على رمال سيلين - الفصل 33 - بقلم غجرية - مكتملة | روايتك

انصدمت المها فمدت نوف يدها وفجت بينهم وقالت بعتب ــ شقاعد تقول ؟..طلعت نايمه ماتشوف وجهها منفخ تقول ..والله مشبهه عليج بس مب لاقطه التشبيه !!.. فهم راشد غلطته وقال يرقع ــ دش مب نوف .. لكن المها انفضت يدها من يد نوف بعصبية ودخلت الغرفه اللي كانت فيها .. راشد ــ وين رايحه؟ المها بعبره ــ بنثبر في بيت جدي ..ولا لي طلعه منه !.. وصكت الباب بقوة .. وانهارت تبجي .. شلون شك فيها راشد ؟؟.. اما راشد من ناحيته متلوم .. كان مفروض يسأل أول قبل لا يتهمها..طالعت له نوف ــ خلها على راحتها ..خل نرد البيت .. ومسكته من يده لكنه وقف ..ــ لحظة .. وراح للغرفه وطق الباب ودخل الغرفه بدون ماينطر رد .. عوره قلبه وهو يشوفها تمسح دموعها .. جلس جنبها ــ أنا آسف .. سكتت المها .. ماقدرت ترد ..ماقعد يبرر ولا يعطي حجج اعترف اعتراف صريح عبر اعتذاره انه مغلط ..قالت بهمس.. .. ــ مب اشكال.. طالعها اخوها متلوم في عمره ـــ يعني مب شايله علي ؟؟.. قالت تكابر وماتبي تطالعه ــ بس محتاجه وقت لين يصفى قلبي ... حب راسها وقام وقبل لايطلع قالت المها ــ برجع معاك... قال بلهجه هاديه ــ لا ...انا بكره بجيبج وكل يوم متعنية تمي هنا لين الخميس اجي واخذكـ.. طالعت له المها بدهشه ــ لا مابي اتم ... ابرجع البيت .. راشد ــ الله يعينني عالعنا يعني مستانسه كل يوم تقعديين من النوم الصبح وترجعين تنامين هنا؟ المها ــ لا طبعا بس مابستانس اذا تميت هنا بدون شغل ..على الاقل في البيت اجابلكم ..هنا جدتي تنام من وهل وجدي مايدخل البيت كله في الميلس مع ربعه ..حتى صالح مايدش البيت لان فاطمه هنا.. راشد ــ تدرين نسيت انها هنا؟؟.. انزين تعالي يله.. الحقته المها وطلعوا واستغربت نوف مسرع مارضت المها ..مب عادتها . دخل بو عبدالرحيم الصالة بعد ماتنحنح .. نادته ام عبدالرحيم ــ ادخل محد غريب.. دخل كانت ام عبدالرحيم جالسه بروحها . ــ شلونج ياالغالية؟؟ اضحك ام عبدالرحيم ــ طيبه ومن صوبك؟ رد ــ طيب الحمدالله .. سألته مستغبيه وهي تصب له بياله شاي ــ اليوم رايق وشكلك مستانس ..شوراك ؟؟ ضحك ــ دوومج كاشفتني يا ام عبدالرحيم .. اي والله مستانس.. ام عبدالرحيم ــ فرحني معاك يا جسوم .. طالع لها مبتسم ــ الله ..من زمان ماسمعت اسمي على لسانج يا ام عبدالرحيم.. استحت ام عبدالرحيم ــ يارجال كبرنا على هالسوالف.... قال لها ــ صالح فاتحني انه يبي يخطب فاطمة بنت خالج .. تغيرت ملامحها فجأة ــ صالح ؟.. نزل عبدالرحيم راسه ــ ادري فيج ماتحبينه .... انصدمت ام عبدالرحيم ــ لا تقول هالكلام ..باالعكس الولد حسبة ولدي... عبدالرحيم ــ المهم ..خبري البنت وخذي ايها و ياليت تقنعينها .صالح ولدج وانت خابرته زين ..رجال ماعليه كلام .. ام عبدالرحيم ــ والنعم والله .. بشوف رايي البنية ..وخير ان شاء الله .. وان وافقت شرايك نعطيهم الطابق اللي فوق ؟؟. بو عبدالرحيم ــ خوش راي ..عطيني من هالشاي الطيب .. من زمان ماقعدت هالقعده الزينه .. استحت ام عبدالرحيم و صبت لزوجها الشاي .. _____ في غرفته جالس بحيره .. طالع التلفون والمس كول من صالح ..تلوم انه مارد عليه .. استجمع شجاعته وقام وراح الميلس .. دخل ــ السلام عليكم .. ردوا عليه الجماعه ــ وعليكم السلام والرحمه .. كان ابوه قاعد متوسط عمامه وجده ويسولفون .. قرب لجده وقعد عنده .. ــ يابو خليفه بغيتك فموضوع .. انتبه له جده وحس ان وراه موضوع ــ شموضوعه؟؟.. كان جاسم يبي يفاتح ابوه ..لكن كان يعف ان ابوه متشدد ..وما يغير كلمته ..وخاف يقول لابوه ابوه يرفض ويعند معاه .. فقرر يفاتح جده .. قال ــ جدي .. تخبر صالح رفيجي؟.. بو خليفه ــ ايه اخبره خوش رجال .. جاسم ــ ياجدي بغيت أخطب بنت اخوه .. طالع له جده منصدم ..سكت شوي بعدين قال ـ بنت عبدالرحيم؟ همس جاسم ــ لا .. بنت يوسف الله يرحمه .. سكت جده شوي بعدين قال ــ بنات العايله ماشاء الله ياجاسم وايد .. ماتخذ لك بنت عم احسن ؟؟.. سكت جاسم وهو متوقع رده فعل جده ..قال بتردد ــ يا جدي .. عيال عمي فيهم الخير .. لكن انا خاطري بهالبنت .. بو خليفه ــ بس بيننا يا وليدي وايد مشاكل .. بين قبيلتنا وقبيلتهم !.. سكت جاسم ماعرف شيرد .. بس حس باحباط .. حس جده فيه فقال ــ ابشر بعزك .. لاتحاتي .. بروح لجدهم وافتح الموضوع معاه ..ونخلي هالنسب صلح بيننا وبينهم .. استانس جاسم وحب راس جده اللي انصدم من رده فعل جاسم ..وتموا عمامه يطالعونه مستغربين بمن فيهم ابوه .. همس بو خليفه ــ شكلك عاشق يا جاسم !!.. استحى جاسم ونزل راسه وضحك جده بصوت عالي...والكل سكت يطالعهم ..بعدين سأل خليفه ــ شوراكم ؟؟ قال بو خليفه ــ الخير ان شاء الله .. الخير.. وطالع جاسم الي استحى وقام من مكانه ـــ عن اذنكم .... طلع عنده أمــل... استانس ... وركب سيارته وراح القهوة .. في جزيرة مايكونوس...في فندق بيتنوس ييتش كانت العنود تطالع من الدريشه مذهوله بالمنظر..كانت الغرفه مطلة على البحر.طالعت احمد وابتسمت وقالت في خاطرها (( نايم!!..حسافه ...)) في الطياه نامت هي وهو تم صاحي يدقق في ملفات جايبها معاه ..والحين هو نايم ...رجعت تطالع المنظر الرهيب .. ______ كانت خديجه تطالع الفلم ويس حانه ماانتبهت للمها اللي جلست جنبها وقعدت تكلمها ــ قدمتي طلب اجازة؟؟بس توك متوظفه مايمديك تقطين ويهج وتقولين ابي اجازة ,,,خديجه؟؟.. طالعت لاختها كانت سرحانه ...سكتت وتمت تطالع الفلم بدون ماتعلن عن وجودها .. خديجه كانت تفكر باللي صار العصر..كانت تنتظر صالح عند سياته لما قرب مبارك .. ــ شلونج ؟؟. التفت له وهي ترتعش من داخل ــ الحمدالله ..وانت؟... استغربت جرأتها انها سألته .. قال ــ مشتاق .. انصدمت وتمت تطالعه بصدمه ..ماتوقعت رده يكون جي ..تتذكر عيونه ونظرته ..كان يقصدها ..شغير؟؟... قالت له بدون وعي ــ متى حبينا عشان نشتاق!!.. طالع لها منصدم نزل راسه شوي بعدي رفعه في كبرياء ــ حبينا ..وهذا هو المهم .. لفت ويهها عنه وهي كانت في صراع داخلي...حبينا؟؟...يعني يحب ؟؟..يحبها؟؟لا مستحيل!!.. ــ خديجه .. لفت له ــ لبيه .. ابتسم ــ لبيتي في منى .. ليش واقفه هنا ؟؟..وين صالح؟. ــ بيجي بعد عشر دقايق ..لازم يسلم تقرير... ــ وبتنطين هنا كل هالوقت؟؟.. كان الجو حار والمظلة ما خففت عليها ..قالت مستسلمة ـ شسوي.. مضطره .. تم واقف قربها .. لين جا صالح اللي استغب وقفته ــ هلا مبارك .. شتسوي هنا؟؟.. مبارك ــ سيارتي في الكراج .. وابي اروح معاك .. الا اذا مالي مكان ؟.. ابتسم صالح ــ حياك .. اركب .. طول الطيق كانوا ساكتين .. محد تكلم ..صمت غريب..صالح سرحان ..ومباك يطالع من الديشه ..وخديجه جالسه وى سيت صالح تطالع من المنظرة.. ــ أغير القنااااه؟؟؟؟.. انتبهت لصراخ المها وفزت ـ وويعه !!... ضحكت المها ــ اللي ماخذ عقلج .. كنت اسألج ..أغير القناة لان الفيلم بااايخ .. خديجه ـ اصلن بقوم واترك لج التلفزيون بكبره !!.. وقامت خديجه عنها وراحت و المها تطالع مستغربه وقعدت تقلب القنوات ومالقت شي يسوى .ارفعت التفلون اتصلت بنورة لقتها مشغول .. اتصلت بديمه ــ الو . . ــ هلا والله ببنت العم .. ــ هلا ديوم .. شحالج ؟ ــ طيبه وانتي شلونج؟ ــ زان لونج طيبه عساج طيبه .. ـــ شقاعده تسوين .؟ ــ ملانه وانتي.؟. ــ ازط بيتزا !!..