على رمال سيلين - الفصل 58 - بقلم غجرية - مكتملة | روايتك

راحت ديمه جاره نفسها غصب للحمام ..ادخلت وصكت الباب وغصب عنها دموعها نزلت .. تذكرت كلمات هيا ورجع الحوار بتفاصيله لذاكرتها .. (( روحي سلمي على خالتج ام محمد تراها هالفتره تبي تزوج محمد .. )) ردت ديمه ــ نعم ؟؟.. لا طبعا حد قال لج اني ادور ريل ؟؟ هيا ـ عمرج 18 منتي صغيره ..ناطره من ؟؟ سكتت ديمه وماردت ولفت ويها بعيد عن هيا اللي قالت ـ لايكون ناطره راشد يجي يخطبج ؟؟ لاتحلمين ... ديمه ــ شقاعده تقولين ؟ هيا ـ ليش ماسمعتي عن اتفاق امي وابوي ؟؟ انا لواحد من عيال عمي وانتي لواحد من عيال خالتي ؟؟...روحي سلمي عليها واعرفي السنع .. انصدمت ديمه حزتها ــ انتي جذابه .. هالاتفاق بس مبارك وحمد .. هيا ــ روحي اسألي أمج .. ولاتنطرين حبيب قلبج رشود . ماتشوفينه ماتقدم للحين ؟؟... امشي سلمي عالحرمه ...بسبقج .. لكن حزتها ديمه كانت بعالم ثاني كانت حاسه برجفه باعماقها ....((راشد يحبني .. مستحيل يتخلى عني ..)) وابتعدت بعيد عن خالتها عشان ماتشوفها وصارت تهرب من رفقه هيا ... افتحت صنبور الماي وغسلت وجهها ... وتممت ..((لا يا راشد .. لا ياولد عمي .. لاتتركني بعد ماتعلقت فيك ..)) ... انطرت لين حست عمرها طلعت اللي في خاطرها من دموع ..بعدين اطلعت راحت اشربت ماي ولما رجعت لقت خديجه والمها نايمات ... حطت الاكل فالثلاجه وحطت راسها ونامت .. _______________________ من ساعه بس طلع سالم من العمليات بعد عمليه خطيره لعموده الفقري ... راشد ــ الدكتور يقول انه حالته خطره لكنه نجا من الصعب .. واهم شي ان الحبل الشوكي ماتضرر .. سعيد ــ الحمدالله .. متى نقدر نشوفه ؟؟ راشد ـ قعدتنا مابتفيده ماحس فينا ...خلنا نروح نحجز بفندق وباجر الصبح نرجع نشوفه .. سعيد ـ خوش راي...بتكلم عمتك ؟؟ راشد ــ لا ..مابي اخرب عليهم فرحتهم ...خليه دام حالته مب مستقره ..ننطر ..بسكر جوالي لين تستقر الحاله .. سعيد ــ الله يستر ياراشد ..والله ان قلبي يدق بقوة ..خايف....هالولد توه باول شبابه ..و... وماحس سعيد بدموعه اللي طاحت ولا بخنقته ..سنده راشد لين جلس ــ ياعمي خل ايمانك بالله قوي .. مكتوب له وان شاء الله الله يشفيه ويقوم بالسلامه ...بس اذكر الله ..وادعي له .. سعيد ــ يالله ..يالله ..لاتعاقبني في ولدي ..عاقبني في صحتي في عافيتي في فلوسي ..بس رجيتك لاتعاقبني في ولدي ... استغفر راشد وهو يربت على يدينه ــ ياعمي مايصيرر ...اطلب من الله يشفيه ..ويقومه بالسلامه ..وربك رحيم .. تم سعيد يستغفر ويدعي ..ودموعه تناجي ... ___________________________ تحت اجهزه التنفس الصناعي كان سالم ينادي ... العنود .. الممرض ــ هو واعي ؟؟ الدكتور ـ لا .. تحت المخدر ..شكله بيحلم .. الممرض ــ مسكين ..بأول شبابه .. الدكتور ــ الله يعيــن اهله .. حاول انه مايتحرك كتير ..وانا في مكتبي انده لي بس مع أي تطور .. الممرض ــ هيتم على جهاز التنفس مده طويله ؟ الدكتور ــ للاسف الرئتين انهارو .. حتى يرجع التنفس ونسبه الاكسجين عنده شبه طبيعيه هيتم تحت الجهاز ... وطلع الدكتور من عنده وتم الممرض الي كسر خاطره هالشاب اللي كان ضحيه دهس وهرب .. لان اللي صدمه فالسياره ما كان عنده ضمير يوقف ويشوف حالته كمل عليه وشرد خايف من الشرطه .. . ___________________ فتح عيونه و.. طالع الساعه كانت4 الفجر ..طالع يمينه كانت فاطمه نايمه بهدوء .. قام ونزل تحت .. شاف البيت اللي تحت مفتوحه انواره استغرب .. لقى ابوه فالصاله لابس جلابيه نوم .. .. ــ يبه .. ــ صالح ..شمصحيك ... ــ صحيت شتسوي هنا يبه .. وجات خديجه من المطبخ وشعرها جامعته على جنب وبيدها قلاص ماي .. ــ صباح الخير ياعريس ...صباحيه مباركه. ــ خديجه ؟؟.. شفيكم شمقومكم من الفجر ؟؟ بو عبدالرحيم ــ نسيت اخذ دواي .. وانا مااعرف الغرش كلها مثل بعض ..بس جيت اشوف طيبه ولا حد هنا ناديت طلعت لي خديجه .. .. صالح ــ بس انا موصي راشد يطلع لك الحبوب .. بوعبدالرحيم ــ راشد محد من امس .. خديجه ــراشد سافر امس سفره اضطراريه لاتسأل وين وليش ماادري.. صالح ـ غريبه .. انزين انا ببدل ملابسي وارجع لك يبه .. بوعبدالرحيم ــ خذ راحتك بعد شوي بيأذن ونروح جميع للمسجد بس لو خديجه تكمل معروفها وتسوي لنا ريووق معتبر .. خديجه ــ تامر امر ...دقايق .. بوعبدالرحيم ــ مايامر عليج عدوو ..فديتج بروح اغير ملابسي وارد لج .. وركضت خديجه للمطبخ سخنت الحليب الابيض وحطت لهم الجبن والسلطه والبيض واللبنه والعسل والتمر و خبز وسوت شاي على جنب وحطت القهوة على النار وودت الريوق للصاله ورجعت تراقب القهوة ..تعرف ان جدها ياكل كل يوم 7 تمرات ...وشرب حليب ابيض بدون سكر ويحب يتقهوى عقبها ... ..تمت تراقب القهوة وصورة مبارك في خيالها وهو يقول كلمات الاغنيه بصوت ثقيل ..حست بقلبها ينقبض ...ملك قلبها من زمان ..وآن الآوان .. خلصت القهوة طلعت الصاله لقت الجماعه توهم اجتمعوا وكاشخين على سنجه عشره ــ يه يه يه ...صالح وآمنا بالله معرس متكشخ ..جدي ..ليكون بس سويتها وعرست ؟؟ ضحك ابو عبدالرحيم ــ لا ما عرست .. خديجه ــ اجل ليش هالكشخه من صباح الخير ؟؟.. صالح ـ بنروح المسجد عقب بنمر الطباخ نتفاهم معاه .. حطي لي قهوة .. ـ مابتتريق ؟؟ صالح ـ باقي اكـلج ..الحمدالله ..ريوقن زين ..حطي لي قهوة .. خديجه ــ كم تدفع ؟؟ .. صالح ــ راحت ايام الذل الحين اصعد فوق وانادي المره تسوي لي قهوة احسن من قهوتج ألف مره .. ضحك بو عبالرحيم وشهقت خديجه ــ افااااااا ...خلاص سحبت علينا يعني ؟؟ لالالا .. افا يا عمي .. تستغني عن قهوتي بهالبساطه ؟؟.... صالح ــ تصبين ولا ؟؟.. خديجه ــ أصب وامري لله ..تم الاستغناء عن مهامنا المطبخيه .. بوعبدالرحيم ــ اشرب قهوتك بسرعه .خل نقوم لانتأخر عن الصلاه .. صالح ــ قاييم . بتردين تنامين ؟؟ خديجه ــ ايه بصلي واقعد الشله وارجع انام .. استغرب صالح ــ الشله ؟ ــ ديوم ومهوي . صالح ــ ايه ..شله الانس هنا ..شيفكني من لسانهم خل اشرد .. حبها راسها وطلع .. مرت خديجه جدتها وصحتها ومرت المها وديوم وصلت سبقتهم لين جروا انفسهم غصب وتوضوا وصحصحوا ... _______________________________ بعد المسائيه اللي تألقت فيها فاطمه تمت ديمه في بيت جدها وجات لها هيا بشر وسحبتها للغرفه ــ لازم ترجعين باجر .. ديمه ــ مابي ارجع .. هيا ــ باجر بتجي ام محمد وامي تبيج موجوده .. عصبت ديمه وقالت ــ مااابي .. ماابي لا محمد ولا غيره مابي .. هيا ــ مب بكيفج باجر بجي اجرج من هنا .. تبين تحرجين امي بعد مااتفقت مع خالتي؟؟.. حست ديمه ان فيها الصيحه ..بغت تصرخ على هيا لكن .. اول ماطلعت هيا امسكت جوالها .. بيأس اتصلت براشد ..لكن الجهاز مغلق ..تمتمت ((وقتك ياراشد ؟؟ وقتك تسافر ؟؟.. في عز ماانا بحاجه لك ؟؟.. )) حطت جهازها بجيبها وامسحت دموعها وراحت ....