روايه قيود ساندرا الجزء التاني - الفصل 11 - مكتملة | روايتك

دطلال ناظرها وشاف كأنها بتبكي بضحكة: وي وي لبى البوز ، يا زين طفلتي .. راغده ضربته على خفيف بصدره وبدلع عفوي: أكرهك . طلال خمها بصدره العريض: وأنا حيل حيل أكرهك .. راغده ابتسمت وتنهدت براحة وشربت كوب النعناع : ما بتنوم هنا ؟ طلال باندفاع: لا لا ما أقدر .. راغده: ليه تتهرب مني طلال ؟ طلال: أخاف اضعف .. راغده: تضعف من وش ؟ طلال بصدق: أخاف ما أمسك نفسي الأفضل يكون كل شيء بعد الزواج .. راغده بتوتر: وش تقصد طلال ؟ طلال:...... راغده: قالت لي الدكتورة ان معك ضعف .. طلال " لانها كذاااابة" بنفاذ صبر: اوكي ذه تحليلها ، وزين انها قالت ضعف ما قالت عجز .. راغده: يعني تقصد الضعف يقدر " وبحيا" ينام مع زوجته كا أي رجل طبيعي .. طلال: طبعا يا راغده والان في علاج يسونه الازواج وانا مو بحاجته .. راغده: ليه مو انت تعاني ؟ طلال بغيض: أنا عن ٣ رجال .. راغده بضحكة: حبيت النكتة .. ههههههههه اوكي اوكي انا الآن نسيت الحزن .. طلال كتم غيضة وقهره ماحب الموضوع يتجه باتجاه مختلف وتصير هوشة لأن مافي رجل يقبل ان احد يقلل من رجولته بس عشان وضع راغده عداها .. وقام: يلا اترخص .. راغده بايتسامة: الله يحفظك لا تسرع .. استودعتك الله الذي لاتضيع عليه الودائع .. صعد سيارته وهو يفكر كيف ممكن يقول لها هو كذا مايقدر يمسك نفسه كيف لما يعيش معها ببيت واحد ، حجز موعد مع الدكتورة سلمى بعد يومين لقى له موعد .. طلال: دكتورة هالشيء صعب علي الدم تجمع بوجهي لما قالت هالكلام ، انتي كذبتي هالكذبة حليها .. د.سلمى: استاذ طلال قلت لك كل شيء مؤقت والله انه مؤقت انت مو شايف ان راغده تغيرت ؟ الظلام وتقبلته وقربك وتقبلته وأي شيء أنت تسويه تأخذه بقبول تام ورضى بعد الزواج بيصير كل شيء بعفوية وتصير حياتكم طبيعية .. طلال: وإذا صارت طبيعية ما بتقول ان احنا كذبنا عليها ! د سلمى تنهدت: اي نعم بتقول لكن بتقدر ليه سوينا كذا .. مسألة وقت لا أكثر .. طلال: ونظرتها لي حسستني .." وبصعوبة نطق" أني مو رجال كيف اني ممكن .. د سلمى قاطعته: أفهمك , ما أعرف ليه ما تسمع كلامي راغده ، قلت لها لا تبين ولا تسولف لك عن هالشيء جايز ممكن شافت ان الميانة عندكم راحت وقالتها بظرافة .. طلال: انت تكرر يا دكتورة ما اعرف ايش ممكن يصير لي..وقتها اعذريني صدق .. د.سلمى: أنا بنفسي بكلمها لا تشيل هم ولين الزواج وقتها يصير خير .. طلال: اتمنى هالشيء يا دكتورة .. . . . يشرب شاهيه: متى زواجهم ؟ ام عبدالعزيز: ما أدري .. تو الناس يا فؤاد .. ابو عبدالعزيز: أنا منيب مقتنع بكلام حمود بس قررت أني اعديها السالفة كلها مادخلت مخي .. ام عبدالعزيز: مو حمود بنفسه قال لك أنه كذب ؟ وانها مو راغده وانه طيش شباب ! ابو عبدالعزيز ماخبر عبير ولا أحد بزواج حمود : هم ما دخل برأسي وممكن معه علاقة ثانية خبرك بطيش الشباب وضروري تسوين زواج راغده سريع وبلا تكاليف وهياط .. خبري أن حديقتها وسيعة وكبيرة والاجواء تجنن وش ألي يعيبها ؟ ام عبدالعزيز بصدمة: تبغى ازوج بنتي بهالطريقة وش بيقولون الناس عنا ؟ ابو عبدالعزيز: الان يتزوجون عند البحر وانتي تفكيرك كذه ! الاوضاع تغيرت واقنعي بنتك تتعجل ونهاية هالشهر يكون الزواج اعزموا اشخاص محدودة وقولي بنتك تبغى هالشيء هم يدرون انها عنيدة وتمشي ألي براسها خلاص ! ام عبدالعزيز بعدم اقتناع وبشك: وليه هالعجلة يا فؤاد ؟ ابو عبدالعزيز: ومن متى تناقشيني يا عبير ! ولا بنتك خربتك ، الناس تتكلم وتسولف هالطلال ماغير يخيم عندها وطول وقتهم مع بعض .. ام عبدالعزيز: يا فؤاد هذا جيلهم ولا ناسي مها وش سوت ؟ ابو عبدالعزيز: لا تقارنين بنتك ببنتي ، بنتي ما توصل لمواصيل راغده بأي شيء .. لا حسيب ولا رقيب وساكنة ببيت لحالها غصب الشيطان يدخل برأسنا لو معها هواجيس وتخاف من الرجال زي ماتدعي ماقالت بتزوج .. . . ببيت فرح .. مريم بفرحة: ألف ألف مبروك فرح مروة بنفس فرحة مريم: ياعمري أنتي وأنا أقول وش فيك غاطه .. الف مبروك ربي يثبته .. فرح تسطحت على ظهرها: الله يبارك فيكم .. متحمسة اعرف بنت ولا ولد .. مريم: تو الناس انتظري باقي لك الاهم خلك مرتاحة ولا تطلعين مو زين الطريق للحامل .. وخلك متسطحة ورجلك ارفعيها بمخدة خفيفة تريحك ولا تطبخين الوحام بطريقه لك .. فرح: يوه يا بنت بغيت استفرغ لما شميت ريحة البيض .. والصبحيه كلا ترجيع ودوران .. مريم: اي الله يعينك ويجيرك يارب ..فترة وبتروح .. مروة: ما قلتي لراغده ؟ فرح: لا ما علمتها ، بعلمها بعدين .. مروة بتأيد: افضل ما تدرين ممكن عينها على ألي ببطنك .. مريم: شوفيها ماغير تتصور وترسل بقروب السناب كشختها ومناسباتها ، لا تبيني لها شيء كويس أنها مشغولة الآن .. ولا كان لزقت فيك لزقة .. مروة: ايي والله خفت على عيالي من نظراتها شربتهم من مويتها .. العين حق يا أختي .. مريم بحماس: وش رايكم نحمل سوا ؟ مروة: وييه ماعندك سالفة يا مريم فاضيين لشقى ، فرحتنا بفرح تكفي .. مريم: وش علي منك أنا بحمل ويارب تكون بنت .. ويرزقك بالولد يارب يا مروة .. مروة: يارب .. فرح بتأنيب ضمير: بس راغده ماقصرت وياي يا بنات ودتني بنفسها للمشفى وتكفلت بالدفع حزينة على ألي صار .. مروة: اذ زوجك بنفسه رافض أنك تعلمينها ايش نقول احنا ألي نعرفها معرفة وثيقة .. فرح: جواد أصلا موسوس قال لا اعلمكم بعد لين ما يثبت بس أنا ما قدرت ما اعلمكم صعبة كل شوي اعتذر عن جمعاتكم .. مريم: معذورة ولا تشيلي هم .. يفضل يكون سر لين ماتخطي الرابع تدرين لك سنين ماجبتي وما تدرين وش بيصير ادعي ان ربي يثبته لك وبس .. . . . عقدت حاجبها: وش قصدك ! كيف يعني امهلك فترة تفكر فيها ! كان رديت عليه وقلت ما بطلقها .. من حقي أنا ألي ازعل واتضايق يا حمود لاني انا المفروض اكون الأولى .. حمود ويده على خده: انتي ماتعرفينهم يا بدرية ذول يهود ، تصوري انهم شكو في بنتهم بسهولة وبسرعة .. بنتهم ذاقت المر منهم ماتحملت وسكنت ببيت بروحها .. بدرية: وطالمة أنت عارف انهم كذا كان علمته من بدري وقلت عن وضعنا مو تقول موافق على المهلة .. حمود: أنا خايف أنهم يضرونك بشيء بأجلها لما تولدين ، وأنا بنفسي بقول له قراري .. بدرية بحده: وهو مخلي لك فرصة تفكر ! يألي كل شوي متصل فيك يعرف علومك وواجباتك يألي بنته الست مها مادرت عنك الان بس بتتسنع لك .. حمود: لأنها ماتدري واضح انهم متسترين ويتوقعون مني أني أطلقك لكن لا وألف لا .. جوان بنتي كانت غلطة وزي ماتقولين عشان اسكتها الان مافي حمل واني يشهد الله علي ما أقرب منها مدعي أني مشغول او تعبان .. بدرية بغيرة: اي هي ساكتة عليك لأنها مو حول زواج ومقابل , ذي بنت مدلعه يا حمود " وبحزن" اذوني حسبي الله عليهم طول هالسنوات انتظر تخلص دراستك وتتزوجني جاو هم بكل بساطة لزقوك فيها .. حمود حط يده بيدها: اعرف يا بدرية والله عارف لكن تطمني لا يمكن أخسر عزيز والي ببطنك واخسرك انتوا كل ما أملك .. وهي اذا عرفت مخيرة أما تجلس أو تطلق اما اني اتركك لايمكن .. بدرية احتضنته والحزن بوجها .. . . جلست قبالهم وبتردد: اممم أنا جمعتكم عشان ابلغكم .. زواجكم بيكون نهاية هالشهر .. راغده:بس يايمه أنا ماجهزت ولا اخترت القاعة ولا شيء .. ام عبدالعزيز: وليه قاعة ! خلاص كتب كتابك بقاعة .. انا فكرت ان زواجك يكون بحديقتك وش رايك ؟ راغده صارت تناظر امها بنظرات مافهمتها طلال حس أن الجو بيتكهرب: عمتي .. ام عبدالعزيز قاطعته قبل لا يتكلم: خذوا راحتكم بالتفكير بس لا تطولون لان ماباقي شيء على نهاية الشهر .. راغده بنظرة ثاقبة: بأمر من حددتو ؟ ام عبدالعزيز: انتي عارفه .. ما نحب نكلف على طلال والمصرف ما يكفي وبتسافرون وهالشغلات تكلف .. راغده صغرت عينها: ومن متى انتي تفكرين بالخساير أو التكلفه ! طول عمرك تهتمين للمظهر .. والعجلة ذي ليه بيقولون اني حامل ومتسترين اهلها عليها وزوجوهم بسرعة ! ام عبدالعزيز: لا تفهمين الموضوع كذا يا راغده المسألة هي أن كتب كتابكم طول والناس بدأت تتكلم .. راغده: طول وهو حتى ما تمم ٣ شهور ! وش سالفتك يمه فؤاد كل مخك وعقلك ! أي شيء يقوله لك تصدقيه وتسويه . ام عبدالعزيز: الان وش دخل فؤاد بالسالفة ذه من تفكيري انا ..والناس فعلا تتكلم وتسولف .. ما تقول شيء يا طلال .. طلال: خير البر عاجلة .. راغده التفتت لطلال ثم ناظرت امها وقامت وعينها كلا غضب .. ام عبدالعزيز: يا طلال اقنعها الناس صارت تسولف وتتكلم عن خرجاتكم الي مالها لزمة يسألوني بنتك تزوجت اقول لا .. وأنا مو ناقصة هرج على هالعمر راغده مو فاهمة الوضع انت تكلم معها وبخصوص المعازيم أنا ما بزود نفس عدد المناسب لحجم حديقتها والجو يجنن ويساعد .. الناس صارت تتزوج عند البحر بعد واحنا نفكر بالقاعات .. طلال: لا تشيلي هم عمه انا بتكلم مع راغده .. ام عبدالعزيز مسكت شنطتها وقامت: ممتاز اترخص انا .. فمان الله طلال: الله يحفظك " تنهد وقام " توجه للمكتبة طرق الباب ودخل: راغده .. راغده بحده: ارجوك طلال .. الموضوع حسم , أنا اعرفه ما بيرتاح إلا ويتعسني .. طلال:....... راغده بين دموعها: يتدخل بكل شيء ، اتفه شيء يتدخل فيه وأي حاجة تزعجني يسويها .. مدري وش ألي بيني وبينه لو مو متقبلني ما تزوج بـ امي ، ومن ألي كانت بتقبل به قبل غير امي طايح الحظ .. طلال: راغده حبيبي روقي وهدي اعصابك .. راغده بعصبية: اي اهدي و روقي !! الوجع مو وجعك ولا الجرح جرحك أنت ما تعرفه قد ايش اذاني واتعبني بحياتي بس عرف ان خالي ما اطيقه حلف انه يسكن معنا وحطها حجة عشان امي ما تتحمل بعد اخوها عنها بعد وفاة اهلها وهو كــــذاب .. والان حتى بتفاصيل زواجي يتدخل .. ومها ألي حتى سافرت مع حمود مو بس طلعت يا سبحان الله بس .. طلال اقترب منها وضمها وهي تقاومه بعصبيتها وحدتها شد عليها وبهمس دافي: اوووش راغده لو مامريت بالي تمرين فيه انا افهمك واحس فيك .. وعارفه الي تمرين فيه مير ما باليد حيلة .. " جلسها بالكنب وهو نزل لها تحت عند رجلها ورفع وجهه يناظر فيها : من جهة ثانية إيش رأيك نسافر فيها بدل هالمخاسير أو فلوس القاعة ذي استثمريها لشغلك .. راغده: ادري انا الان بحاجة للفلوس اكثر من اي وقت مضى لان معي تجارة جديدة ولابد لها رأس مال .. طلال: حلو .. خلاص شوفيها من هالاتجاه ولا عليك من أحد .. ويلا قومي نختار فستانك الابيض .. راغده: بس انا .. طلال: ادري ماتحبي التسوق إلا إلكتروني ، بس احنا بنشوفه بالانستا من المصممة إيمان مو كان نفسك تطلبين منها .. راغده" كيف عرف" باستغراب: كيف عرفت طلال .. اقصد ماقد تكلمت بهالشيء قدامك .. طلال باس يدها: أنا أعرفك من دون ما تتكلمين .. ويلا نشوف وش عندها من تصاميم حلوة .. جلس جنبها وفتحوا الايباد طلال رفع يده اليسار ومدها عند الكنب ورى راغده .. راغده: ايش رايك بهذا؟ طلال باعجاب: يجنن عليك ناعم وبسيط مناسب لزواجنا البسيط .. راغده: برتب أوضاع السفر لاندونيسيا في جزر هناك تجنن لسياحة طلال .. مارحت لها بس شفت بالبحث وكثير يمدحونها كأنها جزر المالديف .. طلال: راغده بخصوص التكلفة لا تنسيني الموضوع يعني أنا بتكفل فيها .. راغده: مو مشكلة أنا اتكفل بالنصف والباقي عليك .. طلال: طيب وش بتسوين بيوم الزواج ومن ألي بتعزمين ؟ بيوم الزواج .. ببيت راغده نظمت المكان نهلة بكراسي بيضاء وشرائط حمراء لبست الطاولة قماش من الدانتيل ويعتلي الطاولات ورد جوري أحمر وبكل طاولة فيها التقديمات وبوفية فاخر بجانب الطاولات .. حلى ودلال القهوة .. موسيقى هادية كانت المصورة تصور راغده وطلال كذا صورة .. ام عبدالعزيز بهمس: يعني صاحباتها اولى من صديقاتي .. ريهام: والله هذا اقتراحك يا يمه .. بس الصراحة الزواج شيء شيء .. نسيم بارد وريحة القهوة وشوي وناكل يا سلام .. مها: وانتي تفكري بس ببطنك .. ريهام: الاكل ينسي الهموم والأحزان .. مها: اي هموم واحزان توك ماقفصتي من بيضة وتقول هموم .. ريهام: عاد هذا المثل يقول .. مها: اول مرة اسمع فيه .. ام عبدالعزيز: بس انتي وهي .. الآن بيجون المعازيم كلهم ويسمعونكم .. بعد ربع ساعة خلص التصوير طلال باس يدها: لا تزعلين راغده انا بعوضك مع الأيام .. راغده بحب: أنت أكبر عوض صار لي طلال انت هي فرحتي .. طلال باس جبينها: يلا بروح ماباقي شيء على جيتهم .. راغده: استودعتك الله .. بعد ٥ دقايق جاوا صاحبات راغده عدا فرح أعتذرت ..