رواية مابعــد الخــذلان - الفصل 5 - بقلم Cluod24 - مكتملة | روايتك

((البارت الخامس)) × ريمان دخلت المطبخ مالقتها ووقفت عند باب المطبخ تعلي صوتها تسمعهاا : هااي انتِ اطلعي ترا ماني خايفه منك وهاتي الحافظه لااعطيك كف يرجعك ديرتك يالعبده البومه مررت نظراتها ع البيت اللي اغلب الانوار مقفله حست بخوف وفشله انها دخلت بيت الناس وهم مو موجودين .. تحركت وهي تتوعد للشغاله بيوم ثاني .. سمعت صوت انفاس وكان احد يمشي وراها هذي اكيد هي اسرعت بمشيها وصارت تجري ماتعرف وين وجهتها وتصارخ وهي تحس انها تجري وراها ضربت في طاوله من الظلام ماشافتها وطاحت ع الارض متألمه وبدت تبكي وهي تشوف زولها في الظلام واقفه قريب منها : والله اسفه لاتسوين فيني شي اسسفه اسفه الشغاله وكلمه العبده البومه خلتها تثور وهي من اولا ثايره ومعصبه تقدمت من ريمان وسحبتها بقوه مع شعرها وفتحت عبايتها ريمان تصارخ وتحاول تدفها عنها بس مالها قوه عند هالضخمه وكانها رجال مو انثى .. تحس انها تحلم مع هالظلام وهالمخلوقه المرعبه تقطع ملابسها وتكفخ فيها وهي تحاول تتخلص منها تضربها مافي فايده .. شوي كذا حست الشغاله تطير من فوقها وتشوف هيئه رجال مو واضحه ملامحه .. ع طول هجمت عليه الشغاله ريمان زحفت ولملت ملابسها وهي تشهق من البكا والخوف وتناظر كيف الرجال يتعارك معها وكانهم رجالين مو رجل وحرمه واضح شغالتهم متدربه .. بس مهما كان قوه الرجل تغلب طاحت الشغاله ع الارض ريمان غطت عيونها وصارت تصارخ تبي تصحى اكيد تحلم ايدين قويه مسكت يدينها من معصمها ونزلهم .. ناظرت الرجال جالس قبالها ع ركبه وملامحه يادوب تشوفها من الظلام رجعت غمضت وتهز راسها : انا احلم اكيد احلم حمد شد ع يديها بقوه ويصارخ يصحيها : صارلك شي تتألمين تكلمي ريمان فتحت عيونها متنحه فيه مو مستوعبه كلامه واللي صار كله ولا حاسه بجسمها اللي تخدر من الضرب اللي اكلته.. حمد عيونه تتفحص ملامحها وشعرها الطويل مبعثر حولهاا وهو متعود ع الظلام .. وقف وشدها بقوه مع يدها لين وقفت ع رجولها بالعافيه .. همس : ريمان الشقيه اخت سلطاان ريمان مشت معه وهو يسحبها مع يدها وهي تناظر الشغاله الساكنه ع الارض صرخت بخوف وتبكي : ماتت ماتت سحبت يدها منه وصارت تضرب خدودها : ذبحتها ذبحتها حمد صرخ عليها : اووش اطلعي مالك شغل فيها اطلعي براا ريمان وقفت نظراتها عليه بخوف قاتــل لفت للباب وحطت رجلها جري .. وهو جري وراها .. قفل باب الحوش بيده بسرعه قبلهاا وصارت بينه وبين الباب ريمان بسرعه نزلت نفسها وطلعت من تحت يده وراحت تجري للجهه اليسار تتذكر ان في باب ثاني ورا البيت .. حمد تنهد بتعب وهو يناظرها تجري وشعرها يتحرك بحيويه وراها وعبايتها المفتوحه وبسرعه صار يجري مايبيها تطلع وتقول لااهلها وتكبر السالفه .. ريمان وقفت تتلفت المكان مظلم تدور الباب ودموعها وقفت من الخوف تحس ان عقلها الباطني يحركها تتخلص منه ولاحقه ع البكاا لفت وراها شافته صارت تصارخ وتجري بلا وجهه .. زادت صراخ لما لف يده بقوه ع خصرها صارت تبكي وتضرب يدينه : بعد عني بعـــد حمد دفها ع الجدار وثبت يدينها بيد وحده وهو يتنفس بتعب ومع هذا يتبسم ويناظرها : شقيه من يومك اتعبتيني ريمان تشهق ببكا : لاتقتلني حمد صرخ : ياغبيه ماماتت انا ضربتها بمكان بس عشان يغمى عليها ونفتك منهاا ريمان تصارخ وهي تتحرك تبي تتخلص منه اكيد بيقتلهاا : كــذاب وخر اتركني حمد : والله مااكذب عليك اهدي ي بنتي انا ااذي الناس كلها ولا ااذيك "حضن خدها بيده ومسح عليه" حظي ضحك لي اليوم وجابك لي ريمان تناظره بخوف ودموعها ماخذه مجراها متقززه من لمسته هذا اللي اليوم كان يضرب وليد .. وشوي ضرب الشغاله وجاي دورها شكله عايش ع الضرب .. وبهدوء تحاول تحنن قلبه : اتركني يرحم والديك خاف الله فيني انا صغيره حمد وعيونه تتفحصها : صغيره بس ماانتِ سهله "قرص خدها بقوه وهو يضحك" ريمان ماهي مستوعبه كلامه همها تبعد عنه وبس : اتركني فك يديييني يع بعددد حمد ترك يديها وهو يغني بروقان : بس قول ابغى وانا اقول حاضر انت الوحيد اللي كلامك اوامر وبعد عن طريقها ووقف يناظرها تجري وكبرتي ي ريمان كبرتي .. × × وقفت بتعب ويديها ع ظهرها : اووف وين رحت بيان وقفت ع باب الغرفه وهي كاشخه بنعومه : ايش تدورين افنان فتحت درج الالوان طلعت لها كم لون تخلطهم : دفتري ذاك العنابي مدري وين طس بيان جلست ع السرير وتنهدت : اهاا ياربي افنان ماني قادره اروح معه وكان شي ماصار احس باقي كلامه مضايقني افنان وقفت قبال جدارها الملون حطت يدها بالاوان وصارت تطبع ع الجدار : والله انا مدري اتكلم من ساعه مع مين ياغبيه ياغبيه لاتستسلمين طلال كويس وقالك انه يكذب عليك واعتذر وانتِ بنفسك تقولي ماسمعتي صوت بالجوال معناته صادق يتكلم مع نفسه من قهره منك لا اعتذرتي ولا شي ع حركتك السخيفه بيان بزعل : كنت بعتذر بس لما قال بيتزوج بطلت افنان لفت عليها : المهم ياخيتي ي عزيزتي كلنا نتمتى ام مثل ام طلال ماشاءالله بس خلاص عاد انتِ كبيره لاتخسرين زوجك عشانها كثر الله خيره يومه يصارحك ويقولك اللي بخاطره يبي حياتكم تتسنع مايروح يتكلم من وراك عند احد بيان تنهدت : صادقه والله امم اسفه فنو ضايقتك بخبالي وانتِ مو ناقصه افنان رجعت تطبع وهذي عادتها لتفريغ ضيقتها : ماعليك انا تمام بيان سكتت عنها تبيها تاخذ راحتها .. لفت ع المرايه تشيك ع شكلها ناظرت جوالها طلال يتصل ردت : هلا طلال : انا برا بنزل اسلم ع عمتي بيان وقفت : طيب دقيقه افتح الباب قفلت منه ولفت ع افنان ارسلت لها بوسه قبل تطلع وتاخذ عبايتها وشنطتها معها .. شافت امها جالسه بالصاله تتابع مسلسل : يمه طلال برا بيسلم عليك فاديه وقفت : يلا طالعه فاديه رتبت شكلها بالمرايه ماتحب اي احد يشوفها الا وهي ع سنقه عشره .. فتحت له الباب وهي وراه ولافه طرحتها ع شعرها طلال دخل ولف يناظرها بشوق دامها متكحله راضيه علينا ابتسم لابتسامتها : اذووب انا ع الكحل بيان صدت عنه بااحراج .. وهو تقدم للمدخل لما شاف فاديه طلعت مع باب البيت سلم عليها وعيونه تلاحق بيان اللي دخلت البيت تلبس عبايتها وتطلع له .. فاديه : الحمدلله مانشتكي باس انت شلونك طلال يعدل نسفه شماغه : بخير الله يسلمك ناقصك شي تامرين ع شي فاديه ابتسمت : ابد سلامتك بس هالله هالله ببيان حطها بعيونك طلال ضحك : ماعليك لاتوصين حريص فاديه : الله يحفظكم عاد لاتقطعون بيان طلعت : يالله يمه مع السلامه طلال ناظر بيان كيف تمشي بدون ماتحضن امها ع الاقل تسلم باليد تبوس راسها مثل ماتسوي مع امه لو انها تو حاضنتها لازم تحضنها قبل تطلع .. ركب سيارته وماحب يعلق خاف تتضايق او يفتح ع نفسه باب مو ناقصه : و حي الله حلوتي نورتي السياره بيان ابتسمت : تسلم نورك طلال شد ع يدهاا وبتأكيد : صفحه جديده بيان تهز راسها : صفحه جديده × × الخميس .. وقف عند بيت سعد اللي حلف عليه بعزيمه يتصدق فيها عشان سلامه .. نزل مع عمامه وعيال عمه ودخلو المجلس .. واخواته وعماته دخلو من مدخل الحريم اللي دلهم عليه ريان يجري قدامهم لبيت مريم : الحريم جن الحريم جن شذى : اووش فشلتنا انطم نهى راحت تجري لجدتها اللي تبي تستقبلهم ع الباب .. فاديه جالسه وهي مقهوره هالعزيمه فوتت عليها الروحه لموضي ومقابله مشاري اشتاقت له حيل صار لها اسبوع ماتدري عن اخباره .. ناظرت ام سعد كيف مبسوطه وتهلي بالحريم .. وقفت بسرعه لما شافت بدور ترحب هه هي بعد لازم تتحرك ولاتاخذ الجو عنها بدور .. مزنه جلست : الله يبقيكن والله الشرف لنا اللي شفناكم ام سعد جلست قريب من مزنه اللي الزمن نساهم خلافاتهم اللي كانت ع ام فياض وفياض ..: بشرينا عنك يام منى فياض يقولي تشكين ريكيباتك ريم تلف بالقهوه ووراها البندري تقرب الحلا والشوكلت .. شذى طلعت بسرعه لما اشرت لها امها تطرد البزارين اللي مسويين ازعاج فالصاله احراج عند الضيوف افنان تعدل شكلها قبال مرايه المدخل شافت شذى : شذى هــي بنت شذى تصارخ ع عيال خالد وريان : العبو براا في الحوش يلاا لفت ع افنان وتخصرت : بدري انسه منشن افنان : اووش تعالي قربي شذى قربت : نعم افنان تاشر ع المجلس : كم وحده شذى تفتح يدها ع اكبر شي : 8 وكلهم حريم كبار "وبزعل" مامعهم بنات كبرنا نتونس عليهم تخيلي حتى بزارين مو جايبين افنان : هذا الناس الذوق شذى تذكرت : الا والله معهم بزر واحد "شهقت" تخيلي الجرح طلع مطلق وهالنتفه ولده افنان تذكرت ريمان لما تقول عنه جرح اكيد الشله كلها زيها .. بعدت شذى عن طريقها وراحت للمجلس دخلت : السلام وقربت لااول وحده ع يمينها حنين وسسلمت عليها واللي بعدها وبعدها .. ماانتبهت لنظرات بشاير المصدومه اصلا ماانتبهت لملامحها ولاعرفتها .. مزنه تشد ع يدها وتناظرها باعجاب : ماشاءالله ماشاءالله فاديه بسرعه سبقت ام سعد : هذي بنتي افنان افنان راحت جلست جنب ريمان اللي مسخنه من كم يوم وهجدانه .. اخذت الفنجان من البندري : تسلمين شربت شوي وهي تمرر نظرها عليهم ووقفت عيونها ع بشاير اللي تناظرها ع طول عرفتها ذي اللي في الجامعه وشلتها سامجين .. ماتدري ايش تقرب لفياض بشاير تنرفزت منها تناظرها بصمت وتتقهوا ياربي يالغرور توها تدري ان ابو افنان يصير ولد خاله فياض اووف .. ولفت للباب لما سمعت صوت بيان النعوم هه كملت جات القطوه .. × × يسولف بالعافيه اساساً ماله خلق العزيمه وزميله بالعمل قتلوه هالخونه .. سلطان : تعبان فياض فياض : لا الحمدلله بخير سلطان : هالخسيس عناد ايش علومه فياض بقهر : بعده ماصحى ال.. سلطان : الله ياخذه الحمدلله اللي طلق اختي وارتحنا منه فياض لف عليه متفاجأ : كيف طلقها متى ؟ سلطان : جيته اول مادخل المستشفى كفخت فيه لين نطقها هه يحسب بخلي اختي تحت رحمته والله ان يبطي فياض وشي بنفسه ارتاح انها تخلصت منه : زين ماسويت × × ماصدقت شافت ام حمد ع طول سألتها عن شغالتها وقالت لها وهي مستغربه من سؤالها انها بخير .. جلست بالصاله وام حمد دخلت المجلس للحريم .. همست : حيه ما ماتت البندري جلست عندها بفضول : من هي ريمان بفهاوه والسخونه ماثره عليها : الشغاله نهى جلست ع يمينها وهم شايفينها من سخنت تهذري ماتت ومدري وبعد عني : اي شغاله ريمان ناظرتهم وصرخت بقهر : بعدوو عني صدق مبزره ناقصتكم اناا البندري : شوف شوف تكبرت عليناا نهى : مردك لناا ريمووه ريمان دخلت المجلس وجلست جنب اخواتها وهي تحس براحه وتردد بداخلها الحمدلله × × يسوق سيارته وجنبه عمته وورا بشاير وجنبها نايم حمودي.. اصر ع عيال عمامه انه يسوق سيارته لشي بنفسه فياض : كيف ازعجكم حمودي عند الجماعه مزنه : لا والله ام سعد ماخلته حتى بناتيخها يشيلن ويحطن فيه فياض مو عارف كيف يسأل افنان شافته عجبها هي تحب الاطفال الشقيين بس حمودي هادي بس حبوب يدخل القلب اكيد حبته دامها متحمسه تشوفه .. مزنه : ي ان عندهم بنات مزاوين بسم الله ماشاءالله عليهم تزوج منهم بس وانا عمتك بشاير تقاطعها : لاا تكفى لاتاخذ ع ذوق امي ابد شايفات انفسهن مررره وكانهم بنات السلطان فياض ضحك وهو مرتاح ان عمته تبيهم وهذي تعتبر معجزه عمته يعجبها احد : هههههه بس مايصير تحكمين ع احد من اول نظره بشاير بقرف : وين اول نظره انا اشوفهم بالجامعه ايش ثقاله دم وماهم شايفات احد شي فياض يتذكر كتاباتها وانهم يقولون عنها مغروره .. مزنه تلف ع بشاير : اسكتي بس والله عجبتني الكبيره مره بس طلعت متزوجه بس حتى اللي بعدها فلقه قمر بس شعرها ماعجبني بشاير : اييه يمه ترا هذي بويه وشفتي اللي اصغر منها مطافيق شيلي هالعايله من بالك انا ازوجك من صحباتي مزنه مستغربه : ايش بويه فياض وعرف قصدهم افنان ظل ساكت مستمع بس يعرف رايهم ولا هو خلاص دخلت مزاجه ولااحد يقدر يطلعها.. بشاير بقرف : يعني مسويه نفسها ولد عشان كذا مقصره شعرها وشفتي حتى مكياج زي البنات مو حاطه مزنه : اعوذ بالله فياض بصرامه : خلاص اقطعو السالفه × × صباح ممطر.. فتح عيونه وهو يسمع صوت الرعد ناظر جنبه ماهي موجوده .. رفع يده يناظر الساعه 7 وربع جلس بسرعه يستوعب الوقت متاخر ع دوامه : بيان بيان اووف هذي وينها ليش ماصحته دامها صاحيه بسرعه دخل الحمام .. دخلت الغرفه بروقان شافت مكانه بالسرير فاضي .. ابتسمت وحطت كوب عصير البرتقال والجزر ع الطاوله وشيكت ع شكلها بالمرايه اخذت عطرها الهادي وتعطرت ع خفيف طلال طلع وناظرها بقهر : تاخرت ع الدوام ليش ماصحيتيني بيان ابتسمت له : علقو الدراسه والجو يخقق مو لازم تداوم انت طلال يلبس ع السريع : احلفي بس بيان تقدمت منه وبنعومه حضنته من ورا : والله العظيم ابيك معي اليوم شوف الجو برا مطر يجنن طلال روق اول مره تتجرأ وتحضنه من نفسها لا وبعد تقول تبيه شد ع يديهاا وهو يشم ريحه عطرها بروقان : انتِ اللي تجننين والله بيان ابتسمت وبعدت عنه واشرت ع العصير : يلا اشرب عصيرك والحقني بحط الفطور بالحوش طلال لف يناظر الشباك : في المطر بيان ضحكت وهي عند الباب : في المدخل حطيت الطاوله وتراه مطر خفيف لاتخاف البس لك شي ثقيل برد برا طلال ابتسم لها بحب : اموت ع الرايقين اناا بيان طلعت وهي مبسوطه صدق لمتى تستحي وتحرم زوجها اشياء بسيطه تبادر فيهاا تسعده ماتدري كيف كانت تفكر .. نزلت تحت راحت لعمتها عند مدخل البيت المظلل العنود جالسه ع الكرسي وتتامل المطر : اللهم اجعلها امطار خير بيان جلست ع الكرسي اللي قبالها : امين يارب العنود : طلال صحى بيان ضحكت : ايه منفجع تاخر ع دوامه بس بعدين اقتنع انه يعتذر اليوم العنود ضحكت : اعرفه ولدي مجتهد من يومه بيان وقفت : ايه ماشاءالله يالله بجيب الفطور قابلت طلال بطريقها مسك راسها بيديه الثنتين وباس خدها بقوه وهي صرخت متألمه وضربت كتفه مقهوره وراح عنها وهو يضحك حطت الفطور قبالهم ع الطاوله وجلست ع كرسيها وهي تشوف طلال يمد لامه لقمه يوكلها بنفسه وهي تضحك ويلف ويوكلها وحده وهو يضحك : عشان ماتغارين يالبزر بيان حطت يدها ع فمها وهي تاكل لقمته الكبيره وتناظره بقهر وبعد مااكلتها : انت البزر انا مااغار من امي طلال سكت شوي وهو يستوعب تقول لامه امي .. ناظر امه وعادي وكان مو اول مره تقول امي .. العنود : طلال يمه اتصلت علي اماني تقول ان ابوك يسال عنك لازم تزوره وانا امك هذا ابوك طلال تنهد بضيق مستحيل ينسى لما ابوه طلق امه وطردها قبالهم وكان باقي ع زواجه اسبوع .. يذكر كيف تهاوش مع ابوه واخذ امه من بيت خاله وجابها لبيته قبل عروسته .. يذكر كيف كان فرحته بعرسه ناقصه امه ماحضرت عرسه .. اخذ بيان من العرس وسيده ع امه .. من بعد عرسه يمكن زار ابوه مرتين او ثلاث بس .. بيان تناظره كيف تضايق .. تتمنى يتكلم لها ويفضفض ..العنود هي اللي قالت لها عن خلافه مع ابوه بعد ماطلقها عشان زوجته المصريه ترضى .. طلال وقف : بجيه ان شاءالله تحرك ونزل درج المدخل وهو يحس بالمطر اللي زاد لف ع بيان بيقطع السالفه : هذي اللي تقول مطر خفيف بيان : لاتسوي فيها عاد توه زاد قبالناا العنود : ادخل عن المطر لاتمرض طلال تقدم بسرعه لبيان وسحبها مع يدها وطلعها معه عن المدخل .. بيان شهقت وهي تحس بقطرات المطر القويه : اتركني بدخل طلال يمسك يديها الاثنين وبنذاله : لا مـافيه بيان تبعد شعرها عن وجهها بكتفها : مااحب اطلع بالمطر بلا نذاله طلال نزل وبخفه شالها ويدور فيها .. بيان تصارخ : طلال نزلني يماااه العنود تضحك ع خبال ولدها بهدل هالبنيه الناعمه بدفاشته .. طلال يضحك : اووش لاتصارخين بيسمعوك الجيران بيان تحرك رجولها وتدفن راسها بصدره : نزلني والله بصارخ طلال يهمس باذنها : واهيم بالثغر الجميل واعشق النظرات من مكحول سود الاعين بيان رفعت راسها تاملت ملامحه ووقفت عيونها بعيونه يالله شكثر تحب هالانسان طلال نزلها وهو يتبسم : في المطر شايلك واقولك شعر وتقولون السعوديين ماهم رومانسيين بيان ضحكت وتمسح وجهها عن المطر تحسه حار متاكده ان لونه قلب احمر .. ودها تصرخ بااحبك بس خجلها مانعهاا × × جالس ع كبوت سيارته ويصور سناب تنرفز من اللي صوره فالمستشفى يتمنى يعرف مين والله مايسكت له .. الكل يساله عن سبب عصبيته .. ورد عليهم بااختصار "حياتي الخاصه مو شغل احد ولاني مجبر ابرر لاحد" وقفل ع السالفه محمد وقف قباله : سلطان تكفى حاول في ابوي اطلع معه سلطان قفل جواله : انا مالي شغل وهو صادق انت وراك مدرسه لازم تهتم هذي اخر سنه لاحق ع الطلعات محمد جلس جنبه وهو مكتم : الله ياخذها هالمدرسه جعلهم يعلقون الدراسه بكره بعد بروح عند خوالي ازين لي سلطان لف ذراعه ع كتفه ورفع جواله : انتظر بصورك معي متابعيني يسالون عنك محمد برجوله رافض : قصدك البنيات سلطان ضحك : ههههههههههه لا والله مو بس البنيات محمد يحاول يبعد عنه لما بدا يصور .. وسلطان يمسكه غصب وهو يضحك محمد دفه ومشى عنه للبيت سلطان يصوره ويضحك : مايبي يتصور الرجال هههههه سعد طلع من البيت : سلطان يبه سلطان قفل جواله : هلا يبه سعد وقف قباله وبيده مفتاح سيارته : انا بروح مع ابو راشد نشوف هالمطور وانت كانك فاضي طلع هالبنيات مشيهن سلطان ميل راسه بطفش رافض : ويييين امشيهن سعد قاطعه : لا لا وانا ابوك مشهن كسرن خاطري وامك تبي تطلع يلا انا بروح ماابي اتاخر ع ابو راشد سلطان تنهد : وانا اتدبس بالبنات اووف دخل البيت شاف امه ترتب الترامس بالحافظه واصوات البنات مايدري وينهم .. مريم : هاه يمه جهزت السياره سلطان مايبي يكسر خاطرها : لا هالحين اطلع الجيب من بيمشي مريم ابتسمت : كلناا ماشاء الله خالد اخذ اهله وطلع والبنات مسكو ابوك طلعنا طلعناا سلطان : حتى جدتي بتمشي معنا مريم ضحكت : حتى جدتك سلطان : ياحوول يالله اجل وين مفتاح الجيب مريم : شوفه مع محمود سلطان وهو طالع من البيت رايح لغرفه سواقهم محمود : والله لو يطلعهم هو وافتك وحوالي عشر دقايق الكل تواجد بالسياره سلطان لما شاف سعادة البنات حتى عمته بدور وفاديه معه.. السياره بالعافيه شايلتهم حس بسعاده ع هالجو العايله ومناقر البنات .. ام سعد : اطلع من المدينه مرره امسك خط النور سلطان : لا لا النور عشان تقولين مرو ع فياض وعز الله مانطلع من عنده الا وهو ذابح لنا ام سعد : لا بالله انا اخبر منك بهالامور وماني قايله مروه مير الديار ذيك زينه افنان تلف ورا وتصور ريمان وشذى ونهى وريان يسوون حركات خبال .. ضحكت وكتبت "رحلة عائليه بالاجواء الجميله" وارسلتها لبيان .. بدور : شغل لنا شيلات خل نستانس فاديه ميلت فمها وصدت عنها بقرف .. ريمان : ايوه ايوه تكفى وهب البراد ونهى وشذى يغنون معها : وزانت النفسيه والجو وروعه والمشاعر حيه سلطان صرخ وهو يحرك يده : ههشش خلاص فهمنا افنان تضحك وتلف ع البنات : لقطو وجيهكم ريمان : سلطان شوفها تضحك عليناا مريم : بس يابنات مانبي هواش خلونا ننبسط مانبي نصدع فاديه : بناتي مايعيشون بدون هواش بدور : هه زين اعترفتي بناتك اصل الازعاج فاديه : لا عاد اذا جينا للازعاج من غيرهم التوم مكسرين الدنيا بدور : بناتي مايبدون ام سعد قاطعتهم : اقطعن الحس ياحريم خلصنا من الصغار جونا الكبار سلطان شغل المسجل وهو يتبسم فاديه وبدور مايشبعون هواش من هم صغار يتذكرهم بس هالحين اشوا بس مناقر مو مثل زمان توصل للضرب بينهم .. × × حطت السطل ع الارض مكان ما المويه تنقط من السقف .. لفت ع امها بحلطمه : لمتى واحنا عايشين بهالبيت خلونا ناخذ لنا بيت جديد ونرتاح عهود المتكيه جنب امها : والله بيتنا شحلاته يجنن ولا موقعه استراتيجي حوله المزارع شي يفتح النفس شتبين اكثر من كذا بشاير جلست بتعب : اييه وكل ماجا مطر ندري ان وراه تنظيف وين راح قصي خله يطلع السطح يمسح المويه مزنه : بهدلتوه المسيكين يمسح ويرجع المطر لا راحت الغيوم خله يمسح مره وحده منى دخلت وهي تضرب ولدها ع رقبته : ادخل لابارك الله في ابليس انا مو قلت محد يطلع منذر يبكي يبي يطلع يلعب في المويه الناقعه جنب بيتهم من المطر .. منى سحبته ع الحمام تروشه عهود : حرام عليك منى خليه يلعب ع كيفه لاحقه ع تنظيفه منى طلت عليها من الحمام : انتِ اووش روحي بس دخلي عيالك لايغبنونه المسكين عهود : والله مادخلتهم خل يلعبون ويطلعون طاقتهم منى صرخت بقهر : عهود لاتقهرين ولدي قومي دخليهم اصلا برد برا عهود تصب لنفسها قهوه : مالك شغل في عيالي بشاير : حرام عليك عهود عهود : ياسلم هي اللي حرام عليها تحرم ولدها اتذكر واحنا صغار نمووت في نقايع المويه بعد المطر متعه اللعب فيها ليش احرم عيالي خل يشبعون لعب بعدين اروشهم مزنه ضحكت : اذكر يوم ادخلكم وتطلعين من الباب الثاني انتِ وفياض ويكمل الشله منصور برا مسوي سواتكم عهود : شفتي عاد هالحين هم يطلعون يتمشون بسياراتهم وانا هني منثبره بشاير : لا وبعد ماخذين رجلك معهم هههههههه عهود ضربت رجل بشاير : قومي بس اتصلي ع البنات خلنا نتجمع عند اي وحده اهم شي بيتنا لاا ابي اطلع بشاير وقفت : اي والله بيتنا لااا × × ناظر جواله اللي يدق : هه وكانه عرف اننا حول ديرتهم ام سعد : فياض سلطان رفع جواله : اي بالله .. هلا مرحباا شذى تهمس لريمان : الجرح ريمان : حددي بالله فياض ولا وليد شذى بضحكه : كلهم وقابل للزياده في قائمه الاعجاب ريمان تضرب ع راسها : خلف الله عليك افنان اللي بعد ماطفشت قدام جات عندهم ورا وريان جا في مكانها عند امها ..: اشش لايسمعكم سلطان عز الله خربت الطلعه نهى تضرب راس شذى : اييه انطمي سلطان قفل منه ولف ع جدته : هه شافنا ام سعد : وينه فيه سلطان يلف السياره : تعديناه تو يتمشى هو وعيال عمه بعد احلف عليه مانبي عزيمه مايفهم مريم : هذا اللي مانبيه سلطان وقف السياره وعدل عصبه شماغه : هالحين يجي اتفاهم معه اعوذ بالله منه ام سعد بحب : كريم ولد كريمه فاديه تناظر الجيب اللي وقف ونزل منه فياض اول مره تشوفه بكل اختصار "رزه" .. استندت ع يدها وهي تناظر تحركاته وكيف يشد ع يد سلطان وكانه بيتهاوش معه ماهي عزيمه .. بدور بصوت واطي : ياجعله من نصيب بناتي فاديه وبس بدور اللي جالسه جنبها تسمعها : ياجعله من نصيب افنان بدور لفت عليها وبسخريه : طليقه الارهابي فاديه ناظرتها بقهر : والله ان ماسكتي لا اقول لعمتي عن قولك وانتِ تعرفين غلاة افنان عندها بدور سكتت وصدت عنها .. ووراهم بالضبط جالسه افنان تناظره وهي تتذكر صوته الغليظ لما كلمته حست بقشعريره تسري بجسمها كيف تجرأة تكلمه بس ماتدري ممكن لو ماقالت له ماهو عايش هالحين .. اللي فهمته من كلام ابوها ان فياض كان عارف ومتفق مع الشرطه .. وسوا نفسه مو عارف ولما طلعو له وقطعو طريقه ونزل من السياره طلعو الشرطه ومسكوهم .. نزلت عيونها بسرعه لما لف عليها مع ان السياره مظلله بس حست انه يشوفها .. ركب سيارته بعد ماوعده سلطان يجو له مره ثانيه مخصوص .. ناظر سيارة سلطان وهي تحرك من قدامه .. لقى نفسه غصب يفكر فيها مايدري هي معهم ولا .. يحس برغبه كبيره تجتاحه يبي يشوفها يتمنى شوفتها من كل قلبه مو قادر حتى يتخيل شكلها ياترى تشبه سعد ولا اخوها ريان ملامحه بنوتيه ناعمه .. استند ع الدركسون وغمض عيونه ويتذكر صوتها المبحوح الباكي تنبهه خايفه عليه يدري ان خوفها عليه انسانيه لا اكثر بس اسعده.. تنهد وعدل جلسته : يارب اجمعني معها ع طاعتك . × × في حوش بيتهم فارشه السجاده ع الارض النظيفه بعد المطر .. وجالسه وقبالها صديقه عمرها نوره .. مدت لها الفنجان : تفضلي نوره اخذته وهي تناظر البيت هادي :الله يسلمك وين الاهل خوله بعدم اهتمام : كلهم راحو بيت عمتي راشده الكل بيتجمع هناك نوره : وليه مارحتي معهم خوله : مالي خلق وربي ولاني طايقه اشوف مزنه ذاك اليوم بكل وقاحه تقولي تحلمين يرجع لك فياض وانها تبي تزوجه نوره ضحكت : وان شاءالله افتهمتي الحين خوله ناظرتها بقهر : هالحين انا متضايقه و انتِ تضحكين نوره تحط يدها ع فمها : حقك علي كملي خوله تنهدت : انا عارفه انه مارح يرجع لي بس مااتخيل اشوفه مع وحده غيري احسني مرتاحه وانا اشوفه لحاله مثلي نوره : حرام عليك ي خوله لاتصيرين انانيه خله يعيش حياته ولاتفكرين فيه و انتِ بعد اللي سويتيه معه مو شويه حسي ع دمك وخلي الرجال في حاله و انتِ شوفي حالك خوله تحس انها شوي وبتبكي : طيب انا معترفه اني غلطت بحقه وهو ليش مايحس فيني انا كنت مصدومه بموت الغالي اخوي واهذري ولاني حاسه بعمري نوره صدت عنها بضيق ماتبي تلومها اللي جاها كفاها من اخوانها وابوها وعمامها .. خوله : انا بكلمه وجها لوجه بعد لازم يسمعني نوره شهقت : وشوو صاحيه انتِ خوله بجديه : ايه صاحيه انا لازم اتحرك واحاول قد مااقدر عشان مااندم بعدين ع استسلامي يمكن يقتنع ويسامح وترجع حياتنا نفس قبل واجمل مع حمودي نوره خايفه عليهاا : ياحبيبتي لاتعيشين نفسك باوهام ثم تنصدمين بالواقع اسمعي كلامي وانا اخيتك عزي نفسك عن هالرجال وشوفي هاللي يخطبونك وكملي حياتك ماتوقف ع احد خوله تلف عنها بعدم اقتناع وفكره انها تكلم فياض تتمكن براسها ... * * من اول مانزلت من السياره راحت جري لبيتهم .. دخلت غرفتها وقفلت الباب بالمفتاح .. بعدت الستاره عن شباكها العاكس .. ناظرت مكانه مو موجود .. نزلت نقابها بقهر يعني وهي بالسياره شافته جالس ع عتبه باب بيتهم مسرع قام .. كانت بتبعد عن الشباك بس شافت بابهم انفتح وطلع وبيده كوب وجلس بنفس مكانه شرب شوي من كوبه ورجع يناظر في الفراغ .. تحس انها مو قادره تميز ملامحه بس هذا هو نفس الطول وهيئه الجسم .. حست قلبها يدق بقوه وهي تتذكر كيف كان قريب منها .. بعدت عن الشباك بسرعه وقفلت الستاره وهي تتذكر كلامه مو قادره تفسره لانها ابداً ماتتذكره بحياتها وكلامه يدل انه يعرفها زين .. جلست ع سريرها وبعدها بعبايتها وطرحتها ع كتوفهاا .. ناظرت شنطتها حقه المدرسه وكتبها جنبهاا تاففت : اوووف متى اتخرج وافتك تحركت بسرعه ونزلت عبايتها وسحبت كتاب الاحياء وانسدحت ع السرير وحطت رجل ع رجل وهي منسدحه وقلبت شوي بالكتاب مالها خلق تراجع .. اليوم كان مفروض اختبارها بس علقو الدراسه وفات اكيد الابله بكره تختبرهم ياااهمي * * نهايه البارت الخامس..