الفصل 13
رواية نوح الحمام
الفصل 13
عوق با اصرار\خلاص ياساره علمينا با السالفه الي تبين تحطين لها نهايه وجلست جنب امي قلت ياالله سمعينا..!
وجلست مقابلتني انا وامي..,
ساره\ شوفي ياعوق القصه الي بقولها لك تبي ضبط اعصاب وتبي انسانه ذكيه تستوعب الي بقوله..؟؟
وانتي اتوقع ذكيه وبتفهمين وتقدرين كلامي..
الي بشرحه لك يمكن بيكون قاسي عليك لكن مافي يدينا شي ..!!
عوق با اهتمام\ قولي الي عندك وانا مأهله نفسي لأسوءالاحتمالات ..
ساره\ اسمعي ..!
انا بقولك السالفه من اولهاانتي الحين بنت كبيره وفاهمه 21سنه سن اعتقدممكن تميزين فيه الصح من الغلط..
مشاعل الي قبالك بنت عمي..,
من يوم طلعنا لدنيا واحنا مع بعض ...
جدي الله يرحمه رجل معروف وعنده خير بنى لأبوي وعمي بيتين مستقلات لكن بسور واحد مايبغي عياله يبعدون عن بعض ..,
عمي الله ماكتب له عيال عنده تسع بنات ومشاعل الوسطى بينهم..
بنات عمي داخلين طالعين على بيتنا واحنا زيهم..
وابوي ماعنده الا ولد واحد على ست بنات هوالاوسط بين خواتي اكبر من مشاعل بسنه...
كنا نعتبر اخوي بنت من كثر البنات الي حوله..!
تخيلي بنات عمي تسعه وانا وخواتي سته يعني عايش بين 15بنت..
وكبر اخوي بينا وعلى انه جسم طول بعرض الا انا نعتبرعمره 8سنين..
ياكل ويلعب ويسولف ويتفرج معانا على التلفزيون ونمزح مع بعض ..,
من كثر ماابوي وعمي متعلقين فيه..,
ينادونه بينا بدر الخمس طعش علشان احنا 15بنت وهو بينا...!
خواتي وبنات عمي مثل الخوات يدرسون بنفس المدارس ..
لبسهم شغلهم مثل بعض خصوص ان اعمارهم متقاربه..
ولا عمرنا حسينا احنا وبنات عمي الا انا خوات وعايشات في بيت واحد..!
ننام في بيت عمي امي ماتفقدنا عارفه ان احنا عندهم وهم كذلك ينامون في بيتنا عادي كأنه بيتهم ..
استقدموالنا سواقين كل بيت فيه سواق علشان مشاورينا الكثيره..
ابوي وعمي حريصين جدآ علينا وكانوايرسلون اخوي من يوم كان صغير يطلع مع السواق الي بياخذنا للمكان الي نبيه سواء سواقنا..,
والا سواق بيت عمي ما يتركنا معاهم نقضي مشاويرنا..
بما ان بدر الولد الوحيد للعايلتين فهو يعتبر ولد للكل ..
حرص ابوي انه يتعلم السواقه وهو صغير رغم خوفنا عليه..
بدر بدت تبان عليه ملامح الرجوله لكن كلنا مغمضين عيونا عن ها الشي ونعتبره طفل..!
مره وحده من خواتي شافته يدخن وخبرت ابوي ..,
زعل منه وضربه..’
ابوي على حبه الشديد لبدرالا انه اذا غلط يعاقبه ما يفوت له شي..!
كان شاري له سياره وهو ماكمل 15سنه بيحسسه انه صار رجال ويهدده اذا غلط يسحبها منه..
بدر صرنا نلاحظ عليه حركات تدل على انه خلاص صار رجال لكن نكذب انفسنا ونشوفه طفل...!
مره دخلت غرفته لقيته يتفرج على شريط فيديوغير اخلاقي..
حلف انه من صديقه ومخبيه عنده امانه وانه اتفرج عليه مجرد فضول بيشوف وش فيه..
حطمت الشريط قدامه وهددته لو بيعيدها ويدخل بيتنا هاالنوعيه من الافلام راح تكون العقوبه من ابوي ..,
عوق بحذر\ طيب ها الحين سالفتك الي من اليوم تسردينها علينا وش دخلني انا وامي فيها..!
معروف اخوك مراهق والمراهق توقعي منه اي شي ..
واحمدو ربكم انه كان يخاف من ابوكم ..
في مراهقين يصورلهم خيالهم انهم خلاص اهلهم لو بيقولون كلمه معناته انتقاص من رجولتهم ويكون لهم ردود عكسيه..
وانتو وبنات عمكم طبيعي يعني تختلطون في بعض بما ان البيوت القريبه ولا في غير محارمكم..
عوق بملل \ خلينا من سوالف المراهقين ادخلي با الموضوع ترى امي تعبانه ولا تقدر تطول با الجلوس ..
لازم لها الراحه واحنا ما احنا فاضين انا وراي امتحانات وامي مرهقه اختصري وعطينا الزبده من ها المحاضره..!
والا تعالي بوقت ثاني كملي لنا قصة حياتكم ..
ساره\لا تعصبين جايتك بالزبده ..!
ابوي وعمي كانوامتفقين ان بدر لمشاعل لأنها اقرب وحده من خواتها لعمره..
وكلنا متقبلين ها الموضوع سواء في عايلتنا او اقاربنا..
الكل عارف ان بدر لمشاعل رغم صغر سنهم وفعلن ابوي كان ينتظر بدر يكمل 18سنه ويزوجه مشاعل ..
يقول ابي اشوف عيال بدر يكبرون معاه,
ابوي من كثر حبه لبدر اخذ له ارض قريبه من عندنا وبدا يبني بيت المستقبل لبدر ..
كان حاط في باله ان بدر ما يجي وقت زواجه الا بيته جاهز..’
ساره تتنهد بألم\لكن صار الي ماهو با الحسبان ولا خطر لنا على بال..!
بدرالطفل في نظرنا اختلى بمشاعل خلوه غير شرعيه وكانت في بيتنا بغفله من كل العايله..
وبغرفةبدر وعلى مرئى من الجميع بحجة كلهم صغار والبيت كله بنات ..
وان ها الأشياء ماتطري في بالهم بما انهم مقاربين لسن الطفوله او احنا كنا بس الي نشوفهم اطفال..
ويوم صار الي صار واكتشفنا ها المصيبه بدر هرب من البيت ...؟
خاف من ابوي وعمي وصدم با السياره الي كان ابوي شاريها له...
ودخل بغيبوبه طويله الأصابه جات بظهره وراسه...؟
ونسينا مع حادث بدر مشاعل الي بعد 4شهور من الحادث اكتشفنا حملها..’
.
.
.
من يوم سمعت ساره تقول حملها حسيت براسي يدور وارص على يد امي وضحى الي شعرت بخوفي وقعدت تسمي علي..’
.
.
.
عوق بغصه\ يمه فديتس لاتخافين والتفت لساره ومشاعل الي ما وقفت بكى وهي ساكته...!!
عوق بحذر\ يا الله كملي..؟
وانا بداخلي كني عرفت وش بتقول..
يا خوفي اني انا الحمل ونتيجة غلطة بدرومشاعل..؟
ساره\ عوق كانك تعبانه بنرجع مره ثانيه...؟
المهم انه صار عندك خبر ان بينا كلام لازم تعرفينه ...!!
عوق بألم\لاو الله ما تطلعون لين تكملون السالفه ماهوعلى كيفكم..
غرزتم سكينكم بصدورنا انا وامي وبتروحون لا انتم الي ذبحتونا ولا انتم الي سحبتو سكينكم..!
ساره بحسره\ بكمل يا عوق..
جات خالتي ام مشاعل عند امي وخبرتها..
وامي قالت مافيه الا ان الحمل يطيح والا بننفضح لو بنترك حمل مشاعل يتم مصيبه على العايلتين..!
يا وسميه انا حرمة كبيره من بيصدق اني احمل بعد ها العمر..!
وانتي شايله رحمك بعد ماولدتي بناتك التؤم,
والكل عارف والا كان قلنا وحده منا حملت وجابت الطفل ويتربى بينا ...!
بس وش نسوي ها الحين وبدر بغيبوبه من شهوروالاكان زوجناهم وسترنا ها البلوى ..
فوق حادث هالولد وبناتي وبناتس الي مخطوبه والي توها معرسه والله ان تخرب بيوتهن قبل تعمر..
وروسنا المرفوعه بتندس بالتراب...
ياربي سترك من وين طلعت هالبلوى..
امي وخالتي ام مشاعل حاولوا ان هالحمل يسقط بأي طريقه وعجزوها واعطوها اعشاب اضربوها ماقدروا ينزلونه
اخذوها مستوصفات خاصه على اساس انها متزوجه ورفضوا ينزلونه يقولون الطفل كبير وخطر علي حياة الام وحرام ينزل..
مشاعل كانت حامل في الخامس..
الدكاترة كانوا يلومون خالتي ليش مزوجتها بهالسن
ومن كثر ماحاولوا امي وخالتي انهن ينزلون هالحمل ولا قدروا..
خافوا ان مشاعل تموت من الي سووه فيها والناس تدري انها حامل...
وماكان قدامهن الا يسترن الخبر ويدبرن مشاعل من عندهن..
خبروا عمي ابو مشاعل ولا قالوا لابوي الي كان منهار على بدر..
عمي انصدم وبلع السالفه الي بين امي وخالتي سميه وعمي
كل البنات في البيتين اعرفوا بخلوة بدر بمشاعل لكن الحمل محد درا فيه كان سر بينهم..
خالتي وسميه لها خاله ارمله وعايشه في البر طلعوا لها امي وعمي وخالتي ومشاعل للبر..
وقالوا لنا انهم زعلانين على مشاعل بعد الي صار ولا يبونها معنا لين يتعافى بدر ويتزوجها..
واخذوا مشاعل عند خالة سميه...
ساره تأشر على وضحى /وبقية السالفه عند وضحى ومشاعل...؟
---------------------------------------------------
يـﮯتبع.