الفصل 46
مر اسبوع طويل على نوف وهي تصد منصور بقوة ..
منصور حس انه صج سبب لهالانسانه الم كبير علشان تصده بهالطريقة .. كانت طالعه من المطبخ شايله قلاص حليب
ــ ممكن اعزمج عالعشا ؟
طالعت له نوف باستغراب .. بعدين طالعت الساعه كانت 8وشي..
ــ عندي دوام باجر .. بنام بدري .
مسك يدها بهدوء وبنبره ترجي
ــ مابنتأخر ممكن ؟ .
طالعت له نوف واستغربت الترجي في صوته ..هزت راسها ببساطه ..
ابتسم بفرح ــ يله بنطرج في السيارة . .
طلع برا وتم تطالع نوف في اثره مب مستوعبه ..ترجيه ..فرحته ....لمسته .. جزيئات جسمها اللي في حالة اهتزاز غريب.. قلبها اللي نبض بقوة ..عقلها اللي يرفض هالصورة ؟ .
ادخلت والبست ملابسها ..وحطت ميكب خفيف..
في السياره ..جلست جدام ....شغل منصور الراديو على الاخبار.. بعدين فجأة دخل سي دي .. اسمعت اغنية فيروز بصوتها الساحر ..
..قديش كان في ناس..
((قديش كان في ناس عالمفرق تنطر ناس..وتشتي الدني ..ويحملوا شمسية وأنا بأيام الصحو ماحدا نطرني..)) .. ..
كانت الاغنية جميلة حزينه .. اندمجت فيها نوف مع انها ماتحب تسمع اغاني وايد ..
في البداية كان الصمت هو اللغه المتوحده بينهم ..طالع لها منصور..وكان حاسه بضيقه ..ذكرى روز مسيطره عليه ..لكن مستقبله .. نوف..
ــ شخبارج .
كان السؤال مفاجيء لها .. اخبار؟. ..
ــ ماعندي ..
شالغباء صار لها اسبوع مرتزعه معاه ..ماشافه طلعت ولا شافها اتصلت في احد .. حتى جمعه يوم الجمعه رفضت تروح فتم منصور معاها ..ولما اتصلوا فيهم قال لهم انها مصدعه ..
ــ نوف .. ممكن نبدأ صفحة جديده ؟ .
طالعت له نوف ببرود ــ مابيننا اوراق... ,
نزل منصور راسه ***** .. وقف عند المطعم وخذ له طاوله في ركن العائلات .. طلبت لها سلطة يونانية ..
ــ خذي وجبه ..
نوف ــ انا متعشية ..
ــ شكليتي.؟..
ــ اي شي..
طالع المنيو ..وطلب اكثر من طبق .. استغربت نوف ــ شحقه ؟؟ .
منصور ــ انا جوعان !!..
كان يكذب وكانت تكذب ..هي ماكلت شي ..وهو متعشي في فينيسا الساعة 6 مع رفيجه .. ومفولين .
ــ نوف .. اسمعيني..بقولج قصتي.. اسمعيها من الأول ,,واحكمي علي..
ــ منصور.. انا اعرف كل شي ..ماله داعي تقلب المواجع ..
نزل منصور راسه ــ لا يا نوف .. ماتعرفين شي..ماتعرفين ان هالانسان الي جدامج خذلته الحياه ..وخسرته جزء من روحه ..
طالعت له نوف بذهول..
ــ انت متحسف على طلاقك لـ روز.
طالع لعيونها ..واول مره يحس انه يشوفها ..كانت هدبها كثيف ونجلا ..
قال بصوت يرجف بعد ماضاع لثواني في عيون نوف ..
ــ لا ..
ــ عيل شتقصد. ؟ .
ــ اسمعيني.. ..اسمعيني قبل لاتحكمين علي..
طالعت له بعدم ثقة ــ ماعندي خيار الا اني اسمعك .. وافهم هالجزء من روحك اللي.. خسرته ..
ابتسم بسخريه يبي يعلق ..لكنه سكت .. قاعده تسخر من جرحه ..لكنه مايلومها ...,,
ــ اليوم اللي جرني فيه ابوي لخطبتج كان اسوأ يوم في حياتي..
بدون وعي صاحت بسخريه ــ هـــه ... شالجديد ..
ـ نوف اسمعيني .. اسمعيني بعدين علقي.. قولي رايج ..ارجوج لاتقاطعيني..
ــ اوك.. بس ارجوك ..لاتحسسني اني فرضت نفسي عليك.. ترا عمي فرضني عليك ..وعبدالرحمن فرضك علي.. كان اسوأ يوم لنا حنا الاثنين ..فلاتحسسني انك احسن مني. ا واني ماصدقت على الله اتزوجك و..
قاطعها ــ نوف .. بس.. اسمعيني..
سكت نوف بعد ماسحبت نفس قوي ــ سامعتك ..
ــ انا كنت متزوج روز قبل لا اتزوجج !.
انصدمت نوف .. وتمت تطالع في الصحن الفاضي اللي جدامها ..ماتوقعته يتكلم عن روز ..
ــ جمعتني بروز قصة حب .. ماادري شلون ا وصفها لج ..جمع بيننا الكره قبل لا يتحول لحب.. تزوجتها ..وحولت ديانتها للاسلام رغم معارضة اهلها .. جمع بيننا حب افلاطوني لايمكن ان اقوله بالكلمات .. انا ماخنتج .. انا ماغدرت فيج .. انا خنتها هي..وكنت متيم فيها مثل طفل عشق لعبه .. حبي لها يزيد كل يوم .. وفجأة .. جرني ابوي مثل الحمار واجبرني اخطبج واحطم حياتج وحياتي.. كنت بقوله قصة زواجي.. لكن روز ترجتني..ماكانت تبي ابوي يغضب علي..كانت راضية باقل الساعات معاها ..المهم اني مااخسر اهلي...ويوم الزواج ..
سكت شوي .. بعدين كمل والحشرجه في صوته كانت واضحه ــ صابت روز حالة نفسية ..كانت متأكده انج بتاخذيني منها ...ووعلشان اضمن تحسن حالتها النفسية ..وعدتها اني لها ..مابلمس غيرها .. وهذا سبب جفاي في البداية ..لما تأكدت روز اني وفيت بوعدي..وشافتني ملتزم بكلمتي ارتاحت نفسيتها ..لكن ..
شال قلاص الماي شرب شوي بعدين كمل ــ كانت تحلم بطفل.. وكنت كاره هالفكره .. لين يوم شكت انها كانت حامل ..وهنا كانت الطامة الكبرى..
كانت نوف ترتجف من الكلام اللي قاعد يقوله ـ جابت لك ولد ؟؟..
ابتسم وهز راسه بلا ...
ــ عيل شنو يامنصور؟. .
ــ اكتشفنا انها مريضة بالخبيث..بمراحله االأخيره !..
اشهقت نوف لا اراديا !... ــ اسم الله سرطان ؟؟..
نزلت دمعه من عيونه بدون وعي ــ ايه .. كان اصعب اسابيع حياتي.. هي كانت مؤمنه وايمانها قوي ... لكن انا تزعزت صلتي في الدنيا !!.. شلون جزء من روحي يحتضر وانا تام حي؟.. وفي عز آلامها اتصل فيني حمد يهزأئني.. يذكرني فيج .. وهي بين يديني تتألم أشد ألم .. الشيطان عمى عيوني .. وصار اللي صار..
نزلت نوف راسها بحيره ..تذكرت ضربه لها ..تفريغه لشي في داخله في هالضربات ..
ـــ سافرت معاها .. رحنا لبلدتهم ..عرفت اهلها وعرفوني ..ومسأله وقت ..وماتت روز مخلفه في روحي فراغ كبير..
ــ عظم الله اجرك ..
ما رد عليها مصدوم من رد فعلها .. تعبث بالشوكه اللي جدامه شوي ..
ــ روز ..الكل يقول لي بقره هنديه ..شتشوف فيها ؟؟.. انا حبيتها ..هي هنديه بس هي بشر قبل لاتصير هنديه وغير مناسبه لوضعي الاجتماعي..فيها انسانه طيبه صادقه ..عشقتها روحي للجنون .. كانت حبي الاول ..انطفت الدنيا في عيوني بوفاتها .. لكن .. الحي ابقى من الميت .. انا مضطر اكمل حياتي .. نوف..انا وصلت للحظة خسرت فيها كل شي... روز ..شغلي..الأمل في حياتي.. اللي يكلمج انسان عانى .. يمكن بتحتقرين معاناتي.. لكني عانيت ..عانيت الم الفراق..ووصلت لمرحلة من اليأس..لولا ايماني بالرحمن ..كان ..
طالعت له نوف بشفقة ..
ــ نوف .. ريحيني وقولي انج فهمتي اسبابي...انا ماظلمتج ...انتي انفرضتي علي مثل ما انا انفرضت عليج .. والحين ..الشي الباقي لي من هالدنيا هم اهلي..وانتي... عطيني سبب ارجع لحياتي الامل.. ادري غلطت ..ادري مديت يدي عليج ..ادري ظلمتج ... لكن هذاك منصور ثاني..منصور ماكان قادر يستوعب الألم ..ماكان راضي بالفراق.. .
جا الجرسون وحط الأكل جدامهم .. تمت نوف تطالع في الاكل سرحانه ..
ــ اتمنى اني ماسديت نفسك عن الأكل..
ابتسمت مجامله ــ لا ماسديت نفسي...
وكانت بتبدا تاكل صحن السلطة لكنه سحبه من جدامها وحط لها صحن ثاني ..
ــ امانه .. اكلي..
ماردته ..أكلت من الصحن .. وتم هو يقلب في السلطة ..
وخياله مع ابتسامة روز ... تعوذ من الشيطان وطالع لنوف .. كانت تتسم بهدوء غريب...كسرت خاطره .... ,, تمنى يعرف بشنو تفكـر...