قصص رعب - طلاسم الموت - مكتملة | روايتك

*قصة طلاسم الموت كنت ماشي في الشارع ولفت نظري ان في محل بيتحرق، والغريبه ان الناس واقفة ومافيش حد فيهم متحرك وبيحاول يطفي الحريق الكل واقف وعلى ملامحه الجمود وكأن الناس دي جثث واقفه على رجليها وقتها لقيت زياد صاحبي بيقرب مني وبيقولى _ اتاخرت ليه يا عم؟... انا مستنيك من الصبح = محل مين اللي بيتحرق ده؟.. والناس واقفه كده ليه هي مش بتحاول تساعد وتطفيه؟ _ لا دي حكايه كبيره اوى هحكيلك يا مصطفى ما تقلقش تعالى بس نقعد في البيت عندي شوية وانا هحكيلك كل حاجة ... طلعت مع زياد بيته واتكلم وقال _ المحل اللي بيتحرق ده بتاع واحد اسمه مسعد.. ما فيش حد بيحب الشخص ده عشان هو شخص ملحد =نعم؟!.. ملحد ازاي يعني؟ _ ملحد.. ما لهوش لا دين ولا مله ولا مؤمن بوجود ربنا.. وقبل ما تستغرب اسمع الحكاية الحكايه بدأت مع عبد الغفار التربى بتاع البلد والكلام ده من 10 سنين تقريباً.. يومها كان معاه الشيخ عمر كان معالج بالقران الكريم وكان كل فتره بيروح المقابر عشان يعمل حمله تنظيف للمقابر من السحر والاعمال والاذى المهم انهم وهما بينضفوا المقابر، لقيوا صورة لشيخ ملتحي والصوره عليها قفل ومكتوب عليها كلام بالاحمر وطبعا الكلام ده كان عباره عن طلاسم وتعاويذ واتكلم الشيخ عمر وقال _ اعوذ بالله من الشيطان الرجيم.. لا حول ولا قوه الا بالله = انا عارف الراجل ده يا شيخ عمر، الاستاذ طاهر ده راجل محترم في المنطقه عندنا وفاتح سوبر ماركت وعمره ما غلط في حد مين بس اللي هيكون عاوز يأذيه الاذية دي كلها _ المشكله انه مش سحر واحد، الراجل ده معمول ليه مجموعه اسحار وكلها مش سهل انها تتفك وانا كان نفسي اجي معاك للراجل ده بس للاسف انا مسافر دلوقتي زي ما انت عارف فانا عاوزك تروح عنده يا عبد الغفار وتشوف حالته عامله ازاي؟!.. اكيد الراجل ده تعبان وبيعاني بشره ان احنا خلاص لقينا السحر وهنفكه = حاضر يا مولانا.. هروح وهتصل بيك وهبلغك _ تمام يا عبد الغفار يلا بينا .... واتحرك الشيخ عمر وكان معاه السحر اللي معمول للاستاذ طاهر، وعبد الغفار اتحرك على السوبر ماركت بتاع الاستاذ طاهر واول ما وصل هناك لقي الراجل بصحه كويسة جداً وبيبيع كويس والحال ماشي.. فقرب منه وسلم عليه وسالوا عن احواله وكان رد الاستاذ طاهر _ انا الحمد لله بخير، وفيك الخير يا عبد الغفار انك جاي لحد هنا عشان تسأل عليا = هو في الحقيقه انا جاي هنا، عشان اطمن عليك بعد ما لقينا سحر في المقابر يخصك والشيخ اللي لقيه قال انك اكيد هتكون تعبان دلوقتي وطلب مني اجي اطمن عليك وابشرك ان الموضوع هيتحل قريب _ بص يا عبد الغفار، انا واحد مش بيسيب المصحف من ايده زي ما انت شايف كده وبصلي فرض بفرض وعارف ربنا وبذكره، وذكر الله يحميك من اي حاجه ومن اي اذى، فانا عاوزك ترجع مكانك وتشكر الشيخ عمر انه اهتم بالامر = يعني انت يا استاذ طاهر، مش خايف؟ _ اخاف من ايه؟!.. ربك موجود ومطلع واللي معاه ربنا ما يخافش ... مشي عبد الغفار ورجع تاني على المقابر، وفات 3 شهور لحد ما في يوم لقينا الاستاذ طاهر خارج من المحل بتاعه بيجري على اول الطريق ما حدش كان فاهم في ايه؟!.. لكن الصدمة ان بنت الاستاذ طاهر وهي راجعه من الدرس خبطتها عربيه واتوفت، الناس كلها جريت عشان تشوف في ايه؟ لقينا الاستاذ طاهر حاضن بنته وقاعد على الارض وبيعيط، للاسف بنته كانت غرقانه في دمها وميتة الناس كانت بتقوله وحد الله استاذ طاهر بس هو ما كانش عاوز يسيبها كان بيصرخ في الناس ويقولهم سيبوني، مهما وصفتلك احساس الراجل ده يومها مش هعرف اعبر عنه وبعد ما دفن بنته وعمل العزا.. اقدر اقولك ان الراجل ده اتغير 180 درجة وهجبلك ابويا الشيخ عبد التواب يحكيلك ايه اللي حصل وايه اللي شافه لما راح يعزي الاستاذ طاهر وكان كلامه عامل ازاي ساعتها ..... _ شوف يا ابني، زياد طلب مني احكيلك في البدايه لازم تعرف ان الاستاذ طاهر ده انسان متدين جداً، يعني مش سهل انه يفقد ايمانه بربنا والدنيا مش دايمة لحد يومها روحت وخبطت على الباب فتحتلى مراته واول ما شافتني طلبت مني ادخل بسرعه اشوفه.... ولما دخلت لقيت واحد انا ما اعرفوش نحيف جداً تحت عينيه هالات سودة شكله كان يخوف.. وكان باصص للفراغ وبيكلم حد مش موجود طلبت من مراته تسيبني معاه شويه، وقربت منه وانا بستعيذ بالله من الشيطان الرجيم لكنه في اللحظه دي بصلى وعينيه كلها بقت سودة تماماً وابتسم انا اتفزعت من المنظر ورجعت لورا وهو كان بيضحك، بدأت اقرأ ايات من القران الكريم كان بيحط ايديه على ودانه وبيصرخ والصوت اللي كان طالع منه صعب صوت حشرجه ما سمعتش زيه قبل كده، وبعدها بدأ يرجع كان منظره صعب.. سبته وخرجت وانا مش مصدق ايه اللي وصله لكده.. لكن مراته اتكلمت وقالت _ اللي حضرتك شوفته ده حاجه، بعد وفاه بنته بيومين طلبت منه يقوم يتوضى ويصلي ركعتين لله، كان مش قادر يقوم سند عليا لحد الحمام ودخل وما فيش دقيقتين وسمعته بيصرخ جوه الحمام وسمعت صوت ازاز بيتكسر، جريت وحاولت افتح باب الحمام ما كانش بيفتح ولما اتفتح لقيته بنفس الشكل اللي حضرتك شوفته عليه ده عينيه كلها كانت سودة ومبتسم صرخت وجريت من قدامه وقفلت الاوضه على نفسي كنت خايفه ليعمل فيا حاجة = جوزك اتمس، واللي عليه مش سهل خالص انا هعمل خلوه وان شاء الله نقدر نوصل لحل ونبطل السحر ده _ ربنا يقدرك يا شيخ .... خرجت من عنده يومها وانا مش مصدق اللي حصله.. بقي ده الأستاذ طاهر، وكان لازم وقتها اعمل خلوه عشان اعرف أواجه اللي عليه ده... بس تاني يوم لقيت مراته جايه عندي البيت وبتبلغني انه فاق شويه من الحاله اللي هو فيها، وقالها على الكلام اللي قالهولو عبد الغفار التربي ولما سمعت اللي اتقال روحت على المقابر على طول وسألت عن بيت عبد الغفار وفتحتلي واحده وعرفت انها مراته ولما سألت عليه قالت انه نايم ودخلت عشان تصحيه وما فيش خمس دقايق وسمعت الست دي بتصرخ دخلت على طول عشان اشوف في ايه؟! لكن الصدمه ان عبد الغفار مات.. مات قبل ما اعرف منه ايه السر بالظبط، لكن عرفت من الناس هناك ان الشيخ عمر اللي ساكن في البلد اللي جنبنا هو اللي كان بيعمل حملات تنظيف المقابر مع عبد الغفار واتحركت على هناك فعلاً سألت على بيته وعرفت انه عايش لوحده.. خبطت على البيت مره واتنين تلاتة بس ما كانش في اي رد.. لكني شميت ريحه وحشه جداً جايه من جوه كانت ريحه عفن استنجدت بالجيران وقلتلهم الشيخ حصله حاجة والناس ساعدتني عشان اكسر الباب وادخل.. والصدمة اننا لقينا الشيخ ميت وكان فاتح بقه على الاخر وكانه بيصرخ شكله كان صعب وكان في دود اسود بيسرح في جسمه.. الناس رجعت لورا واتفزعت من منظره وقدامه كانت صوره الاستاذ طاهر عليها القفل والطلاسم وفي الوقت ده تليفوني رن وكانت مرات الاستاذ طاهر هي اللي بتتصل واول ما رديت عليها سمعتها بتصرخ.. حطيت التليفون في جيبي وجريت ركبت اول مواصله ورجعت على البلد.. وطلعت على بيت الاستاذ طاهر على طول لقيت الناس متجمعه قصاده واول ما دخلت لقيت الاستاذ طاهر ماسك في ايده سكينه وقدامه... يتبع الجزء التاني .... #محمودالأمين الجزء التاني الاستاذ طاهر كان ماسك سكينه وقدامه بنت صغيرة، كانت بنت من بنات الجيران البنت كانت خايفه وبتترعش وهو ماسكها والناس بتحذره انه يأذيها قربت منه وحاولت اتكلم معاه _ انت عايز تقتل البنت ليه يا استاذ طاهر؟ = عشان ارجع اشوف بنتي، هما وعدوني بكده _ مين اللي وعدوك؟.. بنتك خلاص ماتت بلاش تعمل حاجه ممكن تندم عليها = لا هي ما ماتتش، انا بشوفها كل يوم، هي بتيجي تصحيني وبتقولي لو عاوزني افضل معاك على طول نفذ كلامهم طلبوا روح بنت صغيرة وبعدها بنتي هتعيش معايا على طول _ لا حول ولا قوه الا بالله.. ما تصدقش كلامهم وننزل السكينه دي واهدى ... الناس كلها كانت واقفه مش مصدقه اللي بيقولوا الاستاذ طاهر، الراجل المتدين اللي عارف ربنا ومش بيسيب فرض يبقى ده تفكيره.. ما حدش كان عارف ان الاستاذ طاهر عليه مس من جن كافر ومش مسلط بسحر واحد لأ.. بكذا سحر وكل سحر فيهم قادر يخرب اي حياه بني ادم.. بس اللي انا مستغربه ان واحد زي الاستاذ طاهر السحر ياثر فيه بالشكل ده رغم منه كان قريب جداً لربنا.. كان نفسي اعرف وقتها مين اللي في قلبه الغل والكره ده كله!! وبعد محاولات كتير قدرت اخد السكينه من ايد طاهر واهل البنت كانوا عاوزين يقتلوه، لكن انا وضحتلهم بسرعه وجهة النظر في البدايه ما حدش كان مصدق لكن لما بدات اقرا ايات من القران الكريم وادعية بانت اعراض السحر عليه ونفس اللي حصل المره اللي فاتت حصل تاني، عينيه اتقلبت لللون الاسود وابتسم وكان بيطلع منه صوت حشرجه صعب الناس كلها خافت ومشيوا، اما انا فحاولت اطمن مراته انه هيكون كويس وطلعت الصوره اللي كانت عند الشيخ عمر ووريتهلها.. واول ما شافتها لطمت على وشها لكن طلبت منها تكون اهدى واني هحاول احل الموضوع ... كل اللي فات ده كوم واللي جاي كوم تاني خالص، عشان اللي جاي ده حصل معايا انا انا ما كانش ينفع ارجع البيت ومعايا الصوره اللي معمول عليها العمل ده خصوصا بعد اللي حصل للشيخ عمر، خوفت على مراتي وابني وعشان كده روحت البيت اللي بستقبل فيه الحالات وبعالجها فيه، او تقدر تقول لما كنت بعالج.. انا كنت متوقف عن العلاج الروحاني من فتره بسبب موضوع كده لكن المره دي الامر ما ينفعش فيه الكلام ده كان لازم اتدخل وصلت البيت ودخلت الاوضه او الخلوه بتاعتي بمجرد ما سبت الصوره على الترابيزه الخشب قدامي.. سمعت صوت همس في ودني بيقول ابعد.. ابعد عن الموضوع ده استعذت بالله من الشيطان الرجيم ومسكت ورقه بيضة وقلم احمر وبدأت بفك الطلسم اللي موجود على الصورة ومع كل حرف كنت بكتبه كنت بحس ان ايدي بتتحرق بس كنت متحامل على نفسي ودايما كنت بذكر الله لكن في اللحظه دي الورقه اتحرقت في ايدي.. ولقيت باب الاوضه بيتفتح لوحده، وده طبعاً مش هيغير موقفي هما بس حاولوا يرجعوني عن علاج الراجل ده، رجعت مسكت ورقة تاني وبدأت أكتب تاني لكن المره دي الشبابيك كلها اتفتحت بعنف وباب الاوضه اتقفل ولقيت ايد طبقت على رقبتي.. حاولت المح اي حاجة وانا بتخنق وكل اللي قدرت اشوفه هي ايد متفحمة طابقة على رقبتي ما كنتش عارف اتكلم لكن من جوايا كنت بقول يا رب يا رب الايد سابتني وكل حاجه رجعت لطبيعتها تاني بس اول ما جيت اكمل لقيت في حد قاعد قدامي، مهما وصفت ومهما قولت البشاعه اللي في الكائن اللي قاعد قصادي مفزع وشه ده محروق ملهوش ملامح صوته مزعج وكل اللي عمله انه حط ايده على ايدي وفي لحظه المشهد كله اتبدل ولقيت نفسي واقف في اوضة مقرفه ريحتها بشعة وكنت سامع صوت واحد بيتكلم صوته مش غريب عليا كان بيقول _ طب ما هو ممكن يروح لشيخ ويفك العمل، وانا قولتلك انه محبوب في منطقته يا راجل ده انا عملت المستحيل عشان اكره الناس فيه وبرضو ما فيش فايده فرد عليه صوت غريب ما اعرفهوش وقال = دي المره المليون اللي اقولك فيها، لو راح لمليون شيخ لو راح لواحد عنده علم الدنيا كلها ما حدش هيعرف يفك السحر ده، الحل الوحيد انك انت تموت، انت طالب السحر في حاله موتك بس يبطل السحر غير كده كل اللي هيقرب هيموت وقبل ما يموت هيدوق فراق اقرب ما ليه.. هيندم بس انه حاول يتدخل _ تمام.. تمام يا مولانا .... المشهد اتبدل تاني ولقيت نفسي رجعت لاوضتي كنت لوحدي مافيش كائن بشع وما فيش حد حواليا.. والورقه اللي قدامي كانت فاضية جيت اقوم حسيت ان عضم جسمي كله مكسر.. فضلت قاعد شويه حاسس اني مشلول لحد ما قدرت اقوم واول ما خرجت من البيت لقيت مرات الاستاذ طاهر بترن عليا وبتطلب مني اروح عندهم بسرعه عشان طاهر تعبان روحت عندهم ولاول مره اكون محبط مش عارف ازاي فكرت اتراجع.. يمكن اللي شوفته هزني لما دخلت عند الاستاذ طاهر كان بيرجع دم ومنظره صعب.. خليت واحد اتصرف في عربيه بسرعة ونقلناه على المستشفى وبعد الكشف اتصدمت لما عرفت ان الاستاذ طاهر عنده كانسر.. كانت صدمة لمراته اللي لسه مافاقتش من موت بنتها.. والغريبه كان كلام الدكتور في اللحظه دي لما قال _ حاله الاستاذ طاهر غريبه شوية.. الانهيار سريع وده غريب احنا بنحاول نعمل اللي علينا بس بالشكل ده ممكن ما نلحقش مراته طبعاً كانت منهارة من العياط.. طلبت منها انها تقعد جنبه تقراله قرآن وباذن الله هيبقى كويس وخرجت من المستشفى يائس عندي احباط بقول يا رب، دخلت الجامع صليت ركعتين لله وانا بدعي ان ربنا يشفيه ويخرجه من اللي هو فيه وفات شهرين.. الاستاذ طاهر في المستشفى بين الحياه والموت ومراته فقدت الامل خالص.. وانا خايف اتقدم خطوه في فك السحر اخسر مراتي او ابني، الخوف ما كانش على نفسي كان على اقرب ناس ليا مش هقدر اخسرهم تحت اي ظرف لحد ما في يوم كنت خارج من صلاه الجمعة ولقيت في واحد جاي ناحيتي بيطلب مني اني اروح معاه عند شخص تعبان ان الشخص ده طالب انه يشوفني انا بالاسم ما كنتش فاهم حاجه.. مين الشخص ده ويعرفني منين عشان يطلبني بالاسم.. لكني روحت معاه البيت كان بعيد شوية واول ما وصلت لقيت نفسي قدام بيت قديم مش مريح ومقبض.. واول ما دخلت البيت عرفته.. نفس البيت اللي شوفته وسمعت فيه الكلام اللي كان بين الدجال وطالب السحر الراجل دخلني اوضه نوم كان فيها واحد شكله تعبان نايم على السرير.. قعدت قدامه وانا فاهم وعارف هو عاوز ايه؟ كان بيتكلم بالعافيه وقال _ انا خلاص بموت، وخلصت من كل الاسحار اللي عملتها للناس طلبت ان الكل يسامحني بس في سحر.. في سحر مش هيتفك غير لو طالب السحر ده مات.. السحر ده اتعمل على نجاسه بكل انواع الاذيه اللي ممكن تتخيلها.. والشخص اللي عمل السحر ده، كان حاقد وكاره للخير كان مستعد يعمل اي حاجه عشان يأذي الراجل الغلبان اللي اسمه طاهر.. خلاني قفلت على كل الاسحار بقفل مستحيل يتفتح في البدايه السحر ما كانش مأثر في طاهر عشان طاهر كان قريب لربنا كان بيصلي ومش بيسيب المصحف من ايده، وكان لازم طاهر يمر بلحظه من لحظات الضعف اللي يقدر فيها الشيطان يدخل لطاهر ويخلي السحر يتمكن منه والشخص ده دبر حادثة لبنت صغيره كل ذنبها انها بنت طاهر، كان كل هدفه ان طاهر يمر بلحظه الضعف.. انا اللي اذيت ناس كتير كنت مستغرب جبروت البني ادم ده.. بس ما تستغربش ده شخص الحد وكفر بالله وكل ده عشان يأذي شخص معملهوش اي حاجه = مين الشخص ده؟ ... كان لسه هيتكلم لكن فجأة فتح بوقه على الاخر وبرق وروحه طلعت قدام عينيا.. لكن في اللحظه دي سمعت.. ‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ سمعت صوت الراجل اللي جابني لحد هنا واتكلم وقال _ انا عارف هو يقصد مين؟.. ده شخص جه هنا عشان يعمل عمل لواحد من منطقته وكل اللي طلبه وقتها ان حياه الشخص ده تتقلب لجحيم كان عاوزه يخسر كل حاجه = طيب ما تعرفش السبب؟.. يمكن الراجل ده اذاه وهو جاي ينتقم مثلا؟ _ لا ما اذاهوش ولا حاجه، عشان لما الشيخ عارف سأله هو اذاك في ايه؟!.. عليه وقال ما اذانيش في حاجه بس قاطع عليا الرزق وعملت كل حاجه عشان اخلي الناس تكرهه ومش عارف = هو اللي توفى ده اسمه الشيخ عارف؟! _ ايوه طبعا مولانا = مولاك ده لا شيخ ولا حاجه، ده دجال مؤذي واديك شايف نهايته كانت عامله ازاي؟ _ ما لهوش لازمه الكلام ده، الراجل مات ادعيله ربنا يغفرله، هو تاب في اخر ايامه وحرق كل الاسحار اللي كان عاملها للناس = والسحر اللي عمله للاستاذ طاهر، ما عرفش يفكه والنتيجه ان الاستاذ طاهر دلوقتي مرمي في المستشفى بين الحياه والموت عشان واحد مريض حاقد عليه فاكر انه في حاجه بايده، اللي في الاستاذ طاهر دلوقتي ده ابتلاء من عند ربنا وسواء السحر اتفك او متفكش اللي عاوزه ربنا هو اللي هيكون المهم دلوقتي انت بتقول انك عارف الراجل اللي جه عامل السحر. مين هو؟ _ واحد فاتح سوبر ماركت في نفس الشارع اسمه مسعد، انا فاكر كويس شكله هو جيه الشيخ عارف أكتر من مره = انت متاكد ان اللي جالك هنا اسمه مسعد _ زي ما انا متاكد انك واقف قدامي دلوقتي.. ده دفع كل اللي حيلته بس عشان يأذى الراجل ده ... وقتها افتكرت الراجل اللي سمعت صوته لما ظهرلي الجن ووراني الكلام اللي ما بين الراجل اللي طلب السحر والدجال، فعلاً هو صوت مسعد، بس ازاي يعمل كده في واحد جاره، راجل كان بياكلها بالحلال مسعد كان طول عمره مش مظبوط، كان بيتبع اساليب مش كويسه عشان يجذب الزبون ليه، ورغم كده الناس كانت بتروح عند الاستاذ طاهر، حتى لما مسعد نزل الاسعار برضه الناس بقت تروح عند الاستاذ طاهر، عشان الموضوع مش بس تنزيل اسعار ده واحد مؤمن ان الرزق في ايد ربنا، والتاني فاكر ان الرزق في ايد العبد خرجت من عند الراجل وروحت على المنطقه على طول، واول ما وصلت محل مسعد لقيته فاضي زي ما هو ما فيش رجل عليه برضو، كان قاعد سرحان وقفت قدامه ومديتله ايدي فأخد باله وسلم عليا وقال _ اهلا يا مولانا.. ده ايه الخطوه العزيزه دي؟!.. شوف حضرتك عاوز ايه من المحل وانا تحت امرك = الامر لله وحده يا مسعد.. هو انت مؤمن ان الرزق في ايد ربنا؟ _ ايه السؤال ده يا مولانا؟!.. اكيد مؤمن طبعاً = طيب طالما مؤمن بقى، ليه رايح تعمل سحر لابن منطقتك ليه دمرت حياته، ليه دبرت لبنته حادثه عشان الراجل يقع والسحر ياثر عليه _ ايه التخريف ده؟!.. انا ما عملتش حاجه من اللي بتقول عليها انا مستحيل اعمل الكلام ده = انا لسه جاي من عند الشيخ عارف، والراجل حكالي كل حاجه قبل ما يموت، الراجل كان عاوز يكفر عن ذنبه ويتوب من اللي عمله في الناس هو حرق كل الاعمال والسحر والقرف اللي كان عامله بس للاسف السحر اللي انت عامله مش هيتفك غير بموت طالب السحر، يعني انت لازم تموت عشان الاستاذ طاهر يعيش ... وقتها ابتسم وقال _ والله هو تاب، هو مات ما يخصنيش، واذا كنت انت بتتكلم دلوقتي عن السحر والاذيه، فاسمحلي اقولك ان طاهر هو اللي كان ساحر، هو اللي كان بيخلي الزباين تروحله رغم ان اللي عندي احسن من اللي عنده، حتى لما نزلت الاسعار برضو الناس بقت تروحله هو، ودي لقمه عيشي ومش هسمح لحد انه يقاسمني فيها = كل ده شايله، الاستاذ طاهر عمره ما كان ساحر ده كان راجل بتاع ربنا بيكسب رزقه بالحلال، طيب ايه ذنب بنته؟.. ليه تقتل طفله ما عدتش 10 سنين عشان انت بتكره ابوها _ عشان هي نقطه ضعفه، السحر ماثرش فيه ودي حاجه كانت هتشلني، ولما روحت لعارف قال ان الحل الوحيد ان طاهر يمر بلحظه ضعف يخسر فيها اقرب حد ليه؟!.. ودي بتكون اللحظه للشيطان بيقدر فيها يتغلب على البني ادم وساعتها السحر هيشتغل = انت عارف انك الحدت وكفرت بالله، ودلوقتي عاوز ربنا يكرمك _ بلاش كلام كبير يا مولانا، بكره صاحبك طاهر ده يموت والناس هتنساه ومش هيبقى في حد غيري في الشارع، والناس عندنا بتكسل تتمشى وكل الرزق هيبقى ليا انا، انا وبس = انت انسان مريض، وانا هعرف الناس كلها حقيقتك ومش هخلي حد يقرب منك _ ساعتها بقى هخليك تحصل طاهر، وزي ما كان في عارف اكيد في مليون زيه وانت عندك زياد ربنا يخليهولك ... سبته وخرجت ما همنيش تهديده وفضحته في البلد كلها.. وبقي مكروه أكتر من الاول والناس القليله اللي كانت بتروح عنده بطلت تروح اصلا.. لحد ما الموضوع وصل لخال البنت اللي اتوفت بنت الاستاذ طاهر، كان راجل عصبي وما يعرفش يسيب حقه أبداً لما عرف اللي حصل قرر انه هينتقم من مسعد ومش هيسيبه أبداً لحد ما في يوم صحيت من النوم على صوت ابني بيصرخ دخلت عليه الاوضه لقيته بيرجع دم وعينيه اتقلبت لللون الاسود نفس اللي حصل للاستاذ طاهر بيحصل لابني اكيد الشيطان ده عمل اللي قال عليه وراح لدجال جديد عمل لابني سحر وفي نفس اليوم اتصلت بيا مرات الاستاذ طاهر وهي بتصرخ مفهمتش منها اي حاجه والخط قطع، لبست وطلعت اجري على المستشفى وللاسف الاستاذ طاهر توفاه الله مات الراجل الطيب المحترم اللي كان بياكلها بالحلال مات عشان بس كان بيتقي ربنا في شغله وجه واحد مريض عمله سحر وقتل بنته اللي تمكن منه وجابله كانسر في الدم كنت خايف على ابني ليحصله زيه وفكرت اني اخلص من مسعد لكن معاه اذان الفجر سمعنا صوت صراخ، كان صراخ مسعد نفسه في ناس اقتحمت بيته وهو نايم وربطوه ودخلوه جوه محله وولعوا في المحل، متخيل بشاعه الموتى متخيل ان في ناس تدخل عليك بيتك وانت نايم ويعملوا فيك كده، طبعاً الناس عارفه ومتاكدة ان اللي عمل كده في مسعد هو خال البنت اللي ماتت بينتقم لبنت اخته وبينتقم للاستاذ طاهر وبمجرد ما مات ابني ردت في الصحه تاني وبقي كويس سامحني يبني انك لما كنت بتتصل كنت بقولك ان هو مش موجود، بس ما كنتش حابب انه اي حد يشوف ابني تعبان التعب ده، وهو لما فاق من اللي كان فيه وعرف انك سالت عليه كلمك عرفت ليه الناس كانت واقفه تتفرج على محل وهو بيتحرق ومحدش متحرك، الناس كرهت مسعد والشخص المؤذي كده بيفتكر نفسه ان هو كسب في البداية لكن هو بيكون خسران كل حاجة بس بيكتشف ده متاخر ..... خلص والد زياد الحكايه وانا مذهول، هو في بشر فعلا كده؟! طلعت مع زياد البلكونه، وشوفت الاسعاف وهي بتخرج جثته المتفحمة من المحل، والمحل بقي كوم تراب فعلاً اللي يرضى ويعرف ان الرزق بايد ربنا بيرتاح، واللي بيفتكر انه بايد العبد بتكون اخرته كده. .... تمت