على رمال سيلين - الفصل 75 - بقلم غجرية - مكتملة | روايتك

كانت تدور فالبيت بملل .. الشماغ حول رقبتها ورافعه شعرها على شكل ذيل حصان .. خديجه فالدوام بتجي مع صالح .. وراشد نايم ...والبيت فاضي ..وهي تعبت من الدراسه وحل الواجبات .. طلعت للحوش وتمت تتمشى شوي .كان النسيم البارد خفيف .. والسما كلها غيم .. بعد اسبوعين العرس .. وحست انها قاعده تجهد نفسها بين الدراسه وبين التجهيزات ..رغم ان نوف تساعدها لكن نوف حامل الحين وكله في نوبات صدعات .او جوع .. ابتسمت وهي تتذكرها لما تاكل بشراهه ماتخلي شي عالسفره .ويتم منصور يضحك بهستره هو وراشد .. احلوت نوف مع الحمل واايد .. وتغيرت ..اختفت نوف الكئيبه اللي مايشوفونها الا سرحانه .. خديجه ..في عالم ثاني ..كله مودها اوفلاين .. ماتعرف الحاله اللي هي فيها ..لكنها تعرف ان التلفون صار اغلى شي في حياتها..وصورة تجمعها بمبارك تحت مخدتها ..يمسكون يدين بعض بحب .. حست المها ان هي بعد تستاهل الحب .. ليش ماتحب زوجها ؟؟.. ليش ماتستانس بشي حلل ربها ؟؟.. لكن موقف سيلين هو للاسف اللي منكد عليها ...تخاف يظن جاسم انها سهله .. لكن لولا هالموقف ..ماعرفها جاسم ولا حبها .. تنهدت بقوة و قالت لعمرها ـــ وبعديييين ؟؟... ــ وبعدين شنوو ؟؟ نطت من مكانها بقوة وهي تلتف وتلاقي جاسم وراها ــ بسم الله الرحمن الرحيم . حسبي الله عليك خرعتني ....انت شلون دخلت ؟ ولا اراديا حطت يدها على شعرها ترتبه .. قال وهو يقترب ــ من الباب .. كنت بنط من السور .. لكنه عالي .. المها ــ من فتح لك الباب ؟ ــ لقيته مفتوح .. اتصلت براشد وقال لي ادخل من باب المجلس الخارجي .. وقال لي انج فالحوش . طالعت المها فوق لقت راشد يطالعها بضحكه خبيثه .. وبعدين نزل الستاره .. واختفى .. ــ انا اراويه الخاين .. جاسم ـ جبت لج بطاقات العرس .. علشان تعزمين كل من يعز عليج .. واعطاها الكيس اللي كان ثقيل .. ــ شخبارج ؟ قالت وهي متوتره وتحس قلبها بيطير من مكانه بسبه قربه ..وبسبه البطاقات ...ــ زينه..,انت ؟.. طالع لها يتأملها ــ الحين بخير ..لا بألف خير .. بس شفتج ..مابي شي من هالدنيا . قريتي رسالتي ؟؟. هزت المها راسها بأي .. ــ للحينج شايله علي؟.. المها ــ خل نقول انه الشيطان وزك يوم سيلين ..والمسجات ؟؟والورد اللي طرشته لي فالمستشفى ؟.. طالع لها مرتبك ــ الورد ..تستاهلينه لاني انا السبب .. لكن الرسايل انا اعتذرت عنها .. طالعت له المها ــ اعتذرت ؟؟... متى ؟؟.. استغرب جاسم ــ بعد مسج الرمش المستحيل .. طرشت لج مسج اعتذرت فيه ..واني اسف ماراح اطرش لج اي مسجات لين يصير شي رسمي.... طالعت له المها ــ ماوصلني شي.. ــ ليش ؟.. ــ لاني كسرت الجهاز والكرت بعد ماوصلني مسجك الاخير .. ـ شنووو ؟؟؟... ــ ايه ..ماكنتي ابي اي فرصه اني استمر بهالمهزله .. طالعها باعجاب .. كبرت بعينه .. تم يتأملها بعيونه .. كانت لابسه دراعه اماراتيه بيج مع شك على الاكمام و الصدر والشماغ على رقبتها .. ورافعه شعرها ذيل حصان عالي .. في اذونها حلق صير على شكل مظلة من ذهب .. ورافعها غرتها بكلبس فيه قلوب لونه وردي وابيض .. طالعا بانبهار ..بهالبساطه وهي قمة في الجمال ..بعدين انتبه لشي.. قرب منها بقوة وهي كانت تبي تهرب لكن تجمدت اوصالها لما اخذ الشماغ برقه من رقبتها .. صرخت في داخلها ــ لالآلآلآلآلآلآ,,,,انكشفتي له .. تم يطالع الشماغ بانبهار .. يتأمل اطرافه ..شم ريحته ..كانت تشبه عطره ..وفيه من عطرها .. ــ المها .. التفت المها لاخوها راشد .. ــ هلا .. راشد ـ شله واقفين بالحوش .. دخلي مع زوجج المجلس .. ــ وانت .. راشد ــ انا دقايق وجاي ..جاسم اشوفك ماسك هالشماغ .. لوعت جبدي المها فيه ..فوق الشهر وشي وهي تلبسه وكل مااسألها تقول موضه ..يله روحوا المجلس دقايق وبلحقكم . ابتسم جاسم لراشد مجامله . ولحق المها اللي راحت شرده للمجلس ..واول مادخلت مسكها من يدينها وثبتها عالطوفه عشان ماتهرب منه .. ـــ اعترفي .. المها بخووف ــ شنوو .. ــ شماغي ؟؟.. كانت يد المها ترتجف بين ايدينه ـ ايه .. ــ يعني ماتكرهيني ؟؟... هزت راسها بلا .. تركها وتنهد بارتيح والفرحه مب واسعته ــ الحمدالله . استغربت المها من ردة فعله ,, طالعت له وهي تضم يدينها وتحاول تهدي عمرها ــ شفيك؟ طالع لها بنظرة حالمة ــ كنت خايف انج تكرهيني .. كان الشماغ بين يدينه ..قام وقرب منها ..كان حضوره طوله هيبته ..عطره ..كلها ضدها .. ارتجفت بخوف .. كان وااثق وهو يقترب .. لفت راسها عنه ..لكنه حط الشماغ حول رقبتها .. ولفه برقه على رقبتها .. وهي تصنمت .. همس : ـــ احبج .. وشيلتج اللي انام كل ليله وهي بين يديني .. تشهد .. واليوم انا انسان سعيد .. عرفت انج ماتكرهيني ... وهذا يكفيني .. دنق وحبها على راسها بعدين رفع راسها باصبعه .. طالع لها نظره غريبه .. تركها وطلع ..وتمت المها متصنمه ..كان قلبها يدق بسرعه 180 دقه فالثانية .. احساس غريب ذاب في دمها ..ريحته سكنت انفاسها ...جلست على الكرسي .. وحطت يدها على قلبها ــ احبه ,,اي احبه .. مافي مناص من حبه .. __________________________ نزل حمد من غرفته وهو يصفر .. طلعت ديمه من غرفتها وصارت تمشي جنبه ــ لاتصفر مب زين .. طالع لاخته ــ شخبارج ؟... ــ الحمدالله .. وانت ؟ ــ ماشي الحال .. كان يقلب بجواله .. غريبه ماجاه مسج من منى من زمان .. كان يعرف انها منى ..,وكان يفهم رغبتها في الفضفضه .. طلبت منه من اول مسج انه مايرد على مسج وان كل اللي تطرشه يكون خاص فيه .ماتسمح له يوريه لحد .. كانت امه تحت تقرأ الجريده .. جلس هو وديمه جنبها .. ــ شلونج يمه .. ــ زينه .. ديمه ــ يمه للحينج زعلانه مني؟ ام منصور ــ لا .. بس سمعت خبر كدرني .. ديمه وحمد ــ خير يمه ؟؟... ــ اخو منى اللي مايخاف ربه ..زوجها لشيبه .. انصدم حمد وشهقت ديمه ــ شلللوووووووووون .؟؟ هي مب مخطوبه لحمد ؟ ام منصور ــ زوجته اكيد العبت براسه .. حمد مطول لين يتخرج .. والشيبه اللي خذته عنده فلوس وحلال بس ماعنده عيال .. متزوج حرمتين قبل منى.. حمد ــ هي تزوجت تزوجت ؟؟يعني عرس وطق ولا حد يعرف ؟؟.. ام منصور ــ لايمه .. بدون عرس وبدون زفه .. مسكينه ..طول عمرها فقيره هالبنت .. قام حمد وطلع فوق وقعد يقلب المسجات لين اخر مسج .. "انكتب علي الشقا ... انكتب الهم والحرمان .." عصب بقوة .. مسك مفتاح السياره ونزل تحت معصب وركب سيارته ساد اذونه عن صوت ديمه وامه .. وساق مسرع مب عارف وين يبي يروح .. _______________ كان فهد في المجلس لما سمع صوت سياره تدخل بيته .. طلع برا كان حمد داخل سيارته نزل معصب .. ــ انت شلون تزوجها وهي مخطوبه لي ؟؟ ـ حمد اهدى .. لكن من قرب حمد ضرب فهد بوكس على وجهه .. فهد مسك يدين حمد وصرخ فيه ــ هيييييييييييي اعقل .. حمد يصاارخ بقهر ــ فوق انك مخليها خداامه تحت رجووول زوجتك .. فوق انك تزوجها بغير شورررها ؟؟.. انت شنووووو انت ماعندك انسانيه .. انت .. ــ حمد .. انصدم حمد من الصوت .. التفت لقى منى لابسة عبايتها .. انصدم .. هذي منى.. عبايتها كشخه اخر موديل والالماس في يدينها ..ووجهها كله مكياج .. كانت خصله من شعرها طايحه على وجهها .. شعرها الكستنائي صبغته اشقر .. ـــ انا ماتزوجت غصب عني .. وفهد ماغصبني على شي .. حس حمد انه غارق بين ثلج ــ شنو؟... منى وهي رافعه راسها تطالع كل شي الا هو ــ انا تزوجت برضاي .. اترك اخوي .. انا ماكنت ابيك اصلا من الاول ... اكبر شوي وعن حركات اليهال .. حمد انصدم . .. ترك فهد .. ورجع ركب سيارته وطلع بسرعه من البيت مثل مادخل.. ماحس بالاهانه في حياته مثل هالمره ... انقهر و حس بكره .. اكيد هيتكابر ولا تدافع عن اخوها . ... ركب السياره وكانت هذي اخر مره يفكر بمنى.. لان خلاص ..صارت لشخص ثاني ....مب من حقه يفكر فيها ... طالعت منى لزوجها الي في اواخر الاربعين واللي واقف يتفرج من باب المجلس .. وقربت من اخوها وقالت بهمس ــ لاتظن اني كذبت لعيونك .. بس ماحبيت اراوي زوجي ان اخوي بايعني برخيص ..ولا حبيت ابين له اني مالي سند واني مطروده من هالبيت .. انت في حياتي .. انسان حقير .. انسان باعني لعيون زوجته والفلوس .. انت نكره .. صوره ..اسمك اخوي .. بس والله لو احتجت شي .. ماني لاجئه لاشكالك انت وخوانك ..عيال خالتي ارجل منكم .. .. ومابيك تتكلم حرف جدام زوجي . ..ولاتتدخل في حياتي ..تروح تدخل الحين وتقول له ان حمد كان متعشم يتزوجني بس انا مابيه .. لانه صغير ومتهور .. لفت منى ورجعت داخل كانت حياة مرت اخوها تطالع من الزجاج .. كان السبب الحقيقي ..ان منى ماكانت تبي تحسس حمد بالذنب .. ان كونه طالب .. هو اللي ضيع فرصتهم في الزواج .. كل شي قسمة ونصيب.. وزوجها رغم كبر سنه .. شاريها .. صج متزوج حرمتين غيرها .. لكن .. دامها في بيتها بروحها .وبيتها باسمها ..محد له عندها شي ...لكنها ماقدرت تمنع دمعة .. لشيء كان ممكن يكون .. لكن للاسف ..