الفصل 45
صالح من صوبه مستغرب من جرأته .. لكنه حس انه مقصر...ركب سيارته واتصل بمبارك .. لكن الاخير مايرد عليه .. راح القهوة بسوق واقف وقعد هنام يشرب شاي بنعناع و جنبه شباب وشياب .. تموا يسولفون ويضحكون ...وقاموا كلهم لصلاة العشا ..
____
رجع صالح البيت وانصدم بولد جيرانهم سيف يرسم بالبخاخ الرش على الحيطة حروف .. وقف يراقبه ...
وبالاخير بالوان غير متناسقه بوس قلب كبير ..
S+ R=LOvE 4EvEr
قرب صالح منه ــ السلام عليكم ..
اختبص الولد اللي عمره تقريبا ماعدى ال15 ..
ــ وعليكم السلام استاذ صالح ..
ــ سيف .. أبٍسألك .. خلصت كراسات الرسم من الدكاكين ؟؟.
اختبص سيف ــ ها !!!..
طالع له صالح بهدوء ــ خل مسألة الشكل العام على صوب والنظافة والتعدي على بيوت الناس... انت تعرف هالبيت بيت منو؟..
سيفـ ــ ايه بيت بوسعد ..
ــ انزين .. انت تعرف مثل ما انا اعرف ان عنده بنات !!...
هز سيف راسه مفتشل ــ ايه ..
ــ انت الحين من تقصد بحرف الراء هذا ؟؟..
استحى سيف ونزل راسه .. فكمل صالح ــ مهما كانت اللي تقصدها انا متأكد انها مو من هل البيت صح ؟
هز سيف راسه ــ ايه اصلا بناتهم كلهم كبار..
ابتسم صالح وهو يطالع سيف اللي على باله انه نفذ من هالموقف فقال في سخريه ــ وانت تبي تشيل ذنب هالبنت في رقبتك ليوم الدين ؟؟..
انصدم سيف ــ اي بنت ؟؟
ــ انت ماتدري ان بو سعد عنده بنت كبيره اسمها رنا؟؟..
سيف ـ بس انا ماقصدها !!..
ــ اي انا ادري..بس الناس..وبو سعد ..واخوان رنا ..مايدرون .. بيظنون ظن السوء في البنت .. وبيصير لها شي انت مسؤول عنه !!!!!!!...
اختفى كل لون من وجه سيف ..وبدون وعي فتح السبراي و رش على الحروف وطمسها ختى القلب .فصارت بقعه سودا كبيره بشعه ..
ــ اسف استاذ والله ماقكرت !!!..والله ..
ابتسم صالح ــ خلاص ..انا بعتمد عليك ماتعيد هالسلوك مره ثانية ..لكن الحين ..برجع لموضوع الشكل العام ..والنظافه ..برايك هالبقعه .. شنو محلها في الاعراب؟؟..
سيف ــ اسف استاذ.. باج ان شاء الله بشتري صبغ وانظفها ..وعد مني..
صالح ــ انزين وان اعرف انك قد هالوعد .. تعال انت تحضر المحاضرات اللي في المسجد؟؟..
سيف ــ لاء..
صالح ــ احضرها بين فتره وفتره ..احسن لك من هاللعب.. ابي اشوفك هناك ..وعد؟..
سيف ــ ان شاء الله بس استأذن ابوي..
صالح ــ مااعتقد ان ابوك بيمانع .. يله السلام عليكم ..
وراح عنه صالح ودخل غرفته اللي برا بعد ماشيك على ابوه ودخل ينام ..
_______
اليوم الثاني المســا ...
الهدوء يسبق العاصفه .. كان احساس المها ... الكل هادي ومافي اي اكشن ..حتى الحين راشد مب راضي يقتنع برفضها وهي في حيره هل تقوله ولا تستر على الريال !!... كانت في بيت جدها مواعده ديمه ..لما دخل حمد ..حست قلبها يدق بقوة ..
المها ــ حمد .... ابيك في موضوع ..
استغرب حمد ..ــ نعم يالمها شبغيتي؟؟..
قالت وهي ترتجف ــ بغيت .....
وسكتت محرجه .. ..
حمد ــ المها ..لاتستحين وانا اخوج ...
حست المها غصة في قلبها كانت تبيه يحجر عليها جدام العرب مثل ماسوى مبارك ..لكن ..هو ... اخو..صج هي احساسها نحوه كاخو .طول عمرها تعامله كاخو ..ماحبته في يوم الا مثل حبها لراشد وعبدالرحمن ..وبتكون الضحية منى ..حرام .. كافي انها متعذبه وسط زوجات اخوانها بعد تاخذ منها هالانسان الطيب؟؟.. اللي بيعوضها شقى هالسنين ..تذكرت منى وطيبتها ..لولا انها شافت معامله مرت اخوها لها جدام عينها كان ماعرفت عن الشقى اللي هي فيه ... استغفرت في خاطرها وتابت عن خطتها ..وطالعت له
ــ المها ..قولي اللي في خاطرج ..
ـــ شرايج في جاسم ..
استغرب حمد .. طالع بنت عمه .. ــ ماتسألين عمي صالح هو ادرى فيه ..هو اللي مخاويه عمر..
المها ـ وعشان هالسبب قاعده اسألك .. اش رايك انت فيه ..
حمد ــ يالمها الرجال ولد اصل ومصلي ويعرف الله ... اخلاقه ..الصاحب ساحب .وانتي ادرى باخلاق عمج صالح ..فشلون برفيج عمره !...
المها ـ حمد انا مب مرتاحه له ..
ــ استخرتي؟؟..
طالعت له بصدق ــ لاء..ولا ابي استخير..هالانسان مابيه .. عايفته نفسي..
حمد ــ المها ..عطيني سبب مقنع وانا من باجر اوقف بوجه الكل واقول المها ماتاخذه .. بس عطيني سبب مقنع ..مايصير ترفضينه وانتي حتى مااستخرتي!!..بعدين .. في هالنسب الكل يشوف اه فرصه العايلتين تتراضى ..وخوفج اذا رديتيه بدون سبب وهو جايب هله كلهم وجاهه ..تزيد المشاكل والكره ..
استغربت المها ــ جايب اهله شلون ؟؟
حمد ــ جا جده بكبره يطلبج لجاسم ..وعمامه ماشاء الله مب شوي ..انترس المجلس فيهم .. وجدي عطاهم موافقه مبدأية لانه يعرف جاسم .. والكل مستانس بهالنسب خصوصا كبير عايلتنا .. لانه خطوة منهم للصلح !!...
انكتمت المها ,,وصدقت اخيرا انه الزواج واقع لامحاله .. اكتمت عبرتها ..وقالت لحمد ــ الله يقدم اللي فيه الخير...
ابتسم حمد وقال لها ــ يعني نقول مبروك ؟؟..
المها ــ مبدئيا ...عقبالك ...
حمد ــ انا .. خل اخلص جامعه..وعلى طول ... ماني بناطر احد ..اصلا افكر اتزوج الحين واشتغل واحول جامعتي موازي...
المها ـ لا حرام .. بتخرب على عمرك ..مابقى لك وايد .. شد حيلك ..
استأذن حمد وطلع وراحت المها عند جدتها وحطت راسها في حضنها
ــ جده ..أنا خايفه !...
ام عبدالرحيم ــ يالمها .. توكلي على الله ..
المها ــ توكلنا على الله ياجده .. الا ديموه العصلا وين ..
دخلت ديمه ــ الحين صرت عصلا ؟؟؟.. اذكر اني كنت دبا !...
المها ــ هههههه .. صاادوه .. مابغيتج تسمعين هالاعتراف انتي وهالبرجر اللي في يدج !..
ديمه ــ حنيت على بروك يجيبه لي ..واوف بعد مفاوضات يله اقتنع .. مب راضي يصدق اني ماكلت شي من الريوق ..
ام عبدالرحيم ــ مدري شتحبين في لحم البقر هذا ً!!..
ديمه ــ جده ..اسمه برجر !!..
انفضت الجده يدها منها .. قالت المها ــ انزين .. ديوم .. ماعرفتي تحسبين حسابي؟؟ .. مب جايه علشان تشوفين خشتي؟؟..
ديمه ــ اي يا حياتي اموت على هالخشه والكشه ..
المها ــ كشه انتي ..
ديمه ــ خخخ .. انزين .. ماجبت لج اللي فهمته ان وراج عرس..مابيج تمتنين ..
قفزت المها وخذت الكيس من يد ديمه ــ انجلعي انزين .. وطلعت البرجر وتمت تاكل فيه وديمه تحاول تخطفه منها لكنها مب مخليته
دخل صالح
ــ اوف داحس والغبراء ..اشرد احسن !!!!
ديمه ـ عمي ساعدني هالدبه باقت عشاااي!!...
ضحك صالح ـ والله كنج عيوز تبجي على عشاها ..المها ارحميها!!.
المها وهي تاكل بسرعه ــ تستااهوووول .. محد قان نها ماتجيب لي..
صالح ــ ها ؟؟ مهوي لاتغصين وانت تاكلين بسرعه 180 كيلو بالثانيةّ.!!!..
ديمه ــ واسهال ..ومغص ..خلي عشاي .. والله ببجي..
دخل راشد في نفس اللحظة وانقلب وجه ديمه احمر واسكتت فجأة ..
طالعت لها المها بخبث ــ بتبجين على بطنج ؟؟.. ماتستحين ؟؟..
واضربت المها كوع .. ــ جب بس..
ابتسم راشد ــ ديمه.. هالزطيه اسرقت عشاج ؟؟..
حست ديمه باحراج وحست صج انها عيوز .. نزل راسها مستحى وضحك عليها صالح بقوة !!...ومن القهر طالعت راشد ــ ايه .. زطت البرجر كله ..يامال الاسهال ان شاء الله !!..
راشد ــ افا عليج .. الحين احلى وجبه من ماكدونالد بتصير عندج ..ومهوي احسب انج تعشيتي خلاص!!..
المها ــ اي الحمدالله كان برجر مليان ببهارات الشتايم والدموع ههههههه....
ديمه ــ وجع زين!!..
طالع راشد صالح ــ تخاويني؟؟.. نجيب للامه عشا ..
صالح ــ اي امه ماغير ديمه هالزطيه ..خدوج تعشت معاي .. و..
ديمه ــ جيب لفطومه عمي.. تراها تحب الهلابينو جكن من هارديز ..دايما الاقيها هي ونوف طالبين من وراي..
ابتسم صالح ـ صار.. يلا امشي ..يمه تبين شي؟
ام عبدالرحيم ــ سلامتك يمه .. بس جيب لي عصير مثل اللي جبته هذيك اليوم ..
ابتسم صالح ــ يمه هذا عسكريم من مندرين .. بجيب لج افا عليج ..بس اليكر منتظم عندج اول؟؟
ام عبدالرحيم ـ ايه الحمدالله .. شربت حبوبي..وعشاي كان خفيف.. بارك الله فيكم ..
طلع راشد وصالح واركبوا السياره ..وانطلقوا...
في نفس الوقت عند جاسم ..
كان يدخل يطلع ينقهر من نظرات امه العاتبه .ومن ابوه ..للحين ماوجهه له كلمه ..من عرف وجهتهم ونيتهم هو وجده وهو مايكلمه .
دخل عند اخته امنه ..
ــ شفيهم هلج ..
ردت عليه ببرود ــ مب هلي بروحي.
طالع لها معصب ــ حتى انتي..
امنه ــ ايه حتى انا .؟ من هالغريبه اللي تبي تجيبها بيننا ؟؟
ــ امنه هذي بتكون مرتي!!..
امنه ــ لاتحرق دمي..وشفيها بنه بنت عمي.؟ ولا ريان ؟؟... عندك ساره وغالبه بنات عمتي..مكثر البنات من حولك وكل وحده تطلب اشاره من يدك.
ــ شوفي امنه انا مليت من عرض البعارين هذا..انا اخترت شريكه حياتي..نقطة وانتهى!,.
عصبت امنه وقامت عنه مع انه قاعد في غرفتها !,,
دخلت بثينه اخته الصغيره عمرها 6 سنوات ــ جاسم ليش سويت في ريان جي.
بنفاذ صبرــ شسويت لها بعد؟؟
ــ مادري بس كله تصيح وتبجي....وتقول ليش ياجاسم !,,
سكت جاسم تلوم شوي بس هو مايحب ريان ..شافها وماعجبته .. حسها مثل امنه ...اخته شلون يتزوج وحده مشاعره تحاهها مثل مشاعره تجاه اخته؟
قلبه دق لوحده بس ..المها .. طلع وراح لغرفته وصلى ونام ..