الفصل 30
خديجة ــ بقول لصالح ..
ــ شنو تقولين له ..ابيج تقنعينه !!
انصدمت خديجه ــ وعله شفيج .؟ . هذا قرار زواج مب لعب !! يبي تفكير تخطيط ..يمكن صالح حاط حد في باله ؟.
المها ــ بذمتج شنو ناقص فاطمة ؟؟ .. جمال ؟ اخلاق؟؟ ثقافه ؟؟ ..
خديجه ـ مب ناقصها شي بس ماعرفناها .. للحين ..والا هي جميلة انيقة مثقفة .والاهم متدينه ..
المها ــ خلاص .. خير البر عاجله ..ارجوج كدوج..
طالعت لها خديجه بنص عين ــ شوراج يالمها ؟؟.
ابلعت المها ريقها بصعوبه ــ سعاده عمي وبس!!
خديجه ـــ قولي الصراحه ..فاطمة تحبه وطلبت منج تقنعينه ؟؟
انفجرت المها بالضحك وتمت تضحك على افكار اختها ــ
اقولج مابيها ترضى بالي يخطبونها تقولين تحب ..هي وين شافت عمي ؟؟ امانه ..خديجه ..
خديجه ــ وراج شي يابنت يوسف .وراج شي....بس ..مصيري بعرفه ..
المها ــ ماوراي شي..
وطالعت المها وراها باستعباط ..ابتسمت خديجه وقومتها عنها وقامت مشطت شعرها وشالت بقايا المكياج عن وجهها
ــ بنروح لبيت زوج العنود .. جهزي عمرج ..
ــ متى ؟
ــ العصاري .. مب حلوة نروح الصبح ..
ــ بس امانه اقنعي عمي يفتح الموضوع مع جدي .. اماانه !!...
خديجه ــ بتكلم معاه .. بس حنا مابننصفه ..البنت مانعرف عنها شي كله منعزله ولاتشوف احد ..
المها ــ وهذا سبب ثاني..هي منا ..والمفروض تبقى بيننا ...مردها قريبتنا ..
نزلت خديجه تحت كان صالح يقلب في القنوات ملان ..
ــ مافي ريوق ؟.
سلمت عليه خديجه ــ في يا بعد عمري... بس اول .. ها نخطبلك اليوم ؟
طالع لها صالح منصدم ــ وانتي بعد ؟ ياصباح خير!!
خديجه ــ ياعمي شفنا العرس امس حنينا لمناسبة مفرحه .. ومافي غيرك!!
صالح ــ اخوج راشد ..
خديجه ــ اخوي وراه 3 خوات يدلعهم ..بس عمي ماوراه حد .
صالح ــ ياربي ...يعني ناويات .؟؟ .ومن في بالج ؟
خديجه ــ فاطمة ..تراها بنت حلال ..دين وثقافه وجمال..شتبي اكثر؟
صالح ــ مابي شي ..بس خليني استخير الليلة ..وباجر..
استانست خديجه وارفعت راسها شافت المها تأشر لها بلا وبمعناه خليه اليوم ..انفخت بصبر وابتسمت لما التفت عليها عمها وقالت :
ــ ياعمي البنت الكل استخف عليها امس ..مافي مجال استخا ره اكيد بيكون في ناس يبون يخطبونها باجر ..
صالح ــ قلت بستخير وباجر الصبح اكلم ابوي..
انزلت المها ــ بدون استخاره الله حطها في طريجك ..يات من السعوديه عشااانك ..مكتوبه لك ..يلا كلم جدي..اخطبها واستخير بعدين ارتحت تزوجها ..وان مارتحت ..تزوجها هههههههههه مب كل الناس سعداء !!..
طالع لها صالح ببرود ــ اذلفي سوي لي خلطة بيض وطماط ..
المها ــ من عيوني ..بس عاملي وذ ريسبيكت ولاتحدني عالشر!!
ــ شبتسوين يعني؟
ــ ازيد الملح ..
ــ عادي اخليج تسوين طبق ثاني ..
ــ احط لك صرصور ..
ــ صار اكل الجامعه !!... لا بخليج تذوقينه قبل لا اكله ..
قامت المها مبتسمة ..وطالعت خديجه بنظرة توسل انها تقنع صالح ..فغمزت لها خديجه ــ صج عمي .. اخطبها الحين ..
صالح ــ بس انا مب مجهز عمري لابيت ولا مهر.وتوني مطلع سيارة ...
خديجه ــ تزوجها في بيت جدي .
صالح ــ مستحيل....انا ضد هالشي...
خديجه ــ اخطبها وخل الزواج عقب سنة لين تشتري لك بيت .. وتجهزة وهي بتنطر ..
صالح ــ قولتج جي؟؟ .
ــ ايه توكل ..
ــ خلاص بقول لابوي ..وبشرح له وضعي عشان يكلم عمتي ام عبدالرحيم ..
ــ الليلة ؟
ــ توكلنا على الله .. الليلة ..
ابتسم خديجه وحبته على خده ــ مبروك مقدما ..وبدون وعي يببت في الصالة ..نزلت نوف مستغربه وطلع راشد من غرفته مستغرب وجات المها تركض من المطبخ ..
راشد ــ عسى ماشر .. اسمع يبااب ؟؟ .
ابتسمت خديجه ــ عمك بيخطب .. بيقول لجدك الليلة ويتوكل ..
استانست نوف والمها ــ صج ..
نوف ــ من سعيده الحظ ؟
المها ــ فاطمة بنت خال جدتي .. الله يوفقكم آمييييييييييييييييييييييين ..
وتنهدت بارتياح الكل استغرب ردة فعلها .. .
راشد ــ مبروك ياعمي .. مبروك مقدما ..
صالح ــ الله يبارك فيك .. هذي جنون خواتك من الصبح والا انا مب مقتنع ..
نوف ـ ليش والله البنت حلوة .. وان شاء الله تسعدك ..
راشد ــ هي حلوة حيل؟..
طالعت له المها بنص عين ــ رشووووود ؟؟.
ضحك راشد ــ لا ..ماقصد شي ..
المها ــ اي على بالي ..
صالح ــ الولد يسأل خطيبة عمه حلوة ولا لا أكلتيه بقشورة ليه ؟ .
راشد ــ ايه ليه .؟؟ .
بعدين التفت صالح لراشد ــ وانت .. عن الحركات اللي مالها داعي ... مالك الا ديوم وديوم مالها الا لك وبس!!..
انفجروا خواته بالضحك بعد ماقلب وجهه وردي .. وقالت المها بمياعه
ــ ياااويـــــــــــــــــــــلي عالحـــب ..
عصب راشد ــ استحي بالله .. ماتصدقين على الله انتي !!..
طالع صالح المها نظرة غريبة .. استغربت منها المها ..
كان صالح يفكر بجاسم .. جاسم اللي طاح من عينه امس. .. تنهد بقوة وقام
ـــ شكلكم مابتريقوني!!!..
صرخت المها ــ اووووه نسيت ..
وركضت المطبخ ولحقوها كانت الخدامه اخفقت البيض والطماط بطريقة عادية فعصبت المها ..
************
افتحت العنود عيونها مب مستوعبه شي .. ماعرفت المكان فقامت مخترعه .. طالعت يمين يسار مافي حد في الغرفه .. ولما طاحت عينها على فستان العرس تذكرت فجأة .. بدون وعي نطت من السرير ضبطت شعرها والبست الروب ..متردده طلت في الحمام مالقت احد .. عرفت ان احمد محد ..خذت شنطها الصغيرة ودخلت الحمام خذت دش سريع وفرشت اسنانها وطلعت من الشنطة الساري التركوازي .. والبسته .. طلعت جوالها من الشنطة كانت الساعه 10 الصبح ..وراعية الصالون بتجيها بعد عشر دقايق ..
طلعت للغرفه وطلعت من الشنطة الكوفر الجلد حق فستان العرس واحشرت الفستان داخل .. فتحت شعرها ومشطته خفيف .. واجفلت فجأة على صوت الباب . طالعت برا الغرفه لقت احمد داخل وماسك جوال في يده ..
ابتسم في وجهها ــ ماشاء الله ..
انحرجت وتذكرت ان احمد شافها بدون مكياج وشعرها مبلول مب مسشور ..
ادخلت داخل تتأكد من شكلها ودخل هو ــ تجننين .. انتي كذا احلى . صباح الخير ياعروس ..
انحرجت العنود ــ صباح النور..
ــ تعالي نتريق.. الريوق برا ..
مسك يدها وسحبها .. وجلسها في الصالة وهو يبتسم ــ عصير ولا قهوة ؟
العنود ــ حليب بفراولة !!..
ضحك عليها وهو مستغرب يبي يقوول من وين اجيب لك حليب فراولة ..بس انتبه ان قلاص العصير كان فراوله وان الحليب طازج فرش فخفقهما لها في كاس ثالث وطالع لها بابتسامة شقاقية
ــ يالله صرت لك شف عالمي شتبين بعد ؟ .
ابتسمت العنود ــ شف ؟؟.. علشان بتسوي لي حليب فراولة . بس ..اموت واعرف ليش مكشف هالضروس؟؟؟...
احمد ــ اتاريني متزوج لي بزر ...
انحرجت العنود ــ غيرت رايي .. ابي قهوة ..ومرة .. وبدون كريما او حليب ..
طالع لها احمد بتقطيبة ــ لا ماحزرتي .. انا زوجج ومن واجبج الطاعه .. تشربين الحليب والا انا متعني ومسويه لج علشان تشربين قهوة ؟
ابتسمت مجامله له ..وفي قلبها ((( ياويل حالي بس .. من اولها زوج وواجب ..الله يستر ..فديت غمازاتك بس !!.. )) ..
قالت تغير الموضوع ــ متى العرس؟
طالع لها باستعباط ــ العرس امس . بس السفر بكره ..
استغربت العنود ــ عرس شنو ؟
ــ انتي سألتي متى العرس ؟.إلا اذا قصدج زواجي الثاني ؟؟ ..
طالعت له العنود بخوف ــ ليش ناوي تعيدها ؟؟ ..
أحمد بغرور ـ انتي شرايج ؟؟.. اعيدها ؟..
حس العنود بخنقه وقعدت تفكر ((من اولها ضرة لا كملت ..الله يستر شالبلشه )) ...قالت بتأتأةــ مااا..دري ..بس أنا سألتك عن السفر .. مب ..
وقامت تبي تروح متضايقه سحبها من يدها وجلسها ــ وانا اقدر ؟.. انا لج انتي بروحج .. مابتشاركج وحده فيني ابد .. راضية؟؟
طالعت له العنود مستحية .. وهزت راسها موافقة ..
قال لها يحاول يغير الموضوع ــ يجنن الساري عليج ..وشعرج مبلول جي ..لا شكلج عذاب ..
ردت بدهشه ــ صج ؟؟
استحت العنود مب متعوده حد يمدحها ..صج مب شايفه خير ..ابتسمت ونزلت راسها احراج ..
طق الباب وقامت ــ هذي اكيد راعيه الصالون ..
احمد ــ عيل بقوم بنزل تحت عندي شوي اتصالات .. برجع بعد ..
وطالع ساعته ــ كم يبي لج ؟؟..
العنود ــ مادري ساعه او اقل ..
ــ على خير ان شاء الله بتصل فيج ..ترى الأهل ناطرينا من الساعه ثمان ..بصلي الظهر وارجع لج .. يمديج صح ؟؟.
هزت راسها بأوكي ..
اول ماطلع قامت العنود تاكل بسرعه اللبنة والكرواسون والحليب فراولة ..
فجأة ــ نسيت اقولج ..
غصت العنود (( امبيه فشله !! بيقول مب شايفه اكل !!!))
نزلت شعرها على وجهه وحاولت تمضغ بسرعه علشان تقول له لبيه .. لكنه قرب وهو مستانس انه بيحرجها .. رفع راسها وهو يضحك ضحكة شيطانية ووجها احمر من المستحى ــ نسيت اقولج . بالعافية على قلبج ..
مد صبعه ومسح اللبنه من على طرف شفايفها وتركها وطلع ..حتى مانطرها ترد عليه ..
العنود انحرجت بقوة وعافت الأكل وحست انها بتصيح ..ياحبه للاحراج .. قالت تكلم نفسها ــ استاهل .. بس والله اني كنت جوعانه .. امس ماكليت من المستحى ..
دخلت اللي تحط المكياج وهي تضحك ــ كلنا هيك يا قمر .. ننسى ناكل وفجأة الجووع كافر ..
ابتسمت العنود وقالت منحرجه ــ انا مب مجنونه احاجي عمري ..بس توه ريلي صادني وانا احشو هالحلج بالكرواسان وللبنه كأني مفجوعه .. فششششششيله .. بيقول دفشه ..كافي انه شافني الصبح بهالكشه بدون سيشوار ولا ميكاك ...
ردت الممكيجه وهي تشيك تلفونها ــ عادي حبيبتي كتير بيصير الهون هيك .. وبعدين انتي قمر خليك واثقة من نفسك .. خلصي الترويقة علشان ابدأ احط لك المكيب ..
العنود ــ لا الله يخليج انسدت نفسي .. يلا اغسل ويههي واييج ..
قامت العنود ودخلت الحمام وتمت تطالع عمرها في المنظرة .. للحين خدودها حمر .. قعدت تفكر ..
(( أحمد .. أحمد أحمد ...........أحمد .. خلاص يالعنود صرتي زوجه أحمد ..مدام أحمد .. هل بيملك قلبي؟؟.... صج انه امس حسسني بعاطفه وحنان ..بس هل هذا هو الحب؟... ماتدرين يالعنود شمخبية لج الأيام ..)))
غطست ويهها في الماي وانفخت بقوة .. وأول ماطلعته قالت بقهر ــ صج اني معقده البنات يفرحون ويستانسون ..وأنا منكده على عمري ..