رواية مابعــد الخــذلان - الفصل 24 - بقلم Cluod24 - مكتملة | روايتك

((البارت الرابع والعشروون)) × مجلس سعد .. جالس جنب خاله اللي جا معه .. مرتبك بس كلام خالد ريحه شوي انهم يشرون الرجال وماعليهم من وضعه .. وهو له ماضي سيء وانسجن بس بنظرهم انه تاب وسلك الطريق الصحيح وهذا هو بيتزوج ويستر نفسه .. سلطان يناظره بااحتقار بس ساكت عشان ابوه بس مايبي يحرجه عند الناس هه بالله باي وجه جاي بيناسبهم وهو ماضيه يسود الوجه مشاكل مع الشباب ومغازل وقله حياا .. ماسك نفسه بالعافيه .. لين طلع حمد وخاله الله لايردهم .. لف ع ابوهه : ليه مارفضته ع طوول ليه تعطيهم مهله يصدقون انفسم بعد اننا بنرضى نناسب هالاشكال خالد : سلطان عيب عليك تغلط ع الرجال اهتدى الحمدلله سلطان : اهتدى ولامااهتدى انا ماااطيقه ولااارضى اختي تاخذه سعد : انت ياسلطان اطلع منها انا عاجبني رجال كفو صح انسجن بس طلع وكون نفسه بنفسه مااعتمد ع غيره ولا شي سلطان يقاطعه : خل يطس يخطب من جماعته مانبيه يبه انا مااطيقه اقولك خالد : لازم تتعلم تصفي قلبك مو زين تشيل بقلبك وتحقد ع اشياء قديمه سلطان يناظره بقهر : انا ماني حاقد عليه بس ماابيه يتخالط فينا ماابيه حولنا ابيه بعيد عنا وكافينا خيره وشره "ولف ع ابوه" وبعدين يبه نهى بعدها صغيره ع الزواج × × وفي بيت مريم .. بعد ماراحت ام حمد اللي تمقلت نهى زين كانت دايما ماتعطيها بال بس هالمره غير ولدها خطبها لازم تتفحصها عدل .. ام سعد لفت ع بدور : ام حمد الظاهر ناويه ع نهى وهه خذيها مني الرجال بالمجلس يخطبون بدور وجا في بالها وليد ابتسمت : الله يسمع منك البندري بعد ماسمعت كلامها راحت جري للبنات بغرفتهاا : بناات بنااات البنات ناظروها بخووف .. البندري تاخذ نفس : عندي لكم خبررر ياهوو خبررر بفلوووس بفلوس ريمان تضربها ع راسها : تكلمي لاتحرقين اعصابناا البندري تمسك راسها بالم : ااي لاتضربيين شذى : تكلمي عاااد البندري ناظرت نهى وضحكت : في بيتنا خطــااب ريمان شهقت لما طرا عليها حمد اللي ماتدري عنه من بعد ماارسلت عليه وبلكته معقوله ماتحمل تنقطع عنه ع طول جا يخطب .. نهى وشذى بحمااس : مين مين هوو شذى تقرص ريماان : ياهووه واخيرا بنفتك منك البندري : الحين ع اي اساس حكمتو انها ريمان نهى تلف ع شذى : يعني احنا الاصغر ريمان سكتت تناظر البندري بترقب .. البندري تقرص نهى : يالمخطووبه شذى شهقت بحماس وخمت نهى : بتتزوجي قبلي يالخبله نهى بهتت ملامحها بخوف : ماابي يمممه البندري ضحكت : هههههههههههههههههه خيييررر نهى دفت شذى عنها وبجديه : وخروو عني مابي اتزوج لاا اخاف انا صغيره حرام ريمان : خلاص نوونوو اهدي ماصار شي للحين بسم الله عليك شذى جلست جنب توأمها وحضنتها : من جدك نهى نهى والعبره خانقتهاا لما حست بجديه السالفه : مابي مابي خلاص قفلو السالفه البندري تسند خدها ع يدهاا : مابتعرفين من المعرس شذى بحامس لفت عليها : اييه نسينا من هوو البندري : وليد ولد ام حمد شذى تضرب نهى بكوعهاا : خياانه بتاخذين مزيوني نهى دفتها عنها وطلعت من الغرفه زعلانه ومتضايقه .. ريمان جلست تفكر طيب اخوه جاي يخطب ليه ماجا معه عادي هي راضيه بحالته الماديه وهو يعرف بهالشي .. × × ضمت حمودي بشووق وهي تشم ريحته النظيف : اااه يارووح امك وحشتني "وتبوس خدوده" كيفك ياقلبي مرتاح هااه ام منصور : دامك مشتاقه له هالكثر ورا ماتاخذينه معك اسبوع ع الاقل وماظنتي فياض بيرفض خوله جلست وجلسته بحضنهاا : الصراحه كلمت راكان كنت خايفه يرفض بس الحمدلله قالي وقت ماتبين تجيبينه عندك عادي بس مدري عاد فياض ام منصور : ماعليك بيكلمه ابوك وماهو رافض ان شاءالله هند اللي جت وشايله صينيه القهوه نزلتها ع الطاوله : لو افنان مو زينه له ماقلتي تبينه هه عشانها طيبه وحبها خفتي ينساك خوله اللي صدق كان هذا مخوفها بس برضو مشتاقه لولدها وتبيه عندهاا : ماهمتني ام منصور : خلو عنكم المناقر ويله انا بروح بيت عمكم ولاتتاخرون راحو البنت غرفتهم يكملو تجهز .. خوله تعدل تسريحه شعرها ع المرايه : احس ماني طايقه اشوف بشاير بعد مارفضت منصور هند : اي انا اول شي كذا انقهرت منها بعدين عادي انتِ عشان ماشفتيها بعد اللي صار خوله : مالت عليها هي وامهاا قلتي لي ان بشاير ساكنه ببيت اخوها امم كيف عاد افنان معها هند تلبس عبايتها : ولا وحده تطيق الثانيه افنان ساحبه ع بشاير فالجامعه ولاكأنهم يعرفون بعض خوله ابتسمت بشاير من زمان ترفع ضغطها بتلصقها بفياض متعلقه فيه حيل وواضح حتى افنان دابله كبدهاا يالله وصلت فيها تسكن معهم .. كان الله في عونك ي افنان تجهزو بسرعه وراحو لبيت عمهم ابو فياض الله يرحمه .. عندهم مسويين عشا صددقه بسيط يتجمعون عليه .. حمودي ع طول فلت من يد امه وراح يجري للبزارين اللي يلعبون .. خوله نادت ع هادي ولد عهود : هاادي بالله انتبه عليه لايطلع الشارع هاادي : خلاص خالتي ودخلت البيت مع هند وسلمو ع حريم جماعتهم المعتادين مافي احد غريب .. جلست واخذت فنجان القهوه من منى وهي تدور بعيونها افنان اللي بس شافتها بالعيد ومااحتكت فيها ابدا واصلا ماطولت جات متأخر ومشت اول الناس .. × وبالحوش الخلفي .. قفلت من بيان اللي كانت تقنعها تكلم امها وتستسمح منها وتقولها ان امها حلت امر ريمان .. ماعطتها وجه وقالت لها هي بالنور ومشغوله مو وقته .. دخلت البيت عدلت شعرها عند اول مرايه .. ودخلت مجلس الحريم نفس الموجودين اللي سلمت عليهم قبل بس زادو هند وخوله .. اخذت نفس هالمره غير نظرتها لخوله قبل ماكانت تعنيها هالمره تحس ان شوفتها شبت النار بصدرهاا هذي كانت اول انثى بحياة فياض .. هذي ام ولده .. ام محمد مثل ماهو ابو محمد حاولت تطرد افكارها وهي تسلم ع هند .. تشجع نفسها عادي عادي فنو انسي لاتحسسيها بشي بالعيد كنت تووب شاطره سافهتهاا وماتهمك سلمت عليها ببرود قد ماتقدر .. وجلست بمكانها اللي كانت جالسه فيه قبل تتصل بيان هه مسويه نفسها مصلحه اجتماعيه مزنه ومن اول ماجت افنان وهي حاطه العين عليها بعد اللي قالته بشاير .. حاولت تلين نبرتها تبي تحر خوله بس ولا هي ودها توري افنان العين الحمرا قبل تتمرد عليهم حفيده توق : افنان يمه كيف الدراسه معك افنان ناظرتها بااستغراب "افنان يمه" هه وين اللي سلمت عليها بدون نفس اول ماجت ولا حتى سألتها كيفك حتى فياض ماعبرته وهو حبيبي مهتم يسأل عن صحتها وهي ترد بدون نفس .. ردت بهدوء وهي تحس بنظرات خوله عليهاا : زينه الحمدلله ام منصور : ومحمد وين تودوه لما تداومين افنان ومستغربه جدته وماتدري : عند حنين بحضانتها مزنه بغرور مبسوطه بمشروع بنتها حضانه منزليه : اييه ماشاءالله عليها حنين افنان شهقت لما سمعت ضربت الباب القويه وصوت فياض العالي الغاضب : وينكم عنه !!؟؟ افنان فزت بخووف فياض يصارخ ومعصب لييه ايش اللي صار اكيد شي كايد .. طلعت وقبلها مزنه وعماته .. ناظرت من وراهم وهي تتقدم شافت عهود جالسه قبال حمودي ع الارض وتمسح راسه وتعقمه وفياض يصارخ : طفل جاااهل مخليينه ع كيفه يدج بالشارع افنان جرت لحمودي بخوف : بسم الله عليه ايش صار فياض لما شافها صرخ وهو يناظرها بقهر وقلبه محروق ع ولده : انتِ وييييينك عنه جاينا الرجال المجلس شايله بيدينه والدم مغرق ملابسه يقول هذا ولد من وييينك عنه هااااه افنان بهتت ملامحهاا بخوف من صراخه ونظراته والحريم المتجمعات خوله لبست نقابها ورجعت لهم بسرعه اتجهت لولدها ولاهي معبره صراخ فياض ولا افنان تبي تتطمن ع ولدها وبس .. افنان تهز كتوفها برجفه وهي تشوفه يناظرها ينتظر جواب وعيونه تنطق عصبيه هذا اللي يقولو اذا عصب عصب : ا انا مادري فياض قاطعها : طبعا ماتدرين ولاتهتمين لو انه ولدك كان اهتميتي مزنه تقدمت بسرعه وصوتها عالي : اسسكت لاترفع صوتك عليهاا والله انها مداريه ولدك احسن من امه افنان لفت تناظرها وراها والدموع تلمع بعيونها "مزنه" اخر من توقعت توقف بصفهاا مزنه : ولدك من المغرب اخذه خاله ووداه لامه ودام امه استلمته افنان مالها دخل "ولفت ع خوله اللي حاضنه حمودي" ولدك كان بامانتها وينها هي عنه عطشه تحرك يدينها : استهدوو بالله ياجماعه ماصار شي هذا هوو الولد طيب الحمدلله عهود تلف راسه بالشاش وبهدوء وهو بحضن امه تلطف الجو : اي والله الحمدلله طيييب مافيه الا العافيه افنان تسحبت من بين الحريم قابلت بشاير اللي جايه تجري هي وحنين مسكت ايدها : ايش صاير افنان سحبت يدها منها وهي بالعافيه ماسكه دموعها .. مشت عنهم ودخلت غرفته وقفلت الباب .. رفعت عيونها لاتبكين فنوو .. هو متزوجك اصلا عشان ولده فطبيعي صار اللي صار وقام عليها هي لان هذي وظيفتها تنتبه ع ولده بس وتلقي الود والاحترام .. وماانتبهت عليه بتلقى الهواش وعدم الاحترام × × تتمشى بالصاله وتكلم امهاا : والله كلمتها عنيده ماتفهم ماتعرف تتغاظى وتسامح هالبنت فاديه : تبي تقطعني خلها تقطعني بس اختها المسيكينه لاتقسى عليها حرام والله صدكم عنها مارح يفيد بالعكس يزيد البلا بلا ممكن ترجع له بيان : ماعليك يمه ارتاحي انا بكره بجيكم العصر وبجلس مع ريمان واتكلم معها بهدوء وافنان الله يصلحهاا فاديه : زين حبيبي انتبهي ع نفسك بيان ابتسم بحب لتغير امهاا الايجابي : ان شاءالله وانتِ بعد فاديه بعد ماقفلت من بيان مسحت دمعتها اللي خانقتها طول المكالمه .. جفا افنان موجع لها قلبهاا .. وبيان البلسم الحنونه يالله كيف كانت تفكر تبعدها عن زوجها اللي تحبه بكل انانيه محد حس فيها وفهما الا بيان كيف تأذيها ع حساب مصلحتهاا خاصة انها للأان ماشافت اي رد فعل لطلال ريان جا من برا وقفل الباب وراه : يمااه انا جوعان مافي عشاا فاديه : تعشينا من زمان وين كنت هااه ريان يحك شعره الناعم : كنت عند ابوي بالمجلس "وبحمااس تذكر" اييه يمااه شفتي نهى انخطبت فاديه حاست بوزها : عشتوو البزارين ينخطبون من خطبها بالله ريان : حمد ولد جيراننا فاديه تنحت فيه تستوعب ..حمد!!!!!.. كيف ؟ مو ريمان تقولها انه يحبها ويبي يتزوجها .. كيف كذا يتقدم لااختهاا : متأكد خطب نهى ريان : اييوه متأكد كنت عندهم لما خطبو حتى بعد ماراحو سلطان جلس ينافخ مايبي حمد ويقول نهى صغيره فاديه حطت يدها ع فمهاا .. ياالله .. وريمان ؟ .. صارحتها انها حبته وعاجبها واذا جا يخطب بتوافق وراضيه بحالته .. حسبي الله عليه الحقير ايش هالحركه يخطب اختها ايش يقصد .؟ × × الصباح .. فتحت عيونها منزعجه من الصوت اللي مستمر ونغص نومتهاا .. رجعت شعرها وراا وهي تحاول تستوعب الصوت اللي جاي من عند الشباك برا الغرفه ماتدري هالغرفه تطل ع ايش دجــاج!!؟ جلست وهي تنتبه لحالها نايمه بلبس العزيمه وخرت شعرها عن وجهها ولبست نظارتها وطلعت جوالها من جيبتها تشوف الساعه كم .. 9 الصبح حمدت ربها ان ماعليها صلاه عادي رفعت عيونها للشباك وصوت الدجاج مستمر ينرفز وكأنها ناقصه .. وقفت بقهر .. فتحت الشباك بقوه شافت الدجاجات ينحاشوون : وجععع مالقيتو تطقطقوون الا عند راسي عما قفلت الشباك وجلست ع السرير بكسل وهي تسمع الدق ع الباب .. عهود : افنان حبيبتي افتحي انا عهود ماردت عليها مالها خلق احد .. عهود تدق ع الباب : افناان افنان تاففتت ثقاله الدم وراثه عند هالعايله هالحين انا نايمه تدق ع بابي وتزعجني ليه استغفرالله بس .. حتى التبن ولدهم نفس طينتهم دمه ثقيل مايعرف يضحك ويمزح بس ساكت ويوزع ابتسامات بدون رد فعل وهه اذا اعطاك رد فعل تقول مالت عليك ليتك ساكت ازين هفف ناظرت الباب كويس شكلها راحت .. مقهوره من فياض كارهته زود عن كلامه يبي الانفصال بدري طفش .. يروح يصارخ عليها قدام الناس .. اهه وقدام خوله ..شهقتتت وهي تضرب صدرهاا : لايكون لما درى انها هنا راح يسوي شخصيه قدامها ويهاوشني اييه اكييد وانا اقول ماهو طبيعي ليش يعصب كذا ويصارخ من متى فياض البارد الهادي يكون منفعل كذاا وقفت بقهر : طيب يافياض طيب لاابو الحب اللي يذلني الله ياخذك انت وياهاا حنيت لهاا هااه بدلت ملابسها ورتبت شعرها وطلعت وبعده راحت للصاله ..مرت الحمام .. شافت مزنه وبشاير وعهود وعيالها جالسات يفطرون : السلام ردو عليها السلامم .. وقالو لها تلحق تفطر معهم توهم حاطينه .. بشاير تناظر افنان اللي كسرت خاطرها البارح موقف لاتحسد عليه واللي قهرها خوله سكتت ماقالت لهم انه كان عندها افنان مالها دخل فيه انقهرت لما قالت لهم عهود السالفه تمنت انها هنا والله ماسكتت لخوله مزنه تناظر افنان بتفحص :الجو زين اليوم بنروح المزعه تروحين معناا افنان وحابه المزرعه بس مو طايقه فياض : مين يوديكم عهود ضحكت : رجيلاتنا افنان : جد بشاير : شفتي المزارع اللي اول ماتجين حارتنا هذي مزارعنا ومزرعه ابوي اخر وحده مو ع الطريق نفس عمامي افنان : اهاا خلاص عادي اروح معكم مزنه وبعد موقف البارح حنت ع افنان ذكرتها بنفسها لما كان ابو فياض يهاوشها عند الناس ومنيره جالسه تناظرها بغرور .. بعد الفطور تجهزو بسرعه وافنان متحمسه ولافكرت تسأل عن فياض او حمودي .. بتستمتع بالاجواء الحلوه وتنساهم طلعت من البيت وهي شايله سله القهوه والبنات شايلات باقي الاغراض وهادي وقصي يجرون قدامهم .. بشاير تمسك يد امهاا : تكفين يمه بمر بقاله ابو مصلح مزنه : اقول امشي بس سيده للمزرعه ياحبك للدجه بشاير : مارح اطول ع طول اشري والحقكم بسرعه عهود : يمه خليها تطس بتجلس تزن طول الطريق ههفف مزنه باستسلام تعرف بشاير اخر العنقود : طسي ووالله ان وصلنا المزرعه وانتِ مابينتي تشوفين شغلك عدل بشاير نطت بحماس شافت افنان تناظرها : تروحين معي افنان اللي من اول حابه بس منحرجه من مزنه بس الحين دام سمحت لبشاير خلاص : ايه عهود : ياسلام الحين تخلوني اشيل الاغراض لحالي بشاير نزلت اغراضها عند شجره واشرت لافنان حطي انتِ بعد اللي معك : نحطهم هنا ونرجع لهم ولا منتك عهود : والله لو انسرقو ياويلك بشرب دمك بدل القهوه بشاير : يييع اووفر وراحت مع افنان وهم يضحكون ع عهود .. افنان تتأمل القريه الهاديه والجو غيوم يجنن شافت حريم فارشات جنب بيتهم بالشارع وبس لابسات جلال وبرقع : وعادي هذول جالسات كذا بشاير : اي هذا طريق ماتجي منه سيارات عادي ولو مر احد زينا كذا متغطيات مااحد مهتم لهم اسرعي بس خل نعديهم لايفتحون معنا تحقيق من انتن افنان تمشي معها بسرعه وهي تناظر كل شي تمره تتأمل تفاصليه البسيطه .. دخلت البقاله وانصدمت من شكلها صغيره واللي يبيع فيها شايب ولابس نظارات .. بشاير اول مادخلت : سلام عمي بو مصلح افنان تناظر البضاعه البسيطه شبس ابو نص لها زمان ماشافته اخذت تشكيله شبسات مع بشاير .. لفت تشوف مجموعه البزارين اللي دخلو البقاله ومعهم ولد مراهق .. بشاير اول ماشافته ضحكت : شايفه هالبزارين كلهم عيال خواته افنان : وجايبهم البقاله الله يعينه والله لايضيعون هههههه وبعد ماحاسبوو كانت صدمه افنان من الشايب اللي يتفحص كل ريال ياخذه ولازم فلوس جديده اللي يعطيه قديم يرفضه .. بشاير كانت تضحك تقولها هذا بخييل يموت ع القرش بس عاد طيب ومسكين الله مارزقه بعيال غير مصلح اللي توفى وهو صغير اول مره تاخذ وتعطي مع بشاير براحه .. تحسها غير اليوم وصلو المزرعه واول شي طاحت عينها عليه فياض اللي جالس جنب عهود وع طول لف عليهم لما دخلوو مزنه : كان نمتن في البقاله احسن بشاير جلست بتعب : حرام عليك والله خلصنا بسرعه فياض ناظر افنان اللي جلست جنب مزنه بدون ماتقول شي او تناظره تعطي هادي وقصي من الشبس .. عهود اخذت سله القهوه وطلعت الترمس : اشووا جت بالسلامه بشاير : صبي صبي بس و انتِ ساكته افنان حاسه بنظرات فياض عليها مو طايقه تناظره اييه خلك كذا صامت لاتنطق بحرف حرروفك سم وربي . عهود بعد ماطولت تراقب فياض اللي كل شوي يلف لاافنان اللي مو معطته وجه .. تدري بااخوها ندمان وانه ماكان قاصد .. وقفت : قومو بنات الجو يجنن خل نتمشى افنان ماصدقت تطلع من المكان اللي هو فيه بسرعه وقفت : اي والله بشاير : انا مافيني والله رجولي توجعني من المشوار عهود ماحاولت فيها لانها ارتاحت منها .. ناظرت فياض بمعنى الحقنا .. وهو ع طول فمهاا يالله ياعهود اكثر انسانه تحس فيه وتفهمه تدري انه يبي يختلي باافنان بس هي مو معطته وجه حتى البارح بعد ماالكل راح .. دق ع باب الغرفه وماعطته اي رد .. حتى حمودي خلاه يروح مع امه متفشل بعد اللي صار يجيب حمودي لها .. شوي كذا وقف و ع انه يتمشى بالجهه الثانيه بدون مايلفت انظار مزنه وبشاير .. لف بين الشجر بسرعه وصار يدورهم بعيونه .. شافها بعبايتها والطرحه ع كتفها ويديها تلعب بشعرها جالسه لحالها وين راحت عهود.. ماانتظر اكثر تقدم بهدوء وقف وراهاا : حقك علي افنان سكتت شوي تستوعب وجوده .. وببرود بدون ماتلف عليه : طيب فياض جلس جنبها وبنفس هدوءه : ايش اللي طيب !؟ افنان لفت عليه تناظره تتأمل ملامحه الرجوليه : فياض فياض وعيونه تناظرها بلهفه عكس صوته الهادي : سمي افنان : بعد ماننفصل بتفقدني امم اقصد بتفقد اشياء مثلا اسويها لك وكذا فياض مو فاهم ليش السؤال اللي مستحيل يسمح انها تبعد عشان يفقدها اصلا ورد يسايرها : اي اكيد افنان بهدوء : مثل فياض يسلك لها : امم طبخك اللذيذ افنان : وبعد فياض يهز كتوفه : مدري مافي بالي شي افنان والنقطه اللي تبيها لان كل اجوبته ماهمتها لانها مارح تسمح له يبعدها عنه عشان يفقدها بلصق فيه لصق اصلي : امم وام محمد ايش فقدت بعد ماانفصلت عنها فياض وفهم لوين وصل كلامها : حياتي مع ام محمد انسيها ولاتتدخلين فيها افنان لمعت الدموع بعيونها كاسره كل الهدوء اللي حاولت تتصنعه : ايييه مااتدخل بس لما تأذيني بسببها غصب عنك بتدخل هه ياحبيبي انت دريت انها موجوده ورحت قلت يله خلني انافخ ع هالمسيكينه كبش الفداء عشان تطلع شخصيه عند بنت العم وتتحسر ع اللي خسرته وابصم لك ع العشره لو انها مو هنا كان صرت هادي ولاصارخت وسويت البلبله لان هذا مو طبعك فياض وهو يحس بقطرات المطر الخفيفه اللي بدت تهطل وبهدوء يحاول يمتص غضبها : والله مادري انها هنا افنان ترفع طرحتها ع راسها عن المطر وتوقف : اصلاً ماتهمني لاانت ولا هي ولا حتى محمد انا بس ابي احتراام بس فياض وقف معها وقدامها مانعها تروح : انا محترمك افنان وعمري مااذيتك هي لحظه غضب ماكنت حاس بنفسي انا كل شي اتحمله الا احد يأذي ولدي مابيه يعيش اللي عشته افنان تحس انها مو طايقته مجروحه منه حييل .. مدت يدها : خلاص بالله مو طايقه شي وخر عن طريقي سمعو صوت بشاير تنادي عليهم والمطر يزيد .. فياض تنهد ومسح وجهه عن المطر : اوك امشي بعدين نتفاهم بيدخلك البرد افنان مشت قدامه بسرعه .. شافت مزنه راكبه السياره والبنات يشيلون اغراضهم .. مزنه جالسه قدام ومنزله القزاز : يله بنمشي البيت المطر شد فياض راح للسياره وشغلهاا .. افنان شالت مع البنات اغراضهم وماامداها تجلس الا ورا فياض .. قفلت الباب ونزلت القزاز متجاهله تناظر بالمرايه .. ماتبي تشوفه خلاص بتستمتع بهالاجواء المطر بالقرى غييير عهود تضرب قصي ع ظهره وهو جالس بحجرها : لاتتحرك كسرت رجولي بشاير وهادي بحضنها : الحمدلله انه اسم ع مسمى مو مثل قصي هههههه افنان لصقت بالباب : خليه يجلس جنبي تعب عليك قصي يتحرك بوناسه : لا هنا احسن مزنه تتأمل من الشباك : ماشاءالله ياارب تجعلها امطار خير وبركه افنان لفت تناظر من الشباك ماترددت تمد يدها برا تحسس حبات المطر الله شعور جمييل .. غمضت عيونها وهي تحس بالهوا الخفيف وريحه المطر ويدها اللي صارت بارده .. فاجأه حضنتها يد دافيييه فتحت عيونها ودقات قلبها تزيد .. فياض حاضن يدها بيده لفت تشوف البنات احد انتبه يديهم برا ماحد شايف رفعت عيونها للمرايه شافته يناظرها ويده تشد ع يدها اووف نظراته فضيعه شكثرتأثر فيهاا ايش هالرجال .. بلعت ريقها وصدت تتأمل يديهم شعور مو قادره توصفه قلبها يدق بجنون لحركته تحس كل الزعل راح بحح يالله ليش انا عنده كذا خفييفه اتقبل اي شي منه ومااحقد عليه من قلب اوووف مني اووف شدت ع يده وهو يناظرها بالمرايه وابتسم برضا بشاير اللي كانت جنب الباب الثاني .. كانت منتبهه ليد فياض اللي مطلعها برا ونفس الشي افنان .. كانت مارح تلاحظ لو ماشافت نظراتهم وابتسامه فياض للمرايه ياااربي شهالرومانسيه .. وصامتين كعادتهم .. صدت عنهم تناظر برا وقطعت اي امل عندها انها ممكن تنكد حياتهم هذول يستغلون كل لحظه مع بعض ع الصامت بدون ماحد ينتبه لهم .. شافت الحب اللي بينهم قوي ماينهد بسهوله × × وقفت بااعتراض : نعــــــممم هه خريج سجوون جاي يخطب بنتي يخسي ويعقب والله ماعطيتها ايااه سعد بصوت عالي : قصررري حسك ياامره الراي مو عندك بدور تقاطعه بقهر : انا امهااا سعد قاطعهاا بصرامه : نهى تقرر لحالها هي اللي بتاخذه مو انتِ والله لو ضغطتي عليها مايصير طييب بدور سكتت تكتم غيظهاا هذا الناقص بعد .. والله ماياخذها لو يطير .. ليه ماياخذ بنت فاديه هي اكبر واحق بالزواج من بناتها محمد طلع ورا ابوه ورايه من رايه وكل شي ابوه يقوله حاضر عنده بدور ناظرت نهى الساكته وهاجده بمكانهاا تكتفت وابتسمت بدون نفس : ايش رايك عزيزتي نهى صحت بعد مااستوعبت ان اللي خطبها حمد مو وليد وبسرعه وخوف : لا لا لا شذى منشغله بقروب شله الانس تقولهم ان اللي خطب نهى حمد مو وليد وتحريات البندري تحريات كلب .. × تقرأ رساله شذى اكثر من مره عيونها مو مستوعبه وعقلها مو مركز .. بيان جالسه قبالها وع يمينها امهاا اللي قالت لها عن خطبه حمد لنهى ومو عارفه كيف بريمان .. بيان بنفس الوقت كاسره خاطرها اختها وبعد مقهوره منها ليش اذت نفسها بهالطريقه حرام فاديه انتبهت لريمان اللي متنحه بالجوال والدموع تلمع بعيونهاا : ايش فيك ريمان بيان لفت تشوفهاا يدها ترجف : بسم الله عليك ريمان تحس تنفسها سريع مو قادره تسيطر ع ردة فعلها قدامهم .. مو قادره تضبط نفسها ومشاعرهاا .. هذي اختي اختي شلون يخطبها وهو واعدني اناا ويحبني اناا ويتغزل فيني اناا فاديه بسرعه اخذت الجوال من يدها شافت محادثات البنات وفهمت .. بيان حضنت ريمان وهي تناظر امهاا اللي اشرت لها انها عرفت .. شدت ع ريمان اللي ضامتها وتبكي بصمت مصدومه ندمانه منحرجه من امها واختهاا بيان : حسبي الله ونعم الوكيل لاتبكينه لعاب وصخ مايستاهل دمعه منك فاديه جلست بهدوء : ماظنتي بدور ترضى تزوجه بنتها بيان تمسح ع شعر ريمان والقهر بصوتها : انا بروح لها واقولها ترفضه هالحقير مانرضى فيه كلنا ريمان تدفن وجهها بحضن بيان وبهمس مجروح : ااه اكرهه ليش كذا سوا فيني بيان : حبيبتي هالنوعيات بس يلعبون ع بنات الناس مايحبون صدق كذاب يلعب بمشاعرك اخخ منك شلون صدقتيه غبيه ليش عطيتيه وجه اخخ منك × × ناظرت الدولاب والاغراض اللي فوقه : احس شكلهم مكركب الغرفه خلينا ننزلهم ونوزعهم ايش رايك عهود : خلاص عادي وانتِ تفاهمي مع فياض بعدين ههههههه افنان اللي كانت تبي ترتب غرفته لحالها بس عهود لما شافتها اصرت تساعدهاا .. هي نظيفه بس مقصد افنان تستكشف كل شي فيها بس غامض مله اي شي خاص .. باقي الصناديق اللي فوق الدولاب تشوف ايش فيهم : اوك عهود اخذت الكرسي وحطته جنب الدولاب وطلعت عليه نزلت اول صندوق وناولته افنان .. افنان نزلت الصندوق ع السرير وبسرعه فتحته : ملابس شتاا !! عهود ضحكت : ايش ع بالك كنز تعالي بس خذي الثاني افنان اخذته منها : ملابس هذا كمان عهود شافت دفتر عنابي بعيد شوي شدهاا : ايه ومدت يدها بصعوبه تحاول تطوله .. لمسته اصابعها .. سحبته لين مسكته .. غمضت عيونها عن الغبار : كح افنان لفت لها وانتبهت للي بيدهاا دفتر .. عنابي .. عهود ناظرت افنان وهي تلف لها الدفتر : بدون تأنيييب ضمير بالله ابي افتحه بشوف ايش كاتب وليش مرفوع فوق افنان تناظر الدفتر بوضوح .. تعرفه .. كيف ماتعرفه وهذا ..دفترها المفقود.. × نهايه البارت الرابع والعشرون...