نـوح الـحـمـام - الفصل 18 - بقلم ضــوء الــقــمــر - مكتملة | روايتك

رواية نوح الحمام الفصل 18 كم وحده جاتني في الجامعه وتسألني تعرفين بنات الـ فلان.. واذا قلت لا قالوا يخلق من الشبه اربعين...!! واسألي امي هذا هي قدامتس مره وحده ابلشتنا في عرس تقول انتي من بنات خالد والا تركي..!؟ انا مانيب صغيره واميز الصح من الغلط ..., خوذوالكلام مني انا المعنيه فيه .., الي نسوني وانا ملفوفه بكافولتي ما بيهم يتذكروني حتى وانا ملفوفه بكفني...! وهذا اخر ما عندي لكم جزاكم الله خير ودورو لولدكم علاج نفسي وبدني عند غيري..., ان كان شوفت ولدكم لي علاجه له...؟ ترى شوفتي له سمي الي بيذبحني ...! مع السلامه وانسوا ما واجهتم وقمت قدامهن وقفت عندالباب .. اسكتن وافهمن انها طرده لهن..., لبست ساره ومشاعل غطاويهن وطلعوا من بيتنا اخر شي سوته مشاعل التفتت علي وغمضت عيونها وعضت شفايفها..! تبي مني اي ردت فعل لكن قويت قلبي..., صديت عنها ورجعت ابيهن يعرفن انه خلاص ماعادلهم عندي انا وامي وضحى شي..!؟ لقيت امي تبكي في محلها على عصاها رفعت راسها... عوق\ يمه وش يبكيتس انا بنتس شوفيني والله ما ابدلتس ولا اتركتس يا ضي عيوني.. انتي مالتس غيري وانا مالي غيرتس والا هم ناسهم واجد.. وضحى\ يا عوق يا بنتي الشق اكبر من الرقعه ولا تلومينهن ساره اخوها مشلول ومريض ولالهم غير الله ثم ها الولد لو يقدرن يشترن العافيه بدمهن باعن دمهم على شانه .. انتي تحسبين اني صدقت ساره يوم تقول محد يدري من خواتها الا هي..؟! ادري انها تسذابه كلهن داريات بس وش يسون ما يبن السالفه تكبر..! ومشاعل ام انفطر قلبها على ضناها تركض وراهن يمكن تقدر تلمتس من جديد.. عوق بااستهزاء\انفطر ما انفطرشي يخصهم ذنبهن على جنبهن .. انا كنت صفحه سوداء بحياتهم ما صدقوا يقطعونها ويتخلصون منها.. يمه ساره ومشاعل حتى جيتهم لنا شوفي كيف خش ودس وجوا بوقت مافيه احد يدري عنهم ..؟ هم يبوني علاج جديد يجربونه على ولدهم يشوفون يمكن ينفع معه.., وينهم عني مادورني قبل مادرو ان مشاعل جابت بنت الا يوم دخلت الثانوي عندهم خبربوجودي من انولدت ..؟ انتي من دمهم ولحمهم ما انتي غريبه نقول يمكن اخذتيني واختفيتي ..! ما بغوني الا يوم بدر جاله سرطان ..’ والا انا ما فكرو فيني ولا جابوا خبري عوق تضم وضحى بحنان \الي قال ان الام هي الي تربي ماهي الي تولد ما كذب.. انسيهم يا ميمتي تكفين نبي نرجع لحياتنا.. وسوالفنا انا وانتي خلاص وحده بوحده انا اغنيتس عن الناس وانتي با المثل اغنيتيني عن الدنيا كلها..! مسكة يد امي وقومتها ابي اخفف عنها... امي وضحى ما تستاهل مني الا كل خير امي وصلت الي ارذل العمر 87سنه ماهي هينه ..., خايفه عليها من ها الي تشوفه ..! وعدى يومنا على خير ...’’ -------------------------------------- يـﮯتبع.