رواية مابعــد الخــذلان - الفصل 21 - بقلم Cluod24 - مكتملة | روايتك

((البارت الحـــادي والعشرون)) × بعد ماخلصت تنظيف البيت وبخرته .. سوت لها كوفي .. جلست بالصاله : ايييه كذا الوحده تروق وتتهنى بالعطاله اخذت كتابها تكمله .. حبت الكتب التاريخيه ماتدري شلون كانت تكره ماده التاريخ بالمدرسه التاريخ شي جمييل يمكن كانت تكرهه لان اجباري عليها تحفظ مو مثل الحين هي اختارت الكتاب برضاها وتقراه وقت ماتبي هي .. والدكتور منذر القباني اسلوبه يجذبك تقرا ماتنتبه الا وانت مخلص الكتاب بدون ماتحس من جماله اخذت جوالها تشوف الرساله اللي جاتها .. شافتها من طلال .. ابتسمت مرسل لها صورته بالمكتب وهو يضحك بعباطه وكاتب عليها "هالمزيون يحبك" بيان متبسمه وتتأمل صورته : هفف مغرور بس احبه كتبت له "وانا اموووت عليه" × × طلعت من محاضرتها وهي مكشره زهقانه من الجامعه وحياتها وكل شي .. من اول وهي بالعافيه ممشيه بهالجامعه وبعد ماتخرجت بيان كرهتها بزياده .. ملل مافي بنات ع جوها والله مو غرور بس صدق مو لاقيه بنت نفس جوها تكون صديقتها .. دخلت الكافتريا .. اخذت لها عصير بس وجلست بمكانها المعتاد لحالها .. طلعت دفترها تخربش فيه وترسم .. تتذكر فياض البارح ومشاعرها اللي اعترفت فيهاا لنفسهاا .. متضايقه .. مخنوقه ليش يافنو حبيتيه ليش ماانتِ ناقصه وجع ارحمي حالك اللي جاك كفاك رفعت عيونها لما سمعت صوت بشاير وشلتها دخلو الكافتريا وكالعاده ضحك واستهبال .. تحتقرهم البارح لما رجعت هي وفياض كانت حنين رايحه .. بس اللي خلا صدرها يحترق بقهر ودها تسحب بشاير من شوشتها وتطلع قهرها .. بكل وقاحه منومه حمودي بغرفتهم ايش قله الادب هذي تدخل غرفه نومهم .. ماقدرت تسكت لما شافت حمودي نايم بسريره .. طلعت من الغرفه وراحت لبشاير بغرفتها دخلت وقفلت الباب وراها ماتبي فياض اللي كان بالحمام يسمع .. قالت لها وهي تتحكم باعصابها ونبره صوتها "غرفتي دايما اقفلها معناته مااحب احد غريب يدخلها حمودي اذا ماتبينه ينام عندك عادي نوميه بالصاله وانا اشيله وادخله غرفتي اووك" وطلعت بسرعه ماسمحت لها ترد عليهاا .. × هند تناظر افنان : خلينا نقولها تجي عندنا حرام دايما لحالهاا نوال تضحك : اسكتي بس هالمغروره مسويه انها فخمه اجلس لحالي هههههههه اسيل تمسك يد بشاير : بالله هي كذا بالبيت نفسيه بشاير تلوي فمها : يووه يووه نفسيه بس علي ولا عند فياض بس تتبسم وتتميلح ااه يابنات كنت احسها بويه طلعت انا بشير والله البنات يضحكوو .. نوال تضرب كتفها وتضحك : هههههههه ليه شصار بشاير تنهدت : سنعععععه البيت يلق يلق ويووه ياطبخها انا نقطه ضعفي الاكل يابنات لو تسوي فول يطلع يهبل ايش هذا هند : امااا طبيخه !! بشاير : شفتوو مو لايق والله ياكبستها تجنن ارقص في الغرفه لحالي لما اشم ريحه الاكل اسيل : هههههههههه عاد انتِ بطينيه خلقه نوال : طيب كيف هي معك يعني زي هنا سافهتك هههههههه بشاير ضربت نوال ع كتفها : انا اللي سافهتها اناا × × بيت سعد .. جالسه بالدكه وقبالها القهوه والشاهي .. والراديوو شغال .. ومريم جالسه ع يمينها وتنسج بالصوف : ومتى بتروحون مريم : ابو خالد قالي العصر بيوديني ام سعد : والله ان خاطري اشوف اميمتك بس مالي حيل ع الطريق مريم ناظرتها برجا : والله يالييت هي كلها ساعتين ماهي بعيده ينبع ام سعد اللي من البارح بعد ماقالها سعد وحاول فيها تروح معهم وهي تقلبها براسهاا : والله مدري مريم : تروحين معنا بس والله اميمتي ودها بشوفتك ريم جاتهم وهي شايله صحن فطاير وتضحك : هااه اقتنعت تروح ام سعد : وانتِ بس تطبخين هلكتي عمرك يامره ريم جلست وتضحك : لا تعب ولا شي انا احب الطبخ مريم اخذت حبه فطاير : تسلميين الله لايحرمنا منك ام سعد : اي والله هذي حرمه الولد السنعه × × استأذنت ابوها قبل يروحون انها بتروح بنده القريبه هي وريان مع محمود .. وقالها تروح وعطاها فلوس .. لبست نقابها وتأملت عيونها بخجل من نفسهاا لانها رايحه بنده بالذات لان حمد اشتغل كاشير فيها سمعت ام حمد تقول لجدتها عنه .. تبي تشوفه .. صار مايرسل كل يوم .. اشتاقت له طلعت من البيت وراحت لحوش بيت عمتها مريم .. شافت ريان عند السياره يسولف مع محمود .. ماامداها تقرب من السياره الا شافت التوم جايات بعباياتهم يجرون ريمان صرخت وحطت رجلها جري للسياره : اااااااا محمووود شغل شغل بسرعه محمود انخرش لما شافها والبنات وراها يجرون كأنهم باتمان .. وريان ميت ضحك ويدخل السياره بسرعه لاتقتله ريمان ريمان ماامداها تدخل السياره الا شذى تدخل وراها بسرعه وصوت تنفسها عالي من الجري ودخلت وراها نهى نفس الشي .. ريمان صرخت عليهم بقهر : انزلي انتِ وهي خيييررر ابوي قال بس انا شذى بتعب : والله لنروح غصبن عنك يله مهموودووه حرك محمود حرك السياره وهو يتحلطم من هالبنات وهبالهم ريمان : لا لا وقف انزلوو والله ماتاخذون ولا ريال براا نهى تحرك ابهامها ع سبابتها تقهرها : معناا فلوس مشي مشي مهمود ريمان بقهر : والله لااعلم ابووي انا استأذنت اوريكم "وطلعت جوالها من شنطتها" شذى تضحك وتضرب كفها بكف نهى : حتى احنا استأذنا منه وهو اعطانا الفلووس محمود صرخ عصب من هواشهم بالسيارره : بــــس لق لق انا الهين يتصل في بابا سلطان البنات صرخو مع بعض : لااااا خلاااص بنسكت ريمان تتمتم بقهر : الله ياخذكم انتم وهالمهمود وشذى ونهى يضحكون .. وريان يلعب بجواله لعبه وسافههم كلهم .. × نهى تحط بالسله شبسات : اليوم بنسوي بارتي البيت فاضي وكلمت بيوون قالت بتجينا عادي شذى : وريومه قالت بتسوي لنا كيكه عشان كذا مابناخذ حلويات كثير ريمان منفسه لانها مابتاخذ راحتها وهم معهاا وبدون نفس : وانا اخر من يعلم خييرر نهى تدف العربيه : هي هييي انتِ من دخلتي هالجامعه ماعاد نشوفك شذى تدك كتف نهى : كبرت كبرت ايش فييك ريمان طنشتهم وراحت عنهم قسم الفواكه .. اخذت فراوله وكيوي وهي تناظر المحاسبين وينه .. مو امه تقول انه اشتغل هناا هفف راحت اخذت نوتيلا .. وصورتها وكتبت " يمممه لقيتني" وضحكت ع استعباطهاا ولما خلصوو وراحو يحاسبون .. وهي واقفه تنتظر دورها شافته يحاسب بكاشير ثاني غير اللي واقفه عنده شهقت شذى : ايش فيك ريمان تلعثمت بس شلوون تبي تروح تحاسب عنده لازم : احم شوفي مو ذاك حمد ولد جارتنا شذى لفت تشوف بحماس : يع توقعته مزيون مثل وليد نهى : ايش فيه ايش فيه شذى تأشر : هذاك حمد ولد جيراننا ريمان تضرب اصبع شذى لما شافت حمد انتبه لهم : نزلي يدك يازفته شافناا وتقدمت لما راح اللي قدامهم وهي تتحلطم بنفسها وريان واقف قدامها ياخذ معها من الدراجه ويحط ع طاوله الكاشير .. رفعت عيونها لحمد ارتبكت لما شافته يناظرها .. يممه معقوله عرفني ابتسم والله ابتسم .. اووف ياغبيه اكيد يعرفك مو معك ريان .. تنهدت ياليت والله حاسبت عنده بس يالله اهم شي شافته × × لبست حمودي وباست خده : زينووه الرجال فياض وقف ع الباب يناظرها بعشق .. ملبسه حمودي ثوب والشماع عصبه .. افنان انتبهت له : هاا ايش رايك فياض وهو يناظرها فاتحه شعرهاا اللي طول واصل لكتفها : جمييل افنان اخذت العطر ورشت ع حمودي اللي يتسحب منها بيروح يوري بشاير شكله تركته ع راحته وع طول راح يجري لبرا الغرفه .. فياض اخذ شماغه ووقف قدام التسريحه يلبس بهدوء يخفي ارتباكه اللي بيفضح مشاعره .. افنان تفرك اصابعهاا : امم يعني لازم تجلس للسبت بالنور فياض يثبت العقال : ايه صعبه اروح اليوم اودي بشاير واجي وارجع السبت اخذها وارجع كمان افنان بقهر : ليش ماتروح بشاير مع حنين مو هي رايحه للنور اليوم فياض يعدل شماغه ويناظر نفسه : تبين تروحين معنا حياك افنان من قهرها مو حاسه انها علت صوتها : ماابي ارووح وبشاير خلاص تبي تجلس هنا تتحمل بعد تجلس الويكند ياسسسلم هو كل ويكند لازم تروح انت وتجلس هناك عشانها فياض لف عليها وبنظره قويه عكس صوته الهادي الصارم : حـــدك صوتك لايعلى علي فاهمه افنان تجمعت الدموع بعيونها مقهوره هي ليش كذا ضعيفه قدامه تبيه يجلس معها وهو مو حاس اووف تكره نفسها يع مشاعرها اضعفتهاا وبتذكر نفسها وتصحيها : اييه فاهمه مو انا اللي متزوجها ساتر عليها ومالها اي حق تطلب شي تحمد ربها وتسكت تنطم وترضى باللي تتفضله عليهاا فياض شد ذراعها ولفها عليه لما لفت بتروح : ايش تبين انتِ ايش تبين مو فاهمك افنان صرخت مخنوقه لانها بتبكي وهي ماتبي تبكي : مااابي شي مــااابييك وخررر عني يع فياض شد ذراعها بقوه وهو يصر ع اسنانه وداخله يغلي بقهر : هشش لاتصرخين لابكف ع فمك افنان نزلت دموعها : بتضرب اضرب عاادي فياض رفع وجهها بيده وهو ضاغط بيده ع وجهها مقهور منها تقوله يع!! : تأدبي معي ي افنان لاقسم بالله تشوفين اسلوب ثاني عطيتك وجه ونسيتي نفسك اشووف افنان دفته عنها بقوه وجلست ع السرير بتعب وهي تبكي : ماابيك ماابيك وديني بيت اهلي اكرهك يع يع اكرهني فياض خلاص وصلت معه من هالكلمه عصب مو طايقها من تكوون هي تغتر عليه وهو يداريهاا الله ياخذ الحب اللي يذله .. : البسي عباتك وطلع بسرعه .. بشاير اللي كانت جالسه بالصاله وبحضنها عبايتها تنتظرهم .. حست انهم يتهاوشون سمعت صوت افنان بس مو واضح كلامها لان الباب مسكر .. وتأكدت انهم متهاوشين لما طلع فياض اللي واضح بوجهه العصبيه نادرا ماتشوفها .. فياض وهو ماشي : انتظركم بالسياره × رتبت شنطه صغيره ع السريع اخذت الضروريات وكتب الجامعه .. لبست عبايتها وهي تبكي افنان وقفت تناظر غرفه النوم قبل تفتح الباب وشهقت ببكا : ع طول تخلا عنك ياغبيه لاتبكينه "تمسح دموعها المستمره" فتحت الباب شافت بشاير بعبايتها جالسه صدت عنها بسرعه ماتبيها تشوف عيونها .. بشاير اللي بياكلها الفضول : ايش فيك تأخرتي فياض ينتظرنا تحت افنان ماردت عليها ودخلت المطبخ سوت انها بتاخذ شي .. تبيها تروح قبلها وتفكها بشاير دخلت وراها : هو انتِ بتروحين معنا النور افنان خلاص وطاقه التحمل عندهاا انتهتت هناااا لفت عليها وصرخت : مووو شغلك انقلعي لااخووك مالك شغل فيني الله ياخذك بظل ادعي عليك طول عمري ياثقيله الدم حسبي الله فيك بشاير حطت يدها ع قلبها متفاجأه من الدعوات اللي جتها همست بخوف وهي تشوف عيون افنان من ورا النظاره حمرا وواضح من صوتها تبكي : ايش فيه افنان ببكا همست تعبت : اطلعي براا انقلعي عني ماتفهميييين بشاير بسرعه طلعت من المطبخ اخذت حمودي ونزلت بخوف بسم الله هذي ايش فيها انا ايش دخلني فياض يهاوشها وتحط حرتها فيني الله يشفيها الحمدلله والشكر .. ركبت السياره ورا .. ناظرت فياض اللي جالس يناظر برا وولا نطق بحرف وواضح بوجهه العصبيه .. شوي كذا جت افنان حطت شنطتها ورا وجلست قدام ع الصامت .. وبشاير تفكر وتحلل هوشتهم .. ناظرت بيت اهل افنان .. ماتنلام تغتر هذا بيتهم يهبل .. وامها كشخه يفتخر فيهاا .. افنان غصب لفت تشوف فياض قبل تنزل كان يناظر قدام وسافهها كعادته .. كتمت صوت بكاها وصدت ونزلت بسرعه .. بشاير تناظر فياض اللي بعد مانزلت افنان لف يناظرها لين غابت عن نظرهم .. اووف هالاثنين صامتين مماتقدر تفهم منهم شي الحين من مزعل الثاني فياض تنهد بصوت مسموع تنهيده طويله يطلع كل الالم اللي بداخله ناسي وجود بشاير .. سند جبينه ع الدركسون ليش تسرعت وسمحت لها تروح .. كذا يتركها تروح بسهوله لييش كان باله طويل كان واثق انه يقدر يصبر وينتظر تحبه .. ايش اللي صار ليه ماعاد فيه صبر بشاير حقدت ع افنان ايش قالت له هي اللي كان صوتها عالي ضايقة اخوي حبيبي الزفته اوريهاا .. نزلت وركبت قدام فياض انتبه لوجودها .. وحرك السياره بدون مايبرر وقوفه او يقول شي .. تعبان .. مرهق . × × نزلت من الدرج كاشخه وبيدها عبايتها وتكلم موضي : اييه جايه الحين ... ع خير نتقابل هنااك قفلت منها وهي تشوف افنان تدخل وترمي شنطتها ع الارض وتجلس جنبها وترمي نقابها وتسند راسها ع ركبها وتبكي .. انقبض قلبهاا افنااان تبكي .. نزلت بسرعه : بسم الله الرحمن الرحييم ايش فيك ايش صااير افنان رفعت راسها تناظر امها بألم تحس روحها موجووعه .. فاديه جلست جنبها بخوف حضنت وجهها : يمه فنوو ايش فيك ليش تبكين افنان ببكا : فياض تركني بيطلقني خلااااص مايبيني فاديه حضنتها وتمسح ع ظهرها وتسمي عليهاا .. افنان تتكلم وسط بكاها بتعب : انا اذيييت رووحي اذيتهاا فاديه وبكا افنان قطع قلبها افنان القويه اللي مو اي شي يبكيها تشوفها منهاره هالشكل كله عشان فياض تركهاا !! افنان تمسك يدين امهاا وصوتها مبحوح : حرام احب زوجي يمه حرام حرام يكون لي بس انا حرام يجلس معي لحاله اااه يمه من كل الجهات يتدمر هالزواج واااضح من البدايه النهايه بس انا الغبيه يمه انااا "دفنت راسها بصدر امها وتهمس بتعب وسط دموعهاا" انا حيوانه انا حماره اكرهني ليش حبيته ليش امووت عليه وانا عارفه هو ليش تزوجني وعمره مارح ينسى ويحبني قالي انا اسامح بس ماانسى ااه بمووت يمه رووحي موجوعه حيييل لمتى اتحمل فاديه بكت معهاا .. ووقفت ووقفتها معهاا : قومي يمه قومي ارتاحي بغرفتك × × في بيت مريم .. صوت السماعات عالي وماخذات راحتهم بالبيت بيان تصفق وتتمايل وهي جالسه وتردد مع الاغنيه : اهل مكه حمام واهل المدينه قمااري والبنات يرقصون .. ريم جلست بتعب بعد الرقص وتضحك : والله ناكل ونرقص احلا رجيم هههههه البندري اخذت عصير تشربه : والله ياليت فنوو معانا شذى : انسه منشن من تزوجت الجرح سحبت عليناا هههههههه نهى : معها حق انا لو اتزوج "وتحرك يدينها ترقص وتغني" ابنساكم ابنساكم وابنسى ايامي وياكم شذى تضربها ع كتفهاا : ي حيوانه انا تؤمك تنسيني نهى تضحك : انتِ اولهم بيان طنشت هوشتهم : اتصلت عليها ماترد مااتوقع يمديها تجي لو انها فاضيه اتصلت ريم : صح والله بيان لفت تدور ريمان تحس فيها شي غريب اليوم مو داخله جو مع البنات بس تصور سناب وتعدل ع الصور .. شافتها جايه من المطبخ وبيدها جوالهاا وعلبه عصير .. وتجلس عادي تشرب عصيرها وماتعلق شي ريمان مو عادتها السكوت .. وبوسط السوالف كذا وقفت ريمان تمسح ع راسها : انا بروح البيت بنام شذى : ويين بدري ريمان : دايخه مانمت بعد الجامعه اليوم بيان وقفت بقلق عليها في شي مضايق ريمان لازم تجلس معها وتفهم : انتظري بروح معك ظهري اوجعني من الجلسه ريمان ناظرتها باارتباك وهزت راسها : طيب مشت هي وبيان لبيتهم وبنفسها تتحلطم تبي تكلم حمد ع راحتهاا ارسل لها انه بيلعب معها لعبه صراحه يسألها وتسأله تحمست لانها بتعرف عنه اشياء كثير وهذي فرصتها خاصه انها تعودت ترد عليه بالرسايل فصار عادي عندها تحس الخوف اللي اول تحسه راح .. اووف الحين ايش تسوي تخاف تراسله وبيان هنا تخاف تحس عليهاا دخلو البيت وهي ماركزت مع بيان اللي طول الطريق تتكلم .. بيان ناظرت الشنطه والنقاب ع الارض : ايش هذا ريمان مستغربه نفسها : مدري والله بيان همست بخوف : شنطه افنان هي هناا صاير شي تحركت بسرعه وطلعت الدرج وريمان وراهاا .. بيان فتحت باب الغرفه بسرعه شافت افنان نايمه بحضن امها اللي تمسح ع شعرها بهدوء .. فاديه ع طول اشرت لهم يسكتوون ويطلعون هي تجيهم .. بيان طلعت مصدومه وخايفه ايش صاير لافنان .. اكيد صاير لها شي .. شلون تتنازل تنام بحضن امي .. واضح باكيه جفونها حمرا فاديه قفلت النور وطلعت قفلت الباب وراها بهدوء .. بيان بسرعه : شفيهاا ؟؟! فاديه بضيق : تقول فياض تركهاا ريمان : كــيف فاديه تنهدت : مدري متهاوشه معه وقالت له ودني بيت اهلي وجابها هذا اللي فهمته بيان تعض شفتها تمنع دموعها : جت تبكي يعني فاديه هزت راسها : ايه كانت منهاره حييل ريمان بقهرر : لايكون ضاربها الله ياخذه والله لعلم ابوي والعيال فاديه شدت يدهاا : ولا كلمه خليها هي لما تصحى وتهدا نفهم السالفه لاتألفين بيان جلست ع الكرسي وناظرت امهاا بخيبه اكيد متهاوشين بسببك اكيد فياض اذاها بالكلام مو معقول يسكت ويكون محترمها طول الوقت وهو شاف بعيونه اكيد جرحها افنان ماتبكي من الساهل .. فاديه صدت عن نظرة بيان وراحت غرفتها .. طول ماهي تهدي افنان وتنومها كانت تتحلف بداخلها لفياض من يكون هو يخلي بنتها تنهار كذا بتتصل عليه وتسفل فيه تبرد حرة قلبها .. × × قفل من بيان اللي قالت له تبي تنام عند اهلهاا وبعد مارفض محاولاتها يبيها ترجع معه .. قالت له بتجلس مع افنان .. وهو اللي يعرفه ان افنان مو جايه اليوم .. قالها تنصبين علي .. حس في صوتها مخنوقه بتبكي وحلفت ان افنان هنا ومحتاجتهاا .. ووافق مسح ع لحيته يفكر .. اللي فهمه ان افنان توها جتهم لان بيان قبل شوي مصوره سناب ومعلقه ناقصنا فنوو ومن صوتها المخنوق واضح ان افنان فيها شي متضايقه .. متهاوشه مع زوجها فياض .. لمتى وهو عارف الحقيقه وساكت ابد مو راضي عن نفسه بس بيان وعدهاا .. بس لما يحط نفسه مكان فياض يرحمه كيف عايش مع زوجه يظن ماضيها سئ اكيد حياتهم شك ومشاكل .. لو يدري ان هالماضي لامها مو هي كيف بتكون ردة فعله مو قادر يتصور كيف تكون فياض هادي ومايعطي ردات فعل صعب تعرفه .. هي الغبيه افنان شلون راضيه تعيش كذا وهي بريئه وتستاهل زوج يحبها ويحترمهاا .. مافيه يسكت لازم يقول لفياض الحقيقه فتح جواله ودخل الواتس ع محادثه فياض وكتب "السلام .. شلونك .. ابي اشوفك بااقرب وقت بكلمك بموضوع" وارسلهاا × × وفي سيارته علا ع صوت المسجل مبسوط مع ان اليوم خميس وعنده مناوبه بالمستشفى مايمديه يروح النور .. منصور يدق رقبه مع الشيله ويردد معها طرباان واخيرا بيخطب بشاير بكره بيروح النور ويخطبونها له × نهايه البارت الحادي عشر..