على رمال سيلين - الفصل 29 - بقلم غجرية - مكتملة | روايتك

عبدالرحيم ــ يام منصور ..بغيتج تخطبين لي .. انصدمت ام منصور وتمت تطالع زوجها بدهشه ــ هااااه؟؟. عبدالرحيم ــ ايه ..بعدل بينكم بما يرضي الله .. ام منصور دمعت عيونها ــ بعد هالعشرة يابوعيالي؟؟. ليش؟ عبدالرحيم ـ الشرع حلل اربع مافيها شيء .. وانتي عالعين والراس ..مابظلمج .. تمت ام منصور ترتجف .. وسألت ــ في وحده في خاطرك ؟؟ عبدالرحيم ــ ايه .. بنت خال امي .. نسيت اسمها .. ام منصور ـ فاطمة ؟ عبدالرحيم ـ ايه هي .... ام منصور ـ لكنها صغيرة عليك !!. عبدالرحيم ــ انا رجال والرجال مايعيبه الا جيبه .. وبعدين تبيني اخذ عيوز ؟ . انصدمت ام منصور .. فاطمة جميلة ..بتسلب قلب زوجها وبينساها وينسى طوايفها .. قالت بعصبية ــ اختار غيرها .. عصب عبدالرحيم ــ ليش؟ ــ البنت ماعرفها ولا عرف طبايعها !!.. ولا ابيها تدخل بيتي .. عبدالرحيم ــ بحطها لها فيلا بروحها .. انصدمت ام منصور اكثر لولده مارضى يشتري بيت علشان مايفترقون عياله ..لهالغريبة اللي مالها فالقصر الا امس العصر بياخذ لها فيلا !! هزت راسها منصدمه ــ لا ... مابخطبها لك اختار اي وحده فالدنيا الا هالبنت !!. عبدالرحيم ــ وانا ماابي الا هالبنت ولا داش مزاجي غيرها وبخطبها هالجمعه !!!.. انهارت ام منصور بالبجي .. وطلع عبدالرحيم من الغرفه بدون مايشوف اللي كانت تتسمع برا ,, صكت الدنيا في وجه ديمه ..ماعرفت شتسوي تخيلت فجأة زوجة الأب وشرور زوجة الأب .. تخيلت ابوها يختفي من حياتهم ويصير عندها اخوان من ابوها ينغصون على امها حياتها .. تخيلت مشاكل وطلاق ودموع .. انترست عيونها دموع .. زوجة اب ؟ صج ان فاطمة هادية وبنت ناس بس الضرة مرة .. ماحست بنفسها الا و اتصلت فالمها على طول وخبرتها السالفة ,, ــ مهوي شسوي ؟؟ المها بصدمة ـ كأنا ناقصين بلاوي ؟؟.. بيخطبها الجمعة ؟؟ . ديمه ــ ايه .. ــ جدامنا اسبوع .. بفكر وأرد لج خبر .. ديمه ــ الله يخليج امي منهارة بجي .. وانا ماقدر افكر ..احس بدت الدنيا تقلب علينا .اولها منصور واخرها ابوي ليش؟؟. المها ــ ديوم شالكلام .. استعيذي من الشيطان وفكري في حل .. وماكون مهوي الا مطلعتكم من هالازمة .. ديمه ـ شبتسوين تذبحين فاطمة لان ابوي مايبي غيرها !! المها ــ البنت مالها دخل .. لاتحاتين بفكر وارد لج خبر .. تمت المها في الصالة تفكر .. شلون تحل هالأزمة ؟. تمت تطالع السقف *****ة وهي تنافخ .. تقنع فاطمة انها ترفض؟؟ بس .. فاطمة وحيده وماجاتها فرص زواج ..والزواج بعمها عبدالرحيم يمكن يكون نصيبها .. مالها اي حق تقنعها انها ماتتزوج .. يمكن مايتقدم لها حد وتم في ذمتها ؟؟ يتقدم لها احد ؟؟.. فكرت المها بهالفكرة .. دام عمها بيخطب الجمعه .. لازم حد يخطب فاطمة قبله علشان مايخطبها ..واحد مواصفاته مثالية بيرفكت علشان ماترفضه !!,, من هالحد ؟ راشد ؟؟ . . بس راشد يحب ديمه .. ماتقدر تغصبه .. سمعت صوت الباب والتفت ــ صباح الخير مهوي .. كان عمها صالح جدامها طالع من غرفة راشد وين كان نايم .. فجأة المعت فكرة براسها .. ــ هلا والله ,,, صباح الأنوار ,, ــ شالترحيب ... شوراج .. ضحكت المها ــ دايما فاهمني .. الله يسلمك .. امس فالعرس شفت لك شوفه .. والله تطير النوم من عيوووونك .. ابتسم صالح ــ اشم ريــــــــــحه ,,, زواج .. المها ــ عليك نووووور .. صالح ــ انزين .. ومن هالبنت ؟؟ . المها ــ قريبه لاتروح بعيد .. استغرب صالح تم يفكر مالقى حد من معارفه عنده بنت سن زواج ــ استسلم ماعندي فكرة .. المها ــ عمــــــــــــي والله قريبه .. فكر صالح شوي ــ من ؟؟ . المها ــ فاطمة بنت خال جدتي .. استغرب صالح ــ شفتها امس .. عادي شالجديد .. المها ــ شنو شالجديد .. وين شفتها ؟ حك صالح شعره بملل ــ في الحديقة .. بعدين البنت اكبر مني .. المها ـ سو وووااات يعني .؟؟. الرسول عليه السلام تزوج خديجة رضي الله عنها وهي اكبر عنه .. ابتسم صالح ــ حلوة سووو وواات ..ماقلنا شي .. انزين ,, اقنعيني بالحسنى .. المها ــ مب انا اخاف تطير منك .. البنت لقطه .. صالح ــ انزين افكر .. المها ـ مافي مجال تفكير ..وبعدين تكسب فيها اجر البنت دينه وتعرف الله يتيمه مالها الا هالبنت عمة ,..وحيده ووضعها في بنت جدتي مب عدل ..وانا سمعت الحريم يطرونها واايد امس .. تراها جميلة وفريده من نوعها .. صالح ــ مايهمني الجمال بس البنت ماصار لها وايد شتعرفون عنها اخلاقها طباعها !,.. المها ــ ياعمي عشاني كلم جدي الليله لاتنخطب ..عاد اذا انخطبت محد يوقف في طريقها .. لانها حرة نفسها وتبي الستر .. صالح ــ افكر يالمها انا مب مستعجل عالزواج .. انفخت المها بقوة ..وبعدين ابتسمت ..واركضت فوق وصالح منصدم منها ـــ هيه يالخبله وين طايره تعلي سوي لي ريوق ..ابي هالخلطة اللي سويتيها ..البيض والطماط ...مهوووي لكن المها ماردت عليه .. دخلت غرفة خديجه بدفاشه ونطت بسرير ها فزت خديجه .. ــ ياصباح الخير شمصحيج من هالصبح ؟؟ في يوم الاجازة ؟ . المها ــ خديجه ابيج تقنعين عمي صالح يخطب فاطمة الليلة ! طالعت لها خديجه مب مستوعبه ــ نعــم؟؟؟؟؟؟؟؟؟؟؟؟ فاطمة ؟؟من؟ المها ــ كم فاطمة في عايلتنا ؟ بنت خال جدتي .. استغربت خديجه ــ لكن .. البنت مانعرفها .. ماعاشرناها ولانعرف طبايعها .. عصبت المها ــ والله انكم نفس الافكار .. وقامت عن سرير اختها وقالت ــ فاطمة بتنخطب هالاسبوع ..ولازم ما تصير هالخطبة ..البنت راح ..... اسكتت المها شوي مب من مصلحتها تكشف افكارها ــ بتطير من يدنا وحاليا مافي بنت تناسب صالح اكثر منها ..