على رمال سيلين - الفصل 72 - بقلم غجرية - مكتملة | روايتك

في الليل راحت المها لعند جدتها ..ــ جدة .. متى جمعة حريم العايلة ؟؟ اسغربت ام عبدالرحيم ــ بعد اسبوع .. ــ انزين جده ..شوفي انا براسي شوور ..وابيج تعطيني على جوي جدام الحريم .. ــ شوراج ؟ ــ جده صدقيني .. ماوراي الا الخير .. بتعزمين اخت مرت عمي عبدالرحيم ؟؟.. ــ اي كالعاده .. تعرفينها تحضر كل عزايمنا .. ــ عيل ..ابي منج كلمة .. ــ المها لاتفشليني عند الحريم !.. ــ لا ياجده ولله مافشلج ..بس كل كلمة اقولها ابيج تأكدينها ..تقول كلام المها صحيح .. استغربت ام عبدالرحيم ــ انزين .. ــ جده اوعديني .. ــ يابنتي شله اوعدج شالضمان انج مابتخورينها وتجيبين العيد ..وتوطين راسي عند الحريم؟؟ ضحكت المها بقوة ــ هههههه ..بجيب العيد وطوايفه ..بس لاتخافين ..مهي المها بنت يوسف اللي توطي راسج بين الحريم .. كل اخر الشهر حريم العايله يجتمعون في بيت من بيوت العايله وكان الدور على بيت ابو عبدالرحيم في عزيمه كبيره .يجتمعون يعرفون اخبار بعض ويبشرون بعض او يواسوون بعض .. كان هالتقليد في عايلتهم من ثلاثين سنة ..بس الفرق انه قبل كان كل اسبوع ..لكن الحياة قبل مب نفس الحين .. الحين الحريم تجتمع كل شهر ..وودهم يخلونه كل سنه ..بس العياايز الكبار مب طايعات .. قالت ام عبدالرحيم ــ رحتي السوق؟ ــ لا ؟؟ليش؟ انصدمت ام عبدالرحيم ــ يابنتي عرسج بعد كم اسبوع وملجتج بعد اسبوع وشي ..ماجهزتي؟ المها بعبط ـ لا جده ..مب ناويه احضر هههههه.. ــ راااشد ...راااااااااااااشد .. جا راشد من الصالة لغرفة جدته ــ لبيه . ــ لبيت غالي ..لازم بتاخذني واختك السوق ..وراهم عرس بعد اسابيع والبنت ماتقضت .. ـــ زين جده .. المها ــ مااابي راشد ــ عن العياره .... طلع راشد ودخلت خديجه ــ الساعه صارت عشر مهووي .. خل نروح .. ــ اوك ..يله جده استودعك الله الذي لاتضيع ودائعه .. ابتسمت ام عبدالرحمن ــ محفوظة يابنتي باذن الرحمن .. طلعوا للسيارة قال راشد مستغرب ــ اخت المها ..شلي طرا لج تجيبن لجدتي هالحزة .. ــ شي ..كدووج بكره العزيمه بتحضرين ؟ ــ لا مابتحضر .. طالعت المها راشد ــ ليش تقول انها مابتحضر ؟ ـ انتي شدخلج؟بيني وبينها .. بكره بروحج بتقابلين المعازيم .. ــ بدق على ديووم حضوورها بكره مهم جدااا.. خديجه منحرجه وهي تتذكر كلام راشد اللي قاله لها فالصالة ــ شوراج يابنت يوسف ؟ المها ــ احم الخير والحمدلله ... كانت خديجه تفكر بكلام راشد وهي منحرجة .. طلب منها تروح بكرة بعد أنا اثق بمبارك ..انتي بنت عمه مابيرضى لج الاهانة..بياخذج مشوار بعدين ترجعين على طول بيت جدتي .. لان المها بتنام هناك وانا بروح سيلين .. هذا زوجج .شهر وشي وتنتقلين لبيته ..يبي رايج في الاثاث وفي التصاميم .. لاتنحرجين منه ..سمعتي؟ هزت خديجه راسها احراج .. .. ___________________ ثاني يوم المها ونوف وديمه يشرفون على كل شي .. المها ونوف يتفنون بالحلو و ديمه تذوق وتساعدهم .. ـــ بتجي العنود بعد شوي .. المها ــ الله ..اشتقت لجمعتنا .. نوف باستغراب ــ وين خديجه ..؟ المفروض ترجع من دوامها الحين .. المها ــ اي والله اختي لايكون راشد نساها ! هنا ديمه قامت تضحك بهستيريا والكل يطالعها مستغرب !. في السيارة ..كانت خديجه منحرجه ملتصقة فالباب خايفة .. ــ خايفه مني؟ هزت خديجه راسها بلا .. ..تمم ساكت طول الطريق لين وصلو محل ديكورات .. ــ بنختار ديكورات الغرفه .. تعالي ننزل.. نزلت خديجه وراحت المحل ..بعد ساعتين اختارت ديكورات الغرفه والتصاميم والالوان وحست ان مبارك اعجبته اختياراتها .. ــ بنروح الحين عشان اراويج الغرفه .. هزت راسها بدون ما تتكلم .. خذها وشافت الغرفه اللي اختارها مع كل الملحقات ..عجبتها وايد ومع الديكورات بتطلع فلته .. هزت راسها اعجاب وموافقه ..خلاها على راحتها ماحب يضغط عليها مع انه مشتاق يسمع منها حرف .. بعدين راحوا للاستوديو الي قالت له عنه ديمه .. دخلت خديجه وكانت المصورة خليجيه ..كانت خديحه لابسة بدلة كشخه لونها بني وذهبي ومكياجها خفيف ..ساعدتها المصورة وسوت لها شعرها ... جلست جنب مبارك اللي كان منبهر فيها ..تم يطالعها باعجاب وحنان استغلته المصورة في لقطاتها ..وبعدين طلع الدبله والشبكه والساعه و تموا يتصورون و الابتسامة مانعدمت من على شفاتهم .. ______________________ كانت الحريم يتكلمون ويشربون القهوة لما جلست ديمه جنب المها جنب جدتهم .. وجنبهم العنود ونوف ..الجمعه كلها حريم كبار مايجون من بنات العايله اي حد عشان جي قعدت نوف والعنود وديمه والمها معاهم ..وحست المها انه الوقت المناسب لخطتها الجهنمية ... المها بصوت عالي ـــ جده .. رفيجتي تحن علي تبي ديمه لخوها .. شرقت ام عبدالرحيم بالقهوة وطالعت المها منصدمه ــ ها ؟؟ ردت المها ــ ادري ياجده ..قلت لها مافي امل ديمه محجوزه لراشد اخوي ..صح جده ؟؟ تجمدت ملامح ام منصور واختها وطالعوا بعض بصدمه ..طالعت ديمه للمها وهي تشوف في ملامحها فرحه غريبه ..اسكتت جدتهم شوي بعدين قالت ــ اي ..صح ... المها ـ اي قلت لها اخوي حاجر عليها بس بغيت اتأكد منج .. وحده من الحريم الكبار ــ اي مصير البنت لولد عمها ..هذا الكلام الصح .. وحده ثانية ــ والله راشد زين الشباب تستاهلينه ياديمه مبرووك يابنيتي .. بلمت ديمه فجت حلجها تبي ترد لكن المها الكزتها بكوعها وهزت راسها باتجاه الحرمه .. المها ــ الله يبارك فيج يا خاله .. كررت ديمة بآلية ــ الله يبارك فيج ياخاله .. طالعت ديمه ناحية امها وانصدمت لما لقت خالتها معصبه وتتكلم في اذونها ووامها تحاول تهديها.. المها ــ عاد ان شاء الله ياجده نفرح برااشد وديمه في عرس بتتكلم عنه الدوحه بكبرها .. ام عبدالرحيم ــ ان شاء الله .. كانت نوف تراقب الموقف مصدومة .. ماقدرت تتكلم ولاتعلق ؟..شقاعده تسوي المها ؟؟ ...واضح من نظرات ام منصور انها بتطين عيشتهم !.. العنود تطالع لهم مبتسمة وهي تعرف المها ..ماتسوي شي عبث .. تم الكل يبارك لديمه وديمه ترد بوناسه وخجل وتشكرهم ..وحاولت تبعد عينها عن امها .. اول ماخفوا الحريم وهم ماعندهم سالف هالا ديمه وراشد ..اركضت نوف للتلفون ..واتصلت بمنصور ــ منصوور .. ــ لبيه ياحياتي ؟ ــ منصور ابيك تترك كل شي بيدك وتروح بيتكم .. ــ خير في شي ؟وانتي من يجيبج ؟ ــ مادري بس اعتقد عمتي بتسوي شي في ديمه .. ــ شقاعده تقولين ؟ ــ انت استأذن الحين وانا بقول لك كل شي في مسج .. ارجوك طلعت عمتي من خمس دقايق ووجها اسود مايبشر بخير .. ــ رايح الله يستر.. كانت خديجه داخلة البيت وشايلة بيدها كيسه صغيرة .. ــ راحوا الحريم ؟ المها بلامبالاة ــ اي ..تعشيتي ؟؟ ــ اي .. .. ــ انزين دقي على ريلج خل يروح بيتهم ويوقف بصف ديمه .. ــ ليش ؟ ــ بخبرج بعدين بس قولي له هالكلمتين .. سوت خديجه اللي قالته المها وقالت لمبارك انها ماتعرف شالسالفه بس المها خبرتها جي ... طول الوقت في السيارة .. كان حمد مستغرب .. امه ساكته معصبة . ديمه تطالع من الدريشه على ملامحها خوف .. كل مره امها تطالع ورا .. لكن ديمه تتحاشاها . . اول ماوصلوا البيت كانت ديمه بتشرد لغرفتها لكن امها امسكتها من شعرها وجرتها ـــ شسويتي انتي والزفته بنت عمج ؟؟.. دخل حمد ــ شفيكم ؟؟ دخل منصور ومبارك في نفس اللحظة .. ــ شفيكم ؟؟ ام منصور ــ هالمفعوصه تستجري هي والوقحه بنت عمها و يعلنون جدام الحريم ان راشد خطب ديمه !!..شالوقاحه ؟؟ شقلة الادب .. كانت ام منصور مع كل كلمه تجر شعر ديمه وتعورها وديمه ساكته كاتمه ألمها .. ــ انتي ياقليله التربيه ..ام خطيبج قاعده وقاعده بكل وقاحه تستقبلين التهاني مستانسه ..