على رمال سيلين - الفصل 36 - بقلم غجرية - مكتملة | روايتك

عند راشد والمها...كان راشد يقرأ الجريده والمها مستهمه لان صالح مايرد عليها ... ــ شفيه صلوووح ... طالع لها راشد ــ شفيه؟؟ ــ مايرد... استغرب راشد ــ شتبين منه؟؟؟ المها ــ ابي اعرف ردوا عليه في سالفه خطبة فاطمة!.. ــ لا قال لي ماردوا البنت تفكر..وبعدين ماصار له يوم خاطبها.. عصبت المها ــ شتفكر فيه ..ولله لو اني مكانها مافكرت على طول اقبل ..حاصل لي ريل مثل صالح!!! طالع لها راشد بخيبه ــ و الله تفشلين .. انتي صاحية؟؟باجر لاخطبج واحد بتردين عليه في نفس اليوم؟؟ اثقلي بس... المها ــ بس صالح اخلاق وزين ودين...ليش مترددة... ــ هي مب مترددة ه تفكر وبعدين لكل انسان معاييره ..يمكن هي مب حاطة في بالها تتزوج واحد اصغر منها!! انحبطت المها ــ يعني تتوقع ترده ؟؟ ياويلي لو ردته بتروح فيها ديــ... طالع لها راشد بنص عين ــ ديمه؟؟شدخل الديمه؟؟ المها بارتباك ــ ولاشي.. وقامت تبي تروح عنه لكنه مسك يدها ــ تقولين السالفه و لا شلون ؟.. ــ مافي سالفه ياخوي... كان صوت راشد جامد ونبرته حاده ــ المهـــا ــ ياخوي والله ماصار شي...لي صار بتعرف الحين ماقدر اقول لانه امر مايعنيني.. طالع لها راشد ــ شوراج انتي وديمه؟؟ ــ الخير وببسسسسس...عن اذنك بروووذر تراك عورت يديني .. ترك يدها راشد مب عاجبه طالع لها بعصبية ــ مهوي..لايطلع منج الغلط..مابي عمامج يقولون مايعرف يضبط خواته!!.. انصدمت المها وبدون وعي دموعها جرت على خدها ــ انت ياخوي تقول جي؟؟.. وهذي ثاني مرة ياراشد..ان ماكنت توثق فيني فهذي مشكلتك ..انا انسانه تعرف الصح من الغلط ولايمكن ارضى في يوم حد يتهمني بأخلاقي.. تركته وطلعت فوق وهي مقهورة حدها .. شفيه راشد.. بعدين طرى في بالها جاسم ..وانصدمت .. تذكرت نظرات صالح .لايكون!!!...في نفس اللحظة رن جوالها مسج .. فتحت المسج وانفخت بقوة من نفس الرقم ((ياللي صار رمشك حلم مستحيل.. ارحم قلب يحبك وصرت له ذكرى جنونه.... يخاف صورة عيونك من جفونه تطير.. وأمسي مثل الأعمى اللي فقد ضيا عيونه..))).. عصبت المها .. في نفس اللحظة اتصلت نورة .. ــ هلا .. ــ شفيج؟؟ معصبة.؟ المها ــ اووه ..هاللي مايستحي على وجهه طرش لي مسج.. نورةــ ياويلي عالعاشق.. ــ نوووروه لاتمصخينها.. نورة ــ مهوي مافيها شي لو عطيتيه وجه حرام تلاقينه ذايب حده .. المها ـ انتي قد هالكلام ؟؟. .. نورة ــ المها شفيج؟؟ ــ انتي قد هالكلام اللي قلتيه؟؟ نورة ـ اي انا قد كلامي ششايفتني ياهل!.. المها ـ عيل انا انا اللي ماعرفت اختار..انسي ان لج في يوم رفيجه اسمها المها!.. نورة ــ المها انتي شتخربطين انا شسويت؟؟.. المها ــ الصاحب الي يحد صاحبه عالغلط ماهو بـصاحب!... وصكرت التلفون ورنت كلمات راشد في راسها .. طلعت ورقة وكتبت فيها ارقام تحتاجها من التلفون وبعدين طلعت الشريحه وكسرتها .. مسكت الجوال وحذفته من الطابق الثاني وراقبته وو يتفتت لأجزاء .. ابتسمت ..ورجعت الغرفه وقعدت تقرأ روايه وهي مندمجه .. __________ مر أسبوع .. يوم الجمعه .. كان منصور جالس في الفندق مهموم ..مايبي يطلع .. يقلب في الصور ودموعه تزوره بين فتره والثانية .. من وصل الدوحه وهو معتزل في هالغرفة ...لكنه قرر اخيرا يروح بيت جده ... وفي بيت الجد.. ..عبدالرحيم كان منصدم .. من درى بخطبة صالح لفاطمة ..وهو ساكت مايقول شي..اخر شي توقعه ان صالح يتقدم لخطبة فاطمه لكنه ماحقد على اخوه لان اخوه مايدري بنواياه.. فاطمه وافقت بعد تفكير واستخاره و قالت لام عبدالرحيم رايها ..والكل في البيت استانس لموافقتها .وبدون مقدمات اعلن بوعبدالرحيم ان المهر هديه منه لفاطمه وانه بيصلح الطابق الثاني ويعيد تأثيثه .. . صالح ماكان راضي بالتقديمات اللي قدمها ابوه ..كان طول عمره مفكر انه يعتزل ببيته بروحه ويتزوج من حر ماله .. ماحب ابدا فكره سكنه في بيت زوجة ابوه .. لكنه ماحب يخرب فرحه ابوه فوافق مبدئيا.. اللي كانوا صج فرحانين بهالخبر ..هم ديمه والمها اللي كانوا يتنططون مثل اليهال جدام الكل .. خديجه ــ اموت وأعرف هالثنتين على شنو محتشرين ؟؟.. نوف ــ خليهم يفرحون .. خديجه ــ بس صج هالثنتين شبلاهم شوفي شلون ينططون ؟؟.. ابتسمت نوف ــ خليهم ..انا ودي انطط وياهم ..ونااسه ...صالح وبيعرس ..يامحلاه من خبر .. ابتسمت خديجه بعدين اكتأبت ..بتجي وحده تاخذ وقت صالح وسوالفه وضحكه ..وبتخسر صديقها .. بعدين حست انها سخييفه انها تفكر جي ..طالعت ديمه والمها اللي قعدوا يلهثون .. نوف ــ خديجه قومي شوفي الغدا ؟؟ خديجه ــ لا ماابي ... قومي انتي .. كانت خديجه تتفادى شوفه مبارك ..هي متأكده انه مترصد لها فالمطبخ كالعاده .. نوف ــ بقوم انا وامري لله.. مرت جدتها في الصاله الصغيرة لقتها تصلي .ورجعت المطبخ وهي تبتسم وتفكر اكيد خديجه ماتبي تشوف مبارك الخبله ماتدري انه في صلاة اليمعه مع جدها وعمامها واخوانه وراشد؟؟.. دخلت لقت ماتلدا الفلبينيه تقص اليح .. ــ ماتي ..الغدا خلاص؟؟ ــ يس ماما ماما كبير وفاطمه يخلص عيش طفي .. طالعت الساعه كانت 12 واربعين ..في اي لحظة يدخلون الشله .. ــ ماتي جهزي غدا للديوانية واللبن والعصير اللي جبته .. ماتيلدا ــ ماما عصير مال انتي واجد حلوو .. اضحكت نوف ــ شكلج صكيتي عليه يا ماتوو.. ماتيلدا ــ لا ماما بس انا يسوف لون اخضر انا يعرف في طعم واجد حلوو..انا يذوق افاكادو انا ياخذ قلاص كااامل .. كانت نوف مسويه عصير افاكادوا بالعسل وبعصير جوز الهند .. وحاطه فيه مكسرات ومبدعه .. ـ انا مسويه واجد .. حضري طقم الكاسات اللي فيه ليتل فلاور..تعرفينه؟؟ ــ يس ماما...انا بعرف يضبط عصير ..لايخاف..انا الحين يحط لبن ويجهز سماط مجلس.. نوف ــ عطيني السماط وانا اوديه الميلس مع اللبن .. .. البست نوف شيلتها حطت ماتليدا السماط على يدها وعطتها الصينيه اللي فيها اللبن والقلاصات .. و دخلت الميلس و...ماكانت متوقعه تشوف احد في المجلس.. وفجأة تجمدت أوصالها ..ماكانت متوقعه ابدا تشوفه !...لااراديا اخدرت يدينها وطاحت الصينية من يدها .. شوفته بعد هالأسابيع كانت صدمة عنيف لها ..ماتوقعت تشوفه بهالسرعه!!!...طالعت اللبن اللي انسكب على السجاد ..وماقدرت تبقى مكانها على طول طلعت تركض بعيد عن هالمكان .. تم منصور واقف مستغرب..كانه يشوف نوف اول مرة..اول مادخلت وقف على حيله من الصدمه شلون تدخل ميلس الرجاجيل؟؟.. دخلت ماتيلدا وتمت تنظف اللبن ..جلس منصور في مكانه ناطرهم يردون .. اديري بيطردونه ولا بيستقبلونه ..تم جالس يفكر وطرت في باله روز ..وتنهد ... ـ برا المجلس في نفس الوقت كان راشد ميت ضحك وحمد وجه احمر وجدهم يقطع فيه ــ ماعرفت تصكر جوالك ؟؟ في نص الصلاه تطلع هالاغاني ماتستحي انت ماتستحي؟.؟؟ عبدالرحيم ـ مرة ثانية تخلي جوالك فالبيت انت ووجهك فضحتنا بين العرب!!,,, دخل الشياب المجلس وبقى الشباب واقفين بره مبارك وصالح يضحكون عليه لان الشياب مستلمينه ن طلعوا من المسجد لين وصلوا البيت قال مبارك يكلم صالح ــ والله اني عرفت انه جواله من سمعت بو نورة ..آيووووووه ..قلبي عليك التاع ... كل مره اقول الحين بيصكره الحين بيصكره...وماصكره ليش يالخبل ؟؟ حمد ــ ماكنت ابي اثبت التهمه علي كل اللي كنت ابيه انهم يركعون وانا امد يدي واصك الجوال !!...بس ماتوقعت ان الكل عارفين انه انا !!... راشد ـ بذمتك عاد فكرت جي؟؟..اصلا الصوت جاي من الصف الاول على الطرف وجبنك جدي الشيبه !!,,, الناس اكيد تعرف انه انت!!....تعرف ان جدي ماعنده جوال!...الا تعال من داق عليك حزة الصلاة !! ــ رفيجي فهد مسافر لندن يدرس وكل جمعه يتصل علي ...بس اليوم اتصل بدري..مارديت عليه انت شفت من طلعنا من المسجد وكل شايب في المسجد سمعني محاضرة ماتستحي على وجههك!!..... صالح ــ تستاهل صكر جوالك مرة ثانية! واول مادخلوا المجلس انصدموا...كان عبدالرحيم مستلم منصور بالسب اول مادخل مبارك وحمد فصلوا بينهم وصالح حاول يهدي اخوه قال عبدالرحيم معصب ــ يستاهل الجلب يسوي في بنت عمه هاللون !!... منصور معصب ــ قالت لكم اني طقيتها!!,,تستاهل!! تستاهل كل ضربه !! راشد اللي كان متصنم عند الباب انصدم من اعتراف منصور ..عبدالرحيم تم يطالع ولده مب مستوعب واخوان منصور يطالعونه باشمئزاز .. ــ انت مديت يدك على نوف.؟؟... كان صوت صالح قوي ونبره جهوره ..وبدون وعي قرب من منصور وصكه كف على وجهه وقبل لايستوعب منصور صكه صالح كف ثاني .. ــ مب عشانها يتيمه تستغلها يالجلب..!!!.... كان راشد مصدوم ..ليش ماقالت له نوف!!...شلون كانت متحمله هالهمجي!!.. عبدالرحيم ــ انقلع برااا روح جابل الهنديه اللي خذيتها وانسى ان لك اهل !!.. ــ لحظه ...!!.. وقف بو عبدالرحيم بعد ماكان جالس معصب وساكت .. ــ راشد ناد اختك.. طالع له راشد مستغرب ــ نعم ؟؟ ــ ناد اختك!!.. ــ ليش؟؟