على رمال سيلين - الفصل 57 - بقلم غجرية - مكتملة | روايتك

في الطياره كان راشد وسعيد وجهم شاحب خايفين ومتوترين ..من اتصل سعيد براشد يقول له عن حادث سالم وهو متوتر .. راشد ــ شموديه مصر ؟؟ ؟؟.. سعيد ــ مادري.. المفروض هو ببعثته .. راشد ـ الله يستر .. سعيد ــ دري خربت عليك وضايقتك.. راشد ــ عمي شتقول ..سالم اخوي .. واكثر من اخوي .. سعيد ــ ااااخ ... الله يستر .. من جاني الاتصال ماعرفت اتصل باحد ..كنت بتصل باحمد ريل بنتي .. بس ...ماقدرت ...وقعدت اقلب الاسماء..كنت ابي اتصل بصالح بس اليوم عرسه .. ماخرب عليه ..مالقيت الا رقمك .. راشد ــ الله يستر ياعمي ... الله يستر . حس راشد بخوف ..وقعد يصبر نفسه .. حاله سعيد ماتسر ..وسالم في العمليات من الصبح . ----------- في العرس كانت حزة دخول العروس وكانت طيبه جابت لها سي دي عليه مقطع شعري اهدااء وبعده اغنيه لعبدالمجيد .. شهرزاد الحسن .. قبل دخولها اشتغلت الفقاقيع مع الدخان والمؤثرات الفانتازيه .. بعددين من وسط الدخان ادخلت وتسلط عليها الضوء وسط الظلام وساد السكوون ..لامست الفقاقيع بشرتها وانفجرت مخلفه قطرات صابون ... كانت فاطمه تسحر العيون فستانها حلوو مع تطريز على شكل طاووس على الطبقه اللي تحت وشك على الجزء العلوي باللون الأخضر والتركوازي مع اللون الاوف وايت .. ومسكتها عباره عن ورود زرقا وبيضا جوريه مع مجموعه من ريش الطاووس ... كانت مبتسمه بحزن ..بوحده .. وخطت وهي تراقب عبير وهي تتنثر الورد والمشموم في طريقها .. .. وتطالع لمصورة الفيديو مبتسمه .. لحظة تحلم بها كل عروس .. لكن فاطمه في خاطرها تمنت لو تسندها يد ابو ولا ام .. ولا اخو ..انزلت دموعها وهي تتصنع الابتسامه .في داخلها وحده وشعور بالفراغ ..دعت في خاطرها وهي تمسح دمعتها بطرف اصابعها ... ((ياربي انت الكريم ..خل لي في صالح العزاء . يارب انت الوهاب ..هبني الذريه اللي تعوضني يتم السنين اللي راحت ..احمدك اللهم وأشكـرك .) ) مر العرس على سلام ..وطلعت فاطمه لصالح اللي كان ناطرها في غرفه جانبيه رغم ان البنات حاولوا فيه يدخل القاعه لكنه رفض المبدأ .. وكانت خديجه مجهزه لهم خلفيه حلوة علششان الصور والفيديو... اخيرا لم وصلوا البيت وراحوا لقسمهم اللي كان طاغي عليه اللون المشمشي... اول ماجلست حط صالح يده على راسها وقال ((اللهم إني أسألك خيرها وخير ما خلقت له وأعوذ بك من شرها وشر ما خلقت له )) .. رفعت فاطمه راسها مبتسمه بخجل .. صالح ــ بروح اصلي ركعتين وارجع لج ..خذي راحتج ..هذه هي الغرفه والبنات رتبوا اغراضج .. ابتعد عنها ودخل غرفه جانبيه .. دخلت الغرفه ولقت البنات حاطين لها لبسها على السرير ومددخنين الغرفه ..ابتسمت حست انها منونه لهم الاسابيع الاخيره كانت في بيت يوسف الله يرحمه وراشد سكن في المجلس علشان تاخذ راحتها .. كانت على وضوء فصلت ركعتين وهي لابسه الفستان البست جلال الصلاه بعد ما فجت الجيبون اللي كان منفصل عن الفستان وخلته على جنب ..وتمت بالفستان بس وفتحت طرحتها لكنها تشربكت مع الاكسسوار اللي في شعرها .. طق صالح الباب واول مادخل ـ بعدج مابدلتي ؟؟.. كانت عيونه مدمعه ــ الاكسسوار علق في شعري ... طالع لها صالح ***** ــ اساعدج ؟؟ ابتسمت فاطمه ـ تعرف؟؟ صالح ـ لا طبعا ولا عندي أي فكره ...بس بحاول.. قرب منها وانتبه للشربكه ..وندم ليش تطوع بالاساس ..بعدين سألها .. ــ من اهم هذا الحلق ولا شعرج؟ اضحكت بخفه ــ اسمه اكسسوار .شعري طبعا ..اهم .. صالح ـ عيل .. لحظه .. وكسر باصابعه السلسه اللي كانت مسببه المشكله ..وانحل شعرها ..وحطا الاكسسوار على الطاوله وتمت فاطنه تدلك فروة راسها مكان العقده ... ـ مشكوور .. مد يده ورتب خصل شعرها المموجه بحنان (( تجين نتعشى ؟...)) هزت راسها باي ــ بلحقك بعد دقييقه .. طالعت لبسها ..ماحست بجرأه .. طالعت نفسها ورشت شوي من العطر اللي على التسريحه وطلعت بفستانها ..واقعدت جنبه على الطاوله .. _________________________ المها ــ تظنين ليش سافر راشد ؟؟ .. خديجه ـ مادري .. بس الله يستر .. وتمت تمسح المكيب عن عيونها .. ــ بنام بفساتينا ؟؟ المها ـ ملزومين مب جايبين معانا شي والوقت تأخر ..بكره الصبح بخلي جدي ياخذنا لبيتنا .. خديجه ـ جدي يسوق ؟ االمها ـ ادري بنوصل بعد ساعه مع البيت مسافه ثلاث دقايق هههه تذكرين يوم خذانا الجامعه من كم سنه ؟ .. خديجه ــ وشلونا نسى ..قعدت اصيح فالطريق جدي فديتك بسرعه الامتحان بدا وجدي اونه يسرع فديت روحه نقص السرعه عشره كيلو واول ماوصلت وشافني الدكتور قال خلاص تاخرت 45 دقيقه خخخ..حلفت له اني طالعه من البيت من ساعه بس سواقه جدي اخرتني وان ماعندي مواصلات .. المها ـ عاد عاد الامتحان لج ؟ خديجه ـ عاده بعد ماشاف دموعي .. والشي اللي شفع لي انه البنات ماطلعوا من القاعه فدخلني وحطني على جنب وعطاني الامتحان .. وحليته بسرعه .. المها ـ ويه فديته جدي .. زين يركز في الطريق ... شفتي مرت عمي ام منصور شلون تطالع لج ؟؟ خديجه ـ أي .. مارتحت لنظرات بنات اختها . .. المها ـ ولا انا .. مع انها طيبه وحبوبه بس اليوم كانت تطالع لج بـ,,,,غرابه .. خديجه ـ صج انها اول مره بالعاده ولا معبرتني بس بنات اختها يطالعون بحقد مب بغرابه .. المها ـ ماعلينا منهم .. بتنامين ؟؟.. خديجه يس . بس بروح اجيب قلاص ماي ويمكن اكل حاسه اني بموت من الجوع ماكليت شي من الفطور ..جوعانه ....بس مب عارفه اروح بفستاني ..ويديني جي طالعه فشيله يمكن جدي يشوفني ..وعبايه الراس مابي البسها مستثقلتها .. . المها ـ جلال الصلاه على الكرسي الي برا البسيه دامج مستثقله العبايه.. طلعت خديجه وشالت جلال الصلاه والبسته وراحت المطبخ وقعدت تحوس فيه بهدووء .. وفتحت الثلاثه وتمت مدخله ويهها فيها تدور بعيسى تلقى شي يفتح شهيتها ... ـ شتسووين ؟؟... تجمدت فجأه .. صوت مبارك ..شجايبه هنا .. وقفت فجأه فضرب راسها بقوة بباب الثلاجه العلوي .. ــ ايييي.. مبارك ـ اووو ..سلامات .اقعدي اقعدي .. رفعت خديجه الجلال على راسها تغطيه عدل وقعدت قبل لاتدوخ .. مبارك ـ سوري خديجه بس مااقصدت اخرعج .. انتبهت لاكياس على الطاوله .. سألته وجهها وردي من الاحراج ـ شجابك هنا ؟؟.. مبارك ـ ديمه ... ــ شفيها ؟ ـ قالت بتجي تبات معاكم ..وقومتني من النوم .. ـ وين هي الحين ؟ .. ـ دخلت من باب الصاله ..وصكرته ونست الاكل فالسياره فنزلت اوديه لها ..سبحان الله نصيبي اشوفج الليله ..تعورتي وايد ؟ . خديجه باحراج ـ لا .. مب وايد ... عن اذنك .. وكانت بتروح داخل ـ خديجه,, ـ لبيه .. ـ لبيتي في منى ..خذي هالكيس لديمه .. كان الكيس من ماكدونالد كبير ومعاه ثلاث بيبسي .. ـ تامر .. ـ مايامر عليج عدوو ... قربت منه تشيل الاغراض .. ـ تدرين في اغنيه لسعد الفهد .. ابي اهديج اياها .. انحرجت خديجه ..وشالت الاغراض وراحت عند الباب ..بس ماطلعت .. ناطرته يكمل كلامه .. مبارك ـ اسمها يوم شفتك ..كلماتها تقول ... يوم شفتك خفت من عيني عليك ... من كثر سحر العيون الناعسات كنه حسن الكون كله بين إيديك ... التقى بين الرموش الساحرات في عيوني شي ياعمري يبيك ... في حياتي لك ياروحي حياة لاتلوم اللي تولع حيل فيك ... غير شوف العين ماله سواة من جمالك هزني كل شي فيك ... من عيون وجيد وأهداب وشفاة لك بنار الحب قلب يرتجيك ... ولي عيون في دلالك حايرات لا دلال ولا جمال معتليك ... فوق مدلول الحلا حلو الصفات إن بعدت الشوق يجبرني أجيك ... وإن لمحتك أذكر الله في سكات ..وسلامتج ... حست خديجه بقلبها يدق بقوة ... وارتبكت ..ـ عن اذنك ...تصبح على خير .. رد وهو حاس بخجلها ــ وانتي من هل الخير .. اسرعت خطاها لداخل واول مادخلت لقت ديمه والمها يتكلمون عن العرس .. حطت الاغراض ووراحت عند ديمه وضربتها على راسها بقوة ـ’ آيييي ياعلج الــ....ليش طقيتيني .. خديجه ــ مره ثانيه لاتنسين زادج فالسياره !! بقتت المها عيونها وطالعت الاكياس وقالت ديمه متذكره ــ أي نسيتهم من جابهم ...؟.. بس ليش طقيتيني ... المها ـ مافهمتي ؟؟ هذي هي اغراضج الظاهر سي حسن نزل ينزلهم لج ولقى ست الحسن والجمال فالمطبخ خخخخخخخخ... خديجه وهي ماده بوز نص مستانسه نص مغتاظه ــ تقريبا ..الضربه لانه خرعني فالمطبخ وصدم راسي فالثلاجه . ديمه وهي تحك راسها وتضحك ــ كككك واانا شدخلني ؟؟... خديجه ـ وحده بوحده تصافي انتي وهو بعدين ... تمت المها تضحك بقوة .. ديمه ــ بس عن الضحك الهبل عمج فوق لايسمعج .. المها ـ صدق مانبي نزعجهم ,,ديمه انقذتنا وجابت لنا جلابيات بيت .. واشرت على دراعتها.. خديجه ــ الله يوفقج فديتج ... لان صج لاعت جبدي من الفستان ,,, وخذت الجلابيه وراحت لغرفه ثانيه بدلت ورجعت لهم .. ــ كل لبسج ازرق ؟.. ديمه ـ شسوي .. اعشق البحر ...على الطاري شرايكم نروح سيلين ؟؟.. خديجه ــ ياليت ..بس مب مع مبارك! ومدت يدها وخذت لها وجبه وتمت تاكل .. ديمه ــ ولا مع راشد .. المها ــ راشد مسافر .. خديجه ــ يامحلا القعده بالجلابيه مب الفستان احسه خانقني .. ديمه ـ مسافر ؟؟ وين وليش؟؟.. ابتسمت خديجه ــ للاسف السؤال اللي محد يعرف الاجابه عنه !!... كلوا كلوا .. حس ديمه انها فقدت الشهيه فجأه ..شلون يسافر جي بدون سبب يوم مهم مثل هاليوم ؟؟... المها ــ ديوم لاتستهمين .هو كلم عبدالرحمن والظاهر شغل طلع له ..كلي كلي شفتج اليوم انشغلتي مع هيا وما كليتي شي من البوفيه .. ماتدري المها انها سدت نفس ديمه بالمره خصوصا بعد الموقف اللي صار اليوم مع هيا .. ــ بروح الحمام حاسه بمغص كلوا وخلوا لي اكسترا من الشيبس اللي عندكم ..برجع بعد دقايق ...