الفصل 35
كان الجو مشمس وحار بس حلو ومحتمل...الشمس ماكانت ساطعه وايد والنظارة خففت من حدتها .. طالعت العنود لأحمد اللي كان ماسك يدها وسرحان وهو يتفرج على الشوارع المرصوفه .. استغربت سكوته .. وصلوا لمقهى عالبحر ..
ــ شتشربين ؟. .
ــ تونا متريقين .مب مشتهية شي..
تما جالسين وهي مستغبه صمته ..وبعدين تشجعت وسألته ــ أحمد ..
ـ ياعيون أحمد ..
ــ شفيك ساكت؟؟...من طلعنا ودرنا بهالمكان الحلو وانت ساكت .توقعتك تشرح لي شي عن تاريخ هالمكان ..
ابتسم ـ لان شهر العسل مرة بالعمر..ألا اذا تزوجت مرة ثانية ..
عصبت العنود ــ نعم ؟؟
ضحك ــ الله ينعم عليج ..أمزح معاج لاتزعلين .. هو مرة وحده بالعمر..فقررت ان شهرنا يكون بهالمكان الرومانسي ..بنسافر بعدين في جوله حول الدول الاوربية .. لكن .. اول اسبوعين مع بعض لهم معنى كبير.. فيبتج لهالمكان اللي ارتاح له كلما اتوتر...هالمكان اللي جيته وانا مراهق عمري 12 سنه .. هي جزيره سياحيه من جزر اليونان ليتل فينس....وتعتبر من اقدم الجزر الاوربية وتعتبر الهام الفنانيين وعاشقين الطبيعه .... تتميز بهالشاطيء الساحر..وجوها الدافيء.. في متحفين أثريين هنا . ...بنزورهم بعدين وفي طواحين هوائية كانت ميزة هالجزيرة في القرن السادس عشر .. ومثل منتي شايفه طرقها السااحرة والوان البيوت المميزة ..
ــ صحيح حتى الفندق .. كلها ابيض ساطع و ازرق ..ماشاء الله الفندق وايد ..روعه ..يعطيك احساس بيتوتي..والمنظر..روعه ..
طالعها احمد ـ ان شاء الله هذي اخر فندق اربع نجوم تنزلين فيه .. انا مااخترته الا لاني حسيت انه فيه عزله ويليق بهالجو الصيفي.. .. ولا انا زوجتي ماتنزل فنادق اربع نجوم !
ابتسمت له العنود ــ مايهم المكان .. المهم الرفقة والنظافه ..
مسك يدها وقاموا يتمشون على البحر اللي كان لونه الازرق ساحر بشكل لايوصف.. تم يسولف لها عن ذكريات مراهقته ..عن زيارته لهالجزيرة مع اصدقاءه ..وساره كيف كانت كله زعلانه لانها تكره البحر وكله تامه في الغرفه تطالع الملك الأسد! وبوكاهانتس..!!
العنود ــ اووه ايام لول .. بوكاهانتس..
احمد ــ كانت سويره تخاف من البحر..واقولج الصج ..انا كنت مخوفها كنت اقولها قصص عن السعلوة ..
طالعت له العنود ــ هاااا..؟؟؟
سألها احمد ــ مب سامعه بالسعلوة ؟؟تريتره؟؟؟...الغوله ؟؟
ــ سمعت بالغول لكن الباقي .. نوو...
ــ جدتي الله يرحمها كانت تقول لي قصص عن السعلوة ..كانت قصص انها تطلع من البحر وانها تاكل اليهال...وانها تمسخ عمرها وتتنكر وتصير احلى الحريم واحيانا تكون ام القمل والعفن ..سوالف لول ماسمعتي فيها من قبل؟؟
ــ لا ولا مره ..جدتي ماكانت تقول لي قصص رعب ..كانت تقول لي قصة الشاطر حسن ..وان ابدعت يعني ان بدعت ..تقول لي قصص حب حزينه بس اكتشفت بعدين انها مقتبسه من افلام عبدالحليم!!...تعال انت يالظالم بينك وبين سويروا ربع سنوات يعني قلتهم لسويرة وهي عمرها ثمان!!!...
ضحك احمد ـ ايه بس شدراني ان البنت بتتعقد وبتخرب على عمرها عطلة الصيف بكبرها !!...هي بعدين قالت لي انها كانت خايفه من السعلوة وحنا في الطيارة لما ردينا ..اوف كسرت خاطري بقوة وبعدين قلت لها السعلوة مثل الديناصورات انقرضوا من ايام جدتي هههههههه...
طالعت له العنود ــ يعني تبرر جذبك لها.؟.
احمد ـ انا ماجذبت انا قلت لها قصص!! .. بس كان ضميري مأنبني..بس قلت لها ان في سعلاة وحده ظلت في القطب الجنوبي.. وليتني ماقلت لها قعدت طول الرحلة تٍسألني وين القطب الجنوبي!!..
ضحكت العنود من الخاطر عليه ــ واعليه سويره ..ليش تسوي فيها جي؟؟
احمد ــ كانت تلزق فيني وايد ..وكنت احب اروح البحر والعب بالسكي .. وهي تلزق وامي توصيني اختك واختك ..من قلت لها عن السعلاه كل مااروح البحر مع جيراننا صارت تروح وتنخش في غرفتها..وتقعد تصيح ..
ــ ليش؟
ــ تخاف السعلوة تأكلني!!..
ــ ياحلووها سويره وانت قلبك حجر!!...
ضحك احمد ــ لا والله كسرت خاطري فــ .... قلت لها السعلوة ماتاكل الاالبنات !!!!...
ضحكت العنود من خاطرها على هالمجنون ومسلسل الكذب على سويرة ..
ضحك أحمد معاها وهو يأرجح يدها وهم يمشوون ..
ــ وانتي؟؟.. شذكرياتج عن طفولتج؟؟..
سكتت العنود شوي ..وبعدين قالت ــ احلى ذكرياتي مع بنات خوالي .. سالم كان دايما معتزلنا .. تمنيته اني ألعب معاه .. لكن عقله دايما أكبر منا .. بنات خوالي لما كنا نجتمع في بيت جدي كنا ندخل المطبخ ..وكالعاده هم يتفننون وانا اتذوق .. كانت مهمتي التذوق كانوا يخلوني الحكم لان في الأكل انا الوحيده اللي كان ذوقي سليم احب الاكل بيرفكت !!..المها تحبه حامض ..ديمه تحب الملح زياده ..خديجه تحب الزيوت والزبده يكونون زياده عن اللزوم ..ونوف تحب الاكل الحار والفلفل..كنا نسميها رااجو..اووه ايام ..وهيا ..كانت تحب الأكل مطبوخ زياده عن اللزوم علشان الجراثيم !!.. بس اذكر مرة سافرنا جماعه للعمره انا وعمي يوسف الله يرحمه وزوجته الله يرحمها ووالبنات ..كلنا ..ومحد جا من شباب العايلة .يعني بس شلة بنات .. ..وحطوني حكم اختار لهم على ذوقي طبعا كان عمري 10 سنوات والمطعم كان شعبي.. و البنات يبوني اطلب لهم اكل على ذوقي .. طلبت صحن مربين ..برياني ربيان ..لان الكل يحب الربيان ..والكل اكل وعمي استخف على الوجبه ..الله يرحمه ..
ــ الله يرحمه ..
ابتسمت العنود ــ وعالعصاري وحنا على الخط..ههههههههه.....فجأة الكل لاعت جبودهم وقفنا على الطريق وهات ياترجيع ههههههههه تسممنا ..وقف لنا واحد سعودي الله يجزاه بالخير وساق لنا السياره لين المستشفى هههههه طبعا كلنا فينا مغص وفاجين الدرايش على كبر والريال متلطم ههههههههههه ..لايعه جبده ..ترقدنا كلنا حتى عمي .. والكل يتحسب علي ..ههههه تسمم .. بس اكثر وحده تعبت هي هيا ..بغت تروح فيها لانها متعوده على الأكل البيرفكت !!فمابالك بربيان فاسد!! ومن مطعم شعبي ..هذي كانت آخر مرة يخلوني اختار لهم فيها حتى وظيفه الحكم شالوها عني وسلموها لخالي صالح هههه وخلوني المضيفه ..
كان أحمد يضحك عليها لأنها استرسلت بالذكريات بدون ماتحس بعمرها ..حس انه كان معاهم في الرحله ..
ــ مساكين ,,ضحايا اختيارج!!,,
العنود ــ محد قال لهم يختاروني اختار لهم .,,,
ابتسم احمد ــ عاد تحبين الاكلات البحرية؟.
ــ اعشقها ..
ــ عيل تعودي اكلنا هنا بيكون اغلبه اكلات بحرية .,.المطاعم هنا تقدم وايد اشياء لذيذه ..بس بما ان الجزيرة فيها ميناء فالاسماك والربيان كله طازج ..بتذوقين شي خيالي..
استانست العنود ــ كلما سافرنا اوربا ..ماكنت اكل غير الكرواسان ...امي تاكل سلطات وسالم واخواني الصغار دايما يروحون المطاعم العربية .
ــ في اثينا مطاعم عربية وفيه سوبرماكت عربي .. وفي اسواق حلوة وماركات عالمية....
العنود ــ لا ..مابي شي من السوق العالمي..لانه موجود في كل مكان...احب الاسواق المحلية..والبضائع المحلية..احب اخذ ذكرى من كل مكان ...
ــ شنو آخر شي شريتيه من سفره لج؟؟
قعدت العنود تفكر شوي ــ ممممم....مممم..اخر مرة الصيف اللي طاف كنا في باريس .. طبعا كنا في تور في اوربا رحنا وايد مناطق فينسا برلين جنيف لندن .سكوتلند...واخر محطة كانت باريس.كنا نتغذى في مطعم عالنهر..وبعدين تمشينا انا وسالم وعامر وعبير و امي ماجت معانا.. كانت تودع صديقاتها وتمت تتغدى معاهم ...كان في بسطه عالطريق وحده عيوز تبيع مشغولات فضية ..خذيت منها خلخاال فيه احجار زمرد ...كان آخر شي شريته...لان كنا بنروح الفندق ناخذ اغراضنا عسب نروح المطار..الخلخال كان خيالي.ان شاء الله .باراويك اياه لي ردينا الدوحه..
ــ ان شاء الله ..وأحلى شي شريتيه؟؟؟..
ابتسمت العنود ــ وايد اشياء..بس صج احلى شي..كانت لوحه..لفنان مغمور اسباني..شريتها من المعرض يوم عمري 15.. ..عندي اياها في غرفتي في البيت .. ان شاء الله لي ردينا براويك اياها ..
ابتسم ــ تحبين اللوحات..؟
ــ وايد ..احب الفن ..احب المعارض الفنية .
ــ متى حضرت معرض اول مرة.؟؟..
ـــ اول مرة حضرت معرض يوم كان عمري 13سنة.. كنت مع بنت صديقة امي اسمها جيهان وكان عندها تذكرتين لجاليري لفنان مغمور في باريس...وامي وامها يبون يروحون عرض ازياء في الفاشن ويك في باريس..ومايبون يجالسونا ..واخواني كانوا في الدوحه مع البيبي ستر ..وسالم ماجا باريس كان مسافرلندن مع صالح علشان يزورن راشد..فقالت لنا روحوا بس البسوا ملابس انيقة ..لبست يومها بدلة من فيرساتشي. ورحت مع جيهان ..وكان المعض تحربه يديده ..ماكانت اللوحات تجذبني مثل الالوان اللي اختارها ..عجبني الشعور اني اتفرج على كل لوحه ادقق في خطوطها وألوانها...فصارت عادة لي...
ابتسم لها احمد وتموا يتمشون ويستعرضون هواياتهم و الاشياء اللي يحبونها والمواقف اللي صارت لهم ..