الفصل 37
ــ خل منصور يرجعها !! ماعندنا بنات تتطلق !!..
انصدم راشد ــ جدي..مستحيل اختي ترجع له !!..
عصب جسوم ــ راشد .. انت سمعتني ولا لا ؟؟؟. قلت لك ماعندي بنات تتطلق !!..
راشد ــ بس ياجدي هو اهانها وطقها وتزوج عليها !!
منصور ــ انا ماتزوجت عليها انا كنت متزوج قبلها!!..
راشد ــ انت جااااااااب!!!..
سكت منصور ونزل راسه وهو متلوم شرجعه.؟؟..
ــ مارضى على اختي يا جدي.!!.. مارضى عليها بس تخلص عدتها ازوجها لواحد احسن منه ..!!
فجأ انصدم منصور تذكر انه ماقرب من نوف .. وش بيقول عنه الناس؟؟..
ــ لا زوجتي وابيها !!
طالع له صالح منقرف ــ انت طلقتها!ماعادت زوجتك!
بو عبدالرحيم ــ صالح لاتزيدها!... راشد ناد اختك ترجع لزوجها ..
مارضى راشد وتم واقف معصب قام بو عبدالرحيم بنفسه لكن صالح قال
ــ اقعد يبه ..انا بناديها..مع انه انا ضد انها ترجع له!..
قام صالح وناد نوف اللي لقاها تبجي في زاوية البيت ...
مسك يدها ووقفها ــ عمي مابيه!
صالح ــ جدج ملزم ..يقول ماعندنا بنات تتطلق..
ــ وراشد ؟
ــ نفسج مايبيج ترجعين له يقول انه بيزوجج بس تخلص العده..
انهارت نوف بالبجي مرة ثانية ــ ياربي وانا شذنبي؟؟ هو ليش رجع؟
ــ يقول زوجتي وابيها!!..
ــ خل يروح للهنديه انا مابيه ..
ــ تعالي ..
دخلت نوف والدموع في عيونها ..
راشد معصب ــ ليش ماقلتي ان هالواطي مد يده عليج!!..
انصدمت نوف وانصدم منصور يعني ماكانوا يدرون؟؟..
تجمدت نوف بمكانها ..بو عبدالرحيم ــ لازم ترجعين لزوجج..
قال راشد ــ بشرط يطلق الهندية.
قال منصور ــ طلقتها...
انصدمت نوف..تمت واقفه هناك بس تهز براسها كل ماسألوها شي ..بس عقلها ماكان معاها..شلون ترجع له؟؟بعد هالذل؟؟..
اما منصور ..ماكان يبي يخسر اهله ..شعوره كان التمسك باي شي..يبي يرجع وسطهم ..مايبيهم ينبذونه..صج اهل روز اعرضوا عليه عياده ومنصب في مدينتهم..لكن بعد روز مايقدر يبقى هناك..ماعنده شي في الهند ..وهني اهله وابوه وامه .. واخوانه ..وعيال عمه!.. رفع راسه لما قال ابوه
ــ مابيك في بيتي..
انصدم الكل!!.. قال منصور ــ بستأجر لي بيت ...
بو عبدالرحيم ــ بعطيك فيلا في المجمع السكني حقي.. انتقل انت وزوجتك بكره لهناك ..والحين ..نوف روحي انجبي الغدا..
طلعت نوف وهي تسحب عمرها غصب وشافت المها وديمه يتساسرون ويبتسمون ولما شافوها استغربوا ــ نوف شفيج؟؟
طلعت خديجه وام عبدالرحيم وفاطمه من الصاله للمطبخ ــ رجعوا؟؟
هزت نوف راسها ــ يبون الغدا..
طالعت لها خديجه ـ نوف ..انتي تصيحين ؟؟. شفيج؟..
ــ منصور رجع..وتوهم رجعوني له!!..
انصدموا ..وتموا يطالعونها منصدمين !!!
ديمه ــ ورضيتي تردين له ؟؟.. من صجج؟؟..
نوف ودموعها همايل ــ شسوي جدي عصب ..يقول ماعندنا بنات تتطلق!!..
حضنتها خديجه بقوة وخذتها لداخل تريح شوي..
ديمه للمها ــ صج انه اخوي..بس ياني اكرهه كره عاللي سواه في نوف!..
المها ــ الله يعين وان شاء الله تتحسن الامور بينهم...
__
في المجلس خيم الصمت عليهم ومحد قاعد يتكلم عبدالرحيم معصب وبيي يطرد ولده لكن ابوه قعد منصور جنبه وعطاه شاي وقهوة ..لين دخلت الخدامه وقاموا الشباب يجيبون الغدا ..
دخل مبارك المطبخ ــ وين السمك؟؟ ليش لحم؟؟
ام عبدالرحيم ــ جدك اليوم جاب هالخروف وقال اطبخوه عالغدا..
حمد ــ جدتي.. من مسوي هالعصير؟؟..
وخذ له قلاص وتم يتلذذ فيه ..
ماتيلدا ــ ماما نوف يسوي عصير واجد حلو ..
ــ اي والله احلى من مندرين ..
مبارك ــ شرايك باخوك؟؟
حمد ــ لو اني مكان راشد اتوطى في بطنه لين تطلع معدته من خشمه!!..
ضحك مبارك ــ اي والله يستاهل..
ام عبدالرحيم ــ عيب .هذا اخوكم ..
دخلت ديمه المطبخ ــ شصار في المجلس؟
حمد ــ عادي ماصار شي..
مبارك ــ انا وحمد بلمنا ماقدرنا ننطق اخوج فشلنا من قلب!..
ديمه ــ شالجديد يعني .هذا وهو الدكتور الفاهم ..شخلى للبطاليه !!..
طالعت ديمه لحمد بنص عين ..
عصب حمد ـ لو سمحتي انا طالب مب بطالي!!...
ديمه ــ نفس الحروف طالب بطال..بس الباء سبقت الكل ههههههههه..
ــ سخييفه ..مبارك شيل معي الصينيه جدتي طابخه للفريج كله ..
مبارك ــ بشيلها بروحي يالضعيف ..انت شيل لعصير ولا ثقيل بعد ؟؟
شال مبارك الاكل وراح وتمت ديمه تضحك على حمد الي قال ــ احب اقولج يا مدام ديمه انج للتو خسرتي مصادرج التموينيه من الفاست والجنك فود..
ديمه ــ اول شي انا مدموووزايل مهب مدام ..وثاني شي اعرف قلبك طيب يموت علي مابتخون فيني انا اختك ؟؟..وتتخلى عني في اعز ازماتي الباطنيه ..
حمد ــ قومي بس قومي قولي لنوف تسلم يدها على هالعصير ..وقولي لها ترا بشبه كله مابخلي للزطي منصور شي ..
ديمه ـ انزين ..
ام عبدالرحيم ــ لاتطفشونه..دام جانا برجلينه مانبي نخسره ...
ديمه ــ نسيت اتصل في امي اخبرها ..هي من اختفى وهي تحاتيه ..
حمد ــ ليش وين امج ؟؟
ــ في بيت خالتيه عندهم جمعه هي وبنات عمهم ..
ــ مارجعت هيا؟؟
ــ نوو..ولا عمتي طيبه ولا العنود...جده..تهقين العنود ترجع تزورنا مثل اول؟
ام عبدالرحيم ــ ايه قالت لي انه شرطت على احمد انه يجيبها كل جمعتين لبيت جدها ..كانت بتقول له كل جمعه بس ماهان عليها اهله..خصوصا ان احمد هو اللي ماسك شركه ابوه مايفضى لهم الا يوم الجمعه..
ديمه ــ فديتها عنودي...
____________
كان راشد في صدمه قام مبجر وقال لهم انه بيرجع ياخذ البنات العصر..
ــ وين رايح في هالقايله ؟؟..
راشد ـ مشوار..
طلع راشد ركب سيارته وهو متضايق حده حتى صالح قلق عليه كان بيروح معاه لكن راشد ماعطاه فرصه ..
بوعبدالرحيم ــ صالح اتركه ..مب سهل عليه ...
ــ يبه ليش سويت جي؟؟
كان منصور في الحمام وعبدالرحيم مقيل ونايم ..
ــ صالح .اذا منصور طلع من هالباب مايرده شي..بيضيع منا..هذا ولدنا..وبعدين ليش الفضايح؟..مب كافي طيبه اللي تطلقت بعد هالعمر؟؟؟.
ــ بس نوف بتدفع الثمن!!..
ــ لا .. لاتخاف .. انا ماحطيتهم بهالمجمع الا عشان عيني تكون عليهم..لاتخاف ..منصور ذكي مابيكرر خطاه..
دخل منصور في هاللحظة وقال جده ــ تعال اجلس قربي..
جلس منصور وهو منزل راسه ــ لبيه ..
ــ شوف للحظه كنت بحذفك برا هالمجلس واقول الله يخلف عليك مانرجا من وراك شي..لكن ..من دريت ان نوف سترت عليك وما قالت لحد انك مديت يدك عليها..وهالشي اللي لو سمعت انك سويته مره ثاني اجتلك بيدي..ماعندنا رجال يمدون يدينهم على الحريم ..سمعت؟؟..
ــ ايه ..
ــ من دريت ان نوف استرت ..قلت بعطيك فرصه وحده ..وحده بس علشان هالفقيره .. تعزها وترزها وتتذكر انها يتيمه وبنت عمك اللي عزك واللي توسط لك واسطات كثيره علشان تسافر وتدرس طب..البنت ماخطت وانا اعرف ان الخطا جا منك .. اسمع يامنصور مابيك تفشلني جدام راشد وعبدالرحمن ..انا رديت نوف لعصمتك على ضمانتي..وانا مب عايش طول العمر..بس ابيك تبيض وجههي لي الممات وتصلح اللي كسرته ..لك فرصه وحده عقبها اطلق نوف منك وفي ميه الف واحد احسن منك يستاهلها..لاتضيع فرصتك.. وتخسرها وتخسرنا كلنا ...نوف متربيه واخلاقها طيبه ..يلا قوم الحين روح الفيلا وخذ مفتاح من اسماعيل البواب .. انا بتصل فيه ..في فيلا أثثتها وكنت بعطيها صالح هديه زواجه ..بس قلت ان صالح يبقى قربي هنا..احسن ...ماقدر استغني عنه ..بعطيه الطابق اللي فوق...
هز منصور راسه وقام بعد ماخذ العنوان من جده .. عنده فرصه وحده..لازم مايخسرها..
________
اما راشد لقى نفسه بين المقابر في ابو هامور ... دخل وسلم .... راح عند قبر ابوه اللي كان مكانه مميز..جلس عنده وهو ضايق الصدر.. وماحس بعمره الا و العبره خنقته ..
ـ يا يبه ماقدر...ماقدر اشوف هالظلم واسكت..يا يبه شكلي مب قد الحمل..
مسح دموعه تم ضام رجوله ودموعه مب راضيه تخليه .بعد دقايق . قام وراح عند قبر امه ..الي كان قريب من قبر ابوه ..
ـــ يمه .. ودي احط راسي على رجولج مثل ايام قبل .. واشكي لج عن الوجع اللي في داخلي ..اشتقت لج يمه .. اشتقت لج انتي وابوي...اشتقت لبيتنا اللي كان رمز الدفا .. رمز الحنان .. بيتنا الحين هيكل فاضي . ..فيه قلوب مهمومه..
بعد مافرغ اللي في خاطره من دموع .. قام وركب سيارته وتم فيها..جالس متضايق..واقف عند المقابر..هو يشوف الاطفال اللي يستجدون الناس..
_____
دخل حمد ومبارك المطبخ وكانت ديمه تبي تاخذ الجاي الجديد ..عند الباب تبي تدخل وسمعتهم
حمد ــ راشد متضايق حده والله اني خايف عليه شفت شلون طلع من هنا ..وجهه مخنوق..
ــ وش تسوي لو كنت مكانه ؟ جدي فرض رجعه نوف لمنصور عليه .وراشد مايرضى على خواته ادنى شي شلون برجعة اخته لواحد كان يطقها!!..الله يعين وين طلع بهالقايله..شاللي بيخليه يروق؟؟..
دخلت ديمه وشالت الجاي بدون ماتعلق وطلعت ..
كانت المها في الصالة .. نادتها لغرف الضيوف ..
المها ـ شفيج؟
صكرت ديمه الباب ــ راشد ..طلع من هنا مهموم ..ابيج تكلمينه وتتطمنين عليه ..
المها ــ على سالفه نوف اكيد ..
هزت ديمه راسها ــ كلميه امانه .. والله قلبي مب مرتاح..
المها ــ بس ماعندي جوال جوالي انسرق..
ديمه ـ متى ؟؟.
المها ــ مادري..بس صار لي اسبوع اكلمج من تلفون البيت ..الظاهر الفاتوره بتطلع عووده.. خصوصا ان حضرتج ثرثاره و..
قاطعتها ديمه بعصبية ــ وقتج الحين..اقولج قلبي يحرقني على راشد وانتي تهذرين عن الفاتورة؟..قومي جيبي تلفون خديجه ..
ضحكت المها ــ اه ياويلي على هالقلب بس..تلفونج عندج؟؟
هزت ديمه اسها وطلعت تلفونها من مخباها...
اتصلت المها براشد..
كان راشد سرحان لما رن تلفونه ..ولما شاف الاسم استغرب..
DEE CALLING YOU
استغرب ــ دي؟؟.. ديمه؟؟.. رد بعد مانفخ ..
ــ الو ..
ــ هلا راشد . انا المها..
ــ هلا مهوي..
ــ شلونك ياخوي؟؟
ابتسم ـ الحمدالله على كل حال..
ــ زين لان بعض الناس قلوبهم تحرقهم عليك آآآي ديموه ووجع!!..
ابتسم راشد يعني ديمه مستهمه عليه..
ــ قولي لهم فديت قلوبهم لايحاتون...
ــ ليش انا اقول لهم هااك ..
حذفت المها التلفون على ديمه وطلعت ..ارتبكت ديمه ..
ــ الو ..
ـ هلا ..
ــ شلونك راشد؟؟
ــ الحمدالله .. طيب دامني سمعت هالصوت ..
ــ ........................
ــ كنت اقول لديمه تقول لج فديت قلبج لاتحاتين ..
ــ .................................
كان وجهه ديمه قلب أحمر وماقدرت ترد من الحيا ..وحمدت الله ان مبارك مايشوفها هالحين .
ــ تحمل بعمرك ..ولاتتضايق ..ان شاء الله الله يهدي منصور ويتغير ان شاء الله ..
ــ تهقينه يتغير؟؟
ــ بيتغير لا تخاف .. جدتي تقول دامه جا برجلينه لازم مانطفشه ..
ــ ديمه ..قلبي يعورني على نوف ..تحملت وماشكت...ليش؟؟ لا ام ولا ابو ..بس عندها انا اخوها ..
ــ سلامه قلبك يا راشد.. نوف عاقل ..ماتبي تسوي مشاكل..وان اكتمت امس اليوم بان كل شي..لاتخاف ..انا متفاءله من منصور..احسه بيتغير..
ـ ديمه ..تدرين انج خففتي علي شوي؟..ديمه..
ــ لبيه..
همس ..ـ احبج..