نـوح الـحـمـام - الفصل 11 - بقلم ضــوء الــقــمــر - مكتملة | روايتك

رواية نوح الحمام الفصل 11 الجامعه على اسمها..! جامعه بنات من كل مكان ومن مناطق بعيده بمستويات اجتماعيه متفاوته وعقليات مختلفه..! ماهي مثل المدرسه اغلبية البنات يعرفون بعض بحكم ان المدرسه بوسط الحي ..’ تعرفت على بنات جدد...! وكا العاده الفت الانظار..., وين ما تواجدت... كنت باالماضي استحي لما احد يثني على جمالي وافرح بداخلي ..., الآن تغير كل شي, تمرني لحظات اشعر اني استقذرنفسي واكرها..! واحيانآ يجيني احساس ان زميلاتي الي يعرفون حقيقتي يتمنون يعقمون ايديهم بعد ما يصافحوني...! كل الكلام الي اسمعه يمجد جمالي احسه استحقار لي ...! يمكن جمال امي هو الي كان سبب كوني لقيطه..! او يمكن ها الوجه الي اطل با المرايه عليه كل صباح واشوفه ورثته عن ابوي..! امي وابوي هربوا واتركوني داخل كرتون والا بطانيه قديمه تستر الفضيحه قدام مسجد والا حاوية قمامه..!! ولا فكروا با المصير الي راح اواجهه المهم اني غبت عن مدى نظرهم... . . . مره كنت جالسه بكفتريا الجامعه وجاو بنات من نفس قسمي سلمواوجلسوا على طاولتي...! تماظربااعجاب\ تدرين عوق ان البنات كلهم اجمعوا انك اجمل وجه من الدفعه الجديده..., حنان بغيره\ صراحه عوق ما عليها لولا العلامه الي فوق حاجبها احسها مره مشوها وجها ...!! سلوى با استنكار\حرام عليك حنان قولي ماشاء الله العلامه على قولتك ماتبان الا اذا دققتي بوجه عوق ..! عوق بهدوء\ يا ليتنا نسلم من كلمة لولاكان احنا با الف خير.. وبعدين من قالكم اني حلوه يمكن علشانكم تحبوني تحسوني حلوه ... وحتى انا اشوفكم بعيوني ملكات جمال يا ليتني مثل اي وحده فيكم... سلوى\ ماشاء الله عليك عوق جامعه ادب وجمال وتواضع.. وتغير الموضوع للمكافأت وكل وحده با نيه آمال عليها..! . . . وانا اقول بنفسي ما ابي ها الجمال ولا ابي فلوس..! وش نفعتني الفلوس الي كل شهر تنزل بحسابي...! وكل ماصلحت كشف حساب القى رصيدي زايد وانا وامي متطلباتنا قليله... حتى مكافأتي من يوم صرفوها لي الجامعه ماصرفت منها شي...! اخذها من المحاسبه ولا افك التدبيس عنها وبدرج التسريحه مكانها اذا ماحولتهالحسابي... اللهم الا ها المبلغ الي كل ما نزلت مكافئتي اودعه صندوق التبرعات بنية صدقه عني وعن امي ... امي تزعل اذا ما طلبتها والا قلت بصرف من مكافأتي تقول انا امتس وملزومه فيتس.. , . . . دراستي با الجامعه كانت صعبه علي لكن الي كان يدفعني ويذلل الصعوبات هو خوفي من المستقبل وتعب امي الي كل يوم يزيدعليها احاول اجتهد اكثر.. واكثر..’ . . . في المراحل الدراسيه السابقه اذا صعب علي شي كانوا المدرسات يساعدوني ويراعون ظروفي..., اكيد كانوا من اسمي يعرفون اني مجهولة النسب...! من غير امي وضحى اذا ماحضرت للمدرسه شخصيآ تيلفونها يوفي با الغرض واكسر خاطرهم..., لكن الحين الجامعه غير... ما احد يعرف احد .. العلاقه بينا وبين هيئة التدريس الورق وبس...! وانا كل مستوى دراسي بصعوبه اطلع منه.. دخلت ثالث ووصلت للمستوى السادس ...! وكنت اعاني جدآ با المذاكره والبحوث... صرت معتمده بعد الله على نفسي كثير... دموعي مرات تغرق الورق اذا صعب علي شي وانا ابي انجح واعدي لمستوى جديد.. با الكليه اخذت دروس خصوصيه للمواد الصعبه مااتحمل الفشل..’ اصعب مادتين الانجليزي والحمدلله سنتين وافتكيت منه بقى الصرف الي ذبحني ناشب بحلقي ..’ امي كثر نومها ودايم احسها مرهقه ... وحيلها مهدود وكلامها قل ماهي مثل اول.., حتى صارت بصعوبه تمشي العصا ماعاد تفكه من يدها مثل قبل ..’ حاولت انها تستعمل كرسي متحرك ورفضت امي عنيده ولا تحب تبين ضعفهالأحدحتى لو انا..! خلاص قربت اخلص 21سنه سن الرشد... با الجامعه كثير من زميلاتي يلمحون لي تصريح اوتلميح الي تبي تخطبني لأخوها.. والي مستغربه كيف للحين ماتزوجت ..! وليش ما انخطبت ..!! وردي دايم ما افكر با الزواج الا بعد ما اتخرج واتوظف, و انا وحيدة امي ومحتاجتني , او ان اهلي ما يزوجون غريب.. وكل مره اطلع بعذر..! كثير منهن يقولون اسمك غريب وطبع اهلك اغرب ..!! وياماعارضوني وحاجوني بحديث الرسول صلى الله عليه وسلم, (( إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير )) ودايم افكر با اسمي هو صحيح يا عوق كلن له من اسمه نصيب..! امي دايم تناديني يا عوق المزايين .. هل انا عوق والا اعاقه وندبه سوداءفي جسد المجتمع..؟ -------------------------------------- يـﮯتبع.