الفصل 31
كانت نوف في غرفتها ترتبها .. وهي تطالع اغراضها .. وين منصور؟؟..كان السؤال اللي يشغلها ..تركها عشان هالهندية ؟.. معقول هذا حظها من الدنيا ؟؟.. احس شي انها تركز على اخرتها احسن .. بلا زواج بلا هم .. بس تم عاله على اخوها ؟؟.. اذا تحملها راشد هالعشر سنين اللي جايه مابيتحملها العشر اللي عقبها .. طالعت ملحق بيتهم من المنظرة ..بس يتزوج راشد تنتقل له وتترك البيت له ولزوجته .. وان شاء الله تكون ديمه زوجته .لان قلبها طيب ... وماتغير اخوها عليها ....
ــ نووفه ...
فزت ــ بسم الله الرحمن الرحيم .. نعم !..
المها ـ شرايج نسوي فيلم بديوم ههههه نخذها معانا ؟.
ابتسمت نوف ـ انتي شفيج على البنت .. كله مسويه فيها افلام .. عاد ياليت افلامج تسوى ههههه كلها تنتهي بصمت مطبق..
رمت المها بعمرها على السرير ــ شسوي .. رشود وديوم كلن راسه ايبس من الثاني ..
نوف ـ بما ان يوم تخرجت .. شرايج نقنع اخوج يخطبها ويملك عليها ؟؟.
طالعت لها المها باشمئزاز ــ لا والله ..وتنتهي الافلام الهندية ويطردونا برا المسرحية .. لا عيوني .. خلينا نشويهم على جمر ...خخخخخخ..
طالعت لها نوف مبتسمة ــ والله انج ... تحفه !.
بعدين كملت المها بهدوء ـ وشالفتج ترى ماابردت .. ترى قلب راشد عليج جمر .. خل تمر شهور قبل لا نفتح الموضوع معاه .. على الاقل لين تخلص عدتج ...
ابتسمت نوف ـ فديت اخوويا ... يكابر علشاني .. الله يوفقه ويجمعه بديمه ..
طالعت لها المها بجدية ــ مب ناوية ترجعين له ؟ .
استغربت نوف ـ ارجع له ؟ . لا خلاص ... كلن في طريق..
وكتمت عبرتها وابتسمت لاختها ــ قومي يله . ابي ارتب غرفتي ..
طالعت المهال لغرفه كانت مرتبه ففهمت انها تصريفه فقالت
ــ بروح ارتب غرفتي .. يله .. سي يو ارااوند ..
طلعت المها وكانت متملله الجو حر والشله كلها تستعد للمسائية .. ودها تتصل بالعنود او ديمه لكنها متعاجزة.. نادتها لخدامة لان وقت الغدا صار وتبيها تساعدها ..
نزلت المطبخ كانت خديجه مسويه لهم مجبوس لحم .. الخدامه تعرف تطبخ بس عمها موجود فخديجه تبرعت بالطبخ .. حطت الغدا مع الخدامة ونادت الامه .
وكلن نزل بسرعه لانهم تريقوا مبجر ..
صالح ــ صراحه .. اليوم خلص ..باجر دوام .. مالي خاطر اداوم ..
خديجه ــ متى تبدأ اجازتك السنوية ؟ .
صالح ــ باخذها شهر تسعه .. علشان بسافر فيها ..
الكل استغرب ــ سفر؟..
صالح ــ ايه .. لزوم اسافر عرس رفيجي في جده .. ماخذ له جداويه واشرطت عليه العرس في ديرتها ...ومنها سياحه ..
خديجه ــ خاطر اروح معاك ..
رد صالح فرحان ـ هلا فيج ..
المها ـ ودي اروح بس الجامعه .. مافيني ..
نوف ـ متى العرس؟.
صالح ـ اول شهر تسعه قبل رمضان ..
نوف ـ يمكن اروح معاكم ..
صالح ـ حياج ..
نوف ـ كنت باخذ اجازة هالشهر بس ماحسيت في سبب ..محد بيسافر ..
راشد ــ انا مااقدر اخذ اجازة ..وعبدالرحمن اوريدي سافر مع مرته ..صالح بتسافر مع حد من ربعك ؟
صالح ــ لا .. محد .. كان مبارك بيخاويني بس .. اعتذر..
راشد ـ لازم حد يسافر معاك .. شوف حمد ,,
نوف ـ حمد جامعه ,,,
راشد ـ عيل اقنع مبارك . ..ضروري تقنعه .. الطريق يخرع ..
حست خديجه بغصة وبعدين قالت ــ بنسافر بطياره .. وعلي التذاكر ..
طالع لها صالح فاهم افكارها ــ ليش من قال بنسافر بسيارة ؟ انا بحجز تذاكر نص 8 وشقة هناك وانت يا كدوج استلمي معاش اول بعدين تكيرمي علينا .... وبنتم تقريبا شهر اذا يناسبكم .. وأجر سيارة .. شرايكم ؟ .واول يوم رمضان نكون هنا .. وبهالطريقة تكون المها معانا ..
المها ـ انا مواافقه ! ..
ضحك راشد ـ بتم بروحي ؟؟ .
صالح ـ تم في غرفتي في بيت ابوي ..
راشد ـ ياخي ماني ياهل اقدر اقزر عمري .. بس ..البيت بيتم فاضي ؟؟ .
المها ـ وناخذ ديمه معانا .. شرايكم ؟؟.
طالع لها راشد مستغرب لان نظراتها كانت خبيثة ,,
صالح ــ خلاص جهزوا اعماركم .. اسبوعين وننطلق ..
وتموا يتغدون ويمدحون كبسه خديجه ويتلذذون بطعمها ..
****
كانت العنود في قسمها قاعده متكشخه ماشافت احد غير ساره وام احمد وجدتها وتركتهم من حزة الغدا يت علشان ترتاح ..كانت ملانه الساعه 4 العصر واحمد محد ..وساره راحت تنام بعد ماساعدتها في تجهيز الشنط ....بعد شوي المسائية وبتجتمع الناس ..اتصلت براعية الصالون تأكد لها حجزها .. وطلعت بدلتها الهندية الحمرا .. كانت كشخه واايد .. بدلت العنود ملابسها والبست بيجامه بيضا حريرية بتنام ساعه او ساعتين وتصحى لي جات الممكيجه .. غمضت عيونها وبدون ماتحس نامت ..
كانت تحلم انها تعيد امتحان الثانوية ..ولما وصلت الامتحان اكتشفت انه امتحان تاريخ ..وهي كانت داسه كيمياء !!... سبع اسئلة اجبارية مقالية ..حست انها بتصبح ..وقامت تصيح ..لين جات عبير تناديها (( عنووود ..العنود .. العنود ))
وفجأة صار الصوت واقع وفتحت عيونها بكسل وكل عضله بجسمها تعورها وفزت لما شافت احمد يصحيها ـ العنود .. العنود ..
ــ لبيه ..
ــ الساعه 6 حبيبي .. والممكيجه متفقة معاج على خمس ونص وناطره برا بالغصب اقنعتها ساره تنطر ..ودقت علي اجي اصحيج ..شلونج الحين ؟
العنود بخجل ــ الحمدالله ..
ـ قومي غسلي وجهج وبدخل الممكيجه بس خليني ابدل ملابسي واطلع ..
وقامت ودخلت الحمام وانصدمت من شكلها !!.. كان شعرها مبهدل والكحل والماسكرا ملطخ وجهها والروج ملطخ وجهها حست بفشيله ..
ــ الله يهديج ياساره ماصحيتيني بنفسج ؟؟.
طلعت شنطة عناية بالبشره من على جنب وبمناديل جونسون امسحت الميكب عن وجهه وغسلته بحليب منظف .. وغسلت شعرها بكونديشنر وشامبو مخفف بريحه الفواكه ... وطلعت كانت اللي تحط لها المكياج مطلعه ادواتها واللي بتسوي لها الشعر موجوده واحمد محد كالعاده .. راوتهم البدله الحمرا وخلتهم لمخيلتهم ..
الساعه سبع ونص دخلت ساره القسم بعد ماطقت الباب وشايله بيدها باقة ورد جوري احمر . ..
ساره ـ هذي من معجب ..
ابتسمت العنود وهي تسحب البطاقة ..
الى عروسي غودزيلاا ..
مبرووك ..
نسيت اقولج .. (( احبج. .) )
أحمد ..
ضحكت العنود منحرجه وهي تفكر(( مالومه .. مالومه .. انا من شفت عمري تخرعت .. )) ..
اسحبت ورده حمرا من الباقة وطلبت من لكوافيره تحطها لها في شعرها .. وسحبت وردة ثانية بغصن طويل وتمت ماسكتها بين يدينها ..
البست خلخال واساور هندية .. وطلع شكلها روعه .. وطلعت مع سارة ودخلت على زفة هندية للصالة العوده وين الناس كانت محتشره وتطالع لها باعجاب ..
بعدين تذكرت العنود انها ماكلت شي من الكرواسون الصبح ..حست بجوع فظيع ..وجوا بنات خوالها في قمة كشختهم ودعوها لانها بتسافر شهر العسل الصبح ..كانت المها لابسه وردي لون العنود المفضل وديمه كالعاده ازرق ..ونوف فستان بيج ناعم طالعه عليها جنان وخديجه متألقة بفستان خمري وطالعه مذهله ..مع الشعر المرفوع ..
المها ــ ماصدق انج يالعنفوصه تزوجتي قبلي.. توج ياهل بمريول المدرسه !!
ابتسمت العنود ـ اي والله ماحذبتي توني ياهل ..
ديمه ـ عاد ماوصيج هالله هالله بالصور الزينه والصوغه الزينه !!
المها ـ اهم شي الصوغه !!,
العنود ـ ابشروا من ذي العين قبل ذي العين ..وانت خديجه ؟
خديجه ــ الله يوفقج ياحياتي .. مابي الا سلامتج ..
العنود ـ ونوف .. مااقدر انسى جميلج وانج وقفتي معاي وقفة الام مع بنتها ..
ابتسمت نوف ـ فديتج يا حياتي ماسويت الا الواجب .. ابيج غانمه سالمه ..مابي غير هالابتسامه على ويهج وبس..
تدخلت ساره ـ يالله .عندي اوامر من الجهات العليا انج تطلعين الغرفه وتنامين ..
المها ـ ايه شعليه ..
انحرجت العنود وكملت ساره ـ لا وازيدج من الشعر بيت وصاني اقولج تمسحين الكحل من عيونج وتمشين الروج عن حلجج قبل لاتنامين ..مايبي كارثة العصر تنعاد !!..
انحرجت العنود والكل ذبحهم الفضول وهم يسألونها شقصده
قالت العنود بمستحى ــ ابد ..حماتي المصون ماصحتني بنفسها ودت زوجي العتيد يصحيني ...وطبعا مع مكياج الصبح الثقيل ..تخيلوا الخرايط اللي في وجههي..
انفجروا عليها من الضحك ..وكملت العنود ــ وهو ماقصر أول ماصحاني قال لي غسلي ويهج ..
اضحكت ساره منحرجه من اخوها ــ انزين الاوامر وامر الساعه عشر ونص قومي نامي لان طيارتكم عالسبع الصبح ..
سلمت عليهم وطلعت من الصالة منحرجه من احمد ..