على رمال سيلين - الفصل 42 - بقلم غجرية - مكتملة | روايتك

ــ يمه ..ماشفتج من شهور ..ابشوف اخواني.. ــ عنودوه لاتخربين علي مزاجي.. انطمي عند ريلج ..ولي رديتي الديره مريني ..مافيني اغير مخطط رحلتي علشان شوفه خمس دقايق ..وبعدين اخوانج الحين في مخيم كمبيوتر في لندن خليتهم .. ــ ليش يما !! ماجبتيهم معاج ..انا ايام واكون بباريس.. ــ وانا بروح سويسرا مب فاضية لج خلصت مدتي في باريس..خلج مع ريلج استر لج .. ولاتقولين لبوج ان اخوانج فالمخيم ..تراه مايرضى بهالمخيمات.. وتصك التلفون في وجه العنود وتصكرت الدنيا في وجهها .. ــ عنودي؟؟؟.. طالعت لأحمد اللي كان قريب منها واايد .. ــ شفيج حبي ؟؟.. هزت راسها لا اراديا غرقت بأفكارها وهو بهالقرب منها ..لايكون ..شالغباء ؟؟شلون يقرا أفكارها ؟؟... ابتسمت غصب ــ سلامتكـ... مسك خصلة شعرها بين أصابعه ــ من مزعلج ؟؟.. حست بقلبها يدق بقوة ..قالت بدلع ــ أنت !!... تغيرت نظر عيونه للصدمه ـ أنا ؟؟...بقط عمري من الدريشه .. ويبي يروح عنها لكنها امسكت قميصه ــ لا .. بعدين استحت من شافت نظرته المتفاجئة ..اتركت القميص منحرجه..وهو قرب منها أكثر ــ لا شنو ... ـــ ولاشي ... وطالعت بعيد عنه منحرجه وخدودها صارت حمرا بقوة ــ خلاص بقط عمري.. ــ لا ... طالع لها ــ لا شنو؟؟ ــ مايسوى زعلي .. صدقني.. ــ انزين ليش زعلانه ؟؟ ـــ ابي عسكريم ..وانت ماجبت لي عسكريم ! ابتسم وفي قلبه متأكد مية بالمية انها افتعلت هالسالفه في هاللحظة وان زعلها لشي خاص فيها .. ولا ليش ماتبي باريس بعد ماكانت متحمسه لها ؟طالع لها بحب ــ أبيج تتذكرين دايما ..أني أحبج !. نزلت راسها مستحية ..وتركها وطلع وانهارت على الكرسي وبدون وعي تمت تبجي بقوة .. هذا احمد اللي ماكانت تبيه ؟؟ . ..هذا الوحيد اللي في هالدنيا يعشقها ... وهي .. تحبه ..اي تحبه !!!.. مسحت دموعها .امسكت التلفون وطلبت عشا خاص حق شخصين مع باقة ورد بنفسجية .. .قامت للحمام ..غسلت وجهها وحطت ميكب خفيف على عيونها وروج احمر دم الغزال ....طلعت لها فستان ابيض قصير والبسته مع حلق فضية دائرية وفلات فضي ..ورشت من عطر شوبارد .. كان في شعرها رولات خفيفة ضبطته .. اذا ماتقدر توفر له مزاجها الزين على الاقل تكون جميلة في نظره .... جهزت الطاوله حق العشا .. وحطت شموع بنفسجية كانت مشتريتهم اثناء تجهيزها واستغربت وين راح احمد ..جا طلب العشا ..ورتبته على الطاوله ..وتمت تطالع في الساعه ..تأخر الشيخ صار له ساعتين مختفي ! فجأ طل راسه بيده كيس ..انصدم من المنظر ..وطالع ملابسه كان لابس برمودا وشيرت بدون اكمام .. ـــ واااو ...ماقلتي لي على الاقل البس ملابس رسميه !.. انحرجت ــ تأخرت ..والعشا برد .. طالع العشا ــ حركات ..شسوي اضطريت اشتري ثلاجه .. طالعت له مستغربـه ــ ثلاجه! ــ لا يروح بالج بعيد .. انتي مب طلبتي عسكريم؟ هزت راسها بعبط .. ــ انزين فالله يسلمج رحت لمحل البوظه وهو يبعد عن هنا نص ساعه مشي..وقبل لا اوصل لقيت العسكريم ذايب ..رجعت واخذت تاكسي وخذت عسكريم مره ثانية ..وعلقت في الزحمه مع ان المشوار بالسياره ماخذ وقت طويل..وذاب العسكريم ..فرحت السوبر ماركت شريت ثلاجه الحفظ هذي الصغيره وبعدين رحت المحل مشي ..وجبت لج عسكريم .. وعطاها صندوق صغير فتحته لقت علبيتين عسكريم .ــ علبيتين ! قال لها مبتسم ــ لا والله الشيخه تبي تاكل بروحها !!وانا مالي رب؟؟.. ضحكت وقالت منحرجه ــ مشكور ..ماقصرت .. وحطت العسكريم في الثلاجه ..وشغلت الموسيقى كان سيدي لفيروز أغني ((أنا لحبيبي وحبيبي الي ))..حستها اوفر .. بس خلتها .. لفت مالقت احمد استغربت وين اختفى .. راحت عند طاوله العشا ..كانت مطله على منظر المدينه أثينا فالليل وكان الجو رومانسي .. جلست وتمت تنطر احمد .. دقايق وطلع ..كان لابس قميص ابيض وبنطلون رمادي وجلس جدامها .. ــ يلا ناكل ؟؟.. هزت راسها مستانسه وعجبتها لازانيا الخضار وايد .. كان اختيار موفق .. أحيانا قمة الرومانسية تكون في ابسط الأشياء ! _ _ _ ___ _ _ _ _____________ جرت شنطتها بتثقل ..ودخلت الفيلا .. كان شايل الشنطه الكبيره .. ــ نورتي بيتج .. طالعت له مب مصدقه ترحيبه .. لفت ويهها بعيد عنه ــ بتتبعين معاي سياسه الصمت .؟ ماردت عليه .. ــ نوف .. قامت ودخلت داخل ولما جا يلحقها صكرت الباب بوجهه .. كان بيطق الباب ..لكنه قرر يعطيها وقت .. لين تعوض اللي راح .. جلست نوف على السرير وهي متضايقه ..طشت مسج لمريم انها مابتداوم هالاسبوع ..علشان تاخذ لها اجازه عرضي بتنكتم داخل هالغرفه لان آخر شي تبي تشوفه هو منصور! ________________ انصدم بو عبدالرحيم من الوجاهه اللي دخلت مجلسه .. كلهم يعرفهم وكلهم كانوا على عداوه بمعظم قبيلتهم .. ــ تفضلوا اقلطوا .. دخلوا المجلس واشر بو عبدالرحيم لصالح انه يكلم خوه وعيال اخوانه .. ودخل صالح وهو يدري شالسالفه واتصل بعبدالرحيم وعياله وراشد .. ورجع و ضيف ضيوفه القهوة والشاي والحلو .. كان في البدايه الكلام بسيط وسؤال عن الحال ..دخل عبدالرحيم ..وسلم على الجماعه ودخل بعدها الشباب مبارك وحمد وراشد .. واستلم حمد مهم الضيافه بدل عمه صالح .. بو عبدالرحيم ــ يا مرحبا تو مانور المجلس ... بوخليفه ــ والله اليوم جاايينك يا بوعبدالرحيم وكلنا عشم انك ترضى طالع بو عبدالرحيم مستغرب ــ جاسم ولدنا والنعم فيه ورفيج ولدي صالح من كانوا صغار ...... بو خليفه ــ وهذا العشم والله .. انا جيت اليوم وجبت كل اخواني وعيالي وعيال اخواني .. جايين نخطب بنت يوسف الله يرحمه لولدي جاسم .. ابتسم بو عبدالرحيم ـ والنعم فيكم والله وان شاء الله اللي الله كاتبه يصير .. قال مبارك بدون وعي ــ بس البنت محيره لي وانا ابن عمها واولى فيها ! انصدم الكل بمن فيهم راشد اللي كان ساكت ومفوض الامر لجده .. ارتبك بو خليفه وطالع جاسم بعتب ليش يخطب بنت ولد عمها حاجرها ..وجاسم اللي كانت يده ترجف منصدم .. لما لاحظ صالح رده فعل جاسم قال يصحح الوضع .. ــ بس جاسم يبي يخطب بنت يوسف الصغيره ..