على رمال سيلين - الفصل 20 - بقلم غجرية - مكتملة | روايتك

كانت تكره شعور العاله .. كانت بنت عمها ترحب فيها وماحسستها انه مثقله عليها .. لكن طيبه كانت العكس تماما .. كانت تطالع لفاطمه كأنها ثقل . .فتمت فاطمه طول اليوم فالغرفه .. عطت أوراقها لعبدالرحيم علشان يدور لها على وظيفه .. في غرفتها تقرأ كتاب لقته في الصاله .. استغربت من يقرأ كتب ؟؟ . الكتاب انجلش ويتكلم عن الحرب لعالمية الاولى . ولأنها قوية في الانجليزي وتخصصها انجليزي عجبها الكتاب وتمت تقرأ بنهم .. في الصالة كانت طيبه وامها جالسين كانت طيبه حاسه بقهر ـ لين متى بتظل هذي هنا ؟ استغربت ام عبدالرحيم ـ هذي بنت خالي .. احترميها شوي . طيبه ـ يمه مب مرتاحه .. شفت عبدالرحيم شلون يطالع لها مايسوى علينا تخرب بيت اخوي البنت حلوة وبيتنا فيه شباب . ام عبدالرحيم ــ اي شباب مافي الا اخوج صالح وهذا هو مايدخل البيت من سنين الا الجمعه . وعبدالرحيم مب ياهل عشان تزيغ عينه وابوج ما اشتكى البنت يتيمه شتبين منها ؟ وبعدين ماتطلع من غرفتها الا ونقابها على وجهها . . طيبه ــ شجابها تضيق علينا البيت !! ام عبدالرحيم ــ البيت كبير ويوسع ثلاث عوايل .. لاتحسسينها انها عاله علينا ترى ماارضى خالي عزيز على قلبي الله يرحمه . طيبه ـ اوف يمه . احسها على جبدي !. الله يفكنا منها .. طالعتها ام عبدالرحيم معصبة ... وقامت لغرفتها .. ماتنكر ان نظرات عبدالرحيم ماكانت طبيعية للبنت .. وماقالت لأحد انه سألها عن عمرها . الشرع حلل اربع .. مافيها شي لو تزوج فاطمه .. البنت حلوة ومنها يسترون عليها بدل قعدتها في بيت ناس اغراب عنها .. مرت الغرفة دخلت بدون ماتطق الباب .. كانت فاطمه فارده شعرها الكستنائي على جتوفها وهي تقرأ الكتاب .. قالت ام عبدالرحيم برضا ـ لا إله الا الله .. ماشاء الله مزيونه مثل امج الله يرحمها .. قامت فاطمه وردت شعرها لورى . .وسكرت عيونها الناعسه بخجل ــ يا بنت عمتي والله تخجليني بهالكلام .. .. ام عبدالرحيم ــ ماقلت الا الحقيقة .. حسافه ان خالي ماتهنى فيج .. تزوج بآخر عمره ..الله يرحمه .. فاطمه ـ الله يرحمه .. ام عبدالرحيم ـ وشفيج غاديه عود ؟ .. ماتاكلين ؟؟ .. فاطمه ـ والله ا ام عبدالرحيم نفسي عايفه الأكل من زمان .. يالله قلاص الشاي وقطعه توست .. ام عبد الرحيم ــ يابنتي مب زين لج .. قومي تغدي وكلي لج يدام وصالونه .. فاطمه ـ تغديت يا ام عبدالرحيم .. مشكورة وخيرج سابق .. ام عبدالرحيم ـ براحتج يا يا بنت الخال .. اتركج تدرسين .. فاطمه ـ ماادرس .. اقرأ كتاب .. لقيته فالصاله .. اتوقع لطيبه ؟ . ام عبدالرحيم ـ لا .. طيبه وينها ووين الكتب .. تركت المدرسه من عمرها عشر سنين .. يمكن لصالح .. فاطمه ـ صالح ؟ .. ام عبدالرحيم ـ ايه .. اخو عيالي .. استغربت فاطمه بس ماحبت تسأل .. تركتها ام عبدالرحيم وطلعت . تمت تطالع الكتاب وتذكرت الشخص اللي استقبلها .. اكيد هذا صالح .. رجعت للكتاب وتمت تقرأ .. _______________________ كانت نوف تضحك مع ديمه اللي قلب ويهها احمر من الفلفل .. ــ اف اف .. نوف ــ والله مب حار وايد اوكي طعمه .. ديمه ــ انا مااتحمل الفلفل !! نوف ـ عيل ليش طلبتي هلابينو ؟ ديمه ـ مدحته رفيجتي لي انا اراويها عهوودوه .. ياويلي من الفلفل .. نوف ــ اشربي حليب .. تلاقين فالثلاجه . ديمه ــ شربت ماي .. نوف ــ معروف ان الماي يزيد الحراق .. اشربي حليب او سفن اب .. ترى الهنود كله يشربون سفن عقب الاكل عشان ماتتضرر معدتهم من الفلفل ,,, ديمه ـــ وين الحليب؟؟ نوف ـ في الثلاجه .. مراعي قليل الدسم الصغير .. فجت ديمه الثلاجه وتمت تضحك ــ عندج حليب فراوله ؟؟ حق اليهال !!. نوف ـ مافيها شي احب الحليب فراوله !!!.. ليه تضحكين ؟؟.. خذت ديمه واحد وقالت ــ وانا احبه بعد !!!.. بعد دقايق حس تديمه انها ارتاحت شوي وشفايفها بردت .. ــ السندويشه رووعه بس لولا الفلفل !!.. نوف ــ انا عجبتني .. بعتمدها من هارديز خلاص.. كانت ديمه تقلب بالريموت لما انفتح الباب بقوة .. كان منصور واقف معصب .. ابتسمت مرتبكه جدام ديمه ــ هلا .. راح لغرفته ومارد عليها .. وماتبعته تمت جنب ديمه ويدها ترتجف وهي ماسكه السندويش .. ديمه ـ روحي لريلج .. هزت نوف راسها بلا ــ لا عادي .. طلع شايل اغراض له وطالع لنوف ــ مالج قعده في هالبيت .. روحي بيت اهلج انتي طالق .. غصت ديمه لكن نوف تمت تطالعه منصدمه ... قالت تنقذ كبريائها وكانت مصدومه بقوة حاسه انها لو تحركت بتتحطم لمية جزء ــ طيب جات منك .. مابغيت .. طالع لها منصدم .. لفت ويهها واضطرت تمثل انها عادي وانها مب سائله فيه وحركت السندويش لفمها تبي تاكل لكنه دفعه من يدها وضربها على وجهها بقوة .. حسته يفرغ فيها ألم او كره او .. شي لأن ضرباته كانت قويه لين وقفته ديمه عند حده ..وحجزت بينهم .. ديمه ــ وكسر يدك ان شاء الله .. اطلع .. اطلع .. خذ اغراضه وطلع .. طالعت ديمه لنوف اللي تصلبت ملامحها وانحبست دموعها .. كانت تحس ببلاده مو طبيعيه .. ــ تعالي اجلسي خل نكمل سوالف ... انصدمت ديمه ــ نوف .. انتي بخير ؟؟ نوف ــ ايه .. ديمه لاتقولين لحد .. ديمه ــ انتي شتقولين ؟ طلقج يا نوف .. نوف ــ وانا بتم هنا لين تشفى جروحي . .. مابي ارجع بيت اخوي ذليله .. ومااتوقع انه بيرد قريب .. اخذ كل اغراضه اللي هنا .. وهذا بيت عمي .. مابيمانع اذا بقيت .. كان على ويهها كدمه بشعه .. وعينها متورمه .. وفي عيونها نظرة ضياع حست فيها ديمه ..كرهت اخوها منصور .. وخذت راس نوف وحطته في حضنها . وقالت ــ احس انا في حلم .. نوف ـ كابوس .. كانت دنيا نوف توقفت .. كانت عارفه انها بتسبب مشاكل بعايلتهم .. كانت تعرف ان اخوها راشد مابيسكت .. تنهدت بقوة كارهه حظها .. ابتسمت لديمه اللي شافت هالمشهد البشع .. ــ لاتحاتين .. الطلاق شيء كنت احلم فيه .. لاني مااعتبر نفسي عايشه مثل الناس .. وثقلت على حمد ومبارك .. ديمه ــ عيال عمج ومسؤولين عنج .. نوف ـ لا تحاتين .. انا الحين قراري بيدي .. فقررت ان مريم تمرني وتوصلني لدوامي .. قبل زوجي ماكان راضي وكنت خايفه من الله .. اني اعصي زوجي .. لكن الحين .. انا ملكه قراري..مابثقل عليهم ومريوم تعيش قريب ماياخذ منها الا خمس دقايق . . ديمه ــ ياقلبي و لله مفتشله من فعايل اخوي .. نوف ـ مب ذنبج يا حياتي .. لاتفتشلين .. احنا ربع . وبنات عم ماتفرقنا مثل هالامور .. مسحت ديمه بحنان على راس نوف .. وحست بدموع نوف المكتومه .. واحضنتها بقوة .. __________________ دخل منصور للغرفه .. كانت روز نايمه ولاداريه فالدنيا .. نام بقربها وتم يطالع ملامحها .. ـ انا لج .. انا زوجج انتي بس .. محد يشاركج فيني .. بتموتين وانا منصورج .. حبيبج .. مسح ويهها مب سائل في احد لانوف ولا ااي احد .. المهم روز . روز ــ حبيبي .. فتحت عيونها ــ وير ار يو ؟. ــ جنبج .. روز ــ ابي اروح انديا .. منصور ـ حجزت لنا تذكرتين .. بنروح باجر .. مسكت روز يده ورجعت نامت ..