نـوح الـحـمـام - الفصل 14 - بقلم ضــوء الــقــمــر - مكتملة | روايتك

رواية نوح الحمام الفصل 14 ابتسمت لأمي بوجع\ هاه وش بقيت السالفه واشوف عيونها من ورى برقعها حمر من كثر ما بكت ومتردده لاتسولف..’ عوق بألم\يمه كملي لو اني عارفه وش بتقولين لكن ابي اعرفها منتس.. وضحى بحسره وألم \ وش عرفتي ..! عوق بوجع وقهر\عرفت اني لقيطه ومن زمان بعد من يوم كنت با الثانويه .., قولي يمه قولي ماهو اكبر من صدمتي يوم قريت با الاوراق الي في شنطتك القديمه اني مجهولة النسب..!؟ كملي الله يرضى عليتس اليوم يوم المفاجأت ..!! وضحى وهي لامه ايدينها على عصاهاومتمسكه فيه ساندها لاتطيح\ هذا الي انا خايفه منه طول عمري يجي اليوم الي اكسر قلبتس فيه ما شلت هم يا عوق اكبر من هم انتس تدرين عن الحقيقه الي مالتس ذنب فيها .. عوق بغصه \ذنبي حملونياه اهلي ياكم مره حاولت انتحر لكن اتراجع..! واتعوذ من الشيطان واتمسك با الحياه خوف من الله وثم علشانتس..’ ام عوق بوجع \طيش شباب .. ولحظة شيطان .. والراعي غافل ..!! ام عوق بشرود\انا من يوم خلقت وانا في البر واطلع للبلد مرات اقضي حاجه والا اروح مستشفى والا احصل ايجارات بويتات شريتها, شارو علي بشريتها الاجاويد استفيد منها لا تاكل ولا تشرب ماالله رزقني بعيال اذا احتجت عطوني..! والحلال مخاسيره واجد مرات نحتاج علف وماء الارض تمحل ويقل الرعي..’ وحنا متولعينن فيه ما نقدر نتركه ورث اهلنا واجدادنا والايجارات تنفعني وقت عازتها .., طعتهم ومثل ما يقولون العقار مثل الولد البار..’ والحمدلله عندي خير ابل وغنم وربي مبارك فيها لو بقعد عليها اكفتني , لكن المال مثل العافيه ما ينشبع منه وشقى دنيا...! ما قصرواخدموني عيال خالتس ناصر هم عايشين با المدينه ..., وانا ماعمري عارضتهم بشي الي يسوونه عندي هو الزين ... بعت من الحلال الي يخصني من حق اهلي الله يرحمهم .., واشتري بيوت وأجرهاما تحتاج اني اتعب احد واكلف عليه....! سعد يعلمني انه موكل مكتب يراعي بيوتي وهي تحت عينه .., وما يتركوني عيال ناصر...! سعد وسالم دايم يعسوني ويراعون حلالي وحلالهم... انا بيتي شوي مطرف عن ربعنا وعندي رعيان ترعى حلالي وحلال عيال ناصر.., بيوم جاتني سياره ووقفت قدام بيتي وانا ظر وتنزل منها وسميه بنت اختي ..! وارحب فيها الا الحرمه الي شوفتها تدل على العلم الاقشرالي وراها..! وضحى بذعر\وشفيتس يا بنت عسى ما شر..! وسميه تبكي\ يا خاله داخله على الله ثم عليتس انا بمصيبه مالها بعد الله الا انتي..؟!! ويطير قلبي من هرجها وامسك يدها \ وش صار وش جاري عليكم ..!! وسميه\ بنتي ياخاله بنتي ابتلت بعرضها.. وانا تدور بي الدنيا من الي سمعته ما عاد تشيلني رجليني واجلس با الارض ...! وضحى با انكسار\وانا وش عندي يا وسميه ...؟ ان كانكم تعرفونه جروه مع اذنه وزوجوه البنت اعراض الناس ماهي لعبه..؟! وسميه وهي تبكي وتمسح دموعها بكم عباتها\ياخاله الي بلاها ولد عمها.. وانتي عندتس خبر انه متنوم با المستشفى له شهورمن عقب حادثه.. وضحى\ يا بنتي وانا وش بيدي ولدكم ان شاء الله يطلع با السلامه ويتزوج بنتكم ..’ وسميه\ لا يا خاله السالفه اكبر من حادث الولد..!! البنت حامل وهي بزر عجزنا نطيح حملها مادرينا فيه الا هو خلاص فيه الروح والدكاتره ما رضوا ينزلونه.. وضحى بوجع\ وانا وش تبيني اسوي وش عندي حل للمصيبه الي صارت على راس الجميع.., وضحى بتسأل \والحين البنت وش سويتو بها..؟ وسميه\ با السياره مع ابوها وام بدر.. وضحى\خليهم ينزلون يمكن ان ربي يهدينا لحل نستر فيه ها المصيبه..! ودخلت مشاعل وام بدر وابوها والوجيه الي ماتبشر بخير سود سودها الخوف من العار سلموا علي وجلسوا.., وسميه بترجي \ ياخاله خلي مشاعل عندتس لين تولد وعقبها يدبرها الله .. الطفل بنسلمه لرعاية الايتام وهي ان شاء الله ان بدر يتعافى ويعرس عليها وتموت الفضيحه بمحلها محد درى عنها.. ابو مشاعل بغضب \جعلها تموت هي والي تجيبه وتدفنينها با النفود محد درى عنها ولا بعارها.., يابنت نمر والله لو ادري ان موت مشاعل بيستر الفضيحه كان ذبحتها..., لكن موتها مثل حياتها سواد وجه ..’ وضحى \عين خير يا خالد..عين خير.. ماعاد تنفع السوالف ولا الملامه الفاس طاح با الراس خلوها عندي لين الله يفرجها.., انا ما اطلع على احد ولا اخالط الناس واجد..., والي حولي بدوان تطارد ورى حلالهامحد يم احد .. وعيال ناصر عندهم شغل ما هم جايين ها الوقت كان يمرون لهم شوي ما يطولون خبركم هم مدرسين ماهم كل وقت عندي.., وان مرني احد من الجماعه با اخفي مشاعل عنه اما اني بخليها تطلع ورى الحلال والا بنلقى لها دبره..!! امر الله شق القربه ..؟! توكلوا على الله وارجعوا لبيوتكم ومشاعل يدبرهاربها .. وقعدت عندي مشاعل واهلها ماعاد شفت منهم احد.. ------------------------------------- يـﮯتبع.