلت تتحمم لما طلعت جلست تستشور شعرها سمعت صوت الباب يطق سكرت الاستشوار وبخوف : مين ؟ خالد : انا خالد لطيفة قعدت تدور شيلتها بعدين تذكرت ان هذا اخوها وراحت تفتح الباب بخوف ورهبه دخل خالد و بأبتسامة : صباح الخير لطيفة بصوت واطي : صباح النور خالد : شخبارك ؟ كيف نومتك امس ؟ لايكون ازعجك احد ؟ لطيفة : الحمدلله لا مازعجني احد والله خالد : طيب وش رايك تطلعين تفطرين معنا ؟ لطيفة بتردد : انت ومين ؟ خالد : انا و سيف لطيفة : سيف ولد مين ؟ خالد رحمها بس ماوضح : ولد نورة اختك ام ماجد لطيفة : اييه اسفه مابعد حفظت اسمائهم خالد تجاهل الموضوع عشان مايحرجها : تعالي جايبين لك فطور ماراح تنسينه ابدد ... بس مو من اللذه لطيفة ابتسمت : اجل من ايش خالد : لانك بتطيحين بعده اسبوع بالمستشفى لطيفة شهقت : لااا لا شبعانه خالد : هههههههههههههههههه لا امزح ياعيني والله حلو لطيفة ضحكت : طيب بلبس شيلتي واجي خالد وهو مبتسم : و ليه تلبسين شيلتك ؟ مافيه احد ترى اخوك وولد اختك بس لطيفة انحرجت : اممم اوكي خالد : تعالي معي اللحين لطيفة رحبت بالفكرة ومشت وراه سحبها خالد بيده وخلاها تمشي جنبه تعامل خالد معها كان مرييح ومطمنها وتتمنى اللكل يكونون مثله ومثل اختها نوره دخلو خالد ولطيفة للملحق الخارجي اللي كان فيه سيف سيف لما شافها ابتسم وقام عشان يسلم عليها ولطيفة كانت مستحييه مره سيف : شخباارك خالتي لطيفة : لاتقول خالتي احس اني كبيره ههههههههههه سيف : ههههههههههه والله ودي اقولها كانت امنيتي يكون عندي خاله صغيرة خالد : ياللي ماتستحي وانا اللي اكبر منها تناديني باسمي سيف : عاد والله وش اسوي لك انت اللي حالف علينا مانناديك الا بااسمك عشان ماتخرب الكاريزما حقتك خالد : هههههههههههههههههه خلني اتشرّه شوي طيب لطيفة ضحكت عليهم سيف : تفضلي على قل الكلافة والله كان ودنا نجيب شي يواجه بس هذي طلبات اخوك لطيفة وهي تشوف الفطور : ياليتكم قايلين لي اسوي لكم فطور بدال اكل المطاعم اللي مامنه فايدة خالد ابتسم وهو يناظرها : انتي ماخذتي اسم امي وبس .. خذتي شخصيتها بعد لطيفة ضحكت وجلسو ياكلون ويسولفون ارتاحت مررة لانها حست انها تعرفهم من زمان مو من امس و تمنت يكون نفس الشي مع البنات اللي للان ماشافتهم .. ... .. العصر عبدالعزيز توه راجع من دوامه وداخل البيت دخل الملحق وسكر الباب بعصبية كان سيف نايم وفز من طريقة تسكير الباب : خيير شفييك ؟ عبدالعزيز جلس وهو معصب : طالبيني ندب لجده سيف فتح عيونه : طيب وش قلت ؟ عبدالعزيز : لا طبعآ بس احرجني المدير بنص الاجتماع يتوقع اني بسكت وامشيها له سيف : وليش ماتبي جده يعني ؟ عبدالعزيز : مهبول انت ؟ وش يوديني جدة ؟ سيف : ما احس ان عندك مشكلة يعني وافقت على الرياض بسهوله و اتذكر قد رحت 3 شهور لحايل ولا قلت شي عبدالعزيز : لا ياحبيبي تفرق سيف : وش يفرق ؟ عبدالعزيز : مابي اللحين وبس سيف : خلك من جده انت وش فيك ؟؟ عبدالعزيز عقد حواجبه : مافيني شي سيف : كذاب عبدالعزيز : ههههههههههههه مشكلتي اقرب واحد لي دكتور نفسي كيف اصرفه ذا ! سيف يضحك : صاير شي صح ؟ عبدالعزيز : ايه صاير شي سيف : ايوه تكلم عبدالعزيز : طيب وش رايك تعزمني في سلطان ستيك هاوس واعلمك السالفة من اولها لأخرها ؟ سيف : وش الطاري اخبرك تحب نوزومي ! عبدالعزيز : لا بس مشتهي بقلاوتهم سيف : تمم يالله قم بوديك بسيارتي بعد وش تبي اكثر من كذا ؟ عبدالعزيز : يااليت والله لان مالي خلق اسوق ... .. .. بالصالة الجدة جالسة تصلي العصر ولطيفة بالمطبخ تحط الفطاير اللي سوتها بصحن جهزت الشاهي وحطته كله بصينية وطلعت للصالة دخلت وكانت الجده توها شايله الجلال جت وبذرابه نزلت الصينية و حبت راس ام محمد : مساء الخير ام محمد : مساء النور لطيفة : جبت لك الشاهي والفطاير ولاني ماعرف وش تحبين بالضبط نوعت لك ام محمد : الله يجزاك خير جلست لطيفة وصبت لها الشاهي لطيفة : احط فيه سكر ولا ماتبين ؟ ام محمد : لا انا مريضة سكر لطيفة سكتت ومدت البيالة لها .. واخذتها ام محمد وجلست تعلمها عن الحشوات اللي بالفطاير وام محمد ساكته لطيفة تحاول تكسر الحاجر بس ماعرفت كيف جلست معاها الصبح بس ماشافت منها شي سيء ولا شافت شي زين كان تعاملها عادي بس لطيفة ماكانت تحس براحه و موترها الوضع بعد صمت طويل نطقت : اذا مو مرحب فيني ببيتك عادي عندي بيت خالتي بترحب فيني بأي وقت ام محمد رفعت راسها : هذا بيت ابوك لطيفة : بس انتي راعيه البيت واحق مني فيه وانا ماودي اكون ضيف ثقيل ام محمد : انتي بنت زوجي موب ضيف لطيفة : انا ماابي اقولك اعتبريني نفس بنتك لأني ادري انك ماراح تتقبلين هالشي بس تكفين لا تصدين عني كذا ام محمد كانت راحمه البنت وماكانت تكرهها بس كانت مصدومة من اللي صاير .. فيه شي واحد جاذبها بالبنت انها تشبه نورة بنتها ام محمد ابتسمت : انا مانيب زوجه ابو قشرا انتي ببيت ابوك معززه مكرمه ولاراح اكرهك بالمكان ولا شي لطيفة بابتسامة امتنان : شكرآ ام محمد : انا لو مكان امك مابي احد يعامل بنتي معامله شينه وماودي الدنيا تدور ويصير فيني او في عيالي مكروه بسبب شي انا سويته لطيفة : والله ماشفت منك شي شين يا ام محمد ام محمد : ادري اني صديتك يوم جيتي تسلمين علي وهالشي بخاطرك بس اعتبريها ردة فعل سريعة وانسيها لطيفة خنقتها العبره : شكرآ والله شكرآ ام محمد : لا تشكريني ماسويت شي انتي قومي ارتاحي اللحين لان الليل بيجون العيال وعيالهم واكيد بتتعبين معهم ( وبضحكه ) تراهم بيطلعون الشيب براسك لطيفة ارتااااحت وهي تشوفها تضحك لها قامت بسرعه وحبت راسها و راحت لغرفتها وسكرت الباب وعلى طول اتصلت على خالتها مزنه عشان تقول لها كل الاخبار .. .. ... في المطعم عند عبدالعزيز وسيف كان عبدالعزيز توه قايل له سالفة الاسطبل وينتظر ردة فعل سيف سيف كان ياكل بطاطس ويناظر عبدالعزيز بهدوء : خلصت ؟ عبدالعزيز : ايوه سيف : اقولك الحقيقة ولا اكذب عليك ؟ عبدالعزيز : تتوقع اني جالس ساعة اقولك الموضوع عشان تقول اكذب عليك ؟ سيف : لان الحقيقة انك حقير ووصخ .. عبدالعزيز سكت ورفع حاجبه وهو ينتظر سيف يكمل كلامه سيف : وتافه وجبان وقذر لانك استغليت نقطة ضعف بنت ومسكتها مع اليد اللي تعورها عبدالعزيز بدفاع عن نفسه : هي عرضضت نفسها علي !!!! سيف بعصبية : وانت ووشش دراك انها هي ؟ عبدالعزيز : جتني الاضافة باللحظة اللي سكرت فيها الشباك ,, وهي تعرف سنابي يعني امانه ماراح اتوقع انها هي ؟ سيف : غبي انت ؟ هذا منطق ؟ وش اللي جتني الاضافة اول ماقفلت الشباك ... مافكرت انه ممكن يكون واحد من العيال يستهبل عليك او اي بنت ثانية او اي تبن بالحياة ليه على طول شكيت فيها ؟؟؟ عبدالعزيز : صار بيني وبينها مليون موقف خلتني اتأكد تقريبآ انها هي سيف : عزيز حبيبي بلا استهبال اترك كل شي على جنب وفكر بعقلك ترى عمرك 28 مو مراهق ابو 15 عبدالعزيز : والله لي اسبوع افكر ماجا ببالي احد غيرها سيف : مدري اكلمك على انك مراجع عندي واحاول احترمك ولا اكلمك على انك ولد خالي واتلاعن معك احترت بصراحه عبدالعزيز : هههههههههههههه خذ راحتك سيف : بقولك شي عبدالعزيز .. انا لو اني ماعرف اهل البنت او تربيتها او اخوها كان قلت يمكن كلامك صح ... بس انا شفتها في دبي .. البنت محترمه وماتحط عينها بعين اي احد ... يمكن صار بينكم كم موقف بس صدقني ماراح تتعرض لك وانت ماتعرضت لهاا او استفزيتها بأي طريقة عبدالعزيز : و ليه تحط معها الحق ؟ سيف : خذها قاعدة ,, من سابع المستحيلات بنت تسوي كذا بدون ماتشوف منك شي .. وبالذات بنت ابو تركي ... والطريقة اللي تكلمك فيها وكل الكلام اللي قالته لك اكدت لي انك مسوي شي ... والشي الثاني والاهم من هذا كله حركتك الاخيرة عبدالعزيز : انت وش ماسكين عليك بنات ابو تركي ؟ من يوم جلسنا وانت تمدح فيهم سيف : ههههههههههههههه كل تبن .. تكفى خلك جدي الموضوع مو متحمل مزح عبدالعزيز بجديه : والله هذا كلامي وانا اللي عشت الموقف عشان كذا اتوقع اني انا اللي فاهم الوضع صح سيف : ارجع اقولك فكر بعقلك ( وشدد على كلامه ) واترك التهوور ترى بيضيعك ياعبدالعزيز وانت اللي بتندم اخر شي سكتو وكل واحد سرح بتفكيره ... .. .. في بيت ام لولوة "نوف" كانت جالسة هي وبناتها لولوة واسماء بالصالة ويتابعون التلفزيون ام لولوة : هاه يالولو وش صار على الموضوع اللي قلت لك سويه اسماء عقدت حواجبها : موضوع ايش سفهتها امها وطقت رجل لولوة اللي كانت السماعه باذنها : اكلمك انا ليش ماتردين لولوة وهي تشيل السماعات : ماسمعتك والله وش تبين ؟ ام لولوة : اقولك وش صار على اللي قلت لك سويه ؟ لولوة : قصدك تركي ؟ ام لولوة : اييه لولوة : والله كلمته على اساس عندي مشكلة بالبنك بس ماخذت منه لا حق ولا باطل اسماء مستغربه : ليش ماما وش السالفة ؟؟ وش ناويين عليه ام لولوة : ابيها تتقرب لتركي وتملى عينه عشان يعجل بالزواج لولوة : اساسآ كذا ولا كذا هو بيتزوجني ام لولوة : بس ولو ابيه يجي بكامل رضاه .. بعدين مو انا قايله لك تقربي من وعد ورهف وروحي لهم كل شوي ؟ لولوة بقرف : اووه يمه ماطيقهم والله خصوصا الزفت اللي اسمها رهف ام لولوة : ولا انا مو من حبي لهم بس احنا نبي تركي لازم لازم يتزوجك و باسرع وقت لولوة : انا مدري كيف صار اخوهم هالذرب الجنتل يارربي اسماء وعينها بجوالها : انا اقول انسو الموضوع من الاساس .. وشلون بتعيشين معه ولا انتي طايقة اهله ولا هم طايقينك ام لولوة : انتي اسكتي احسن لك .. تنسى ايش بالضبط ! سنين وانا المح لاختي ام تركي واحرجها قدام الناس وانتي تقولين انسي اسماء : انا مدري وش فيكم عليه ! قلو الرجال يعني ! لولوة بحماس : وانتي من جدك تقارنين تركي بأي رجال ... اخخخ الله يعجل اليوم اللي يصير من نصيبي بس ام لولوة بضحكه : اميين ياحبيبتي .. بس مثل ماقلت لك روحي للزفتتين وتقربي منهم اسماء وهي تقوم : هههههههههههههههههههههههه والله واضح من اللحين وش نهاية احلامكم ذي راحت اسماء غرفتها ورجعو ام لولوة ولولوة يسولفون عن تركي ... .. ... المغرب كل العوائل تجمعو ببيت ام محمد لطيفة كانت بغرفتها تتجهز كل مالبست لبس تحس انه مو كويس وتغيره حست انه غلط تلبس لبس اوفر لين استقرت اخيرآ على بنطلون جينز وبلوزة لف بيضاء .. فيها خوف ماتبي تطلع قدامهم كلهم تمنت ان امها معها بهالموقف عشان تروح الرهبه اللي فيها قاطعها صوت الباب فزت من مكانها : تفضل انفتح الباب بشويش وفجأه طلع منه 3 روس كلهم يشوفون بنفس الوقت ابتسمت على اشكالهم ونزلت راسها وشافت نفسها نظرة سريعة وجدان : معليش كان ودنا ننتظرك تخلصين ولانتطفل على خصوصيتك بس الحماس واصل حده لطيفة كانت ساكتة تشوف وجيههم ولا هي عارفه ولا وحدة منهم وجدان : اممم انا وجدان لطيفة خذت نظرة سريعة على وجدان وجدان ضحكت بحياء : لاتشوفيني كذا استحي ماكشخت بعد لطيفة : اضحكي مرة ثانية وجدان ابتسمت بحياء لطيفة : انتي اخت سيف ؟ ريوف : لاا لا انا اخته هههههههههههههههه لطيفة التفت عليها : انتي ريم ؟ ريوف : لا انا ريوف اخت سيف وماجد وسعود وريناد وريما مو ريم لطيفة ابتسمت : بشويش بشويش لحظة ( ولفت على وجدان ) ضحكتك تشبه ضحكة سيف عشان كذا حسسيت انك اخته وجدان تحس وجهها صار بالارض من الحياء : لا انا بنت اخوك ابو فيصل الهنوف ضحكت وعشان تخفف احراج وجدان ومادرت انها بتزيد الطين بله: اتوقع عشان فيهم غمازة وحدة بس وكلهم نفس الجهه لطيفة لاحظت وجه وجدان الاحمر : اجل انتو المميزين وجدان ضحكت : اييييه طبعآ هههههههههههههه قاطعهم دخول مشاعل وهي تركض : ويين عمتي ضحكت لطيفة وكلهم شافو غمازاتها الواضحة الهنوف : هههههههههههههههههههه اووه هذي علامة الجودة بالعايلة مشاعل وهي تسلم عليها : سبحان الله مرره تشبهين عمتي نورة لطيفة ابتسمت : ايييه حتى ابوي يقوله ريوف شهقت : وانا لي ساعة اقول ياربيه من تشبه صارت تشبه امي وجدان : ههههههههههههههه الله يخلف على عمتي بس حتى اشباه امك مضيعتها لطيفة تشوفهم وهم يضحكون ويستهبلون وارتاحت نسبيآ كانت متوقعه العكس متوقعه اشخاص شايفين نفسهم بس كانو جدآ بسيطين ارتاحت مرررة وارتسمت على وجهها ابتسامة كبيرة وقالت : طيب ممكن تعرفوني عليكم والله ماحفظتكم وجدان : انا اكيد عرفتيني لطيفة : اييه انتي وجدان ام غمازه وحدة حفظتك ريوف : وانا بنت شبيهتك ريوف الهنوف : وانا الهنوف بنت اخوك ابو عبدالله مشاعل : وانا مشاعل بنت اخوك محمد ابو سلمان لطيفة لاحظت الراس الصغير اللي يطل عليهم : وهذي الحلوة مين ؟ لفو كلهم الهنوف : هذي حلا اختي الصغيرة جت حلا وتعلقت بيد الهنوف دخلت عليهم ام فيصل ام فيصل : ياحيا الله لطيفة وسلمت عليها بحرارة لطيفة : هلا والله ام فيصل : شكل البنات ازعجوك لطيفة : لا والله مازعجوني ولا شي بالعكس خففو التوتر ام فيصل تشد على يدها : لا تتوترين ولا يضيق صدرك كلنا اهلك وترى فيه باقي برا ينتظرونك تطلعين وجدان : يمه اسلوبك يروع ترى مايريح اللكل ضحك طلعو كلهم وسلمت على الجميع بتوتر خفيف ريناد بحماس : اللله اخيييرآ صار عندي خاله ولا بعد تشبه امي لطيفة ابتسمت لها : انتي ريناد ولا ريما ؟ ريناد وهي تضحك : لا انا ريناد ريما : وانا ريما ,, يالله صدق تشبهين امي والله بس على شباب وجمال اكثر ام ماجد رمتها بكرتون المناديل : وش قصدك يعني انا مو جميله ريما تمسك راسها : اححح يمه والله مو قصدي بس معجبة بخالتي انا ضحكت لطيفة : لا عاد حرام عليك ظلمتي امك والله انها اجمل مني ام ماجد : ياحلوك والله يااختي عاد ترى ريما ماتجامل يعني راحت علينا هههههههههههههه كانو البنات جالسين حولها ويسولفون ويحاولون يحسسونها ان الوضع طبيعي وعادي ارتاحت مرة معهم وحست انها ببيتها وحست انها من سنين تعرفهم وتندمت على اللحظات اللي خافت فيها منهم او من شخصياتهم او من انهم يكرهونها لما جا العشاء كانت هيفاء توها تصحى من النوم وطلعت لهم للصالة وجدان : هلاا باللي له الخافق يهلي هيفاء كانت نص عينها مقفله : هلا جوجوو وجدان وهي تسلم عليها : كيف اختبارك هيفاء : الحمدلله يستاهل كل ساعة سهرت فيها قامو البنات يسلمون عليها وكانت لطيفة بينهم هيفاء سلمت عليها وهي دايخه بعدين فتحت عيونها بقوه وهي تشوفها لطيفة : هذي الحلووة ميين ؟ مشاعل وهي تضحك : اختي هيفاء هيفاء استوعبت وسلمت عليها مره ثانيه بحرارة : معلييييش عمتي والله ماستوعبت لطيفة ابتسمت لانها سمعت كلمة عمتي على طول منها : وش دعوة قلبي جلست معهم وعلى طول دخلت بالمود رن جوال وجدان وجدان : هلا فيصلوه ,, مشاعل ؟ ,, وانا اقول غريبة تتصل علي طلعت ساحبه عليك ,, لا وش تبي ؟ ,, اصبر بسألها ,, او تصدق بخليها تروح للملحق الخارجي وانتو تعالو ,, خلاص طيب بس اصبر شوي ,, يلا باي وجدان لفت على مشاعل : وانتي ليش ماتردين على اخووي ؟ مشاعل تحط يدها بحضنها : يوه جوالي مو معي لطيفة بتساؤل : اهااا مشااعل انتم اللي ابوي يقول زواجكم بعد اسبوعين ؟ مشاعل على طول صار وجهها احمر وجدان : ههههههههههههه يوه ليتك ماجبتي الطاري اللحين بنجلس ساعتين على ماترجع طبيعية لطيفة وهي تضحك : اسفه والله مادريت هيفاء : الا بالعكس انا اذا ازعجتني وحبيت اسكتها قلت لها فيصل وخلاص ارتاااح نفسيآ 3 ساعات مشاعل رمت عليها الخداديه وجدان : ايه صح قبل ما انسى عمتي ترى العيال يبون يسلمون عليك لطيفة : اللحييين ! وجدان : ايييه فيصل يقول نبي نجي للملحق الخارجي لطيفة بتوتر : طيب ام ماجد كانت جنبهم : تبيني اروح معك لطيفة ؟ لطيفة : ايه يالييت والله .. ام ماجد ابتسمت : يالله ياقلبي اجل طلعو ام ماجد ولطيفة وجدان تلف على البنات : اففف تجنننن ياربيه حبيتها ريناد : مره تحسين اننا نعرفها من زمان مو تونا قبل شوي شايفينها مشاعل للان مستحيه من طاري الزواج وساكته الهنوف : هههههههههههههههههههههههههه مشاعل وربي مو طبيعية انتي !!! معقوله للان تستحين ! مشاعل : يختي وش اسوي طاريه يشتتني هيفاء : ياعمرري يالتشتت انا هههههههههههههه ! حتى المصطلحات تغيرت بسبب فيصل مشاعل : بس امانه شرايك ؟ ريما : الله يخلف على ولد خالي والله رحمته مشاعل : انتي اصصص وجدان : اي والله الله يخلف على اخوي صادقه ريموه مشاعل : وانتي اصص بعد من اللحين مااخذه وضعية الحماة القشرا بالملحق الخارجي دخلو العيال وسلمو على لطيفة وجابت لهم الشغاله القهوه والحلا وجلسو يتقهوون ويسولفون وبعد ربع ساعه تقريبآ بعضهم رجعو للمجلس واللي جالسين للحين خالد وفيصل وعبدالعزيز وسيف عبدالعزيز : عاد باقي شخص واحد بس ماشفتيه لطيفة : ميين ؟ عبدالعزيز : ماجد ولد عمتي لطيفة : ليش وينه ؟ خالد : بالدوام .. ولد اختك دكتور لطيفة ابتسمت سيف : اتصلت عليه و يقول بجي متأخر شوي لان عنده عملية لطيفة : ياعمري الله يعينه اللكل : امييين لطيفة : طيب فيه واحد اسمه سعود اخوك ياسيف صح ؟ سيف : ايييه سعود اخوي في امريكا للان بيجي بعد اسبوعين تقريبآ على وقت زواج فيصل لطيفة : الله يوصله بالسلامة سيف : اميين دخل مشعل عليهم : فاتني الحلا والاشياء الحلوة ؟؟؟؟؟ عبدالعزيز : والله فاتك عمتك الحلوة ماسلمت عليها لطيفة استحت من كلام عبدالعزيز وقامت عشان تسلم على مشعل مشعل وهو يسلم عليها : انا اقصد الحلا انتي والله ولا الاكل لاحقين عليه ام ماجد : هههههههههههههه عيال اخوي محمد ماراح يتعبون زوجاتهم ابدآ والله عليهم السنه عبدالعزيز ابتسم لين بانت غمازاته : امانه مو عسل ؟؟ ام ماجد : والله تروعوون بالذات انت ياعزيز من يوم انك صغير نفس اللسان .. على كثر سواياك ومصايبك محد يقولك شي بسبب هاللسان العسل عبدالعزيز وهو يضحك : ان صرت دفش هاوشتوني وان صرت حنون هاوشتوني وش تبوني اصير ؟ لطيفة وهي مبتسمة : خللك نفس ما انت تجنن ماعليك من احد عبدالعزيز ضحك : صرتي بطرفي من اللحين لطيفة : اييه طبعآ سيف : لنا الله بس كملو سواليفهم وضحكهم لييين كلن تفرق وراح كل واحد لبيته - يوم الجمعة الصبح في المستشفى سيف جالس على مكتبه ومنهمك بالشغل عاللاب توب قطع اندماجه صوت الباب يوم طق سيف بدون مايرفع راسه : تفضل عبدالعزيز فتح الباب : صباااح الفل سيف رفع راسه بأبتسامة : هلااا عزيز عبدالعزيز جلس : شخبارك سيف : تمام والله .. وش تبي ؟ مامدى توني شايفك امس عبدالعزيز : الشرهة مو عليك على اللي يمرك سيف بضحكة : منورني والله ياعيني بس اني استغربت عبدالعزيز وهو يفرك وجهه وراسه بتعب : مريت الصيدلية اللي جنب المستشفى باخذ بنادول وقلت والله ما امشي بدون ما اسلم على العيال سيف : سلامتك ! وش فيك ؟ عبدالعزيز : الله يسلمك لا والله مافيه شي بس صداع من امس ماقدرت انام منه سيف : ماتشوووف شر يابعدي ( وبهدوء وهو يفتح الدرج ) مشغلتك سالفة رهف واضح عبدالعزيز بحدة : ماله دخل سيف ابتسم : اوكي ماله دخل ماله دخل ,, ايووه وش تشرب ؟ عبدالعزيز : ............. . *** *____________* *يتبــ؏ . .*