الفصل 55
في مجلس ام ناصر وهي من سيدات المجتمع ومجلسها عامر باهم سيدات المجتمع الراقي كانت العنود جالسه في زاويه بعيد عن السوالف . بأبهى طله لها وحطت رجل على رجل وتهز رجلها بتعب وهي حاطه يدها على خدها ..قربت منها سارة اللي كانت طلتها حلوة مسويه كرلي لشعرها ومكياج خفيف وردي مع فستان قصير ابيض ..عكس العنود اللي حاطه مكياج سهره وكارهته من قلب لان لونه فضي مع التنوره السموكي والقميص الاسود اللي لابستها ..وحاطه اشارب وردي...وقرط فضي ثقيل في اذونها ..
ــ تعبتي ؟؟
طالعت العنود لساره ...هزت راسها بلا ...
ــ شخبار احمد ؟؟
تنهدت العنود ــ والله مادريي..انا ارجع الفجر وانام وهو يطلع الصبح ..ومارد الا حزة الفطور ..نشوف بعض حزة الفطور بعدين يروح المسجد ..وعالساعه 7 تجي راعيه الصالون بعدين اطلع معاج ومع عمتي ..وهذا انا ,,صار لي من بدا رمضان نفس النظام ..
ساره ــ خلاص بكلم امي ..
العنود ــ لا .. لاتكلمينها فشله ...هي واعده كل رفيجاتها بجيتنا ..لاتخلف بوعدها ..وهي مستأذنه من احمد ..
ساره ــ شكله واحشج مووت ..
استحت العنود .,واحشها ؟؟الا بتموت بس تقابله ساعه على بعض ..
من بدايه رمضان وهي وعمتها من بيت لبيت ..مناسبات اجتماعيه مع صديقات عمتها ..حلقات ذكر ..سوالف وخيم ..
دخلت روان ..وهي بنت تكرهها العنود من قلب..
ساره ـ يات حبيبة قلبج .
العنود ــ اللهم طولك ياروح ...هذي الانسانه ماحبها ..
بعد ماسلمت على الكل وتبتسم لهذ وهذيك قربت من العنود وقعدت ..
ساره ــ السلام لله ..
طالعت لها روان نظره استخفاف والتفت للعنود ــ كاشخه ..
كانت روان بضا في عيونها سحبه غريبه كأنها قطه ..ولابسه فستان عاجي مع حزام جلد بني .. طالع على جسمها حنان ..ومكياجها اوفر...
علقت ساره ــ العنود دومها راعية كشخه ..
طالعت لها روان ــ كلمتج ؟؟...
حست ساره انها بتقتلها ..
علقت العنود ــ ساره هي انا وانا ساره . فاي كلام توجهينه لي ..ساره لها الحق ترد عليج على لساني ..
روان ـ ماطول لسانج يابنت طيبه ..
العنود ـ لو سمحتي ..بنت سعيد سالم والنعم ....شقالوا لج مالي ابو لجل تناديني بنت امي ؟؟؟
طالعت لها روان باستخفاف ــ شفت احمد اليوم ..وكلمته عن صفقه ..
ساره ــ انزين يعني واذا .......
روان ــ لا بس حبيتا قول ان الكلام بيننا طول .. ونسيت اقوله اني فزت بالصفقه وان سعري كان الارخص ..
ساره ـ طول عمرج رخيصه شالجديد ,,,
عصبت روان وشوي وتقوم تضرب ساره لكن العنود قالت مبتسمه ــ شالمطلوب مني..
روان ــ بس خبريه ان السعر اللي قدمته كان اقل ..واني فزت ..بس ..
العنود ــ زين عدلتي الجمله ... انتقوا الفاظكم ..لاشفتيه خبريه انتي انا مااشتغل مرسال بينكم ...قومي ساره نشرب لنا سحلب ولا شي حار من البوفيه ...حاسه ببروده بعظامي مع ان الجو حار و..
سكتت العنود وهي تطالع روان نظرها اشمئزاز...
قامت ساره وفالطريق همست للعنود بغيظ ــ اكرهها الحمدالله ان ابوي مارضا ان احمد يخطبها !
حست العنود بمغص فجأه ...الكلمتين اللي قالتهم ساره وجعوها من قلب شحب وجهها ــ شنو؟؟....
انتبهت ساره لغلطتها ــ ها !!,,,,,,
العنود ــ احمد كان يبيها .....
ساره ــ لا ..بس..ها ..تعالي اشربي السحلب ..
وعطتها الكاس السحلب بالمكسرات ..فجأه حست العنود بغثيان واركضت للحمام ...
دارت الدنيا فيها بعد مااستفرغت ...واول ماطلعت من الحمام اسندت الطوفه ..,وماقدرت تمسك عمرها اغمى عليها ...
_____________
فتحت عيونها بتثاقل ..لقت نفسها فالمستشفى ... حولها احمد وساره ...مسك احمج يدها بحنان ــ حبي..حمدالله عالسلامه ..
ضاقت عيونها وطالعت مستغربه تبي تتكلم لكنها حاسه بصداع ..
ــ سلامات العنود
العنود ـ شصار ؟؟.
احمد ــ الدكتور يقول هبوط ضغط الدم ....
حست العنود بارتباك ــ ها... زين ليش مايعطيني دوا حاسه بصداع ..
ابتسم احمد وساره ــ لانه مب زين ..
استغربت العنود وحست عمرها مب فاضيه لهم ــ ؟؟
احمد ـ مب زين للنونو..
طالعت له العنود مبطله عيونها عالاخير ..نونو ؟؟؟ حامل ؟؟
كرهت نفسها فجأه .. طالعت له بخيبه امل ..وبدون وعي لفت راسها عنه ..ونامت ..
________
انصمت المها وخديجه من تصريح راشد ..
خديجه ــ بسرعه جي ؟؟
المها ـ راشد .. من صجك ؟؟
راشد ـ على قولة صالح خير البر عاجله ..
وقفت المها وحذفت الفنجال اللي كان في يدها واركضت فوق معصبه ..تمت خديجه مصدومه ــ شهرين ؟؟....انا معليه بس المها زوجها غريب ..وو..
راشد ــ خديجه .. خلاص الاثنن متوظفين ومخلصين ومستعدين لشروطكم ..
خديجه ــ بس المها ماخلصت جامعتها ..
راشد ــ يهالجامعه ..مو عذر تقدر توفق بين بيتها وبين دراستها .. هالجامعه بس مسويه مشاكل بالبلد ..
ــ رااشد شتقول ..
راشد ــ اقول الصج الوحده ماتبي تتزوج الا لي خلصت جامعتها يعني هي ضامنه بتجيها الفرصه الزينه مره ثانية ؟؟ ولا ضامنها بختها بينطرها تخلص دراستها ؟؟
ماردت عليه مدت بوزها شبرين وقعدت مبوزة ..
ــ اووف ..
ــ شالكآبه ؟ .. اقولكم عرسكم بعد شهرين ..كل وحده ماده البوز...
وقفت خديجه كاتمه عبرتها ــ عن اذنك ..
وراحت لغرفتها وفيها الضيقه ..
تم راشد فالصاله ..حس انه عبدالرحمن رقم 2 .. بيزوج خواته بدون موافقتهم ...المها ابدا مب بالعه السالفه وخديجه حجرها مبارك جدام العرب ... بس خلاص هم التزموا واعطوا كلمه ... باجر بيشكرونه حاسم مافي مثله ..ومبارك شاري خديجه ويحبها ...
تم يقلب في قنوات التلفزيون ..بعدين مل وحذف الرموت وقام لغرفته ..
ـــــــــــــ
دخلت روان الغرفه وكانت العنود واحمد فالغرفه وهي مكتئبه وساكته واحمد يطالع لها مستغرب اكتئابها ..
تمتمت العنود ــ مب ناقصه ..افف... وتمت تراقب احمد الي وقف واخذا البوكيه من يد روان وحطه على جنب ..
علقت العنود ببرود ــ ماخليتي الحمالين يشيلونه ..
روان ــ لا وشلون حبيت اجيبه لج بنفسي ..شخبارك احمد ؟؟
ـ الحمدالله شلونج ؟؟ماتوقعت تجين اليوم قلتي بتروحين لمأدبه الفطور اللي بتسويها الشركه ..
روان ـ لا وااجب جيت اسلم على العنود .
احمد ـ راعيه واجب والله ..
العنود من داخل كانت مقهورة.. قالت ببرود ــ انتم التقيتم اليوم ؟
روان ـ كل يوم نلتقي حتى لو ماعندنا شغل ..
التفت لها احمد مستغرب سكت واستغرب من كلمتها ..
حاولت العنود انها تبين عمرها طبيعيه .
العنود ــ ماباركتي لي .. ماقال لج احمد في احد هاللقاءات اني حامل ؟..
وجه روان صار شاحب وارتبكت ــ لا ..ماقال ..مانناقش الا الامور ..
وقبل لاتكمل قاطعها احمد ببرود بعد مافهم محاولتها ـ العمل ..الامور الشخصيه والعائليه مانناقشها ولا اعتقد بناقشها . عن اذنكم ..
طلع من الغرفه مقهور من حركه روان وقف عالباب يفكر شوي .. .. شنو كان هدفها ؟؟ تبي تخلي العنود تغار ؟؟ .. وصل صوت العنود لاذنه
ــ حب ؟.. ممم تقدرين تقولين تعود اكثر..ماحبيت احمد بس تعودت عليه ..
انصدم .. هالتصريح قتله في الصميم ...حاول انه يسمع مجرا الحديث ..لكن ..ماقدر .. حس بانتفاضه داخله .. راح الكافتيريا جلس هناك يفكر ..
(معقوله تعودت عليه ؟؟..ماحبته ؟؟... توقعها تحبه ..بس ..))
اول ماشاف روان طالعه ورايحه للبوابه دخل الغرفه وقبل لايعلق قالت العنود
ــ ابي انام ...
ولفت راسها عنه ...وتم واقف مكانه متصنم ..
في المسا ارجعوا لبيتهم .. وسط تراحيب الكل .. وانسلت العنود لغرفه جانبيه جزء من قسمهم ..كان بيلحقها لكن .. راعى حالتها المرضيه ..وكل ليله والعنود تدخل لنفس الغرفه ..والكلام قل بينهم بدرجه كبيره وهو ماحاول يقرب منها ..ابتعد .. صارت تنام بغرفه وهو بغرفه ..حتى سلام ..ماكانوا يسلمون على بعض .. بس يقعدون يتغدون ويقومون ..ماكان عاجبه الحال لكن ..ماحب يضغط عليها ...
اما العنود ..فجأه حست انها منتميه لعالم غلط ..روان اللي ازعجتها بنغزاتها ..قبل ماكانت تصدق كلامها .لكن من سمعت احمد يقول لها ليش مارحتي المأدبه ..وهي تحس دنياها كلها اعتفست ..يعني يلتقون ويسولفون ويتناقشون وهي بهالمجالس من بيت لبيت مبتلشه بالرسميات بعيد عنه .. .. حست بجرح كبير ..الالعن لما استفزتها روان وقالت ان احمد يبين لها انه مايناقش امور شخصيه لكنه قال لها انه ايام الخطبه العنود كانت متيمه فيه وتتصل فيه لكن العنود انصدمت . وقالت لها ماكان حب اكثر منه تعود .. لكن الحين هي تحبه وهو زوجها على سنه الله ورسوله ليش ماتحبه ؟؟...وندمت على هالتصريح لان روان مب مقربه منها هالكثر ..لكن ..احمد اللي ابتعد ..يمكن تعود ..طول هالشهر وهو يختفي وماتشوفه ..وحاسه انها ماتقدر تشوفه والا بتم تصيح .. خصوصا بعدما ماعرفت ان قلبه كان فيه روان قبلها ...